1. Ino Lesa wakabacafwa buyani basebenshi bakwe bakale kale kwaamba ayi babe ankusu?

 MU BAIBO muli shakubonenaako shiinji sha basebenshi bakwe Lesa bashomeka abo bakalinga kucite nkusu. Sombi teshi lyoonse ndyebakalinga kulinyumfwa kuba ankusu. Kucakubonenaako, pashiindi shimwi Mwaami Defedi wakalinga kulinyumfwa ayi ngumuntu utaloondi alimwi ‘muyumu anga nkalundu,’ sombi pashiindi shimwi ‘wakaloonda.’ (Kulu. 30:7) Mushimu wakwe Lesa wakacafwa Samusoni kuba ankusu shilibetele. Sombi Samusoni wakalinga kucishi ayi kwakubula lucafwo lwa mushimu wakwe Lesa, inga wababo “mbuli bantu bamwi boonse.” (Boombo. 14:​5, 6; 16:17) Yehova ngowakabapa nkusu basebenshi bakwe bashomeka aba.

2. Ino nceebonshi Paulo ncaakaambila ayi “muciindi ndyeendefukite, lyalo ndyeenjuma”? (2 Bene Kolinto 12:​9, 10)

² Mutumwi Paulo wakalinga kucishi ayi wakalinga kuyandika lucafwo lwakwe Yehova kwaamba ayi abe ankusu. (Amubelenge 2 Bene Kolinto 12:​9, 10.) Paulo wakalinga kuciswaciswa bweenka mbuli ndiswe sobaanji. (Gala. 4:​13, 14) Pashiindi shimwi, cakalinga kumuyumina kucita shintu shili kabotu. (Loma. 7:​18, 19) Alimwi pashiindi shimwi wakalinga kulisukama akuloonda ceebo cakuyeeya sheenga shamucitikila. (2 Koli. 1:​8, 9) Nacibi boobo, Paulo ndyaakalefuka, wakayuma. Munshila nshi? Yehova wakamupa nkusu nshaakalinga kuyandika kwaamba ayi acikoonshe kuliyumya mumapensho ngaakalinga kwiindaamo.

3. Ino njimiipusho nshi njeshi tucane shikumbulo mumutwi uyu?

³ Aswebo Yehova wakatushomesha ayi ananootupa nkusu shakuliyumya. (1 Pit. 5:10) Sombi tulyeelete kucitaawo comwi kwaamba ayi atucaafwe. Kucakubonenaako, na mwafwa nsala lyalo babaamba nshima, mulyeelete kulya nshima iyo kwaamba ayi nsala imane.  Aswebo tulyeelete kucitaawo comwi kwaamba ayi Yehova atupe nkusu nshetutoyandika. Ino Yehova alatucafwa buyani kwaamba ayi tube ankusu? Alimwi ino nshiinshi nshotuyandika kucita kwaamba ayi atupe nkusu? Tutoocana shikumbulo kumiipusho iyi kwiinda mukwiiya Yehova mbwaakacafwa mushinshimi Jona, Maliya banyina Yesu alimwi amutumwi Paulo. Alimwi tutokwiiya a Yehova mbwaatolelela kucafwa basebenshi bakwe munshiku shino, bweenka mbwaakacafwa basebenshi bakwe bakale kale.

4. Ino inga twacita buyani kwaamba ayi Yehova atupe nkusu nshetutoyandika?

⁴ Comwi nceenga twaciita kwaamba ayi Yehova atupe nkusu, nkupaila kuli nguwe. Yehova inga wakumbula mipailo yesu kwiinda mukutupa “nkusu shiindaawo nshetucite.” (2 Koli. 4:7) Alimwi kubelenga Maswi akwe alimwi akukutumana kuyeeyawo, akwalo inga kwatucafwa kuba ankusu nshetuyandika. (Kulu. 86:11) Maswi akwe Lesa “alicite nkusu.” (Ebu. 4:12) Na kamupaila kuli Yehova akubelenga Maswi akwe, alaakumupa nkusu nshemuyandika kwaamba ayi mucikoonshe kuliyumya, kutolelela kuba alusangalalo alimwi akukumanisha mukuli uyumu ngweenga mwapekwa. Amuleke tubandike Yehova mbwaakacafwa mushinshimi Jona kutaloonda akuba ankusu nshaakalinga kuyandika.

5. Ino nceebonshi mushinshimi Jona wakalinga kuyandika kutaloonda?

⁵ Mushinshimi Jona wakalinga kuyandika kutaloonda. Wakaloonda kuya kumusena Yehova nkwaakamutuma. Aboobo wakatanta bwaato akuya kumwi. Ceebo cakwaamba ayi wakacita boobo, kwakacaalabo paniini kwaamba ayi lakwe abaabo mbwaakalingaabo mu bwaato bafwe. Beshikweensha bwaato ndyebakamuwaala mulweenge, ciswi cinene cakamumina. Lyalo Jona wakalicana mumusena mwatana kukalaawo kale. Ino mutoyeeya ayi Jona wakalinyumfwa buyani? Sa wakalinga kuyeeya ayi atoofwa? Na mpashi wakalisukama akuyeeya ayi camana Yehova wamukaka? Jona alyeelete wakalisukama abuumbi.

6. Kweelana a Jona 2:​1, 2, 7, ino nshiinshi Jona nshaakacita ndyaakalinga mumala mwa ciswi kwaamba ayi Yehova amucaafwe kutaloonda?

⁶ Ino nshiinshi Jona nshaakacita ndyaakalinga mumala mwa ciswi kwaamba ayi Yehova amucaafwe kutaloonda? Wakapaila kuli Yehova. (Amubelenge Jona 2:​1, 2, 7.) Nabi kwaamba ayi Jona taakwe kunyumfwila Yehova, wakaana alimwi wakalinga kushomete ayi Yehova atookutika mupailo wakwe. Alimwi Jona wakakutumana kuyeeya cakubikila maano pamalembo ngaakabelengaawo. Ino nceebonshi nceenga twaambila boobo? Mukwiinga maswi aanji ngaakaamba mumupailo ulembetwe mulibuku lya Jona capita 2, ngomaswi ngotucana amulibuku lya Kulumbaisha. (Kucakubonenaako, amweelanye Jona 2:​2, 5 a Kulumbaisha 69:1; 86:7.) Ncakutatoonsha kwaamba ayi Jona wakalinga kwaashi kabotu malembo ayo. Malembo ayo akacafwa Jona kushoma cakutatonsha ayi Yehova atoomucafwa. Yehova wakapulusha Jona alimwi mukuya kwaciindi wakaba ulibambite kusebensa ncito njaakapekwa.—Jona 2:10–3:4.

7-8. Ino mukwesu umwi waku Taiwan wakacita buyani kwaamba ayi Yehova amupe nkusu shakuliyumya paciindi ndyaakalinga kwiinda mumapensho?

⁷ Cakubonenaako cakwe Jona inga catucafwa ndyetutokwiinda mumapensho apusenepusene. Kucakubonenaako, mukwesu waliina lya Zhiming, b uyo ukala ku Taiwan, alaciswa bulwashi bunene. Kwiilikaawo, bamumukwashi wakwe balamupikisha abuumbi ceebo cakusalawo kusebensela Yehova. Yehova alamupa nkusu shakuliyumya kwiinda mukupaila akwiiya Maswi akwe. Wakaamba ayi, “Cimwi ciindi na kuli lipenshi lyampolela, ndalisukama abuumbi cakwaamba ayi ndaalilwa kukalikana mumoyo kwaamba ayi ncite ciiyo capalwaangu.” Sombi alacinka manungo muli Yehova kwaamba ayi amucaafwe. Wakaamba ayi: “Cakutaanguna, ndapaila kuli Yehova.  Lyalo ndatalika kukutika nyimbo shesu sha Bwaami. Cimwi ciindi, ndatalika kwiimba nyimbo shesu muliswi lya panshi kushikila ndakalikana mumoyo. Mukweelaako, ndatalika kucita ciiyo capalwaangu.”

⁸ Kucita ciiyo capalwaabo kwakacafwa ba Zhiming kuliyumya paciindi ndyebakalinga kwiinda mubukaalo buyumu. Kucakubonenaako, pesule lyakwaamba ayi babacita opaleshoni inene, naasi umwi wakabalwiita ayi batoyandika kubikwa bulowa ceebo cakwaamba ayi maseelo apanga bulowa (red blood cells) akaceya mumubili wabo. Ndyekwakacaala bushiku bomwi kwaamba ayi ba Zhiming babacite opaleshoni, bakabelenga makani akalinga kwaamba pali nankashi umwi uyo wakalinga kucite lipenshi lyomwi andyebakalinga kucite lyakapa kwaamba ayi bamucite opaleshoni. Lakwe maseelo apanga bulowa akalinga aceya abuumbi kwiinda aba Zhiming; sombi wakakaka kubikwa bulowa alimwi wakoola. Cakubonenaako cakwe cakacafwa ba Zhiming kutolelela kushomeka kuli Yehova.

9. Ino nshiinshi nsheenga mwaciita na mutolisukama abuumbi ceebo ca lipenshi ndyemutokwiindaamo? (Amubone ashikope.)

⁹ Sa paciindi ndyemutokwiinda mumapensho mulalisukama abuumbi cakwaamba ayi mulaalilwa kupaila kuli Yehova? Nabi sa mulalinyumfwa kulema abuumbi cakwaamba ayi mwaalilwa kucita ciiyo capalwaanu? Munokwiibaluka ayi Yehova alanyumfwishisha kabotu bukaalo mbomutokwiindaamo. Aboobo nabi mwapailabo mupailo ufwiifwi, inga mwashooma ayi alaakumupa nkusu nshemutoyandika. (Efe. 3:20) Na camuyumina kubelenga akwiiya ceebo cakuciswa, kulema na kulisukama abuumbi, inga mwakutika ku maswi amu Baibo akalekodwa na amu mabuku esu aamba shamu Baibo. Alimwi mpashi inga mwakutika nyimbo shesu shimwi na kweebela vidyo pa jw.org. Yehova inga wamucafwa kuliyumya na mwapaila kuli nguwe alimwi akulangoola shikumbulo mu Baibo amu shakulya shimwi shakumushimu nshaatupa.

10. Ino bamakwesu abenankashi inga batuyuminisha buyani?

¹⁰ Yehova inga wasebensesha bashominyineesu kwaamba ayi atuyuminishe. Inga ‘batuyuminisha abuumbi’ ndyetutokwiinda mulipenshi limwi na ndyecitootubeta ciyumu kukumanisha mukuli umwi. (Kolo. 4:​10, 11) Tulayandika kuyuminishikwa kubashominyineesu bunene bunene paciindi ndyetutokwiinda “mumapensho.” (Tus. 17:17)  Na twalefuka, bamakwesu abenankashi inga batucafwa lwakumubili, kutuyuminisha akutucafwa kutolelela kusebensela Yehova cakushomeka. Amuleke tubandike pali Maliya banyina Yesu, mbwaakayuminishikwa kuswa kubamwi.

11. Ino nceebonshi Maliya wakalinga kuyandika kuyuminishikwa?

¹¹ Maliya wakalinga kuyandika kuyuminishikwa. Amuyeeyebo mbwaakalisukama, munjelo waliina lya Gabuliyelo ndyaakamulwiita ayi alaakumita nabi kwaamba ayi taakalinga kweebetwewo. Nabi kwaamba ayi taakalinga kucishiiwo bwakulama mwaana, wakalinga kusa mukulama mwaana musankwa uyo wakalinga kusa mukuba Mesiya. Paciindi ici Maliya kaatana kukumanaawo kale amusankwa, sombi wakalinga kweelete kulwiita Josefu ayi alicite lifumo. Cilyeelete tacakalinga cuubu kulwiita Josefu makani aya.—Luka 1:​26-33.

12. Kweelana a Luka 1:​39-45, ino Maliya wakayuminishikwa buyani ndyaakapekwa mukuli uyumu?

¹² Ino Maliya wakayuminishikwa buyani kwaamba ayi acikoonshe kukumanisha mukuli uyu ulibetele alimwi uyumu? Wakasenga lucafwo kuswa kubamwi. Kucakubonenaako, wakasenga Gabuliyelo kwaamba ayi amucaafwe kushibilaawo ashimwi pa mukuli uyu. (Luka 1:34) Lyalo ndyepakeendabo ciindi ciniini, wakaya “mundabala yakalinga mutulundu” mucishi ca Juda mukufwakashila Lisabeti shikamukowa wakwe. Kufwakasha uku kwakalinga kubotu, mukwiinga Lisabeti wakalumba Maliya alimwi wakatanjililwa amushimu usalashi kwaamba bushinshimi buyuminisha pa mwaana musankwa Maliya ngwaakalinga kusa mukutumbuka. (Amubelenge Luka 1:​39-45.) Maliya wakaamba ayi ‘lyaansa lyakwe [Yehova] lyacita shintu shankusu shikankamika.’ (Luka 1:​46-51) Yehova wakayuminisha Maliya kwiinda mukusebensesha Gabuliyelo a Lisabeti.

13. Ino nshiinshi shakacitika nankashi umwi ukala ku Bolivia ndyaakasenga lucafwo kubashominyina?

¹³ Aswebo bashominyineesu inga batuyuminisha bweenka Maliya mbwaakayuminishikwa. Nankashi waliina lya Dasuri uyo ukala ku Bolivia, wakalinga kuyandika kuyuminishikwa. Baishi ndyebakaciswa abuumbi alimwi kabali mucipatela, wakalinga kusuni kucita nsheenga wacikonsha kwaamba ayi anoobalama. (1 Timo. 5:4) Sombi teshi lyoonse ndyecakalinga kumubeta cuubu. Wakaamba ayi, “Mankanda aanji ndakalinga kulinyumfwa ayi teshi ncikoonshe kutolelela kucisisha bata.” Pakutaanguna taakwe kusenga lucafwo kuswa kubamwi. Wakaamba ayi, “Nshindakalinga kusuniiwo kupensha bamakwesu. Ndakalinga kuyeeya ayi, ‘Yehova atoompa lucafwo ndontoyandika.’ Sombi ndakesa mukushiba ayi kutasenga lucafwo kubamwi, kwakatondesha ayi ndakalinga kusuni kumana mapensho angu neenka.” (Tus. 18:​1, NWT) Nankashi Dasuri wakasalawo kutumina meseji beshicibusa bakwe bamwi akubasansulwiita bukaalo mbwaakalinga kwiindaamo. Wakaamba ayi, “Bamakwesu abenankashi bakanjuminisha abuumbi. Bakatuletela shakulya kucipatela akumbelengela malembo ayuminisha. Cilayuminisha abuumbi kushiba ayi tatubete sweenka. Soonse tuli lubasu lwa mukwashi wakwe Yehova unene. Alimwi bashominyineesu balisuni kutucafwa anshetutoyandika, kulila andiswe ndyetutopenga alimwi akutuyuminisha kutolelela kusebensela Yehova pomwi ambabo.”

14. Ino nceebonshi tulyeelete kusumina lucafwo kuswa ku bamanene?

¹⁴ Nshila yomwi Yehova mbwatuyuminisha, nkwiinda mukusebensesha bamanene. Nshipo nshaasebensesha kwaamba ayi atuyuminishe akutucafwa kulinyumfwa kuubilwa. (Isa. 32:​1, 2) Aboobo na mwalisukama, amulwiiteko munene umwi mbomutolinyumfwa. Alimwi tamweelete kuwayawaya kutambula lucafwo ndweenga bamanene bamupa. Yehova inga wasebensesha mbabo kwaamba ayi amuyuminishe.

15. Ino nkulangila nshi Beneklistu boonse nkobacite?

¹⁵ Shishomesho shamu Baibo inga shatupa kulangila ankusu shakutolelela kusebensela Yehova. (Loma. 4:​3, 18-20) Beneklistu bamwi batolangila kukala kwamuyayaya kwiculu, lyalo bamwi batolangila kukala kwamuyayaya mu paladaiso pacishi  capanshi. Kulangila kwesu kulatucafwa kuliyumya ndyetutokwiinda mumapensho, kushimikilako bamwi makani abotu, alimwi akusebensela bamakwesu abenankashi mulibungano. (1 Tesa. 1:3) Kulangila uku nkokwakayuminisha amutumwi Paulo.

16. Ino nceebonshi mutumwi Paulo wakalinga kuyandika kuyuminishikwa?

¹⁶ Paulo alakwe wakalinga kuyandika kuyuminishikwa. Munkalata njaakalembela bene Kolinto, wakalikoshanisha kunongo ya bulongo iyo yeenga yapwaika. Pashiindi shimwi wakalinga kupenshekwa, kutoonsha akucisikwa. Alimwi pashiindi shimwi buumi bwakwe bwakalinga mumapensho. (2 Koli. 4:​8-10) Paulo wakalemba maswi aya ndyaakalinga palweendo lwakwe lwatatu lwa bumishonali. Alimwi pesule lyakulemba maswi aya, wakeenda mubukaalo abumwi buyumu abuumbi. Kumamanino alweendo lwakwe lwa bumishonali, bantu bakamulwana, wakalinga kusuni kunwiita palweenge, alimwi wakaangwa akubikwa mujeele.

17. Kweelana a 2 Bene Kolinto 4:​16-18, ino nciinshi cakacafwa Paulo kuba ankusu shakuliyumya ndyaakalinga kwiinda mumapensho?

¹⁷ Paulo wakaba ankusu shakuliyumya ceebo cakubikila maano kukulangila nkwaakalinga kucite. (Amubelenge 2 Bene Kolinto 4:​16-18.) Wakalwiita bene Kolinto ayi taakalinga kusuniiwo kuboolela pesule nabi kwaamba ayi wakalinga kulinyumfwa ayi nkusu shitooya buceya. Wakatolelela kubikila maano kukulangila nkwaakalinga kucite. Kulangila kwa kukala buumi butamaani kwiculu kwakalinga kulibetele abuumbi kuli Paulo, cakwaamba ayi wakalinga kulibambite kuliyumya mumapensho ali woonse kwaamba ayi akatambule cilambu cakwe. Paulo wakalinga kukutumana kuyeeya pakulangila uku, aboobo kwakamucafwa kuba ankusu shakuliyumya bushiku abushiku.

18. Ino kulangila kulabayuminisha buyani ba Tihomir amukwashi wabo?

¹⁸ Mukwesu waliina lya Tihomir ukala ku Bulgaria, alayuminishikwa ceebo cakulangila nkwaacite. Myaaka iniini yainda, Zdravko mwanike wakwe musankwa wakafwa mu akisidenti. Ici cakapa mukwesu uyu kunolinyumfwa buumba abuumbi. Kwaamba ayi bacikoonshe kuliyumya, lakwe abamumukwashi wakwe balayeeya mbweshi cikabe na Zdravko akabushikwe. Wakaamba ayi: “Tulabandika nkweshi tukakumanine a Zdravko, shakulya nsheshi tukamutelekele, bantu mbweshi tukeete kukusekelela na akabushikwe, alimwi ansheshi  tukamulwiite pashitoocitika munshiku shino shakweelaako.” Ba Tihomir bakaamba ayi kubikila maano kukulangila nkobacite kulacafwa mukwashi wabo kutolelela kuliyumya akutolelela kulindila ciindi Yehova ndyeshi akabushe mwanike wabo.

19. Ino nshiinshi nsheenga mwaciita kwaamba ayi muyumye kulangila kwanu? (Amubone acikope.)

¹⁹ Ino nshiinshi nsheenga mwaciita kwaamba ayi muyumye kulangila kwanu? Na mulalangila kukala kwamuyayaya pacishi capanshi, amubelenge makani amu Baibo aamba mu Paladaiso mbweshi mukabe akukutumana kuyeeyawo. (Isa. 25:8; 32:​16-18) Amukutumane kuyeeya buumi mbweshi bukabe mucishi cipya. Amuyeeye bantu mbomusuni kubona, nsheshi mukanyumfwe, alimwi ambweshi mukalinyumfwe. Kwaamba ayi munooyeeya buumi mbweshi bukabe mu Paladaiso, munoolangilisha shikope shitondesha mu Paladaiso mbweshi mukabe isho shicanika mumabuku esu na kweebela vidyo ya nyimbo yaamba ayi Amuyeeye ayi Muli Mucishi Cipya, Cakalingabo Pafwifwi, na yaamba ayi Amuyeeye Buumi Mbweshi Bukabe Kunembo. Na lyoonse katukutumana kuyeeya buumi mbweshi bukabe mucishi cipya, tunanobona ayi “mapensho oobu ngotutoobona teshi aciindi cilaamfu.” (2 Koli. 4:17) Kulangila Yehova nkwaakamupa inga kwamucafwa kuliyumya ndyemutokwiinda mumapensho.

20. Ino nshiinshi nsheenga twaciita kwaamba ayi tube ankusu nabi ndyetwalinyumfwa kulefuka?

²⁰ “Lesa alaakutupa kuba nkusu,” nabi twalinyumfwa kulefuka. (Kulu. 108:​13, NWT) Kuli shintu shiinji Yehova nshaakamupa sheenga shamucafwa kuba ankusu. Aboobo na mutoyandika lucafwo kwaamba ayi mucikoonshe kukumanisha mukuli umwi, kuliyumya ndyemutokwiinda mumapensho, na kutolelela kuba alusangalalo, amupaile kuli Yehova kuswa panshi lya moyo akucita ciiyo capalwaanu kwaamba ayi amucaafwe. Amusumine kuyuminishikwa kuswa kubashominyinaanu. Lyoonse munoocana ciindi cakukutumana kuyeeya pakulangila nkomucite. Lyalo Lesa “alaakumuyuminisha ankusu shakwe shoonse kweelana abulemu bwankusu shakwe kwaamba ayi mutolelele kuliyumya cakukalika moyo alimwi calusangalalo.”—Kolo. 1:​11, NWT.