1. Paquemodo el Dios ya hace fuerte con el de suyu maga siervo de antes?

 MANADA beses el Palabra del Dios ta habla que fuerte el maga fiel hombre. Pero maskin pa el de con todo mafuerza kanila gendeh pirmi ta sinti fuerte. Por ejemplo na cuanto ocasion, ya sinti si Rey David que “fuerte [le] igual na un monte” pero na otro maga ocasion “ya tiene [le] miedo.” (Sal. 30:7) El espiritu del Dios ya hace con Samson bien mafuerza. Pero sabe si Samson que si nuay el poder que estaba con Dios, “hay perde el [de suyu] fuerza y hay queda [le] igual na maga ordinario hombre.” (Juez 14:5, 6; 16:17) Mafuerza lang este maga fiel hombre cay ya dale kanila poder si Jehova.

2. Porque ya habla si apostol Pablo que maluya le pero mafuerza? (2 Corinto 12:9, 10)

² Sabe tambien si apostol Pablo que necesita le el poder estaba con Jehova. (Le con el 2 Corinto 12:9, 10.) Igual na manada kanaton, ya enfrenta si Pablo maga problema na salud. (Gal. 4:13, 14) Tiene maga tiempo, yan dificil tambien le hace si cosa el justo. (Roma 7:18, 19) Y ya sinti le lingasa y ya tiene miedo si cosa posible sucede con ele. (2 Cor. 1:8, 9) Pero cada vez tan luya si Pablo, ta queda le mafuerza. Paquemodo? Ya dale si Jehova con Pablo el poder que necesita le. Ya hace le fuerte con Pablo.

3. Cosa maga pregunta kita hay contesta na este articulo?

³ Ya promete si Jehova que hace tambien le fuerte kanaton. (1 Ped. 5:10) Pero, gendeh kita puede expecta que puede kita ricibi ese ayuda si gendeh kita hace esfuerzo. Para ilustra: El maquina el ta causa para corre el coche. Pero, necesita anay pisa el driver con el accelerator para move este. Na igual manera, preparao si Jehova dale el fuerza que necesita kita. Pero, debe kita hace maga manera para puede ricibi con ese. Cosa si Jehova  ya dale para hace kanaton fuerte? Y cosa kita debe hace para puede ricibi con ese ayuda? Hay sabe kita con el maga contestacion de ese si considera kita si paquemodo si Jehova ya hace fuerte con el tres caracter na Biblia—si profeta Jonas, si Maria, el nana de Jesus, y si apostol Pablo. Hay mira tambien kita si paquemodo si Jehova ta continua hace fuerte con el de suyu maga siervo ahora na igual manera.

4. Paquemodo kita puede ricibi el ayuda de Jehova?

⁴ El un manera que puede kita ricibi el ayuda de Jehova amo si atraca kita con ele na rezo. Si hace kita se, hay ricibi kita el “grande poder [que] ta sale con el Dios.” (2 Cor. 4:7) Hay queda tambien kita fuerte si le kita con el de suyu Palabra y medita con ese. (Sal. 86:11) “Bien poderoso” el mensaje de Jehova que puede kita le na Biblia. (Heb. 4:12, El Nuevo Testamento) Si reza tu con Jehova y le con el de suyu Palabra, hay tene tu el fuerza que necesita tu para puede aguanta, mentena con el de tuyu alegria o cumpli con el un dificil assignment. Nota si paquemodo si Jehova ya hace fuerte con profeta Jonas.

5. Porque necesita fuerza si profeta Jonas?

⁵ Yan luya si profeta Jonas y necesita le fuerza. Ya escapa le na un bien dificil assignment que ya dale con ele si Jehova. Como resulta, cerca ya era le muri na un fuerte tifun y ya pone le na peligro con el vida del de suyu maga uban na barco. Cuando ya buta con ele na mar, ya traga con ele el un grande pescao. Si Jonas ya guinda na un bien iscuru lugar—na barriga del un grande pescao. Cosa gaha ya sinti si Jonas? Ya pensa ba le que hay muri le alla? Posible ba que ya sinti le que ya abandona con ele si Jehova? Posible, ya sinti gayot bien malingasa si Jonas.

6. Base na Jonas 2:1, 2, 7, cosa ya hace fuerte con Jonas mientras talla le na barriga del grande pescao?

⁶ Cosa ya hace si Jonas para ricibi el fuerza mientras solo le na aquel iscuru lugar? Ya reza le con Jehova. (Le con el Jonas 2:1, 2, b 7. c) Maskin pa ya desobedece le con Jehova, ya arripinti le y tiene le fe que hay oi si Jehova con el de suyu rezo. Ya pensa tambien si Jonas con el maga texto que ya puede ele le de antes. Porque kita se puede habla? Na de suyu rezo que escribido na Jonas capitulo 2, ya usa le manada palabra y frase que igual na cosa puede incuntra na libro de Salmo. (Por ejemplo, compara con el Jonas 2:2, 5 na Salmo 69:1; 86:7.) Claro que bien familiar gayot si Jonas con ese maga texto. Y cay ya medita le con ese durante aquel dificil situacion, ya tiene le el asiguranza que ayuda con ele si Jehova. Ya salva con ele si Jehova y na uliji, preparao ya le hace con el assignment que ya dale con ele.—Jon. 2:10–3:4.

7-8. Paquemodo el un hermano na Taiwan ya queda fuerte para enfrenta con el de suyu maga dificultad?

⁷ El ejemplo de Jonas puede ayuda kanaton si ta enfrenta kita maga dificultad. Por ejemplo, si Zhiming, d un hermano na Taiwan, ta sufri por causa na de suyu enfermedad. Puera con ese, ta maltrata con ele el de suyu familia por causa na de suyu fe con Jehova. Ta queda le fuerte por medio na rezo y estudiada. “Tiene vez, si ta tiene problema,” ele ya admiti, “ta queda yo bien malingasa y ta sinti yo que gendeh mas yo puede hace con el de mio personal estudiada.” Pero, ta continua le confia na  ayuda de Jehova. “Una, ta reza yo con Jehova,” ya habla le. “Despues, ta saca yo con el de mio earphone y ta oi con el diaton maga Kingdom song. Tiene tiempo, ta canta pa gane yo con ese na hinay voz hasta calma yo. Despues, ta principia ya yo estudia.”

⁸ Por medio na personal estudiada, ya queda fuerte si Zhiming na manera que nuay le expecta. Por ejemplo, despues del de suyu operacion, ya habla con ele el un nurse que necesita con ele abona sangre cay bajo el colorao celula na de suyu sangre. Na noche antes el de suyu operacion, ya le si Zhiming acerca na un hermana con quien ya opera tambien. Mas bajo el colorao celula na sangre de ese hermana contra con ele. Maskin pa ansina, nuay acepta el hermana que abona sangre con ele y ya queda le bueno. Ese experiencia ya anima con Zhiming que esta fiel.

9. Si tan lingasa tu por causa na un dificultad, cosa tu puede hace? (Mira tambien con el maga letrato.)

⁹ Si ta experiencia tu un dificultad, ta queda ba tu bien malingasa que gendeh mas tu ta puede reza con Jehova? O ta sinti ba tu bien maluya que gendeh mas tu ta puede estudia? Acorda que ta entende gayot si Jehova con el de tuyu situacion. Poreso maskin simple lang el de tuyu rezo, puede tu asigura que hay dale le contigo el cosa gayot tu necesita. (Ef. 3:20) Si tan dificil tu le y estudia cay enfermo tu, cansao o bien malingasa, puede tu oi maga audio recording de Biblia o del diaton maga publicacion. Puede tambien ayuda contigo si oi tu con el uno del diaton maga cancion o mira un video na jw.org. Si reza tu con Jehova y busca con el de suyu contestacion na maga espiritual provision que ya dale le, ta permiti tu con ele que hace contigo fuerte.

10. Paquemodo ta hace fuerte kanaton el diaton maga hermano y hermana?

¹⁰ Puede usa si Jehova con el maga hermano y hermana na congregacion para hace fuerte kanaton. “Grande el consuelo” o comforta que puede sila dale si ta enfrenta kita un dificultad o si tan dificil kita cumpli con el un assignment. (Col. 4:10, 11) Necesita kita maga amigo o amiga especialmente na “tiempo de dificultad.” (Prov. 17:17) Si ta sinti kita luya, el diaton  maga hermano y hermana puede dale el diaton maga necesidad, dale comforta kanaton y anima kanaton que esta fiel con Jehova. Considera si paquemodo si Maria, el nana de Jesus, ya ricibi el fuerza que ta necesita le.

11. Porque necesita fuerza si Maria?

¹¹ Ta necesita fuerza si Maria para hace con el voluntad de Jehova. Pensa si cosa le ya sinti despues ricibi un dificil assignment estaba na un angel que si Gabriel. Gendeh pa le casao; pero, hay queda le priñada. Nuay le experiencia si paquemodo hace engranda anak pero necesita le cuida con el un bata quien queda el Mesias. Y ciendo nuay pa le tene sexual relacion, paquemodo este explica si Maria con Jose con quien hay casa pa lang le?—Luc. 1:26-33.

12. Asegun na Lucas 1:39-45, paquemodo si Maria ya ricibi el fuerza que ta necesita le?

¹² Paquemodo ya tiene fuerza si Maria para cumpli con este un dificil assignment? Ya pidi le ayuda con otro. Por ejemplo, ya pidi le mas informacion con Gabriel acerca con el de suyu assignment. (Luc. 1:34) Despues del cuanto tiempo, ya viaja le para na Juda—un “lugar donde tiene mucho maga monte”—para visita con el de suyu pariente que si Elisabet. Ya tiene buen resulta el de suyu viaje. Ya comenda si Elisabet con Maria y ya guia con ele si Jehova para dale un bonito profecia acerca na anak de Maria que nuay pa nace. (Le con el Lucas 1:39-45.) Ya habla si Maria que “ya dale [si Jehova] mira el disuyo poder.” (Luc. 1:46-51) Por medio con Gabriel y Elisabet, ya hace fuerte si Jehova con Maria.

13. Paquemodo ya beneficia el un hermana na Bolivia cay ya pidi le ayuda con el maga hermano y hermana?

¹³ Igual con Maria, puede tambien tu ricibi fuerza estaba na maga hermano y hermana. Si Dasuri, un hermana na Bolivia, ta necesita ese fuerza. Cuando ya tiene un grabe enfermedad el de suyu tata y yan hospital, quierre si Dasuri que ele el cuida con el de suyu tata. (1 Tim. 5:4) Gendeh quel pirmi facil. “Manada beses ya sinti yo que gendeh mas yo puede continua,” ya admiti le. Del una, nuay le pidi ayuda con otro. “No quierre yo destorba con el maga hermano y hermana,” ele ya explica. “Ya pensa yo, ‘Si Jehova el quien dale conmigo el ayuda que ta necesita yo.’ Pero na uliji, ya realiza yo que si ta hace yo separta con el de mio mismo cuerpo con otro, ta pricura yo solva con el de mio problema solo-solo.” (Prov. 18:1) Ya decidi si Dasuri que escribi carta con el cuanto del de suyu maga amigo y amiga, y explica el de suyu situacion. “Tormento explica si paquemodo ya hace fuerte conmigo el de mio maga amable hermano y hermana,” ele ya habla. “Ya lleva sila maga comida na hospital y ya le conmigo maga versiculo na Biblia que ta dale gayot conmigo comforta. Bien bonito gayot para pensa que gendeh kita solo. Parte kita na grande familia de Jehova—un familia quien preparao ayuda contigo, llura junto contigo y anima contigo que continua sirvi con Jehova.”

14. Porque debe kita acepta ayuda na maga anciano?

¹⁴ El un manera que ta dale kanaton fuerza si Jehova amo por medio na maga anciano. Maga regalo sila que ta usa le para hace fuerte y anima kanaton. (Isa. 32:1, 2) Poreso si ta sinti tu lingasa, puede tu se habla na maga anciano. Acepta con el ayuda que ta ofrece sila. Por medio kanila, puede si Jehova hace fuerte contigo.

15. Cosa esperanza tiene el todo Cristiano?

¹⁵ El diaton esperanza que base na Biblia puede dale kanaton fuerza. (Roma 4:3, 18-20) Como maga Cristiano, tiene kita el esperanza que vivi hasta para cuando—na un paraiso tierra o na cielo. El diaton esperanza ta dale  fuerza kanaton para aguanta na maga dificultad, predica con el buen noticia y cumpli con el diferente assignment na congregacion. (1 Tes. 1:3) Ese mismo esperanza el ya dale fuerza con apostol Pablo.

16. Porque necesita fuerza si apostol Pablo?

¹⁶ Ya necesita fuerza si Pablo. Na de suyu carta na maga de Corinto, ya compara le con el de suyu mismo cuerpo na un tinaja de lodo pandayan. Ya habla le que “mucho el [de suyu] maga tormento,” “persiguido” le, “gulpiao y tumbao.” Tiene pa gane maga tiempo que na peligro el de suyu vida. (2 Cor. 4:8-10) Ya escribi si Pablo con ese maga palabra durante el de suyu ika-tres viaje como un misionario. Y despues le escribi con ese maga palabra, ya enfrenta le mas manada dificultad. Ya gulpia con ele el maga gente, ya arresta con ele, ya sumi el barco onde le ta munta y ya pone con ele na preso.

17. Asegun na 2 Corinto 4:16-18, cosa ya dale fuerza con Pablo para aguanta na maga dificultad?

¹⁷ Si Pablo ya tiene el fuerza para aguanta cay yan focus le na de suyu esperanza. (Le con el 2 Corinto 4:16-18.) Ya habla le con el maga de Corinto que “maskin el [de suyu] cuerpo ta principia ya perde el fuerza,” gendeh le permiti con ese que hace luya con ele. Yan focus si Pablo na de suyu futuro. El de suyu esperanza que vivi hasta para cuando na cielo amo “un gloria que . . . grande gayot.” Para con ele, bien especial ese esperanza poreso preparao le aguanta na maskin cosa dificultad para puede obtene con ese premio. Ya medita si Pablo con ese esperanza y como resulta, ya sinti le que “el [de suyu] espiritu ta queda mas nuevo cada dia.”

18. Paquemodo el esperanza ya hace fuerte con Tihomir y con el de suyu familia?

¹⁸ Si Tihomir, un hermano na Bulgaria, ya tiene el fuerza por causa na de suyu esperanza. Cuanto año ya el ya pasa, el de suyu menor hermano que si Zdravko ya muri na un accidente. Como resulta, bien dolorido si Tihomir. Para enfrenta con el diila tristeza, ele, de suyu mujer y diila anak ta medita si cosa sucede na resureccion. Ele ya explica: “Por ejemplo, ta discuti kame si onde kame hace encuentro con  Zdravko, cosa comida kame hay hace para con ele, con quien kame invita na primer gathering junto con ele y si cosa kame habla con ele acerca na ultimo maga dia.” Si Tihomir ya habla que ciendo tan focus sila na diila esperanza, ta dale este fuerza con el de suyu familia que continua aguanta y continua espera si cuando si Jehova resucita con el de suyu hermano.

19. Paquemodo tu hace fuerte con el de tuyu esperanza? (Mira tambien con el letrato.)

¹⁹ Paquemodo tu puede hace fuerte con el de tuyu esperanza? Si por ejemplo tiene tu esperanza que vivi hasta para cuando na tierra, le si cosa ta habla el Biblia acerca na vida na Paraiso y medita con ese. (Isa. 25:8; 32:16-18) Pensa si cosa el vida na nuevo mundo. Imagina que talla tu. Con quien tu puede mira alla? Cosa sonor tu puede oi? Cosa tu sinti? Para puede ayuda contigo imagina si cosa el vida na Paraiso, mira con el maga letrato na diaton maga publicacion o mira un music video, igual na Un Mundo Nuevo Ya y Bien Cerca ya el Dia. Si pirmi na diaton pensamiento el diaton esperanza na nuevo mundo, hay sinti kita que el diaton maga problema “liviano y temporario.” (2 Cor. 4:17) Por medio na esperanza que ya dale contigo si Jehova, hay hace le fuerte contigo.

20. Maskin pa ta sinti kita mahina, paquemodo kita tene fuerza?

²⁰ “Por medio con Dios, hay tene [kita] fuerza” maskin pa ta sinti kita mahina. (Sal. 108:13) Ya dale ya si Jehova si cosa tu necesita para ricibi el fuerza estaba con ele. Poreso, si necesita tu ayuda para cumpli con el un assignment, aguanta na un dificultad o mentena con el de tuyu alegria, reza con Jehova y busca con el de suyu guia por medio na personal estudiada. Acepta ayuda na maga hermano y hermana. Regular medita con el de tuyu esperanza na futuro. Como resulta, si Jehova ‘hay dale contigo animo y fuerza para aguanta con el maskin cosa con paciencia y con alegria.’—Col. 1:11.