1. ¿Ñaupa tiempopi Diosta sirvijcunaca imamantataj imata mana manchaj, sinchicuna carca?

 BIBLIAPICA Diosta sirvijcunamanta parlashpaca sinchi feta charishcata, imata mana manchajcuna cashcatami nin. Shinapish maijancunaca sinchi feta charishpapish huaquinpica llaquilla, fuerza illajmi sintirircacuna. Por ejemplo, rey Davidca sinchi, imata mana manchajmi carca. Paica ‘jatun urcu shina pi mana cuyuchipaj’ cashcatami yuyaj carca. Chashnapish huaquinpica manchaihuan, fuerza illajmi sintirij carca (Salmo 30:7). Cutin Sansonca Jehová Dios paipaj espíritu santota cushcamantami fuerzasapa carca. Pero Jehová Dios espíritu santota mana cujpi fuerza illaj saquirinataca allimi yacharca (Jueces 14:​5, 6; 16:17). Shinashpaca ñaupa tiempopi Diosta sirvijcunaca Jehová Dios espíritu santota cujllapimi fuerza, animota charircacuna.

2. ¿Pabloca imamantataj “ñucaca imata mana rurai tucui horasmi poderyuj tucuni” nirca? (2 Corintios 12:​9, 10).

² Apóstol Pabloca Jehová Dios cushca fuerzasta minishtishcatami yacharca (2 Corintios 12:​9, 10-ta liyipai). Pabloca ñucanchij shinami ungüicunata charirca (Gálatas 4:​13, 14). Shinallataj paica allita rurangapajmi esforzarij carca (Romanos 7:​18, 19). Huaquinpicarin huañunata yuyashpami mancharij carca (2 Corintios 1:​8, 9). Chashnapish paica: “Ñucaca imata mana rurai tucui horasmi poderyuj tucuni” nircami. Shinashpaca Pablo fuerza illaj cajpica Jehová Diosmi fuerzasta cuj carca. Chashnami paica poderyuj tucurca.

3. ¿Cai yachaipica imatataj yachashun?

³ Jehová Diosca ñucanchijmanpishmi fuerzasta cusha nin (1 Pedro 5:10). Shinapish ñucanchijman fuerzasta cuchunca mana maqui cruzashcachu saquirina canchij. Shuj carropi yuyashun. Motormi  carro purichun fuerzasta cun. Pero motor japirishpa carrota purichichunca carrota manejajmi aceleradorta llapina can. Jehová Diosca chai motor shinami ñaupajman catichun ñucanchijmanca fuerzasta cui tucun. Pero ñucanchijpishmi aceleradorta llapij shina ñaupajman catingapaj esforzarina canchij. ¿Jehová Diosca ima shinataj ñucanchijman fuerzasta cun? ¿Paipaj ayudata chasquingapajca imatataj rurana canchij? Caita alli intindingapajca Jonasta, Mariata y Pablota ima shina sinchiyachishcatami cunanca yachashun. Shinallataj cunan punllacunapi Jehová Dios paita sirvijcunata ima shina sinchiyachijtami ricushun.

4. ¿Jehová Dios ñucanchijman fuerzasta cuchunca imatataj rurana canchij?

⁴ Jehová Dios ñucanchijman fuerzasta cuchunca paitami mañana canchij. Chaita rurajpica Diosca poderta cushpami ñucanchijta ayudanga (2 Corintios 4:7). Diospaj Shimica achca podertami charin (Hebreos 4:12). Chaimantami Bibliata liyina, chaipi nishcacunapi yuyana canchij (Salmo 86:11). Diosta mañangapaj, Bibliata liyingapaj esforzarishpaca Dios cushca fuerzastami chasquishun. Chashnami llaquicunata ahuantashpa cushilla Jehová Diosta sirvishun, sinchi mingashcacunatapishmi alli pajtachi tucushun. Cunanca Jehová Dios Jonasta ima shina sinchiyachishcatami ricushun.

5. ¿Jonasca imamantataj fuerzasta minishtirca?

⁵ Jonasca Dios mingashcata pajtachingapajca fuerzastami minishtirca. Paica manchaita charishcamantami Dios cachashca llajtaman ringapaj barcota japinapaj randica shujtaj barcota japirca. Chaimi paipish, paihuan barcopi cajcunapish jatun acapana shamujpi casi huañurcacuna. Barcopi cajcuna paita mama cuchaman shitajpica shuj jatun pescadomi paitaca causajta millpurca. ¿Jonasca pescadopaj huijsapi cashpaca chaipi huañunatachu yuyashcanga? ¿Jehová Dios paita saquishcatachu yuyashcanga? Seguramente paica llaquilla, manchaihuanmi cashcanga.

6. ¿Pescadopaj huijsa ucupi cashpaca Jonasca fuerzasta japingapajca imatataj rurarca? (Jonás 2:​1, 2, 7).

⁶ ¿Jonasca pescadopaj huijsa ucupi cashpaca fuerzasta chasquingapajca imatataj rurarca? Jehová Diostami mañarca (Jonás 2:​1, 2, 7-ta liyipai). Paica Jehová Diosta mana cazushcamantaca arrepintirishcami carca. Chaimantami Jehová Dios paipaj mañaita cutichinata seguro carca. Shinallataj paica Diospaj Shimipi nishcacunapimi yuyarca. ¿Imamantataj shina ninchij? Paica Jehová Diosta mañacushpaca Salmos libropi nishcacunatami yuyarirca. Por ejemplo, Jonás 2:​2, 5-pi nishcacunata Salmo 69:1 y 86:​7-huan chꞌimbapurajpica casi igualmi can. Shinashpaca Jonasca llaquicunata chari horas Diospaj Shimipi nishcacunata yuyarishcamantami Jehová Dios paita ayudanata seguro carca. Chaimi chai pescado Jonasta allpapi shungu tigrajpica Jonasca paiman mingashcata pajtachingapaj listo carca (Jonás 2:10–3:4).

7, 8. ¿Shuj huauquica llaquicunata ahuantangapajca imatataj rurarca?

⁷ Llaquicunata ahuantangapajca Jonaspaj ejemplotami yuyarina canchij. Taiwán llajtapi causaj huauqui Ziming shuti llaquicunata ahuantangapaj imata rurashcata ricushun. b Paica ancha ungushcami can. Shinallataj Jehová Diosta sirvishcamantami paipaj familiaca cꞌuyaillata tratancuna. ¿Chashnapish Jehová Diosmanta ama caruyangapajca imatataj ruran? Paica Diosta mañanata, Bibliata estudianataca manataj saquishcachu. Shinallataj paica: “Huaquinpica achca problemacunata charishcamantami Bibliata estudiangapajca mana animota charini. Pero estudiai callaringapajca Yaya Diostami mañani. Chai qꞌuipaca audifonocunata churashpami cantocunata uyani. Chai cantocunata  shimi ucullapi cantashpami tranquilo sintirini. Chaipi si Bibliatami estudiai callarini” nircami.

⁸ Cai huauquica Bibliata, publicacioncunata estudiashcamantami paipaj crishcacunataca mana manchashpa difindi tucushca. Por ejemplo, doctorcuna paita operashca qꞌuipaca shuj enfermeraca: “Cambaj yahuarpica ashalla glóbulos rojoscunami tiyan. Chaimi cantaca yahuarta churana canchij” nircami. Pero Zimingca paita operachun ashalla horascuna faltajpimi shuj panipaj experienciata liyishca carca. Chai panitapishmi doctorcunaca chai operacionllatataj rurashcacuna carca. Paica ashtahuan menos glóbulos rojoscunata charishpapish doctorcuna paiman yahuarta churachunca mana saquircachu. Chashnapish paica alliyarcami. Chai experienciata liyishcamantami huauqui Zimingca Jehová Diosta cazungapaj fuerzasta charirca.

9. ¿Llaquicunata charishcamanta fuerza illaj cashpaca imatataj rurai tucungui? (Fotomantapish parlapai).

⁹ ¿Llaquicunata apacushpaca yallitaj sustarishca cashcamanta Jehová Diosta mañanaca cambajca sinchichu cashca? ¿O fuerzas, ánimo illaj saquirishcamantachu Bibliata estudianaca sinchi can? Jehová Dios can ima shina sintirishcataca allimi yachan. Chaimantami ashalla shimicunapi paita mañajpipish Jehová Diosca can imalla minishtishcacunataca cunga (Efesios 3:20). Ungushca o llaquilla cashcamanta Bibliata, publicacioncunata liyina sinchi cajpica grabashcatami uyai tucungui. Ashtahuanpish jw.org paginapi tiyaj cantocunata, videocunata uyashpami animota japi tucungui. Shinashpaca Jehová Diosca ñucanchij mañashcacunataca paipaj Shimipi nishcacunahuan, sumaj publicacioncunahuanmi cutichi tucun.

10. ¿Huauqui panicunaca ima shinataj ayudancuna?

¹⁰ Jehová Diosca huauqui panicunata utilizashpami ñucanchijmanca fuerzasta cui tucun. Jatun llaquicunata apacujpi o ñucanchijman mingashcacunata pajtachingapaj esforzaricujpica paicunami cushichi tucun (Colosenses 4:​10, 11). Llaquicunata apacushca horasmi amigocunaca ashtahuan valishca can (Proverbios 17:17). Chaimantami fuerza illaj, llaquilla cajpica huauqui panicunaca tucuipi ayudai tucuncuna. María fuerzasta, animota ima shina chasquishcata ricushun.

11. ¿Mariaca imamantataj fuerzasta, animota minishtirca?

 ¹¹ Mariaca Diospaj munaita pajtachingapajca fuerzasta, animotami minishtirca. Ángel Gabriel, ‘manaraj cazarashpa chichu saquiringui’ nijpica Mariaca achcatami mancharishcanga. Paica huahuacunata mana charishpapish cunanca Diospaj Churitami alli huiñachina carca. Shinallataj Josehuan manaraj chayarinacushpapish shuj huahuata charigrishcatami paiman huillana carca (Lucas 1:​26-33).

12. Lucas 1:39 al 45-pi nishca shinaca ¿Mariaca ima shinataj animota chasquirca?

¹² ¿Mariaca sinchi mingashcata pajtachingapaj fuerzasta, animotaca ima shinataj japirca? Paica shujtajcunapaj ayudatami mashcarca. Por ejemplo, ángel Gabrielmanmi Jehová Dios imata rurachun munashcata alli intindichichun mañarca (Lucas 1:34). Asha punllacuna qꞌuipaca Mariaca Judá llajta urcucunapi saquirij shuj llajtamanmi utcashpa rirca. Chaipimi paipaj familia Elisabetta visitarca. Elisabetca Mariatami felicitarca. Shinallataj Diospaj espíritu yuyaita cujpimi Elisabetca María charigrishca huahuamanta shuj sumaj profeciata huillarca (Lucas 1:​39-45-ta liyipai). Chaita uyashpami Mariaca: “Diosca paipaj maquihuanmi jatun ruraicunata rurashca” nirca (Lucas 1:​46-51). Caipi ricushca shinaca Jehová Diosca ángel Gabrielta, Elisabetta utilizashpami Mariamanca fuerzasta curca.

13. ¿Dasuri ayudata mañajpica huauqui panicunaca paitaca ima shinataj ayudarcacuna?

¹³ Huauqui panicunaca ñucanchijtapishmi animai, ayudai tucuncuna. Bolivia llajtapi causaj pani Dasurimanta parlashun. Paipaj yayaca millai ungüita charishcamantami hospitalpi carca. Chaimi Dasurica paita alli cuidangapaj tucuita rurasha nirca (1 Timoteo 5:4). Pero paipaj yayata cuidanaca mana facilchu carca. Chaimi huauqui panicunapaj ayudata minishtirca. Shinapish Dasurica yallitaj shaicushca cashpapish callaripica huauqui panicunapaj ayudata mana mañarcachu. ¿Imamanta? Paica: “Turi ñañacunataca mana molestasha nircanichu. Jehová Dioslla tucuipi ñucata ayudachunmi shuyacurcani. Pero turi ñañacunamanta caruyashpaca ñucalla chai jatun llaquita apacushcatami cuentata curcani” nircami (Proverbios 18:1). Chaita cuentata cushpaca Dasurica huaquin huauqui panicunamanmi ima llaquita apacushcata huillarca. Dasurica: “Turi ñañacuna ñucata ayudashcamanta, sinchiyachishcamanta ima shina agradicinataca mana yachanichu. Paicunaca hospitalman micunitata apamushpa, sumaj versocunata yuyachishpami ñucataca animarcacuna. Paicuna chashna ayudajpimi mana ñucalla cashcata cuentata curcani. Testigo de Jehovacunaca shuj jatun familia shinami canchij. Chai familiaca siempremi ñucanchijta ayudangapaj, ñucanchijhuan huacangapaj, sinchiyachingapaj listos cancuna” nircami.

14. ¿Anciano huauquicuna ñucanchijta ayudasha nijpica imatataj rurana canchij?

¹⁴ Jehová Diosca anciano huauquicunata utilizashpami ñucanchijmanca fuerzasta, animota cun. Paicunaca Jehová Dios cushca sumaj bendicionmi can (Isaías 32:​1, 2). Chaimantami llaquicunata apacushpaca ancianocunahuan parlangapaj esforzarina canchij. Paicuna ayudasha nijpica ñucanchijta ayudachunmi saquina canchij. Chaita rurashpami Jehová Dios ñucanchijta sinchiyachichun saquicushcata ricuchishun.

15. ¿Diosta sirvijcunaca imatataj shuyacunchij?

¹⁵ Fuerzasta japingapajca Bibliapi nishca shina shamuj punllacunapi sumaj causai tiyanatami seguros cana canchij (Romanos 4:​3, 18-20). Tucuicunami shuj esperanzata charinchij. Maijancunaca Paraisopi causanatami shuyacuncuna. Shujtajcunaca jahua pachapi Jesushuan mandanatami shuyacuncuna. Chai esperanzata  charishcamantami ima llaquicuna ricurijpipish ahuantanchij. Tucui shunguhuan huillangapaj, ñucanchijman mingashcacunata alli pajtachingapajpishmi esforzarinchij (1 Tesalonicenses 1:3). Apóstol Pablo bendicioncunata chasquina yuyailla causashcamanta ima shina sintirishcata ricushun.

16. ¿Pabloca imamantataj fuerzasta, animota minishtirca?

¹⁶ Pabloca fuerzasta, animotami minishtirca. Chaimi Corintopi causaj huauqui panicunaman quillcashca cartapica pꞌaquirinalla, allpa puñu shina cashcata nirca. Shinallataj Diospaj enemigocuna paita catirashpa llaquichishcata, urmachisha nishcatami huillarca. Huaquinpica caita chaita yuyacushcata, casi huañushcatapishmi nirca (2 Corintios 4:​8-10). Pabloca quimsa cutin misionero shina viajacushpami chai cartata quillcarca. Qꞌuipa punllacuna ashtahuan llaquicunata charina cashcataca manachari yacharca. Por ejemplo, achca gentecuna paita macashca qꞌuipaca prezumi japircacuna. Chai qꞌuipaca pai viajacun barco hundirijpimi casi huañurca. Chai huashaca carcelmanmi aparcacuna.

17. 2 Corintios 4:16 al 18-pi nishca shinaca ¿Pabloca llaquicunataca ima shinataj ahuantai tucurca?

¹⁷ ¿Pabloca fuerzasta, animota japingapajca imatataj rurarca? Paica shamuj punllacunapi bendicioncunata chasquina cashcata yuyangapajmi esforzarirca (2 Corintios 4:​16-18-ta liyipai). Shinallataj Pabloca Corintopi caj huauqui panicunamanca ‘ñuca aicha urmarijpipish mana desanimarinichu’ nircami. Pabloca jahua pachapi causana esperanzatami charirca. Paica chai bendicionca imahuan mana chꞌimbapuraipaj cashcatami nirca. Chai bendicionta chasquina yuyailla causashcamantami llaquicunataca cushilla ahuantai tucurca. Chaimantami ‘ñuca yuyaipish, ñuca shungupish punllantami mushujyarishpa catin’ nirca.

18. ¿Huauqui Tihomirpish, paipaj familiapish huañushcacuna causarinataj cashcata tucui shunguhuan cringapajca imatataj rurancuna?

¹⁸ Bulgaria llajtapi Tihomir shuti huauquica tranquilo sintiringapajca shamuj punllacunapi bendicioncunata japina yuyaillami causan. Huaquin huatacuna huashamanca paipaj qꞌuipa huauquica shuj accidentepimi huañurca. Paica  Dravko shutimi carca. Tihomirca paipaj huauqui huañushcamantami dimastij llaquilla carca. Pero paipish, paipaj familiapish chai jatun llaquita ahuantangapajca ¿imatataj rurashcacuna? Paicunaca Paraisopi huañushcacuna ima shina causarinata yuyangapajmi esforzarincuna. Tihomirca: “Ñuca familiahuanmi ñuca huauqui causarijpi paita ima shina chasquinata, ima micunata caranata, paita chasquingapaj picunallata invitanata, tucuri punllacunamanta paiman imallata parlanata yuyanchij” nircami. Chaicunapi yuyashcamantami cai huauquipish, paipaj familiapish fuerzasta japishcacuna.

19. ¿Paraisopi causana yuyailla cangapajca imatataj rurana canchij? (Fotomantapish parlapai).

¹⁹ ¿Bendicioncunata chasquina yuyailla causangapajca imatataj rurana cangui? Paraisopi causana esperanzata charishpaca Paraisomanta Bibliapi liyicushpaca chaipi cashcata yuyai (Isaías 25:8; 32:​16-18). Shinallataj ¿Paraisopi yuyacushpaca canpish chaipi cashcatachu yuyangui? ¿Chaipica picunallatataj ricungui? ¿Imallatataj uyangui? ¿Chaipi cashcamantaca ima shinataj sintiringui? Ñucanchij publicacioncunapica Paraisomantaca alaja fotocunami tiyan. Chai fotocunami Paraisopi yuyachun ayudan. Shinallataj video musicalcunata ricushpami animaringui. Por ejemplo, Paraisopi yuyashpami cushicunchij, Ñallami Paraisopi causashun, Paraisopi cashcata yuyashunchij nishca videocunata ricuchunmi animanchij. Paraisopi yuyangapaj tiempota llujchishpaca ‘llaquicunaca ashacamalla apanalla cashcatami’ seguros cashun (2 Corintios 4:17).

20. ¿Shaicushca, llaquilla sintirishpaca fuerzasta japingapajca imatataj rurana canchij?

²⁰ Shaicushca, llaquilla cai horasca Jehovami fuerzasta cunga (Salmo 108:13). Paica ñucanchijta sinchiyachingapajca tucui laya ayudacunatami cun. Chaimantami ñucanchijman mingashcacunata pajtachina sinchi laya ricurijpi, llaquicunata cushilla ahuantangapaj esforzaricushpaca Jehová Dios ayudachun mañana canchij. Bibliatapishmi estudiana canchij. Huauqui panicuna ñucanchijta ayudachunpishmi saquina canchij. Paraisopi yuyanatapish manataj saquinachu canchij. Chaita rurajpimi Yayitu Diosca ‘paipaj jatun poderhuan ñucanchijta sinchiyachinga. Chai jatun podermi ñucanchijtaca pacienciahuan, cushicushpa tucuita ahuantachun ayudanga’ (Colosenses 1:11).