1. Halía giñe meha san hasagarei lubúeingu Bungiu ha lánina binadu dan erei le hawagubei?

 LIIBE-AGEI dan ayanuhatu Bíbülia hawagu lubúeingu Bungiu ha úaraguabaña kei gürigia gabafutiña. Gama lumoun, íbini hátima hérebaña mama súnwandan hasandiragun houngua ítara. Kéiburi, anihein meha burí dan sandiguati urúei Dawidi lungua lau ganigi, ligía lariñagubei: “Derebugugüda bumutina lidan fulasu chóuruti lau bareini”, gama lumoun, lidan burí amu dan sandiguati lungua débili luma lau saragu anufudei (Sal. 30:7). Luéigiñe le aban oubaü, wéiriti meha erei le luágubei Sansón dan meha le líchuguni Heowá lani sífiri lun, lau sun lira subudi lumuti sin lan lubafu Bungiu aba lanme ledebilidun “kei furumiñeguarügü wügüri” (Ali. 14:​5, 6; 16:17). Halía giñe san hasagara lubúeingu Bungiu úaraguatiña ha erei? Lúmagiñe Heowá.

2. Ka uéigiñe lariñaga apostolu Pábulu débili lan ani here ligía? (2 Korintuna 12:​9, 10).

² Subudi lumuti meha giñe Pábulu megei lani ubafu le ñǘbuinbei lúmagiñe Heowá (aliiha huméi 2 Korintuna 12:​9, 10). Ítara kei saragu wádangiñe, gaturobuliti giñe meha apostolu Pábulu luma látuadi (Gal. 4:​13, 14). Lanwoun lira, áfaaguati meha lun ladügüni le buídubei (Rom. 7:​18, 19). Ani anihein dan nidiheri lan ani hanufudeti meha giñe leferidiruni libagari (2 Ko. 1:​8, 9). Íbini ítara ariñagati: “Lugundun dántima le débili nan, ábatima néredun”. Ida liña san katei le? Ladüga líchuguni Heowá erei le lemegeirubei lun, ítarati aba liabin lun aba lan gürigia gabafuti.

3. Kaba álügüdahani ounabúa lidan aturiahani le?

³ Füramaseti giñe Heowá ladügüba lan lun here wamá (1 Fe. 5:10). Gama lumoun, lun lasuseredun katei le siñati werederun chagu warüna. Samina wamá tuagu aban karü. Lun téibugun mégeitu aban máhina héreti. Lau sun lira madügünbei máhina lun téibaagun ugunei anhein madügün abugahati lun téibaagun. Ítara kei máhina le, gayaraati giñe líchuguni Heowá erei le wemegeirubei woun.  Gama lumoun, mosu wíchugun luéigiñe wóubadina. Ka ídemuei líchugubei Heowá woun lun here wamá? Ani ka lunbei wadügüni lun wasagarun saragu buiti lídangiñe? Lun wasubudiruni, ariha waméi ida liña lan líchugun Heowá erei lun profeta Honasi, tun María to lúguchu Hesusu luma lun apostolu Pábulu. Warihubei giñe adüga lani Heowá ligiaméme hawagu lubúeingu uguñe weyu.

4. Ka gayaraabei wadügüni lun weresibiruni erei le ñǘbuinbei lúmagiñe Heowá?

⁴ Aban lídangiñe katei le gayara wabéi adüga lun weresibiruni erei le ñǘbuinbei lúmagiñe Heowá, wafurieidun lun. Óunaba lumuti wafurieidun lau líchuguni “óunwenbu ubafu le wawagubei” (2 Ko. 4:7). Buídubei giñe wadüga ánhawa aliihoun lererun luma wararamagun asaminara luagu le waliihabei tídangiñe (Sal. 86:11). Ariñagati woun tidan Lererun winwan tan ani “gabafu tuguya” (Ebü. 4:12). Ligíati, danme le bafurieidun lun Heowá ani aliihaboun Lererun, beresibirubei erei le bemegeirubei lun gayara lan bawanduni, lénrengunga le lunbei liabin luma lun bakipuragun bungua gúndaañu lidan bagunfulirun lau dasi le hénrengubei. Ariha waméi ida liña lan líchugun Heowá erei lun profeta Honasi.

5. Ka uagu megei lubéi meha Honasi erei?

⁵ Mégeiti meha Honasi erei. Rúhali meha Heowá aban dasi lun lun ladügüni. Gama lumoun, kei hanufude lan lagunfulirun lau dasi ligía, aba lanurahan, aba ládinun tidoun aban waporu lun lidin lidoun amu fulasu. Kei le aubei warihei, ligía hama sun ha aweiyasuhabaña úara luma hóunwegua yebe lidan aban lanarime durumandei. Dan le hágurun baali mandulugu, aba lidin adagara lidan aban fulasu búrigati ani hanufunati: lurageirugu aban óunwenbu udu. Ida liña san lasandiragun Honasi lungua? Saminati funa san lounwen lan ñein? Saminati funa san rula lan Heowá lanagan luagun? Meberesenga ka lan lasaminarubei, chóuruti sandí lan aban lanarime anufudei.

6. Ka íchugubei erei lun Honasi dan le lurageirugu lubéi aban óunwenbu udu? (Honasi 2:​1, 2, 7).

⁶ Ka ladügübei Honasi lun lárügüdün erei lurageirugu óunwenbu udu ligía? Lúmagiñe lurageirugugiñe animaalu ligía aba lafurieidun lun Heowá (aliiha huméi Honasi 2:​1, 2, 7). Íbini subudi lan lun Honasi arufudaali lan maganbadi lun Heowá, subudi lumuti giñe luagu laganbubei lan Heowá lafurieidun le ladügübei lau saragu ǘnabuguni, lugundun asakürihaali tídangiñe sun lanigi. Lanwoun lira, ráramaguati asaminara luagu le tariñagubei Lererun Bungiu. Ida liña wasubudiruni? Lugundun lidan furíei le ladügübei, le adarirubei lidan kapítulu 2 tidan liliburun, yúsuti Honasi saragu dimurei lídangiñe dimurei burí le lídanbei Sálumu (kei hénpulu, ariha huméi giñe Honasi 2:​2, 5 luma Sálumu 69:1; 86:7). Arihúati subudi lan burí bérusu le lun Honasi buidu buidu. Ani kei ráramagua lubéi asaminara luagun dan le lásügürünbei lídangiñe sügǘ hénrenguti ligía, ligía lafiñerubei luagu líderagubei lan Heowá. Lárigiñe, dan le múarugu hali, aranseeli meha lun lánharun luma lun lagunfulirun lau lidasin (Hon. 2:10–3:4).

7, 8. Ka íderagubalin aban íbiri lun here lan dan le lagagibudagunbei luma lénrengunga?

⁷ Gayaraati líderaguniwa lani Honasi hénpulu dan le wásügürün lídangiñe lénrengunga. Samina wamá luagu aban íbiri le awinwandubei Taiwán le gíribei Zhiming. b Sándiñein, lanwoun lira, híchuguña meha liduheñu lidere dan lun ladüga leseriwidun lun Heowá. Ida liña libihini erei le ñǘbuinbei lúmagiñe Heowá? Lau lafurieidun luma lau laturiahan. Ariñagati: “Anihein dan, dan le ñein lan turobuli, sandiguatina nungua lau idiheri adügati lira lun hénrengu lan nun nagalumarun lun gayaraabei lan naturiahan nábuguarügü”. Lau sun lira, mábürühanti larüna. Ariñagayati: “Furumiñeti katei le nadügübei, nafurieidun lun Heowá. Lárigiñe, aba naganbahan fiu uremu le lánina lalawahóun Heowá. Anihein  dan aba neremuhani hámaru darí lun darangilu lan nasandiragun nungua. Lárigiñe ábati nagumeserun aturiaha”.

⁸ Le lafurendeirubei Zhiming lidan laturiahan lábuguarügü ruti erei lun lidan dan le lemegeirubalin. Luagu aban dan, dan le lóuchadaguña lan lárigiñe aban lanarime ibugúni, aba tariñagun aban anosuhatu lun rariha lan lani glóbulos rojos ani megei lan libihin hitaü. Gama lumoun, guñoun lubaragiñe libugúnua aliihali meha tuagu aban íbiri to meha ásügürüboun lídangiñe le lásügürübei. Hanarimeti meha lǘnabun tani íbiri tuguya glóbulos rojos luéi lani, gama lumoun, máhatu meha líchuguniwa hitaü tuagu ani areidaguatu. Lau laliihani Zhiming sügǘ le ruti erei lun, lun úaragua lan.

9. Ka gayaraabei hadügüni anhein adüga lubéi somu óuchawaguni lun mere humá? (Ariha humoun giñe iyawaü).

⁹ Dan le hásügürün lídangiñe aban óuchawaguni, anihein san dan hasandiragun hungua lau idiheri darí lun hénrengu lan hun hafurieidun? O genegeti san hun mere humá lun haturiahan? Haritagua huméi gunfuranda lani Heowá buidu buidu le hásügürübei. Ligíati, íbini ñüraü lan furíei le hadügübei, chouru huméi líchugubei lan Heowá létima hemegeirubei hun (Efe. 3:20). Anhein anihein lubéi gáriti huagu o wuriba lan hasandiragun hungua ani adügati katei le lun siñá lan haliihan ni haturiahan, buídubei lun híchugunu Bíbülia to aganbahóuarügütu o haganbahanu wani agumeiraguagüdüni. Ábaya katei le gayaraabei líderagunün híchuguni fiu lídangiñe uremu le wámabei o bidéu le lídanbei wani páhina jw.org. Dan le hafurieidun lun Heowá ani áluaha huméi lóunabagüle furíei le hadügübei lidan idewesei le líchugubei hun, ítara liña kamá hamuga hariñaguña lun “Bungiu Núguchi ruba erei nun”.

10. Ida liña híchugun íbirigu erei woun?

¹⁰ Gayaraati layusuruniña Heowá íbirigu lun híchugun erei woun. Dan le wásügürüña lan lídangiñe somu lénrengunga o wáfaaguña lan lun wagunfulirun lau aban dasi, gayaraati ítara hamá woun “kei aban óunwenbu dǘgüdaguaü” (Kol. 4:​10, 11). “Lidan lidaani idiheri” ligíatima wemegeiruniña wamadagu (Ari. 17:17). Ánhawa asandira débili wamá, gayaraati híchuguni íbirigu le wemegeirubei woun, gurasu luma dǘgüdaguaü lun wasigirun eseriwida lun Heowá. Warihaali ida liña lan teresibirun María, to lúguchu Hesusu ídemuei.

11. Ka uagu megei tubéi meha María saragu erei?

 ¹¹ Mégeitu meha María erei lun gayaraabei lan tagunfulirun lau lugundan Heowá. Chóuruti sandí tan saragu idiheri dan le lariñagunbei ánheli Gabüriéli tun dageinañoun lan íbini mámarigiru lan meha. Ibidiñegili meha hagüriahóuniwa irahüñü tun ladüga marahüñügiru meha, gama lumoun, tuguyaba meha agüriahei le lunbei Mesíasi lan dan ligía. Kei marourugiru lan meha luma ni aban wügüri lidan tibagari, ida lubati tafuranguagüdüni María lun Hosé le tadari dageinañoun lan (Luk. 1:​26-33).

12. Según Lúkasi 1:​39-45, ida liña teresibiruni María erei le temegeirubei?

¹² Ida liña teresibirun María erei lun tagunfulirun lau aban dasi wéiriti, espechaliti ani hénrenguti kei le? Amuriahatu ídemuei hama amu. Kei hénpulu, aba tariñagun lun Gabüriéli lun líchugun lanwoun ariñahani tun luáguti dasi le líchugubei Heowá tun (Luk. 1:34). Fiu dan lárigiñe, aba tadügün María aba limigifen wéiyaasu “lidoun aban uburugu le labadinaguabei burí wübü Hudéa” lun tidin bisidoun Isawéli to tiduhe. Buiti lidin tun María lidan bisida ligía! Ariñagatu Isawéli tun María biní laru lan Bungiu lau lídehan sífiri sandu, ariñagatu giñe Isawéli aban profesía le íchugubei gurasu luáguti irahü le lunbei tagaraüdüni María (aliiha huméi Lúkasi 1:​39-45). Aba tariñagun María luagu Heowá: “Adügaali óunwenbu burí katei lau lubafu” (Luk. 1:​46-51). Yusu lumuti Heowá ánheli Gabüriéli tuma Isawéli lun híchugun gurasu tun María.

13. Ka asuseredubei dan le tamuriahanbei Dasurí ídemuei hama íbirigu?

¹³ Ítara kei lidan tikesin María, gayaraati giñe híchugun amu lubúeingu Bungiu ha úaraguatiña erei le hemegeirubei hun. Ariha waméi tani aban íbiri to awinwanduboun Boliwia to gíriboun Dasurí hénpulu. Aba ladarirun aban sandi máraninati luagu túguchi aba lebelurun háspitalirugun. Kei aban isaani buitu busentu meha terederun lurugabu túguchi lun tóunigiruni buidu buidu (1 Tim. 5:4). Subudi tumuti aban lan dasi hénrenguti le. Ariñagatu: “Saragu wéiyaasu nasandiragun nungua luagu siñá lan nun”. Furumiñe mamuriahantu ídemuei. Ka uagu? Ariñagatu Dasurí: “Mabusenruntina lun aban nan ihürügu houn íbirigu. Aba tariñagun túniwagua: ‘Heowaba íderaguana’. Gama lumoun, aba níchugun fe dan lan nadisedun hawéi amu le lan lúgubu nahandilihañéin lan turobuli le nábuguarügü” (Ari. 18:1). Aba tanúadirun Dasurí tabürühan houn fiu tumadagu lun tafuranguagüdüni houn ka lan gádanbarun. Aba tasigirun ariñaga: “Úati dimurei lun nariñaguni luagu lueirin ídemuei luma erei le híchugubei níbirigu nun. Barütiña éigini nun háspitalirugun ani ayanuhatiña giñe nun luagu burí bérusu tídangiñeti Bíbülia. Ma lubuidun nasandiragun nungua lau mama lan nábuguarügüñadina! Hádangiñetiwa iduheñu ha Heowabei háguchi, iduheñu ha aransebaña lun híderagunibu lidan le bemegeirubei, ayahuatiña buma ani rútiña gurasu bun lun basigirun eseriwida lun Heowá úara hama”.

14. Ka uagu mosu lubéi wánharun lun ídemuei le híchugubei wéiyaaña lidan afiñeni woun?

¹⁴ Yusu lumutiña giñe Heowá wéiyaaña lidan afiñeni lun híchugun erei woun. Ítara haña woun kei aban idewesei ha líchugubaña Heowá woun lun hederebudagüdüni wafiñen luma lun híchugun gurasu woun (Isa. 32:​1, 2). Ligíati, ayanuha humá hama dan le nidiheri humá luagu somu katei. Ani anha humá lun ídemuei le híchugubei wéiyaaña lidan afiñeni hun. Ladüga layusuruñanu Heowá lun híchugun erei hun.

15. Ka lubuidun emenigini wámabei wagía kristiánugu?

¹⁵ Buíngüda lumutiwa emenigini le tíchugubei Bíbülia lau erei (Rom. 4:​3, 18-20). Sun kristiánugu anihein lubuidun emenigini wamá lun wawinwandun lun súnwandan, sielu lan yebe o ya lan yebe Ubouagu lidan aban paraísu. Seremei emenigini le, here wabéi lun gayaraabei lan wawanduni óuchawaguni, lun gayara lan wapurichihani uganu buiti luma lun wagunfulirun lau wadasin  lidan damuriguaü (1 Tesa. 1:3). Ariha waméi ida liña lan ladügün emenigini le lun lederebugudun lafiñen apostolu Pábulu.

16. Ka meha uagu megei lubéi apostolu Pábulu erei?

¹⁶ Mégeiti meha Pábulu erei. Ariñagati tidan gárada to labürüdüboun houn korintuna débili lan ani ítara liña lan kei aban ágeidinaü le lauti múa. Abahüdahati luagu éibaahoua lan buleseiwa ligía, ani anihein lan dan sandí lan machouruni. Anihein burí dan ítagaraü yebe lounwen (2 Ko. 4:​8-10). Abürüha lumuti sun le lidan lǘrüwan luéiyasun kei misionéru. Chóuruti ibidiñe lan lun lagurabahañein lan saragu turobuli lidan meha dan ligía. Dan lárigiñe, lídanmeme wéiyaasu ligía, aba hábürühan saragu gürigia luagun lau furundei, aba hárügüdüni ani ítagaraü yebe giñe lounwen dan le tabuluchun waporu lau, lagumuhóun aba ladaürün.

17. Según 2 Korintuna 4:​16-18, ka íchugubei erei lun Pábulu lun gayaraabei lan lawanduni óuchawaguni?

¹⁷ Ka íchugubei erei lun Pábulu lun lawandun? Lau letenirun lun lemenigin (aliiha huméi 2 Korintuna 4:​16-18). Aba lariñagun Pábulu houn íbirigu ha korintubaña, íbini “agumuchagueina” liña lan lúgubu murusun murusun, meferidirun lumuti lugundan. Aba letenirun lun ibagari le lunbei libihini ámuñegü. Espechaliti meha lun apostolu Pábulu emenigini lun lawinwandun sielu, ítara liña meha lun kei “uéiriguni le magumuchaditi […]; wéiriti ani gíbetimati”. Ani aranseñu liña meha lun lawandun furumiñeguarügü katei lun gayaraabei lan libihini lafayeiruaha. Ráramaguati meha Pábulu asaminara luagu emenigini le ani lau ladügüni katei le aba lasandirun iseridagueina liña lan sagü weyu.

18. Ida liña lederebudagüdüni emenigini Tíjomir hau sun liduheñu?

¹⁸ Ruti emenigini erei lun aban íbiri le awinwandubei Bulgaria le gíriti Tíjomir. Fiu irumu guentó, aba lounwen lamulen, le meha gíribei Zdravko, lidan aban danaguaü. Wéiriti igarigu le lasandirubei Tíjomir lau lounwen lamulen. Kati íchugubei gurasu lun luma houn liduheñu lun gayaraabei lan hawanduni igarigu le? Lau hasaminarun luagu águyuguni. Afuranguagüdati: “Kei hénpulu, ayanuhatiwa halíaba lan weresibirei Zdravko, kaba lan éigini wáboungua, kaba lan burí giñe gürigia wamisuraha danme le wadügüni fedu lánina buiti  achülürüni lúmati wabahüdaguni lun le asuseredubei lidan lagumuhóun dan le, le marihin lubéi”. Ariñagati Tíjomir lau lan hetenirun lun emenigini le, ru lan erei lun luma houn liduheñu lun hasigirun awanda luma lun hagurabuni weyu le lunbei láguyuguagüdüni Heowá lamulen.

19. Ka gayaraabei hadügüni lun hederebudagüdüni hemenigin? (Ariha huméi giñe dibuhu).

¹⁹ Ka gayaraabei hadügüni lun hederebudagüdüni hemenigin? Anhein hemenigi hubéi hawinwandun lun súnwandan ya Ubouagu, aliiha huméi le tariñagubei Bíbülia luagu Paraísu ani samina humá ñéinñadün lan (Isa. 25:8; 32:​16-18). Samina humá luagu ida luba lan ibagari lidan iseri ubóu. Aríaguatün san hungua ñein? Ka harihubei? Ka haganbubei? Ka hasandirubei? Iyawaü luáguti Paraísu to áfuachuboun tidan agumeiraguagüdüni tíderagubadün lun hasaminarun luagu. Gayaraati giñe harihini bidéu lánina uremu kéiburi, Wagurabuñein iseri ubóu, Yarafaali o Nadiraaruñein sun nibagari. Anhein hechu wabéi asaminara luagu ida luba lan ibagari lidan iseri ubóu, ladügüba katei le lun warihini lénrengunga kei aban katei le “mahürüti ani fureseti lásügürün” (2 Ko. 4:17). Emenigini le líchugubei Heowá ladügüba hun lun here humá.

20. Halíagiñeba wasagara erei, íbini dan le débili lan wasandiragun woungua?

²⁰ “Lau lídehan Bungiu, wadügüba katei wéinamuburiti” íbini dan le débili lan wasandiragun woungua (Sal. 108:13). Ru laali Heowá sun le wemegeirubei woun lun here wamá. Ligíati, danme le hasandirun hénrengu lan hun hagunfulirun lau somu dasi le íchugubei hun, hénrengu lan hun lun hawandun aban óuchawaguni o hasigirun eseriwida lun Heowá lau ugundani, furíei humá lun tídangiñe sun hanigi ani aturiaha humóun Bíbülia lun ladundehanün. Lanwoun lira, anha humá lun ídemuei le híchugubei íbirigu hun, ani kipu huméi emenigini le wínwanñu. Ligíati, “lau lueirin lubafu” Heowá, líchuguba erei hun “lun gayara lan hawanduni sun katei lau saragu gurasu luma ugundani” (Kol. 1:11).