1. Gurhi Nnâmahanga ahîremwo abakozi bage bishwekerezi emisi omu mango ga mîra?

 AKANWA KA NNÂMAHANGA kanaganirire kanji-kanji abalume bishwekerezi nka bantu ba misi. Cikone, ciru n’ow’emisi bwenene egarhi kabo arhali ensiku zoshi zo aciyumvirhe agwerhe emisi. Kwa lwiganyo, hali amango Mwami Daudi aciyumvirhe ‘azibuhire,’ cikone agandi mango aciyumva ‘ayobohire.’ (Enna. 30:7, Mashi Bible) Ciru akaba Samusoni al’igwerhe emisi yago-yago amango akag’ilongozibwa n’iroho lya Nnâmahanga, ayemire n’obwalagale oku buzira eyo misi kurhenga emwa Nnâmahanga, ‘akabire muzamba ayorhe nk’abandi bantu.’ (Bac. 14:5, 6; 16:17) Abo balume bishwekerezi bali ba misi bulya Yehova akag’ibaha yo.

2. Bici byarhumaga Paolo aderha oku amango ali muzamba go mango akag’iba agwerhe emisi? (2 Abakorinti 12:9, 10)

² Paolo al’iyemire n’obwalagale oku naye al’ilagirire oku misi kurhenga emwa Yehova. (Osome 2 Abakorinti 12:9, 10.) Paolo akag’ilwisa amazibu g’endwala aka banji ba muli rhwe. (Gl. 4:13, 14) Kandi, hali amango kwali kuzibu kuli ye okujira ebintu binja. (Rm. 7:18, 19) Na kandi hali amango akag’iciyumva ayobohire lugenda ebyakamuhikire. (2 Kr. 1:8, 9) Ciru akaba ntyo, amango Paolo ali muzamba, go mango akag’iba agwerhe emisi. Omu njira nci? Yehova akag’imuha emisi al’ilagirireko. Akag’imuzibuhya.

3. Madoso gahi rhwashuzako mw’eci cigabi?

³ Yehova alaganyize oku nirhu arhuzibuhya. (1 Pt. 5:10) Cikone rhurhakalangalira oku rhwahâbwa eyo misi buzira kujira bushiru boshi-boshi. Kwa lwiganyo, omoteri gwanaha omutuga emisi lyo gugenda. Cikone shoferi agwasirwe alabarhe ebitenzi lyo guja ngasi hoshi gugwasirwe okuja. Ko n’oko, Yehova aba mubidu  okurhuha emisi rhulagirireko, cikone rhugwasirwe rhujire bintu bilebe ly’arhuha yo. Bici Yehova ahizireho ly’arhuzibuhya? Na bici rhushinganine rhujire lyo rhuhâbwa eyo misi? Rhwabona amashuzo g’ago madoso omu kuganirira gurhi Yehova azibuhizemwo bantu basharhu baganirirwe omu Bibliya; ko kuderha omulebi Yona, Mariya nnina wa Yezu, n’entumwa Paolo. Kandi rhwabona gurhi Yehova agendekire azibuhya abakozi bage ba muli gano mango omu njira ziri nk’ezo.

4. Gurhi rhwakahâbwamwo emisi kurhenga emwa Yehova?

⁴ Njira nguma rhwakahâbwamwo emisi kurhenga emwa Yehova kuli kukamuyegera kugerera isala. Lyo Yehova ashuza amasala girhu, anarhuha “obuhashe bunene . . . burhali bwirhu.” (2 Kr. 4:7, Mashi Bible) Kandi rhwanahâbwa emisi omu kusoma Akanwa kage n’okukarhanyako bwenene. (Enna. 86:11) Omwanzi gwa Yehova kuli rhwe guli omu Bibliya ‘gurhagaluka kwone.’ (Hb. 4:12, Mashi Bible) Omu kuyegera Yehova kugerera isala n’okusoma Akanwa kage, wanahâbwa emisi olagirireko ly’olembera, ly’ogendekera waba n’omwishingo, erhi ly’ohikiriza omukolo muzibu. Rhuganirire gurhi Yehova azibuhizemwo omulebi Yona.

5. Bulya gurhi omulebi Yona al’ilagirire oku misi?

⁵ Omulebi Yona al’ilagirire oku misi. Ali amayaka omukolo muzibu Yehova amuhûnaga ajire. Oko kwarhuma alinz’iheza obuzine bwage omu mulaba mudarhi ahira n’obuzine bw’abali mw’obo bwarho omu mazibu. Erhi bamukweba omu nyanja acirhimana ali ahantu arhalisag’ihika bundi; omu nda y’ensamaki nnenene. Gurhi orhanyize Yona aciyumvirhe? K’arhanyize oku afîra omo? K’arhanyize oku Yehova amukabulire? Yona agwasirwe abe aciyumvirhe ahangayisire bwenene.

6. Kushimbana n’olwandiko lwa Yona 2:1, 2, 7, bici byahîre Yona emisi amango ali omu nda y’ensamaki?

⁶ Gurhi Yona ajijire ly’ahâbwa emisi amango ali yene omu nda y’ensamaki? Ayegera Yehova kugerera isala. (Osome Yona 2:1, 2, 7.) Ciru akaba Yona abuzire burhumikira Yehova, al’iyemire n’obwalagale oku Yehova ayumvirhiza er’isala lyage ly’obwirhohye na lya kuciyunjuza. Kandi Yona arhanya bwenene oku Mandiko ali asomire embere z’aho. Bulya gurhi rhudesire ntyo? Omu isala lyage liri omu Yona cigabi ca 2, akolesize nderho nyinji ziri omu citabu c’Ennanga. (Kwa lwiganyo, oshushanye Yona 2:2, 5 n’Ennanga 69:1; 86:7.) Bibonekine n’obwalagale oku Yona al’imanyire ago mandiko bwinja. N’omu kugarhanyako bwenene omu mango ali omu mazibu, ayemera n’obwalagale oku Yehova akamurhabire. Buzinda, Yona agalulwa ebulambo, anaba mubidu okuyemera ogundi mukolo ahâbagwa n’okuguhikiriza.—Yon. 2:10–3:4.

7-8. Gurhi mwene wirhu muguma w’omu Taïwan ahâbirwemwo emisi omu mazibu gage?

⁷ Olwiganyo lwa Yona lwanarhurhabala amango rhuli rhwalwisa amazibu ga ngasi lubero. Kwa lwiganyo, mwene wirhu muguma w’omu Taïwan ohamagalwa Zhiming, b ajira amazibu madarhi g’obulwala. Kandi, analembere okuhagalikwa bwenene n’abantu b’omulala enyanya z’obuyemere bwage muli Yehova. Anahâbwe emisi kurhenga emwa Yehova kugerera isala n’ifunzo. Adesire ntya: “Mango maguma na maguma, erhi amazibu gampikira nanciyumve mpangayisire bwenene, n’oko kunarhume nabula burhulirira lyo njira ifunzo lyani niene.” Cikone, analangalire oburhabale kurhenga emwa Yehova. Adesire ntya: “Burhangiriza, nanyegere Yehova kugerera isala. Enyuma z’aho, nampire e ekutere zani omu marhwiri n’okuyumvirhiza enyimbo zirhu z’obwami. Ciru hali amango  nziyimba omw’izu lisungunu kuhika ntulirire. Buzinda, nantondere okuyiga.”

⁸ Omu kujira ifunzo lyage yene, Zhiming ahâbirwe emisi omu njira arhal’irhanyizeko. Kwa lwiganyo, mango maguma erhi aba akola ali afuma enyuma z’okuberwa obulwala budarhi, munganga amubwira oku bulya eglobile ndukula zapungusire omu mubiri gwage, al’ishinganine ahirwemw’omuko. Omu budufu bw’embere z’okuberwa kwage, Zhiming asoma lugenda mwali wirhu waberagwa obulwala bo n’obo. Eglobile ndukula z’oyo mwali wirhu zal’ipungusire bwenene kulusha ezage; ciru akaba ntyo, oyo mwali wirhu arhayemeraga okuhirwamw’omuko ananafuma. Olo lwiganyo lwaha Zhiming emisi y’okubêra mwishwekerezi.

9. Erhi akaba mazibu malebe gakuzambanyize, gurhi wakajira? (Olole n’enfoto.)

⁹ Amango oli walwisa amazibu, k’onaciyumve ohangayisire bwenene kuhika oyabirwe okubwira Yehova oku oli waciyumva? Erhi k’onaciyumve orhagwerhi misi y’okujira ifunzo? Okakengera oku Yehova ahugûsirwe bwinja akanga kawe. Co cirhumire ciru wakajira isala lyofofi, wanayemera n’obwalagale oku kobinali akuha ebi olagirireko. (Ef. 3:20) Erhi akaba amalumwa gawe g’omubiri erhi g’ekandalala garhumire kwaba kuzibu kuli we okusoma n’okuyiga, nkaba wanayumvirhiza e arejistrema y’obusomi bw’Ebibliya erhi y’ebicapo biyimangire oku Bibliya. Kandi nkaba okuyumvirhiza lwimbo luguma lw’omu nyimbo zirhu erhi okulaba evideo y’oku jw.org kwanakurhabala. Yehova aba alonzize akuzibuhye ananajira ntyo erhi wakamuyegera kugerera isala n’okulonza amashuzo oku masala gawe omu Bibliya n’omu bindi bintu byoshi arhuhirireho.

10. Gurhi bene wirhu na bali birhu Bakristu barhuzibuhyamwo?

¹⁰ Yehova anakolesa bene wirhu na bali birhu Bakristu lyo barhuzibuhya. Banaba ‘burhulirize bwirhu’ amango rhuli rhwalwisa mazibu malebe erhi amango rhuli rhwabona nka kuli kuzibu okuhikiriza mukolo mulebe. (Kl. 4:10, 11) Bwenene amango rhuli omu “mbaka” lyo rhuba rhulagirire oku bîra. (Mig. 17:17) Amango rhuli rhwaciyumva rhuli bazamba, bene wirhu na bali birhu banarhurhabala omu hali y’omubiri, y’ekandalala, n’ey’ekiroho. Rhuganirire gurhi  Mariya nnina wa Yezu ahâbagwamwo emisi kugerera abandi.

11. Bulya gurhi Mariya al’ilagirire oku misi?

¹¹ Mariya al’ilagirire oku misi. Orhanye gurhi aciyumvirhe azidohirwe erhi malahika Gabriyeli amuha omukolo muzirho. Arhal’iciheruka; cikone al’igwasirwe abe izimi. Arhal’igwerhe bumanye omu kulera abana, cikone al’igwasirwe ashibirire omwana-rhabana wakabire Masiya. Na bulya arhalisag’ibonana n’omulume yeshi-yeshi, gurhi akahugûliremwo Yozefu wakag’imusheba ebyo byoshi?—Lk. 1:26-33.

12. Kushimbana na Luka 1:39-45, Mashi Bible, gurhi Mariya ahâbirwemwo emisi al’ilagirireko?

¹² Gurhi Mariya ahâbirwemwo emisi al’ilagirireko ly’ahikiriza ogo mukolo muzirho na gwago-gwago? Ahûnyire abandi oburhabale. Kwa lwiganyo, ahûnyire malahika Gabriyeli amuhugûlire binji lugenda ogo mukolo ahâbagwa. (Lk. 1:34) Kasanzi kasungunu enyuma z’aho, abalamira omu ‘cishagala [lugo] ciguma cali omu ntondo’ z’e Yuda ly’alambagirira Elizabeti, muntu w’omu mulala gwage. Ogo mubalamo gwamulerhera obunguke. Elizabeti avuga Mariya omunkwa analongozibwa n’iroho litagatifu lya Yehova ly’aganirira bulebi bulebe bw’okuhâna omurhima lugenda oyo mugala wa Mariya wali omu nda. (Osome Luka 1:39-45, Mashi Bible.) Mariya aderha oku Yehova “ajijire emikolo y’obuhashe n’emisi y’okuboko kwage.” (Lk. 1:46-51, Mashi Bible) Yehova ahîre Mariya emisi kugerera Gabriyeli na Elizabeti.

13. Gurhi mwali wirhu muguma w’omu Bolivie ahembirwemwo omu kuhûna bene wabo na bali babo oburhabale?

¹³ Aka Mariya, nawe wanahâbwa emisi kugerera bene winyu na bali binyu. Mwali wirhu muguma w’omu Bolivie ohamagalwa Dasuri, al’ilagirire oku misi ya ntyo. Erhi ishe alwala endwala ndarhi erhajira bufumu n’okuja omu hopitali, Dasuri ayemera buzira kusezibwa omukolo gw’okumushibirira. (1 Tm. 5:4) Arhali ensiku zoshi ogo mukolo gwali mulembu. Adesire ntya: “Kanji-kanji nakag’iciyumva nka ntakacihasha okugendekera.” K’ahûnyire oburhabale? Oku murhondero arhahûnaga abandi oburhabale. Adesire ntya: “Ntal’ilonzize okurhindibuza bene wirhu. Nakag’irhanya ntya, ‘Yehova ye wampa oburhabale ndagirireko.’ Cikone buzinda nabona oku omu kuciyegula oku bandi, nakag’iba ndi nalonza okubarhula amazibu gani niene.” (Mig. 18:1) Dasuri ahiga okuyandikira bîra bage balebe n’okubahugûlira akanga alimwo. Adesire ntya: “Ntamanyiri gurhi nakaderha lyo mpugûla kunganaci bene wirhu na bali birhu Bakristu banzibuhize. Bakag’inderhera ebiryo oku hopitali n’okuganirira amandiko g’Ebibliya g’okurhuliriza haguma na nani. Rhunaciyumve bwinja bwenene omu kumanya oku rhurhali rhwene. Rhuba cigabi c’omulala munene gwa Yehova; mulala guba mubidu okurhurhabala, okulaka haguma na nirhu, n’okulwa entambala haguma na nirhu.”

14. Bulya gurhi rhushinganine rhuyemere oburhabale bw’abagula?

¹⁴ Eyindi njira Yehova arhuhamwo emisi kuba kugerera abagula. Baba ngalo Yehova akolesa ly’arhuzibuhya n’okurhurhuliriza. (Iz. 32:1, 2) Co cirhumire erhi wakaciyumva ohangayisire, obwire abagula ebikuhangayisize. Erhi bakakuha oburhabale, obuyemere n’omwishingo. Kugerera bo, Yehova anakuzibuhya.

15. Bulangalire buhi Abakristu boshi bashagalukira?

¹⁵ Obulangalire bwirhu buyimangire oku Bibliya bwanarhuha misi minji. (Rm. 4:3, 18-20) Rhuli Bakristu, rhugwerhe obulangalire bwinja bwenene bw’okulama ensiku n’amango; baguma bayish’ilama omu paradizo yayish’igalulwa hanw’igulu n’abandi omu Bwami bw’empingu. Obulangalire bwirhu bunarhuhe emisi y’okulembera amazibu, okuhubiri omwanzi mwinja  n’okuhikiriza emikolo eri lubero omu cigamba. (1 Ts. 1:3) Obo bulangalire bo n’obo bwahîre entumwa Paolo emisi.

16. Bulya gurhi Paolo al’ilagirire oku misi?

¹⁶ Paolo al’ilagirire oku misi. Omu maruba gage ayandikiraga Abakorinti, acishushanyize n’ecombo cizamba c’ibumba. Abwine “amalibuko ga ngasi lubero,” ‘alimw’entanya,’ ‘akag’ilibuzibwa,’ ‘banamurhibulire okw’idaho.’ Ciru hali n’amango akalamo kage kali omu mazibu. (2 Kr. 4:8-10, Mashi Bible) Paolo ayandikaga ezo nderho amango g’omubalamo gwage gwa kasharhu gw’obumisiyonere. Enyuma z’okuyandika ezo nderho, alwisize akandi kanga kazibu kulusha. Ecigusho c’abantu camujirire n’obuminya, ashwesirwe, ebato alimwo yazika, ciru anakwebwa omu prizo.

17. Kushimbana na 2 Abakorinti 4:16-18, Mashi Bible, bici byahîre Paolo emisi ly’alembera amazibu gage?

¹⁷ Paolo abire n’emisi y’okulembera omu kusegeza obwenge oku bulangalire bwage. (Osome 2 Abakorinti 4:16-18, Mashi Bible.) Abwizire Abakorinti oku ciru omubiri gwage gw’obunyanyama gwakaja “gwasherera bunyi bunyi,” arhakalesire oko kumuvune omurhima. Paolo al’isegize obwenge oku mango gayisha. Obulangalire bwage bw’obuzine bw’ensiku n’amango omu mpingu bwali bw’“irenge linene” omu kubushushanya n’amalibuko goshi-goshi gamuhikire. Paolo akag’irhanya bwenene kw’obo bulangalire, n’oko kwarhuma ‘azibuha buca buyira.’

18. Gurhi obulangalire bwazibuhizemwo Tihomir n’omulala gwage?

¹⁸ Obulangalire bwahîre mwene wirhu muguma w’omu Bulgarie, ohamagalwa Tihomir emisi. Omu myaka misungunu egezire, mulumuna wage wakag’ihamagalwa Zdravko, afâ omu aksida. Enyanya z’oko, Tihomir ababala bwenene omu kasanzi kalebe enyuma z’aho. Lyo balembera, ye n’omulala gwabo bakabona omu bwenge bwabo oku obufûke bwayish’iyorha. Ahugwîre ntya: “Kwa lwiganyo, rhwakaganirira ngahi rhwayish’irhimanana na Zdravko, biryo bici rhwayish’imurheganyiza, ba ndi rhwayish’ilalika okw’idinye lirhangiriza rhwanajire hano afûka, n’ebi rhwayish’imubwira lugenda ensiku nzinda.” Tihomir adesire oku okusegeza obwenge  oku bulangalire bw’obufûke kwazibuhya omulala gwabo lyo bagendekera balembera n’okulinda kuhika amango Yehova afûla mulumuna wage.

19. Gurhi wakajira ly’ozibuhya obulangalire bwawe? (Olole n’enfoto.)

¹⁹ Gurhi wakazibuhyamwo obulangalire bwawe? Kwa lwiganyo, erhi akaba ogwerhe obulangalire bw’okulama omu paradizo hanw’igulu, okasoma ebi Ebibliya ehugwîre lugenda Eparadizo n’okubirhanyako. (Iz. 25:8; 32:16-18) Okarhanya lugenda gurhi akalamo kayish’iba omw’igulu lihyahya. Okacibona olimwo. Ndi obwinemwo? Mazu gahi oli wayumva? Gurhi oli waciyumva? Ly’obona bwinja omu bwenge gurhi eparadizo yayish’iyorha, olole oku nfoto eri omu bicapo birhu eyerekine Eparadizo erhi olole video ndebe y’omuziki; kwa lwiganyo, evideo edesire Dunia Mupya Yenye Kuja, Iko Karibu Sana, erhi Orhanye oku Mango Gayisha. Erhi ngasi mango rhwakakaciha akasanzi k’okurhanya oku bulangalire bwirhu, amalibuko girhu ganaba “masungunu [na] ga kasanzi kasungunu.” (2 Kr. 4:17, Mashi Bible) Yehova akuzibuhya kugerera obulangalire akuhîre.

20. Ciru n’amango rhuli rhwaciyumva rhuli bazamba, gurhi rhwakabamwo n’emisi?

²⁰ Ciru n’amango rhuli rhwaciyumva rhuli bazamba, bulya “Nnâmahanga ali olunda lwirhu rhwahima.” (Enna. 108:13, Mashi Bible) Yehova ahizireho ebi olagirireko byoshi ly’ohâbwa emisi kurhenga emwage. Co cirhumire, erhi wakaba olagirire oku burhabale ly’ohikiriza mukolo mulebe, ly’olembera amazibu, erhi ly’ogendekera waba n’omwishingo, okayegera Yehova kugerera isala ly’obushiru n’okulonza obulongozi bwage kugerera ifunzo lyawe wene. Okayemera okuhâbwa omurhima kugerera bene winyu na bali binyu Bakristu. Ngasi mango okaciha akasanzi k’okurhanya oku bulangalire bwawe bw’amango gayisha. Erhi wakajira ntyo, ‘obuhashe bw’irenge [lya Nnâmahanga] bwakuzibuhya, ohash’ilembera amalibuko goshi n’oburhwali.’—Kl. 1:11.