1. I mushind kaay waakady bahambidil ba Yehow bahet diikand mu biisang bya kal?

 DIIY DYA MAWEJ didyaakal dileeb neey baat bady ni lulamat i bakasakan. Ki ning aab baakady bakasakan menmen mukacy mwaabab kabaady biiyumvw teng bakasakan. Cileejel, misang yikwaabw Mukaleng Davih waakady mwiiyumvw neey waakady “mukasakan bu mulund,” ki misang yikwaabw “waakady ni mooy i mwiin weeh.” (Mus. 30:7, NWT) Ning naak Samuson waakady ni makand ma habwaah diib diheteley spirit a Mawej, ni waakady mumanyik neey yiy mwiikal kay ni bukash bwa kudy Mawej, waakady mwa kwiiy “kujimbaj diikand ni kushaaley bituh bu baat boos aab.” (Zuj. 14:5, 6; 16:17) Baat ba lulamat aab baakady bakasakan teng bwaal Yehow waakady wiibaakish bukash aabw.

2. Bilondeshel 2 Biin Korent 12:9, 10, bwabiny mupostol Pool uleebel neey waakady misang yikwaabw mukooyel ni misang yikwaabw mukasakan?

² Mupostol umanyikil neey waakady ukaam byend bukash bwa kudy Yehow. (Bal 2 Korent 12:9, 10.) Teng bu bavul ba kutudy, Pool waakady utat byend bwa myand ya mabenj. (Kal. 4:13, 14) Ha biisang bikwaabw, waakady ul cikwaabw diivit bwa kulong myand yivul. (Rom 7:18, 19) Cikwaabw, waakady wiiyumvw ni kaakunying ni kay mumanyik cya kulong. (2 Kor. 1:8, 9) Cikwaabw, haakady Pool mwiiyumvw mukooyel, waakady wiiyumvw mwiikal ni diikand. Mushind kaay? Yehow waakishil Pool diikand dyaakadyey kay naady. Ulongel nook ni Pool kwiiyey mukasakan.

3. I majooj kaay matwiiyiiy kwaalabul mu ciin bwaal eecy?

³ Yehow wiitulaalay byeet neey wiiyiiy kwiitukashish byeet. (1 Py. 5:10) Ki katwiin mwa kuhet bukash oobw tut katuy biikashishomw. Twangat cileejel, moteer udy mwa kwaakish mashiny bukash bwa kwend. Nook, mwendesh a mashiny udy mwa kukal mudimw ni cya kuvudij naacy lubil bwa kuyey cyaab cyoos cidyey mukat. Bya mushind aakaabumw, Yehow udy habwiih bwa kwiitwaakish diikand ditukaakaam, ki bikaam teng twiikashishomw bwa kwiidihet. I biny bidy Yehow mwiitwaakish bwiitut kwiikal bakasakan?  Ni i biny bitudy ni bwa kulong bwiitut kuhet bukash aabw? Twiiyiiy kulong bwa kuhet maalabul ku majooj aam hakukontonon mushind waakady Yehow mukashish baat basat badyobw baleeb mu Bibl—muprofet Jonas, Mariy maamend a Yeez, ni mupostol Pool. Twiiyiiy kutal cikwaabw mudy Yehow utungunuk ni kukashish biin mudimw bindiy ba leel teng bu mulongeley kal.

4. I biny bitudy mwa kulong bwiitut kuhet bukash bwa kudy Yehow?

⁴ Umw mushind utudy mwa kulong bwa kuhet bukash bwa kudy Yehow i hakufweej kudyey hakumusambil. Bwa kwaalabul masambil miitut, Yehow udy mwa kwiitwaakish ’bukash butudy mwa kukal naabw mudimw bwalaalukil kudyey, bukiish bwaalukil kutudy.’ (2 Kor. 4:7) Tudy mwa kuhet byeet diikand hatubaabal Diiy dindiy ni tulangiloh. (Mis. 86:11) Musah a Yehow udy mu Bibl udy ni “bukash.” (Ebr. 4:12) Hawusaasambil Yehow ni ubal Diiy dindiy, wiiyiiy kwiikal ni diikand diikal mwa kukwambulwiish bwiibuh kutaatameen makab, bwiibuh kutungunuk ni kwiikal ni musangal, eecy bwa kukumbaj mudimw mukasakan.Tal mushind waakady Yehow mukashish muprofet Jonas.

5. Bwabiny muprofet Jonas waakady ukaam kwiikal ni mucim mukasakan?

⁵ Muprofet Jonas waakady ukaam kwiikal ni mucim mukasakan. Uyiil lubil bwa kulek kuy kalong mudimw umwaakishil Yehow umweekel mukasakan kudyey. Bwa bwaal oobw, uteekel buumy bwindiy mu buuhund ni bwa baat baakady nend mu ma majuw mu ciheeh cikasakan cilongekel ha mwanz. Haakady bendesh ba majuw bamwiimbaash mu kaabuk-koony, musaany mutam i mwiin umuminyin, Jonas wiisangeen mund mwa musaany, cyaab cifulul cyaakadyey kay mwanj kutaloh bend. Ulaalangok bicy bwa mushind umvwiil Jonas? Waakady mumanyik neey waakady ni bwa kwiiy kufwiilomw eeny? Wiileebakeenok ning Yehow waakady mumulek eeny? Jonas waakady ni bwa kwiiyumvw ni kaakunying kavul.

6. Bilondeshel mukand a Jonas 2:1, 2, 7, i biny bikashiishil Jonas haakadyey mund mwa musaany?

⁶ I biny bilongel Jonas bwa kuhetey diikand diib dyaakadyey kaayend mund mwa musaany? Usambiil Yehow. (Bal Jonas 2:1, 2, 7.) Ning mwaakadyey mukufwaabeel Yehow, Jonas wiifwiijil naay ni waakady ni diitabij dya neey Yehow wiiyiiy kumvw diisambil dindiy. Jonas ulangil cikwaabw ha Diiy dya Mawej. Bwabiny tudy mwa kuleeb nook? Diisambil dilongeley, didy diifund mu mukand udy ni diijin dindiy mu Jonas shapitil 2, i bakalomw mudimw ni myaak yivul yaakaabumw ni byambil bivul byaakaabumw bya bwiin bitusaasangan mu mukand a Misambw. (Cileejel, fwanyikij myand yidy yifund mu mukand a Jonas 2:2, 5 ni mu Misambw 69:1, NWT; 86:7.) Biin-biin, Jonas waakady mumanyik bilengel may mu Bibl aam. Ni haakadyey ulangil ha may aam mu ciisang cikasakan aacy, waakady mutwiishibw neey Yehow waakady mwa kwiiy kumwambulwiish. Hahicil mafuk, Yehow ukudiloh Jonas hakumuhatul mund mwa musaany, ni waakady habwiih bwa kwiitab ni bwa kuy kalong mudimw waakady Yehow mumwambil.—Jonas 2:10–3:4.

7-8. I mushind kaay udy mwiin-kweet kaahand wa muTaiwan muhet diikand mu ciisang cyaakadyey ni makab?

⁷ Cileejel cya Jonas cidy mwa kwiitwambulwiish diib ditutwiitwiilangan ni makab ma mitah ni mitah. Cileejel, mwiin-kweet Zhiming wa mu Taiwan, ukaakab bwa myand ya mabenj yikasakan yidyey naay. b Cikwaabw, utaatatameen bulwiish bukasakan bwa biin cisak bwa mudyey mwiitabij Yehow. Uheehet diikand hasaasambiley Yehow ni hadyey ulong Diiy dindiy. Uleeleeb neey: “Misang yikwaabw, hady bilumbw bijuuk,” “Numvumvw micim yiikabakan bikasakan  ni nakaakal bwa kubatamijok micim yaam bwa mim kwiilongel myand ya mu Bibl.” Ki kiin bend mulek kutungunuk ni ciibidil aacy. Uleeleeb neey: “Cya kuuhal, nasaasambil Yehow.” “Cikwaabw, nateeteek ekuteer yaam mu mat ni natang kumvw misambw yiitut ya Bukaleng. Ha biisang bikwaabw, niiyumbumb cikwaabw ni diiy dya haash teng ni hanabaabatamij micim. Kuunyim natwaatwaadij kulong.”

⁸ Kwiilongel kwa myand ya Mawej kwaakady kukashish Zhiming mu diitabij dindiy mu mishind yaakadyey kay mwelel meej. Cileejel, haakadyey wend ni kumvw bilengel habitaatal lubeel lwaakadyey naalw lwaakady lukaam bwa bamuhand bikasakan, mungang mwaan-mukaj umwambiil neey bu mwaakadyey ni mash makeeh, byaakady bikaam bamumb mash. Kuuhal kwa kumuhandobw bufuk aabw, Zhiming waakady mubal myand habitaatal mwiin-kweet mwaan-mukaj uhandilobw waakady ni lubeel lwa bwiin ludyey naal. Mash maakady naam mwiin-kweet aaw, maakady makeeh menmen, ki mindiy makaadyok mavul; cikwaabw, umvwiil neey mwiin-kweet aaw kiitabiloh bend bwa kumumbobw mash ni waakady mwa kumvw bilengel. Bwaal oobw bukashiishil Zhiming bwa kushaaley ni lulamat.

9. Uw mutal neey lutat kaahand i lukukooyesh, i biny biwudy mwa kulong? (Tal cikwaabw cifwaatul.)

⁹ Mu ciisang cya makab, wiiyumvuumvwok ni kaakunying kavul bwiibuh kwiisamb mwiilekelel mu diisambil eeny? Wiiyumvuumvwok mukooy menmen bwa kulong eeny? Vuluk neey Yehow i mumanyik bilengel menmen shikacil iibuh. Cikwaabw ning uw mulong diisambil diihiih, iikal mutwiishibw neey wiiyiiy kukwaakish biin-biin biwukaakaam. (Ef. 3:20) Uw mutal neey i bikasakan bwiibuh kubal ni kulong hawubeebeel, hawudy mukooyel, eecy hawudy mumvw bibiih menmen, udy mwa kumvw may ma mu Bibl makwaat eecy may makwaat ma mu mikand yiitut mudyobw bumvwiij myand ya mu Bibl. Udy mwa kuhet cikwaabw dyambulwiish hakukun mat ku musambw kaahand wa ku misambw yiitut eecy hakutal film kaahand udy mu jw.org. Yehow i mukat kukukashish ni wiiyiiy kulong nook hawukaakaam dyaalabul hakumusambil ni hawukaakaam maalabul makwaabw mu byaakudy bya mu spirit bidyey mwiitwaakish.

10. I mushind kaay udy biin Krist neet biitwambulwiish?

¹⁰ Yehow ukaakal mudimw ni biin Krist neet baan-balum ni baan-bakaj bwa kwiitukashish. I  bab ’bitukaakashish bikasakan mu mabok’ hatuheehet lutat eecy hatulwaal diivit bwa kukumbaj mudimw kaahand udyobw biitwaakish. (Kol. 4:10, 11) Tudyaakal nang-nang tukaam balund mu ciisang cya “mal ni makeng.” (Tus. 17:17) Hatwiiyumvumvw bakooyel, biin Krist neet bady mwa kwiitwambulwiish hakwiitwaakish biit bitudy naaby diikeng, bady mwa kwiitukashish, ni bady mwa kwiitusak bwiitut kutungunuk ni kukadil Yehow mudimw ni lulamat. Tukontononaay mukashishilobw Mariy maamend a Yeez kudy baat bakwaabw.

11. Bwabiny Mariy waakady ukaam diikand bwa kulong lukat lwa Mawej?

¹¹ Mariy waakady ukaam diikand bwa kulong lukat lwa Mawej. Langok ket bwa mwaakadyey mwa kwiiyumvw kuunyim kwa yiy muman kuhet mudimw mutam wiiyilobw kumwambil kudy waakutum a Mawej Kabriyel. Kaakadyoh bend mwanj kuy ku maluw; cikwaabw, waakady mwa kwiiy kwiimit. Kaakadyoh bend mwanj kumanyik mwa kukashish baan yiy kaayend, ki waakady ni bwa kukashish mwaan mwaan-mulum waakady mwa kwiiy kushaal Mesih. Cikwaabw, ning mwaakadyey kay mwanj kumanyik balum, i mushind kaay waakadyey mwa kwiiy kumvwiij myand yoos eey kudy waakady mumukwaacil, Yozeefw?—Luuk 1:26-33.

12. Bilondeshel Luuk 1:39-45, i mushind kaay uhetel Mariy diikand bwa kulong lukat lwa Mawej?

¹² I mushind kaay waakady Mariy muhet diikand dyaakadyey ukaam bwa kukumbajey mudimw mutam waakadyey kay mwanj kulongoh? Ukaamin dyambulwiish kudy bakwaabw. Cileejel, wiihangujil Kabriyel bwa kumwambiley myand yikwaabw habitaatal mudimw wiiyey kwiikal nend. (Luuk 1:34) Kuunyim kwa mafuk makeeh bituh, uhonen mu njil mwiilandakany waay mu ’cibunj cidy mukacy mwa milund’ mu bulab bwa Yuudeh bwa kakumbul mwaan-naabw Luzabeet. Lwend aalw lwaakady lulengel. Luzabeet umbumb Mariy lumbandy ni Yehow umuleejel ku dyambulwiish dya spirit mujilang bwa kuleebey diiy dya buprofet dikaakashish eedy habitaatal mwaan sangwiilum waakady Mariy mwiimit. (Bal Luuk 1:39-45.) Mariy uleebel neey: Yehow “i muulongel myand yikasakan ni kubok indiy a bukash.” (Luuk 1:46-51) Ku dyambulwiish dya mwanjel Kabriyel ni Luzabeet, Yehow ukashiishil Mariy.

13. I mushind kaay waakady mwiin-kweet wa Bolivie muhet bulang bwa kukumbaj cyaakadyey ukaam kulong ku dyambulwiish dya biin Krist nend?

¹³ Teng bu Mary, uw byeeb bady mwa kukukashish kudy biin-kweet biin Krist. Dasuri, mwiin-kweet mwaan-mukaj wa mu Bolivie, waakady ukaam byend bwa kwiikal ni diikand. Haakady taat indiy mwiiy kubeel bikasakan ni kakwaakadyoh bend mang bwa lubeel lwindiy. Haakadyey mu lupitaady, Dasuri ukacil ni mucim aakaabumw bwa kwangat bujit bwa kutabaleel taat indiy. (1 Tim. 5:4) Bwaal oobw kabwaakady teng buheehel bwa kwiibukumbaj. Uleeleeb neey: “Misang yivul naakady niiyumvw bu neey cyaakadyoh bend mwa kutungunuk ni kulong nook.” Ulombelok dyambulwiish eeny? Kalongeloh bend nook ku butambwiil. Uleeleeb neey: “Cyaakadyoh bend mukat kutacish biin-kweet.” “Nalangil neey, ‘I Yehow wiiyiiy kuuyambulwiish bwa cinakaakaam.’ Ki natadil neey hakulek kushikat ni bakwaabw, naakady nakaam kuman myand yaam mim kaayany.” (Tus. 18:1) Dasuri wangacil dihangadik dya kufundil bamw ba ku balund bindiy bakeeh bwa kwiibumvwiij bwaal bwaakady bumutond. Uleeleeb neey: “May kamiish mwa kuleej mwaakadyobw baakashish bikasakan kudy biin Krist naany bady ni lukat “Baakady baahayil byaakudy ku lupitaady ni kuukashishobw ni verseh ya mu Bibl. Tudy ni musangal muvul bwa kumanyik neey katwiinoh bend kaayeet. Tudy mu cisak citam cya Yehow—cisak cidy cikat kukwambulwiish, cidy cikat kudil haakaabumw neeb, ni cidy cikat kul diivit haakaabumw neeb.”

14. Bwabiny bikaam twiitab dyambulwiish dya kudy bakul?

¹⁴ Mushind udy Yehow wiitwaakish bukash bwindiy i ku dyaambulwiish dya bakul. I biheel  bidyey ukal naaby mudimw bwa kwiitukashish ni kubatamij micim yiibuh. (Ye. 32:1, 2) Nook uw ukabakan ni micim bwa myand yidy yikutond, udy mwa kwiiyambilok bakul. Bab bakwaakish dyambulwiish, i diitab ni dyanyish. Ku dyambulwiish dyaabab, Yehow udy mwa kukukashish.

15. I kutakamin kaay kudy naak biin Krist boos?

¹⁵ Kutakamin kwiitut kushimatil mu Bibl kudy mwa kwiitut diikand. (Rom 4:3, 18-20) Mutudy biin Krist, tudy ni dyaakatook dya kwiikal ni buumy buuyil mu Paradiiz ha bulab ni bakwaabw i batakamin bwa kwiikal ni buumy buyiil mu diiwul. Kutakamin kwiitut kwiitukaakashish bwiitut kutaatameen makab, hatudiidiil baat musah mulengel, ni hatuloolong midimw mishil-shilangan mu cisumbw. (1 Tes. 1:3) Kutakamin kwaakaabumw ook kukashishil byend mupostol Pool.

16. Bwabiny mupostol Pool waakady ukaam diikand ?

¹⁶ Paul waakady ukaam diikand. Mu mukand ufundiley biin Korent, waakady mwiifwanyikij ni dibung dilong ni bulab didy dikooyel. ’Bamumweeshel mal,’ ’baakady bamulekesh bwa kukadil Mawej mudimw,’ ’bamukabishil’ ni ’bamufiinyin haash.’ Buumy bwindiy bwaakady cikwaabw mu buuhund. (2 Kor. 4:8-10) Pool ufundil may aam diib dilongeley lwend lwindiy lwiisat lwa bumisiyoneer. Ni hamanyiney kufund may aam, waakady mutaatameen cikwaaabw myand yikasakan. Waakady mwa kutaatameen myand ya cikis yaakady mu baat, haakadyobw mwa kumukwaat, bwa mwaakadyey mwa kutukin mu mwanz, ni lutat lwa mu nzubw a lukan.

17. Mu dyumvwangan ni 2 Biin Korent 4:16-18, i biny byaakady bikashish Pool bwa kutaatameeney makab?

¹⁷ Pool uhetel diikand bwa kutaatameen hatuminey meej mindiy ha kutakamin kwaakadyey naak. (Bal 2 Korent 4:16-18.) Wambiil biin Korent neey ning mwaakady nyeet yindiy yiikal yend ni “kubutuk ku bikeeh ku bikeeh,” kaakadyoh bend mwa kuneken mu mabok. Pool utumin meej mindiy ha myand yaakadyey mutakamin mu mafuk miiyiiy. Kutakamin kwindiy kwa kwiikal ni buumy bwa mwendelel mu diiwul kwaakady kwa “lutumb luvul,” luhitoh ni kuleeh mal maakadyey wend ni kumon. Pool ulangil ha kutakamin aak, ni bu cihet, umvwiil mucim indiy mund ’wend ni kukasakan ku diifuk ni ku diifuk.’

18. I mushind kaay udy kutakamin kukashish Tihomir ni cisak cindiy?

 ¹⁸ Tihomir, mwiin-kweet mwaan-mulum wa mu Bulgarie, uheehet diikand mu kutakamin kudyey naak. Hahitil mivw yikeeh, mwaacy indiy waakadyobw babiikan neey Zdravko, ufwiil mu njiw ya mu kuhitakan. Ni kuunyim kwa mafuk, Tihomir ulwiil diivit ni kaakunying kavul. Bwa kutaatameeney, yiy ni cisak cindiy i biifwaafwanyikij bwa ciikal diifuk dya kusanguk. Uleeleeb neey: “Cileejel, twiisaasamb bwa cyaab citwiikal mwa kuhetelangan ni Zdravko, bwa byaakudy bitwiikal mwa kumwaakish, baat batwiikal mwa kubiikan ku musangal a kuuhal utwiikal nend diib didyey ubuk ku lufw, ni myand yitwiikal mwa kumwambil yilongekel mu mafuk ma bulekel.” Tihomir uleeleeb neey kutum meej ku kutakamin kwaabab kukaakashish biin cisak cyaabab bwa kutaatameen ni bwa kwiimanyin ciisang ciikal Yehow mwa kusangul mwaanaabw.

19. I biny biwudy mwa kulong bwa kukashish kutakamin kwiibuh? (Tal cikwaabw cifwaatul)

¹⁹ I biny biwudy mwa kulong bwa kukashih kutakamin kwiibw? Cileejel, biby biikal neey udy ni kutakamin kwa kwiikal ni buumy buyiil ha bulab, bal myand ya mu Bibl yileeleeb bwa Paradiiz ni langiloh. (Ye. 25:8; 32:16-18) Langil ket bwa mwiikal shikacil iibuh mu bulongolody buhyaabuhy. Iifwanyikij bu neey ukaadyoomw. I bangany bawutaatal? I biny biwumvumvwoomw? I mushind kaay uwiiyumvumvw? Bwa kukwambulwiish bwa mwiikal Paradiiz, tal bifwaatul bidy mu mikand yiitut ha cyaab cidyobw bamuleej eecy tal film wa musambw, bu mudy buloba bupiabupia bualua , Anu pabuipi apa, eecy Monabi dîba adi! Tut balam mu meej ni diitabij dyoos kutakamin kwa bulongolody buhyaabuhy, myand yitudy naay yiiyiiy kwiikal “mal makeeh ma cilung ciihiih.” (2 Kor. 4:17) Ku dyambulwiish dya kutakamin kudy Yehow mukwaakish, wiiyiiy kukukashish.

20. Ning tut twiiyumvw bakooyel, tudy mwa kuhet bukash bicy?

²⁰ Ning tut twiiyumvw bakooyel, “twiiyiiy kuhet bukash kudy Mawej.” (Mis. 108:13, NWT) Yehow i muman kukwaakish byoos biwukaakaam bwiibuh kuhet diikand ku dyambulwiish dindiy. Nook diib diwukaakaam dyambulwiish bwiibuh kukumbaj mudimw kaahand, bwa kutaatameen lutat kaahand, eecy bwiibuh kwiikal ni musangal, lomb Yehow mu diisambil ni mucim aakaabumw ni kaam buludik bwindiy ku dyambulwiish dya kulong kwiibuh kwa Bibl. Iitab mibel yikwaakwaakiishobw kudy biin Krist neeb bwa kukukashish. Iikal ni ciibidil cya kwiikal ni diib dya kulangil ha kutakamin kuwudy naak bwa mafuk maciiyiiy. Nook nwiiyiiy kwiikal “bakasakan cyoocyoocy ku bukash bwindiy bwa lutumb [lwa Mawej] bwiinun kwiikal bakasakan bituh micim ni batukij mu diis bwa myand yoos.”—Kol. 1:11.