1. Hao nao God strongim olketa faithful servant blo hem lo bifor?

 STAKA taem Bible storyim olketa faithful man bifor wea barava strong. Bat samfala taem olketa savve discourage tu. For example, samfala taem King David feel olsem hem “barava strong olsem wanfala maunten,” bat lo olketa nara taem hem “fraet tumas” tu. (Ps. 30:7) Spirit blo God givim paoa lo Samson and hem strong tumas. Nomata olsem, hem luksavve if God no givim hem datfala paoa hem bae “wik olsem olketa nara man nomoa.” (Judg. 14:5, 6; 16:17) Olketa faithful man hia strong, only bikos Jehovah givim paoa lo olketa.

2. Why nao aposol Paul sei taem hem wik hem nao taem hem strong? (2 Corinth 12:9, 10)

² Aposol Paul luksavve hem tu needim paoa from Jehovah. (Readim 2 Corinth 12:9, 10.) Olsem staka lo iumi, Paul tu garem samfala health problem. (Gal. 4:13, 14) Samfala taem hem hard tu for Paul duim stret samting. (Rome 7:18, 19) And samfala taem hem fraet and no sure lo wat nao maet happen lo hem. (2 Cor. 1:8, 9) Bat taem Paul wik, hem nao taem hem strong. Why nao olsem? Jehovah givim paoa wea Paul needim for strongim hem for deal witim olketa challenge wea hem feisim.

3. Olketa wanem kwestin nao bae iumi storyim lo disfala article?

³ Jehovah promis for strongim iumi tu for no givap. (1 Pet.  5:10) Bat iumi no expectim for hem givim iumi paoa if iumi no duim samting. For example, engine savve givim paoa lo car for muv forward. Bat draeva mas stepim accelerator mekem hem savve go eniwea. Lo semsem wei tu, Jehovah redi for givim paoa wea iumi needim, bat for benefit from datwan, iumi mas duim samting. Wat nao Jehovah provaedem for strongim iumi? And wat nao iumi need for duim mekem iumi kasem datfala paoa? Iumi bae kasem ansa for olketa kwestin hia, taem iumi storyim hao Jehovah strongim profet Jonah, Mary mami blo Jesus, and aposol Paul. Bae iumi storyim tu hao Jehovah gohed strongim olketa servant blo hem distaem lo sem wei.

4. Wat nao iumi savve duim for kasem paoa from Jehovah?

⁴ Wanfala samting wea iumi savve duim for kasem paoa from Jehovah, hem for prea lo hem. Jehovah bae ansarem olketa prea blo iumi taem hem givim iumi “strong wea winim strong bilong man.” (2 Cor. 4:7) Taem iumi readim Bible and ting raonem, datwan savve strongim iumi tu. (Ps. 86:11) Message blo Jehovah lo Bible hem “garem paoa.” (Heb. 4:12) Taem iu prea lo Jehovah and readim Bible, datwan bae mekem iu kasem strong wea iu needim for no givap, for gohed hapi, or for duim eni hard assignment wea iu kasem. Bae iumi storyim hao Jehovah strongim profet Jonah.

5. Why nao profet Jonah need for no fraet?

⁵ Profet Jonah hem need for no fraet. Hem ranawe from wanfala challenging assignment wea Jehovah givim hem. From datwan, hem and pipol wea insaed ship klosap lusim laef blo olketa lo raf sea. Taem olketa crew torowem hem from ship, wanfala big fish swallom hem and Jonah insaed lo bele blo datfala fish. Iu tingse, hao nao feeling blo Jonah? Maet firstaem hem tingse bae hem dae lo there. And maet hem tingse Jehovah lusim hem nao. Jonah mas fraet for gud.

6. Olsem Jonah 2:1, 2, 7 storyim, wat nao strongim Jonah taem hem insaed bele blo datfala fish?

⁶ Wat nao Jonah duim for strongim hem taem hem insaed bele blo fish? Hem prea lo Jehovah. (Readim Jonah 2:1, 2, 7.) Nomata Jonah no obeyim Jehovah, hem repent and sure Jehovah bae lisin lo prea blo hem. Jonah ting raonem tu olketa scripture wea hem bin readim. Iumi savve lo diswan bikos prea blo hem wea stap lo Jonah chapter 2, hem iusim olketa sem toktok wea stap lo Psalms. (For example, comparem Jonah 2:2, 5 witim Psalm 69:1; 86:7.) Hem klia Jonah savve gud lo olketa scripture hia. From datwan, Jonah sure Jehovah bae helpem hem. Gogo Jonah kasem bak drae land, and hem redi for acceptim and duim assignment blo hem.—Jonah 2:10–3:4.

7-8. Wat nao strongim wanfala brata lo Taiwan taem hem kasem olketa hard taem?

⁷ Example blo Jonah savve helpem iumi taem iumi deal witim olketa difren hard taem. For example, Zhiming, b wanfala brata from Taiwan, kasem samfala health problem. And tu, famili blo hem barava againstim hem from hem worshipim Jehovah. Jehovah strongim hem from hem prea and duim personal study. Hem sei: “Samfala taem wea problem kamap, tingting blo mi no savve setol for mi duim personal study.” Bat hem depend lo Jehovah for help. Hem  sei: “Firstaem mi prea lo Jehovah, then mi putim earphone and lisin lo olketa Kingdom song. Samfala taem mi singsing smol followim olketa song hia go kasem taem mi garem peace. Then mi start for study.”

⁸ Personal study strongim Zhiming for deal witim olketa hard situation wea hem kasem. For example, taem hem gohed recover from wanfala big operation, wanfala nurse talem hao red blood cell blo hem low, so hem needim blood transfusion. Lo naet bifor hem kasem datfala operation, Zhiming read abaotem wanfala sista wea kasem semkaen operation. Red blood cell blo sista hia barava low winim hem. Nomata olsem, datfala sista no acceptim blood transfusion and hem recover. Datfala experience strongim Zhiming for gohed faithful.

9. If iu wari tumas taem iu kasem eni hard taem, wat nao iu savve duim? (Lukim tu olketa piksa)

⁹ Taem iu kasem hard taem, waswe, iu wari tumas gogo iu no savve storyim klia feeling blo iu lo prea? Or iu feel taed tumas for study? Tingim, Jehovah savve gud lo situation blo iu. So nomata iu talem wanfala simpol prea, iu savve sure hem bae givim wat iu barava needim. (Eph. 3:20) If hem hard for iu read and study bikos iu sik, taed, or feel nogud tumas, iu savve lisin lo audio recording blo Bible or eni pablikeson blo iumi. Iu savve lisin tu lo wanfala song blo iumi or watchim eni video lo jw.org. Jehovah laek for strongim iu and hem bae duim datwan, taem iu prea and luk lo Bible and olketa nara samting wea hem provaedem for lukim hao Jehovah ansarem olketa prea blo iu.

10. Hao nao olketa brata and sista savve strongim iumi?

¹⁰ Jehovah savve iusim olketa brata and sista for strongim iumi. Olketa savve “barava comfortim” iumi taem iumi deal witim hard taem or stragol for duim wanfala assignment wea no isi. (Col. 4:10, 11) Iumi barava needim olketa fren taem iumi kasem “hadtaem.” (Prov. 17:17, SIPB) Taem iumi wikdaon, olketa brata and sista savve provaedem wat iumi needim, comfortim, and  encouragem iumi for gohed worshipim Jehovah. Bae iumi storyim hao olketa narawan strongim Mary, mami blo Jesus.

11. Why nao Mary need for strong?

¹¹ Mary need for strong for gohed duim will blo Jehovah. Tingim hao Mary mas wari tumas afta hem kasem wanfala hard assignment from angel Gabriel. Hem no marit yet, bat angel sei bae hem babule. Mary no garem experience lo hao for lukaftarem pikinini, bat hem bae tek kea lo boy wea bae kamap Messiah. And from hem no sleep witim eni man, hao nao bae hem explainim datwan lo Joseph wea tufala engage finis?—Luke 1:26-33.

12. Olsem Luke 1:39-45 storyim, hao nao Mary kasem strong wea hem needim?

¹² Hao nao Mary kasem strong for duim disfala spesol and hard assignment? Hem lukaotem help from olketa narawan. For example, hem askem samfala information moa abaotem datfala assignment lo angel Gabriel. (Luke 1:34) Then, Mary travel go lo wanfala taon lo Judah wea stap lo “olketa maunten” for visitim relative blo hem Elizabeth. Hem benefit from datfala visit. Elizabeth praisem Mary and Jehovah givim holy spirit lo Elizabeth for talem encouraging profesi abaotem baby blo Mary wea no born yet. (Readim Luke 1:39-45.) Mary sei Jehovah bin “iusim paoa bilong hem for duim olketa big samting.” (Luke 1:46-51) Jehovah iusim angel Gabriel and Elizabeth for strongim Mary.

13. Wanem gud samting nao wanfala sista lo Bolivia kasem from hem askem help?

¹³ Olsem Mary, olketa brata and sista savve strongim iu tu. Sista Dasuri from Bolivia tu needim strong. Dadi blo hem barava sik and no eni cure for sik blo hem. Taem dadi admit lo hospital, Dasuri willing for tek kea lo hem. (1 Tim. 5:4) Datwan no isi. Hem sei: “Staka taem mi feel olsem mi laek givap nao.” Hao, Dasuri ask for help? Firstaem, hem no ask for help. Hem sei: “Mi no laek putim hevi lo olketa brata and sista. Lo tingting blo mi, Jehovah nao bae givim help wea mi needim. Then mi luksavve, taem mi isolatim mi from olketa narawan, mi trae for solvem seleva olketa problem blo mi.” (Prov. 18:1) Dasuri disaed for raet lo samfala brata and sista and explainim situation blo hem. Hem sei: “No eni toktok fitim hao olketa brata and sista strongim mi. Olketa tekem kam kaikai lo hospital and sharem olketa scripture wea comfortim mi. Hem gud tumas for savve iumi no stap seleva. Iumi part lo famili blo Jehovah wea willing for help, krae witim iumi, and encouragem iumi for gohed worshipim Jehovah tugeta.”

14. Why nao iumi shud acceptim help from olketa elder?

¹⁴ Wanfala wei wea Jehovah savve givim paoa lo iumi, hem thru lo olketa elder. Olketa hia present wea Jehovah iusim for strongim and comfortim iumi. (Isa. 32:1, 2) So taem iu wari abaotem samting, storyim datwan lo olketa elder. Hapi for acceptim help wea olketa givim lo iu. Jehovah iusim olketa for strongim iu.

15. Wanem hope nao evri Christian garem?

¹⁵ Olketa promis lo Bible savve givim iumi hope and paoa for iumi gohed worshipim Jehovah. (Rome 4:3, 18-20) Samfala Christian garem hope for laef olowe lo heven, and olketa narawan garem hope for laef olowe lo earth wea bae kamap paradaes. Hope strongim iumi for no givap lo olketa hard  taem, preachim gud nius, and for gohed duim olketa difren assignment lo kongregeson. (1 Thess. 1:3) Datfala sem hope strongim aposol Paul tu.

16. Why nao aposol Paul needim strong?

¹⁶ Paul hem needim strong. Lo leta blo hem for olketa lo Corinth, hem comparem hemseleva witim clay wea isi for brek. Hem sei hem kasem “hard taem,” “konfius,” ‘pipol spoelem hem,’ and “sorre.” And samfala taem laef blo hem stap lo danger tu. (2 Cor. 4:8-10) Paul raetem olketa toktok hia during lo third missionary tour blo hem. Bihaen datwan, hem deal witim staka hard taem moa. Olketa raf grup attakim hem, olketa arrestim hem, hem insaed olketa ship wea rek, and olketa putim hem lo prison.

17. Olsem 2 Corinth 4:16-18 storyim, wat nao strongim Paul for no givap taem hem kasem hard taem?

¹⁷ From Paul focus lo hope wea hem garem, datwan strongim hem for no givap. (Readim 2 Corinth 4:16-18.) Hem talem olketa lo Corinth nomata body blo hem “gogo for nogud,” hem bae no letem datwan for discouragem hem. Paul focus lo future blo hem. Hope for laef olowe lo heven hem barava spesol lo hem, so hem no givap lo olketa hard taem wea hem feisim mekem hem kasem datfala reward. From Paul focus lo datfala hope, datwan mekem hem “strong moa evriday.”

18. Hao nao hope strongim Timothy and famili blo hem?

¹⁸ Brata Timothy from Bulgaria, kasem strong from hope blo hem for future. Tu-thri year go finis, young brata blo hem, Stephen, dae lo accident. Datwan mekem Timothy sorre tumas. For deal witim datwan, hem and famili imaginim taem blo resurrection. Hem sei: “Mifala storyim ples wea mifala bae meetim Stephen, kaikai wea bae mifala redyim for hem, hu nao mifala bae invaetem lo first party blo hem, and wat mifala bae storyim lo hem abaotem olketa last day.” Timothy sei from olketa focus lo hope blo olketa, datwan strongim famili blo hem for no givap and for gohed weitim taem wea Jehovah bae resurrectim brata blo hem.

19. Wat nao iu savve duim for strongim hope blo iu? (Lukim tu piksa)

 ¹⁹ Wat nao iu savve duim for strongim hope blo iu? For example, if iu garem hope for laef olowe lo earth, read abaotem hao Bible storyim datfala Paradaes and ting raonem. (Isa. 25:8; 32:16-18) Imaginim laef lo niu world. Imaginim iu lo there. Hu bae iu lukim? Wat nao olketa saond wea bae iu herem? Hao nao bae iu feel? For helpem iu duim datwan, lukluk lo olketa piksa abaotem Paradaes lo olketa pablikeson blo iumi, or watchim eni music video olsem Niu World wea Bae Kam, Just Around the Corner, or Tingim Go Taem. If iumi gohed tingim hope for niu world, bae iumi ting lo olketa hard taem blo iumi olsem hem for ‘lelebet taem nomoa and no big tumas.’ (2 Cor. 4:17) Hope wea Jehovah givim iu bae mekem iu strong.

20. Nomata taem iumi wikdaon, wat nao iumi savve duim for strongim iumi?

²⁰ Nomata taem iumi wikdaon, “God nao bae givim [iumi] strong.” (Ps. 108:13) Jehovah provaedem finis wat iu needim for strongim iu. So taem iu needim help for duim wanfala assignment, deal witim hard taem, or for gohed hapi, prea lo Jehovah and duim personal study for kasem help from hem. Acceptim encouragement from olketa brata and sista. Gohed ting raonem hope blo iu for future. Then iu bae “kasem evri nambawan paoa bilong God wea [iu] needim mekem [iu] nating givap and [iu] gohed for patient and hapi.”—Col. 1:11.