1. Ia duwen Koht eh kakehlaka sapwellime ladu kan mahso?

 MAHSEN en Koht kin kalapw mahsaniheki ohl lelepek kan nin duwen ohl ekei me ahneki pwoson kehlail. Ahpw irail sohte kin ahnsou koaros pehm me re kehlail. Karasepe, ekei pak Nanmwarki Depit pehm me e kehlail duwehte “nahna ehu,” ahpw ekei pak e kin “masepwehkada.” (Mel. 30:7) Sapwellimen Koht manaman kihong Samson kehl laud. Ahpw Samson ese me ma sohte manaman sang rehn Koht, e pahn “luwetala duwehte aramas teikan.” (Sounkopwung 14:​5, 6; 16:17) Siohwa me ketikihong sapwellime ohl lelepek pwukat kehl.

2. Dahme kahrehda wahnpoaron Pohl koasoia me e kin luwet oh kehlail? (2 Korint 12:​9, 10)

² Wahnpoaron Pohl pohnese me e pil anahne kehl sang Siohwa. (Wadek 2 Korint 12:​9, 10.) Duwehte me tohto rehtail, Pohl ahneki kahpwal en roson. (Kal. 4:​13, 14) Ekei pak, e pil kin apwalki wia dahme pwung. (Rom 7:​18, 19) Oh ekei pak e kin masak dahme kakete wiawihong ih. (2 Kor. 1:​8, 9) Ahpw, ni ahnsou me Pohl kin luwet, e kin kehlailla. Ia duwen? Siohwa ketikihong Pohl kehl me e anahne pwehn dadaur eh kahpwal kan.

3. Peidek dah kan me kitail pahn sapengala nan iren onop wet?

³ Siohwa ketin inoukihda en pil ketin kakehleikitailda. (1 Pit. 5:10) Ahpw kitail sohte kak kasik en ale sapwellime manaman ma kitail sohte wia uwen atail kak. Karasepe, misihn en sidohsa ehu kak kamourada sidohsa ehu pwehn tang.  Ahpw, sountangahkio anahne tiak kahso pwehn kak tangseli. Duwehte met, Siohwa kin ketin onopada en ketikihong kitail kehl me kitail anahne, ahpw kitail anahne mwekid pwehn paiekihda met. Dahme Siohwa ketikidahr pwe kitail en kehlail? Oh dahme kitail anahne wia pwehn alehdi kehlo? Kitail pahn esehda pasapengpen peidek ko sang ni atail medewe ia duwen Siohwa eh sewese soukohp Sona, Mery inen Siseso, oh wahnpoaron Pohl. Kitail pahn pil kilang ia duwen Siohwa eh kin pousehlahte kakehlaka sapwellime ladu kan ni soangen ahlo rahnwet.

4. Ia duwen atail kak alehdi kehl sang rehn Siohwa?

⁴ Ehu ahl me kitail kak alehdi kehl sang rehn Siohwa iei sang ni atail kapakap ong ih. Siohwa pahn ketin sapengala atail kapakap kan sang ni eh ketikihong kitail “kehl me laudsang dahme aramas ahneki.” (2 Kor. 4:7) Kitail pil kak alehdi kehl ni atail wadek sapwellime Mahsen oh doudouloale. (Mel. 86:11) Sapwellimen Siohwa Mahsen ong kitail nan Paipel “uhdahn kehlail.” (Ipru 4:12) Ni omw kapakap ong Siohwa oh wadek sapwellime Mahsen, ke pahn alehdi kehl me ke anahne pwehn dadaur, pwehn ahnekihte peren, de kapwaiada pwukoa apwal ehu. Tehk ia duwen Siohwa eh kakehlaka soukohp Sona.

5. Dahme kahrehda soukohp Sona anahne kehl?

⁵ Soukohp Sona anahne kehl. E tangasang pwukoa apwal ehu me Siohwa ketikihong. Pwehki met, ih oh aramas ako nan sohpo kereniong mehla nan melimel ehu. Ni ahnsou me e lekdeksang nan sohpo, lapalahn mwahmw men kadalehlla. Sona mi wasa kamasepwehk ehu nan kapehden mwahmw men. Ia omw madamadau ia ahn Sona pepehm? E kasik en mehla wasao? E kakete medewe me Siohwa ketin likidmelieiehla ih? Sona uhdahn masepwehkada.

6. Nin duwen me Sona 2:​1, 2, 7 mahsanih, dahme kakehlaka Sona erein eh mi nan kapehden mwahmwo?

⁶ Dahme Sona wia pwehn alehdi kehl ni eh kelekelehpw nan kapehden mwahmw men? E kapakap ong Siohwa. (Wadek Sona 2:​1, 2, 7.) Mendahki Sona sapeikiong Siohwa, e koluhla oh pwoson me Siohwa pahn ketin karonge eh kapakapo. Sona pil kin doudouloale iren Paipel kan me e wadek mahso. Dahme kahrehda kitail kak ndahki met? Eh kapakapo nan Sona irelaud 2, e doadoahngki pali laud en lokaia kohte me mi nan Melkahka. (Karasepe, pil kilang Sona 2:​2, 5; Melkahka 69:1; 86:7.) E sansal me Sona esehla mwahu iren Paipel ko. Iren Paipel ko kamehlelehiong me Siohwa pahn ketin sewese. Siohwa ketin doarehla Sona oh mwuri e onopadahr en wia doadoahko me Siohwa mahsanihong en wia.—Sona 2:10–3:4.

7-8. Ia duwen emen brother nan Taiwan eh alehdi kehl erein eh kahpwal kan?

⁷ Ahn Sona mehn kahlemeng kak sewese kitail ni ahnsou me kitail lelohng soangsoangen kahpwal kan. Karasepe, Zhiming, b brother men nan Taiwan, lokolongki kahpwal en roson laud ehu. Patehng met, eh peneinei ko kin lemeiong pwehki eh pwoson Siohwa. Sang ni kapakap oh onop e alehdi kehl sang Siohwa. E koasoia: “Ekei pak, ni ahnsou me kahpwal kin pwarada, I kin pwunodada me kahrehda I sohte kak meleileidi pwehn wia pein ei onop en Paipel.” Ahpw e likih sapwellimen Siohwa sawas. E koasoia: “Keieu, I kapakap ong Siohwa. Mwuri, I kin doadoahngki nei earphone ko oh rong neitail koulen kaping ong Siohwa. Ekei pak, I pil kin koulki ni ngihl tikitik lao I meleileidi. Mwuri I ahpw tepida onop.”

 ⁸ Pein onop Paipel kakehlaka Zhiming ni soangen ahl kei me e sohte kasik. Karasepe, erein eh mwamwahudahsang pwal laud ehu, nurse men padahkihong me pwehki eh ntao tikitik, e pahn anahne doken nta. Pwohngo mwohn eh pwal, Zhiming wadek duwen sister men me ale soangen pwalohte. Ahn sistero ntao pil tikitiksang ah ntao; ahpw e sohte ale doken nta oh e mwahula. Dahme wiawio kakehlakahda Zhiming en lelepekte.

9. Ma kahpwal ehu kaluweteiukala, dahme ke kak wia? (Pil kilang kilel kan.)

⁹ Erein kahpwal ehu, ke kin masak en kasalehda omw madamadau nan kapakap? De ke kin nohn pwang en onop? Tamataman me Siohwa uhdahn ketin mwahngih omw irair. Eri ni omw pil wia kapakap me mengei, ke kak kamehlele ma e pahn ketikihong uhk dahme ke uhdahn anahne. (Ep. 3:20) Ma e apwal ong uhk en wadawad oh onop pwehki omw soumwahu, pwang, de uhdahn pwunod, ke kak rong ngilen wadawad en Paipel de ehu neitail sawasepen Paipel kan. Ke pil kak rong ehu neitail koul kan de kilang kasdo ehu nan jw.org. Sang ni omw kapakap ong Siohwa oh rapahki pasapeng nan neitail sawasepen Paipel kan me e ketikihda, e pahn ketin seweseiuk en kehlail.

10. Ia duwen riatail Kristian kan ar kin kakehlaka kitail?

¹⁰ Siohwa kak ketin doadoahngki riatail Kristian kan en kakehlei kitail. Irail kak wia “utupen nsenamwahu laud” ni atail lelohng kahpwal de apwalki kapwaiada pwukoa apwal ehu. (Kol. 4:​10, 11) Kitail kin keieu anahne kompoakepatail kan ni “ahnsou apwal.” (Lep. Pad. 17:17) Ni atail kin luwet, riatail Kristian kan kak sewese kihda dahme kitail anahne, kansenamwahwih kitail, oh kangoange kitail en doulahte papah Siohwa ni lelepek. Medewehla ia duwen Mery, inen Siseso eh ketin alehdi sawas sang meteikan.

11. Dahme kahrehda Mery anahne kehl?

¹¹ Mery anahne kehl pwehn wia kupwuren Siohwa. Medewehla ia uwen eh pwunod ni ahnsowo me tohnlengo Kapriel padahkihong me e pahn liseianda mendahki e saikinte pwopwoudla. Saikinte pak ehu me e pein apwalihda seri, ahpw e anahne apwalih kisin  pwutako me pahn wiahla Mesaia. Oh pwehki e saikinte wia nsenen pwopwoud, ia duwen Mery eh pahn kawehwehiong eh inoun pwopwoudo Sosep duwen met?—Luk 1:​26-33.

12. Nin duwen me Luk 1:​39-45 mahsanih, ia duwen Mery eh alehdi kehl me e anahne?

¹² Ia duwen Mery eh alehdi kehl me e anahne pwehn kapwaiada pwukoa tohrohr oh apwalo? E rapahki sawas sang meteikan. Karasepe, e peki Kapriel en kasalehda pil ekei ire me pid pwukoau. (Luk 1:34) Sohte pwand mwurin mwo, e seiloakla “wasa nahnahn sahpwo” nan Suda pwehn mwamwaitih kisehu Elisapet. Seiloak mwahu ehu met. Elisapet kapinga Mery oh Siohwa ketin doadoahngki pwehn ehukihong Mery kokohp kangoango me pid nein Mery kisin pwutako me saikinte ipwidi. (Wadek Luk 1:​39-45.) Mery koasoia me Siohwa “ketin wiahkihda lime roson soahng kapwuriamwei kan.” (Luk 1:​46-51) Sang ni eh ketin doadoahngki Kapriel oh Elisapet, Siohwa ketin kakehlakahda Mery.

13. Dahme wiawi ni sister men eh peki sawas sang rie Kristian kan?

¹³ Duwehte Mery, ke pil kak alehdi kehl sang iengomw tohnkaudok kan. Dasuri, sister men nan Bolivia, anahne soangen kehl wet. Eh pahpao ahnekihda soumwahu laud ehu oh sohte mehkot kak kamwahwihala. Ni ahnsou me e mihmi nan imwen wini, Dasuri men mihmihte reh ni uwen eh kak. (1 Tim. 5:4) Met sohte kin ahnsou koaros mengei. E koasoia, “Pak tohto I kin pehm me I solahr kak doulahte.” E peki sawas? E sohte wia met nin tapio. E koasoia, “I sohte men kedirepwe brother kan. I pein medewe me ‘Siohwa me pahn ketikihong ie sawas me I anahne.’ Ahpw I tehkada me ni ei kin katohreiehsang meteikan, I kin songosong en kelehpwiki ei kahpwal kan.” (Lep. Pad. 18:1) Dasuri pilada en ntinglahng ekei kompoakepah kan oh kawehwehda eh irairo. E koasoia: “Lokaia sohte kak kawehwehda ia uwen iengei Kristian kan ar kakehlaka ie. Re wahdo mwenge ni imwen winio oh ehukihong ie iren Paipel kansenamwahu kan. Ia uwen eh kansenamwahu en ese me kitail sohte kin kelekelehpw. Kitail wia kisehn sapwellimen Siohwa peneinei laud ehu, peneinei ehu me kin sewesehki atail anahn kan, iang kitail sengiseng ni atail kin lokolok, oh kangoange kitail en doulahte iang irail papah Siohwa.”

14. Dahme kahrehda kitail anahne men ale sawas sang elder kan?

¹⁴ Ehu ahl me Siohwa kin ketikihong kitail kehl iei sang elder kan. Irail wia kisakis me e kin ketin doadoahngki pwehn kakehlaka oh kansenamwahwih kitail. (Ais. 32:​1, 2) Eri ni omw kin pwunod, ehukihong elder kan omw pepehm. Dehr peikasalki ale sawas sang rehrail. Pwehki irail, Siohwa kak ketin kakehlakaiukada.

15. Koapworopwor dah me Kristian koaros kesempwalki?

¹⁵ Inou kan nan Paipel kak kihong kitail koapworopwor oh kehl pwehn pousehlahte papah Siohwa. (Rom 4:​3, 18-20) Ekei Kristian ahneki koapworopwor en mour kohkohlahte nanleng a ekei ahneki koapworopwor kaselel en mour kohkohlahte nan paradais nin sampah. Atail koapworopwor kin kakehlaka kitail en dadaur pahn kahpwal kan, kalohki rongamwahwo, oh papah riatail Kristian kan nan mwomwohdiso. (1 Des. 1:3) Soangen koapworopwor wet kakehlakahda wahnpoaron Pohl.

16. Dahme kahrehda wahnpoaron Pohl anahne kehl?

 ¹⁶ Pohl anahne kehl. Nan nah kisinlikou ong mehn Korint ko, e kapahrekiong pein ih sah ehu. E kin “idaidpene,” “pingida,” “aramas kin kaloke,” oh ‘kesehdi.’ Ekei pak eh mour kin mihla nan keper. (2 Kor. 4:​8-10) Pohl ntingihedi mahsen ko erein kesiluhn eh seiloak en misineri. Oh erein eh ntingihdi mahsen ko, e lelohng pil ekei kahpwal kan. Erein eh seiloako, pwihn en aramas kei keme, salihedi, oh pil kereniong duhla oh selidi.

17. Nin duwen 2 Korint 4:​16-18 mahsanih, dahme kakehlaka Pohl en dadaurete kahpwal kan?

¹⁷ Sang ni eh koapworopwor, Pohl alehdi kehl pwehn dadaurete. (Wadek 2 Korint 4:​16-18.) E padahkihong mehn Korint ko me mehnda ma paliwereo pil “luhluwetala,” e sohte pahn mweidohng met en kaluwetehla. Pohl medemedewehte eh koapworopwor. Eh koapworopwor en mour soutuk nanleng kin “wie lalaudla.” Ahn Pohl koapworopwor uhdahn tohrohr ong ih me kahrehda e men dadaurete pahn kahpwal kan pwehn alehdi ketingpe. Pohl doudouloale koapworopworo, oh imwilahn met, e pehm me e “kekehlailla ehuehu rahn.”

18. Ia duwen koapworopwor eh kakehlaka Tihomir oh eh peneinei?

¹⁸ Tihomir brother men nan Bulgaria, diar kehl sang eh koapworopwor. Sounpar kei mwohn mwo, rie pwutak tikitiko Zdravko, mehla nan aksident. Pwehki met, Tihomir kin uhdahn nsensuwedla. Pwehn dadaurete, ih oh eh peneineio kin medewehla ia pahn mwomwen kaiasada. E koasoia: “Karasepe, se kin koasoiapene ia wasa me se pahn tuhwong Zdravko, mwenge dah me se pahn wiahda kene, ihs me se pahn luke ni kamadipwo ni ahnsou me e pahn pwurodo, oh dahme se pahn padahkihong duwen ni imwin rahn akan.” Tihomir koasoia me en medemedewe arail koapworopworo kakehlaka eh peneineio en dadaurete oh awiawihete ahnsou me Siohwa pahn ketin kaiasada rie pwutako.

19. Dahme ke kak wia pwehn kakehlaka omw koapworopwor? (Pil kilang kilel.)

 ¹⁹ Ia duwen omw kak kakehlaka omw koapworopwor? Karasepe, ma ke ahneki koapworopwor en mour kohkohlahte nin sampah, wadek duwen Paipel eh kawehwehda Paradais oh doudouloale. (Ais. 25:8; 32:​16-18) Medewe ia pahn mwomwen mour nan sampah kapwo. Medewehla ihs me ke pahn tuhwong, ngihl dah me ke pahn rong, oh ia pahn omw pepehm. Pwehn seweseiuk medewehla ia pahn mwomwen Paradais, kilang kilel kan nan neitail sawasepen Paipel kan de kilang kasdohn koul kan, me duwehte The New World to Come, Just Around the Corner, de Imagine the Time. Ma kitail kin kalapw wiahda ahnsou en doudouloale duwen koapworopwor en sampah kapwo, atail kahpwal kan pahn “ongete ahnsou kis oh me marahra.” (2 Kor. 4:17) Koapworopwor me Siohwa ketikihong uhk kak seweseiuk en dadaur pahn kahpwal kan.

20. Pil ni atail luwet, ia duwen atail kak alehdi kehl?

²⁰ Pil ni ahnsou me kitail luwet, “Koht pahn ketikihong kitail kehl.” (Mel. 108:13) Siohwa ketikihonguhkehr dahme ke anahne pwehn ale kehl sang reh. Eri ni omw anahne sawas en kapwaiada pwukoa ehu, anahne dadaur pahn kahpwal ehu, de kolokolete omw peren, kapakapohng Siohwa oh wia pein omw onop pwehn diar sawas. Men ale kangoang sang riomw Kristian kan. Kaukaule wiahda ahnsou en medemedewe omw koapworopwor ong ahnsou kohkohdo. Eri ke pahn “kehlailkihda manaman koaros nin duwen sapwellime [Koht] roson lingaling pwe kumwail en uhdahn dadaurete ni kanengamah oh peren.”—Kol. 1:11.