1. Aha do na dilehon Debata tu naposona najolo asa boi margogo?

 JOTJOT do tajaha di Bibel taringot akka bawa na gogo jala na togu haporseaonna tu Jahowa. Alai nang pe nasida gogo, hea do nasida gale. Contohna Raja Daud. Hea do ibana “togu songon dolok”, alai hea do tong ibana “mabiar”. (Ps. 30:7) Songon i do tong si Simson. Tondi parbadia ni Jahowa do na mambahen ibana margogo. Jadi diboto ibana do molo dang alani tondi parbadia ni Jahowa, ‘gabe gale do ibana songon na asing’. (Pangh. 14:​5, 6; 16:17) Jadi margogo pe si Daud dohot si Simson, alana dilehon Jahowa do gogo tu nasida.

2. Boasa didok Apostel Paulus “tikki gale au, gabe margogo do au”? (2 Korint 12:​9, 10)

² Diboto Apostel Paulus do ikkon diurupi Jahowa do tong ibana asa boi margogo. (Jaha 2 Korint 12:​9, 10.) Songon godangan sian hita, si Paulus pe marsahit do. (Gal. 4:​13, 14) Ikkon berjuang do tong ibana lao mangulahon na sittong. (Rom 7:​18, 19) Jala sipata holsoan do ibana jala mabiar mamikkirhon aha na lao masa tu ibana. (2 Kor. 1:​8, 9) Alai nang pe gale si Paulus, boi do ibana gabe lam margogo. Boasa? Ala dilehon Jahowa do gogo tu si Paulus asa toktong martahan mangadopi akka sitaononna i.

3. Sukkun-sukkun aha do na lao tabahas di artikel on?

³ Marjanji do Jahowa tu hita, na lao lehononna do tong gogo tu hita. (1 Ptr. 5:10) Alai ikkon adong do upaya sian hita asa boi dapotta gogo na sian Jahowa. Dos ma i songon mobil. Asa boi mardalan mobil i, ikkon tapangolu do masinna. Dos songon i ma, rade do Jahowa mambahen hita margogo. Alai ikkon adong do upaya sian hita asa boi dapotta gogo na sian Jahowa. Jadi aha ma na diparade Jahowa lao mangurupi hita asa boi margogo? Jala aha ma na ikkon taulahon asa boi  dapotta gogo na sian Jahowa i? Lao mandapot alusna, tabahas ma jolo songon dia Jahowa mambahen Panurirang Jona, si Maria omak ni Jesus, dohot Apostel Paulus gabe margogo. Jala lao tabahas do muse songon dia Jahowa mambahen cara na sarupa asa boi margogo naposona saonari on.

4. Boha do carana asa dapotta gogo sian Jahowa?

⁴ Sada cara asa boi dapotta gogo sian Jahowa, i ma marhite tangiang. Songon dia do Jahowa mangalusi tangiangta? Dilehon Jahowa do tu hita gogo na ‘lobi sian gogo ni sahalak jolma’. (2 Kor. 4:7) Boi do muse hita dipatogu molo tajaha Bibel jala tarimangi isina. (Ps. 86:11) Alana “marhuaso” do Hata ni Debata na disurat di Bibel. (Heb. 4:12) Jadi molo taulahon i sude dapotta ma gogo asa boi hita toktong martahan, marlas ni roha, jala boi mangulahon tugas na borat. Saonari taida ma songon dia Jahowa mambahen Panurirang Jona gabe margogo.

5. Boasa porlu di si Jona gogo sian Jahowa?

⁵ Mabiar do si Jona mangulahon tugas na sian Jahowa. Alani i lao ma ibana markapal tu inganan na asing. Alai gabe naeng mate do ibana dohot akka halak na di kapal i alani badai. Disappatton halak na di kapal i ma si Jona. Dung i diboddutton dekke na balga ma ibana jala di bagasan butuha ni dekke i ma ibana. Boi ma tabayakkon songon dia perasaan ni si Jona tikki i. Olo do ra didok rohana mate nama ibana. Manang olo do ra didok rohana nungnga ditinggalhon Jahowa ibana. Pasti holsoan do roha ni si Jona tikki i. Alani i, porlu do di si Jona gogo na sian Jahowa.

6. Songon na disurat di Jona 2:​1, 2, 7, aha do na diulahon si Jona asa boi margogo tikki sahalakna di bagasan butuha ni dekke i?

⁶ Aha do na diulahon si Jona tikki sahalakna di bagasan butuha ni dekke i? Martangiang do ibana tu Jahowa. (Jaha Jona 2:​1, 2, 7.) Nang pe sanga ibana dang mangoloi Jahowa, alai olo do ibana muba jala pos do rohana pasti ditangihon Jahowa do tangiangna. Asing ni i, dirimangi si Jona do hata ni Debata. Sian dia taboto? Molo tajaha tangiangna na disurat di Jona bindu 2, godang do dipakke ibana hata na di bukku Psalmen. (Contohna, bandingkon ma Jona 2:​2, 5 tu Psalmen 69:1; 86:7.) Takkas do diboto si Jona akka ayat i. Jala i ma na paposhon rohana pasti diurupi Jahowa do ibana. Dung i dipalua Jahowa ma si Jona jala gabe rade ma ibana mangulahon tugas na sian Jahowa.—Jona 2:10–3:4.

7-8. Aha do na dibahen si Zhiming asa boi margogo ibana mangadopi sitaononna?

⁷ Teladan ni si Jona boi mangurupi hita mangadopi marragam sitaonon. Contohna donganta si Zhiming, b na sian Taiwan. Susa do ibana ala marsahit na posi. Asing ni i, dianiaya keluargana do ibana ala gabe sisomba Jahowa ibana. Nang pe songon i boi do ibana martahan mangadopi i sude ala dapotna gogo sian Jahowa marhite tangiang dohot belajar pribadi. Didok ibana, “Tikki ro masalah, olo do au holsoan jala dang boi au tenang tikki belajar pribadi.” Alai dang menyerah si Zhiming. Didok ibana do muse, “Martangiang do au tu Jahowa. Dung sae au martangiang, hupakke ma headset-hu lao mambege ende harajaon. Jala olo do au nenget mangendehon i sappe tenang huilala. Dung i baru pe au mulai pelajaran pribadi.”

⁸ Asing ni martangiang, boi do muse margogo si Zhiming ala belajar pribadi ibana. Contohna tikki baru operasi ibana, adong ma sahalak perawat na mandok ikkon transfusi darah ibana ala rendah hian jumlah ni sel  darah merahna. Alai di borngin andorang so operasi i, nungnga dijaha si Zhiming hian pengalaman ni sahalak donganta borua na mangadopi situasi na sarupa songon ibana. Urrendah do jumlah ni sel darah merah ni donganta borua i sian ibana. Alai dang olo donganta i manjalo transfusi darah jala boi do ibana malum. Pengalaman ni donganta i mangurupi si Zhiming asa toktong setia.

9. Molo nga loja dihilala hamu alani sitaononmuna, aha do na boi diulahon hamu? (Ida gambar.)

⁹ Hea do hamu gabe paholsohu alani sitaononmuna jala sappe dang diboto hamu aha sidokkononmuna tikki martangiang? Manang, hea do dihilala hamu nga palojahu hamu sappe dang tolap be lao belajar pribadi? Ingot ma takkas do diattusi Jahowa situasimuna. Jadi nang pe singkat tangiangmuna, pos ma rohamuna, pasti dilehon Jahowa do aha na dihaporluhon hamu. (Eps. 3:20) Molo maol hamu manjaha manang belajar pribadi ala marsahit hamu, palojahu, manang paholsohu, boi do dibege hamu rekaman audio ni Bibel manang rekaman audio ni publikasitta. Asing ni i, boi do dibege hamu akka endetta manang manotton video sian jw.org. Lomo do roha ni Jahowa mambahen hita margogo. Alani i, asa boi dapotta gogo na sian Jahowa i, martangiang ma hita tu Ibana jala talului ma alus ni tangiangta i sian Bibel dohot sian akka publikasitta.

10. Aha do na dibahen akka donganta lao mangurupi hita?

¹⁰ Boi do dipakke Jahowa akka dongan sahaporseaon lao mangurupi hita. Nasida ma na ‘patoguhon rohatta’ tikki adong masalahta, manang tikki dang sanggup hita mangulahon sada tugas. (Kol. 4:​10, 11) Porlu do di hita akka dongan tarlumobi “tikki masa sitaonon”. (Poda 17:17) Tikki gale hita, boi do akka donganta mangalehon akka na tahaporluhon, mangapuli rohatta, jala patoguhon hita asa toktong setia manomba Jahowa. Taida ma songon dia si Maria omak ni Jesus boi margogo ala diurupi na asing.

11. Boasa porlu di si Maria gogo sian Jahowa?

¹¹ Tabayakkon ma songon dia holso ni roha ni si Maria tikki dipaboa sada suru-suruan na  margoar si Gabriel na lao hamil ibana. Hape di tikki i dang muli dope ibana. Jala dang adong dope pengalamanna lao pagodang-godangkon dakdanak, hape ikkon dijaga ibana do sahalak dakdanak na lao gabe Messias. Asing ni i muse dang hea ibana mangulahon seks dohot si Josep. Jadi boha ma cara ni si Maria lao paboahon i sude tu si Josep? Jadi porlu do di si Maria gogo sian Jahowa.—Luk. 1:​26-33.

12. Songon na disurat di Lukas 1:​39-45, aha do na mambahen si Maria gabe margogo?

¹² Aha do na diulahon si Maria asa margogo ibana lao mangulahon tugas na borat on? Dipangido ibana do bantuan sian na asing. Misalna dipangido ibana do tu si Gabriel asa dipaboa gumodang hatorangan taringot tugasna i. (Luk. 1:34) Dang leleng dukkon i, lao ma si Maria tu “sada kota na di Juda na adong di dolok” manjuppangi si Elisabet keluargana. Balga do pengaruh ni i tu si Maria ala ro ibana tusi. Dipuji si Elisabet do si Maria jala marhite panogu-noguon ni Jahowa dipaboa si Elisabet do surirang na patoguhon taringot poso-poso na adong di rahim ni si Maria i. (Jaha Lukas 1:​39-45.) Gabe didok si Maria ma, “Dibahen [Jahowa] do akka ulaon na palongang roha marhite tanganna na gogo i.” (Luk. 1:​46-51) Takkas ma dipatogu Jahowa do roha ni si Maria marhite si Gabriel dohot si Elisabet.

13. Aha do hasilna ala olo si Dasuri mangido bantuan ni akka dongan?

¹³ Songon si Maria, hamu pe boi do margogo ala diurupi akka dongan sahaporseaon. Contohna donganta borua na margoar si Dasuri, na tinggal di Bolivia. Marsahit na parah do bapakna jala dang adong ubat ni sahitna i. Masuk rumah sakit ma bapakna jala lomo do roha ni si Dasuri mangurus bapakna sian nasa tolapna. (1 Tim. 5:4) Pasti dang mura mangulahon i. Didok ibana, “Sipata huhilala hira dang tolap be au mangulahon on.” Di mulana, dang dipangido ibana bantuan sian akka dongan. Didok ibana muse, “Gabe repot annon akka dongan alani au. Ninna rohakku, ‘Jahowa ma annon na mangurupi au jala mangalehon sude na huhaporluhon.’ Alai husadari ma ala mandao au sian akka dongan, hira na sahalakku do na berjuang mangatasi masalahki.” (Poda 18:1) Ujungna dibahen ibana ma surat tu piga-piga donganna jala dipaboa ma songon dia situasina. Hasilna didok ibana, “Dang tarhatahon au, gabe dipatogu do au alani akka dongan. Diboan nasida do sipanganon tu rumah sakit jala dipaboa nasida do akka ayat ni Bibel na boi patoguhon au. Gabe ninna rohakku ma, dang sahalakku hape. Sude do hita keluarga ni Jahowa. Jala akka dongan pe lomo do rohana mangurupi hita, mangalehon akka na porlu di hita, rap tangis dohot hita tikki susa, jala patoguhon hita asa toktong manomba Jahowa.”

14. Boasa porlu tajalo bantuan sian akka sintua?

¹⁴ Sada cara ni Jahowa mangalehon gogo tu hita, i ma marhite akka sintua. Silehon-lehon ni Debata do nasida lao patoguhon hita. (Jes. 32:​1, 2) Jadi molo holsoan hamu, paboa ma i tu akka sintua, jala unang ma maila manjalo bantuan sian nasida. Alana, nasida do na dipakke Jahowa lao mambahen hamu margogo.

15. Aha do harapan ni sude halak Kristen?

¹⁵ Janji ni Debata na dipaboa di Bibel mangurupi hita asa toktong margogo lao manomba Jahowa. (Rom 4:​3, 18-20) Di ari na naeng ro, boi do hita mangolu saleleng ni lelengna. Adong na lao mangolu di surgo jala adong do na lao mangolu di tano on. Harapanta i boi mangurupi hita toktong martahan mangadopi masalahta, lam semangat marbarita na uli, dohot mangulahon akka tugasta di  huria. (1 Tes. 1:3) Harapan on do tong na mambahen Apostel Paulus lam margogo.

16. Boasa porlu di si Paulus gogo sian Jahowa?

¹⁶ Di suratna tu halak Korint, dipatudos si Paulus do dirina songon hudon na sian tano liat. ‘Disosak do ibana’, ‘dibahen na haccit’, “didabuhon”, jala marsak do ibana. Sipata tarancam do ngoluna. (2 Kor. 4:​8-10) Disurat si Paulus do hatana i saleleng pardalanan utusan injilna na patoluhon. Jala, dung sae disurat ibana i godang nai dope sitaonon na lao adopanna. Godang do halak na menyerang, manakkup, manang pamasukkon ibana tu penjara. Jala hampir lonong do kapal na ditoppang si Paulus. Alani i, porlu do di si Paulus gogo sian Jahowa.

17. Songon na disurat di 2 Korint 4:​16-18, aha do na mambahen si Paulus margogo?

¹⁷ Ala toktong diingot si Paulus harapanna, gabe lam margogo do ibana mangadopi akka sitaononna. (Jaha 2 Korint 4:​16-18.) Didok ibana do tu halak Korint, ‘nang pe lam gale dagingna’, alai dang gabe metmet rohana alani i. Alana sai toktong do diingot ibana upa na lao jaloonna. Sada hasangapon na balga do i di si Paulus, ala boi do annon ibana mangolu salelengna di surgo. Dang sadia sitaononna i dibandingkon tu upa na lao jaloonna. Ala dirimangi ibana i sude, gabe ‘lam dipaimbaru do roha nang pikkiranna ganup ari’.

18. Aha do pengaruhna di si Tihomir dohot keluargana ala sai diingot nasida janji ni Debata?

¹⁸ Parrohahon ma pengalaman ni si Tihomir, sahalak donganta bawa di Bulgaria. Gabe margogo do ibana ala sai mangingot akka janji ni Debata di ari na naeng ro. Piga-piga taon naung salpu, mate ma anggina si Dravko alani kecelakaan. Gabe lungun hian ma roha ni si Tihomir alani i. Jadi asa tarapul ibana dohot keluargana, dibayakkon nasida ma songon dia annon haheheon i. Didok ibana, “Dibahas hami ma didia annon hami pajuppang dohot si Dravko, sipanganon aha na lao diloppa hami tu ibana, akka ise na lao diundang hami tu pesta lao menyambut ibana, jala aha na lao diceritahon hami taringot ari parpudi.”  Didok si Tihomir, ala sai diingot nasida janji ni Debata i, gabe boi ma nasida toktong martahan jala sabar paimahon Jahowa pahehehon anggina.

19. Boha do carana asa lam pos rohamuna tu janji ni Debata? (Ida gambar.)

¹⁹ Boha do carana asa lam pos rohamuna tu janji ni Debata? Misalna molo harapanmuna naeng mangolu saleleng ni lelengna di tano on, jaha jala rimangi ma aha na didok Bibel taringot Paradeiso. (Jes. 25:8; 32:​16-18) Bayakkon ma hamu mangolu disi. Akka aha do na diida hamu? Akka aha na dibege hamu? Jala songon dia pakkilalaanmuna? Asa mura dibayakkon hamu i sude, ida ma akka gambar na adong di publikasitta taringot Paradeiso. Manang, tonton ma video musik songon, Ro ma Paradeiso, Nungnga Tung Jonok Hian, manang Saut Janji ni Debata. Molo toktong dirimangi hamu akka janji ni Debata i, gabe hira ‘parsatokkinan ma dihilala hamu masalahmuna i jala dang borat’. (2 Kor. 4:17) Janji ni Debata i boi mambahen hamu toktong martahan mangadopi sitaononmuna.

20. Tikki gale hita, aha do na porlu taulahon asa margogo muse?

²⁰ Pos ma rohatta tikki gale hita, “lehonon ni Debata do gogo tu [hita]”. (Ps. 108:13) Nungnga diparade Jahowa sude na tahaporluhon asa boi hita margogo. Alani i martangiang ma hita tu Jahowa, jala belajar pribadi asa marhasil hita mangulahon sada tugas, martahan mangadopi sitaonon, jala toktong marlas ni roha. Tajalo ma bantuan sian akka dongan sahaporseaon, jala tabahen ma tikki lao mangarimangi janji ni Debata di ari na naeng ro. Molo taulahon i, gabe lam margogo ma hita “alani huaso ni Debata na massai balga i. Dung i boi ma [hita] martahan, sabar, jala marlas ni roha”.—Kol. 1:11.