1. Pe den sama di be e dini Yehofa a fosi be e fende kaakiti?

 TE BEIBEL e taki fu sama di taanga, da ai taki fu sama di tan dini Yehofa anga den hii ati. Winsi fa den sama ya biibi be taanga, toku son yuu den be e fii booko-saka. Luku a toli fu Kownu David. Son yuu a be e fii enke a ‘taanga enke wan mongo’. Ma son yuu ‘ná pikin buuya a be e buuya’. Aa be e sabi san a mu du (Ps. 30:7). Simson a be wan man di be taanga tu. Ma a be kon si taki sondee a kaakiti fu Yehofa a be swaki enke ala taa sama (Kuut. 14:5, 6; 16:17). Den man ya be taanga, bika a Yehofa be e gi den kaakiti.

2. Saide apostel Pawlesi be taki te a swaki, da a taanga? (2 Korentesama 12:9, 10)

² Apostel Pawlesi be fusutan taki a abi a kaakiti fu Yehofa fanowdu. (Leisi 2 Korentesama 12:9, 10.) Leti enke wi aini a ten ya, Pawlesi be abi gusontu polobelema tu (Gal. 4:13, 14). Son yuu a be e feti anga den swakifasi fi en (Rom. 7:18, 19). Boiti dati, son yuu a be e feele, bika aa be sabi san be o pasa anga en (2 Kor. 1:8, 9). Toku te Pawlesi be swaki, a be e taanga baka. Saide? Bika Yehofa be e gi en a kaakiti di a abi fanowdu fu pasa den tesi di be e miti en.

3. Sowtu akisi wo luku aini a artikel ya?

³ Yehofa paamisi u taki aw giw a kaakiti di wi abi fanowdu fu holidoo tu (1 Peit. 5:10). Ma efu u wani fende a kaakiti fu Yehofa, useefi mu du wan sani. Pakisei a toli ya. A wan masini e meke wan wagi man lei. Ma efu a wagi mu  go a fesi, da a sama di e lei en mu doloki a gas. A so a de anga Yehofa tu. A de kabakaba fu giw a kaakiti di wi abi fanowdu. Ma useefi mu du wan sani tu efu u wani fende a kaakiti fi en. San Yehofa du fu gi wi a kaakiti fi en? Saw mu du efu u wani fende a kaakiti fu Yehofa? Fu man fende a piki fu den akisi ya, wo poti pakisei a dii sama di Yehofa be gi kaakiti. Den sama ya a Yona, Maliya, anga apostel Pawlesi. Boiti dati, wo si fa Yehofa e gi den sama di e dini en aini a ten ya kaakiti.

4. Faw sa fende a kaakiti fu Yehofa?

⁴ Wan fasi faw sa fende a kaakiti fu Yehofa a te we begi en. Yehofa o piki a begi fu u, bika aw giw ‘a kaakiti fi en di bigi pasa maiki’ (2 Kor. 4:7). Wo fende kaakiti tu te we leisi a Wowtu fu Gadu anga te we teke ten pakisei saw leisi (Ps. 86:11). A bosikopu di Yehofa abi gi wi aini Beibel ‘abi kaakiti’ (Heb. 4:12). Te ye begi Yehofa, anga te ye leisi a Wowtu fi en, yo fende a kaakiti di yu abi fanowdu fu holidoo. A sani ya o yeepi i fi ya lasi i piisii. Aw yeepi i tu fu du wan wooko dii mu du aini a kemeente winsi aa makiliki. Meke u luku fa Yehofa be gi polofeiti Yona kaakiti.

5. Saide polofeiti Yona be abi taanga-sikin fanowdu?

⁵ Yona be abi deki-ati fanowdu, bika a be e feele fu go a pe Yehofa be sende en go. Neen meke a teke wan sipi di be e go a wan taa peesi. Di a du a sani ya, pikinmoo en anga den taa sama di be de aini sipi dede, bika wan gaan winta be e wai. Baka di den man di be e tyai a sipi iti en go aini a ze, wan gaan fisi gwili en. Fai denki Yona be sai fii di a be de aini a fisi bee? Kande a be e denki taki aw dede. Kande a be e si enke Yehofa gwe fika en tu. Ná pikin feele a be musu e feele.

6. Enke fa Yona 2:1, 2, 7 e soi, da san be gi Yona taanga-sikin di a be de aini a fisi bee?

⁶ A Yona wawan be de aini a fisi bee. Ma san a du fu fende kaakiti? A begi Yehofa. (Leisi Yona 2:1, 2, 7.) Yona á be aliki Yehofa. Ma bakaten a be hati en taki aa be du sani enke fa Yehofa wani. A be e biibi taki Yehofa be o aliki a begi fi en. Boiti dati, a be e pakisei son pisi fu Beibel. Saide u taki so? Bika aini a begi fi en di sikiifi a Yona kapitel 2, a taki tyaipi sani di sikiifi aini den Psalm. (Luku Yona 2:2, 5 anga Psalm 69:1; 86:7 tu.) A sani ya e soi taki Yona be sabi den pisi fu Beibel ya bun. Den tekisi ya be yeepi Yona fu biibi taki Yehofa be o yeepi en. Yehofa kibii en. Neen meke bakaten a be de kabakaba fu go du a wooko di Yehofa be gi en.​—Yona 2:10–3:4.

7-8. Fa wan baala di e tan aini Taiwan be fende taanga-sikin fu pasa den tesi di be e miti en?

⁷ Te tesi e miti u, u sa du sani enke Yona. Na a sani ya wan baala den e kai Zhiming b di e tan aini Taiwan be du. A gusontu fu a baala ya be e go anga baka. Boiti dati, den famii fi en be e libi ogii anga en fu di ai dini Yehofa. Begi anga a sutudeli di ai sutudeli Beibel e gi en kaakiti. A taki: ‘Son yuu te mi abi booko-ede mi e feele te, mi nai poi sutudeli anga miseefi. Ma a baala ya á gi abaa. A taki: ‘A fosi sani di mi e du a taki mi e begi Yehofa. Bakadati da mi e aliki den Kownukondee singi fu u. Son yuu mi e singi den te enke mi bigin fii bun.  Bakadati, da mi e bigin sutudeli anga miseefi.’

⁸ Den sani di Zhiming be e leli te a be sutudeli, be e yeepi en fu holidoo te tesi be e miti en. Baka di a du wan gaan opalasi, a dataa taigi en taki a mu teke buulu, bika a buulu fi en be saka tumisi. Ma a neti fosi a du a opalasi, a be leisi wan ondoofenitoli fu wan sisa di be du aseefi opalasi ya. A buulu fu a sisa ya be saka moo du fi en, ma a sisa á teke buulu. Bakaten a sisa kisi enseefi. A ondoofenitoli ya be gi Zhiming taanga-sikin fu aa gwe fika Yehofa.

9. Efu wan tesi e miti i di e meke ye feele, sai sa du? (Luku a fowtow tu.)

⁹ Wan tesi miti i kaba di meke a be taanga gii fu begi Yehofa? Efuso kande i fii swaki te, da ya poi sutudeli? Holi a pakisei taki Yehofa e fusutan sai miti i. Neen meke winsi a wantu sani namo i taki te ye begi, i sa biibi taki Yehofa o gii pilisisi san yu abi fanowdu (Efe. 3:20). Efu ai taanga gii fu leisi efuso fu sutudeli fu dii siki, i sa aliki den audio fu a Beibel efuso wan buku fu a olikanisâsi. I sa aliki den tu efi ye fii booko-saka te neen ya poi leisi. Boiti dati, i sa aliki wan Kownukondee singi efuso luku wan felon a jw.org. Efii begi Yehofa fu wan sani, neen ye suku a piki a den sani di a seeka giw, ye gi en a okasi fu a gii kaakiti.

10. Fa den baala anga sisa sa giw taanga-sikin?

¹⁰ Yehofa sa meke den baala anga sisa giw taanga-sikin. Den baala anga sisa de enke wan ‘peesi pe u sa fende toosutu’ te tesi e miti u, efuso te ai taanga giw fu du wan wooko di Yehofa giw (Kol. 4:10, 11). Wi abi mati fanowdu ‘te u fuka’ (Odo 17:17). Te we fii swaki, den baala anga sisa sa giw taanga-sikin fu tan dini Yehofa anga u hii ati. Meke u luku fa Yesesi mma Maliya be fende taanga-sikin.

11. Saide Maliya be abi taanga-sikin fanowdu?

¹¹ Maliya be abi taanga-sikin fanowdu fu du san Yehofa wani. Pakisei fa a be e fii di a yee den sani di Gabriyel taigi en. A be kon de anga a bee ma aa be toow.  Aa be sabi fa a mu kiya wan pikin tu. Ma now a be o toon a mma fu a pikin di be o toon a Mesiyas. Boiti dati, aa be siibi anga man ete. A pisiten di a engel be taigi en a sani ya, Maliya be abi mofu fu toow. Fa a be o taigi Yowsefu a sani ya?​—Luk. 1:26-33.

12. Enke fa Lukasi 1:39-45 e soi, da fa Maliya fende taanga-sikin?

¹² Fa Maliya fende taanga-sikin fu du a sani di Yehofa be taigi en fa du winsi fa aa be makiliki? A suku yeepi a taawan. A be akisi Gabriyel fu a taigi en moo sani fu a faantiwowtu di a be fende (Luk. 1:34). Aa langa seefi neen Maliya go ‘a wan foto di be de a den mongo mindii’ fu Yuda fu go luku wan famii fi en den e kai Elisabet. A fende wini di a du a sani ya. Elisabet gafa Maliya neen a taki wan polofeititoli fu a pikin di Maliya be o meke. A sani di a be taki be gi Maliya taanga-sikin. (Leisi Lukasi 1:39-45.) Maliya taki ‘Yehofa du omen gaan sani anga a makiti fi en’ (Luk. 1:46-51). Yehofa be meke Gabriyel anga Elisabet gi Maliya taanga-sikin.

13. Sowtu wini wan sisa fu Bolifiya fende di a akisi den baala anga sisa fu yeepi en?

¹³ Leti enke Maliya, den baala anga sisa sa giw taanga-sikin. Na a sani ya wan sisa fu Bolifiya den e kai Dasuri be abi fanowdu. En dda be kon siki bunbun fasi. Neen meke den be holi en na ati-osu. A sisa ya be teke a faantiwowtu fu solugu en dda (1 Tim. 5:4). Ma a ná ala yuu a be e makiliki. A taki: ‘Gaanse leisi mi be e fii enke mi naw poi holidoo.’ Ma a sisa ya be e akisi taawan fu yeepi en? Biginbigin aa be e akisi sama fu yeepi en. A taki: ‘Mia be wani fuufeli den baala anga sisa. Mi be e denki taki Yehofa o gi mi a kaakiti di mi abi fanowdu. Ma mi be kon si taki te mi nai mosoo anga taawan, da a leti enke a mi wawan e losi den polobelema fu mi’ (Odo 18:1). Dasuri app wantu fu den mati fi en, neen a taigi den sai miti en. A taki: ‘Mia poi taigi i fa mi e fii fu a taanga-sikin di den baala anga sisa gi mi. Den be e tyai nyanyan kon giw na ati-osu. Den be e leisi moin tekisi anga u tu. Ye fii bun tei sabi taki a nai wawan de. I de aini a gaan osufamii fu Yehofa di de kabakaba fu yeepi i. Den e kee makandaa anga i. Den e yeepi i fu holidoo tu.’

14. Saide u mu meke den owluman yeepi u?

¹⁴ Yehofa e koboloiki den owluman tu fu giw taanga-sikin (Yes. 32:1, 2). Neen meke efi yu abi booko-ede i sa taki anga den owluman. Ya mu daaidaai fu teke a yeepi di den wani gii. A Yehofa e koboloiki den baala ya fu taanga u.

15. San na a howpu di wi abi?

¹⁵ Den sani di Yehofa paamisi u e giw howpu. A howpu fu u e yeepi u fu tan dini Yehofa (Rom. 4:3, 18-20). Son Kelesten abi a howpu fu libi fu teego a hemel. Ma taawan fu den abi a howpu fu libi fu teego aini wan paladeisi a goontapu ya. Na a howpu di wi abi e yeepi u fu holidoo te tesi e miti u. Na a sani ya e yeepi u fu tan paati a bun nyunsu, anga fu tan yeepi den baala anga sisa fu wi aini a kemeente (1 Tes. 1:3). Na a howpu ya be gi Pawlesi taanga-sikin.

16. Saide apostel Pawlesi be abi taanga-sikin fanowdu?

¹⁶ Pawlesi be abi taanga-sikin fanowdu. Aini a biifi di a be sikiifi gi den Kelesten  fu Korente, a be maiki enseefi anga wan doti patu. ‘Tesi be e miti en. Son yuu a be e buuya.’ Sama be e ‘du ogii anga en’. Den be e ‘naki en’ tu. Boiti dati, sani be e miti en pe a be sa lasi en libi (2 Kor. 4:8-10). Pawlesi be sikiifi den sani ya di a be go luku den kemeente enke zendeling du fu dii leisi. Baka di a sikiifi a biifi gi den Kelesten fu Korente, moo gaan tesi be miti en. Wan kulu ogiiman be wani du ogii anga en. Den be sooto en tu. Boiti dati, a sipi di a be de aini be sungu.

17. Enke fa 2 Korentesama 4:16-18 e soi, da san be gi Pawlesi taanga-sikin fu holidoo di tesi be e miti en?

¹⁷ Fu di Pawlesi be e poti ala en pakisei na a howpu fi en, meke a be poi holidoo. (Leisi 2 Korentesama 4:16-18.) A be taigi den Kelesten fu Korente taki winsi en sikin e ‘go anga baka’, toku a naw gi abaa. A be e poti ala en pakisei na a howpu di a abi. A howpu di a be abi fu libi fu teego a hemel be taanga. Neen meke a be poi pasa iniiwan tesi di be e miti en. Fu di Pawlesi be e pakisei a howpu fi en, meke ‘dei fu dei a be e fende nyun kaakiti’.

18. Fa a howpu di wi abi be gi Tihomir anga en osufamii taanga-sikin?

¹⁸ A howpu di wi abi be gi wan baala den e kai Tihomir taanga-sikin. A baala ya e tan aini wan foto den e kai Bulgariya. Wantu yali pasa en pikinbaala den e kai Zdravko naki anga wagi, neen a dede. Ná pikin du a dede fi en baala du en ogii. A wan hii pisiten a be e kusumi. A sani di be e gi Tihomir anga en osufamii taanga-sikin, a te den be e pakisei fa aw de te Gadu o weki den sama fu u di dede. A taki: ‘U be lobi taki pe wo miti Zdravko, sowtu nyanyan wo boli gi en, anga sama a den sama di wo kai fu kon na a fosi fesa di wo holi fu bali wadaa gi en. Wo taigi en tu fa sani waka aini den lasiti dei fu a goontapu.’ Tihomir taki na a howpu di wi abi gi en kaakiti fu holidoo.  A howpu ya e yeepi en fu pakisei fa aw de, te Yehofa o weki en baala baka.

19. Sai sa du fu meke a howpu fii kon moo taanga? (Luku a fowtow tu.)

¹⁹ Faw sa taanga a howpu fu u? Efi yu abi a howpu fu libi a goontapu ya, i sa leisi den tekisi di e soi fa a libi o de aini a nyun goontapu. Bakadati teke ten pakisei sai leisi (Yes. 25:8; 32:16-18). Pakisei fa a libi o de aini a nyun goontapu. Sama a den sama di yo si? San a den sani di yo yee? Fa yo fii? Efii wani a howpu di yu abi fu libi aini a nyun goontapu taanga, i sa luku den fowtow di de aini den buku fu u. Boiti dati, i sa luku den singi di den e kai Freide de! Leti na baka uku, anga T’a nyun grontapu kon. Efu we teke ten pakisei fa a libi o de aini a nyun goontapu, den polobelema fu u naw fooseli u tumisi (2 Kor. 4:17). A howpu di Yehofa giw o yeepi u fu holidoo te tesi e miti u.

20. Saw mu du fu fende taanga-sikin te we fii booko-saka?

²⁰ Winsi we fii swaki son yuu, toku ‘Gadu o giw kaakiti’ (Ps. 108:13). Yehofa seeka sani giw fu u sa fende a kaakiti di wi abi fanowdu. Neen meke efu ai taanga gii fu du wan wooko aini a kemeente, fu pasa wan tesi efuso fi ya lasi i piisii, i sa begi Yehofa anga i hii ati. Sutudeli anga iseefi. Boiti dati, meke den baala anga sisa yeepi i. Meke ten fu pakisei fa a libi o de aini a nyun goontapu. Efu we du den sani ya, ‘da [Gadu] o gi wi a kaakiti di wi abi fanowdu, fu u sa holidoo anga pasensi anga ala piisii’.​—Kol. 1:11.