1. Dan lepase, kouma bann serviter Zeova ti gagn lafors?

 LABIB souvan dekrir bann dimounn ki fidel ar Zeova, kouma bann dimounn ki for. Selman, zot pa ti touletan santi zot for. Par exanp, Lerwa David parfwa ti santi li “for kouma enn montagn.” Me ena fwa, li “ti gagn bien per.” (Ps. 30:7) Gras-a lespri sin Zeova, Sanson ti ena enn lafors extraordiner. Selman, li ti kone ki san lafors ki Zeova donn li, li ti pou “vinn feb, parey kouma ninport ki zom.” (Ziz 14:​5, 6; 16:17) Sa bann zom fidel-la ti for zis parski Zeova ti donn zot lafors.

2. Kifer lapot Pol ti dir ki li feb ek pwisan? (2 Korintien 12:​9, 10)

² Lapot Pol ti rekonet ki li osi li ti bizin lafors ki Zeova done. (Lir 2 Korintien 12:​9, 10.) Parey kouma nou tou, Pol ti tom malad. (Gal. 4:​13, 14) Ena fwa, li ti osi gagn difikilte pou “fer seki bon.” (Rom. 7:​18, 19) Ek parfwa, li ti trakase ek li ti gagn per, parski li pa ti kone seki ti pou ariv li. (2 Kor. 1:​8, 9) Selman, mem si Pol ti feb, li ti vinn pwisan. Kouma? Zeova ti donn Pol lafors ki li ti bizin pou andir so bann difikilte.

3. Ki kestion nou pou reponn dan sa lartik-la?

³ Zeova promet nou ki Li pou donn nou osi lafors pou andire. (1 Pier 5:10) Selman, fode pa nou panse ki Li pou ed nou si nou pa fer okenn zefor. Anou pran enn lexanp: Enn loto roule gras-a so moter. Selman, si sofer-la pa pez akselerater, loto-la pa pou al okenn par. Dan mem fason, Zeova dispoze pou donn nou lafors ki nou bizin. Selman, nou bizin fer bann zefor pou gagn sa. Ki kitsoz Zeova servi pou donn nou lafors ki nou bizin? Ek ki nou bizin fer pou gagn sa lafors-la? Dan sa lartik-la, nou pou reponn sa bann kestion-la. Nou pou  gete kouma Zeova ti donn lafors profet Zonas, Mari, ek lapot Pol. Nou pou gete osi kouma Zeova kontign donn lafors so bann serviter azordi.

4. Kouma Zeova donn nou lafors?

⁴ Zeova donn nou lafors kan nou priye Li. Kan Li reponn nou lapriyer, Li kapav donn nou “sa pwisans ki plis ki seki normal la.” (2 Kor. 4:7) Nou kapav osi gagn lafors kan nou lir Labib ek nou reflesi lor la. (Ps. 86:11) Lansegnman ki ena dan Labib “li pwisan.” (Ebre 4:12) Kan to priye Zeova ek to lir Labib, to pou gagn lafors ki to bizin pou andire, pou gard to lazwa, ek pou asim bann responsabilite ki difisil. Anou gete kouma Zeova ti donn lafors profet Zonas.

5. Kifer profet Zonas ti bizin lafors ek kouraz?

⁵ Profet Zonas ti bizin lafors ek kouraz. Kifer? Parski li ti per pou fer mision ki Zeova ti donn li. Li pa ti al kot Zeova ti dir li ale, me li ti mont dan enn bato ki ti pe al dan lot direksion. Akoz sa, Zeova ti fer enn tanpet leve lor lamer. Zonas ti manke mor, ek li ti osi met lavi bann lezot marin an danze. Kan bann-la ti zet li dan lamer, enn gro pwason ti aval li, ek li ti bizin res dan vant sa pwason-la. Ki Zonas ti resanti dan sa ler-la? Eski li ti panse ki li ti pou mor dan vant sa pwason-la? Eski li ti pe demann limem si Zeova ti abandonn li? Zonas sirman ti bien trakase dan sa ler-la.

6. Dapre Zonas 2:​1, 2, 7, kouma Zonas ti gagn lafors kan li ti dan vant sa gro pwason-la?

⁶ Kan li ti tousel dan vant sa gro pwason-la, kouma Zonas ti gagn lafors? Premierman, li ti priye Zeova. (Lir Zonas 2:​1, 2, 7.) Mem si Zonas ti dezobeir Zeova, li ti repanti, ek li ti kone ki Zeova ti pou ekout so lapriyer. Deziemman, Zonas ti reflesi lor bann Lekritir. Kouma nou konn sa? Dan so lapriyer, ki trouv dan Zonas sapit 2, Zonas ti servi sertin parol ki trouv dan liv Psom. (Par exanp, konpar Zonas 2:​2, 5 ar Psom 69:1; 86:7.) Sa montre ki Zonas ti konn bien sa bann verse-la. Ek parski li ti reflesi lor la, Zonas ti ena konfians ki Zeova ti pou ed li. Zeova ti sov Zonas apre sa, ek Zonas ti pre pou fer mision ki Zeova ti donn li.—Zonas 2:10–3:4.

7-8. Kouma Zhiming ti gagn lafors pou andir so bann difikilte?

⁷ Lexanp Zonas kapav ed nou kan nou gagn bann difikilte. Zhiming, b enn frer ki res Taywann, ena enn maladi bien grav. Anplis, so bann fami persekit li parski li enn Temwin. Selman, kan li etidie ek li priye Zeova, Zhiming gagn lafors. Li dir: “Parfwa, kan mo gagn bann difikilte, mo telman trakase ki mo latet fatige ek mo pa kapav fer mo letid personel.” Selman, Zhiming pa bes lebra. Li dir: ”Pou koumanse, mo priye Zeova. Apre sa, mo met mo irfonn dan mo zorey ek mo ekout bann kantik. Parfwa, mo mem sant bann kantik-la dousma-dousma ziska ki mo aret trakase. Ek apre sa, mo koumans etidie.”

⁸ Zhiming ti gagn lafors pou andir so bann difikilte gras-a bann kitsoz ki li ti aprann dan so letid personel. Par exanp, apre ki li ti fer enn gro  loperasion, enn ners ti dir li ki li bizin met disan parski so disan ti bien ba. Selman, lanwit avan so loperasion, Zhiming ti lir biografi enn ser ki ti fer mem loperasion. Ser-la so disan ti pli ba ki pou Zhiming. Pourtan, li ti refiz transfizion, ek tou ti pas bien pou li. Sa biografi-la ti donn Zhiming lafors pou li res fidel ar Zeova.

9. Kan to santi twa feb, ouswa kan to latet fatige, ki to kapav fer? (Get zimaz osi.)

⁹ Kan to gagn bann difikilte, eski parfwa to latet telman fatige ki to pa reisi priye Zeova? Eski parfwa to santi twa tro feb pou etidie? To kapav sir ki Zeova konpran to sitiasion. Alor, mem si to fer enn ti lapriyer bien sinp, to kapav sir ki Li pou donn twa seki to bizin. (Efe. 3:20) Si to pe soufer lor plan fizik ouswa emosionel, ek ki to trouv sa difisil pou lir ek etidie, to kapav ekout bann lanrezistreman odio Labib ouswa bann piblikasion. To kapav osi ekout nou bann sante, ouswa get nou bann video lor jw.org. Zeova anvi donn twa lafors, ek Li pou reisi fer sa si to priye Li, ek to rod repons to bann lapriyer dan Labib ek dan bann piblikasion.

10. Kouma nou bann frer ek ser donn nou lafors?

¹⁰ Zeova kapav servi nou bann frer ek ser pou donn nou lafors. Zot kapav vinn “enn gran sours rekonfor” kan nou gagn bann difikilte, ouswa kan nou bizin asim bann responsabilite ki difisil. (Kol. 4:​10, 11) Se sirtou dan “bann moman difisil” ki nou bizin ena bann kamarad. (Prov. 17:17) Kan nou santi nou feb, nou bann frer ek ser kapav rekonfort nou, donn nou seki nou bizin, ek ankouraz nou pou kontign servi Zeova ar fidelite. Anou gete kouma Mari, mama Zezi, ti gagn lafors ar lezot.

11. Kifer Mari ti bizin lafors?

¹¹ Mari ti bizin lafors pou fer volonte  Zeova. Sey mazine seki li ti resanti kan anz Gabriel ti dir li ki li ti pou tom ansint, alor ki li pa ti ankor marye. Se premie fwa ki li ti pou elve enn zanfan, ek sa zanfan-la ti pou vinn Lemesi. Anplis, li ti ankor vierz, alor kouma li ti pou explik tousala Zozef, so fianse?—Lik 1:​26-33.

12. Dapre Lik 1:​39-45, kouma Mari ti gagn lafors ki li ti bizin?

¹² Kouma Mari ti gagn lafors pou asim sa responsabilite bien difisil la? Li ti rod led ar lezot. Par exanp, li ti demann anz Gabriel plis linformasion lor responsabilite ki li ti pou gagne. (Lik 1:34) Apre sa, li ti fer enn long vwayaz pou al “dan bann montagn” Zida, pou vizit enn so fami ki ti apel Elizabet. Laba, Mari ti gagn lankourazman ki li ti bizin, ek Elizabet ti felisit li. Anplis, lespri sin Zeova ti vinn lor Elizabet ek li ti partaz ar Mari enn profesi konsernan so Garson ki ti pou vinn Lemesi. (Lir Lik 1:​39-45.) Lerla, Mari ti dir ki Zeova ti “fer bann kitsoz bien pwisan avek so lebra.” (Lik 1:​46-51) Zeova ti donn Mari lafors gras-a anz Gabriel ek Elizabet.

13. Ki bienfe enn ser dan Bolivi inn gagne kan li’nn rod led so bann frer ek ser?

¹³ Parey kouma Mari, twa osi to kapav gagn lafors ar to bann frer ek ser. Dasuri, enn ser ki res Bolivi, ti bien bizin lafors. So papa ti tom bien malad, ek bann dokter pa ti kapav fer nanye pou li. Kan so papa ti admet lopital, Dasuri ti fer so maximum pou okip li. (1 Tim. 5:4) Sa ti bien difisil! Dasuri dir: “Plizir fwa mo ti anvi zet zarm.” O-koumansman, li pa ti rod led ar lezot. Li dir: “Mo pa ti anvi fatig mo bann frer ek ser.” Me apre li dir: “Mo ti dir ar momem, ‘Se Zeova ki pou donn mwa lafors ki mo bizin.’ Selman, mo’nn konpran ki kan mo ti res dan mo kwin, mo ti pe esey regle mo problem par momem.” (Prov. 18:1) Lerla, Dasuri ti explik de-trwa kamarad so sitiasion. Li dir: “Mo pa kapav explike ki kantite lafors ek kouraz mo bann frer ek ser inn donn mwa. Zot ti amenn manze pou nou lopital, ek zot ti partaz bann verse rekonfortan avek mwa. Mo ti nepli santi mwa tousel, ek sa ti fer mwa boukou dibien. Nou form parti enn gran fami; fami Zeova. Nou bann frer ek ser anvi ed nou, zot anvi plor ansam ar nou kan nou soufer, ek zot anvi ankouraz nou pou kontign servi Zeova.”

14. Kifer nou bizin aksepte led bann ansien?

¹⁴ Zeova servi bann ansien pou donn nou lafors. Bann ansien, zot bann kado ki Zeova servi pou ankouraz nou ek rekonfort nou. (Iza. 32:​1, 2) Alor, si ena enn kitsoz ki pe trakas twa, fer bann ansien kone. Ek kan zot ed twa, aksepte zot led parski Zeova kapav servi zot pou donn twa lafors.

15. Ki lesperans bann Kretien ena?

¹⁵ Bann promes ki ena dan Labib kapav donn nou lespwar ek lafors ki nou bizin pou kontign servi Zeova. (Rom. 4:​3, 18-20) Sertin Kretien ena lesperans pou viv pou touletan dan lesiel, alor ki lezot ena lesperans pou viv dan enn paradi ki pou lor later. Nou lesperans kapav donn nou lafors pou andir bann difikilte, pou pres bon nouvel, ek  pou asim nou bann responsabilite dan lasanble. (1 Tes. 1:3) Se sa lesperans-la mem ki ti donn lapot Pol lafors.

16. Kifer lapot Pol ti bizin lafors?

¹⁶ Lapot Pol ti bizin lafors ek kouraz. Dan let ki li ti ekrir bann Korintien, li ti konpar limem ar enn resipian later. Li ti gagn “bann gran presion,” li pa ti “kone ki pou fer,” ek li ti “gagn persekision.” So lavi ti an danze. (2 Kor. 4:​8-10) Pol ti ekrir sa bann parol-la pandan so trwaziem vwayaz misioner. Sa lepok-la, li pa ti kone ki so sitiasion ti pou vinn pli pir ankor, parski apre sa enn lafoul dimounn ti bat li, li ti al dan prizon, ek li ti fer nofraz.

17. Dapre 2 Korintien 4:​16-18, ki kitsoz ti donn Pol lafors pou andir bann difikilte?

¹⁷ Pol ti gagn lafors pou andire parski li ti res konsantre lor so lesperans. (Lir 2 Korintien 4:​16-18.) Li ti dir bann Kretien dan Korint ki, mem si so lekor ti pe “deperi,” li pa ti pou les sa dekouraz li. Pol ti res konsantre lor so lavenir. So lesperans pou al viv dan lesiel ti “vinn deplizanpli gran.” So lesperans ti ena telman valer pou li, ki li ti pre pou andir ninport ki difikilte pou ki li kapav gagn so rekonpans. Pol ti reflesi lor so lesperans, ek sa ti donn li lafors pou andire.

18. Kouma Tihomir ek so fami ti gagn lafors gras-a zot lesperans?

¹⁸ Tihomir, enn frer ki res Bilgari, inn gagn lafors gras-a so lesperans. Sa fer de-trwa lane aster-la ki so ti frer, Zdravko, inn mor dan enn aksidan. Tihomir inn bien soufer akoz sa. Lesperans rezireksion ti ed li ek so fami pou sirmont zot lapenn. Li dir: “Par exanp, nou ti pe reflesi kotsa nou ti pou zwenn Zdravko, ki manze nou ti pou kwi pou li, kisann-la nou ti pou invite dan premie program ki nou ti pou fer apre so rezireksion, ek seki nou ti pou dir li konsernan seki’nn arive pandan bann  dernie zour.” Tihomir dir ki, kan li ek so fami ti res konsantre lor zot lesperans, sa ti ed zot pou kontign andire, ek pou kontign atann avek pasians ziska ki Zeova resisit Zdravko.

19. Kouma to kapav ranforsi to lesperans? (Get zimaz osi.)

¹⁹ Kouma to kapav ranforsi to lesperans? Si to ena lesperans pou viv pou touletan lor later, lir kouma Labib dekrir Paradi ek reflesi lor la. (Iza. 25:8; 32:​16-18) Reflesi osi kouma lavi pou ete dan lemond nouvo, ek mazinn twa dan Paradi. Kisann-la to pe trouve? Ki bann son to pe tande? Ki to resanti? To pou kapav servi pli bien to limazinasion, si to get bann zimaz dan nou bann piblikasion, ki montre Paradi, ouswa si to get bann video klip kouma Nou dan Lemond Nouvo, ouswa Li Zis Devan Nou. Si nou lesperans bien kler dan nou lespri, nou bann problem pou “tanporer ek leze.” (2 Kor. 4:17) Wi, gras-a nou lesperans, Zeova donn nou lafors.

20. Mem kan nou santi nou feb, kouma nou kapav gagn lafors?

²⁰ Mem kan nou santi nou feb, “avek Bondie nou pou gagn lafors.” (Ps. 108:​13, NW) Zeova inn fini donn twa tou seki to bizin pou ki to gagn lafors. Alor, si to bizin led pou asim enn responsabilite, pou andir enn difikilte, ouswa pou gard to lazwa, priye Zeova ar tou to leker ek rod repons to lapriyer gras-a to letid personel. Aksepte bann lankourazman to bann frer ek ser. Ek kontign gard to lesperans bien kler dan to lespri. Si to fer sa bann kitsoz-la, Zeova pou “fortifie [twa] avek tou pwisans gras-a so lafors ki ranpli ar laglwar pou ki [to] kapav andir tou kitsoz avek pasians ek lazwa.”—Kol. 1:11.