1. Moi prat na sadi dung ai mayam ni hpe Karai Kasang gara hku n-gun jaw ai kun?

 SADI dung ai ni hpe atsam marai rawng ai ni hku nna, Chyum Laika kaw tsun chye ai. Raitim, atsam marai grai rawng ai ni pyi, n-gun n rawng ai ngu hkamsha ai aten ni nga ai. Ga shadawn, Hkawhkam Dawi nga yang, “bum zawn ngang kang” ai ngu hkamsha ai aten ni nga ai zawn, kalang lang “hkrit” ai ngu hkamsha ai aten ni mung nga wa ai. (Shk 30:7, NWT) Samson mung, Karai a chyoi pra ai wenyi a majaw, laklai ai n-gun atsam nga wa ai raitim, Karai jaw ai n-gun atsam n nga mat yang, “n-gun daw nna gawng kya ai hte masha gale zawn rai” mat na hpe yin la ai. (Trg 14:5, 6; 16:17) Yehowa jaw da ai majaw sha, sadi dung ai ni n-gun atsam nga taw ai re.

2. N-gun yawm nga tim, n-gun atsam hte hpring nga ai ngu Pawlu hpa majaw tsun ai kun? (2 Korinhtu 12:9, 10)

² Yehowa kaw na, n-gun atsam ra ai ngu ai hpe kasa Pawlu yin la ai. (2 Korinhtu 12:9, 10 hpe hti u.) Masha law law zawn, Pawlu hta hkamja lam manghkang nga ai. (Gal 4:13, 14) Jaw ai hpe galaw na matu yak ai aten ni nga ai. (Rom 7:18, 19) Shawng hta hpa byin na hpe n chye ai majaw, myit tsang ai aten ni nga ai. (2 Ko 1:8, 9) Raitim, n-gun yawm ai aten hta Pawlu n-gun atsam hpring nga ai. Gara hku nna kun? Ra nga ai n-gun atsam hpe Yehowa jaw ai majaw re.

3. Ndai sumhpa hta hpa lam hkaja na kun?

³ Anhte hpe mung, Yehowa n-gun atsam jaw na ngu ga sadi jaw da ai. (1 Pe 5:10) Raitim, tinang hpa n galaw ai sha, Karai Kasang kaw na n-gun atsam lu na ngu n mai myit mada ai. Ga  shadawn, mawdaw jak kaw na pru ai n-gun a majaw, mawdaw hkawm ai raitim, gau ai wa mung liba kabye ra ai. Dai zawn sha, ra ai n-gun atsam jaw na matu, Yehowa gaw jin jin re. N-gun atsam lu na matu tinang galaw ra ai hpe gaw galaw ra ai. Rai yang, anhte n-gun atsam rawng na matu, Yehowa hpa ni lajang da ya ai kun? Karai jaw ai n-gun atsam lu na matu, anhte hpa galaw ra na kun? Ndai ga san ni a mahtai hpe chye lu na matu myihtoi Yona, Yesu a kanu Mari, kasa Pawlu ni hpe Yehowa gara hku n-gun jaw wa ai lam, dai ni aten na mayam ni hpe mung, gara hku n-gun jaw nga ai lam bawngban mat ga.

4. Yehowa kaw na n-gun atsam lu na matu hpa galaw ra ai kun?

⁴ Yehowa kaw na n-gun atsam lu mai ai lam langai gaw, akyu hpyi ai lam re. Akyu hpyi ga hpe mahtai jaw ai hku nna, “chyahtum chyalai re ai n-gun atsam” hpe Yehowa jaw lu ai. (2 Ko 4:7) Chyum Laika hti ai, myit sawn sumru ai mung n-gun atsam lu shangun ai. (Shk 86:11) Chyum Laika hta lawm ai Yehowa a Mungga mung, “alet nga ai.” (Heb 4:12) Akyu hpyi ai shaloi, Chyum Laika hti ai shaloi, hkamjan lu na matu, matut kabu gara lu na matu, yak ai lit ni hpe gun hpai lu na matu, ra nga ai n-gun atsam lu wa na re. Myihtoi Yona hpe Yehowa gara hku n-gun jaw ya ai lam hkaja yu ga.

5. Myihtoi Yona hpa majaw n-gun atsam ra wa ai kun?

⁵ Myihtoi Yona n-gun atsam ra wa ai. Yehowa dat ai shara de n sa gwi ai majaw, sanghpaw jawn nna hprawng mat ai. Tinang hte sanghpaw ntsa hta lawm ai ni yawng, nbung laru hte hkrum nna si na loi sha ra ai. Yona hpe sanghpaw kaw na masha ni, panglai de kabai jahkrat dat ai shaloi, nga kaba langai mayu kau nna, nga a kan hta nsin chyip nga ra wa ai. Yona gara hku hkamsha nga na kun? Si ra sana, Yehowa kau da mat sai ngu myit taw na kun? Grai myit tsang taw na gaw teng sha re.

6. Yona 2:2, 3, 8 hku nga yang, nga kan hta nga taw ai shaloi, shi gara hku n-gun lu wa ai kun?

⁶ Tinang hkrai sha rai nna, hkamsha taw ai aten hta n-gun atsam lu na matu Yona hpa galaw ai kun? Shi akyu hpyi ai. (Yona 2:2, 3, 8 hpe hti u.) Yehowa a ga n madat nna hprawng mat ai raitim, ya na zawn myit malai lu nna, shagrit shanem let akyu hpyi ai ga hpe Yehowa madat ya na hpe kam ai. Chyum daw ni hpe bai myit ai. Hpa majaw dai hku lu tsun ai kun? Yona Laika daw kaba 2 hta lawm ai, Yona a akyu hpyi ga ni hta, Shakawn Kungdawn Laika kaw na ga ni law law lawm ai majaw re. (Ga shadawn, Yona 2:3, 6 hte Shakawn 69:1; 86:7 ni hte shingdaw yu u.) Dai chyum daw ni hpe Yona atsawm chye ai gaw dan dawng nga ai. Si wa mahka hta, dai chyum daw ni hpe myit dat ai shaloi, Yehowa karum ya na hpe tsep kawp kam mat ai. Yehowa gaja wa karum ya ai. Karai jaw ai lit hpe gun hpai na matu Yona jin jin rai nga sai.—Yon 2:10–3:4.

7-8. Htaiwan mungdan kaw na hpunau langai mayak mahkak hkrum ai shaloi, gara hku n-gun lu wa ai kun?

⁷ Mayak mahkak amyu myu hkrum nga ai aten hta, Yona a mabyin gaw anhte hpe karum ya lu ai. Ga shadawn, Htaiwan mungdan kaw na, hpunau Zaimin b gaw grai hkam n kaja ai. Dai sha n-ga, Yehowa hpe nawku ai majaw, nta masha ni grai ninghkap ai. Zaimin gaw akyu hpyi, hkaja nna n-gun la ai. “Kalang lang manghkang ni pru wa ai shaloi, grai myit tsang ai majaw, tinang hkrai hkaja na matu myit hpe azim sha n lu tawn ai” ngu tsun ai. Raitim, Yehowa hpe kamhpa ai. “Shawng nnan akyu  hpyi ai. Ngut yang, Mungdan mahkawn ni madat ai. Kalang lang hkan mahkawn ai. Myit zim mat yang she hkaja ai” ngu tsun ai.

⁸ Tinang hkrai hkaja ai lam kaw na chye wa ai lam ni a majaw, Zaimin mayak mahkak ni hpe hkamjan na matu n-gun lu wa ai. Kalang mi hta, ga tsi lajang ngut ai hpang nau pyi n hkyam sa shi ai, sai hkyeng di yawm taw ai majaw, sai bang ra ai ngu sarama langai sa tsun ai. Raitim, n ga shi ai shana hta sha, nauna langai a mahkrum madup hpe shi hti da ai. Dai nauna a masa hte shi a masa gaw bung taw ai. Nauna a sai hkyeng di yawm ai gaw, shi hta grau sawng ai. Nauna gaw sai n bang ai raitim, bai hkyam sa wa ai. Dai mahkrum madup hpe hti da ai majaw, matut sadi dung na matu Zaimin n-gun lu wa ai.

9. Mayak mahkak langai a majaw myit daw wa yang hpa galaw mai ai kun? (Sumla ni hpe mung yu u.)

⁹ Mayak mahkak hkrum ai shaloi, grai myit tsang ai majaw hpa akyu hpyi ra na hpe pyi n chye ai baw byin ga ai kun? Hkaja na matu n-gun n nga ai ngu hkamsha ga ai kun? Na a masa hpe Yehowa tsep kawp chye na ai hpe dum u. Kadun mi sha hpyi yang pyi, ra ai hpe tup hkrak Karai Kasang jaw na hpe kam u. (Ehp 3:20) Myit hte hkum hkrang grai pu ba ai majaw, Chyum Laika n lu hti ai, n hkaja lu ai nga yang, Chyum Laika, Chyum Laika hte seng ai laili laika ni nsen bang da ai hpe madat mai ai. jw.org kaw na mahkawn langai ngai hpe madat mai ai. Video yu mai ai. Akyu hpyi ai, Chyum Laika hte Chyum Laika hte seng ai laili laika ni kaw na akyu hpyi ga a mahtai tam ai gaw, tinang hpe n-gun atsam jaw na matu Karai Kasang hpe lam hpaw ya nga ai re.

10. Hpunau nauna ni gaw anhte hpe gara hku n-gun lu shangun ai kun?

¹⁰ Laksan hku nna, “ru yak hkrum ai nhtoi” hta anhte jinghku ra ai. (Gsh 17:17) Dai majaw, anhte hpe n-gun atsam jaw na matu, Hkristan hpunau nauna ni hpe Yehowa akyu jashawn lu ai. Mayak mahkak hkrum ai aten hta, yak ai lit ni hpe gun hpai ra ai aten ni hta, shanhte “shingdep shingtau” ya lu ai. (Kol 4:10, 11) Myit masin, hkum hkrang hte wenyi lam ni hta karum ya lu ai. Yesu a kanu Mari  gaw, kaga masha ni kaw na gara hku n-gun la wa ai hpe yu yu ga.

11. Mari hpa majaw n-gun atsam ra ai kun?

¹¹ Mari n-gun atsam ra wa ai. N hkungran shi tim, na-um nasin byin wa sana lam, lamu kasa Gabriela kaw na na lu ai shaloi, Mari kade daram myit tsang mat na hpe myit yu u. Kasha bau maka ai mahkrum madup n nga shi ai. Ya, ma langai hpe bau maka ra sana re. Bau maka ra na gaw, Meshia byin wa na wa re. Mahkawn raitim, na-um nasin byin nga sai hpe mahtan da ai Yosep hpe gara hku sanglang dan na?—Luk 1:26-33.

12. Luka 1:39-45 hku nga yang, Mari gara hku n-gun atsam lu wa ai kun?

¹² Laklai nna grai yak ai ndai lit hpe gun hpai na matu, ra ai n-gun atsam hpe Mari gara hku lu wa ai kun? Kaga ni kaw Mari karum hpyi ai. Ga shadawn, lit hte seng nna kahtap sanglang dan na matu, Gabriela hpe hpyi shawn ai. (Luk 1:34) Kade n na yang, “bum ga e nga ai mare” na jinghku Elisabet hpang de sa chyai ai. Sa chyai ai jaw mat ai. Mari hpe Elisabet shakawn ai. Garai n shangai shi ai ma hte seng ai n-gun lu hpa myihtoi ga hpe, chyoi pra ai wenyi shadut ya ai hku nna tsun dan ai. (Luka 1:39-45 hpe hti u.) Yehowa a “lahpum hte atsam” madun ai ngu Mari hkamsha ai. (Luk 1:46-51) Gabriela hte Elisabet hku nna Mari hpe Yehowa n-gun atsam jaw ai.

13. Bolibiya mungdan kaw na nauna langai gaw hpunau nauna ni hpe karum hpyi ai majaw hpa akyu lu wa ai kun?

¹³ Mari zawn sha, nang mung hpunau nauna ni kaw na n-gun atsam lu mai ai. Bolibiya kaw na nauna Dasuri dai zawn hkrum wa ai. Nauna a kawa grai machyi sawng nna, tsi rung lung taw ra ai. N mai tsi sai. Kawa a makau hta dang lu ai daram Dasuri nga mayu ai. (1 Tm 5:4) Loi gaw n loi ai. “N dang hkam sai ngu chyahkring hkring hkamsha ai” ngu Dasuri tsun ai. Kaga ni kaw karum hpyi ai kun? Shawng nnan hta gaw n hpyi ai. “Hpunau nauna ni hpe lit n kam shali ai. Ngai hpe n-gun atsam jaw na gaw, Yehowa she re ngu myit hkrup ai. Raitim, san san nga ai gaw, manghkang hpe tinang hkrai sha gun nga ai hpe chye na wa ai” ngu tsun ai. (Gsh 18:1) Manang nkau hpang de masa lam hpe laika ka nna sanglang dan ai. “Hpunau nauna ni a majaw, kade daram n-gun lu wa ai hpe chye pyi n chye tsun dan mat sai. Tsi rung de malu masha ni hpe la sa wa ya ai. Shalan shabran lam lu shangun ai chyum daw ni hti dan ai. Tinang hkrai sha n re ai, ngu ai hkamsha lam gaw, grai myit pyaw shangun ai. Tinang hte rau nga ya na, rau hkrap ya na, rau tawt lai ya na nta masha ni hpe ngai lu da ai” ngu Dasuri tsun ai.

14. Myitsu salang ni a karum shingtau hpe hpa majaw hkap la ging ai kun?

¹⁴ Anhte hpe Yehowa n-gun atsam jaw ai kaga lam langai gaw, myitsu salang ni hku nna re. Myitsu salang ni gaw, shalan shabran lam lu na matu Yehowa akyu jashawn ai kumhpa ni re. (Esa 32:1, 2) Dai majaw, myit tsang ai shaloi, myitsu salang ni hpe tsun dan u. Karum shingtau jaw wa ai shaloi kabu gara hte hkap la u. Myitsu salang ni kaw nna nang hpe Yehowa n-gun atsam jaw ya lu ai.

15. Hkristan yawng gara myit mada lam hpe manu shadan ma ai kun?

¹⁵ Chyum Laika ga sadi ni mung myit mada lam hte n-gun lu shangun ai. (Rom 4:3, 18-20) Mungkan ga hparadisu hta raitim, sumsing mungdan hta raitim, htani htana asak hkrung na ngu ai, manu dan ai myit mada lam hpe anhte lu da ai. Dai myit mada lam gaw, mayak mahkak ni hpe hkamjan lu na matu, kaga ni hpe kabu gara shiga hkaw tsun na matu, nawku hpung lit amyu myu hpe gun hpai na matu  n-gun lu shangun ai. (1 Ht 1:3) Myit mada lam a majaw kasa Pawlu n-gun lu wa ai re.

16. Kasa Pawlu hpa majaw n-gun atsam ra wa ai kun?

¹⁶ Pawlu n-gun atsam ra wa ai. Korinhtu nawku hpung de ka ai laika hta, tinang hkum tinang ga di bu hte shingdaw nna tsun wa ai. Kasa Pawlu “tsin-yam tsindam hkrum” wa ai, “myit ru myit tsang hkrum” wa ai, “zingri zingrat hkrum” wa ai, “ari gumpye kau ai hkrum” wa ai. Asak shoihpa pyi hkrum wa ai. (2 Ko 4:8-10) Dai ga ni hpe masum lang ngu na sasana hkrun lam laman hta Pawlu ka wa ai re. Grai sawng sai ngu shadu nna dai lam ni hpe ka wa ai raitim, dai hta grau sawng ai ni hpe naw hkrum ra na. Ngam ai hkrun lam hta, jawm gasat ai, rim hkrum ai, sanghpaw hten ai, htawng jahkrat hkrum ai lam ni hkrum wa ai.

17. 2 Korinhtu 4:16-18 hku nga yang, mayak mahkak ni hpe hkamjan lu na matu Pawlu hpe hpa gaw n-gun lu shangun ai kun?

¹⁷ Myit mada lam hpe myit maju jung ai majaw, Pawlu hkamjan lu ai n-gun atsam nga wa ai. (2 Korinhtu 4:16-18 hpe hti u.) Hkum hkrang “hten bya hkrum” tim, de a majaw myit n daw ai ngu Korinhtu hpung masha ni hpe Pawlu tsun dan ai. Htawm hpang hpe myit maju jung ai. Sumsing lamu hta lu wa na htani htana asak gaw, “nachying kaba” ai majaw, hpa mayak mahkak mi hkrum tim, ging dan ai ngu Pawlu hkamsha ai. Myit mada lam hpe Pawlu myit sawn sumru ai. Myit mada lam “lani hte lani prat bai pra wa nga ai” ngu Pawlu hkamsha ai.

18. Htawm hpang myit mada lam a majaw Tihomiya a dinghku gaw gara hku n-gun lu wa ai kun?

¹⁸ Htawm hpang myit mada lam a majaw, Bugeriya mungdan kaw na hpunau Tihomiya n-gun lu wa ai. Lai wa sai shaning loi mi hta, kanau Zadrabago gaw mawdaw adawt nna si mat ai. Aten tsawm ra na ai du hkra Tihomiya grai yawn ai. Hkamjan lu na matu, shanhte a dinghku gaw bai hkrung rawt ai lam hpe shingran yu ai. Shi ndai hku tsun ai: “Ga shadawn, Zadrabago hpe gara shara kaw hkrum na, hpa ni shadu jaw na, shawng nnan hkrum  na Pati hta kadai ni hpe saw shaga na, hpang jahtum nhtoi ni hte seng nna hpa ni hpe tsun dan na ngu ai lam ni hpe anhte myit ai.” Htawm hpang myit mada lam hpe myit maju jung ai gaw, dinghku ting hkamjan lu na matu, Zadrabago hpe Yehowa jahkrung sharawt ya na aten hpe myit mada nga na matu karum ya ai.

19. Myit mada lam ngang kang nga na matu nang hpa galaw mai ai kun? (Sumla hpe mung yu u.)

¹⁹ Myit mada lam hpe gara hku shangang shakang lu na kun? Nang gaw, mungkan ga ntsa htani htana asak myit mada lam nga ai wa rai yang, Hparadisu a lam hti nna myit sawn sumru u. (Esa 25:8; 32:16-18) Mungkan nnan asak aprat gaw gara hku rai na hpe shingran yu u, myit yu u. Mungkan nnan hta du taw nna, kadai hte hkrum ai, hpa nsen ni na ai, gara hku hkamsha ai hpe shingran yu u. Uhpung kaw na sumla ni hpe yu nna, hkrang pru wa hkra galaw u. Mungkan Nnan Du Hkyen Sai, Grai Ni Nga Sai, Shingran Yu Ga ngu ai mahkawn ni hpe madat u. Dai lam ni myit hta jung nga yang, ya hkrum nga ai mayak mahkak ni gaw, chyahkring sha rai nna “atsang sha rai nga ai” ngu hkamsha na re. (2 Ko 4:18) Karai jaw ai myit mada lam gaw, mayak mahkak ni hpe hkamjan lu na matu karum ya ai.

20. N-gun yawm ai aten hta pyi gara hku nna n-gun atsam lu mai ai kun?

²⁰ N-gun yawm ai aten hta pyi, “Karai Kasang kaw na anhte n-gun” lu la ai. (Shk 108:13, NWT) N-gun lu na matu, ra nga ai ni hpe Karai Kasang lajang da ya ai. Dai majaw, lit langai gun hpai na matu, matut hkamjan na matu, matut kabu gara na matu karum shingtau ra ai shaloi, Yehowa kaw akyu hpyi u. Tinang hkrai hkaja ai lam galaw nna, Karai a lam matsun tam u. Hpunau nauna ni a n-gun jaw lam hpe hkap la u. Tinang a myit mada lam hpe shangang shakang nga u. Rai yang, “[Karai Kasang] a hpung shingkang re ai n-gun nga ai hte maren, shakut sharang nna kabu gara ai hte myit galu” nga na re.—Kol 1:11.