1. Sar o Devel dinđa snaga pe slugenđe ko purano vreme?

 KED e Devleso Lafi vaćeri ando verna manuša, olenđe često phenela pe soj tane but zorale. Ama, čak hem i najzorali osoba na osetinđa pe uvek zorali. Na primer, o kralj David podijekh puti osetinđa pe „zoralo sar planina“, ama ki aver situacija „ukljinđa [le] i dar“ (Ps. 30:7). O Samson hine but zoralo odolese so o Jehova dinđa le po sveti duh. Ama, đanđa so bizo sveti duh, ov ka ovel slabo „sar svako aver manuš“ (Sud. 14:5, 6; 16:17). Akala verna manuša hine zorale samo odolese so o Jehova dinđa len snaga.

2. Sose o apostol Pavle phenđa soj tano hem slabo hem zoralo? (2. Korinćanima 12:9, 10)

² O apostol Pavle priznajinđa so valjani lese snaga ando Jehova. (Čitin 2. Korinćanima 12:9, 10.) Sar but đene amendar, hem o apostol Pavle hine le problemija pe sastipaja (Gal. 4:13, 14). Isto ađahar, hine lese pharo te ćerel odova soj tano ispravno (Rimlj. 7:18, 19). Disavo puti hine zabrinuto hem darandilo so ka ovel oleja (2. Kor. 1:8, 9). Ama, ked hine slabo, ov hine zoralo. Sose? Odolese so o Jehova dinđa le snaga te istrajini ko pharipa.

3. Ko kola pućiba ka dobina odgovor ko akava članko?

³ O Jehova obećini amenđe so ka del amen snaga te istrajina (1. Petr. 5:10). Ama, amen našti te dobina olesi pomoć ako ništa na ćeraja. Sar odova? Aće jekh primer: O vorda šaj te đan jedino ako tano o motori uključimo. Ama, te šaj te đan o vorda, o vozači mora te del gas. Isto ađahar, o Jehova tano spremno te pomožini amenđe. Ama, amen mora te ćera diso te šaj te dobina olesi pomoć. Sar o Jehova zorjaćeri amen? So amen valjani te ćera te šaj te dobina olesi pomoć? O odgovor ko akala pućiba ka  dobina ađahar so ka razmotrina sar o Jehova zorjaćerđa trine manušen kotar Biblija. Odola tane o prorok Jona, i Marija e Isusesi daj hem o apostol Pavle. Isto ađahar, ka dikha sar o Jehova avdije zorjaćeri pe slugen.

4. Sar šaj te dobina snaga kotar Jehova?

⁴ Jekh način sar šaj te dobina snaga kotar Jehova tano prekali molitva. Ov šaj te odgovorini ko amare molitve ađahar so ka del amen „but bari snaga“ (2. Kor. 4:7). Isto ađahar, šaj te dobina snaga ađahar so ka čitina e Devleso Lafi hem hor ka razmislina kotar odova so čitinđam (Ps. 86:11). Šaj te ova sigurna so e Jehovaso lafi isi le „bari moć“ (Jevr. 4:12). Ked molinaja amen e Jehovase hem čitinaja oleso Lafi, amen šaj te ovel amen snaga te istrajina, te aćhova radosna hem te ćera disavo pharo zadatko. Akana ka dikha sar o Jehova dinđa snaga e Jonase.

5. Sose e Jonase valjanđa snaga?

⁵ E Jonase valjanđa snaga. Ov darandilo te đal uduri kuri o Jehova bićhalđa le. Odolese, brodoja đelo ki aver diz. Sebepi odova, ov hem o mornarija harićkase hine ka meren ki jekh bari oluja. Ked o mornarija fordinđe le ko more, nakhavđa le jekh but baro maćho. Odothe sigurno hine but strašno. So mislineja, sar osetinđa pe? Da li mislinđa so ka merel? Da li razmislinđa odolestar so o Jehova aćhavđa le? Ov ćaće but brininđa pe.

6. Premalo Jona 2:1, 2, 7, so dinđa snaga e Jonase đi hine ko maćho?

⁶ So o Jona ćerđa đi hine ko maćho? Ov molinđa pe. (Čitin Jona 2:1, 2, 7.) Iako na šunđa e Jehova, ov pokajinđa pe hem hine uverimo so o Jehova ka šunel olesi ponizno molitva. Isto ađahar, ov pažljivo razmislinđa ando stihija kola đanđa. Sose šaj te phena odova? Ki olesi molitva, koja tani pisimi ko Jona dujto poglavlje, dikhaja so koristinđa but lafija hem izrazija kotar o Psalmija. (Na primer, uporedin Jona 2:2, 5 hem Psalam 69:1; 86:7.) Jasno tano so o Jona šukar đanđa akala stihija hem on uverinđe le so o Jehova ka pomožini le. O Jehova spasinđa le hem kasnije hine spremno te prihvatini o zadatko kova o Devel dinđa le (Jona 2:10–3:4).

7-8. So zorjaćerđa jekhe phrale kotar Tajvan ked hine le kušnje?

⁷ E Jonaso primer šaj but te pomožini amen ked isi amen kušnje. Amaro phral o Džiming b kotar Tajvan, isi le baro problemi pe sastipaja. Uzo odova, olesi porodica but protivini pe lese. Ama, o Jehova zorjaćeri le sose molini pe hem proučini. Ov phenela: „Disavo puti, ked isi man bare problemija odobor hijum uznemirimo so našti te proučinav.“ Ama, ov na odustajini, već oslonini pe upro Jehova. Ov pana phenela: „Najangleder, molinava man e Jehovase. Palo odova, ćhivava me slušalice ko kana hem šunava amare đilja. Podijekh puti, čak tiho đilabava sa đi na smirinava man, a palo odova počminava te proučinav.“

⁸ O lično proučibe dela but bari snaga amare phralese. Na primer, đi oporavinđa pe andi jekh bari operacija, i medicinsko sestra phenđa lese so olesi krvno slika tani but lošno hem so sebepi odova mora te primini transfuzija. So tegani pomožinđa lese te istrajini? I rat angleder te ovel i operacija, ov već čitinđa andi jekh  phen koja hine la isto operacija. Olaki krvno slika hine but pološno nego olesi. Ama, oj na prihvatinđa i transfuzija hem uspinđa te oporavini pe. Akava iskustvo zorjaćerđa amare phrale te aćhol verno.

9. So šaj te ćere ako hijan but zabrinuto sebepi disavo problemi? (Dikh i slika.)

⁹ Da li nekad hijan le previše zabrinuto so našti hine te moline tut? Da li osetinđan tut odobor umorno so našti hine te proučine? Ma bistri so o Jehova savršeno haljola ti situacija. Odolese, čak iako samo kratko molineja tut olese, ov uverimo so ov ka del tut odova so valjani tuće (Ef. 3:20). Ako tano tuće pharo te čitine hem te proučine odolese so hijan nabormo, umorno ili zabrinuto, šaj te šune o audio snimkija kotar Biblija ili disavi publikacija. Isto ađahar, šaj te pomožini tuće ako šuneja amare đilja ili dikheja disavo video ko amaro sajt. O Jehova mangela te del tut snaga. Ov odova ćerela ked molineja tut hem rodeja odgovor ki ti molitva ki Biblija hem ko publikacije kotar amari organizacija.

10. Sar zorjaćerena amen amare phralja hem phenja?

¹⁰ O Jehova šaj te zorjaćeri amen prekalo amare phralja hem phenja. On šaj but te utešinen amen ked isi amen disavo problemi ili ked tano amenđe pharo te ispunina disavo zadatko (Kol. 4:10, 11). Pogotovo valjanena amenđe amala ko „phare dive“ (Posl. 17:17). Ked osetinaja amen so hijam slaba, amare phralja hem phenja šaj te pomožinen amen ko fizičko, emocionalno hem duhovno pogled. Akana ka dikha sar avera zorjaćerđe e Marija, e Isusese daja.

11. Sose e Marijaće valjanđa snaga?

¹¹ E Marijaće valjanđa snaga te ćerel e Jehovasi volja. Šaj samo te zamislina sar osetinđa pe ked o anđeo Gavrilo phenđa laće so ka aćhol khamni, iako na hine ko rom. Oj na hine la iskustvo sar barjarena pe o ćhave, a valjanđa te brinini pe ando ćhavo kova kasnije ka ovel Mesija. Isto ađahar, odolese so niked na hine la seksualna odnosija, sar i Marija ka objasnini pe  verenikose e Josifese, soj tani khamni? (Luka 1:26-33).

12. Premalo Luka 1:39-45, sar i Marija dobinđa snaga koja valjanđa laće?

¹² Sar i Marija dobinđa snaga koja valjanđa laće te ispunini odova neobično hem pharo zadatko? Oj rodinđa pomoć averendar. Na primer, pućlja e Gavrilo te phenel laće pana diso ando olako zadatko (Luka 1:34). Kratko palo odova, putujinđa ki jekh diz, ko „judejska bregija“, te posetini pe rođaka e Jelisaveta. Odija poseta isplatinđa pe laće. I Jelisaveta pohvalinđa e Marija hem o Jehova prekalo po sveti duh podstakninđa la te vaćeri jekh proročanstvo ando Marijako ćhavo, kova pana hine ko olako vođi. (Čitin Luka 1:39-45.) I Marija phenđa so o Jehova pe vasteja ćerđa „moćna delija“ (Luka 1:46-51). Prekalo Gavrilo hem i Jelisaveta, o Jehova zorjaćerđa e Marija.

13. So desinđa pe ked jekh phen andi Bolivija rodinđa pomoć e phralendar hem e phenjendar?

¹³ Sar i Marija, hem tut šaj te zorjaćeren amare phralja hem phenja. Jekh phen kotar Bolivija koja vićini pe Dasuri, valjanđa laće baš odova. Olako dad hine le jekh neizlečivo bolest. Ked hine ki bolnica, oj manglja so pobuter te ovel oleja (1. Tim. 5:4). Ama, odova na hine uvek lokho. I Dasuri phenela: „But putija mislinđum so našti te đav dalje.“ Da li rodinđa nekastar pomoć? Ki početka, na. Oj phenela: „Na mangljum te smetinav e phralenđe hem e phenjenđe. Mislinđum, o Jehova ka del man odova so valjani maje. Ama, haljiljum so ađahar cidinđum man averendar hem pokušinđum kokri te rešinav o problemi“ (Posl. 18:1). I Dasuri odlučinđa te pisini nekobor amalenđe hem te objasnini pi situacija. Oj pana phenela: „Našti lafencar te opisujinav kobor zorjaćerđe man o phralja hem o phenja. On anđe hrana ki bolnica hem čitinđe maje utešna stihija. But tano šukar te đane so na hijan kokri. Amen pripadinaja ki Jehovasi bari porodica koja tani spremno te del tut po vas, te rovel tuvaja hem te borini pe zajedno tuvaja.“

14. Sose valjani te prihvatina i pomoć ando starešine?

¹⁴ Jekh način sar o Jehova zorjaćeri amen tano prekalo starešine. On tane amenđe poklon kova o Jehova koristini te utešini amen hem te zorjaćeri amen (Is. 32:1, 2). Odolese, ked hijan but zabrinuto, vaćer lenđe sar osetineja tut. Ako nudinena tuće pomoć, prihvatin odova olendar. Prekalo lende, o Jehova šaj te zorjaćeri tut.

15. Koja nada isi len sa o hrišćanija?

¹⁵ O obećanja kola isi amen ko Devleso Lafi šaj te den amen nada hem snaga ponodri te služina e Jehovase (Rimlj. 4:3, 18-20). Disave hrišćanija isi len nada so zauvek ka živinen ko nebo, a disave isi len nada so zauvek ka živinen ko raj ki phuv. Sebepi odija nada, amen šaj te istrajina ked isi amen kušnje, te propovedina i šukar vest hem te ćera amare zadatkija ki skupština (1. Sol. 1:3). Odija isto nada zorjaćerđa hem e Pavle.

16. Sose e Pavlese valjanđa snaga?

¹⁶ E Pavlese valjanđa but bari snaga. Ko lil kova pisinđa e hrišćanenđe ko Korint, ov pes uporedinđa jekhe phuvjake ćareja. Ov hine le but bare nevolje. Podijekh puti hine ki „neizvesnost“, hine „progonimo“  hem o problemija „peravđe“ le. Čak oleso životi hine ki opasnost (2. Kor. 4:8-10). Akala lafija o Pavle pisinđa đi hine ko po trito misionarsko putovanje. Ama, tegani na đanđa kola pharipa pana ađićerena le. Kasnije i rulja napadinđa le, doživinđa brodolom, hine astardo hem ćhivdo ko phanlipe.

17. Premali 2. Korinćanima 4:16-18, so zorjaćerđa e Pavle te istrajini ko kušnje?

¹⁷ O Pavle hor razmislinđa andi pi nada hem odova dinđa le snaga te istrajini. (Čitin 2. Korinćanima 4:16-18.) Ov phenđa e hrišćanenđe ko Korint so čak ako oleso fizičko telo „raspadini pe“, ov na ka mukhel odova te obeshrabrini le. Ov razmislinđa andi budućnost. I nebesko nada odobor hine lese važno so hine spremno te istrajini ko bilo kova pharipe te šaj te dobini pi nagrada. Odolese so hor razmislinđa andi pi nebesko nada, ov šaj hine te „obnovini pe ando dive ko dive.“

18. Sar i nada zorjaćerđa e Tihomire hem olese porodica?

¹⁸ Amare phrale, e Tihomire, kotar Bugarska but zorjaćerđa i nada asi budućnost. Angleder nekobor berš, oleso phral, o Zdravko, mulo ko jekh saobraćajno udes. Sebepi odova, o Tihomir but patinđa. Te šaj te istrajini, olesi porodica hem ov razmislinđe sar ka ovel o uskrsenje. Ov phenela: „Vaćerđam odolestar kaj ka resa amen e Zdravkoja, so ka spremina lese te hal, kas ka vićina ko prvo druženje palo oleso uskrsenje hem so ka vaćera lese ando poslednja dive“. O Tihomir phenela so odova so razmislinđa ando uskrsenje, pomožinđa olese hem olese porodicaće te istrajinen đi na avela o vreme ked o Jehova ka uskrsnini olese phrale.

19. So šaj te ćere te šaj te zorjaćere ti nada asi budućnost? (Dikh i slika.)

¹⁹ Sar šaj te zorjaćere ti nada? Ako isi tut nada so zauvek ka živine ki phuv, tegani  čitin o stihija kola vaćerena ando raj hem razmislin olendar (Is. 25:8; 32:16-18). Isto ađahar, razmislin savo ka ovel o životi ko nevo sveto. Zamislin so već hijan ko raj. Kas dikheja? Kola zvukija šuneja? Sar osetineja tut? Ako mangeja te zamisline sar ka ovel ko raj, dikh o slike ko amare publikacije ja dikh o muzička spotija sar soj tane: U novom svetu tom, Samo što nije hem Zamisli dan. Ako redovno odvojinaja vreme te razmislina odolestar sar ka ovel amenđe ko raj, tegani amare problemija ka oven „trenutna hem lokhe“ (2. Kor. 4:17). I nada koja o Jehova dela amen šaj te zorjaćeri amen te istrajina ko pharipa.

20. Sar šaj te dobina snaga čak ked hijam slaba?

²⁰ Čak hem ked osetinaja amen so hijam slaba, „o Devel ka del amen snaga“ (Ps. 108:13). O Jehova već dinđa amen but buća kola pomožinena amen te ova zorale. Odolese, ked valjani amenđe pomoć te ispunina disavo pharo zadatko, te istrajina ki kušnja ja te aćhova radosna, amen valjani te molina amen e Jehovase hem te proučina oleso Lafi. Isto ađahar, valjani te dozvolina e phralenđe hem e phenjenđe te ohrabrinen amen. But tano važno te odvojina vreme te razmislina andi nada ki budućnost. Ako sa akava ćeraja, o Jehova obećini so ka zorjaćeri amen prekali „pi slavno moć hem ka del amen snaga koja valjani amenđe te šaj strpljivo hem radosno te istrajina ko sa“ (Kol. 1:11).