တၢ်မၤလိ ၄၃
ယဟိဝၤယွၤ ကဒုးဆူၣ်ထီၣ် နဂံၢ်ဘါဒ်လဲၣ်
“[ယဟိဝၤယွၤ] ကမၤဂၢၢ်မၤကျၢၤသု, အဝဲကဒုးဆူၣ်ထီၣ်သု ဒီးအဝဲကဒုးဆၢထၢၣ်သု ဂၢၢ်ဂၢၢ်ကျၢၤကျၢၤ.”—၁ ပ့း ၅:၁၀.
တၢ်သးဝံၣ် ၃၈ ကစၢ်ကမၤဆူၣ်ထီၣ် နဂံၢ်ဘါ
တၢ်မၤလိအံၤ အတၢ်တိာ်ပာ် a
၁. ကစၢ်ယွၤ အပှၤဂီၢ်မုၢ် လၢညါတဖၣ် ဒိးန့ၢ်တၢ်ဂံၢ်တၢ်ဘါဒ်လဲၣ်.
လံာ်စီဆှံ ပာ်ဖျါထီၣ်ဝဲ ပှၤလၢအသးတီတဖၣ်န့ၣ် မ့ၢ်ပှၤလၢအသးဆူၣ်. ဘၣ်ဆၣ် ပှၤလၢအသးဆူၣ်န့ၣ် တဘျီတခီၣ် အသးဂံၢ်ဘါလီၤစၢ်သ့စ့ၢ်ကီး. အဒိ ဘၣ်တဘျီ စီၤပၤဒၤဝံး တူၢ်ဘၣ်လၢ အမ့ၢ်ပှၤလၢ အဂံၢ်ဆူၣ်ဘါဆူၣ် ဒီးအသူၣ်ဒူသးဒူ “ထဲသိးဒီး ကစၢၢ်တဖျၢၣ်.” ဘၣ်ဆၣ် ဘၣ်တဘျီဘျီန့ၣ်အ “ပျံၤတၢ်ဒိၣ်မး.” (စံး ၃၀:၇) မ့မ့ၢ်စီၤၡံၡိၣ်န့ၣ် အမ့ၢ်ပှၤလၢအဂံၢ်ဆူၣ် ခီဖျိလၢ ကစၢ်ယွၤအသးစီဆှံ မၤစၢၤအီၤအဃိ. ဒီးအနီၢ်ကစၢ်စ့ၢ်ကီး သ့ၣ်ညါဝဲလၢ ကစၢ်ယွၤအသးစီဆှံ မ့ၢ်တမၤစၢၤအီၤဘၣ်န့ၣ် ‘အဂံၢ်အဘါ ကလီၤစၢ်ကွံာ်ဝဲ ဒီးအကကဲထီၣ် ဒ်ပှၤပိာ်ခွါ အဂၤတဖၣ် အသိး.’ (စံၣ်ညီၣ် ၁၄:၅, ၆; ၁၆:၁၇) ပထံၣ်ဘၣ်လၢ ပှၤလၢအသးတီတဖၣ်အံၤ အိၣ်ဒီးတၢ်ဂံၢ်တၢ်ဘါန့ၣ် ခီဖျိလၢ ယဟိဝၤယွၤ မၤစၢၤအဝဲသ့ၣ်အဃိလီၤ.
၂. ဖဲစီၤပီလူး အဂံၢ်စၢ်ဘါစၢ်အခါ အအိၣ်ဒီးတၢ်စိတၢ်ကမီၤ သ့ဒ်လဲၣ်. (၂ ကရံၣ်သူး ၁၂:၉, ၁၀)
၂ တၢ်မၢဖိပီလူးစ့ၢ်ကီး သ့ၣ်ညါလီၤအသးလၢ ဒ်သိးအကအိၣ်ဒီး တၢ်ဂံၢ်တၢ်ဘါအဂီၢ် အလိၣ်ဘၣ် ယဟိဝၤယွၤ အတၢ်မၤစၢၤ. (ဖး ၂ ကရံၣ်သူး ၁၂:၉, ၁၀.) စီၤပီလူးန့ၣ် အထံၣ်ဘၣ်တၢ်ကီတၢ်ခဲ လၢတၢ်အိၣ်ဆူၣ်အိၣ်ချ့တကပၤ ဒ်ပဝဲအသိးစ့ၢ်ကီး. (ကလၤ ၄:၁၃, ၁၄) အအဲၣ်ဒိး မၤတၢ်လၢအဘၣ် ဘၣ်ဆၣ် တဘျီတခီၣ်န့ၣ် ကီလၢအဂီၢ်ဒိၣ်မး. (ရိ ၇:၁၈, ၁၉) ဒီးတဘျီတခီၣ် အတူၢ်ဘၣ်လၢ အသူၣ်ကိၢ်သးဂီၤ ဒီးအဘၣ်ယိၣ်တၢ်စ့ၢ်ကီး. (၂ ကရံၣ် ၁:၈, ၉) ယဟိဝၤယွၤ ဟ့ၣ်စိဟ့ၣ်ကမီၤစီၤပီလူး အဃိ ဖဲစီၤပီလူး အဂံၢ်စၢ်ဘါစၢ်အခါ အတူၢ်ဘၣ်ဝဲလၢ အအိၣ်ဒီး တၢ်စိတၢ်ကမီၤ ဒီးအဂံၢ်အဘါ ဟဲဆူၣ်ထီၣ်ကဒါက့ၤ.
၃. လၢတၢ်မၤလိတခါအံၤ ပကတဲသကိး တၢ်သံကွၢ်မနုၤလဲၣ်.
၃ ယဟိဝၤယွၤ အၢၣ်လီၤပှၤလၢ အကဒုးဆူၣ်ထီၣ် ပဂံၢ်ပဘါစ့ၢ်ကီး. (၁ ပ့း ၅:၁၀) ဒ်သိးကပန့ၢ်ဘၣ် တၢ်ဂံၢ်တၢ်ဘါလၢ ယဟိဝၤယွၤအအိၣ်အဂီၢ် ပနီၢ်ကစၢ်စ့ၢ်ကီး ပကဘၣ် ထဲးဂံၢ်ထဲးဘါ. အဒိ ကါတခိၣ်န့ၣ် အိၣ်ဒီးအစဲးအဃိ အလဲၤလၢ တၢ်လီၢ်တပူၤဂ့ၤတပူၤဂ့ၤသ့ဝဲ. ဘၣ်ဆၣ် ကါကစၢ်မ့ၢ်တနီအီၤဘၣ်န့ၣ် ကါတခိၣ်အံၤ လဲၤတၢ်တသ့ဘၣ်. ဒ်န့ၣ်အသိး ယဟိဝၤယွၤ အိၣ်ကတဲာ်ကတီၤအသးလၢ ကမၤစၢၤပှၤ ဒီးကဟ့ၣ်ပှၤ တၢ်ဂံၢ်တၢ်ဘါ. ဘၣ်ဆၣ် ဒ်သိး ပကဒိးန့ၢ်ဘၣ် တၢ်ဂံၢ်တၢ်ဘါတခါအံၤအဂီၢ် ပနီၢ်ကစၢ်စ့ၢ်ကီး ပကဘၣ် ထဲးဂံၢ်ထဲးဘါ. ယဟိဝၤယွၤ ကဒုးဆူၣ်ထီၣ် ပဂံၢ်ပဘါဒ်လဲၣ်. ဒီးဒ်သိး ပကဒိးန့ၢ်ဘၣ် ကစၢ်ယွၤ အတၢ်မၤစၢၤအဂီၢ် ပကဘၣ်မၤဒ်လဲၣ်. ပကသ့ၣ်ညါ တၢ်စံးဆၢအဂီၢ် ပကမၤလိဘၣ်လၢ ယဟိဝၤယွၤ မၤစၢၤဝဲ ဝံယိၤနါ, ယ့ၣ်ၡူးအမိ နီၢ်မၤရံ ဒီးတၢ်မၢဖိပီလူးဒ်လဲၣ်. တကးဒံးဘၣ် ပကမၤလိဘၣ်စ့ၢ်ကီး ယဟိဝၤယွၤ ဒုးဆူၣ်ထီၣ် အခ့အပှၤလၢ ဆၢကတီၢ်ခဲအံၤတဖၣ် အဂံၢ်အဘါဒ်လဲၣ်.
တၢ်ဃ့ထုကဖၣ် ဒီးတၢ်မၤလိ လံာ်စီဆှံန့ၣ် ကမၤဆူၣ်ထီၣ် နဂံၢ်နဘါ
၄. ပဒိးန့ၢ်ဘၣ် တၢ်ဂံၢ်တၢ်ဘါလၢ ယဟိဝၤယွၤအအိၣ် ကသ့ဒ်လဲၣ်.
၄ ကျဲတဘိလၢ ပကဒိးန့ၢ်ဘၣ်တၢ်ဂံၢ်တၢ်ဘါ လၢယဟိဝၤယွၤအအိၣ်န့ၣ် မ့ၢ်ဝဲ ပဃ့ထုကဖၣ်လၢအအိၣ်. ဒီးယဟိဝၤယွၤ ကစံးဆၢပတၢ်ထုကဖၣ် ခီဖျိ အဟ့ၣ်ပှၤ “တၢ်ဂံၢ်တၢ်ဘါလီၤဆီ.” (၂ ကရံၣ် ၄:၇) တကးဒံးဘၣ် ယဟိဝၤယွၤ အကလုၢ်ကထါ လံာ်စီဆှံန့ၣ် “အိၣ်ဒီးအစိကမီၤ.” (ဧ့ၤ ၄:၁၂) အဃိ ပမ့ၢ်ဖးလံာ်စီဆှံ ဒီးဆိကမိၣ်ထံအီၤန့ၣ် ပကဒိးန့ၢ်ဘၣ် တၢ်ဂံၢ်တၢ်ဘါ. (စံး ၈၆:၁၁) ဖဲပဃ့ထုကဖၣ် လၢယဟိဝၤယွၤအအိၣ် ဒီးဖးအကလုၢ်ကထါအခါ ပကဒိးန့ၢ်ဘၣ် တၢ်ဂံၢ်တၢ်ဘါ ဒ်သိး ပတူၢ်တၢ်ခီၣ်တၢ်ကကဲ, ပကအိၣ်ဒီး တၢ်သးခု ဒီးပမၤလၢပှဲၤ ပမူဒါလၢအကီအခဲ ကန့ၢ်အဂီၢ်. ခဲအံၤ ပကတဲသကိး ဘၣ်ဃးဒီး ယဟိဝၤယွၤ မၤဆူၣ်ထီၣ်ဝံယိၤနါ အဂံၢ်အဘါဒ်လဲၣ်အဂ့ၢ်.
၅. ဘၣ်မနုၤအဃိ ဝံယိၤနါလိၣ်ဘၣ် တၢ်ဂံၢ်တၢ်ဘါလဲၣ်.
၅ ဒ်သိး ဝံယိၤနါ ကအိၣ်ဒီး တၢ်သးဒူအဂီၢ် အလိၣ်ဘၣ် ယဟိဝၤယွၤ အတၢ်မၤစၢၤ. ဘၣ်တဘျီ ဖဲအန့ၢ်ဘၣ် မူဒါလၢအကီအခဲအခါ ခီဖျိလၢ အပျံၤတၢ်အဃိ အဝဲပာ်တ့ၢ်ကွံာ် မူဒါတခါအံၤ. အဃိ အဘူးကသံ လၢပီၣ်လဲၣ်ပူၤ ဒီးပှၤဒိးကဘီဖိ လၢအဂၤစ့ၢ်ကီး အသးသမူ အိၣ်လၢတၢ်လီၤဘၣ်ယိၣ်. လၢခံ ဖဲပှၤကွံာ်လီၤ ဝံယိၤနါ လၢပီၣ်လဲၣ်ပူၤအခါ ညၣ်ဖးဒိၣ် ယူၢ်လီၤကွံာ်အီၤ ဒီးအဘၣ်အိၣ်လၢ ညၣ်အဟၢဖၢပူၤ. ဖဲန့ၣ်အဆၢကတီၢ် စီၤယိၤနါ တူၢ်ဘၣ်ဝဲဒ်လဲၣ်. မ့ၢ်အကဆိကမိၣ်ဝဲလၢ အကသံလီၤဧါ. မ့တမ့ၢ် အကဆိကမိၣ်ဝဲလၢ ယဟိဝၤယွၤ ပာ်တ့ၢ်အီၤလံဧါ. ဖဲန့ၣ်အဆၢကတီၢ် စီၤယိၤနါ ကသူၣ်ကိၢ်သးဂီၤတၢ် ဖးဒိၣ်ညါ.
ဒ်ဝံယိၤနါအသိး ဖဲပထံၣ်ဘၣ် တၢ်ကီတၢ်ခဲအခါ ပမၤဆူၣ်ထီၣ် ပဂံၢ်ပဘါ ကသ့ဒ်လဲၣ် (ကွၢ်လံာ်အဆၢ ၆-၉)
၆. ဖဲစီၤယိၤနါ အိၣ်လၢညၣ်အဟၢဖၢပူၤအခါ တၢ်မနုၤဒုးဆူၣ်ထီၣ် အဂံၢ်အဘါလဲၣ်. (ယိၤနါ ၂:၁, ၂, ၇)
၆ ဖဲစီၤယိၤနါအိၣ်လၢ ညၣ်အဟၢဖၢပူၤအခါ အဒိးန့ၢ်ဘၣ်ဝဲ တၢ်ဂံၢ်တၢ်ဘါဒ်လဲၣ်. ပထံၣ်ဘၣ်လၢ အဃ့ထုကဖၣ် လၢယဟိဝၤယွၤအအိၣ်. (ဖး ယိၤနါ ၂:၁, ၂, ၇.) စီၤယိၤနါ တဒိကနၣ် ယဟိဝၤယွၤအကလုၢ်ဘၣ်. သနာ်က့ လၢခံအဝဲ ပီၢ်ယၢ်လီၤက့ၤအသး ဒီးနာ်ဝဲ သပှၢ်တၢၢ်လၢ ယဟိဝၤယွၤ ကဒိကနၣ် အတၢ်ထုကဖၣ်. ဖဲစီၤယိၤနါအိၣ်လၢ ညၣ်အဟၢဖၢပူၤအခါ အဆိကမိၣ်ထံစ့ၢ်ကီး လံာ်စီဆှံအဆၢတဖၣ်. ဘၣ်မနုၤအဃိ ပတဲဒ်န့ၣ်လဲၣ်. ဖဲစီၤယိၤနါ ဃ့ထုကဖၣ်အခါ အသူဝဲ တၢ်ကတိၤတဖၣ်န့ၣ် လီၤဂာ်လိာ်သးဒီး တၢ်ကတိၤလၢ လံာ်စံးထီၣ်ပတြၢၤအပူၤ. (အဒိ ထိၣ်သတြီၤ ယိၤနါ ၂:၂, ၅ ဒီး စံးထီၣ်ပတြၢၤ ၆၉:၁; ၈၆:၇.) ပသ့ၣ်ညါဘၣ် လီၤတံၢ်လီၤဆဲးလၢ စီၤယိၤနါ သ့ၣ်ညါဝဲ လံာ်စီဆှံအဆၢတဖၣ် ဂ့ၤဂ့ၤ. ဖဲစီၤယိၤနါထံၣ်ဘၣ် တၢ်ကီတၢ်ခဲအခါ အဆိကမိၣ်ထံဝဲ လံာ်စီဆှံ အဆၢတဖၣ်အံၤအဃိ အနာ်ဝဲလၢ ယဟိဝၤယွၤ ကမၤစၢၤအီၤ. လၢခံ စီၤယိၤနါ က့ၤထီၣ်ဘၣ်လၢ ခိခိၣ် ဒီးဖဲန့ၣ် အအိၣ်ကတီၤသးလၢ အကတူၢ်လိာ်ဝဲမူဒါ ဒီးကမၤလၢပှဲၤဝဲ မူဒါလၢ ကစၢ်ယွၤဟ့ၣ်လီၤအီၤ.—နါ ၂:၁၀–၃:၄.
၇-၈. ဖဲဒီပုၢ်ဝဲၢ်ခွါစံမ့ ထံၣ်ဘၣ် တၢ်မၤကွၢ်တဖၣ်အခါ အဒိးန့ၢ်ဘၣ် တၢ်ဂံၢ်တၢ်ဘါ ဒ်လဲၣ်.
၇ ဖဲပထံၣ်ဘၣ်တၢ်မၤကွၢ် အကလုာ်ကလုာ်အခါ စီၤယိၤနါ အဒိအတဲာ် မၤစၢၤပှၤ ကသ့ဒ်လဲၣ်. အဒိ ဒီပုၢ်ဝဲၢ်ခွါစံမ့ b လၢအအိၣ်လၢ ကီၢ်ထဲၣ်ဝၣ်န့ၣ် အတူၢ်ဘၣ်ဝဲ တၢ်ဆူးတၢ်ဆါနးမး. ထဲန့ၣ်တကးဒံးဘၣ် ခီဖျိလၢ အဘူၣ်ထီၣ်ဘါထီၣ် ယဟိဝၤယွၤအဃိ အဟံၣ်ဖိဃီဖိ ထီဒါအီၤ. ဒ်သိး အတူၢ်တၢ်ကန့ၢ်အဂီၢ် အန့ၢ်ဘၣ်တၢ်ဂံၢ်တၢ်ဘါ လၢယဟိဝၤယွၤအအိၣ် ခီဖျိအဃ့ထုကဖၣ် ဒီးအမၤနီၢ်ကစၢ် တၢ်မၤလိလံာ်စီဆှံ. ဒီပုၢ်ဝဲၢ်ခွါစံမ့ တဲဝဲလၢ “ဖဲယထံၣ်ဘၣ် တၢ်ကီတၢ်ခဲအခါ ယကိၢ်တၢ်အဃိ ယပာ်သးမုာ်မုာ် ဒီးမၤနီၢ်ကစၢ် တၢ်မၤလိလံာ်စီဆှံ တန့ၢ်ဘၣ်.” ဘၣ်ဆၣ် ဒီပုၢ်ဝဲၢ်ခွါစံမ့ တဟ့ၣ်အၡူဘၣ်. အဆဲးတဲဝဲလၢ “အဆိကတၢၢ်န့ၣ် ယဃ့ထုကဖၣ် လၢယဟိဝၤယွၤအအိၣ်. ဝံၤဒီး ယကနၣ် ဘီမုၢ်တၢ်သးဝံၣ် တကးဒံးဘၣ် တဘျီတခီၣ် ယသးဝံၣ်တၢ်လၢ ယကလုၢ်ကဖီလီဖိ တုၤလၢ ယသးခုၣ်လီၤက့ၤ. ဖဲန့ၣ်ဝံၤအလီၢ်ခံ ယမၤ နီၢ်ကစၢ် တၢ်မၤလိလံာ်စီဆှံ.”
၈ နီၢ်ကစၢ် တၢ်မၤလိလံာ်စီဆှံန့ၣ် မၤစၢၤဝဲ ဒီပုၢ်ဝဲၢ်ခွါစံမ့ဒိၣ်မး. အဒိ ဖဲအဖွဲးသး ဝံၤအလီၢ်ခံ ကသံၣ်သရၣ်မုၣ်တဂၤ တဲအီၤလၢ ခီဖျိလၢ အသွံၣ်ဂီၤဖျၢၣ်စှၤအဃိ အကဘၣ်သွီသွံၣ်. ဘၣ်ဆၣ် တချုးလၢ ဒီပုၢ်ဝဲၢ်ခွါစံမ့ ကဖွဲးသးတနၤန့ၣ် အဖးဘၣ်ဝဲ ဒီပုၢ်ဝဲၢ်မုၣ်တဂၤ အတၢ်လဲၤခီဖျိလၢ အဘၣ်ဖွဲးသး လီၤဂာ်ဒ်သိးဒီးအီၤ. ဒီပုၢ်ဝဲၢ်မုၣ်တဂၤအံၤ အသွံၣ်ဂီၤဖျၢၣ် စှၤဒိၣ်န့ၢ် ဒီပုၢ်ဝဲၢ်ခွါစံမ့ဒံး. ဘၣ်ဆၣ် ဒီပုၢ်ဝဲၢ်မုၣ်အံၤ တတူၢ်လိာ်ဝဲ တၢ်သွီသွံၣ်ဘၣ် ဒီးလၢခံ အတၢ်ဆါဘျါက့ၤဝဲ ဂ့ၤဂ့ၤ. အဃိ ဒီပုၢ်ဝဲၢ်မုၣ်အံၤ အတၢ်လဲၤခီဖျိန့ၣ် မၤစၢၤဝဲ ဒီပုၢ်ဝဲၢ်ခွါစံမ့ လၢအကတီဒီး ယဟိဝၤယွၤအဂီၢ်.
၉. ဖဲပထံၣ်ဘၣ်တၢ်မၤကွၢ် ဒီးပသူၣ်ကိၢ်သးဂီၤဒိၣ်မးအခါ ပကဘၣ်မၤဒ်လဲၣ်. (ကွၢ်စ့ၢ်ကီးတၢ်ဂီၤ.)
၉ ဖဲနတူၢ်ဘၣ် တၢ်ကီတၢ်ခဲအခါ နကဃ့ထုကဖၣ် ဒီးတဲဘၣ်ကစၢ်ယွၤလၢ နတၢ်တူၢ်ဘၣ်အဂီၢ်န့ၣ် ကီဘၣ်နၤဧါ. မ့တမ့ၢ် နကမၤ နီၢ်ကစၢ် တၢ်မၤလိလံာ်စီဆှံအဂီၢ်န့ၣ် ကီစ့ၢ်ကီးဧါ. မ့ၢ်ကီဘၣ်နၤန့ၣ် သ့ၣ်နီၣ်ထီၣ်လၢ ယဟိဝၤယွၤ နၢ်ပၢၢ်ဝဲ ပတၢ်အိၣ်သး လၢလၢပှဲၤပှဲၤ. ပမ့ၢ်ဃ့ထုကဖၣ် ဖုၣ်ဖုၣ်ဖိ ဒီးယိယိဖိ သနာ်က့ ယဟိဝၤယွၤ နၢ်ပၢၢ်ဝဲ ပတၢ်အိၣ်သး ဒီးအကဟ့ၣ်ပှၤ တၢ်လၢပတၢ်လိၣ်ဘၣ်. (အ့း ၃:၂၀) ခီဖျိလၢ ပဆိးက့ မ့တမ့ၢ် ပသးအုးဒိၣ်မးအဃိ ပဖးဒီးမၤလိ လံာ်စီဆှံ မ့ၢ်တကဲဘၣ် သနာ်က့ လံာ်စီဆှံ ဒီးလံာ်လဲၢ်အဂၤ လၢအအိၣ်ဒီး တၢ်ကလုၢ်န့ၣ် ပဒိကနၣ်အီၤသ့. တကးဒံးဘၣ် ပဒိကနၣ်စ့ၢ်ကီး တၢ်သးဝံၣ် ဒီးကွၢ်တၢ်ဂီၤမူလၢ jw.org အပူၤသ့. ပမ့ၢ်ဃ့ထုကဖၣ် ဒီးဃုကွၢ်ကျဲလၢ ယဟိဝၤယွၤ စံးဆၢပတၢ်ထုကဖၣ် ခီဖျိ နီၢ်သးတၢ်အီၣ်တဖၣ်အံၤန့ၣ် ပကဒိးန့ၢ်ဘၣ် တၢ်ဂံၢ်တၢ်ဘါ လၢယဟိဝၤယွၤအအိၣ်.
ပန့ၢ်ဘၣ် တၢ်ဂံၢ်တၢ်ဘါလၢ ပဒီပုၢ်ဝဲၢ်မုၣ်ခွါအအိၣ်သ့
၁၀. ပဒိးန့ၢ်ဘၣ် တၢ်ဂံၢ်တၢ်ဘါလၢ ဒီပုၢ်ဝဲၢ်မုၣ်ခွါတဖၣ်အအိၣ် လၢအခါဖဲလဲၣ်.
၁၀ ယဟိဝၤယွၤ သူဝဲပဒီပုၢ်ဝဲၢ်မုၣ်ခွါတဖၣ်လၢ ကဟ့ၣ်ဆူၣ်ထီၣ် ပဂံၢ်ပဘါ. ဖဲပထံၣ်ဘၣ်တၢ်ကီတၢ်ခဲ ဒီးပမ့ၢ်ဆိမိၣ်လၢ ပမၤလၢပှဲၤပမူဒါ လၢအကီအခဲ တန့ၢ်ဘၣ်အခါ ပဒီပုၢ်ဝဲၢ်မုၣ်ခွါတဖၣ်န့ၣ် ကဲထီၣ် “တၢ်ဟ့ၣ်ဂံၢ်ဟ့ၣ်ဘါ” လၢပဂီၢ်ဒိၣ်မး. (ကလီး ၄:၁၀, ၁၁) ဒီးဖဲပထံၣ်ဘၣ် “တၢ်ကိၢ်တၢ်ဂီၤ” အခါ ပလိၣ်ဘၣ် ပတံၤသကိး နီၢ်ကီၢ်. (ကတိၤ ၁၇:၁၇) ဖဲပတူၢ်ဘၣ်လၢ ပဂံၢ်ဘါစၢ်, ပတၢ်အိၣ်ဆူၣ်အိၣ်ချ့ တဂ့ၤဘၣ်, ပသးအုး မ့တမ့ၢ် ပလိၣ်ဘၣ် တၢ်မၤစၢၤ လၢနီၢ်သးတကပၤအခါ ဒီပုၢ်ဝဲၢ်မုၣ်ခွါတဖၣ် ကကဲထီၣ်တၢ်မၤစၢၤ လၢပဂီၢ်. ခဲအံၤ ပကတဲသကိး ဘၣ်ဃးဒီး ယ့ၣ်ၡူးအမိ နီၢ်မၤရံန့ၣ် အန့ၢ်ဘၣ်တၢ်ဟ့ၣ်ဂံၢ်ဟ့ၣ်ဘါ လၢပှၤဂၤအအိၣ်ဒ်လဲၣ်.
၁၁. ဘၣ်မနုၤအဃိ နီၢ်မၤရံလိၣ်ဘၣ် တၢ်ဟ့ၣ်ဂံၢ်ဟ့ၣ်ဘါလဲၣ်.
၁၁ နီၢ်မၤရံစ့ၢ်ကီး အလိၣ်ဘၣ် တၢ်ဟ့ၣ်ဂံၢ်ဟ့ၣ်ဘါ. ဆိကမိၣ်ကွၢ် ဖဲနီၢ်မၤရံ ဒိးန့ၢ်ဘၣ် မူဒါဖးဒိၣ်တခါလၢ မူခိၣ်ကလူး ကၤဘြံၤအ့လး အအိၣ်အခါ အကတူၢ်ဘၣ်ဝဲဒ်လဲၣ်. နီၢ်မၤရံန့ၣ် အတဖျီသးဒံးဘၣ်, ဘၣ်ဆၣ် အကဘၣ်ဒၢထီၣ် ဒီးအကလုၢ်ဒိၣ်ထီၣ်အဖိစ့ၢ်ကီး အတၢ်လဲၤခီဖျိတအိၣ်ဘၣ်. ဒီးအဖိခွါလၢ အကဘၣ်လုၢ်ဒိၣ်ထီၣ်ဝဲတဂၤအံၤ မုၢ်ကအိၣ်ဝဲတနံၤန့ၣ် အကကဲထီၣ်ဝဲ မ့းၡံအၤ. ထဲန့ၣ်တကးဒံးဘၣ် အဝဲစ့ၢ်ကီး တမံဃုာ်ဘၣ်ဒီး ပှၤနီတဂၤဒံးဘၣ်အဃိ နီၢ်မၤရံ ကၡဲပၠးဝဲ အတၢ်အဲၣ်တီ စီၤယိၤသး လၢတၢ်ဂ့ၢ်တဖၣ်အံၤဒ်လဲၣ်.—လူၤ ၁:၂၆-၃၃.
၁၂. နီၢ်မၤရံ ဒိးန့ၢ်ဘၣ် တၢ်ဟ့ၣ်ဂံၢ်ဟ့ၣ်ဘါ လၢအလိၣ်ဘၣ်ဝဲ ဒ်လဲၣ်. (လူၤ ၁:၃၉-၄၅)
၁၂ ဒ်သိး နီၢ်မၤရံ မၤလၢပှဲၤအမူဒါ လၢအကီအခဲ ကသ့အဂီၢ် အဒိးန့ၢ်ဘၣ် တၢ်ဟ့ၣ်ဂံၢ်ဟ့ၣ်ဘါဒ်လဲၣ်. နီၢ်မၤရံ ဃ့တၢ်မၤစၢၤ လၢပှၤဂၤအအိၣ်. အဒိ အဝဲသံကွၢ် မူခိၣ်ကလူး ကၤဘြံၤအ့လးလၢ ကဒုးသ့ၣ်ညါအါထီၣ်အီၤ တၢ်ဂ့ၢ်တၢ်ကျိၤ ဘၣ်ဃးဒီး အမူဒါ. (လူၤ ၁:၃၄) ဖဲန့ၣ်ဝံၤအလီၢ်ခံ နီၢ်မၤရံ လဲၤဝဲလၢ “ကစၢၢ်ကလိအကျါ” လၢကီၢ်ယူဒၤအပူၤ ဒ်သိးကလဲၤအိၣ်သကိးဝဲ အဘူးအတံၢ် နီၢ်အ့းလံၤစါဘ့း. ခီဖျိလၢ အလဲၤဝဲအဃိ အန့ၢ်ဘၣ်ဝဲ တၢ်ဟ့ၣ်ဂံၢ်ဟ့ၣ်ဘါ. ဖဲနီၢ်အ့းလံၤစါဘ့း ထံၣ်နီၢ်မၤရံအခါ အပတြၢၤဝဲ နီၢ်မၤရံ. ဒီးကစၢ်ယွၤ အသးစီဆှံ ထိၣ်ဟူးထိၣ်ဂဲၤထီၣ် နီၢ်အ့းလံၤစါဘ့းလၢ ကတဲဖျါထီၣ်ဝဲ ဝံအတၢ်စံးပာ် ဘၣ်ဃးဒီး နီၢ်မၤရံအဖိခွါလၢ ကအိၣ်ဖျဲၣ်ထီၣ်တဂၤအံၤ အဂ့ၢ်. (ဖး လူၤကၣ် ၁:၃၉-၄၅.) ဖဲန့ၣ်န့ၣ် နီၢ်မၤရံတဲဝဲလၢ ယဟိဝၤယွၤ “ပာ်ဖျါထီၣ် အစုတၢ်စိတၢ်ကမီၤ.” (လူၤ ၁:၄၆-၅၁) ဖဲအံၤပထံၣ်ဘၣ်လၢ ယဟိဝၤယွၤသူဝဲ မူခိၣ်ကလူး ကၤဘြံၤအ့လး ဒီးနီၢ်အ့းလံၤစါဘ့း ဒ်သိးကဟ့ၣ်ဂံၢ်ဟ့ၣ်ဘါဝဲ နီၢ်မၤရံ.
၁၃. ဒီပုၢ်ဝဲၢ်မုၣ် လၢအအိၣ်လၢ ကီၢ်ဘိၣ်လ့ဘံယါန့ၣ် ခီဖျိလၢ အဃ့တၢ်မၤစၢၤလၢ ဒီပုၢ်ဝဲၢ်မုၣ်ခွါတဖၣ်အအိၣ်အဃိ အဒိးန့ၢ်ဘၣ် အဘျုးဒ်လဲၣ်.
၁၃ ဒ်နီၢ်မၤရံအသိး ပဝဲစ့ၢ်ကီး ပလိၣ်ဘၣ် တၢ်ဟ့ၣ်ဂံၢ်ဟ့ၣ်ဘါလၢ ပဒီပုၢ်ဝဲၢ်မုၣ်ခွါတဖၣ်အအိၣ်. ဒီပုၢ်ဝဲၢ်မုၣ်ဒါစူရံန့ၣ် အအိၣ်လၢ ကီၢ်ဘိၣ်လ့ဘံယါ. အဝဲစ့ၢ်ကီး အလိၣ်ဘၣ် တၢ်ဟ့ၣ်ဂံၢ်ဟ့ၣ်ဘါဒ်န့ၣ်. ဖဲအသ့ၣ်ညါလၢ အပါဆိက့နးဒိၣ်မး ဒီးဘၣ်ထီၣ်တၢ်ဆါဟံၣ်အခါ အပာ်လီၤသးလၢ အကက့ၤကွၢ်ထွဲအပါ. (၁ တံၤ ၅:၄) အကကွၢ်ထွဲအပါအဂီၢ် တညီလၢအဂီၢ်ဘၣ်. ဒီပုၢ်ဝဲၢ်မုၣ်အံၤ တဲဝဲလၢ “ယတူၢ်ဘၣ်လၢ ယမၤတကဲလၢၤဘၣ်န့ၣ် အိၣ်တဘျုးဘျီညါ.” အဃိ ဒီပုၢ်ဝဲၢ်မုၣ်အံၤ ကဃ့တၢ်မၤစၢၤလၢ ပှၤဂၤအအိၣ်ဧါ. ခီၣ်ထံးခါန့ၣ် အတဃ့ဝဲဘၣ်. ဒီပုၢ်ဝဲၢ်မုၣ်အံၤ တဲဝဲလၢ “ယတဘၣ်သး မၤတံာ်တာ် ဒီပုၢ်ဝဲၢ်မုၣ်ခွါတဖၣ်ဘၣ်. ဖဲန့ၣ်အခါ ယဆိကမိၣ်လၢ ယဟိဝၤယွၤ ကဟ့ၣ်ယၤ တၢ်ဂံၢ်တၢ်ဘါ ဒီးကမၤစၢၤယၤ. ဘၣ်ဆၣ် လၢခံန့ၣ် ယသ့ၣ်ညါလီၤသးလၢ ယတဃ့ ဒီပုၢ်ဝဲၢ်မုၣ်ခွါတဖၣ် အတၢ်မၤစၢၤဘၣ်အဃိ လီၤဂာ်ဒ်သိး ယကျဲးစၢး လဲၤခီဖျိတၢ်ကီတၢ်ခဲ လၢယကစၢ် ထဲတဂၤလီၤ.” (ကတိၤ ၁၈:၁) လၢခံ ဒီပုၢ်ဝဲၢ်မုၣ်ဒါစူရံ ကွဲးန့ၢ်အသကိးတနီၤလံာ် ဒီးတဲဘၣ်အဝဲသ့ၣ်လၢ အတၢ်အိၣ်သး. ဖဲန့ၣ်အတဲဝဲလၢ “ယဒိးန့ၢ်ဘၣ် တၢ်ဟ့ၣ်ဂံၢ်ဟ့ၣ်ဘါ လၢဒီပုၢ်ဝဲၢ်မုၣ်ခွါအအိၣ်အါမး ဒီးယဂံၢ်ယဘါထီၣ်ဒိၣ်မး. ယတဲပၠး မၣ်တဘၣ်လၢၤဘၣ်.” အဆဲးတဲဝဲလၢ “အဝဲသ့ၣ်ဟဲစိာ်န့ၢ်ယၤ တၢ်အီၣ်တၢ်အီ လၢတၢ်ဆါဟံၣ် ဒီးဆှၢန့ၢ်ယၤ လံာ်စီဆှံအဆၢတဖၣ် လၢအမၤမုာ်ထီၣ်ယသးစ့ၢ်ကီး. ခီဖျိလၢ အဝဲသ့ၣ် မၤဝဲဒ်န့ၣ်အဃိ ယသ့ၣ်ညါဘၣ်လၢ ယတအိၣ်ထဲတဂၤဘၣ်. ဒီးခီဖျိလၢ ပကဲ ယဟိဝၤယွၤ အဟံၣ်ဖိဃီဖိအဃိ ဒီပုၢ်ဝဲၢ်မုၣ်ခွါတဖၣ် သးအိၣ်ကဟုကယာ်ယၤ, ဆီၣ်ထွဲ မၤစၢၤယၤ, ဟီၣ်ဒီးယၤ ဒီးလဲၤခီဖျိ တၢ်ကီတၢ်ခဲဒီးယၤ ဒ်သိးသိး.”
၁၄. ဘၣ်မနုၤအဃိ ပဘၣ်တူၢ်လိာ် တၢ်မၤစၢၤလၢ တၢ်အိၣ်ဖှိၣ်သးပှၢ် အအိၣ်လဲၣ်.
၁၄ ယဟိဝၤယွၤ မၤစၢၤပှၤ လၢကျဲအဂၤတဘိ ခီဖျိ အသူဝဲ တၢ်အိၣ်ဖှိၣ်သးပှၢ်တဖၣ်. တၢ်အိၣ်ဖှိၣ်သးပှၢ်တဖၣ်န့ၣ် မ့ၢ်ဝဲတၢ်ဟ့ၣ်တခါလၢ ယဟိဝၤယွၤအအိၣ် ဒီးယဟိဝၤယွၤ သူအဝဲသ့ၣ်ဒ်သိး ကမၤမုာ်ထီၣ်ပသး ဒီးကဟ့ၣ်ဂံၢ်ဟ့ၣ်ဘါပှၤ. (ၡါ ၃၂:၁, ၂) အဃိ ဖဲပသူၣ်ကိၢ်သးဂီၤတၢ်အခါ ပဃ့တၢ်မၤစၢၤလၢ တၢ်အိၣ်ဖှိၣ်သးပှၢ်တဖၣ် အအိၣ်သ့. ဒီးအဝဲသ့ၣ် မ့ၢ်မၤစၢၤပှၤန့ၣ် ပကဘၣ် တူၢ်လိာ်အဝဲသ့ၣ် တၢ်မၤစၢၤ. ပမ့ၢ်တူၢ်လိာ် အဝဲသ့ၣ် တၢ်မၤစၢၤန့ၣ် ကဲဝဲ ကျဲတဘိလၢ ပပျဲယဟိဝၤယွၤ ဟ့ၣ်ဂံၢ်ဟ့ၣ်ဘါပှၤ.
တၢ်မုၢ်လၢ်လၢခါဆူညါန့ၣ် အမၤဆူၣ်ထီၣ် နဂံၢ်နဘါ
၁၅. ပဝဲခရံာ်ဖိတဖၣ် ပအိၣ်ဒီးတၢ်မုၢ်လၢ် မနုၤလဲၣ်.
၁၅ ပတၢ်ကရၢကရိ ထုးထီၣ်လံာ်လဲၢ်တဖၣ်န့ၣ် ကမၤစၢၤပှၤဒ်သိး ပဂံၢ်ပဘါ ကဆူၣ်ထီၣ်စ့ၢ်ကီး. (ရိ ၄:၃, ၁၈-၂၀) ဒ်ပမ့ၢ် ခရံာ်ဖိတဂၤအသိး ပအိၣ်ဒီးတၢ်မုၢ်လၢ်လၢ ပကအိၣ်မူဘၣ် လီၤထူလီၤယိာ် လၢဟီၣ်ခိၣ်ပၤရဒံစူးအပူၤ မ့တမ့ၢ် ကလဲၤထီၣ်ဘၣ်လၢ မူခိၣ်. ခီဖျိလၢ ပအိၣ်ဒီးတၢ်မုၢ်လၢ်အံၤအဃိ ပလဲၤခီဖျိ တၢ်ကီတၢ်ခဲကဲ, ပကဆဲးစံၣ်တဲၤတဲလီၤ တၢ်သးခုကစီၣ် ဒီးပမ့ၢ်န့ၢ်ဘၣ်မူဒါ လၢတၢ်အိၣ်ဖှိၣ်ပူၤ တခါဂ့ၤတခါဂ့ၤန့ၣ် ပမၤလၢပှဲၤအီၤကန့ၢ်. (၁ သ့း ၁:၃) တၢ်မုၢ်လၢ်တခါအံၤ ဟ့ၣ်ဂံၢ်ဟ့ၣ်ဘါဝဲ တၢ်မၢဖိပီလူးစ့ၢ်ကီး.
၁၆. ဘၣ်မနုၤအဃိ စီၤပီလူးလိၣ်ဘၣ် တၢ်ဟ့ၣ်ဂံၢ်ဟ့ၣ်ဘါလဲၣ်.
၁၆ စီၤပီလူးစ့ၢ်ကီး အလိၣ်ဘၣ်ဝဲ တၢ်ဟ့ၣ်ဂံၢ်ဟ့ၣ်ဘါ. ဖဲအကွဲးန့ၢ်လံာ်လၢ ပှၤကရံၣ်သူးဖိတဖၣ် အအိၣ်အခါ အဝဲထိၣ်သတြီၤလီၤအသးလၢ ဟီၣ်ခိၣ်သပၢၤ လၢအသ့ၣ်ဖးညီ. စီၤပီလူးတဲဝဲလၢ “တၢ်ဆီၣ်တံၢ်ပှၤ,” “ပကဘၣ်မၤဒ်လဲၣ်န့ၣ် ပတသ့ၣ်ညါဘၣ်,” “တၢ်မၤအၢမၤနးပှၤ” ဒီး “ပှၤမၤဘၣ်ဒိပှၤ.” တကးဒံးဘၣ် စီၤပီလူး ထံၣ်ဘၣ်တၢ်လီၤဘၣ်ယိၣ် လၢအသးသမူအဂီၢ်စ့ၢ်ကီး. (၂ ကရံၣ် ၄:၈-၁၀) ဖဲစီၤပီလူးလဲၤဝဲ အမံၤၡၢၤနရံၤ အတၢ်လဲၤ သၢဘျီတဘျီအခါ အကွဲးဝဲ တၢ်ကတိၤတဖၣ်အံၤ. ဒီးအကွဲးဝဲ တၢ်ကတိၤတဖၣ်အံၤ ဝံၤအလီၢ်ခံ အထံၣ်ဘၣ် တၢ်ကီတၢ်ခဲ လၢအဂၤ ဒ်သိးဒီး ပှၤကမျၢၢ်တဖု လၢအမၤတၢထီၣ်တၢလီၤတၢ်န့ၣ် မၤကီမၤခဲအီၤ, ပှၤဖီၣ်အီၤ, ကဘီဟးဂီၤ ဒီးအဘၣ်အိၣ်လၢ ဃိာ်ပူၤ.
၁၇. စီၤပီလူး ထံၣ်ဘၣ်တၢ်မၤကွၢ်တဖၣ် ဘၣ်ဆၣ် အဒိးန့ၢ်ဘၣ် တၢ်ဂံၢ်တၢ်ဘါဒ်လဲၣ်. (၂ ကရံၣ်သူး ၄:၁၆-၁၈)
၁၇ စီၤပီလူး န့ၢ်ဘၣ်တၢ်ဂံၢ်တၢ်ဘါ ခီဖျိ အသးစၢၢ်ဆၢဝဲ အတၢ်မုၢ်လၢ် လၢခါဆူညါ လၢအကဒိးန့ၢ်ဘၣ်ဝဲ. (ဖး ၂ ကရံၣ်သူး ၄:၁၆-၁၈.) စီၤပီလူးတဲဘၣ် ပှၤကရံၣ်သူးဖိလၢ အနီၢ်ခိမ့ၢ် “ဟးဂီၤကယီကယီ ဒံးယံာ်ဒံးအါထီၣ်” ဘၣ်ဆၣ် အတပျဲဝဲ တၢ်သူၣ်ဟးဂီၤသးဟးဂီၤ မၤလီၤစၢ်အသးဘၣ်. အဝဲသးစၢၢ်ဆၢတၢ်လၢ ခါဆူညါဟီ. စီၤပီလူးတူၢ်ဘၣ်ဝဲ တၢ်ကီတၢ်ခဲ ဒီးတၢ်နးတၢ်ဖှီၣ်တဖၣ် သနာ်က့ အသ့ၣ်ညါဝဲလၢ အတၢ်မုၢ်လၢ် လၢမူခိၣ်န့ၣ် အဂ့ၤ “ဒိၣ်န့ၢ်အန့ၣ် စၢၢ်တလၢၢ်.” ခီဖျိလၢ စီၤပီလူး ဆိကမိၣ်ထံဝဲ အတၢ်မုၢ်လၢ်အံၤအဃိ အတူၢ်ဘၣ်ဝဲလၢအ “ဒိးန့ၢ်ဘၣ် တၢ်ဂံၢ်တၢ်ဘါလၢအသီ တနံၤဘၣ်တနံၤ.”
၁၈. ခီဖျိလၢ ဒီပုၢ်ဝဲၢ်ခွါထံဟိၤမါ ဒီးအဟံၣ်ဖိဃီဖိ အိၣ်ဒီးတၢ်မုၢ်လၢ်အဃိ အဝဲသ့ၣ် ဒိးန့ၢ်ဘၣ် တၢ်ဂံၢ်တၢ်ဘါဒ်လဲၣ်.
၁၈ ဒီပုၢ်ဝဲၢ်ခွါထံဟိၤမါ လၢအအိၣ်လၢ ကီၢ်ဘူၣ်က့ရံယါန့ၣ် အဝဲစ့ၢ်ကီး အန့ၢ်ဘၣ် တၢ်ဂံၢ်တၢ်ဘါခီဖျိ အဆိကမိၣ်ထံဝဲ အတၢ်မုၢ်လၢ်လၢ ခါဆူညါ. ဖဲပူၤကွံာ်စှၤကိာ်နံၣ်န့ၣ် အဒ့ဖိ စဒြါခိၤ အကါဘၣ်တဲးအဃိ အသံဝဲ. ဖဲအဒ့ဖိ သံဝံၤအလီၢ်ခံ အသးဘၣ်ဒိဒိၣ်မး. ဒ်သိးအဝဲ ဒီးအဟံၣ်ဖိဃီဖိ တူၢ်ဝဲ တၢ်သူၣ်အုးသးအုးတခါအံၤ ကန့ၢ်အဂီၢ် အဝဲသ့ၣ် ထံၣ်တမှံကွၢ်ဝဲလၢ ခါဆူညါန့ၣ် အဒ့ဖိ ကသမူထီၣ်က့ၤ. အတဲဝဲလၢ “ပဟံၣ်ဖိဃီဖိန့ၣ် ပတဲသကိး တၢ်ဆၢကတီၢ် ဖဲကထံၣ်ဘၣ်က့ၤ စဒြါခိၤအခါ ပကဖီဒုးအီၣ်အီၤ တၢ်အီၣ်မနုၤလဲၣ်, ဖဲအဝဲဟဲက့ၤတနံၤန့ၣ် ပကကွဲမုာ် ဒီပုၢ်ဝဲၢ်မုၣ်ခွါတဖၣ် ဒ်သိး အဝဲသ့ၣ် ကဟဲတူၢ်လိာ်ခီၣ်ဆၢအီၤဒ်လဲၣ်. ဒီးပကတဲပၠးအီၤလၢ ဖဲမုၢ်နံၤခံကတၢၢ် အဆၢကတီၢ်န့ၣ် တၢ်မၤသးဒ်လဲၣ်စ့ၢ်ကီး.” ဒီပုၢ်ဝဲၢ်ခွါထံဟိၤမါ တဲဝဲလၢ ခီဖျိလၢ အီၤဒီးအဟံၣ်ဖိဃီဖိ သးစၢၢ်ဆၢဝဲ အတၢ်မုၢ်လၢ် လၢခါဆူညါအဂီၢ် အဃိ အဝဲသ့ၣ်အိၣ်ဒီး တၢ်တူၢ်န့ၢ်ခီၣ်ကဲ ဒီးအိၣ်ခိးကွၢ်လၢ်ဝဲလၢ ယဟိဝၤယွၤ ကမၤသမူထီၣ်န့ၢ်က့ၤ အဒ့ဖိ.
ထံၣ်တမှံကွၢ်လၢ ဟီၣ်ခိၣ်သီပူၤန့ၣ် နတၢ်အိၣ်မူ ကမၤသးဒ်လဲၣ် (ကွၢ်လံာ်အဆၢ ၁၉) c
၁၉. ပမၤဂၢၢ်ကျၢၤထီၣ် ပတၢ်မုၢ်လၢ် ကသ့ဒ်လဲၣ်. (ကွၢ်စ့ၢ်ကီးတၢ်ဂီၤ.)
၁၉ တၢ်မုၢ်လၢ်န့ၣ် ဒုးဆူၣ်ထီၣ် တၢ်ဂံၢ်တၢ်ဘါ သ့ဒ်လဲၣ်. အဒိ နမ့ၢ်အိၣ်ဒီး တၢ်မုၢ်လၢ်လၢ နကအိၣ်မူဘၣ် လီၤထူလီၤယိာ် လၢဟီၣ်ခိၣ်န့ၣ် ဖးတၢ်ဂ့ၢ်တၢ်ကျိၤလၢ လံာ်စီဆှံပူၤ လၢအပာ်ဖျါထီၣ် ပၤရဒံစူးအဂ့ၢ် ဒီးဆိကမိၣ်ထံအီၤ. (ၡါ ၂၅:၈; ၃၂:၁၆-၁၈) ထံၣ်တမှံကွၢ်လၢ ဟီၣ်ခိၣ်သီအပူၤန့ၣ် တၢ်ကမၤသးဒ်လဲၣ်. ထံၣ်တမှံကွၢ်လၢ နအိၣ်ဖဲန့ၣ် ဒီးနထံၣ်မတဂၤတဖၣ်လဲၣ်, နနၢ်ဟူဘၣ် မနုၤလဲၣ် ဒီးနတူၢ်ဘၣ်တၢ်ဒ်လဲၣ်. ဒ်သိး နထံၣ်တမှံကွၢ် တၢ်အိၣ်မူလၢ ဟီၣ်ခိၣ်သီပူၤ ကသ့အဂီၢ် ကွၢ်တၢ်ဂီၤတဖၣ် လၢပတၢ်ကရၢကရိ ထုးထီၣ်ဝဲ ဘၣ်ဃးဒီး ပၤရဒံစူးအဂ့ၢ်. မ့တမ့ၢ် ကွၢ်တၢ်ဂီၤမူ ဒီးဒိကနၣ် တၢ်သးဝံၣ် လၢအမ့ၢ် ဟီၣ်ခိၣ်လၢအသီအံၤ, ဘူးထီၣ်လၢတြဲၤအခီၣ်ထံး ဒီး ပထံၣ်တမှံကွၢ် တၢ်အိၣ်မူဆူညါ. ပမ့ၢ်ပာ်လီၤတၢ်ဆၢကတီၢ် ဒီးဆိကမိၣ်ထံ ပတၢ်မုၢ်လၢ် လၢဟီၣ်ခိၣ်သီအပူၤ ထီဘိန့ၣ် တၢ်ကီတၢ်ခဲလၢ ပတူၢ်ဘၣ်တဖၣ်န့ၣ် ပကထံၣ်အီၤ ဒ်အမ့ၢ် “တၢ်တစဲးဖိ ဒီးမ့ၢ်ဒၣ် တၢ်တစိၢ်တလီၢ်.” (၂ ကရံၣ် ၄:၁၇) ခီဖျိလၢ ယဟိဝၤယွၤ ဟ့ၣ်ပှၤ တၢ်မုၢ်လၢ်အဃိ အမၤဆူၣ်ထီၣ် ပဂံၢ်ပဘါ ဒီးပတူၢ်တၢ်ကန့ၢ်.
၂၀. ပမ့ၢ်တူၢ်ဘၣ်လၢ ပဂံၢ်ပဘါစၢ် သနာ်က့ ပဒိးန့ၢ်ဘၣ် တၢ်ဂံၢ်တၢ်ဘါ ကသ့ဒ်လဲၣ်.
၂၀ ပမ့ၢ်တူၢ်ဘၣ်လၢ ပဂံၢ်ပဘါလီၤစၢ် သနာ်က့ “ပကဒိးန့ၢ်ဘၣ် တၢ်ဂံၢ်တၢ်ဘါ ခီဖျိလၢ ကစၢ်ယွၤ” အအိၣ်. (စံး ၁၀၈:၁၃) ဒ်သိး ယဟိဝၤယွၤ ကဒုးဆူၣ်ထီၣ် ပဂံၢ်ပဘါအဂီၢ် အဟ့ၣ်ပှၤ တၢ်မၤစၢၤဒီဒူၣ်လံ. အဃိ ပမ့ၢ်ဘၣ် မၤလၢပှဲၤမူဒါ လၢအကီအခဲမ့ၢ်ဂ့ၤ, ပဘၣ်တူၢ် တၢ်နးတၢ်ဖှီၣ် တမံၤမံၤမ့ၢ်ဂ့ၤ ဒ်သိးပကဆဲးအိၣ်ဒီး တၢ်သးခုအဂီၢ် ပဃ့ထုကဖၣ်လၢ ယဟိဝၤယွၤအအိၣ် ဆူၣ်ဆူၣ်, ဃုသ့ၣ်ညါ အတၢ်ဟံးစုနဲၣ်ကျဲ ခီဖျိပမၤနီၢ်ကစၢ် တၢ်မၤလိလံာ်စီဆှံ ဒီးတူၢ်လိာ် တၢ်ဟ့ၣ်ဂံၢ်ဟ့ၣ်ဘါ လၢပဒီပုၢ်ဝဲၢ်မုၣ်ခွါတဖၣ်အအိၣ်. တကးဒံးဘၣ် ပကဘၣ် ဆဲးဆိကမိၣ်ထံ ပတၢ်မုၢ်လၢ်အဂ့ၢ်ထီဘိ. ပမ့ၢ်မၤဒ်န့ၣ်န့ၣ် လံာ်စီဆှံ တဲဝဲလၢ ပက “န့ၢ်ဂံၢ်န့ၢ်ဘါ ပှဲၤဒီး တၢ်စိတၢ်ကမီၤခဲလၢာ်” ဒ်သိးပ “တူၢ်တၢ်ကိးမံၤဒဲးလၢ တၢ်ဝံသးစူၤ ဒီးတၢ်သးခုအပူၤ ကန့ၢ်အဂီၢ်.” —ကလီး ၁:၁၁.
တၢ်သးဝံၣ် ၃၃ ပာ်ထီၣ်နတၢ်ဝံတၢ်ယိးလၢ ယဟိဝၤအလိၤ
a ပမ့ၢ်ထံၣ်ဘၣ်တၢ်ကီတၢ်ခဲ မ့တမ့ၢ် ဒိးန့ၢ်ဘၣ်မူဒါ တခါခါလၢ အကီအခဲန့ၣ် တၢ်မၤလိတခါအံၤ ကမၤစၢၤပှၤ. ဒီးပကသ့ၣ်ညါဘၣ်စ့ၢ်ကီးလၢ ယဟိဝၤယွၤ မၤဆူၣ်ထီၣ် ပဂံၢ်ပဘါ ဒ်လဲၣ် ဒီးဒ်သိးပကန့ၢ်ဘၣ် တၢ်ဂံၢ်တၢ်ဘါအဂီၢ် ပကဘၣ်မၤဒ်လဲၣ်.
b ပှၤမံၤတနီၤန့ၣ် ပှၤဆီတလဲဝဲ.
c တၢ်ဂီၤ အခီပညီ– ဒီပုၢ်ဝဲၢ်မုၣ်လၢ အတနၢ်ဟူတၢ်ဘၣ်တဂၤ ဆိကမိၣ်ထံဝဲ ဘၣ်ဃးဒီး ဝံအတၢ်စံးပာ်အဂ့ၢ် ဒီးကွၢ်ဝဲ တၢ်သးဝံၣ် လၢအအိၣ်ဒီးတၢ်ဂီၤမူ ဒ်သိးကမၤစၢၤအီၤလၢ အကထံၣ်တမှံလီၤအသးလၢ ဟီၣ်ခိၣ်သီအပူၤအဂီၢ်.
