1. Woo deed Gott siene Deena ieeschtemma stoakjen?

 EN Gott sien Wuat läs wie foaken von true Mana, waut väl Krauft hauden. Oba mau rajcht de Stoakjste mank dee, feelden sikj lang nich emma stoakj. De Kjennich David feeld sikj biejlikj en Stekjen “soo stoakj aus eenen Boajch”, oba dan wia am bieaun uk wada angst (Psa. 30:7, NW). Derch Gott sienen heiljen Jeist wia Simson butajeweenlich stoakj. Oba Simson wist, daut hee onen de Krauft, waut von Gott kjeem, “nuscht stoakja [wia] aus aule aundre Menschen” (Rech. 14:5-6; 16:17). Dise true Mana wieren stoakj, wäajens Jehova an Krauft jeef.

2. Wuarom säd de Apostel Paulus, daut hee schwak un uk stoakj wia? (2. Korinta 12:9-10).

² De Apostel Paulus stunt daut uk too, daut am daut aun Jehova siene Krauft fäld (läs 2. Korinta 12:9-10). Soo aus väle von ons haud Paulus uk Trubbels met de Jesuntheit (Gal. 4:13-14). Bieaun wia am daut uk schwoa, daut rajchte to doonen (Reem. 7:18-19). Un eenjemol haud hee uk Sorjen un Angst, waut met am woaren wudd (2. Kor. 1:8-9). Oba aus Paulus schwak wia, wort hee stoakj. Woo schauft daut? Daut wia Jehova, waut am dee Krauft jeef, waut am fäld. Soo, Jehova muak Paulus stoakj.

3. Waut vonne Froagen woa wie en disen Artikjel beauntwuaten?

³ Jehova vesprakjt, daut hee ons woat stoakj moaken (1. Pet. 5:10, NW). Oba daut wie siene Krauft kjrieen kjennen, mott wie ons uk aunstrenjen un ons Poat doatoo doonen. Daut es een bät soo aus de Moota bie eene Koa, waut de  Krauft haft, de Koa toom foaren to brinjen. Oba daut daut dan uk schauft, mott de Foara ieescht oppspieden. Krakjt soo es daut uk bie ons. Jehova es reed, ons de needje Krauft to jäwen, oba wie motten uk waut doatoo doonen. Waut haft Jehova ons jejäft toom ons stoakj moaken? Waut mott wie doonen, om siene Krauft to kjrieen? Well wie doatoo mol seenen, woo Jehova dree Menschen von de Bibeltiet stoakjen deed. Daut wia de Profeet Jona un Maria, waut Jesus siene Mutta wia, un de Apostel Paulus. Wie woaren uk seenen, woo Jehova siene Deena vondoag dän Dach krakjt soo Krauft jeft aus don.

4. Woo kjenn wie von Jehova Krauft kjrieen?

⁴ Eene Wajch, woo wie von Jehova Krauft kjrieen kjennen es, wan wie to am bäden. Un Jehova kaun onse Jebäda biejlikj doaderch beauntwuaten, daut hee ons “de butajeweenelje Krauft” jeft (2. Kor. 4:7, NW). Wie kjennen uk jestoakjt woaren, wan wie sien Wuat läsen un doaräwa nodenkjen (Psa. 86:11). Jehova siene Norecht, waut wie enne Schreft finjen, “es kjraftich” (Heb. 4:12). Wan du to Jehova bätst un sien Wuat läst, woascht du dee Krauft kjrieen, waut die fält toom uthoolen, diene Freid bewoaren ooda uk toom eene schwoare Oppgow utfieren. Well wie nu mol seenen, woo Jehova dän Profeet Jona Krauft jeef.

5. Wuarom fäld dän Profeet Jona daut aun Krauft?

⁵ Dän Profeet Jona fäld daut aun Krauft. Hee haud Angst doahan to gonen, wua Jehova am hanjeschekjt haud, un doawäajen jinkj hee no een Schepp un brocht sikj fuat. Oba wäajen hee daut jedonen haud, kjeemen hee un de aundre Mana opp daut Schepp meist en eenen grooten Storm todood. Aus de Mana am em Mäa nennschmeeten, wort hee von eenen grooten Fesch oppjeschlukt. Dan wia Jona en dän Fesch, wua aules diesta wia. Waut jleefst du, woo haft Jona sikj jefeelt? Docht dee veleicht, daut hee stoawen wudd? Wundad hee veleicht, aus Jehova am veloten haud? Secha haud Jona groote Angst.

6. Waut deed Jona, aus hee en dän grooten Fesch sienen Pans wia, soo aus Jona 2:2-3, 8 wiest?

⁶ Waut deed Jona, om Krauft to kjrieen, aus hee gaunz auleen en dän Fesch sienen Pans wia? Hee bäd to Jehova (läs Jona 2:2-3, 8). Am wia daut leet, daut hee ieescht nich no Jehova jehorcht haud, oba hee wia sikj secha, daut Jehova no sien Jebäd horchen wudd. Jona docht uk sea äwa daut no, waut hee enne Schreften jeläst haud. Wuarom kjenn wie daut sajen? En sien Jebäd, waut wie en Jona, Kapitel 2 finjen, sent väl Wieed un Saza bennen, waut wie uk en de Psalmen finjen (vejlikj mol Jona 2:3, 6 met Psalm 69:2; 86:7). Daut es kloa to seenen, daut Jona dise Bibelvarzhen goot kjand. Un dise Bibelvarzhen jeewen Jona de Sechaheit, daut Jehova am halpen wudd. Jehova rad Jona, un lota wia hee reed, de Oppgow notokomen, waut Jehova am oppjejäft haud (Jona 2:11 – 3:4).

7-8. Woo kjrieech een Brooda en Taiwan Krauft, aus hee derch schwoaret jinkj?

⁷ Jona sien Biespel kaun ons halpen, wan wie derch schwoaret gonen. Biejlikj een Brooda en Taiwan, waut Zhiming b heet, haft groote Trubbels met de Jesuntheit. Bowenenn haft hee uk noch Jäajenstaunt enne Famielje, wäajen hee Jehova deent. Oba derch bäden un studieren kjricht hee Krauft von Jehova. Hee sajcht: “Eenjemol, wan doa Trubbels oppkomen, hab ekj soo väl Sorjen, daut ekj nich ruich woaren kaun toom fa mie selfst studieren.”  Oba hee jeft nich opp. Hee sajcht wieda: “Ieescht bäd ekj to Jehova. Dan näm ekj mie miene Uarenspiekers un horch mie de Kjennichrikjs-Leeda aun. Bieaun sinj ekj mau rajcht opp stelles met, bat ekj mie ruja feel, un dan fang ekj aun to studieren.”

⁸ Zhiming kjrieech Krauft toom en schwoare Loagen uthoolen derch daut, waut hee studieed. Biejlikj aus hee ieescht een grootet Oppereeschen jehaut haud, säd de Nurs to am, daut sien roodet Bloot sea läach wia un daut se am wudden motten Bloot enlakjen. Oba dee Nacht ver daut Oppereeschen haud Zhiming de Erfoarunk von eene Sesta jeläst, waut dautselwje Oppereeschen jehaut haud. Äa roodet Bloot wia mau rajcht noch läaja jewast aus sient, un doch haud see sikj oba nich loten Bloot enlakjen un wia wada jesunt jeworden. Dit to läsen, haud Zhiming Krauft jejäft, tru to bliewen.

9. Waut kaust du doonen, wan du die wäajen eenen Trubbel doljeschloagen feelst? (See uk de Bilda.)

⁹ Feelst du die en eene schwoare Loag eenjemol soo doljeschloagen, daut du nich to Jehova bäden kaust? Ooda feelst du die too meed toom studieren? Hool em Denkj, daut Jehova krakjt weet, woo du die feelst. Soo, wan du uk mau bloos een kortet Jebäd sajen kaust, kaust du die oba secha sennen, daut hee die daut jäwen woat, waut die fält (Efs. 3:20). Wan die daut too schwoa es, waut to läsen ooda studieren, wäajen du krank, meed ooda truarich best, dan kaust du die uk de Bibel ooda aundre oppjeschnakte Bieekja äwahorchen. Du wurscht uk kjennen onse Leeda horchen ooda een Video opp jw.org kjikjen. Jehova well die stoakj moaken un hee woat daut doonen, wan du to am bäden deist un de Auntwuaten opp diene Jebäda en de Bibel un en aulet aundre sieekjst, waut hee ons jeft.

10. Woo stoakjen de Breeda un Sestren ons?

¹⁰ Jehova kaun ons derch de Breeda un Sestren stoakjen. Dee kjennen fa ons “een Troost” sennen, wan wie waut schwoaret derchmoaken ooda wan wie eene Oppgow motten derchfieren, waut ons schwoa felt  (Kol. 4:10-11). Besonda bruck wie Frind, waut ons “em Trubbel biestonen” (Spr. 17:17). Wan wie gaunz dol sent, kjennen onse Breeda un Sestren ons halpen, ons treesten un Moot jäwen, Jehova wieda tru to deenen. Well wie mol seenen, woo Maria, Jesus siene Mutta, von aundre jestoakjt wort.

11. Wuarom fäld Maria daut aun Krauft?

¹¹ Maria fäld daut aun Krauft. Denkj mol doaräwa no, woo schwoa daut mott fa ar jewast sennen, soone groote Oppgow to kjrieen von dän Enjel Gabriel. See wia nich mol befriet un sull oba aul een Kjint haben. See wist uk nich, woo daut wia, Kjinja opptotrakjen un nu sull see sikj om eenen Jung kjemren, waut doa wudd de Messias woaren. Un woo sull see Josef daut dietlich moaken, daut see wudd een Kjint haben, wan see noch kjeenmol wia met wäm jeschlajchtlich toopjekomen? (Luk. 1:26-33).

12. Woo kjrieech Maria no Lukas 1:39-45 no dee Krauft, waut ar fäld?

¹² Woo kjrieech Maria dee Krauft, waut ar fäld, om dise besondre un schwoare Oppgow notokomen? See socht Help bie aundre. Biejlikj fruach see Gabriel, daut hee ar noch mea sajen sull äwa dise Oppgow (Luk. 1:34). Meist fuaz doahinja reisd see no “eene Staut en de Boaj” en Juda, wua Elisabet wond, waut äa Frintschoft wia. Dise Reis loond sikj. Elisabet lowd Maria un Jehova brukt ar toom eene Profezeiunk verutsajen von Maria äaren ojjebuarnen Sän, waut Maria väl Moot jeef (läs Lukas 1:39-45). Maria säd, daut Jehova “met sienen Oarm jewaultje Dinja jedonen” haud (Luk. 1:46-51). Jehova stoakjt Maria derch Gabriel un Elisabet.

13. Woo kjeem daut ut, aus de Sesta en Bolivien de Breeda un Sestren no Help fruach?

¹³ Soo aus Maria kjenn wie uk jestoakjt woaren derch onse Breeda un Sestren. Dasuri, eene Sesta en Bolivien, fäld daut aun Krauft. Aus see enwort, daut äa Voda eene schlemme Krankheit haud, waut nich wajchtodoktren jinkj, un em Hospitol nennkjeem, äwaneem Dasuri sikj daut, sikj om am to kjemren (1. Tim. 5:4). Daut wia nich emma leicht. See sajcht: “Foaken feeld sikj mie daut soo, ekj kunn nich wieda.” See fruach ieeschtlich nich no Help. See jeft too: “Ekj wull miene Gloowesbreeda nich baudren. Ekj docht soo, Jehova wudd mie de Help jäwen, waut mie fäld. Oba ekj wort en, daut ekj proowd, gaunz auleen met miene Trubbels foadich to woaren, wiels ekj mie oppoat hilt von de aundre” (Spr. 18:1). Oba dan wort Dasuri sikj eenich, een poa Frind to schriewen un dee von äare Loag to vetalen. See sajcht: “Ekj kaun daut nich utspräakjen, woo väl Krauft ekj von miene Breeda un Sestren kjrieech. Dee brochten mie Äten em Hospitol un weesen mie Bibelvarzhen, waut mie Troost jeewen. Daut es soon scheenet Jefeel to weeten, daut wie nich auleen sent. Wie jehieren to Jehova siene groote Famielje – eene Famielje, waut reed es, eenem uttohalpen, eenem bietostonen un eenem Moot to jäwen, Jehova wieda to deenen.”

14. Wuarom wudd wie sellen de Help von de Eltestasch aunnämen?

¹⁴ Eene Wajch, woo Jehova ons Moot jeft, es derch de Eltestasch. Dee sent soo aus Jeschenkja, waut Jehova brukt toom ons stoakjen un Moot jäwen (Jes. 32:1-2). Wan du die bedrekjt feelst, dan saj de Eltestasch daut. Un wan dee die Help aunbeeden, dan nemm dee wellich aun. Jehova kaun die derch dee stoakj moaken.

15. Waut vonne Hopninj hab wie aula?

¹⁵ De Hopninj, waut wie derch de Schreft haben, jeft ons väl Krauft (Reem. 4:3,  18-20). Eenje Christen haben de Hopninj, fa emma em Himmel to läwen un aundre fa emma em Paradies oppe Ieed. Onse Hopninj stoakjt ons, daut wie kjennen schwoaret uthoolen, de goode Norecht prädjen un veschiedne Oppgowen enne Vesaumlunk nokomen (1. Tess. 1:3). Deeselwje Hopninj jeef uk dän Apostel Paulus Krauft.

16. Wuarom fäld dän Apostel Paulus daut aun Krauft?

¹⁶ Paulus fäld daut aun Krauft. En sienen Breef aun de Christen en Korint, schreef hee, daut hee soo wia aus een ieednet Jefäs. Hee wia “hoat bedrenjt,” un “en Veläajenheit,” hee wort “vefolcht” un “unjadrekjt”. Bieaun wia mau rajcht sien Läwen en Jefoa (2. Kor. 4:8-10). Dise Wieed schreef Paulus, aus hee opp siene dredde Missionsreis wia. Hee woat daut dan veleicht nich jewist haben, daut hee noch mea Trubbels haben wudd. Hee wudd von eene Häad Menschen aunjejräpen woaren, faustjenomen woaren, metem Schepp veojjlekjen un hee wudd enjestopt woaren.

17. Waut jeef Paulus de Krauft, schwoare Tieden uttohoolen, soo aus 2. Korinta 4:16-18 wiest?

¹⁷ Paulus kjrieech doaderch Krauft, daut hee aun siene Hopninj docht (läs 2. Korinta 4:16-18). Hee säd to de Breeda en Korint, daut wan sien Kjarpa uk “langsom vefelt”, wudd hee doawäajen oba nich mootloos woaren. Paulus docht sea aun daut, waut noch komen wudd. Siene Hopninj wia, eewich em Himmel to läwen. Daut wia fa am “äwa aule Moten harlich” un hee wia reed, aules uttohoolen, om dise Hopninj to kjrieen. Daut Paulus soo äwa siene Hopninj docht, jeef am Krauft un hee feeld sikj soo, aus wudd hee aule Dach niejemoakt woaren.

18. Woo wort Tihomir un siene Famielje derch de Hopninj jestoakjt?

¹⁸ Een Brooda en Bulgarien, waut Tihomir heet, wort sea derch de Hopninj jestoakjt. Een poa Joa trigj wia sien jinjra Brooda Zdravko derch een Ekjsident todood jekomen. Doawäajen wia hee sea truarich un bedrekjt. Om doamet foadich to  woaren, deeden hee un siene Famielje äwa daut Oppstonen vom Doot nodenkjen. Hee sajcht: “Wie räden doaräwa, wua wie Zdravko trafen wellen, waut wie fa am koaken wellen, wäm wie fa daut ieeschte Fast enloden un waut wie am vetalen woaren von de latste Doag.” Tihomir sajcht, daut de Hopninj am un siene Famielje halpt, wieda uttohoolen un doano to luaren, bat Jehova sienen Brooda woat oppwakjen.

19. Waut kaust du doonen, om diene Hopninj stoakj to hoolen? (See uk daut Bilt.)

¹⁹ Woo kaust du diene Hopninj stoakj hoolen? Biejlikj wan du de Hopninj hast fa emma oppe Ieed to läwen, dan läs Varzhen von ut de Schreft, wua daut om daut Paradies jeit, un denkj doaräwa no (Jes. 25:8; 32:16-18). Jrebbel doaräwa no, woo daut woat enne niee Welt sennen. Stal die väa, du best doa. Wäm sitst du doa? Waut kaust du doa hieren? Woo feelst du die? Daut du die daut noch bäta kaust väastalen, kaust du die Paradies-Bilda beseenen von onse Bieekja ooda de Musikj-Videos kjikjen, soo aus De niee Welt, waut Gott vesprakjt, Aul gaunz dicht bie ooda Woo scheen woat daut sennen. Wan wie pinkjlich äwa de niee Welt nodenkjen, waut onse Hopninj stoakjt, dan woaren onse Trubbels “bejrenst un leicht” sennen (2. Kor. 4:17). Derch de Hopninj, waut Jehova ons jeft, moakt hee ons stoakj.

20. Woo kjenn wie Krauft kjrieen, wan wie ons uk schwak feelen?

²⁰ “Wan Gott met ons es, woa wie fauststonen”, wan wie ons uk schwak feelen (Psa. 108:14). Jehova haft die aules jejäft, waut die fält, toom siene Krauft kjrieen. Wan die Help fält, om eene Oppgow derchtofieren, waut schwoaret uttohoolen ooda diene Freid to bewoaren, dan bäd iernstlich to Jehova un sieekj no Rot derch dien perseeneljet Studium. Nemm de Help von diene Breeda un Sestren aun. Denkj äwa diene scheene Hopninj no. Dan woat Gott die “stoakj moaken, doano aus siene Macht harlich es, daut . . . [du] aules jeduldich un met Freid uthoolen” kaust (Kol. 1:11).