1. Oinsá mak Maromak nia atan sira iha tempu uluk hetan kbiit?

 BÍBLIA sempre temi kona-ba mane fiar-naʼin sira nuʼudar ema neʼebé iha kbiit. Maski sira iha kbiit, neʼe la dehan katak sira sempre sente hanesan neʼe. Porezemplu, dala ruma Liurai David sente katak nia mak “metin hanesan foho ida”, maibé iha situasaun balu, nia “sai taʼuk loos”. (Sal 30:7) Maromak nia espíritu fó kbiit neʼebé boot tebes ba Sansão, no Sansão hatene katak se Maromak la fó kbiit ba nia, nia “sei sai fraku no sai hanesan ema baibain”. (Juís 14:​5, 6; 16:17) Mane fiar-naʼin sira-neʼe bele iha kbiit tanba Jeová mak fó ida-neʼe ba sira.

2. Tanbasá apóstolu Paulo dehan katak nia fraku no mós iha kbiit? (2 Korinto 12:​9, 10)

² Apóstolu Paulo hatete katak nia mós presiza kbiit husi Jeová. (Lee 2 Korinto 12:​9, 10.) Hanesan ita barak, Paulo mós hasoru problema saúde. (Gal 4:​13, 14) Dala ruma nia sente susar atu halo buat neʼebé loos. (Rom 7:​18, 19) No dala ruma nia sente laran-taridu no taʼuk kona-ba buat ruma neʼebé sei akontese ba nia. (2 Kor 1:​8, 9) Maibé bainhira Paulo sai fraku, nia iha kbiit. Oinsá? Jeová fó ba Paulo kbiit neʼebé nia presiza atu tahan hasoru susar sira.

3. Iha lisaun neʼe, ita sei buka resposta ba pergunta saida deʼit?

³ Jeová mós promete atu fó kbiit mai ita. (1 Ped 5:10) Maibé ita mós presiza hakaʼas an atu halo buat ruma hodi bele simu kbiit neʼe. Porezemplu, mákina bele fó kbiit ba karreta atu halai. Maibé se xofér la sama gas, karreta sei  la muda ba fatin ida. Hanesan neʼe mós, Jeová prontu atu fó ita kbiit neʼebé ita presiza, maibé ita mós presiza halo hakat balu atu bele simu kbiit neʼe. Jeová fó ona saida atu ita bele iha kbiit? No saida mak ita presiza halo atu simu kbiit neʼe? Ita sei haree hamutuk resposta ba pergunta sira-neʼe hodi aprende kona-ba oinsá Jeová fó kbiit ba profeta Jonas, Jesus nia inan Maria, no apóstolu Paulo. Ita mós sei haree oinsá Jeová kontinua fó kbiit ba ninia atan sira ohin loron hanesan buat neʼebé nia halo uluk.

4. Oinsá ita bele hetan kbiit husi Jeová?

⁴ Dalan ida atu simu kbiit husi Jeová mak liuhusi orasaun. Jeová sei hatán ba ita-nia orasaun hodi fó ita “kbiit neʼebé la hanesan baibain”. (2 Kor 4:7) Ita mós bele hetan kbiit bainhira ita lee Bíblia no hanoin kleʼan kona-ba neʼe. (Sal 86:11) Jeová nia liafuan iha Bíblia mak “kbiit boot”. (Ebr 4:12) Bainhira Ita halo orasaun ba Jeová no lee Bíblia, Ita sei simu kbiit neʼebé Ita presiza atu tahan susar, mantein Ita-nia ksolok, no kumpre knaar neʼebé susar. Mai ita haree oinsá Jeová fó kbiit ba profeta Jonas.

5. Tanbasá profeta Jonas presiza hetan kbiit?

⁵ Profeta Jonas presiza hetan kbiit. Nia saʼe ró no halai husi knaar neʼebé Jeová fó ba nia. Rezultadu mak nia no ema seluk neʼebé iha ró laran besik atu mate tanba anin-boot no halo ró besik atu mout. Ema soe nia ba tasi laran no ikan boot tolan tiha nia. Nia iha ikan nia kabun, fatin neʼebé nakukun tebes. Tuir Ita-nia hanoin, Jonas sente oinsá? Karik nia hanoin nia sei mate. No karik nia sente katak Jeová la simu ona nia. Jonas laran-taridu tebes.

6. Tuir Jonas 2:​1, 2, 7, saida mak Jonas halo atu simu kbiit kuandu nia iha ikan nia kabun?

⁶ Saida mak Jonas halo atu simu kbiit kuandu nia mesak iha ikan nia kabun? Nia halo orasaun. (Lee Jonas 2:​1, 2, 7.) Maski Jonas la halo tuir Jeová, maibé nia arrepende an no fiar metin katak Jeová sei rona ba ninia orasaun. Jonas mós hanoin fali kona-ba Eskritura sira. Ita hatene ida-neʼe tanba iha ninia orasaun neʼebé hakerek iha Jonas kapítulu 2, nia uza liafuan barak neʼebé foti husi livru Salmo. (Porezemplu, kompara Jonas 2:​2, 5 ho Salmo 69:1; 86:7.) Klaru katak Jonas hatene didiʼak eskritura sira-neʼe. No hodi hanoin kleʼan eskritura sira-neʼe, nia bele fiar metin katak Jeová sei ajuda nia. Ikusmai, ikan muta sai Jonas ba rai maran, no ikusmai nia prontu atu simu knaar no kumpre knaar neʼe.—Jonas 2:10–3:4.

7-8. Oinsá mak irmaun ida iha rai-Taiwán hetan kbiit durante ninia susar?

⁷ Jonas nia ezemplu bele ajuda ita bainhira hasoru susar oioin. Porezemplu, irmaun ida naran Zhiming b husi rai-Taiwán, hasoru problema saúde. Ninia família mós kontra makaʼas nia tanba ninia fiar ba Jeová. Nia simu kbiit husi Jeová liuhusi orasaun no estuda. Nia hatete: “Dala ruma, bainhira problema mosu, haʼu sente laran-taridu toʼo haʼu labele sai kalma atu bele estuda mesak.” Maibé nia la rende an, nia hatete: “Haʼu halo orasaun ba Jeová, no tuirmai haʼu uza headset no rona ba knananuk husi  organizasaun. Dala ruma, haʼu mós kanta ho lian neineik toʼo haʼu sente kalma. Tuirmai haʼu komesa estuda.”

⁸ Zhiming hetan kbiit atu tahan hasoru situasaun susar liuhusi buat neʼebé nia aprende kuandu estuda mesak. Porezemplu, nuʼudar nia sai diʼak husi operasaun boot ida, enfermeira dehan katak ninia glóbulu mean menus, tan neʼe nia presiza simu transfuzaun raan. Iha kalan antes operasaun boot neʼe, Zhiming lee ona kona-ba esperiénsia husi irmán ida neʼebé hetan operasaun neʼebé hanesan. Irmán neʼe nia glóbulu mean menus liu fali ninian, maibé irmán neʼe la simu transfuzaun raan no nia bele sai diʼak fali. Esperiénsia neʼe hametin duni Zhiming atu kontinua laran-metin.

9. Ita bele halo saida se Ita sente laran-susar? (Haree mós dezeñu.)

⁹ Durante tempu susar, Ita sente laran-kraik toʼo susar atu halo orasaun ka lae? Dala ruma Ita sente la iha kbiit atu estuda ka lae? Hanoin-hetan, Jeová komprende didiʼak Ita-nia situasaun. Tan neʼe, maski Ita halo orasaun neʼebé simples, Ita bele fiar katak nia sei fó Ita buat neʼebé Ita presiza. (Éf 3:20) Se Ita sente susar atu lee no estuda Bíblia tanba moras, kole, ka sente laran-susar, Ita bele rona ba gravasaun áudio husi Bíblia ka ita-nia publikasaun sira. Ita mós bele rona ba knananuk sira ka nonton vídeo iha jw.org. Hodi halo orasaun ba Jeová no buka resposta ba Ita-nia orasaun iha Bíblia no publikasaun sira, Jeová sei ajuda Ita atu iha fali kbiit.

10. Oinsá irmaun-irmán sira hametin ita?

¹⁰ Jeová bele uza irmaun-irmán sira atu hametin ita. Sira bele sai hanesan “ajuda-naʼin neʼebé fó kmaan” kuandu ita hasoru problema ka sente susar atu kumpre knaar ruma. (Kol 4:​10, 11) Ita presiza duni belun durante “tempu susar”. (Prov 17:17) Bainhira ita sente fraku, irmaun-irmán sira bele ajuda ita iha dalan fíziku, emosaun, no espirituál.  Haree toʼok oinsá Jesus nia inan Maria hetan kbiit husi ema seluk.

11. Tanbasá Maria presiza hetan kbiit?

¹¹ Maria presiza hetan kbiit. Karik nia hanoin barak kuandu nia simu knaar importante husi anju Gabriel. Nia seidauk kaben, maski nuneʼe nia sei sai isin-rua. Nia seidauk iha esperiénsia atu haboot oan rasik, maibé nia presiza tau matan ba bebé neʼebé sei sai Mesias. Maria seidauk halo relasaun seksuál ho mane ida, maibé nia presiza fó-hatene José katak nia isin-rua. Ita bele fiar katak susar ba Maria atu esplika ida-neʼe ba José.—Lc 1:​26-33.

12. Tuir Lucas 1:​39-45, oinsá mak Maria simu kbiit neʼebé nia presiza?

¹² Oinsá mak Maria simu kbiit neʼebé nia presiza atu kumpre ninia knaar importante neʼe? Nia buka ajuda. Porezemplu, nia husu ba anju Gabriel atu esplika liután kona-ba knaar neʼe. (Lc 1:34) Lakleur depois neʼe, nia halo viajen ba “área foho nian iha Judá” atu vizita ninia família Isabel. Vizita neʼe ajuda tebes nia. Isabel gaba Maria, no Jeová dirije Isabel atu fó sai profesia neʼebé anima Maria kona-ba bebé neʼebé sei moris-mai. (Lee Lucas 1:​39-45.) Maria dehan katak Jeová “halo ona buat boot sira ho ninia liman rasik”. (Lc 1:​46-51) Jeová hametin Maria liuhusi Isabel no anju Gabriel.

13. Irmán Dasuri hetan rezultadu saida bainhira buka ajuda husi irmaun-irmán sira?

¹³ Hanesan Maria, Ita mós bele hetan kbiit liuhusi irmaun-irmán sira. Irmán Dasuri husi rai-Bolívia presiza simu kbiit hanesan neʼe. Bainhira ninia apá kona moras neʼebé labele kura no tama ospitál, Dasuri prontu atu tau matan ba nia. (1 Tim 5:4) Dala ruma, neʼe la fasil, nia hatete: “Dala barak haʼu sente atu rende an deʼit.” Nia husu ajuda ka lae? Foufoun lae, nia hatete: “Haʼu lakohi fó todan ba irmaun-irmán sira. Haʼu hanoin: ‘Jeová mak sei fó ajuda neʼebé haʼu presiza.’ Maibé tuirmai haʼu rekoñese katak se haʼu haketak an husi ema seluk, neʼe hanesan haʼu koko rezolve haʼu-nia problema mesak deʼit.” (Prov 18:1) Dasuri deside atu hakerek karta ba ninia belun balu atu esplika kona-ba ninia situasaun. Nia hatete: “Irmaun-irmán sira hametin tebes haʼu. Sira lori ai-han ba ospitál no fahe eskritura neʼebé fó kmaan tebes. Haʼu agradese tebes tanba hatene katak haʼu la mesak. Haʼu mak parte ba Jeová nia família boot. Irmaun-irmán sira prontu atu ajuda haʼu, tanis hamutuk ho haʼu, no anima haʼu atu kontinua serbí Jeová hamutuk sira.”

14. Tanbasá ita presiza simu ajuda husi katuas sira?

¹⁴ Jeová mós fó kbiit mai ita liuhusi katuas kongregasaun. Sira hanesan prezente neʼebé nia uza atu fó kbiit no kmaan mai ita. (Isa 32:​1, 2) Tan neʼe, bainhira Ita sente laran-taridu, fó sai ida-neʼe ba katuas sira. Kuandu sira fó ajuda ba Ita, keta dada an atu simu ida-neʼe. Liuhusi sira, Jeová bele halo Ita hetan kbiit.

15. Ema Kristaun hotu hafolin esperansa saida?

¹⁵ Esperansa husi Bíblia bele fó ita kbiit. (Rom 4:​3, 18-20) Nuʼudar ema Kristaun, ita iha esperansa atu moris ba nafatin iha mundu paraízu ka iha lalehan. Esperansa neʼe hametin ita atu tahan hasoru susar sira, haklaken liafuan  diʼak, no halaʼo knaar oioin iha kongregasaun. (1 Tes 1:3) Esperansa neʼe mós hametin apóstolu Paulo.

16. Tanbasá apóstolu Paulo presiza hetan kbiit?

¹⁶ Paulo presiza hetan kbiit. Iha ninia karta ba ema Kristaun iha Korinto, nia kompara ninia an hanesan sanan-rai neʼebé fraku. Nia hetan “terus makaʼas oioin husi sorin-sorin”, “la hatene atu halo saida”, “ema fó-terus”, no ‘ema soe nia ba rai’. Dala ruma ninia moris mós iha perigu laran. (2 Kor 4:​8-10) Paulo hakerek liafuan sira-neʼe durante ninia viajen terseiru nuʼudar misionáriu. Karik iha tempu neʼebá nia la hatene katak nia sei hasoru tan susar seluk, hanesan violénsia, ema kaer nia, ró mout, no tama komarka.

17. Tuir 2 Korinto 4:​16-18, saida mak ajuda Paulo atu tahan hasoru susar sira?

¹⁷ Paulo simu kbiit atu tahan susar sira hodi fokus ba ninia esperansa. (Lee 2 Korinto 4:​16-18.) Nia hatete ba ema Kristaun iha Korinto katak maski ninia isin sai “fraku daudaun”, nia sei la husik ida-neʼe atu halo nia laran-kraik. Paulo fokus ba ninia futuru. Ninia esperansa atu moris ba nafatin iha lalehan mak folin-boot liu fali susar neʼebé nia hasoru. Paulo hanoin kleʼan kona-ba ninia esperansa, no rezultadu mak nia simu kbiit foun “loron ba loron”.

18. Oinsá mak esperansa hametin Tihomir no ninia família?

¹⁸ Irmaun ida naran Tihomir husi rai-Bulgária, simu kbiit liuhusi ninia esperansa. Tinan balu liubá, ninia alin-mane Zdravko mate tanba asidente. Tan neʼe, ba tempu kleur Tihomir sente triste tebes. Atu tahan ida-neʼe, nia no ninia família imajina kona-ba moris-hiʼas iha futuru. Nia dehan: “Ami koʼalia hamutuk kona-ba ami sei hasoru Zdravko iha neʼebé. Ami sei prepara ai-han saida ba nia. Ami sei konvida sé kuandu halo festa primeiru ho nia. No ami sei hatete saida  ba nia kona-ba loron ikus sira.” Tihomir esplika katak hodi fokus ba sira-nia esperansa, neʼe hametin tebes ninia família tomak atu tahan no kontinua hein ba tempu neʼebé Jeová fó moris-hiʼas ba ninia alin.

19. Saida mak Ita bele halo atu hametin Ita-nia esperansa? (Haree mós foto.)

¹⁹ Oinsá Ita bele hametin Ita-nia esperansa? Se Ita iha esperansa atu moris ba nafatin iha rai, Ita bele lee husi Bíblia kona-ba Paraízu no hanoin kleʼan kona-ba neʼe. (Isa 25:8; 32:​16-18) Imajina toʼok kona-ba Ita-nia moris iha mundu foun. Ita sei hasoru sé? Ita sei rona lian hanesan saida? No Ita sei sente oinsá? Atu ajuda Ita imajina, haree dezeñu iha publikasaun sira kona-ba Paraízu, ka nonton vídeo múzika, hanesan Paraízu neʼebé atu mai, Besik daudaun ona, ka Imajina kona-ba mundu foun. Se ita kontinua hanoin kona-ba mundu foun, ita-nia problema sira sei “ba tempu uitoan deʼit no kmaan”. (2 Kor 4:17) Esperansa neʼebé Jeová fó ba Ita, sei ajuda Ita tahan hasoru susar sira.

20. Oinsá mak ita bele hetan kbiit bainhira ita sente fraku?

²⁰ Bainhira ita sente fraku “Maromak sei fó kbiit mai ita”. (Sal 108:13) Jeová fó ona buat neʼebé Ita presiza atu bele simu kbiit husi nia. Tan neʼe, kuandu Ita presiza ajuda atu kumpre knaar ruma, tahan hasoru susar, ka atu kontinua iha ksolok, husu Jeová nia ajuda liuhusi orasaun no buka ninia matadalan liuhusi estuda mesak. Simu anima husi irmaun-irmán sira, no kontinua hanoin kona-ba Ita-nia esperansa ba futuru. Hodi halo nuneʼe, Ita bele hetan ‘forsa ho kbiit hotu tuir Maromak nia kbiit neʼebé furak atu nuneʼe Ita bele tahan buat hotu ho pasiénsia no ksolok’.—Kol 1:11.