1. Ba götö föna, hewisa wangabölöʼö Yehowa nono mbanuania?

 ASESE iwaʼö Sura Niʼamoniʼö wa ono mbanua Yehowa si lö faröi no niha sagabölö. Hewaʼae niha sagabölö ira, lö sagötö faʼara larasoi zimanö. Duma-dumania, Razo Dawido no irai irasoi wa faʼabölönia ”simane faʼabölö hili” hizaʼi ba ginötö tanö böʼö no irai irasoi ’waʼataʼu’. (Si. 30:7) Duma-duma tanö böʼö yaʼia daʼö Simesono sanema faʼabölö moroi ba geheha Lowalangi, hizaʼi ifaduhuʼö na lö hadöi eheha niʼamoniʼö ’alö waʼabölönia ba atata dölania simane niha sato’. (Sangu. 14:5, 6; 16:17) Tola laʼokhögö waʼabölö ira niha si lö faröi andre börö me Yehowa zameʼe khöra faʼabölö.

2. Hana wa iwaʼö Faulo wa itema waʼabölö ba ginötö ambö waʼabölönia? (2 Korindro 12:9, 10)

² Ifaduhuʼö göi sinenge sotöi Faulo wa moguna khönia waʼabölö moroi khö Yehowa. (Baso 2 Korindro 12:9, 10.) Simane yaʼita, no irai mofökhö Waulo. (Gal. 4:13, 14) Itaria göi irasoi wa abua wamalua satulö. (Rom. 7:18, 19) No irai ataʼu ba aombö dödönia ba woʼangeragö si lö alua nasa. (2 Ko. 1:8, 9) Hizaʼi ba ginötö ambö faʼabölönia, ba daʼö itema waʼabölö. Hadia mbörö? Börö me Yehowa zameʼe faʼabölö soguna khönia.

3. Hadia manö wanofu-nofu nitutunöda ba artikel daʼa?

³ No ifabuʼu Yehowa wa hasambalö iʼabölöʼö göi ita. (1 Fe. 5:10) Hizaʼi, so zinangea tafalua enaʼö tasöndra waʼabölö andrö. Duma-dumania, tola mofanö moto börö me so mesin-nia. Hizaʼi, lö iʼila mofanö moto andrö na lö lahundragö gas-nia. Simanö göi, so zinangea tafalua enaʼö ibeʼe khöda waʼabölö Yehowa. Hadia nihenaigö Yehowa ba wangabölöʼö yaʼita? Ba hadia  zinangea tafalua enaʼö tola tatema waʼabölö andrö? Tola tasöndra wanema linia na tafahaʼö ita hewisa Yehowa ba wangabölöʼö si datölu niha nitutunö ba Zura Niʼamoniʼö, yaʼia daʼö Yona samaʼeleʼö, Maria ina Yesu hegöi sinenge sotöi Faulo. Tafahaʼö göi ita hewisa Yehowa ba wangabölöʼö ono mbanuania ba ginötöda iadaʼa.

4. Hewisa enaʼö tola taʼokhögö waʼabölö moroi khö Yehowa?

⁴ Sambua lala enaʼö tatema waʼabölö moroi khö Yehowa yaʼia daʼö mangandrö ita khönia. Ibeʼe wanema li Yehowa ba wangandröda yaʼia na ibeʼe khöda ’waʼabölö sahöli-höli dödö’. (2 Ko. 4:7) Tola göi tatema waʼabölö na tabaso ba taʼangerönusi Daromali Yehowa. (Si. 86:11) Sindruhu-ndruhu mofaʼabölö Daromalinia andrö. (Heb. 4:12) Na mangandrö ndraʼugö khö Yehowa ba öbaso Daromalinia, tola ösöndra waʼabölö enaʼö anau gölömö, lö tebulö omuso dödömö ba tola öfalua halöwömö hewaʼae abua ia. Nehegö hewisa Yehowa wameʼe faʼabölö khö Yona samaʼeleʼö.

5. Hana wa moguna waʼabölö khö Yona samaʼeleʼö?

⁵ Me itema Yona halöwö sabua moroi khö Yehowa, ilau moloi itörö göfa. Lua-luania, yaʼia hegöi niha si so ba göfa andrö arakhagö mate börö mbade sabölö-bölö. Me latiboʼö ia ba nasi ba itölö ia iʼa sebua, aboto ba dödönia wa so ia ba nahia sogömi-gömi safönu ametaʼuö. Moloʼö yaʼugö hewisa dödö Yona? Hadia iwaʼö tödönia wa hasambalö mate ia ba daʼö? Mazui iwaʼö tödönia wa no iʼerogö ia Yehowa? Ataʼu sibai Yona, ba moguna khönia waʼabölö.

6. Hadia nifalua Yona enaʼö iʼokhögö waʼabölö me so ia ba dalu giʼa? (Yona 2:1, 2, 7)

⁶ Hadia nifalua Yona enaʼö isöndra waʼabölö me so ia ba dalu giʼa? Ilau mangandrö khö Yehowa. (Baso Yona 2:1, 2, 7.) Hewaʼae no irai lö iʼoʼö niwaʼö Yehowa, hizaʼi si fao fangide-ideʼö ifalalini gera-erania ba faduhu dödönia wa hasambalö ifondrondrongo wangandrönia Yehowa. Iʼangerönusi göi Daromali Lowalangi. Hana wa tola tawaʼö zimanö? Fangandrönia nisura ba Yona faza 2, oya ngawua wehede si fagölö nisura ba zura Zinunö. (Duma-dumania, fatimbaisi Yona 2:2, 5 faoma Sinunö 69:1; 86:7.) Ba daʼö taʼila wa aboto ba dödö Yona ayati si so ba zura Zinunö andrö. Börö me iʼangerönusi daʼö sagötö feʼasonia ba dalu giʼa, faduhu dödönia wa hasambalö itolo ia Yehowa. Lö ara aefa daʼö, iʼutaʼö ia iʼa ba ngöfi ba ifaʼanö ia ba wamalua halöwö nibeʼe Yehowa khönia.—Yon. 2:10–3:4.

7-8. Hadia nifalua zi samösa talifusöda ba Taiwan enaʼö tola iʼokhögö waʼabölö ba ginötö göna ia famakao?

⁷ Salua khö Yona möi fanoloda ba ginötö göna ita fanandraigö. Duma-dumania talifusöda Zhiming b si toröi ba Taiwan, göna ia fökhö sabölö-bölö. Lafakao göi ia ira ösi nomonia börö wamatinia khö Yehowa. Hizaʼi, isöndra waʼabölö moroi khö Yehowa börö me lö iböhöli wangandrö ba ifalua wamahaʼö samösa. Imane, ”Itaria na alua gabula dödö, so khögu waʼataʼu irege lö uʼila ufalua wamahaʼö samösa.” Hizaʼi lö awuwu ia. Imane aefa daʼö, ”Si oföna ulau mangandrö khö Yehowa, aefa daʼö ufake headset ba ufondrondrongo zinunö Kerajaan. Itaria uʼide-ideʼö ligu woʼanunöisi yaʼia, aefa daʼö awena ufalua wamahaʼö samösa.”

⁸ Moroi ba wamahaʼö samösa, so mbua nitema dalifusöda Zhiming si lö idöna-döna. Duma-dumania, me no awai la-operasi ia, imane si samösa perawat wa moguna mubeʼe khönia transfusi börö me ambö ndronia. Ba mbongi fatua lö mu-operasi Zhiming, ibaso waö-waö zi samösa talifusöda ira alawe  ni-operasi simane yaʼia. Abölö ambö nasa ndro dalifusöda andrö moroi khö Zhiming. Hewaʼae simanö lö itema transfusi darah, ba tola döhö ia. Daʼö zamarou tödö Zhiming irege lö faröi ia.

9. Hadia zinangea öfalua ba ginötö aombö dödömö mazui marase sibai ndraʼugö? (Faigi göi gambara.)

⁹ Ba ginötö alua khöu wanandraigö, hadia no irai örasoi waʼataʼu irege lö saʼae öʼila hadia zinangea öfaʼema ba wangandrö? Hadia no irai marase sibai ndraʼugö irege lö öʼila öfahaʼö ndraʼugö ba Zura Niʼamoniʼö? Böi olifuʼö wa aboto sibai ba dödö Yehowa hadia zalua khöu. Börö daʼö, hewaʼae no adogo-dogo sibai wangandrömö, yafaduhu dödöu wa hasambalö itolo ndraʼugö Yehowa. (Ef. 3:20) Na abua khöu ba wombaso hegöi ba wamahaʼö yaʼugö ba Zura Niʼamoniʼö börö wökhö, talafo marase mazui örasoi waʼaombö-aombö dödö, tola öfondrondrongo rekaman audio Zura Niʼamoniʼö mazui rekaman publikasida. Tola göi öfondrondrongo zinunö mazui öfaigi video si so ba jw.org. Omasi Yehowa wameʼe khöu faʼabölö ba ifalua daʼö na mangandröʼö khönia ba öʼalui wanema li moroi ba wangandrömö andrö ba Zura Niʼamoniʼö hegöi ba ngawalö gö wamati si no tehenaigö.

10. Hadia nifalua ndra talifusöda si sara lala wamati ba wamarou tödöda?

¹⁰ Tola iʼogunaʼö ndra talifusöda Yehowa ba wangabölöʼö yaʼita. Tobali ira ’umbu wondrara dödö’ ba ginötö alua khöda gabula dödö mazui na tatema halöwö sabua. (Kol. 4:10, 11) Moguna sibai khöda zi fahuwu töra-töra ”ba ginötö waʼatosasa”. (Amd. 17:17) Ira talifusöda tola labeʼe khöda wanolo ba ginötö si tefaudu, labeʼe wondrara dödö, ba lafarou ita enaʼö lö faröi ba wamosumange Yehowa. Datafaigi hewisa Maria ina Yesu me itema wanolo moroi ba niha böʼö.

11. Hana wa moguna khö Maria waʼabölö?

¹¹ Moguna wamarou dödö khö Maria ba wamalua niwaʼö Yehowa. Khalaigö hawaʼabu dödönia me itema halöwö sabua moroi khö malaʼika Gaberieli. Lö sangowalu ia, hizaʼi iwaʼö khönia malaʼika andrö wa manabina ia. Lö irai irorogö nono sawuyu ba zilalö, hizaʼi iadaʼa moguna irorogö nono matua si tobali Mesia  dania. Börö me lö irai orudu ia ba ndra matua, hewisa wanutunönia daʼa fefu khö matuania sotöi Yosefo?—Luk. 1:26-33.

12. Moloʼö Luka 1:39-45, hezo moroi waʼabölö nitema Maria?

¹² Hezo moroi waʼabölö nitema Maria ba wamalua halöwö sabua ba si tohude andrö? Iʼandrö wanolo moroi ba niha böʼö. Duma-dumania, iʼandrö khö malaʼika Gaberieli ba wamatunö khönia hewisa wamaluania halöwö andrö. (Luk. 1:34) Lö ara aefa daʼö, möi ia ba ”mbanua si no ifasui hili” ba Yehuda ba wamalukhaisi si fahatö khönia sotöi Elizabe. Hadia mbua nitemania weʼamöi ba daʼö? Isuno ia Elizabe, ba börö wanolo moroi ba geheha Yehowa tola ifaʼema Elizabe wamaʼeleʼö si möi famarou dödö sanandrösa khö nono si so ba dalu Maria. (Baso Luka 1:39-45.) Iwaʼö Maria wa no ”iforomaʼö [Yehowa] waʼabölö faoma taʼionia”. (Luk. 1:46-51) Iʼodela Gaberieli hegöi Elizabe Yehowa ba wameʼe famarou dödö khö Maria.

13. Hadia mbua nitema Dasuri me iʼandrö wanolo khö ndra talifusö si sara lala wamati?

¹³ Simane Maria, tola tasöndra wamarou dödö moroi khö ndra talifusöda si sara lala wamati. Dasuri, samösa talifusöda si so ba Bolivia, moguna khönia wamarou dödö simane daʼö. Me göna fökhö sabölö-bölö bapania ba moguna toröi ba rumah sakit, ihalö gangetula ba wondrorogö bapania andrö. (1 Ti. 5:4) Abua khönia wamalua daʼö. Imane, ”Asese imane tödögu wa lö sagu khögu na simane-mane daʼa manö.” Hadia iʼandrö wanolo moroi ba niha böʼö? Ba wamobörö, lö iʼandrö wanolo khö ndra talifusö tanö böʼö. Imane, ”Lö omasido ufakao ndra talifusöda. Uwaʼö tödögu ha Yehowa zabölö mangila hadia wanolo soguna khögu. Hizaʼi me itugu numalö ginötö, aboto ba dödögu na ufandröndröu ndraʼo moroi khö ndra talifusö sindruhunia no uʼodaligö waʼabölögu samösa ba wangasiwai abula dödö andrö.” (Amd. 18:1) Ihalö gangetula talifusöda Dasuri ba wamatunö salua khönia andrö khö ndra talifusöda. Imane, ”Tebai udunö-dunö faoma fehede hawaʼebua lua-luania khögu me no ututunö gabula dödögu khö ndra talifusö. Lafasao gö ba rumah sakit, ba labeʼe göi khögu ayati Zura Niʼamoniʼö si möi fondrara dödögu.” Omuso sibai dödöda me taʼila wa tenga ha yaʼita zanaögö abula dödö andrö. No farahu ita ba nösi nomo Yehowa. Ira talifusöda no lafaʼanö ira ba wameʼe fanolo khöda, fao ira khöda ba waʼabu dödö, ba labeʼe wamarou dödö enaʼö lö faröi ita ba wamosumange Yehowa.”

14. Hana wa omasi ita tatema wanolo moroi khö ndra satua sokubaloi?

¹⁴ Ibeʼe göi Yehowa waʼabölö khö ndra satua sokubaloi. Yaʼira andrö amaedola mbuala moroi khö Yehowa sangabeʼeʼö ba samarou tödöda. (Yes. 32:1, 2) Börö daʼö, na örasoi waʼaombö dödö, böi lawösi wanutunö daʼö khö ndra satua sokubaloi. Ba na labeʼe khöu wanolo, andrö saohagölö ba temaʼö daʼö. Iʼogunaʼö ira Yehowa ba wangabölöʼö yaʼugö.

15. Hadia wanötöna niʼokhögö fefu nono mbanua Lowalangi?

¹⁵ Buʼusa li si so ba Zura Niʼamoniʼö, daʼö zameʼe khöda fanötöna ba faʼabölö ba wamosumange Yehowa. (Rom. 4:3, 18-20) So ösa niha Keriso sangokhögö dötönafö faʼauri si lö aetu ba zorugo, ba tanö böʼönia faʼauri si lö aetu ba gulidanö Faradaiso. Tötönafö andrö zameʼe khöda faʼabölö ba wanaögö famakao, ba wanuriaigö turia somuso dödö hegöi ba wamalua ngawalö halöwö ba mbanua niha Keriso. (1 Te. 1:3) Tötönafö daʼö göi zameʼe faʼabölö khö Waulo.

16. Hana wa iʼandrö waʼabölö Faulo moroi khö Yehowa?

 ¹⁶ Ba zurania khö ndra niha Keriso si so ba Gorindro, ifagölösi ia hulö simane bowoa tanö salio aboto. Iwaʼö wa ’lafalala wamakao yaʼia, itaria lö iʼila hadia nifaluania, lafatörö khönia wamakao safökhö ba laböbözi ia irege tegaölö tou ba danö’. Itaria arakhagö mate ia. (2 Ko. 4:8-10) Isura wehede daʼö Faulo me ifalua halöwö utusan injilnia si medölu. Ba me no aefa isura daʼö, ifuli zui göna ia abula dödö tanö böʼö. Duma-dumania, laböbözi ia niha, laraʼu ia, ahöndrö göfania ba labeʼe ia ba gurunga. Sindruhu-ndruhu moguna waʼabölö khö Waulo.

17. Moloʼö 2 Korindro 4:16-18, hadia zanolo Faulo irege anau gölönia?

¹⁷ Börö me iʼosambuaʼö dödönia Faulo ba dötönafö, andrö wa anau gölönia. (Baso 2 Korindro 4:16-18.) Ifatunö khö ndra niha Korindro wa hewaʼae ’tebai mbotonia’, hizaʼi lö ide-ide dödönia. Iʼosambuaʼö dödönia Faulo ba zi so miföna. Tötönafö faʼauri si lö aetu ba zorugo niʼokhögönia, no ”lakhömi sebua” irege tola anau gölönia ba wanaögö ngawalö wamakao salua khönia. Börö me iʼangerönusi dötönafönia andrö, buania ’ero maʼökhö tebohouni dödö hegöi era-erania’.

18. Hewisa dötönafö tobali famarou dödö Tihomir hegöi ösi nomonia?

¹⁸ Samösa dalifusöda sotöi Tihomir si toröi ba Bulgaria, isöndra waʼabölö börö dötönafö. Mato hauga fakhe silalö, mate nakhinia ono matua sotöi Stravko börö me fatandru ba lala. Me no aefa mate nakhinia, ara awena taya waʼabu dödönia. Enaʼö tola lataögö zalua andrö yaʼia hegöi ösi nomonia, lakhalaigö hewisa dania na alua wanusugi. Imane, ”Mafatunöisi hezo dania falukhaga Stravko, hadia gö nirinoma önia, haniha nikaonima na owulo ndraʼaga khönia, ba hadia nitutunöma khönia sanandrösa ba götö safuria andre.” Itutunö Tihomir wa börö me laʼosambuaʼö dödöra ba dötönafö, daʼö mbörö wa anau gölöra yaʼira si sambua omo, ba labaloi hawaʼara isusugi dania dalifusöra andrö Yehowa.

19. Hadia nifaluamö ba wangaʼaroʼö tötönafömö? (Faigi göi gambara.)

 ¹⁹ Hadia nifaluamö ba wangaʼaroʼö tötönafömö andrö? Duma-dumania, na ba gulidanö so dötönaföu, baso waö-waö nisura ba Zura Niʼamoniʼö sanandrösa ba Waradaiso ba angerönusi daʼö. (Yes. 25:8; 32:16-18) Khalaigö hewisa waʼaurimö ba gulidanö si bohou. Haniha nifalukhaisimö ba daʼö? Hadia ngawalö li somasiʼö örongo? Hewisa dödöu ba ginötö daʼö? Ba wokhalaigö gulidanö Faradaiso, tola öfondrondrongo video musik: Na So Waradaiso, So ba Duduma Hörö, mazui Khalaigö Gulidanö Faradaiso. Na takhalaigö waʼaurida ba gulidanö si bohou, tola aboto ba dödöda wa lö abölö-bölö ba lö arara wamakaoda andrö. (2 Ko. 4:17) ötönafö nibeʼe Yehowa zameʼe khöu faʼabölö.

20. Hadia nifaluada ba ginötö ambö waʼabölöda?

²⁰ Ba ginötö ambö waʼabölöda, ”ibeʼe khöda waʼabölö Lowalangi”. (Si. 108:13) No ihenaigö fefu zoguna khöda Yehowa enaʼö abölö ita. Börö daʼö, na moguna khöu wanolo ba wamalua halöwömö, na alua gabula dödö, mazui enaʼö lö tebulö öʼokhögö waʼomuso dödö, hatöʼögö khö Yehowa ba wangandrö soroi ba dödö ba alui wanuturu lala moroi khönia ba ginötö öfalua wamahaʼö samösa. Tema wanolo moroi khö ndra talifusö si sara lala wamati. Khalaigö dötönaföu ba zi so miföna. Na öfalua daʼö, tola ötema ’waʼabölö moroi ba gehehania solakhömi, irege anau gölömö ba wanaögö fefu hadia ia si fao faʼebolo dödö ba faʼomuso dödö’.—Kol. 1:11.