1. Sobuo ka Naaŋmen puorebiiri da maŋ nyɛ faŋa emmo takoreŋ saŋa na?

 GBƐƐ YAGA Naaŋmen Yelbiri na maŋ yeleŋ ka noba naŋ taa yelmennoŋ taa la faŋa. Kyɛ ona naŋ taa faŋa yaga zaa ba poɔŋ gba, saŋa kaŋa o ba maŋ nyɛ ka o siriŋ taa la faŋa. Aŋa mannoo poɔŋ, saŋa kaŋa Naa Deevid da maŋ nyɛŋ ka o taa la ‘faŋa aŋa tankpoŋ,’ kyɛ saŋa kaŋa meŋ, “dabeɛ̃ maŋ kpɛ oŋ yaga zaa.” (Yiem. 30:7) Naaŋmen vooroŋ soŋ na da maŋ ko la Samsen faŋa yaga zaa. Kyɛ o da baŋɛɛŋ ka ka o naŋ ba nyɛ kpeɛ̃o yi Naaŋmen zieŋ, ‘o na leɛ la bambaala a leɛ waa ŋa dɔɔ la dɔɔ zaa.’ (Sar. 14:​5, 6; 16:17) Jehoova la da ko a noba ŋa naŋ da taa yelmennoŋ kpeɛ̃o, azuŋ baŋ da taa faŋa.

2. Ananso la wala ka bitontona Pɔɔl da yelka ka o faŋaŋ wa baara o maŋ taa la kpeɛ̃o? (2 Korinti 12:​9, 10)

² A bitontona Pɔɔl meŋ da baŋɛɛŋ ka aseŋ ka o nyɛ faŋa emmo yi Jehoova zie. (Kanne 2 Korinti 12:​9, 10.) Pɔɔl da bɛ la baaloŋ aŋa lɛ te yaga zie zaa meŋ naŋ beɛrɛ na. (Gal. 4:​13, 14) Saŋa kaŋa, a da maŋ eɛ kpeɛŋaa ko o meŋ ka o e yɛlɛ naŋ soma. (Uro. 7:​18, 19) Saŋa kaŋa meŋ dabeɛ̃ da maŋ kpeɛ̃o a kyaare o nendaare kaŋa yɛlɛ. (2 Kor. 1:​8, 9) Kyɛ saŋa na Pɔɔl faŋa naŋ da maŋ wa baara na, a saŋa oŋ da maŋ taa kpeɛ̃o. Sobuoŋ? Jehoova da ko la Pɔɔl a faŋa ka o na baŋ toɔ̃ are o yelkpeɛne noɔreŋ.

3. Bo soorebie nɔɛ iribo teŋ na nyɛ a zannoo ŋa poɔŋ?

³ Jehoova eŋ teŋ noɔre ka o na ko la te meŋ faŋa emmo. (1 Pit. 5:10) Kyɛ aseŋ ka te e yelkaŋa sɛre kyɛ na baŋ nyɛ faŋa emmo yi o zie. Aŋa mannoo poɔŋ, lɔɔre engine la maŋ vɛŋ ka a lɔɔre zoro, kyɛ ka a dravaŋ ba neɛ a lɔɔre gaasi, a lɔɔre koŋ  gaa. Lɛ meŋ la, Jehoova eɛ siri ka o ko te faŋa emmo, kyɛ aseŋ ka te e yelkaŋa sɛre, kyɛ na baŋ nyɛ faŋa emmo yi o zie. Sobuo ka Jehoova maŋ tu kyɛ korɔ te faŋa? Ka bo aŋ seŋ ka te e sɛre kyɛ na baŋ nyɛ faŋa emmo yi o zie? Te na zanne nyɛɛ lɛ Jehoova naŋ da eŋ a daŋyele Gyoona, Yezu ma Mareya, ane a bitontona Pɔɔl faŋa, ka a soŋ te ka te nyɛ a soorebie ŋa nɔɛ iribo. Te na zanne nyɛɛ lɛ Jehoova naŋ maŋ korɔ o puorebiiri faŋa zenɛ ŋa meŋ.

4. Wala teŋ na baŋ e nyɛ kpeɛ̃o yi Jehoova zie?

⁴ Sori na kaŋa teŋ na baŋ nyɛ faŋa emmo yi Jehoova zie la ka te maŋ puoro sɔroo. Jehoova na sagɛɛ te puoro a maŋ ko te “kpeɛ̃o . . . naŋ ba taa mannoo.” (2 Kor. 4:7) Te na baŋ nyɛ la faŋa emmo meŋ ka teneeŋ maŋ kanna o Yelbiri na a teɛrɛ a yɛlɛ gɛrɛ tɔɔre. (Yiem. 86:11) Yɛlɛ Jehoova naŋ vɛŋ baŋ sɛge eŋ a Baabole poɔŋ ko te na ‘taa la kpeɛ̃o.’ (Hib. 4:12) Ka hooŋ maŋ puoro sɔrɔ Jehoova a kyɛ kanna o Yelbiri na, ho na nyɛ la faŋa emmo a toɔ̃ are ho yelkpeɛne noɔreŋ, a taa popeɛloŋ, bee a toɔ̃ toŋ tonkpeɛŋaa zaa baŋ na ko bo. Hooŋ nyɛ lɛ Jehoova naŋ da eŋ daŋyele Gyoona faŋa.

5. Ananso la wala aŋ da seŋ ka a daŋyele Gyoona taa nyaa?

⁵ A da ferɛɛŋ ka a daŋyele Gyoona taa nyaa, bonso o da zoree dabeɛ̃ ka o gaa zie na Jehoova naŋ tomoo ka o gaa na. Azuŋ o da kpɛ la maŋgbori ka o zo gaa paaloŋ yuo kaŋa. A kpɛle lɛ zuŋ, a da kyɛrɛɛ fẽẽ lɛ ka o neŋ noba na naŋ da be a maŋgbori poɔŋ na kɔŋ ba nyɔvoɛ a sasekpeɛŋaa poɔŋ. Saŋa na a maŋgbori mɔnneba naŋ da de o lɔɔ eŋ a koɔ̃ poɔŋ na, zoŋkpoŋ kaŋa da vɔlooŋ. Azuŋ o da be la zie kaŋa naŋ e dabeɛ̃ yaga. Ho teɛre ka wala aŋ da waa ko Gyoona? O da teɛrɛ ka o na kpiŋ bee? Kyɛbee aminekaŋaŋ o da teɛrɛ ka Jehoova gyɛ oŋ bare? Nɔkpeɛne zaa kyebe ka a yɛlɛ ŋa da eɛ kpeɛŋaa yaga ko Gyoona.

6. Aŋa lɛ na Joona 2:​1, 2, 7 naŋ yel na, boŋ da eŋ Gyoona faŋa saŋa na oŋ da naŋ be a zoŋkpoŋ poɔŋ na?

⁶ Wala ka Gyoona da e nyɛ faŋa emmo saŋa na oŋ da e o yoŋ a be a zoŋkpoŋ poɔŋ na? O da puoreeŋ. (Kanne Joona 2:​1, 2, 7.) Aneazaa ka o da zagrɛɛ Jehoova noɔre, kyɛ Gyoona da baŋ ka Jehoova na kyɛlle woŋ la o puoro na o naŋ yi sigrimennoŋ ane kaŋdabaŋkalɛ poɔŋ a puore koo na. Gyoona meŋ da teɛrɛɛ Sɛgre mine oŋ da kanne yɛlɛ. Ananso la wala teŋ yel lɛ? Yelbie na o naŋ da yel o puoro na poɔŋ aŋ be Joona zuri 2 na, ane a zu meŋ la be a Yieme gane na poɔŋ. (Aŋa mannoo poɔŋ, de Joona 2:​2, 5 manne neŋ Yieme 69:1; 86:7.) A pɛlɛɛŋ ka Joona da baŋɛɛ ana sɛgre ŋa poɔŋ yɛlɛ soŋ. Saŋa na oŋ da teɛrɛ ana sɛgre ŋa yɛlɛ o toɔrɔ saŋa na, o da baŋɛɛŋ peɛlaaŋ ka Jehoova na somooŋ. Jehoova da faa la Gyoona nyɔvore. A puoriŋ o da eɛ siri ka o toŋ toma na Jehoova naŋ da koo ka o toŋ na.—Joona 2:10–3:4.

7-8. Sobuo ka te yɔɔdɔɔ kaŋa naŋ be Taiwan paaloŋ da nyɛ faŋa emmo saŋa na oŋ da tuoro yelkpeɛne na?

⁷ Gyoona zemmo yɛlɛ ŋa na baŋ soŋ teŋ ka teneeŋ wa tuoro yelkpeɛne. Aŋa mannoo poɔŋ, baaloŋ faa kaŋa da kpɛ la te yɔɔdɔɔ Zhiming b naŋ be Taiwan paaloŋ. Ane meŋ, o booree deme da dɔgrooŋ yaga zaa o sagediibu zuŋ. Kyɛ saŋa na oŋ da puoro sɔrɔ Jehoova a kyɛ zanna a Baabole na, o da nyɛɛ faŋa emmo yi Jehoova zie. O yeleeŋ ka, “Saŋa kaŋa ka yelkpeɛneŋ wa wa, a maŋ eɛ kpeɛŋaa yaga ko ma ka N teɛroŋ gaŋ ziyenaa ka N toɔ̃ zanne boma.” Kyɛ o eŋɛ da ba kyoɔre. O yeleeŋ ka, “N maŋ daŋ puoreŋ, a kyɛ pãã de N earphones eŋ N toboŋ a kyɛllɛ te puoruu yiele na mine.  Saŋa kaŋa gba, N maŋ yielee a yiele aŋ yire fẽẽfẽẽ fẽẽfẽẽ lɛ a te ta saŋa na N teɛroŋ naŋ wa gaŋ ziyenaa, sɛre kyɛ maŋ pãã piili a boma zannoo.”

⁸ Zhiming naŋ maŋ zanna boma na, a somooŋ oŋ nyɛ faŋa emmo yaga zaa a toɔ̃ are o yelkpeɛne noɔreŋ. Aŋa mannoo poɔŋ, saŋa na baŋ da wa wɛroo wɛre nimizeɛ kaŋa ka a fili naŋ maana na, a nɛɛsi pɔge kaŋa da yelkooŋ ka o zĩĩ sigee teŋɛ azuŋ a na fɛreŋ ka ba emoo zĩĩ. Kyɛ zie naŋ da na nyaaŋ ka ba wɛroo na, Zhiming da kannɛɛ te yɔɔpɔge kaŋa zemmo yɛlɛ. Ba da wɛrɛɛ o meŋ wɛrebo na tɔ baŋ da wɛre Zhiming meŋ na. O zĩĩ gba da sigee teŋɛ a gaŋ Zhiming; kyɛ o da ba sage baŋ emoo zĩĩ, kyɛ o da nyɛ laafeɛ. O zemmo yɛlɛ na da eŋɛɛ Zhiming faŋa oŋ meŋ are kpeɛŋaa.

9. Ka hooŋ tuoro yelkpeɛŋaa kaŋa ka lɛ vɛŋ ka ho eŋɛ kyoɔre, boŋ hoŋ na baŋ e? (Kaa a fotori meŋ.)

⁹ Ho daŋ tuoree yelkpeɛŋaa kaŋa aŋ e kpeɛŋaa ko bo ka ho puore sɔre Jehoova bee? Bee aŋ vɛŋ hoŋ bale a ba taa faŋa a na zanne boma bee? Teɛre baŋ ka Jehoova woŋee ho yɛlɛ na muni soŋ zaa. Azuŋ ka hooŋ gbaŋ puore ŋmaa ŋmaa lɛ sɔre Jehoova, baŋ peɛlaaŋ ka o na ko boŋ bon yɛlɛ naŋ fɛre bo. (Efe. 3:20) Ka hooŋ beɛrɛ, a bale, bee ka posaanaaŋ vɛŋ ka ho koŋ baŋ zanne boma, ho na baŋ ŋmɛ la a Baabole odiori na mine bee te gama na odiori na mine ba naŋ rekɔde na a kyɛlle. Ho na baŋ kyɛllɛɛ te vidiori na mine meŋ naŋ be jw.org zuŋ na. Jehoova boɔrɔŋ ka o eŋ bo faŋa; o na eɛ lɛ meŋ ka hooŋ maŋ puoro sɔroo a kyɛ kaara ka ho nyɛ ho puoro na nɔɛ iribo a yi a Baabole, a gama, ane a vidiori na zaa Jehoova naŋ korɔ te na poɔŋ.

10. Sobuo ka te Kristabitaaba na baŋ eŋ te faŋa?

¹⁰ Jehoova na baŋ tu la te Kristabitaaba eŋɛŋ a kyɛ eŋ te faŋa. Ka teneeŋ wa tuoro yelkpeɛŋaa kaŋa bee ka ba naŋ wa ko te toma mine naŋ e kpeɛŋaa ko te, ba na baŋ “soŋ [te] la yaga zaa.” (Kol. 4:​10, 11) Agaŋaazaa, te na boɔrɛɛ te yɔɔmine sommo “dɔgɛɛ daare.” (Yeng. 17:17) Ka te eŋɛŋ wa kyoɔre, te yɔɔmine na baŋ soŋ teŋ, a dii te sukyie, a kyɛ eŋ te faŋa ka te naŋ kyɛnɛ puoro Jehoova yelmennoŋ poɔŋ. Hooŋ nyɛ lɛ Yezu ma Mareya naŋ da nyɛ faŋa emmo yi noba mine zie.

11. Bonso ka Mareya da boɔrɔ faŋa emmo?

 ¹¹ Mareya da boɔrɛɛ faŋa emmo. Hooŋ leɛ teɛre nyɛ lɛ aŋ da na dɔɔnɔ Mareya yaga zaa, saŋa na a maleke na yuori naŋ di Gabereyɛl naŋ da wa yelkoo ka o na taa la poɔ aneazaa ka o da ba kuli serɛ na. O daŋ ba guoli biiri zaa, kyɛ o naŋ da seŋ ka o guoli a bie ŋa naŋ na wa leɛ a Mɛzaaya na. O neŋ dɔɔ zaa daŋ ba gaŋ ne taa, kyɛ a da seŋ ka o yelko Gyoosɛf ka o taa la poɔ. A da na eɛ kpeɛŋaa yaga zaa koo ka o e lɛ.—Luk. 1:​26-33.

12. Aŋa lɛ na Luka 1:​39-45 naŋ yel na, wala ka Mareya da e nyɛ faŋa emmo a na toɔ̃ toŋ toma na ba naŋ koo na?

¹² Wala ka Mareya da e nyɛ faŋa emmo a toɔ̃ toŋ a toŋ tegroŋ ŋa oŋ da nyɛ na? O da bɔ la sommo yi noba mine zie. Aŋa mannoo poɔŋ, o da yelko la Gabereyɛl ka o wuluu yelzaa naŋ bebe a kyaare a toma. (Luk. 1:34) A da ba kɔɔre kyɛ oŋ da tu sori a gaa “Gyudiya teŋɛ kaŋa naŋ are tanne poɔ” ka o te puore o dɔgrɔ Elizabɛl. O da nyɛ la tɔnɔ yi be meŋ. Elizabɛl da pugi la Mareya, ka Jehoova vooroŋ soŋ meŋ da emoo faŋa oŋ manne daŋyelbo kaŋa naŋ kyaare Mareya bie na oŋ naŋ ba dɔge na. (Kanne Luka 1:​39-45.) Mareya da yeleeŋ ka, Jehoova “wuli la O kpeɛ̃o.” (Luk. 1:​46-51) A tuuro Gabereyɛl ane Elizabɛl eŋɛŋ, Jehoova da eŋɛɛ Mareya faŋa.

13. Bo tɔnɔ ka te yɔɔpɔge kaŋa naŋ yi Bolivia paaloŋ da nyɛ saŋa na oŋ da bɔ sommo yi o Kristabitaaba zieŋ na?

¹³ Ho meŋ na baŋ nyɛ la faŋa emmo yi ho yɔɔmine zie, aŋa lɛ Mareya naŋ da nyɛ na. Te yɔɔpɔge Dasuri naŋ yi Bolivia paaloŋ meŋ da boɔrɛɛ faŋa emmo. O saa da beɛrɛɛ baaloŋ nimizeɛ kaŋa naŋ ba taa sammo baŋ deɛ o gaali asibitiŋ. Azuŋ o da boɔrɔŋ ka o be o saa zieŋ a kaaroo. (1 Tim. 5:4) Kyɛ a da ba e mɔlɔ fẽẽ zaa. O da yeleeŋ ka, “Gbɛɛ yaga, N eŋɛ zaaŋ da maŋ kyoɔre.” O da bɔ la somoo bee? A piilee saŋa na o da ba bɔ sommo. O yeleeŋ ka, “N da ba boɔrɔ ka N de N tuobu na dɔgili N yɔɔmine na zuŋ. N da teɛrɛŋ ka, ‘Jehoova la na ko ma a faŋa ka N baŋ toɔ̃ are kpeɛŋaa.’ Kyɛ N da wa nyɛɛŋ ka N naŋ wɛlɛ N meŋɛ yire N taaba zieŋ na wuleeŋ ka N da boɔrɔŋ ka N are a yelkpeɛne ŋa noɔreŋ N yoŋ tɛgɛ.” (Yeng. 18:1) Dasuri da sɛge la lɛtare ko o zɔmenne mine a manne yɛlɛ na poɔŋ oŋ da be na ko ba. O yeleeŋ ka, “N koŋ baŋ manne lɛ na te yɔɔmine naŋ da eŋ maŋ faŋa yaga zaa aseŋ. Ba da maŋ maalɛɛ bondirii a wa ko ma, a wuli ma Baabole sɛgre naŋ diire sukyiri yaga zaa. Nyɛ lɛ a naŋ maana sukyiri yaga zaa ka te baŋ ka te ba e te yoŋ. Te zaa be la Jehoova booree naŋ e kpoŋ na poɔŋ. Te yɔɔmine meŋ eɛ siri ka ba soŋ te, a dii te sukyie ka teneeŋ wa be awonaa poɔŋ, a kyɛ eŋ te faŋa ka te zaa naŋ kyɛnɛ puoro Jehoova.”

14. Bonso aŋ seŋ ka te sage sommo yi a lantaapuoruu nembɛrɛ zie?

¹⁴ Jehoova maŋ lɛ tu la a lantaapuoruu nembɛrɛ meŋ zie kyɛ eŋ te faŋa. Ba eɛ kyɔɔtaa oŋ maŋ tu ba eŋɛŋ kyɛ korɔ te pɛnnoo ane faŋa emmo. (Aiz. 32:​1, 2) Azuŋ ka yɛlɛ mineŋ wa dɔnnɔ bo, manne yɛlɛ na naŋ dɔnnɔ bo na ko a nembɛrɛ. Ka ba naŋ wa korɔ bo sommo, sage ba sommo na. Jehoova na tu la ba eŋɛŋ kyɛ eŋ bo faŋa.

15. Bo teɛretɔ la ka Kristabiiri zaa taa oŋ e nanee yaga zaa ko ba?

¹⁵ Teɛretɔ na a Baabole naŋ korɔ te na na baŋ eŋ teŋ faŋa yaga zaa. (Uro. 4:​3, 18-20) Kristabiiri mine taa la teɛretɔ ka ba na gaa la sazu a te zeŋ be tegitegilɛ, ka ba mine meŋ taa teɛretɔ ka ba na zeŋ la a donɛɛ ŋa zuŋ paradiisi poɔŋ tegitegilɛ. Te teɛretɔ na na baŋ eŋ te faŋa ka te are yelkpeɛne noɔreŋ, a moɔlɔ a duorisoŋ, a kyɛ tonɔ toŋ yobo mine meŋ a lantaapuoruu poɔŋ. (1 Tɛs. 1:3) Ana  teɛretɔ na neŋ o zu la da eŋ a bitontona Pɔɔl faŋa.

16. Bonso aŋ da fɛre ka a bitontona Pɔɔl nyɛ faŋa emmo?

¹⁶ A da ferɛɛŋ ka Pɔɔl meŋ nyɛ faŋa emmo. O lɛtɛ na oŋ da sɛge ko Kristabiiri naŋ be Korinti paaloŋ poɔŋ na, o da de la o meŋɛ manne neŋ yagraa dogre. O da nyɛ la “dɔgɛɛ boorɔ zaa,” ka o “teɛroŋ gyɛre,” ka ba da “dɔgre” o a ŋmɛ o “lɔɔ teŋɛŋ.” Saŋa kaŋa gba a da maŋ kyɛrɛɛ fẽẽ lɛ ka o kɔŋ o nyɔvore. (2 Kor. 4:​8-10) Pɔɔl sokyɛŋ toma ata soba na poɔŋ la oŋ da sɛge a lɛtɛ ŋa. Saŋa na oŋ gba da wa sɛge a yɛlɛ ŋa baare na o da lɛ tuoree dɔgɛɛ yaga. Noba mine suuri naŋ da iri yaga zaa da wa nyɔgooŋ a ŋmɛ, ka noba mine meŋ da nyɔgoo a te di o sɛrɛɛ. A da kyɛre fẽẽ lɛ ka koɔ̃ de o, baŋ da emoo nempɔgedieŋ meŋ.

17. Aŋa lɛ na 2 Korinti 4:​16-18 naŋ wuli na, boŋ da eŋ Pɔɔl faŋa oŋ toɔ̃ are o yelkpeɛne noɔreŋ?

¹⁷ Pɔɔl da de la o teɛroŋ zaa eŋ o teɛretɔ na eŋɛŋ, aŋ da koo faŋa oŋ toɔ̃ are o yelkpeɛne noɔreŋ. (Kanne 2 Korinti 4:​16-18.) O da yelko la a Korinti deme ka, ka o eŋdaa gbaŋ “korɔ,” kyɛ o koŋ vɛŋ ka lɛ kyoɔre o eŋɛ. Pɔɔl da de la o teɛroŋ zaa eŋ o nendaare kaŋaŋ. A teɛretɔ o naŋ da taa ka o na nyɛɛ nyɔvore naŋ ba taa baaraa sazuŋ na eɛ “puubu naŋ ba taa baaroo ka ba kontoɔ̃ manne,” azuŋ oŋ da e siri ka o are yeltuo zaa oŋ na tuore noɔreŋ. Pɔɔl da teɛrɛɛ ana teɛretɔ na yɛlɛ gaa tɔɔre, ka lɛ da vɛŋ oŋ maŋ “nyɛ . . . faŋ paalaa bebiri zaa.”

18. Sobuo ka nendaare kaŋa teɛretɔ na eŋ Tihomir ane o yideme faŋa?

¹⁸ Te nendaare kaŋa teɛretɔ na da eŋɛɛ te yɔɔdɔɔ Tihomir naŋ be Bulgaria paaloŋ faŋa. Yuomo mine naŋ pare, lɔɔre da lɔɔ la o yɔɔdɔɔ yuori naŋ di Zdravko oŋ kpi. Lɛ zuŋ Tihomir da di la woore yaga zaa. Yɛlɛ naŋ da soŋ o neŋ o yideme la ka ba teɛrɛɛ lɛ a kũũni leɛ-iruu naŋ na waa. O yeleeŋ ka: “Te maŋ di la dama a kyaare zie na teŋ na te pɔge Zdravko ka ba naŋ wa seŋ o yi kũũni poɔŋ, bondirii na teŋ na maale koo, noba na teŋ na toŋ boɔle ka ba wa tigri na teŋ na maale koo ka o naŋ wa iri yi kũũni poɔŋ wa, ane yɛlɛ teŋ na yelkoo a kyaare  a bebi baare.” Tihomir yeleeŋ ka baŋ maŋ de ba teɛroŋ zaa eŋ ba teɛretɔ eŋɛŋ na maŋ eŋɛɛ ba yideme faŋa baŋ are kpeɛŋaa a kyɛ kyɛnlɛ saŋa na Jehoova naŋ na seŋ o yɔɔ na.

19. Wala hoŋ na baŋ e eŋ ho teɛretɔ na faŋa? (Kaa a foto meŋ.)

¹⁹ Wala hoŋ na baŋ e eŋ ho teɛretɔ na faŋa? Ka hooŋ taa teɛretɔ ka ho na zeŋ la a donɛɛ ŋa zuŋ, ho na baŋ kannɛɛ Baabole sɛgre mine naŋ manna Paradiisi yɛlɛ, a teɛre a yɛlɛ gaa tɔɔre. (Aiz. 25:8; 32:​16-18) Teɛre nyɛ lɛ zemmo naŋ na waa a donpaalaa poɔŋ. Ŋmaa foto ho teɛroŋ poɔŋ a nyɛ neɛ na hoŋ na nyɛ be, yɛlɛ na hoŋ na wono bee a nyɛrɛ, ane lɛ aŋ na waa ko bo. Ka hooŋ boɔrɔ ka ho nyɛ a yɛlɛ soŋ zaa, ho na baŋ kaa la Paradiisi fotori naŋ be te gama poɔŋ, bee ka ho kaa te yiele vidiori naŋ yele Paradiisi yɛlɛ, aŋa The New World to Come, Just Around the Corner, kyɛbee Imagine the Time. Ka teneeŋ vɛŋ ka a donpaalaa yɛlɛ be te teɛroŋ wagre zaa, te yelwonee zaa na eɛ “belaa” lɛ. (2 Kor. 4:17) A teɛretɔ na Jehoova naŋ ko bo na na baŋ soŋ boŋ ka ho are kpeɛŋaa.

20. Ka te eŋɛŋ gbaŋ wa kyoɔre, wala teŋ na baŋ e nyɛ faŋa emmo?

²⁰ Ka te eŋɛ gbaŋ wa kyoɔre, “a tuuro Naaŋmen eŋɛŋ te na nyɛ la toɔ̃bo.” (Yiem. 108:13) Jehoova ko teŋ bonzaa yɛlɛ naŋ fɛre ka te na baŋ nyɛ faŋa emmo a yi o zie. Azuŋ ka hooŋ wa boɔrɔ sommo ka ho toɔ̃ toŋ toma mine ba naŋ ko bo, a are ho yelkpeɛne noɔreŋ, bee a naŋ kyɛnɛ taa popeɛloŋ, puore sɔre Jehoova, a sɔroo ka o soŋ bo ho Baabole zannoo poɔŋ. Sage faŋa emmo na te yɔɔmine naŋ na ko bo na. Nyɔge ho teɛretɔ na kpeɛŋaa. Naaŋmen na eŋ “ka yɛ e kpeɛne kyɛ taa faŋa zaa naŋ yi O puubu kpeɛ̃o poɔ, kyɛ nare yɛ ka yɛ dire kannyiri yelzaa poɔ ne popeɛloŋ.”—Kol. 1:11.