1. Kasano a napabileg dagiti agdaydayaw iti Dios idi un-unana?

 ITI Sao ti Dios, dagiti matalek a tattao ket masansan a nadeskribir kas nabileg. Ngem narikna uray dagiti kapigsaan kadakuada a saanda a kanayon a napigsa. Kas pagarigan, iti dadduma a gundaway, narikna ni Ari David a “napigsa a kas iti bantay.” Ngem adda met dagiti tiempo a ‘nagbuteng.’ (Sal. 30:7) Uray pay no naidumduma idi ti bileg ni Samson gapu iti tulong ti espiritu ti Dios, ammona a no awan ti bileg nga aggapu iti Dios, isu ket ‘kumapuy ken agbalin a kas iti ordinario a tao.’ (Uk. 14:5, 6; 16:17) Nagbalin laeng a napigsa dagitoy a matalek a lallaki gapu iti bileg nga impaay ni Jehova.

2. Apay a naibaga ni apostol Pablo nga idi nakapuy, isu ket nabileg? (2 Corinto 12:9, 10)

² Binigbig met ni apostol Pablo a kasapulanna ti bileg nga ipaay ni Jehova. (Basaen ti 2 Corinto 12:9, 10.) Kas iti adu kadatayo, naipasango ni Pablo kadagiti problema iti salun-at. (Gal. 4:13, 14) Adda dagiti gundaway a narigatan met a mangaramid iti umiso. (Roma 7:18, 19) Ken no dadduma, nadanagan ken nagbuteng kadagiti mabalin a mapasamak kenkuana. (2 Cor. 1:8, 9) Ngem idi nakapuy ni Pablo, isu ket nagbalin a nabileg. Kasano? Ni Jehova inikkanna ni Pablo iti bileg a kasapulanna isu a pimmigsa.

3. Ania dagiti saludsod a masungbatan iti daytoy nga artikulo?

³ Ikarkari ni Jehova a papigsaennatayo met. (1 Ped. 5:10) Ngem ditay ekspektaren a maawattayo dayta a bileg nga awan ti panagregget nga aramidentayo. Kas panangyilustrar, ti makina ti mangpaandar iti lugan. Ngem masapul a baddekan ti drayber ti siliniador tapno agtaray. Kasta met, nakasagana ni Jehova a mangipaay iti bileg a kasapulantayo. Ngem adda dagiti  masapul nga aramidentayo tapno magunggonaantayo iti dayta. Ania dagiti ipapaay ni Jehova a mangpabileg kadatayo? Ken ania dagiti masapul nga aramidentayo tapno maawattayo dayta a bileg? Masungbatan dagita a saludsod bayat nga usigentayo no kasano a pinapigsa ni Jehova ti tallo a karakter ti Biblia—ni propeta Jonas, ni Maria nga ina ni Jesus, ken ni apostol Pablo. Kitaentayo met no kasano a pabpabilgen ni Jehova dagiti adipenna ita kadagiti umasping a pamay-an.

4. Kasanonatayo a mapabileg ni Jehova?

⁴ Ti maysa a pamay-an a mapabilegnatayo ni Jehova ket ti panagkararag. Kas sungbat ni Jehova kadagiti kararagtayo, ikkannatayo iti “bileg a nalablabes ngem iti gagangay.” (2 Cor. 4:7) Mapabilegtayo met no basaentayo ti Saona ken panunotentayo a naimbag dayta. (Sal. 86:11) Ti mensahe ni Jehova iti Biblia ket “nabileg.” (Heb. 4:12) No agkararagka ken Jehova ken basaem ti Saona, maawatmo ti bileg a kasapulam tapno makapagibturka, agtalinaedka a naragsak, wenno mairingpasmo ti maysa a narigat nga asaynment. Kitaentayo no kasano a pinabileg ni Jehova ni propeta Jonas.

5. Apay a kasapulan ni propeta Jonas ti bileg?

⁵ Kasapulan idi ni propeta Jonas ti bileg. Intarayanna ti narigat nga ipapaaramid kenkuana ni Jehova. Kas resultana, dandani natay gapu iti nadawel a bagyo ken pinagpeggadna ti biag dagiti kakaduana iti barko. Idi intapuakda isuna iti baybay, inalimon ti nagdakkel nga ikan. Adda ngarud isunan iti nakabutbuteng a lugar—iti nasipnget a tian ti dakkel nga ikan. Ania ngata ti narikna ni Jonas? Inekspektarna ngata nga idiayen a matay? Pinanunotna ngata a binaybay-anen ni Jehova? Permi la ketdi idi ti danag ni Jonas.

6. Sigun iti Jonas 2:1, 2, 7, ania ti nangpabileg ken Jonas bayat ti kaaddana iti tian ti ikan?

⁶ Ania ti inaramid ni Jonas tapno mapabileg bayat nga agmaymaysa iti tian ti ikan? Nagkararag. (Basaen ti Jonas 2:1, 2, 7.) Uray no nagsukir ni Jonas ken Jehova, nagbabawi ken nagtalek a denggen ni Jehova ti napakumbaba a kararagna. Pinampanunotna met a naimbag ti Kasuratan. Kasanotayo a maibaga a kasta? Adu a sasao a makita iti Salmo ti kapada ti kararagna a mabasa iti Jonas kapitulo 2. (Kas pagarigan, idilig ti Jonas 2:2, 5 iti Salmo 69:1; 86:7.) Nalawag a kabesado ni Jonas dagita a paset ti Kasuratan. Dagita a bersikulo ti nangpabileg kenkuana a tulongan ni Jehova bayat dagiti pakarigatanna. Idi agangay, naisubli ni Jonas iti takdang a nakasaganan a mangawat ken mangitungpal iti sumaruno nga asaynmentna.—Jon. 2:10–3:4.

7-8. Kasano a napabileg ti maysa a brother a taga-Taiwan bayat dagiti pakasuotanna?

⁷ Makatulong kadatayo ti ulidan ni Jonas no maipaspasangotayo iti agduduma a pakasuotan. Kas pagarigan, adda dagiti nakaro a problema iti salun-at ni Zhiming b a maysa a brother iti Taiwan. Kasta met, nagdakes ti panangtrato kenkuana dagiti kapamiliana gapu iti pammatina ken Jehova. Ngem mapabpabileg gapu iti panagkararagna ken Jehova ken panagadalna. “No dadduma, no adda dagiti problemak,” inaminna, “permi ti danagko isu a saanak a makapagpokus nga ag-personal study.” Ngem saan a simmuko. “Umuna, agkararagak ken Jehova,” imbagana, “saak ag-earphone ken dumngeg kadagiti Kingdom song. No dadduma, kantaek dagita  iti nakapsut agingga nga agkalma ti riknak. Kalpasanna, rugiakon ti agadal.”

⁸ Napabileg ni Zhiming a mangibtur kadagiti narigat a situasion gapu kadagiti nasursurona iti personal a panagadalna. Kas pagarigan, bayat nga agpapaimbag kalpasan ti operasionna, imbaga ti maysa a nars a masapul a mayalisonan iti dara gapu ta nababa ti bilang ti nalabaga a selula ti darana. Iti rabii sakbay ti operasionna, nabasa ni Zhiming ti kapadasan ti maysa a sister a kapadana ti rason a naoperaan. Nababbaba pay ti bilang ti nalabaga a selula ti darana, ngem saan a nagpayalison iti dara ket immimbag met latta. Gapu iti dayta a kapadasan, napabileg ni Zhiming nga agtalinaed a matalek.

9. No kimmapuyka gapu iti maysa a suot, ania ti aramidem? (Kitaen met dagiti ladawan.)

⁹ No adda pakasuotam, madanaganka kadi unay nga uray la dimon ammo ti ibagam iti kararagmo? Wenno awan ti pigsam nga agadal? Laglagipem a naan-anay a maawatan ni Jehova ti situasionmo. Isu nga uray no simple laeng ti kararagmo, masiguradom nga ipaayna ti eksakto a kasapulam. (Efe. 3:20) No marigatanka nga agbasa ken agadal gapu ta masakitka, nabannog, wenno madandanaganka unay, mabalinmo ti dumngeg kadagiti audio recording ti Biblia wenno kadagiti publikasiontayo a naibatay iti Biblia. Baka makatulong met no dumngegka iti maysa kadagiti kantatayo wenno agbuya iti video iti jw.org. Kayat ni Jehova a papigsaennaka ket aramidenna dayta no agkararagka kenkuana, no birokem iti Biblia ti sungbat dagiti kararagmo, ken iti dadduma pay a probisionna.

10. Kasano a mapabilegdatayo dagiti kapammatiantayo?

¹⁰ Mabalin nga usaren ni Jehova dagiti kapammatiantayo tapno mapabilegdatayo. Makaipaayda iti “kasta unay a liwliwa” no adda pakasuotantayo wenno marigatantayo a mangaramid iti narigat nga asaynment. (Col. 4:10, 11) Nangnangruna a kasapulantayo dagiti gagayyem “no adda rigat.” (Prov. 17:17) No nakapuytayo iti pisikal, emosional, ken naespirituan, matulongandatayo dagiti kapammatiantayo. Usigentayo  no kasano a ni Maria nga ina ni Jesus ket pinabileg ti sabsabali.

11. Apay a kasapulan ni Maria ti bileg?

¹¹ Kasapulan ni Maria ti bileg. Permi la ketdi ti danagna idi imbaga ni anghel Gabriel nga agsikogto uray awan asawana. Dina pay met napadasan ti mangpadakkel kadagiti annak, ngem masapul nga aywananna ti ubing nga agbalinto a Mesias. Ken gapu ta saan pay a nakidendenna ni Maria iti asinoman, kasanona nga ilawlawag amin dagita iti nobiona a ni Jose?—Luc. 1:26-33.

12. Sigun iti Lucas 1:39-45, kasano a napabileg ni Maria?

¹² Kasano a napabileg ni Maria tapno maitungpalna ti naidumduma ken narigat nga annongenna? Nagpatulong iti sabsabali. Kas pagarigan, nagkiddaw ken Gabriel iti kanayonan nga impormasion maipapan iti annongenna. (Luc. 1:34) Di nagbayag, napan “iti kabambantayan” ti Juda tapno bisitaenna ti kabagianna a ni Elisabet. Imbag la ketdin ta napan. Kinomendaran ni Elisabet ni Maria ken inwanwan ni Jehova tapno ibagana ti makaparegta a padto maipapan iti sikog ni Maria. (Basaen ti Lucas 1:39-45.) Imbaga ni Maria a nagtignay ni Jehova “babaen ti nabileg nga imana.” (Luc. 1:46-51) Inusar ni Jehova da Gabriel ken Elisabet a mangpabileg ken Maria.

13. Kasano a nagunggonaan ti maysa a sister a taga-Bolivia iti panagpatulongna kadagiti kapammatianna?

¹³ Kas ken Maria, mapabilegdaka met dagiti kapammatiantayo. Kasapulan ni Dasuri a maysa a sister iti Bolivia ti kasta a bileg. Idi nadayagnos nga adda din maagasan a sakit ni tatangna ken nayospital, nagboluntario ni Dasuri a mangaywan kenkuana. (1 Tim. 5:4) Saan a kanayon a nalaka dayta. Inaminna, “Namin-adu a nariknak a diakon kaya.” Nagpatulong kadi? Idi damo, saan. “Diak kayat nga istorbuen dagiti kakabsat,” imbagana. “Inrasonko, ‘Ni Jehova ti makaammon a tumulong kaniak.’ Ngem idi kuan, naamirisko a no isinsinak ti bagik, kasla solsoluek dagiti problemak.” (Prov. 18:1) Napanunot ni Dasuri a suratan ti dadduma a gagayyemna ken inlawlawagna ti situasionna. “Diak mailadawan no kasano a napabilegdak dagitoy nga ipatpategko a kapammatiak,” imbagana. “Imbalonandakami iti makan iti ospital ken pinabilegdak kadagiti makaliwliwa a teksto. Nagmayat no mariknam a saanka nga agmaymaysa. Pasettayo ti dakkel a pamilia ni Jehova—pamilia a situtulok a tumulong, makipagsangit, ken mangpabileg kenka a saan a sumuksuko.”

14. Apay a masapul nga awatentayo ti tulong dagiti panglakayen?

¹⁴ Ti maysa a pamay-an a mapabilegnatayo ni Jehova ket babaen kadagiti panglakayen. Sagutna ida kadatayo tapno pabilgen ken bang-arannatayo. (Isa. 32:1, 2) Isu a no madanaganka, ipakaammom kadagiti panglakayen dagiti marikriknam. Awatem ti tulong nga ipaayda ket agyamanka kadakuada. Us-usaren ida ni Jehova tapno mapapigsanaka.

15. Ania a namnama ti ipatpateg unay ti amin a Kristiano?

¹⁵ Mapabilegnatayo ti namnamatayo a naibatay iti Biblia. (Roma 4:3, 18-20) Kas Kristiano, adda nakapatpateg a namnamatayo nga agbiag nga agnanayon—iti man maisublinto a paraiso a daga wenno iti nailangitan a Pagarian. Mapabilegnatayo ti namnamatayo a mangibtur kadagiti suot, mangikasaba iti naimbag a damag, ken mangitungpal iti nadumaduma nga asaynmenttayo iti kongregasion. (1 Tes. 1:3) Dayta met la a namnama ti nangpabileg idi ken apostol Pablo.

16. Apay a kasapulan idi ni apostol Pablo ti bileg?

 ¹⁶ Kasapulan idi ni Pablo ti bileg. Iti suratna kadagiti taga-Corinto, inkomparana ti bagina iti narasi a damili a pagkargaan. ‘Naparigat,’ “nariribukan,” ‘naidadanes,’ ken ‘natuang.’ Nagpeggad pay ketdi ti biagna. (2 Cor. 4:8-10) Insurat ni Pablo dagita a sasao bayat ti maikatlo a panagmisionerona. Mabalin a dina ammo idi a saan pay gayam nga agpatingga dagiti problemana. Mapasarannanto pay ti kinaranggas dagiti manangriribuk, pannakaaresto, pannakarba ti barko, ken pannakaibalud.

17. Sigun iti 2 Corinto 4:16-18, ania ti nangpabileg ken Pablo a mangibtur kadagiti suot?

¹⁷ Bimmileg ni Pablo nga agibtur ta nagpokus iti namnamana. (Basaen ti 2 Corinto 4:16-18.) Imbagana kadagiti taga-Corinto nga uray no “kumapkapuy” ti pisikal a bagina, dina ipalubos a dayta ti mangupay kenkuana. Nagpokus ni Pablo iti masakbayanna. Ti namnamana nga agbiag nga agnanayon idiay langit ket “dakdakkel ken agnanayon.” Nakasagana a mangibtur iti aniaman a rigat tapno magun-odanna dayta. Kanayon a pinampanunot ni Pablo dayta a namnamana. Kas resultana, nariknana nga “inaldaw a mapabpabaro.”

18. Kasano a ti namnama ti nangpabileg ken Tihomir ken iti pamiliana?

¹⁸ Napabileg ni Tihomir a brother idiay Bulgaria gapu iti namnamana. Sumagmamano a tawenen ti napalabas, natay iti aksidente ti adingna a ni Zdravko. Permi idi ti ladingit ni Tihomir. Tapno mailiwliwagna ken ti pamiliana ti nasaem a riknada, im-imadyinenda ti mapasamak inton panagungar. Inlawlawagna: “Kas pagarigan, pagsasaritaanmi no sadino ti pangsabatanminto ken Zdravko, anianto dagiti taraon nga isaganami para kenkuana, siasinonto dagiti imbitaranmi iti angayenmi a kaunaan a party a kaduami isuna, ken no anianto dagiti iyestoriami kenkuana maipapan iti maudi nga al-aldaw.” Imbaga ni Tihomir a gapu ta kanayon a pampanunotenda a sangapamiliaan ti namnamada, mapabpabilegda nga agtultuloy nga agibtur ken agtultuloy nga aguray iti oras a pagungarenen ni Jehova ni adingna.

19. Ania ti mabalinmo nga aramiden tapno bumileg ti namnamam? (Kitaen met ti ladawan.)

 ¹⁹ Kasanom a mapabileg ti namnamam? Kas pagarigan, no ti namnamam ket agbiag nga agnanayon ditoy daga, basaem ti panangdeskribir ti Biblia iti Paraiso ken utobem dayta. (Isa. 25:8; 32:16-18) Panunotem a naimbag no anianto ti kasasaad ti biagtayo iti baro a lubong. Imadyinem nga addakan sadiay. Siasino dagiti makitkitam? Ania dagiti mangmangngegmo? Ania ti marikriknam? Tapno lallalo a rumayray ti imahinasionmo, kitaem dagiti ladawan kadagiti publikasiontayo maipapan iti Paraiso wenno agbuyaka iti music video, kas iti Idiay Paraiso, Dayta ket Asidegen, wenno Iladawam. No kanayon a panunotentayo ti namnamatayo maipapan iti baro a lubong, mariknatayto a dagiti problematayo ket “apagbiit ken nalag-an.” (2 Cor. 4:17) Babaen ti namnama nga impaay kenka ni Jehova, mapapigsanaka.

20. Uray no mariknatayo a nakapuytayo, kasanotayo a mapabileg?

²⁰ Uray no mariknatayo a nakapuytayo, “ti Dios ti mangpabilegto kadatayo.” (Sal. 108:13) Addan dagiti impaay ni Jehova a mangpabileg kenka. Isu a tapno maitungpalmo ti asaynmentmo, maibturam ti suot, wenno agtalinaedka a naragsak, makatulong kenka ti napasnek a panagkararagmo ken Jehova ken agpaiwanwanka kenkuana babaen ti personal a panagadal. Awatem ti pammaregta dagiti kapammatiam. Pagtalinaedem a naraniag ti namnamam. Iti kasta, ‘ti nadayag a pannakabalinna ti mangted kenka iti amin a bileg a kasapulam tapno siraragsak ken siaanus a makapagibturka.’—Col. 1:11.