1. Ddiniyani yaakavihera adhaari a Yehova a kale okala a kopolo?

 DILA dhowinjhivadhene Bibiliya anowaawoga alobwana oororomeleya akale, ninga athu yanna kopolo ni yaali ooliba. Mbwenye ebaribariya sowihina malabo mamodha alobwana ala kayiwonelamo okala akopolo. Motajhiha malabo mamodha mwene Davidi iwoona okala ‘akopolo ninga mwango,’ mbwenye malabo mamodha ‘owoova.’ (Sal. 30:7) Sansawu ahikanna kopolo mwaha wa nikavihero wa muzimu wa Mulugu, mbwenye naarive dhigali ndo Sansawu ahinona wihina Mulugu ahahiye omukavihera eere oyelela kopolo, eere ‘okwerebeya ni erege oligana ni athu amodhaya.’ (Juí. 14:5, 6; 16:17) Alobwana ala akale yahikanna kopolo mwaha wihina Yehova davahile kopolo ndha.

2. Mwahaya bwaddi murumiwi Pawulo adha awogege egi, aali okwerebeya mudhidhi mmodhave a kopolo? (2 Coríntios 12:9, 10)

² Murumiwi Pawulo ahinona wihina oohowela kopolo dha Yehova. (Omwileri 2 Coríntios 12:9, 10.) Ndala ninga owinjhiva wa iyo Pawulo ahikanna oredda. (Gál. 4:13, 14) Teto malabo mamodha oliye oohowela wilibihedha vanlubale wihina erena ethu yapama. (Rom. 7:18, 19) Malabo mamodha oliye owoova dhithu dhafuna ompadduwela osogolo. (2 Cor. 1:8, 9) Naarive dhigali ndo, murumiwi Pawulo akala ookerebeyeene fwakanniyena kopolo. Eyo yapadduwa mwaha wihina Yehova onvaha kopolo murumiwi Pawulo ahoweliye wihina awanena makathamiho aye.

3. Makoho baani nnafunihu wawakula muwari mwa yohudhera ela?

³ Yehova anonipaganya wihina anere onivaha kopolo nnahowelihu wihina nande ovilela. (1 Ped. 5:10) Mbwenye wihina naakele nikavihero nno nnohowela werana epaddi yehu. Motajhiha mutori funeriha wihina karo yeeddege, mbwenye motorista  ahimunyingala aseleradore karoya kinedda. Ni makalelo mamodhave, Yehova anoofuna onivaha kopolo nnahowelihu, mbwenye negi naakele nikavihero naye nnohowela werana ethu-sithu. Ethu baani Yehova ananivahiye wihina anilibihe? Ki ethu baani nnahowelihu werana negi naakele kopolo dhinadha wa Yehova? Nnere woona dhowakula dha makoho ala wodhela opendda makalelo Yehova anvahiliye kopolo namavuhulela Jonasi, Mariya amaye Yesu ni murumiwi Pawulo. Teto nnere woona ni makalelo baani Yehova anaavahiye kopolo adhaari aye peeno.

4. Nnande aavi wakela kopolo dhinadhela wa Yehova?

⁴ Ethu modha nnahowelihu werana wihina naakele kopolo dha Yehova funfiyedha Oliye ni nlobelo. Yehova anere wawakula malobelo ehu wodhela onivaha ‘kopolo dhohikala dha masika.’ (2 Cor. 4:7) Ohiha eyo iyo podi wakela kopolo nnahowelihu wodhela omwileri Bibiliya ni opwasedha opendda ndhe nilerihu. (Sal. 86:11) Muthenga wa Yehova nnafwanyihu mBibiliyani ‘ohukanna kopolo.’ (Heb. 4:12) Walobelaga wa Yehova ni wawilerigi madhu aye onowakela kopolo onahoweliwe wihina wande ovilela, okanna ohagalala ni wanda wakwanihedha mutholo worusa. Kabeni noone makalelo Yehova anvahiliye kopolo namavuhulela Jonasi.

5. Mwahaya bwaddi Jonasi oohowela kopolo?

⁵ Namavuhulela Jonasi oohowela oliba murima, Jonasi ahithawela wolapela Yehova nunvaha mutholo worusa. Mwaha wa yeyo oliye aali neena nuukwa mwaha wa nipevo ninlubale, teto ahipweha egumi ya athu amodhaya vang’ovini. Anameeddiha baruku nunvokedha muniya ompadduwela ethu ahajhehedhiye, omedhiwa ni oba. Ononamo wihina Jonasi aali aavi mudhidhi yole? Nerege oliye ubuwela wi eere okwela mwemune? Obe ubuwela wihina Yehova ahimunyanyala? Mwebaribarene ahithabwa othuwathuwa.

6. Ddiniyani yaamulibihile Jonasi agaali mbani mwa oba? (Jonas 2:1, 2, 7)

⁶ Ethu baani Jonasi ereliye wihina aakele kopolo mudhidhi aaliye yeka mbani mwa oba ele? Ethu yobajha oliye eriliyena yaali olobela wa Yehova. (Omwileri Jonas 2:1, 2, 7.) Jonasi kaamwiwelele Yehova, mbwenye oliye ahikanna ebaribari wihina Yehova eere ovuruwana nlobelo naye nowiyeviha nooniha wihina oliye ahithwaruwa. Teto ahipendda dhipaddi dha dholebela dha mBibiliyani. Mwahaya bwaddi nigawoga ndo? Mwaha nlobelo eriliyena nnafwanyeya va Jonas kapitulu 2 oliye anowalabihedha madhu enafwanyeya mulivuru na Salmos. (Motajhiha, omuliganihe Jonas 2:2, 5 ni Salmos 69:1; 86:7.) Eyo enoniha wihina Jonasi ahinona pamadhene dholebela. Vano mudhidhi apenddaga dholebela ndhe nuufwanyiwa makathamiho, Jonasi ahikanna ebaribari wihina Yehova eere omukavihera. Yehova ahinvulusa Jonasi teto vasogolova Jonasi aali owiwegeredhene wihina aakwanihedhe mutholo aavahiwiye ni Yehova. — Jonas 2:10–3:4.

7-8. Ethu baani yamulibihele Zhiming mudhidhi afwanyiwaga dhoweha?

⁷ Yopadduwa ya Jonasi podi onikavihera naafwanyiwaga makathamiho oorusa. Motajhiha ddibila dhaala anakala elabo yoTaiwan anithaniwa Zhiming, b anowanana dhiredda dhohiyanahiyana, ohiya eyo amudhaaye amodha enoomoniha goyi vanlubale mwaha oliye okala namoona a Yehova. Mbwenye Zhiming anowakela kopolo dha Yehova mwaha olobela ni ohudhera oliye anowoga egi: “Malabo mamodha yaakalaga ninga makathamihoya kinadha emala miyo ginothabwa othuwathuwa newene kaginanda opwaseya wihina gande werana  ohudhera waaga wavayeka.’’ Naarive dhigali ndo Zhiming kanaselela oliye anowogave egi: “Vobajha ginoolobela wa Yehova, voharela ginowara foni dhaaga wihina givuruwanege jhibo dhOmwene, malabo mamodha ginowiba ni ndhu na vati-vati wihina gande opwaseya. Gera ndo ginobajha ohudhera waaga wavayeka.’’

⁸ Ohudhera wavayeka ohumukavihera vanlubale Zhiming. Motajhiha numala woperariwa enfermera dhaala ahimwaddela wihina oliye oohowela ovahiwa nikame, mwaha globulos vermelhos dhaye dhahithabwa oyeva. Emahiyu ahinathi woperariwa Zhiming ahileri wodhela yopadduwa ya murogola dhaala ooperariwe mwaha oredda mmodhave globulos vermelhos dha murogola ola dhaali vang’ono opitha dhaye, mbwenye naarive dhigali ndo oliye kaarumendhe nikame mbwenye ahanda ovulumuwa. Yopadduwa ela yahimulibiha Zhiming teto oliye ahanda okala ororomeleya.

9. Wakala othuwathuwene mwaha wa makathamiho, onere ddi? (Osugwe fotu.)

⁹ Onofwanyiwaga makathamiho oorusa ofiyedha ohandaga omwaddela Yehova ethu enupadduwela? Onookalaga oogomeene ofiyedha ohikanna efunelo yohudhera? Kudduwale wihina Yehova ohunona pamadhene dhithu dhinupadduwela. Bumwahaya naarive ogeenrena nlobelo nookweya, okanne ebaribari wihina Yehova anere wuvaha ele onahoweliye. (Efé. 3:20) Akala onofwanyiwa makathamiho a mwilini obe a mmubuweloni enuthukulela ohanda omuhudhera Bibiliya, ononamo aavi onvuruwana awudiyu a Bibiliya obe a malivuru mamodha obe we podi ovuruwana jhibo dhOmwene obe woona vidiyu dhinafwanyeya mu jw.org. Walobela wa Yehova ni wasayela dhowakuladha mBibiliyani ni mmalivuruni mwehu enakala ninga onamwithana Yehova wihina ulibihe, teto oliye anere werana eyo.

10. Addibilihu enanilibiha ni makalelo baani?

¹⁰ Yehova podi walabihedha addibila ni arogola wihina enilibihe. Aliwa podi okala ‘ntxela nootodola’ nafwanyiwaga makathamiho obe nahandaga wakwaneliha mutholo wehu. (Col. 4:10, 11) Iyo nnowahowela akwihu thabwathabwa ‘mudhidhi worusa.’ (Pro. 17:17) Nahikanna kopolo addibila podi onilibiha epaddi  yomwilini ni yomuzimuni. Nnere woona makalelo Mariya amaye Yesu, yaalibihiwiwa naathu amodha.

11. Mwahaya bwaddi Mariya oohowela okanna kopolo?

¹¹ Mariya ohowela kopolo wihina ande wakwaneliha ndhe Yehova amulobiye. Kubuwela makalelo oliye aaliye oothuwathuwa mwaha wakela mutholo ole woorusa aaddeliwiye ni mungero Gabiriyeli. Oliye kaateliwe, mbwenye eere okanna wari. Oliye kanamulelege mwaana, mbwenye oliye oohowela omulela mwaana aakale Mesiya. Woona wi oliye kanagonege ni mulobwana ande aavi omwaddela mwenddaye Juze? — Luc. 1:26-33.

12. Mariya andile aavi okanna kopolo ahoweliye? (Lukaji 1:39-45)

¹² Mariya andile aavi okanna kopolo wihina ande wakwanihedha mutholo ole worusa? Oliye ahisayela nikavihero naathu amodha. Motajhiha, oliye ahimuloba mungero Gabiriyeli dhoholela wodhela mutholo akenliye. (Luc. 1:34) Voharela, Mariya omaruwa mowaguva odhowa murudda dhaala womwangoni luwani yoJuda wihina amwaredhele mmudhaye Elizabeti. Olenddo ole wahimukavihera. Elizabeti ahimuthethela Mariya ni ahivetheliwa ni Yehova wihina awoge yovuhulela wodhela mwaana aabaliwe ni Mariya. (Omwileri Lucas 1:39-45.) Mariya owoga wihina Yehova ‘aherana dhithu dhakopolo ni moono waye.’ (Luc. 1:46-51) Yehova omulabihedha Gabiriyeli ni Elizabeti wihina emulibihe Mariya.

13. Ethu baani yampadduwele murogola dhaala anakala oBoliviya nuuloba nikavihero naaddibila ni naarogola?

¹³ Ndala ninga Mariya, ni weya podi ovahiwa kopolo naale enamwebedha Yehova. Murogola dhaala anakala oBolívia anithaniwa Dasuri ohowela kopolo. Ababe nuubaxari ospitale teto nufwanyiwana oredda wohuvulumuwana, Dasuri othoma wasamalela ababe ni murimaye wamutene. (1 Tim. 5:4) Mbwenye werana eyo, kiyaali ethu yokweya. Oliye anowoga: “Dila dhowinjhivadhene, miyo goona wi kagande wasamalela ababa.” Nerege oliye ahiloba nikavihero? Omabajhowene naari. Oliye onowoga egi: “Miyo kagafuna wanyonya addibila. Miyo gubuwela: ‘Yehova baahi dinagivahe kopolo ginahowelimi’. Mbwenye miyo wonelamo wi, waalapela addibila yakala ninga gafuna wamariha makathamihoya meka.” (Pro. 18:1) Dasuri othoma wawaddela addibila dhithu dhampadduwela. Oliye onowoga egi: “Kaginna madhu wihina gande owoga makalelo addibila egilibihiliwa. Aliwa yahinikavihera ni dhoojha ospitale ni yahinilerela dholebela dholibiha. Onona wi kagaali meka wahigikurumusa. Iyo nnokosa epaddi ya emudhi enlubale ya Yehova, emudhi enafuna wukavihera, enunla ni we ni enukavihera wawanana makathamiho.”

14. Mwahaya bwaddi nigahowela orumedha nikavihero nanamaholela mulogo?

¹⁴ Makalelo mamodha Yehova ananivahiye kopolo fuudhela walabihedha anamaholela mulogo. Aliwa nvaho Yehova anivahiliye wihina enlibihe ni enikavihere wawanana makathamiho ehu. (Isa. 32:1, 2) Bumwahaya, wakala othuwathuwene wawaddele dhothuwathuwiha dhawo anamaholela mulogo. Yuvaha nikavihero, kuwubuwele dila bili, orumedhe mowaguva. Aalabihedhaga anamaholela mulogo, Yehova podi wuvaha kopolo.

15. Ejhehedho baani enna makiristawu aatene?

¹⁵ Ejhehedhelo yehu enafwanyeya mBibiliya, podi onilibiha ni onivaha kopolo. (Rom. 4:3, 18-20) Makiristawu amatene ehikanna ejhehedhelo yoriya vanlubale yokalawo ni mukalakala, podi okala velaboni yavati obe odhulu. Ejhehedhelo yehu enonikavihera wawanana makathamiho, odidelave olaleya ni  wakwanihedha mutholo bu mutholo nnakelihu mmulogoni. (1 Tes. 1:3) Yaali ejhehedhelo yela yaamulibihile murumiwi Pawulo.

16. Mwahaya bwaddi murumiwi Pawulo ohowela kopolo?

¹⁶ Murumiwi Pawulo ohowela kopolo dhohikala dha masika. Karta naye aalebeliye akudda Korintu, oliye ahiliganiha ni muno wa ologo wahinarusa opweseya. Oliye ahipinyamwinyiwa, ‘ahisimwela,’ ‘ahiharahariwa’ ni ahifiyedha wubuwela wihina ‘ahimorihiwa’. Teto malabo mamodha oliye ahihala nena nukwa. (2 Cor. 4:8-10) Pawulo aalebile madhu ala mudhidhi eragana olenddo waye wanatharu, teto oliye kubuwela wi eere ofwanyiwa makathamiho oorusa wapitha ale yanfwanya. Oliye eere orijhiwa ni muthithi waathu waafune omwerela obure, eere omagiwa, eere obwina ni baruku ni eere ovokedhiwa mukambura muwari mwa mudhidheene.

17. Ethu baani yanvaha kopolo murumiwi Pawulo afwanyiwaga makathamiho (2 Coríntios 4:16-18)

¹⁷ Pawulo ahikanna kopolo wihina ande ovilela, mwaha ubuwela baahi ejhehedhelo yaye. (Omwileri 2 Coríntios 4:16-18.) Oliye ahiwoga naakudda Korintiyu wi oliye eere ‘onyowa’, naarive dhigaali ndo oliye kaaselele. Pawulo asugwa baahi ejhehedhelo yaye. Ejhehedhelo yaye yowakela egumi yohimala odhulu yaali yathima vanlubale. Bumwahaya naarive afwanyiwaga makathamiho bi makathamiho oliye kaaselele. Pawulo oopendda wodhela ejhehedhelo ela, mwaha wa yeyo oliye ‘oovenyihedhiwa kadda labo.’

18. Ejhehedhelo enamulibiha aavi Tihomir ni amudhaaye?

¹⁸ Ejhehedhelo ninnihuna yosogolo sinanvaha kopolo ddibila dhaala anakala oBulgaria, anithaniwa Tihomir. Yaka dhamundduli ddibile amung’onoya Zdravko, okwa vang’ovini ya karo. Mwaha wa yeyo, Tihomir ahukuuwa vanlubale. Wihina yande owanana wukuuwa wule, oliye naamudhaye obajha wubuwela makalelo enakale ovenyihiwa muukwani. Oliye anowoga egi: “Motajhiha, iyo nnowubuwela murudda nnanfwanyihu Zdravko, ddiniyani nnampiyelihu, athu baani nnawithanelihu wihina najhe vamodha ni Zdravko aavenyihiwa muukwani ni dhithu baani nnafunihu omwaddela  dhipadduwile malabo ookuthula.” Tihomir onowoga wi wubuwela ejhehedhelo ela sinalibiha emudhihu odhowagave evilelaga ni ejhehaga mudhidhi wofwanelela Yehova ananvenyihiye Zdravko.

19. Onere ddi wihina olibihe ejhehedho yawo? (Osugwe fotu.)

¹⁹ Onande aavi olibiha ejhehedhelo yawo? Akala ejhehedhelo yawo fukala nimukalakala elabo ela yavati, wilerigi ni openddege wodhela dhopadduwa dhinafwanyeya mBibiliyani dhinawoga wodheela parayizu. (Isa. 25:8; 32:16-18) Wubuwelege makalelo enakalege egumi mwilaboni exa ni wiwubuwelege ogaali wengo. Motajhiha, onamoona aani? Ddiniyani oniwiwe erumaga? Murima wawo oli aavi? Wihina wandege omubuwela parayizu, osugwege fotu dhinafwanyeya mmalivuruni mwehu obe woonege jhibo dhinafwanyeya musayitini ninga Elabo exa ehaaddamela, Miyo ginorumedha obe Wubuwelege osogolo. Nasayelaga mudhidhi wihina nipendde makalelo enakale egumi mwilaboni exa, makathamiho ehu enakale ‘oovira ni oojajala’. (2 Cor. 4:17) Ejhehedhelo enivahile Yehova sinaanivahe kopolo.

20. Naarive nigaali ookwerebeyene, nnande aavi okanna kopolo?

²⁰ Naarive nigaali ookwerebeyene, nihinona wihina ‘nnikavihero na mulugu nnere okanna kopolo.’ (Sal. 108:13) Yehova anonivaha dhatedhene nnahowelihu wihina naakele kopolo dhinadhela wa oliye. Bumwahaya wahowelaga nikavihero wihina wande wakwanihedha mutholo wawo, wawanana makathamiho obe odidelave okala oohagalala, onfugulele murima wawo Yehova ni nlobelo ni osayele dhoholela dhaye wodhela werana ohudhera wa vayeka. Orumedhe okaviheriwa ni olibihiwa ni addibila. Malabo amatene osayelege mudhidhi wihina wubuwele makalelo enakale egumi mwilaboni exa. Ni makalelo yala, ninga munawogela Colossenses 1:11, ‘We onere olibihiwa, ni kopolo dhatedhene, kopolo dhaye dhowaara, wi odidele ojhedhiha nuuvilela, vamodha nuuhagalala.’