1. Elob ǃoaba-aona ǃkharuge ǁaeb ǃnâ mati ge ǀgaiǀgaihe?

 ELOBMÎS ge ǃnāsase ǂgomǂgomsa-aoga, ǀgaisa khoegu ase ra ǁguiǃā. Xawe hoaǁae a ǀgaisa khoeb tsîn ge hoaǁae ǀgaisase tsâ tama hâ. Aiǁgause, ǀnî ǁaeb aib ge Gao-aob Daviba ‘ǃhomgu’ khamib a ǀgaisa khama gere tsâ. Xaweb ge ǀnî ǁaegu ai gere “ǃao.” (Psa. 30:7) Simsonni ge Elob gagaba xu ǂoaǂamsa ǀgaiba gere hō xaweb ge gere ǂanǃgâ, Elob ǀgaib oseb “nau khoen ǁkhān khami nî ǂkhabusasa.” (ǂHǂh. 14:5, 6; 16:17) Nē ǂgomǂgomsa-aogu ge ge ǀgaisa ī, Jehovab ge ǁîga ǀgaiba gere mā amaga.

2. Apostel Pauluba mati io ge mî, ǁîb a ǂkhabusa tsî ǁkhā ǁaeb ai ǀgaisa ti? (2 Korinteǁîn 12:9, 10)

² Apostel Paulub ge ge mûǂan ǁîb tsîn ǀgaiba, Jehovaba xu ǂhâ hâsa. (Khomai re 2 Korinteǁîn 12:9, 10 sa.) Sida khamib ge Pauluba ǀaeb ǃgomsiba gere hōǃâ. (Gal. 4:13, 14) ǀNî ǁaegu aib ge ǁîb tsîna ge ǃgombahe i ǂhanu xūna dīsa. (Rom. 7:18, 19) Tsî ǀnî ǁaeb aib ge gere ǃao tsî ge ǀū-i tae-i ǁîb ǀkha nî īsa. (2Kor. 1:8, 9) Xaweb ge ǂkhabub gere ǁaeb ai gere ǀgaisa. Mâ ǀgaub ǃnâ? Jehovab ge Pauluba ūhâ tamab ge hâ-i ǀgaiba gere mā, ǁîb ge Pauluba ge ǀgaiǀgai.

3. Mâ dîde da nē ǁkhāǁkhāǃâs ǃnâ nî ǃhoaǃgao?

³ Jehovab ge ra mîmâi sida tsînab nî ǀgaiǀgaisa. (1Pet. 5:10) Xawe da ge nē ǀgaiba ǃkhōǃoa tide, sida ǀkhāba da ga dī tama io. Aiǁgause, engens ge audosa ǀgaiba ra mā îs  aisǀkhā ǃgû. Xaweb ge ǃnari-aoba clutchs ai nî dā, îs audosa ǃnari ǁkhā. ǁKhā ǀgaub ǃnâb ge Jehovab tsîna aiǂhomisen hâ, ǂhâ da hâ ǀgaiba māsa. Xawe da ge sada tsîna xū-e nî dī nēsa hōs ǃaroma. Jehovaba tae-e ra mā da ǀgaiǀgai da ra-e? Tae-e da nî dī î da nē ǀgaiba hō? Nē dîdi di ǃereamde da ge nî ǁkhāǁkhāsen, matib ge Jehovaba Elobmîs ǃnâ hâ ǃnona khoena ǀgaiǀgais ǃnâ-ū. ǁÎn ge kēbo-aob Jonab, Jesub mamas Marias tsî apostel Paulub tsîna. Jehovab mati ǁkhā ǀgaub ǃnâ ǁîb ǃoaba-aona nētsē ra hui ǀgaub tsîna da ge nî ǃhoaǃgao.

4. Mati da ǀgaiba Jehovaba xu ra hō?

⁴ ǀGui ǀgaub hîna da Jehovaba xu ǀgaiba ra hōb ge, ǁîba ǀgores ǃnâ-ū ǀgūsa. Sida ǀgorede ǁnâu-ams ǃnâ-ūb ge Jehovaba “kai ǀgaiba” mā da ǁkhā. (2Kor. 4:7) Sida tsîn ge nî ǀgaiǀgaihe, Elobmîsa khomai tsî da ga ǂâiǃgâ o. (Psa. 86:11) Jehovab di haisi-ams hîna Elobmîs ǃnâ hâs ge sida ‘ǀgaiba’ ra mā. (Heb. 4:12) Jehovaba ǃoa ǀgore tsî du ga ǁîb mîsa khomai, o du ge ǂhâ du hâ ǀgaiba nî hō. Tsî sadu ǂkhîba nî ūhâ ǀgara, ǃgom ǁgaumâisa dīǀoaǀoas ǃnâ. ǃGaoǃgâ re matib ge Jehovaba ǁîb kēbo-aoba ǀgaiǀgai ǀgausa.

5. Kēbo-aob Jonaba tae-i ǃaroma ǀgaiba ge ǂhâ hâ i?

⁵ Kēbo-aob Jonab ge ǀgaiba ge ǂhâ hâ i. ǁÎb ge Jehovab ge mā bi ǁgaumâisa xu ge ǃkhoe. Tsî nēs xa ǃaromahe hâse î ge ǁîb ǀkha ge ǂgaub ǃnâ hâ î gu tsîna ge ǁō ǁkhā. ǂGauba xub ge aoǁnâhe, ob ge kai ǁaub xa ge hara-e. Jonaba mati gere tsâ ti du ra ǂâi? ǁÎba ǁnāpap nî ǁōsa ge ǃâubasen hâ i? ǁÎb ge ǀnîsi gere ǂâi, Jehovab ge ǁîba ǁnāxūǃnâ ti, Jonab ge ǀînîsi gere ǂâiǂhansen.

6. Jonab 2:1, 2, 7 ǃoagu, tae-e Jonaba ge ǀgaiǀgai ǁaub di ǁhoms ǃnâb hâ hîna?

⁶ Tae-eb ge Jonaba dī, îb ǀgaiba hō, ǀguritsâsen i gere ǁaeb ai? ǀGui xū-i hînab ge dī i ge, Jehovaba ǃoa ǀgore sa. (Khomai re Jonab 2:1, 2, 7 sa.) Jonab ge Jehovaba ge ǁnâuǀnam tama hâ i, xaweb ge ǂgomǃgâsiba ge ūhâ i, Jehovab ǁîb ǃgamǃgamsenxa ǀgoresa nî ǁnâusa. ǃKharuge ǁaeb ǃnâb gere khomai Xoadeb ge ǂōrisase gere ǂâiǃgâ. Tae-i ǃaroma da ti ra mî? Jonab di 2ǁî danaǃâs ǃnâ a xoasa mîdi ge Psalmdi ǃnâs tsîna a hō-e ǁkhā. (Aiǁgause, Jonab 2:2, 5 tsî Psalmdi 69:1; 86:7 tsîna ǀgopeǀnō re.) Kaise î ge a ǃgāsa Jonab ge ǁnā Xoade ǃamkuse ǂan isa. Nē xoadi ge Jonaba ǂgomǂgâsiba gere mā, Jehovab nî huibi sa. Jehovab ge Jonaba ge sâu tsîb ge ega mā-eb ge hâ ǁgaumâisa ge dīǀoaǀoa.—Jon. 2:10–3:4.

7-8. Taiwani ǃnâ hâ ǃgâsaba mati ǀgaiba ge hō ǃgomsigu ǃnâ?

⁷ Jonab di aiǁgaus ge nî huida, ǂgui ǃgomsina da ga hōǃâ o. Aiǁgause, Zhiming ti ǀon hâ ǃgâsab Taiwanni dib ge ǀgaisa ǀaeb ǃgomsiba ūhâ. b Tsî ǁnās ǂam-ai i ge ǁîb omaris ǁanina ǃgâise ge hâ-ūbi tama hâ i, ǁîb Jehovab ǃnâ ra ǂgom amaga. ǁÎb ge ǀgaiba Jehovaba xu ge hō, ǀgores tsî Elobmîsa ǁkhāǁkhāsens ǃnâ-ū. ǁÎb ge ra ǂanǃgâ: “ǀNî ǁaegu ai ta ge ǃgomsigu ga hāǂam te, o kaise ra ǂâiǂhansen tsî ǃnomsase tsâ tama hâ. Tsî ta ge nēs xa Elobmîsa khomai hō tama hâ.” Xaweb ge ǁîba Jehovab ai ǀûsen tama hâ. ǁÎb ge ra mî: “ǂGurose, ta ge Jehovaba ǃoa ra ǀgore tsî ǁnāpaxū ǀapeǂhomisa xu  hâ ǁnae-amde ra ǃgâ. ǀNî ǁaegu ai ta ge nē ǁnae-amde ǂaub ǀkha ra ǁnae, ǃnomsase ta nî tsâs kōse. ǁNāpaxū ta ge ra ǁkhāǁkhāsen tsoatsoa.”

⁸ Zhimingi ge Elobmîsa ôaǃnâs ǃnâ-ū, ǀgaiba ǃâubasen tamab hâ ǀgaugu ǃnâ ge hōǃâ, îb ǃgomsigu ǃnâ mâǀgai. Aiǁgauseb ge kai ǃkhôasa xu a ǂhai, os ge ǀaedī-aosa ge mîba bi ǁîb di ǀaob ǃgôab ǃgâisa. Tsîb ǀaoba ǁgaihe tidesa. ǃKhôaheb nî tsēs aiǃâb ge ǃgâsas hîna ge, ǁkhā ǃkhôas ǃnâ-ū ǃkharu hâ is xa ge khomai. ǁÎs di ǀaba ǀaob celdi ge ǁîb ti i xa kaise ge ǂam-i. Xawes ge ǀaoba ǁgaihesa ge ūǃoa tama hâ i tsî ge ǂgau. ǁNā aiǁgaus ge ǁîba ge ǀgaiǀgai, îb ǂgomǂgomsase hâ.

9. ǃGomsigu xa du ga ǂkhabuǂâikaihe, o du tae-e a dī ǁkhā? (Ai-īsiga mû re.)

⁹ ǃGomsiga du ga hōǃâ ǁaeb ai i a ǃgom, Jehovaba ǃoa ǀgoresa? Tamas ka io du ǂkhabusase ǁkhāǁkhāsens ǃaroma ra tsâ? ǂÂis ǃnâ ūhâ, Jehovab ge sadu di mâsiba ǃamkuse ra ǁnâuǃā. ǃNubu ǀgoresa du ga dī xawe ǂâis ǃnâ ūhâ re, Jehovab ge ǂhâ du hâ-e ǁnā ǁaeb ai nî mā du. (Efe. 3:20) ǀNîsi du ga ǀaeb tamas ka io ǃgâi tama tsâsigu xa ǃaromahe hâse khomai tamas ka io ǁkhāǁkhāsen hō tama io. O du ge ǃkhōǁnâsa Elobmîs khomaiǃâde ǃgâ tsî ǁîs ai a ǃgaoǃgaosa ǂkhinin tsîna a khomai ǁkhā. ǀApeǂhomisa xu hâ ǁnae-amde ǃgâs tamas ka io du ge jw.orgs ai hâ vidiogu tsîna kō ǁkhā. Jehovab ge ra ǀgaiǀgai du ǂgao, ǁîba ǃoa du ga ǀgore o. Tsîb ge ǁîba sadu ǀgorede Elobmîs tsî nau xūn ǃnâ-ū nî ǃeream.

10. Sada Xristeǁî ǃgâsana mati ra ǀgaiǀgai da?

¹⁰ Jehovab ge sada ǃgâsan ǃnâ-ū ǀgaiǀgai da ǁkhā. ǁÎn ge “kai ǁkhaeǂgao-i ase” ī, ǃgomsi-i tsî ǃgom ǁgaumâihe da ga hōǃâ o. (Kol. 4:10, 11) ǃGōsase da ge ǀhōsana ǂhâhâ, ‘ǂhâb ǁaeb ǃnâ.’ (ǂKhm. 17:17) ǂKhabu da ga ǁaeb ain ge sada ǃgâsana, sorosise, gagasise tsî ǃgâi tama tsâsiga da ga hōǃâs tsîna ra huida. ǃGaoǃgâ re matis ge Jesub mamas Mariasa nau khoena xu ǀgaiba a hō ǀgausa.

11. Mariasa tae-i ǃaroma ǀgaiba ge ǂhâ hâ i?

 ¹¹ Marias ge huiba ge ǂhâ hâ i, îs Jehovab di ǂâisa dī. ǁÎs gere tsâ ǀgaub xa ǂâi re, nē kai ǁgaumâisas ge ǀhomǃgāb Gabriela xu a hō o. ǁÎs ge ge ǃgamme tama hâ i xawes nî ǀgamǀkhā. ǁÎs ge ǀgôa-e kaikais di ǂansa ge ūhâ tama hâ i. Xawes ge nē nî ǃnae ǀgôarob, Mesia kai nîba nî kōǃgâ. Marias ge aorekhoeb ǀkha ge ǁgoeǀhao tsâ tama hâ i. Xawes Josefa ǁîs ǀgamǀkhās xa nî mîba. ǁNāsa dīs ge kaise ga ǃgom hâ—Luk. 1:26-33.

12. Lukab 1:39-45 ǃoagu, Mariasa mati ǂhâs ge hâ i ǀgaiba ge hō?

¹² Mariasa ǀgaiba mati ge hō, îs nē ǃgom ǁgaumâisa dī ǁkhā? ǁÎs ge nau khoena xu huiba ge ūǃoa. Aiǁgauses ge Gabriela ge ǂgan, îb ǃnāsa ǃgāsasiba, māsi nē ǁgaubmâis xa. (Luk. 1:34) ǁAero-i khaoǃgâs ge ǁîs ǀaokhoes Elisabetsa “ǃhomxa ǀkharib” Judab dib ǃnâ sī ge sari. ǁNā saris ge ǃgâi ǀamǂoasa ge ūhâ-i, Elisabets ge Mariasa ge ǂkhâǃnâ. Tsîb ge Jehovaba ǁîsa ge hui, îs Mariasa ǂkhâǃnâ ra kēbosa ǁîs ǃnae tama ǀgôab xa mîba. (Khomai re Lukab 1:39-45 sa.) Marias ge ge mî, Jehovab ge “ǀgaisa dī-e . . . ǁîb di ǁôab ǀkha” ge dī. (Luk. 1:46-51) Gabrieli tsî Elisabets ǃnâ-ūb ge Jehovaba Mariasa ge ǀgaiǀgai.

13. Tae-e Boliviab ǃnâ ra hâ ǃgâsas ǀkha ge ī, huibas ge Xristeǁî ǃgâsan ai a ǂgan o?

¹³ Sadu tsîn ge Marias khami, nau ǃgâsana xu ǀgaiba hō ǁkhā. Dasuri ti ǀon hâ ǃgâsas, Boliviab ǃnâ ra hâs tsîn ge ǁkhā ǀgaiba ge ǂhâhâ i. ǁÎs dadab ge kaise ge ǀaesen tsî î ge ǁîb di ǀaeba nî ǂgauǂgau sōǀôana ge ǀkhai i. Dasuris ge māsenxase ǃereamsa ge ū îs ǁîs dadaba kōǃgâ. (1Tim. 5:4) ǁNās ge hoaǁae ge supu tama hâ i. ǂAnǃgâs ge ra: “ǂGuiǃnāde ta ge aiǃgû ǁoa ta a khami gere tsâ.” ǁÎsa huiba ge ǂgan? Tsoatsoas ǃnâs ge ǂgan tama ge hâ i. “ǃGâsana ta ge ge ǂhani ǂgao tama hâ i “ tis ge ra ǁguiǃā. “Tita ge gere ǂâi ‘Jehovab ge ǂhâ ta hâ huiba nî māte’ ti. Xawe ta ge ge mûǂan, nau khoena xu ǂgae-oasens ǃnâ-ū ta ge ti ǃgomsina aitsama gere sîsenǂam ǂgaosa.” (ǂKhm. 18:1) Dasuris ge ǀnî ǀhōsana ǃoa ge xoa tsî ǁîs mâsiba ge ǁguiǃā. ǁÎs ge ra mî: “Xū-i xare-i tsîn ge a ǁguiǃā ǁoa, Xristeǁîn ge ǀgaiǀgaite ǀgauba. ǂÛ-en ge hospitals tawa ǀkhī-ūbate tsî Elobmîsa xu xoade tita ǀkha gere ǀgoragu. Buruxa tsâsib ge ǂansa, ǀguri da hâ tama hâsa. Jehovab omaris ǁani da ge, sida ǃgâsan ge ǂhâsib tsî ǃgomsin tsîn ǃnâ ra huida. ǁÎn ge ra ǂkhâǃnâ da, î da Jehovaba ǃoaba ǀgara.”

14. Tae-i ǃaroma da ǀhaohâb ǃûi-aoga xu huiba nî ūǃoa?

¹⁴ ǀGui ǀgaub Jehovab sida ǀgaiba ra māb ge ǀhaohâb ǃûi-aogu ǃnâ-ū. ǁÎgu ǃnâ-ūb ge ǀgaiǀgai tsî ra khoakhoa da. (Jes. 32:1, 2) ǂÂiǂhansen du ga, o ǀhaohâb ǃûi-aoga mati du ra tsâsa mîba re. ǁÎgu ga huidu ǂgao, o ǁîgu huiba ūǃoa re. ǁÎgu ǃnâ-ūb ge Jehovaba ǀgaiǀgai du ǁkhā.   

15. Mâ ǃâubasensan hoa Xristeǁîna ra ǀgapiǃgôa?

¹⁵ Sida ǃâubasens Elobmîs ai a ǃgaoǃgaosas ge, a ǀgaiǀgai da ǁkhā. (Rom. 4:3, 18-20) Xristeǁîn ase da ge ǀamose ûis di aiǂhanuba ūhâ. ǁNās ge ǀamosib kōse ǃhūbaib ai tamas ka io ǀhommi ǃnā ûisa. Sada ǃâubasens ge ra ǀgaiǀgai da, î da ǃgomsina mâǀgai, ǃgâiǂhôasa aoǁnâ tsî ǃkharagagu ǁgaumâide dīǀoaǀoa  ǀhaohâb ǃnâ. (1Tes. 1:3) ǁKhā ǃâubasens ge apostel Pauluba ge ǀgaiǀgai.

16. Apostel Pauluba tae-i ǃaroma ǀgaiba ge ǂhâ hâ i?

¹⁶ Paulub ge ǀgaiba ge ǂhâhâ i. Korinteǁînab ge xoaba sîǂkhanis ǃnâb ge ǂoab ǀkha kuruhe hâ xabab ǀkha gere ǀgopeǀnōsen. ǁÎb ge “ǂōǂōsib,” “îganǀgē,” “ǃgôaǃgonhe,” tsî “ǂnauǁguihe” hâse gere tsâ. ǁÎb ûib ge ǁkhōǁkhōsa mâsib ǃnâ ge hâ i. (2Kor. 4:8-10) Paulub ge ǁnā mîde ge xoa, ǁîb di 3ǁî sîsabe sîsenni ǁaeb ǃnâ. Tsî ǁnā mîdeb ge xoa toas khaoǃgâb ge ǃnāsa ǃgom mâsiga ge hōǃâ. Nē saris ǃnâb ge ǂkhābadī-aogu xa ǁnāǂamhe, hurib ǃnâ ǁō ǁkhā tsî ǃkhōsis ǃnâ ge ǂgāhe.

17. 2 Korinteǁîn 4:16-18 ǃoagu, tae-e Pauluba ge ǀgaiǀgai îb ǃgomsina mâǀgai?

¹⁷ Paulub ge mâǀgais ǁkhāsiba ge hō, ǁîb ǃâubasens ai ǂgomaiǂnûis ǃnâ-ū. (Khomai re 2 Korinteǁîn 4:16-18 sa.) Korinteǁînab ge ge mîba, ǁîb soros ga kaira tsî “ǂkhabu” xaweb ge ǁnāsa mā-am tide ǂkhabuǂâi kai bisa. Paulub ge ǁîb hānî ǃâubasens ai ǂâisa ge ǂnûi hâ i. Tsî ǃâubasens ǀhommi ǃnâ ûis tis ge ǁîba kaise ge ǀō-aisaba i. Tsîb ge ge māsenxa i, mâ ǃgomsi-i hoa-e mâǀgaisa, îb ǁîb di mādawa-amsa hō ǁkhā. Paulub ge ǁnā ǃâubasens xa gere ǂâi tsî ǁnās ǀkha tsēsa xu tsēs ǀkha gere “ǀasa kaihe.”

18. Hānîǁaeb ǃâubasensa Tihomiri tsî ǁîb omaris tsîna mati ge ǀgaiǀgai?

¹⁸ Tihomir ti ǀon hâ ǃgâsab, Bulgarib ǃnâ hâb ge ǀgaiba ǁîb ǃâubasensa xu gere hō. Kuriga ǃkharu hâseb ge ǁîb ǂkham ǃgâsab Zdravkoba tsūkēǃgâ-i ǃnâ ge ǁō. ǁAeroba ǁnās khaoǃgâb ǃkharu tsîb ge Tihomira ǀgaisa ǃoab tsûba ǂgaob ǃnâ gere hōǃâ. ǁNāsa sîsenǂams ǃaroman ge ǁîb omaris ǀkha ǀguiba khâis mati nî īs xa gere mûnan-ai. ǁÎb ge ra ǁguiǃā: “Aiǁgause da ge gere ǃhoaǃgao, mapa da Zdravkoba nî ǀhao-ū, mâ ǂûna da nî dība bi, hamna nî ǁkhauhe ǁîb di ǂguro ǁâudiba ǃoa. Tsî taena da nî ǁgamba bisa ǀuniga  tsēdi xa.” Tihomiri ge ra mî, ǁîn ǃâubasens hānîǁaeb dis ai ǂâisa ǂnûis ge ǁîb omarisa ge ǀgaiǀgai în mâǀgai. Tsî Jehovab ǁaeb ai ǃâu ǀgara, ǁîb ǃgâsabab khâisa nî māsa.

19. Tae-e du nî dī, î du sadu ǃâubasens hānîǁaeb dīsa ǀgaiǀgai? (Ai-īsiga mû re.)

¹⁹ Mati du sadu ǃâubasensa ǀgaiǀgai ǁkhā? Aiǁgause, ǃhūbaib ai ûis ǃâubasensa du ga ūhâ, o khomai re Elobmîs Paradaisa ra ǁguiǃā ǀgausa tsî ǁnās xa ǂâiǃgâ. (Jes. 25:8; 32:16-18) Mûnanai re ûiba mati nî īsa ǀasa ǃhūbaib ǃnâ. ǁNāpa mûnan-aisen re: Ham-e du ra mû? Mâ ǀnōba du ra ǁnâu? Mati du ra tsâ? Paradais mati nî īsa mûnan-ais ǀkha huis ǃaroma, ǀapeǂhomis ra māǂui ǂkhinina kē. Tamas ka io musik viodioga kō re: ǀAsa ǃhūbaib hā nîb, Just Around the Corner, tamas ka io ǁAeb xa ǂâi re ti hâde. ǀAsa ǃhūbaib di ǃâubasensa da ga ǀgaisase ǂâis ǃnâ ūhâ ǀgara, on ge sida ǃgomsina “ǁaerob . . tsî . . ǂkhaisib” dis ǀguisa nî ī. (2Kor. 4:17) ǃÂubasens hînab ge mādas ǃnâ-ūb ge Jehovaba nî ǀgaiǀgai da.

20. ǂKhabusase da ga tsâ xawe da mati ǀgaiba hō ǁkhā?

²⁰ ǂKhabusase da ga tsâ xawe da ge ‘Elob ǀgaib ǀkha nî dan.’ (Psa. 108:13) Jehovab ge ǀnai ǂhâ da hâ xū-e ge māda, î da ǁîba xu ǀgaiba hō. ǁGaumâisa dīǀoaǀoas, ǃgomsi-e mâǀgais tamas ka io ǂkhîba ūhâ ǀgaras ǀkha du ga huiba ǂhâ, o Jehovaba ǃoa ǀgore. Tsî ǁîb daoǁgausa ôa Elobmîsa ôaǃnâs ǃnâ-ū. Nau Xristeǁîna xu huiba ūǃoa re. ǁAeba ǁamaǂui tsî hānîǁaeb ǃâubasens xa mûnanai re. ǁNāsa du ga dī, o du ge ‘ǁîb ǂkhaisib di ǁkhāsiba ǃoa hoa ǀgaib ǀkha nî ǀgaiǀgaihe, taniǀnamxasib ǀkha du nî mâǃkharuse, ǃgâiaǂgaob ǀkha.’—Kol. 1:11.