1. Guutip itsaq kiffani qanoq nakussatsittarpai?

 JEHOVAMUT kiffartortut aalajaatsut Biibilimi sapiitsutut nukittuutullu allaatigineqarajuttarput. Ilaannikkulli taamatut misigineq ajorput. Assersuutigalugu kunngi Daavi ilaannikkut misigisarpoq sapiissuseqangaarluni ilaannikkulli ‘annilaangangaaler­tarluni’. (Tuss 30:8) Samsonni Guutip anersaavanit immikkut ittumik nukittuun­ngortin­neqartarpoq, nalunngilaali Guutimit pissatsin­neqanngikkuni ‘nukini annaassallugit inuttullu allatut sanngiitsigilis­salluni’. (Eqq 14:5, 6; 16:17) Aap, angutit aalajaatsut taakku nukittupput Jehovamit pissatsin­neqaramik.

2. Sooq apustili Paulusi oqarpa sanngiik­kaangami nukittusarluni? (Korintimiunut 2. 12:9, 10)

² Aamma apustilip Paulusip nalunngilaa Jehovamit nakussatsin­neqartariaqarluni. (Korintimiunut 2. 12:9, 10 atuakkit). Amerlanersatta atugaqar­nerattut Paulusi peqqiil­liortarpoq. (Gal 4:13, 14) Ilaannikkut eqqortulior­nissani sapernar­tittarpaa. (Rom 7:18, 19) Aamma ernumasarpoq. (Kor 2. 1:8, 9) Sanngiik­kaangamili nukittusarpoq. Qanoq? Jehovamit pisariaqar­titaminik pissatsin­neqartarami.

3. Allaaserisami matumani apeqqutit suut akissutis­sarsissavagut?

³ Jehova neriorsuivoq aamma uagut nakussatsin­niarluta. (Pet 1. 5:10) Taassumanngali ikiorneqas­sagutta nammineq iliuuseqar­tariaqarpugut. Assersuuteqariarta: Motoori biilinik ingerlatitsisinnaavoq. Biililli ingerlas­sappata aquttup sukkalisaataa ilalaar­tariaqarpaa. Taamatuttaaq Jehovap pisariaqar­titatsinnik nakussatsik­kusuttarpaatigut. Uagulli ikiuinera  iluaqutigiumallugu iliuuseqar­tariaqarpugut. Jehovap sutigut nakussatsit­tarpaatigut? Nakussatsik­kumallutalu susariaqarpugut? Taakku akissutis­sarsiumallugit misissus­savarput Jehovap pruffiiti Juuna, Jiisusip arnaa Mariia aamma apustili Paulusi qanoq ikiorai. Aamma paasissavarput Jehovap nalitsinni kiffani qanoq assingusumik nakussatsittarai.  

4. Jehovamit qanoq nakussatsin­neqarsin­naavugut?

⁴ Ilaatigut qinunikkut Jehovamit nakussatsin­neqarsin­naavugut. Qinnutigut akillugit Jehovap ‘pissaanermik nalingin­naanngitsumik’ tunisin­naavaatigut. (Kor 2. 4:7) Aamma Biibilimik atuarnikkut eqqarsaatigin­neqqissaar­nikkullu nakussatsin­neqarsin­naavugut. (Tuss 86:11) Biibilimi Jehovap uagutsinnut oqariartuutaa ‘pissaaneqarpoq’. (Hebr 4:12) Jehovamut qinugaangavit oqaasianillu atuaraangavit pinertusaar­nissamut, nuannaar­tuarnissamut imaannaan­ngitsumil­luunniit suliassamik naammas­sinninnissamut pisariaqar­titannik nakussatsin­neqartarputit. Maluginiaruk Jehovap pruffiiti Juuna qanoq nakussatsikkaa.

5. Sooq pruffiiti Juuna nakussatsin­neqartariaqarpa?

⁵ Pruffiiti Juuna nakussatsin­neqartariaqarpoq. Jehovamit naammas­sisinnaan­ngisorisaminik suliassin­neqarami umiarsuarmut ikilluni qimaasimavoq. Kingunerisaanik anorersuarsioramik inuunini annaangajappaa umiarsuarmilu ilaaqatimi inuunerat navianar­torsior­tillugu. Immamut naloriun­neqarami aalisagarsuarmit iineqarpoq. Aalisagarsuup naavata iluani taartumiitilluni qanoq misigisimas­sasoraajuk? Immaqa aallaqqaammut eqqarsarsimassaaq tassani toqussalluni. Immaqalu misigisimavoq Jehovamit qimanneqarluni. Juuna annilaangangaarsimassaaq.

6. Jona 2:2, 3, 8-lu naapertorlugit aalisagarsuup iluaniitilluni Juunap suna nakussatsis­sutigaa?

⁶ Aalisagarsuup iluani taartuin­narsuarmi Juuna nakussatsin­neqarumalluni sua? Jehovamut qinuvoq. (Jona 2:2, 3, 8 atuakkit). Jehovap peqqussutaa maleruarsiman­ngikkaluarlugu qularinngilaa maniguulluni peqqissimillunilu qinnutini Jehovamit tusarneqassasoq. Juuna aamma Allakkanik Illernartunik eqqarsaatigin­neqqissaarpoq. Tamanna qanoq nalunngilarput? Qinnutimini, Jonamik allakkani kapitali 2-mi atuarneqarsin­naasumi, oqaatsit oqaaseqatigiillu Tussiaatineersut atortarmagit. (Assersuutigalugu Jona 2:3, 6 Tussiaat 69:2; 86:7-imut naleqqiukkit). Juunap allassimaffiit taakku ilisimalluarai ersarippoq. Taakkuninngalu eqqarsaatigin­neqqissaarami Jehovamit ikiorneqar­nissani upperil­luinnalerpaa. Jehovamit annaanneqarpoq suliassin­neqaqqileramilu naalappoq. – Jon 2:11–3:4.

7-8. Qatanngut angut Taiwanimeersoq misilin­neqarnermini qanoq nakussatsin­neqarpa?

⁷ Assigiin­ngitsutigut misilin­neqarnitsinni Juunap maligassiaa tuppallersaatigisin­naavarput. Assersuutigalugu qatanngut angut Taiwanimeersoq, Zhiming, b peqqiil­liungaarpoq. Tamatuma saniatigut Jehovamut uppertuunini pissutigalugu ilaquttaminit sakkortuumik akerlilersor­neqarpoq. Qinunikkut misissueq­qissaar­nikkullu Jehovamit nakussatsin­neqartarpoq. Ima oqarpoq: “Ilaannikkut ajornar­torsiuleraangama isumakulungaarama eqqissiveqan­nginnermik atuaqqis­saarnissara aallartinneq ajulertarpara.” Jehovalli ikiuinissaa tutsuigiuaannarpaa. Ima nangippoq: “Jehovamut qinoqqaariarlunga  siutinut naalaarutikka ateriarlugit erinarsuutigut tusarnaar­tarpakka, ilaannikkullu eqqissinissama tungaanut nipikitsun­nguamik erinarsoqataasarpunga. Taava misissuillunga aallartit­tarpunga.”

⁸ Zhimingip pisumi anigoruminaatsumi atuarsimasani nakussatsis­sutigai. Assersuutigalugu pilatserujus­suarnermi kingorna peqqissaasumit oqarfigineqarpoq timimini aap aappaluttortai annikimmata aalersor­tinneqar­tariaqartoq. Pilatsin­nissani aqaguttoq Zhiming qatanngut arnaq aamma taamatut pilatsis­simasoq pillugu atuarpoq. Qatanngutip arnap aavata aappaluttortai annikin­nerujus­suusimapput, taamaattorli aalersor­tikkusus­simanngilaq, kingornalu peqqissivoq. Misigisaa Zhimingip aalajaat­tuarnis­saminut nakussatsis­sutigaa.

9. Misilin­neqarnermi sanngiitsutut misigiguit susinnaavit? (Aamma assilissat takukkit).

⁹ Misilin­neqartillutit misiginikuuit isumakulunnermik allaat qinunikkut qanoq oqassanerlutit nalullugu? Imaluunniit misigivit misissuinissannut qasuallaarlutit? Eqqaamajuk Jehovap atukkatit paasilluinnarai. Naatsun­nguamil­luunniit qinunikkut saaffigigaluarukku qularutigis­sanngilat pisariaqar­titarluinnarnik tuniumaaraatit. (Ef 3:20) Timikkut misigis­sutsikkul­luunniit anniarnerit pissutigalugu atuarnissat ajornakusoor­tikkukku Biibilimik atuffas­sinerit imaluunniit Biibililersaarutitsinnik immiussat tusarnaar­tarsinnaavatit. Aamma erinarsuutitsinnik tusarnaarneq jw.org-imiluunniit videunik isiginnaarneq iluaqutigisin­naavatit. Jehovap nakussatsik­kusuppaatit. Qinunikkullu saaffigigukku aamma Biibilimi Biibililersaarutinilu pilersitaani qinnutinnut akissutis­sarsiortaruit nakussatsis­savaatit.

10. Uppeqatitsinnit qanoq nakussatsin­neqarsin­naavugut?

¹⁰ Jehovap uppeqatigut aqqutigalugit nakussatsis­sinnaavaatigut. Misilin­neqarnitsinni sapernar­titatsin­nilluunniit suliassin­neqarnitsinni uagutsinnut ‘tuppallersaataangaarsin­naapput’. (Kol 4:10, 11) Pingaartumik “annikil­liornermi” ikinngutit taamaattut pisariaqar­tittarpagut. (Uss 17:17) Sanngiitsutut misigigaangatta  uppeqatitta timikkut, misigis­sutsikkut anersaakkullu ikiorsin­naavaatigut. Jiisusip arnaa Mariia allanit qanoq nakussatsin­neqartoq sammeriartigu.

11. Sooq Mariia nakussatsin­neqartariaqarpa?

¹¹ Mariia nakussatsin­neqartariaqarpoq. Katissiman­ngikkaluarluni inngilimit Gaabrialimit oqarfigineqarami naartulissasoq ernumaam­mersimassaaq. Meeqqanik nammineq perorsaanikuunngilaq, maannali nukappiarannguaq Missiarsin­ngortussaq perorsar­tussanngorpaa. Aamma atoqateqarsiman­ngisaan­naraluarluni naartulernini uissaminut Juuserfimut qanoq ililluni nassuiarsinnaavaa? – Luk 1:26-33.

12. Mariia pisariaqar­titaminik qanoq nakussatsin­neqarpa? (Lukkarsi 1:39-45)

¹² Akisussaaf­ferujussuani immikkut ittoq naammas­siumallugu Mariia pisariaqar­titaminik qanoq nakussatsin­neqarpa? Allanut ikioqquvoq. Assersuutigalugu akisussaaffini pillugu Gaabrialimut oqaluttuuteqquvoq. (Luk 1:34) Tamatuma kinguninngua eqqarlini Elizabetti Juudamiittoq tikeraar­niarlugu “nunamut qaqqartuumut” ungasissumut angalavoq. Tikeraarninilu iluaqutigeqaa. Elizabettimmi Mariia nersorpaa, Jehovamillu isumassarsisitaalluni Mariiap naarmiua pillugu nuannersumik siulittuivoq. (Lukkarsi 1:39-45 atuakkit). Mariia oqarpoq Jehova ‘pissarsuulluni iliuuseqarsimasoq’. (Luk 1:46-51) Tassa Gaabriali Elizabettilu aqqutigalugit Jehovap Mariia nakussatsippaa.

13. Boliviami qatanngut arnaq uppeqatiminut ikioqqugami qanoq ikiorneqarpa?

¹³ Mariiatut illittaaq uppeqatinnit nakussatsin­neqarsin­naavutit. Boliviami qatanngutip arnap, Dasurip, taama nakussatsin­neqarnissani pisariaqartippaa. Ataatani perulun­nartumik nappaateqalerluni napparsim­mavimmut unitsitaammat Dasurip sapinngisaminik najortuarusuppaa. (Tim 1. 5:4) Tamannali imaannaajuaan­nanngilaq. Oqarpoq ilaannikkut tunniutiin­nangajat­tarluni. Kisianni ikiortis­sarsiorpa? Aallaqqaam­muunngitsoq. Ima oqaluttuarpoq: “Qatanngutit akornusersorusun­ngilakka, eqqarsarama Jehovamuna pisariaqar­titannik ikiortus­saagaanga. Paasilerparali allanit immikkoor­nialerama ajornar­torsiutikka nammineerlunga aaqqinniarsarilersimallugit.” (Uss 18:1) Dasuri aalajangerpoq ikinngutiminut aalajangersimasunut allanniarluni atukkani pillugit nassuiaalluni. Ima oqarpoq: “Uppeqatinnit asanartunit nakussatsin­neqarnera oqaaser­talerneqarsin­naanngilaq. Napparsim­mavimmiittunga nerisassanik pajuttarpaannga, Biibilimillu allassimaffinnit tuppaller­nartunik avitseqatigalunga. Ilaa, ilisimallugu kisimiin­ngisaan­nartugut nuanningaarami! Jehovap ilaqutariis­sortaanut ilaavugut, taakkualu ikiorusut­tarpaatigut, qiaqatigerusut­tarpaatigut Jehovamullu kiffartoqatigiuar­niassagamisigut nakussatsik­kusuttarluta.”

14. Sooq utoqqaanertanit ikiorneqarnissaq nangaas­sutigis­sanngiliuk?

¹⁴ Jehovap utoqqaanertat aqqutigalugit nakussatsit­tarpaatigut qiimmas­sartarlutalu. Aap, taakku Jehovamit tunissutaapput. (Es 32:1, 2) Taamaattumik ernumagaangavit isumakuluutitit utoqqaanertanut oqaluttuarisakkit. Ikiorniar­neqarnerillu nangaas­sutigeqinagu. Utoqqaanertammi aqqutigalugit Jehovap pissatsis­sinnaavaatit.

15. Kristumiut nuannersumik qanoq neriuuteqarpat?

¹⁵ Biibilimi neriorsuutit neriuuteqalis­sutigaagut Jehovamullu kiffartor­tuarnissamut  nakussatsis­sutigalugit. (Rom 4:3, 18-20) Kristumiut ilaat naassaan­ngitsumik qilammiin­nissaminnik ilaallu nunarsuarmi paratiisiusumi naassaan­ngitsumik inuunis­saminnik neriuuteqarput. Taama neriuuteqaratta misilin­neqarnerni pinertusaarsin­naavugut, nutaarsiassat nuannersut oqaluus­sissutigisin­naavagut ilagiinnilu suliassiis­sutigineqartut assigiin­ngitsut naammas­sisinnaallugit. (Tes 1. 1:3) Aamma apustilip Paulusip neriuutini nakussatsis­sutigaa.

16. Sooq Paulusi nakussatsin­neqartariaqarpa?

¹⁶ Paulusi nakussatsin­neqartariaqarpoq. Korintimiunut allakkamini imminut immersakkamut marraasumut assersuuppoq. ‘Tatineqartarpoq, qanoq iliussanerluni nalornilertarpoq, malersor­neqartarpoq uppisin­neqartarlunilu.’ Allaallu inuunera navianar­torsiortarpoq. (Kor 2. 4:8-10) Oqaluus­sisartutut angalanermi pingajussaanni oqaatsit taakku allappai. Aamma kingorna amerlanerusunik ajornakusoor­titaminik nalaataqarpoq. Angalanermi tassani inuppas­suarnit kamattunit saassun­neqarpoq, tigusaavoq, umiuvoq parnaarus­saallunilu.

17. Paulusip misilin­neqarnermi pinertusaar­nissaminut suna nakussatsis­sutigaa? (Korintimiunut 2. 4:16-18)

¹⁷ Neriuutini eqqarsaatigisaramiuk Paulusi nakussatsin­neqarlunilu pinertusaarsinnaavoq. (Korintimiunut 2. 4:16-18 atuakkit). Korintimiut allaffigai timini “nungullariar­toraluartoq” tamanna nikalluutiginiarnagu. Paulusip siunissani eqqarsaatigineruaa. Qilammi ‘suli annertunerujar­tuinnartumik naassaan­ngitsumillu akissarsisin­neqarnissamik’ neriuuteqarami akissarsisin­neqarumalluni qanorluunniit annikil­liornerminik naammagit­tarusuppoq. Paulusip neriuutini eqqarsaatigeq­qissaartarpaa, tamatumalu kingunerisaanik ‘ullut tamaasa inuttut nutaanngorsartarpoq’.

18. Tihomirip ilaqutaasalu neriuutertik qanoq nakussatsis­sutigaat?

¹⁸ Bulgariami qatanngutip angutip, Tihomirip, neriuutini nakussatsis­sutigaa. Ukiualuit matuma siorna nukaa ajunaarpoq. Tamannalu  Tihomirip sivisuumik aliasuutigingaarpaa. Nuliani erninilu takorluuisarput makititaanissaq qanoq issanersoq. Ima oqarpoq: “Assersuutigalugu eqqartorparput nukara sumut naapigias­sanerlutigu, sunik nerisas­siuutis­sanerlutigu, makititaappat tikilluaq­qusissummik nuannisaaqatigiinnermut kikkut qaaqqus­sanerlutigit aamma ullut kingulliit pillugit qanoq oqaluttuutis­sanerlugu.” Tihomir oqaluttuarpoq neriuutertik ilaqutariiullutik nakussatsis­sutigalugu pinertusaarsin­naallutik nukamilu Jehovamit makititaanissaa utaqqiuarusullugu.

19. Siunissat pillugu Jehovap neriorsuutaanik upperin­ninnerit qanoq nakussatsis­sinnaaviuk? (Aamma asseq takuuk).

¹⁹ Siunissaq pillugu Jehovap neriorsuutaanik upperin­ninnerit qanoq nakussatsis­sinnaaviuk? Assersuutigalugu nunarsuarmi naassaan­ngitsumik inuunissamik neriuuteqaruit paratiisi Biibilimi qanoq allaatigineqar­tarnersoq atuartaruk eqqarsaatigeq­qissaar­tarlugulu. (Es 25:8; 32:16-18) Paratiisimi inuunissat qanoq issanersoq takorloortaruk. Takorlooruk tassaniillutit. Kikkut naapippigit? Nipit suut tusaavigit? Qanoq misigivit? Paratiisissaq takorloor­neruler­niarlugu Biibililersaarutitsinni assilissat isiginnaakkit imaluunniit musikvideo, soorlu Paratiisi takorloorpara, Eqqissineq kiisami misigis­savarput! imaluunniit Lige rundt om hjørnet, isiginnaaruk. Paratiisissamik neriuuterput eqqarsaatigisarutsigu misigissaagut ajornar­torsiutigut ‘sivikil­lutillu annikissasut’. (Kor 2. 4:17) Jehovap ilinnut neriuutis­siissutaa nakussatsis­sutigisinnaavat.

20. Sanngiitsutut misigigaluaraangat­taluunniit qanoq pissatsis­sinnaavugut?

²⁰ Allaat sanngiitsutut misigigaangavit Guutip pissatsis­sinnaavaatit. (Tuss 108:14) Pisariaqar­titannik nakussatsin­niarlutit Jehova iliuuseqareersimavoq. Taamaattumik ilinnut suliassiis­sutigineqartoq naammas­siniarlugu, misilin­neqarnermi pinertusaarumallutit nuannaarnerlu attatiin­narumallugu Jehova qamannga pisumik qinnuigisaruk, Biibilimillu misissueq­qissaarnikkut taassumunnga siulersoqqugit. Uppeqatinnit qiimmas­sarneqarnissat akuerisaruk. Siunissat pillugu neriuutit takorloortaruk. Taava ‘sutigut tamatigut naammagit­tarlutit nuannaarlutillu pinertusaarsin­naanias­sagavit’ Guutip ‘pissaanersuanut alutornartumut naapertuuttumik nakussatsin­neqassaatit’. – Kol 1:11.