1. Jehovan aplea adlea visvaxi sevokank koxi ghottai dili?

 BIBLE-ANT choddxe pavtti Jehovache visvaxi sevok xoktivont asat mhunn sanglolem asa. Punn hea visvaxi sevokank sodanch oxem disonk na. Udharonnak, Raza Davidak zaite pavtti apunn ‘dongra bhaxen ghott’ asa oxem dislem. Punn thodde pavtti tacher ‘kolkolo ailo vo to bhielo.’ (St. 30:7) Toxench Samsonacher Devachi xokti kam korunk lagli tednam to kuddin xoktivont zalo. Punn to zannam aslo ki Devache xokte bogor ‘tachi ghottai na zatoli ani to konnui her munxa bhaxen zatolo.’ (Fudd. 14:5, 6; 16:17) Tor Jehovan tankam xokti dili dekhunuch he visvaxi munis xoktivont asle.

2. Oskot aslear pasun apunn xoktivont asa oxem apostl Paulun kiteak mhunnttlem? (2 Korintkarank 12:9, 10)

² Tea bhair, apostl Paulu pasun apleak Jehovache xoktichi goroz asa mhunn zannam aslo. (2 Korintkarank 12:9, 10 vachat.) Karonn amchea modlea zaitea lokam bhaxen Pauluchi bholaiki bori nasli. (Gal. 4:13, 14) Kednam-kednam, sarkem tem korunk taka khub kotthin zatalem. (Rom. 7:18, 19) Ani thodde pavtti, tachea sangata kitem zatolem hem chintun to khub usketalo vo bhietalo. (2 Kor. 1:8, 9) Tori astana, oskot aslear pasun to xoktivont zalo. Koso? Jehovan taka xokti dili ani to ghott zalo.

3. Ami hea lekhant kitem polloitolim?

³ Jehova amkam pasun xokti ditolo mhunn bhas dita. (1 Ped. 5:10) Punn amkam Jehova koddlean apxinch xokti mellchina. Tea pasot, amkam kitem tori korunk poddttolem. Udharonnak, gaddiek engine asop gorjechem. Punn engine aslolean  gaddi apxinch fuddem voichina. Driver-an ti cholounk zai. Tednanch ti fuddem voitoli. Teach bhaxen, Jehova amkam xokti diunk toiar asa. Punn ti melloun gheunk amkam thoddim pavlam gheunk poddttolim. Tor Jehovan amkam xokti diunk kitem bondobost kela? Ani ti melloun gheunk ami kitem korunk zai? Hea prosnanche zobab zannam zaunk, Jehovan provadi Jonasak, Jezuchi avoi Mariek, ani apostl Pauluk koxi xokti dili tem polloum-ia. Toxench, aiz Jehova aplea sevokank koso xokti di-it asa tem pasun polloum-ia.

4. Jehova thaun xokti mellonk ami kitem korunk zai?

⁴ Jehova thaun xokti mellonk ek vatt mhunnttlear, tache lagim magnnem korop. Ami magnnem kortat tednam Jehova amkam ji xokti dita ti “munxachea xokte poros khub vorti asa.” (2 Kor. 4:7) Toxench, Jehovan Bible-ant amchea pasot zo sondex boroila to “xoktivont asa.” (Heb. 4:12) Tor jednam ami Bible vachtat ani tacher niall kortat tednam amkam xokti melltta. (St. 86:11) Hea pasot xokti mellonk, Jehova lagim magnnem korat ani Bible vachat. Ani hi xokti tumkam thir ravonk, khuxalkai samballunk, vo kotthin dista ti zobabdari purnn korunk modot kortoli. Atam ami, Jehovan provadi Jonasak koxi xokti dili tem polloum-ia.

5. Provadi Jonasak xoktechi kiteak goroz asli?

⁵ Provadi Jonasak xoktechi goroz asli. Jehovan dilʼlem kam taka kotthin dislem dekhun, to dusrea zagear pollon gelo. Uprant doriant ek vhodd vadoll ailem, jea udexim tacho ani tea tarvant aslolea munxancho jiv dhokeant poddlo. Tarvotteamnim Jonasak doriant uddoilo tednam, ek vhodd nustean taka gillʼllo. To nusteachea pottant aslo ani taka kainch disonaslem. Tea vellar Jonasak koxem dislem astolem tea vixim chintat. Atam apunn ani jivo urchona, vo Jehovan mhaka soddun dilo oxem tachea monant ailem astolem. Tor Jonas khorench khub bhielo astolo.

6. Jonas 2:2, 3, 8-a pormonnem, eksuro astana xokti mellonk Jonasan kitem kelem?

⁶ Jonas atam eksuro aslo. Tor ghottai mellonk tannem kitem kelem? Sogleam-von poilim, tannem Jehova lagim magnnem kelem. (Jonas 2:2, 3, 8 vachat.) Tannem Jehovachem aikonk na tem khorem. Punn tannem poschatap kelo, ani Jehova tachem magnnem aikotolo mhunn taka visvas aslo. Toxench, tannem adim vachlolim versam ugddasak haddlim. Oxem ami kiteak mhunnonk zata? Karonn Jonas odheai 2-ant aslolim tachea magnneantlim zaitim utram, Stotr pustokantlim aslim. (Udharonnak Jonas 2:3, 6-antlim utram, Stotr 69:1; 86:7-a sangata sor korat.) Tor Jonasak tim versam bore bhaxen khobor aslim mhunn amkam kolltta. Ani to trasant aslo tednam, tim ugddas kelʼlean Jehova taka modot kortolo mhunn taka khatri mellʼlli. Uprant, Jehovan Jonasak salvar kelo, ani Jehovan sanglolem kam korunk to toiar zalo.—Jonas 2:11–3:4.

7-8. Taiwan-ant ravpi eka bhavak trasancho fuddo korunk koxi xokti mellʼlli?

⁷ Trasancho fuddo kortana Jonasachem udharonn amkam modot korunk xokta. Zoxem, Taiwan-antlea bhav Zhiming-achea b udharonnacher dhean diat. Taka gombhir duensam asat. Tea bhair, to Sakxi zaun asa dekhun, tachi famil tachea sangata khub krur toren vagta. Oslea vellar, magnnem ani obheas kelolean taka xokti melltta. Bhav mhunntta: “Thodde pavtti somosia ietat tednam, mhaka itlo usko zata ki svotacho obheas korunk mhojem mon xant asona.” Punn bhav soddun dina. To mhunntta, “Poilim hanv Jehova lagim magnnem kortam ani uprant earphone ghalun Raj-gitam aikotam. Thodde pavtti tim aikotana, hanv pasun sovkas avazan gaitam. Mhojem mon xant zaisor hanv  toxem kortam. Ani tea uprant, hanv obheas korunk suru kortam.”

⁸ Svotacho obheas kelolean bhav Zhiming-ak khub xokti mellʼlli. Udharonnak tachem ek vhoddlem operation zalea uprant, nurse-in taka sanglem ki tachem rogot samkem unnem zalam, ani dekhun taka rogot gheunk poddttolem. Punn operation-achea adlea rati, bhavan eke bhoinnicho onubhov vachlolo. Tea bhoinnichem pasun toslench operation zalʼlem. Ani tichem rogot bhava poros chodd unnem zalʼlem. Tori astana, tinnem rogot gheunk na ani ti bori zali. Tor tichea onubhovantlean bhavak khub xokti mellʼlli, ani to Jehovak visvaxi ravonk pavlo.

9. Trasancho fuddo kortana tumkam ekdom chodd usko zata zalear, tumi kitem korunk zata? (Chitram pasun polloiat.)

⁹ Trasancho fuddo kortana, ekdom chodd uskeank lagon tumkam koxem bhogta tem Jehovak ukteponnim sangonk tumkam kotthin zata kai? Vo tumi thoklolim asat dekhun, obheas korunk tumkam kotthin zata kai? Toxem zalear, Jehova tumchi poristhiti ekdom bore toren somzota mhunn ugddas dovrat. Ani tumi ek lhanxem magnnem kelear pasun, to tumkam sarkem goroz tem ditolo mhunn khatri dovrat. (Ef. 3:20) Tumi duent asat, thoklolim asat, vo tumchea mathear uskeancho bhar asa dekhun, tumkam Bible ani Bible-achea adarit aslolim prokaxonam vachunk ani obheas korunk kotthin zata zalear, tumi tanchem audio rekordding aikonk zata. Vo tumi jw.org-acher songottnnen toiar kelʼlim gitam aikonk zatat, vo ek video pollounk zata. Jehova tumkam xoktivont korunk sodhta. Tor tumi magnnem korun, ani Bible-ant toxench Jehova dita tea her vostumnim tumchea magnneacho zobab sodhun, xoktivont zaunk xoktat.

10. Xoktivont zaunk bhav-bhoinnam amkam koxim modot korunk xoktat?

¹⁰ Amkam xokti diunk Jehova bhav-bhoinnank pasun uzar korunk xokta. Tor trasancho fuddo kortana, vo amkam dilʼli zobabdari purnn korunk amkam kotthin dista tednam, bhav-bhoinnam thaun amkam “khub bhuzvonn” mellonk xokta. (Kol. 4:10, 11) “Oddchonniche gorje khatir” amkam khas korun ixttanchi goroz asta. (Mho. 17:17) Ami oskot  asat oxem amkam dista tednam, amchim bhav-bhoinnam amchi gorzo purnn korunk, bhuzvonn diunk, ani visvaxiponnan Jehovachi seva korit ravonk amkam urba diunk xoktat. Atam ami Jezuchi avoi Mariek, heram thaun koxi xokti mellʼlli tem polloum-ia.

11. Mariek xoktechi goroz kiteak asli?

¹¹ Jehovachi khuxi korunk Mariek xoktechi goroz asli. Mariechem kazar zaunk naslem. Punn devdut Gabrielan, ti gorbest zatoli ani eka bhurgeak zolm ditoli mhunn sanglem tednam, ti kitli bhieli astoli tem chintat. Bhurgeank koxem vaddounchem, tea vixim tika onubhov naslo. Itlench nhoi, tika oslea bhurgeachi kallji gheunk asli, zo fuddarak Mesias zauncho aslo. Toxench, khoincheach dadlea sangata kuddicho sombond nastana ti avoi zaunchi asli. Tor hem soglem ti Juzek koxi somzaitoli asli?​—Luk. 1:26-33.

12. Lukas 1:39-45-a pormonnem, Mariek goroz ti xokti koxi mellʼlli?

¹² Hi ekdom khas ani kotthin zobabdari purnn korunk Mariek koxi xokti mellʼlli? Tinnem dusrea thaun modot ghetli. Zoxem, tinnem devdut Gabrielak tea vixim anik mahiti vicharli. (Luk. 1:34) Ani thoddea disam uprant, tichi soiri Elizabetak mellonk, ti “dongri vattarant aslolea Juda xarant” geli. Oxem korun Marien borem kelem. Elizabetan Mariechi tokhnnai keli, ani Jehovachea preronnan Mariek zolmotolea bhurgea vixim bhasaunni keli. (Lukas 1:39-45 vachat.) Tednam Marien mhunnttlem ki Jehovan “aplea hatachem boll dakhoilem.” (Luk. 1:46-51) Khorench, Jehovan Gabriel ani Elizabeta udexim Mariek xokti dili.

13. Bolivia-ntlea eke bhoinnin bhav-bhoinnanchi modot ghetli tednam tika koso faido zalo?

¹³ Marie bhaxen amkam pasun dusrea koddlean xokti mellonk xokta. Hea vixim Bolivia-ntli, Dasuri nanvache eke bhoinnicho amkam onubhov asa. Ticho bapui ekdom duent zalʼlo, ani tachea duensak ilaz naslo. Tor to hospital-ant aslo tednam, bhoinn zata titlo vell tachea sangata ravonk sodhtali. (1 Tim. 5:4) Punn oxem korop sodanch sompem naslem. Ti sangta, “Mhojean anik sosunk zaunchem na, oxem mhaka zaite pavtti distalem.” Tor tinnem dusreanchi modot ghetli kai? Survatek tinnem toxem korunk na. Ti sangta: “Bhav-bhoinnank tras zalʼle mhaka naka aslem. Toxench, ‘Jehova mhaka modot kortolo’ oxem hanvem chintlem. Punn uprant mhaka kollon ailem ki hanv mhakach dusream koddlean pois korun, svota zaun mhojeo oddchonneo suttaveo korunk proitn kortalem.” (Mho. 18:1) Tor bhoinnin tiche poristhiti vixim tichea thoddea ixttank sanglem. Ti mhunntta: “Bhav-bhoinnam udexim mhaka kitli xokti mellʼlli, tem hanv utramnim sangonk xokona. Tim hospital-ant jevonn gheun ailim, ani Bible-antlim versam sangon mhaka bhuzvonn dili. Ami ekttinch nant hem zannam zaun amkam kitli xokti melltta nhoi! Ami soglim Jehovachea vhoddlea familicho bhag zaun asat. Hi famil amchea gorzanchi kallji gheta, ami trasant astat tednam amchea sangata roddtta, ani Jehovachi seva korit ravonk amkam urba dita.”

14. Ami vhoddilam koddlean modot gheunk kiteak fatti sorchem nhoi?

¹⁴ Jehova amkam vhoddilam koddlean pasun xokti dita. Te Jehova koddlean dennim zaun asat. Tankam uzar korun to amkam xokti ani ghottai dita. (Iz. 32:1, 2) Tor tumkam koslo-i usko asa zalear, tea vixim vhoddilam lagim uloiat, ani te ditat ti modot gheunk fattim soronakat. Karonn tanchea udexim Jehova tumkam xoktivont korunk xokta.

15. Soglea Kristanvank koslo bhorvonso asa?

¹⁵ Bible-ant dilʼlea bhorvonxea udexim amkam xokti mellonk xokta. (Rom. 4:3, 18-20) Kristanv aslolean, amchea modlea choddxea zannank sobit bag zalʼlea hea prithumer,  ani thoddea zannank sorgar, sasnak jieuncho bhorvonso asa. Hea bhorvonxeak lagon, amkam trasancho fuddo korunk, porgottnnechem kam korit ravonk, ani sobhent asloleo zobabdareo samballunk xokti melltta. (1 Tes. 1:3) Heach bhorvonxea thaun apostl Pauluk pasun xokti mellʼlli.

16. Apostl Pauluk xoktechi goroz kiteak asli?

¹⁶ Korintkarank boroilʼlea chittint, Paulun apleak, eka nazuk matiechea aidonak sor kelo. Aple poristhiti vixim sangtana taka soglea vatten “chiddʼddoitat,” to ‘ghuspota,’ taka “dhumallo ditat,” ani “khala uddoitat,” oxem tannem mhunnttlem. Ani thodde pavtti, tachi poristhiti itli vaitt astali ki tacho jiv pasun dhokeant astalo. (2 Kor. 4:8-10) Paulun him utram, tachea tisrea mixinori bhonvdde vellar boroilʼlim. Punn fuddem tachi poristhiti anikui vaitt zatoli mhunn taka khobor nasli. Karonn uprant lokanchea eka zomean taka dhumallo dilo, toxench taka arrest kelo, to provas kortalo tem tarum futtlem, ani taka bondkhonnint pasun ghatlo. Tor Pauluk khoreaninch xoktechi goroz asli.

17. 2 Korintkarank 4:16-18 pormonnem, Pauluk aplea trasancho fuddo korunk koxi xokti mellʼlli?

¹⁷ Xokti mellonk Paulun aplea bhorvonxeacher dhean dilem. (2 Korintkarank 4:16-18 vachat.) Apli kudd “kabar zait voita” zalear pasun, apunn niraxi zaunchona mhunn tannem Korintantlea Kristanvank sanglem. Paulucho sorgar voicho bhorvonso taka “sogleam poros vorto” aslo. Ani to melloun gheunk, to kosle-i tras sosunk toiar aslo. Paulu sodanch hea bhorvonxea vixim niall kortalo dekhun, to “disan-dis novo zait voita” oxem taka dislem.

18. Fuddarachea bhorvonxeacher dhean dilolean bhav Tihomir ani tache familik koxi modot zata?

¹⁸ Bulgaria-ntlea Tihomir nanvachea bhavak, fuddarachea bhorvonxeacher dhean dilolean xokti mellʼlli. Thoddea vorsam poilim tacho dhaktto bhav accident zaun bhair poddlo. Thoddo temp poriant, bhavak ani tachea familik hem dukh sosunk ekdom kotthin aslem. Tor tannim, fuddarak to jivont zatolo tednam tim kitem kortolim tea vixim niall kelo. Bhav sangta: “Udharonnak, taka khoim mellttolim, tachea pasot kitem randtolim, tachea pasot party dovortolim  tednam konnank apoitolim, ani nimannea disam vixim taka kitem sangtolim, tea vixim ami sangata mellon uloitat.” Oxem kelʼlean, dukh sosunk ani Jehova tachea bhavak jivont kortolo tea disachi vatt polloit ravonk tankam modot zata mhunn Tihomir sangta.

19. Fuddarachea bhorvonxeacher tumcho visvas ghott korunk tumi kitem korunk zata? (Chitr pasun polloiat.)

¹⁹ Fuddarachea bhorvonxeacher tumcho visvas ghott korunk tumi kitem korunk zata? Tumkam hea prithumer sasnak jieuncho bhorvonso asa zalear, Bible-ant sobit bage vixim kitem sanglam tem vachat, ani tacher niall korat. (Iz. 25:8; 32:16-18) Novea sonvsarant jivit koxem astolem tem tumchea dolleam mukhar haddat. Tumi tea sobit bagent pavleant mhunn chintat. Tumkam thoim konn-konn dixtti poddtta, thoim kosle avaz ietat, ani tumkam koxem bhogta tea vixim chintat. Sobit bag koxi astoli tem tumchea dolleam mukhar haddunk, amchea prokaxonamnim hea vixim dilʼlim chitram polloiat. Fuddaracho Novo Sonvsar, Fuddarachea Jivitacher Niallttam vo Just Around The Corner, hea JW gitanche video polloiat. Tumi novea sonvsaracho bhorvonso tumchea kallza-monant rigoun dovorlear, tumi atam sostat te tras ‘lhan ani thoddeach vellache,’ oxem tumkam distolem. (2 Kor. 4:17) Tor Jehovan dilʼlea bhorvonxea vorvim to tumkam xoktivont kortolo!

20. Tumi oskot asat oxem dista zalear pasun, tumkam koxi xokti mellonk xokta?

²⁰ Ami oskot asat oxem dislear pasun, ‘Dev amchea sangata aslear, ami bollan zhuztoleanv vo amkam xokti mellttoli.’ (St. 108:13) Xokti diunk Jehovan poilim thaunuch sogli manddavoll kelea. Tor tumchi zobabdari purnn korunk, tras sosunk, vo khuxalkai samballunk kotthin dista zalear, Jehova lagim kallzan thaun magnnem korat, svotacho obheas korat, bhav-bhoinnam koddlean modot gheiat, ani fuddarachea bhorvonxea vixim niall korat. Tednam ‘Dev aplem mhoimevont boll uzar korun tumkam xokti ditolo, jea udexim tumi pasiensan ani khuxalkaien soglea vostumnim thir ravonk pavtolim.’​—Kol. 1:11.