1. Mbuti Leza mbwaakayumya babelesi bakwe basyomeka kaindi?

 JWI LYA LEZA kanji-kanji lyaamba bantu basyomeka kuti bakali bayumu. Pele balo tiibakali kulimvwa boobo lyoonse pe. Mucikozyanyo, aciindi cimwi Mwami Davida wakalimvwa kuti wakali ‘muyumu mbuli cilundu,’ nokuba boobo, zimwi ziindi wakali ‘kuyoowa kapati.’ (Int. 30:7) Muuya wa Leza wakapa Samusoni nguzu zinji kapati. Pele Samusoni wakalizyi kuti kakunyina kugwasyigwa a Leza ‘nguzu zyakwe zyakali kukonzya kumana alimwi akuba mbuli bantu boonse.’ (Bab. 14:​5, 6; 16:17) Baalumi aaba basyomeka bakali bayumu akaambo kakuti Jehova wakabapa nguzu.

2. Nkaambo nzi mwaapostolo Paulo ncaakaambila kuti ciindi naatakajisi nguzu ndendilyo naakajisi nguzu kapati? (2 Bakorinto 12:​9, 10)

² Mwaapostolo Paulo awalo wakalizyi kuti uyandika nguzu kuzwa kuli Jehova. (Amubale 2 Bakorinto 12:​9, 10.) Mbubwenya mbuli ndiswe toonse, Paulo wakali aapenzi lyakuciswa. (Gal. 4:​13, 14) Zimwi ziindi, cakali kumuyumina buya akucita ciluzi. (Rom. 7:​18, 19) Kumane alimwi wakali kulibilika akuyoowa kujatikizya cikonzya kumucitikila. (2Kor. 1:​8, 9) Nokuba boobo, ciindi naatakajisi nguzu ndendilyo naakajisi nguzu kapati. Munzila nzi? Jehova wakamupa nguzu Paulo nzyaakali kuyandika kutegwa acikonzye kuliyumya kumapenzi ngaakajisi.

3. Ino mibuzyo nzi njotutiilange-lange mucibalo eeci?

³ Jehova utusyomezya kuti andiswe ulakonzya kutupa nguzu nzyotuyandika kutegwa tucikonzye kuliyumya. (1Pet. 5:10) Pele tatukonzyi kulangila kutambula nguzu eezyo kakunyina kucita lubazu lwesu. Mucikozyanyo, njini ilakonzya kupa mootokala nguzu zyakucikonzya kweenda. Nokuba boobo, namutekenya weelede kucinca magiya kutegwa mootokala ucikonzye kuunka nkwayanda. Mbubwenya buyo, Jehova ulilibambilide kutupa nguzu nzyotuyandika, pele kuli ntaamu andiswe nzyotweelede kubweza kutegwa  tucikonzye kugwasyigwa anguzu eezyo. Ino Jehova utupa buti nguzu? Alimwi ncinzi ncotweelede kucita kutegwa tutambule nguzu eezyo? Tulabujana bwiinguzi kumibuzyo eeyo kwiinda mukulanga-langa Jehova mbwaakapa nguzu zyakuliyumya bantu botatwe baambidwe mu Bbaibbele nkokuti musinsimi Jona, Mariya banyina Jesu alimwi amwaapostolo Paulo. Tulabona alimwi Jehova mbwaazumanana kubapa nguzu zyakuliyumya babalesi bakwe munzila njiyonya eeyo mazuba aano.

4. Mbuti mbotukonzya kutambula nguzu kuzwa kuli Jehova?

⁴ Kutegwa tucikonzye kutambula nguzu kuzwa kuli Jehova, tweelede kupaila kulinguwe. Jehova uyooyiingula mipailo yesu kwiinda mukutapa “nguzu zigambya iziinda zyabantu.” (2Kor. 4:7) Alimwi tulakonzya kujana nguzu nzyotuyandika kwiinda mukubala akuzinzibala kuyeeya Jwi lya Leza. (Int. 86:11) Mulumbe wa Jehova uuli mu Bbaibbele ‘ulaanguzu.’ (Heb. 4:12) Ikuti mwapaila kuli Jehova akubala Jwi lyakwe, muyoojana nguzu nzyomuyandika kutegwa muliyumye, muzumanane kukkomana naa kutegwa mucikonzye kuzuzikizya mukuli umwi uukatazya. Amubone Jehova mbwaakamugwasya kuliyumya Jona.

5. Nkaambo nzi musinsimi Jona ncaakali kuyandika busicamba?

⁵ Musinsimi Jona wakali kuyandika busicamba. Wakali kuyoowa kuunka nkwaakatumwa a Jehova. Aboobo wakatanta bwato akuunka kubusena bumwi. Akaambo kaceeci, walo abaabo mbaakali limwi mubwato bakafwutukila kumpela aalwala ciindi nokwakali guwo mpati mulwizi. Ciindi basikweenzya bwato nobakamusowela mulwizi, Jona wakalijana mubusena buyoosya kapati, nkokuti mwida lyanswi. Ino muyeeya kuti Jona wakalimvwa buti? Ambweni kumatalikilo wakali kuyeeya kuti ulafwa. Alimwi wakali kukonzya kulimvwa kuti Jehova wacileka kumuyanda. Kweelede kuti Jona wakalilibilikide kapati.

6. Kweelana alugwalo lwa Jona 2:​1, 2, 7, ncinzi cakagwasya Jona kuliyumya ciindi naakali mwida lyanswi?

⁶ Ino ncinzi ncaakacita Jona kutegwa atambule nguzu zyakucikonzya kuliyumya ciindi naakali mwida lyanswi? Wakapaila kuli Jehova. (Amubale Jona 2:​1, 2, 7.) Nokuba kuti Jona wakaalilwa kumumvwida Jehova, wakalisinizyide kuti mupailo wakwe iwakali kutondezya kweempwa, Jehova wakali kuyoowiingula. Jona alimwi wakali kuzinzibala kuyeeya Magwalo. Nkaambo nzi ncotukonzya kwaambila boobu? Mumupailo wakwe uulembedwe kuli Jona caandaano 2, Jona wakabelesya mabala aakozyene ayaayo aajanika mubbuku lya Intembauzyo. (Mucikozyanyo, amweezyanisye Jona 2:​2, 5 a Intembauzyo 69:1; 86:7.) Cilalibonya aantangalala kuti Jona wakalaazyi kabotu magwalo aayo. Kuzinzibala kuyeeya kwakamugwasya kapati Jona kuba alusyomo lwakuti Jehova wakali kuyoomugwasya. Jehova wakamuvwuna Jona, aboobo kumbele Jona wakalilibambilide kucita mulimo Jehova ngwaakali kuyanda kuti acite.—Jon. 2:10–3:4.

7-8. Mbuti mukwesu umwi waku Taiwan mbwaakajana nguzu naakali mubukkale bukatazya?

⁷ Cikozyanyo ca Jona cilakonzya kutugwasya ciindi notuli mubukkale bukatazya. Mucikozyanyo, mukwesu waku Taiwan wazina lya Zhiming, b ulaciswa kapati. Kuyungizya waawo, banamukwasyi tabamweendelezyi kabotu akaambo kalusyomo lwakwe muli Jehova. Nokuba boobo, nguzu zyakuliyumya uzijana kuli Jehova Kwiinda mukupaila alimwi akubala. Wakaamba kuti: “Zimwi ziindi ikuti naa ndasikilwa mapenzi, inga ndilalibilika kapati akaambo kakwaalilwa kukkazika moyo calo cindipa kutacikonzya kucita ciiyo cangu ndemwini.” Mukwesu Zhiming inga usyoma Jehova kuti amugwasye. Wakaamba kuti: “Kusaanguna ndilapaila kuli Jehova mpoonya akutalika kuswiilila nyimbo zyesu zya Bwami.  Zimwi ziindi inga ndilaimba andime caansaansi kusikila ndalimvwa kabotu. Kumane nendiya nditalike kubala.”

⁸ Mukwesu Zhiming wakajana nguzu zyakuliyumya kumapenzi kwiinda muzintu nzyaakaiya lyaciiyo cakwe mwini. Mucikozyanyo, ciindi naakali kupona kukwaandulwa kupati, nesi wakamwaambila kuti wakeelede kubikkwa bulowa akaambo kakuti bulowa bwakali busyoonto. Pele cikkomanisya ncakuti busiku katanaandulwa, mukwesu Zhiming wakalibalide kale cibalo icakali kwaamba mucizyi umwi iwakajisi penzi likozyene alyakwe. Bulowa bwamucizyi ooyu bwakali busyoonto kapati kwiinda bwakwe. Nokuba boobo, wakapona nokuba kuti kunyina naakazumina kubikkwa bulowa. Cakuluula eeci cakamukulwaizya kapati mukwesu Zhiming kuzumanana kusyomeka.

9. Ikuti naa mapenzi amupa kubula nguzu, ncinzi ncomweelede kucita? (Amubone acifwanikiso.)

⁹ Ciindi nomuli mubukkale bukatazya, sena kuli nomulibilika kapati cakuti cilamwaalila kupaila? Naa mulimvwa kubula nguzu kapati cakuti cilamwaalila kwiiya. Kamuyeeya kuti Jehova ulabumvwisya bukkale bwanu kabotu-kabotu. Aboobo nokuba kuti mwapaila buyo mupailo mufwaafwi, mulakonzya kuba alusyomo lwakuti uyoomupa nzyomuyandika. (Ef. 3:20) Ikuti kacimukatazya kubala alimwi akwiiya akaambo kakuciswa, kukatala naa kulibilika, mulakonzya kuswiilila ku Bbaibbele lyakalekkoodwa, naa mabbuku aamba zyamu Bbaibbele. Alimwi cilakonzya kumugwasya kuswiilila imwi yanyimbo zyesu naa kweebelela vidiyo imwi a jw.org. Aboobo kwiinda mukupaila kuli Jehova alimwi akubona mbwayiingula mipailo yesu kwiinda muzyakumwaya zyakumuuya nzyatupa, cili mbuli kuti tumutamba kuti atuyumye.

10. Mbuti bakwesu abacizyi mbobatuyumya?

¹⁰ Jehova ulakonzya kubelesya bakwesu abacizyi kutuyumya. Balakonzya ‘kutuumbulizya kapati’ ciindi notuli mumapenzi naa ciindi notwajana buyumuyumu kuzuzikizya mukuli umwi uukatazya kapati. (Kol. 4:​10, 11) Tuyandika balongwe ikwaambisya ciindi notuli “muziindi zyamapenzi.” (Tus. 17:17) Ciindi notwalimvwa kubula nguzu, bakombima balakonzya kutupa nzyotuyandika, kutuumbulizya alimwi akutukulwaizya kutegwa tuzumanane kumubelekela Jehova  cakusyomeka. Atubone Mariya banyina Jesu mbwaakayumizyigwa abamwi.

11. Nkaambo nzi Mariya ncaakali kuyandika kuyumizyigwa?

¹¹ Mariya wakali kuyandika kuyumizyigwa kutegwa azumanane kucita kuyanda kwa Jehova. Amweezyeezye buyo mbwaakalibilikide ciindi mungelo Gabriyeli naakamwaambila kuti wakali kuyoomita nokuba kuti tanaakakwetwe. Mariya tanaakajisi luzyibo lwakukomezya bana, pele lino wakeelede kukomezya mwana iwakali kuyooba Mesiya. Alimwi mbwaanga kunyina naakalede kale amusankwa, ino wakali kuyoomupandulwida buti Josefa iwakali kuyanda kumukwata?—Lk. 1:​26-33.

12. Kweelana a Luka 1:​39-45, mbuti Mariya mbwaakatambula nguzu nzyaakali kuyandika?

¹² Ino Mariya wakayumizyigwa buti kutegwa acikonzye kuzuzikizya mukuli ooyu uulibedelede alimwi uukatazya? Wakasyoma bamwi kutegwa bamugwasye. Mucikozyanyo, wakalomba Gabriyeli kuti amupandulwide zinji kujatikizya mukuli ooyu ngwaakapegwa. (Lk. 1:34) Kuzwa waawo, Mariya wakaunka kuyooswaya bbululu wakwe Elizabeta iwakali kukkala “kucisi camalundu” ku Juda. Kuswaya ooku kwamugwasya kapati. Elizabeta wakamulumbaizya Mariya alimwi wakasololelwa a Jehova kwaamba businsimi bukkomanisya, ibwakali kujatikizya mwanaakwe iwatakalinazyalwa. (Amubale Luka 1:​39-45.) Mariya wakaamba kuti Jehova wakacita “milimo mipati ajanza lyakwe.”(Lk. 1:​46-51) Aboobo, kwiinda mukubelesya Gabriyeli alimwi a Elizabeta, Jehova wakamuyumya Mariya.

13. Mbuti mucizyi umwi waku Bolivia mbwaakagwasyigwa kwiinda mukulomba lugwasyo kubakombinyina?

¹³ Mbubwenya mbuli Mariya, andinywe mulakonzya kuyumizyigwa abakombinyoko. Mucikozyanyo, mucizyi Dasuri uukkala ku Bolivia wakali kuyandika kuyumizyigwa. Ciindi bausyi nobakajatwa abulwazi butasilikiki alimwi akujatwa mucibbadela, mucizyi Dasuri wakalyaaba kubalanganya. (1Tim. 5:4) Mukuli ooyu tiiwakali muubauba. Wakaamba kuti: “Ziindi zinji ndakali kulimvwa kuminwa.” Sena wakalomba lugwasyo? Kutali mpoonya-mpoonya. Mucizyi Dasuri wakayungizya kwaamba kuti: “Tiindakali kuyanda kupenzya bakwesu abacizyi. Ndakali kuyeeya kuti, ‘Jehova alikke nguukonzya kundigwasya’. Pele ndakabona kuti, kwiinda mukutalomba lugwasyo kuli bamwi, ndakali kusola kulwana mapenzi aangu, ndalikke.” (Tus. 18:1) Aboobo mucizyi Dasuri wakasala kuzyibya balongwe bakwe bamwi alimwi akubapandulwida kujatikizya bukkale bwakwe. Wakaamba kuti: “Majwi taakonzyi kupandulula mbobakandiyumya bakombima. Bakali kundiletela zyakulya kucibbadela alimwi akundibalila tupango twamu Bbaibbele tuumbulizya. Eelo kaka cilakkomanisya kuzyiba kuti tatuli tolikke! Tuzulilwa mumukwasyi wa Jehova, mumukwasyi muli bantu balibambilide kutugwasya muziindi zyamapenzi, ibalila andiswe alimwi batukulwaizya kuzumanana kubelekela Jehova.

14. Nkaambo nzi ncotweelede kulutambula lugwasyo luzwa kubaalu?

¹⁴ Nzila imwi Jehova mwatuyumya nkwiinda mubaalu. Aaba bakwesu nzipego nzyabelesya kutuyumya alimwi akutukatalusya. (Is. 32:​1, 2) Aboobo ikuti mwalibilika, amwaambila mwaalu umwi kujatikizya nzyomulibilika. Tamweelede kuwaya-waya kutambula lugwasyo ndobamupa baalu, nkaambo Jehova ulakonzya kumuyumya kwiinda mulimbabo.

15. Mbulangizi nzi Banakristo boonse mbobakkomanina kapati?

¹⁵ Zisyomezyo zyamu Bbaibbele zilakonzya kutuyumya akutupa nguzu zyakuzumanana kubelekela Jehova. (Rom. 4:​3, 18-20) Tobanakristo tulijisi bulangizi bwakuyoopona kukabe kutamani kufwumbwa naa muparadaiso anyika naa nkuujulu. Bulangizi bwesu oobu bulakonzya kutugwasya kutegwa tuliyumye kumapenzi, tu cikonzye  kukambauka alimwi akuzuzikizya mikuli iindene-indene mumbungano. (1Tes. 1:3) Oobu mbobulangizi bwakamuyumya awalo mwaapostolo Paulo.

16. Nkaambo nzi mwaapostolo Paulo ncaakali kuyandika kuyumizyigwa?

¹⁶ Paulo wakali kuyandika kuyumizyigwa. Kulugwalo ndwaakalembela bana Korinto, wakalyeezyanisya kuziyobwedo zyabulongo izipwaika buyo. Nokuba boobo wakali ‘kusyanikizyigwa,’ ‘kuzyingwa,’ alimwi ‘akuumputilwa ansi.’ Mubwini buumi bwakwe zimwi ziindi bwakali muntenda. (2Kor. 4:​8-10) Paulo wakalemba majwi aayo ciindi naakali mulweendo lwakwe lwatatu lwabumisyinali. Pele nociba ciindi naakamana kwaalemba majwi aayo, wakajana mapenzi manji. Wakali kubukilwa abasimanyongwe, kulijana muntenda zyamulwizi alimwi akwaangwa buya.

17. Kweelana alugwalo lwa 2 Bakorinto 4:​16-18, ncinzi cakagwasya Paulo kuliyumya kumapenzi?

¹⁷ Paulo wakacikonzya kuliyumya kwiinda mukubikkila maano kubulangizi mbwaakajisi. (Amubale 2 Bakorinto 4:​16-18.) Wakaambila Banakristonyina kuti tanaakali kuyootyompwa nokuba kuti buntu bwakwe bwaanze bwakali ‘kuyaabunyonyooka.’ Paulo wakabikkilide maano kubuumi bwakwe bwakumbele. Bulangizi bwakwe bwabuumi butamani kujulu bwalo ibwakali “bupati kapati butakonzyi kweezyanisyigwa,” bwakali kuyandika kapati kuli Paulo cakuti wakalilibambilide kwiinda mumapenzi aali woonse kutegwa akabujane. Paulo wakali kubuyeeyesya kapati bulangizi oobo, akaambo kaceeco wakali kulimvwa ‘kubukulusyigwa buzuba abuzuba.’

18. Ino kuba abulangizi kwakabagwasya buti kuliyumya ba Tihomir amukwasyi wabo?

¹⁸ Ba Tihomir imukwesu waku Bulgaria, balaliyumya akaambo kabulangizi bwabo bwakumbele. Myaka misyoonto yainda, mwanookwabo uutegwa Zdravko, wakafwa muntenda yamumugwagwa. Aboobo eeci cakapa kuti ba Tihomir bause kapati. Pele kutegwa bajane luumbulizyo, balo amukwasyi wabo baleezeezya mbobunoobede bubuke. Bakaamba kuti: “Mucikozyanyo, inga tulabandika nkotuyooswaanganina a Zdravko, zyakulya nzyotuyoomujikila, bantu mbotuyootamba kukapobwe kakusaanguna nkotuyoocita aakubusyigwa alimwi azintu nzyotuyoomwaambila  kujatikizya mapenzi mapati.” Ba Tihomir bakaamba kuti kubikkila maano kubulangizi bwabo kupa kuti mukwasyi wabo uzumanane kuliyumya akuzumanana kulindila ciindi ncabikkide Jehova cakubusya mwanookwabo.

19. Ncinzi ncomweelede kucita kutegwa muyumye bulangizi bwanu? (Amubone acifwanikiso)

¹⁹ Mbuti mbomukonzya kuyumya bulangizi bwanu? Mucikozyanyo, ikuti kamujisi bulangizi bwakuyoopona anyika mane kukabe kutamani, amubale ncolyaamba Bbaibbele kujatikizya mboinoobede Paradaiso akuzinzibala kuyeeya kujatikizya njiyo. (Is. 25:8; 32:​16-18) Amuyeeye kujatikizya mbobunoobede buumi munyika mpya. Amweezeezye kuti muli mulinjiyo. Ino mbaani mbomubwene? Ino nkulila kwanzi nkomumvwide? Ino mulimvwa buti? Kutegwa mweezeezye kabotu mboinoobede, amubone zifwanikiso izili mumabbuku eesu izitondezya Paradaiso naa kweebelela vidiyo yanyimbo, mbuli yakuti Amweezyeezye Kuti Muli mu Paradaiso, Nyika Mpya Ilaafwaafwi, naa yakuti Amweezyeezye Buumi Bwakumbele. Ikuti lyoonse katuyeeya kujatikizya bulangizi bwanyika mpya, mapenzi eesu ayooba ‘akaindi buyo kaniini alimwi mauba-uba.’ (2Kor. 4:17) Bulangizi Jehova mbwaamupa buyoomugwasya kuliyumya kumapenzi.

20. Nociba ciindi notulimvwa kutyompwa, mbuti mbotukonzya kuba anguzu?

²⁰ Nociba ciindi notulimvwa kutyompwa, ‘Leza uyootupa kuba anguzu.’ (Int. 108:13) Jehova wakatupa kale cintu ncotuyandika kutegwa atugwasye kuliyumya. Aboobo ciindi nomuyanda lugwasyo lwakuzuzikizya mulimo wanu, kuliyumya kumasunko, naa kuzumanana kukkomana, amupaile kuli Jehova cakuzwa ansi amoyo akulomba busolozi bwakwe ciindi nomucita ciiyo canu nobeni. Amuluzumine luumbulizyo luzwa kubakwesu abacizyi. Amuzumanane kweezeezya kujatikizya bulangizi bwanu bwakumbele. Ikuti mwacita oobo, ‘muyooyumizyigwa anguzu [zya Leza] zyoonse kweelana abulemu bwanguzu zyakwe ikutegwa muliyumye cakumaninina kumwi kamukkazikide moyo alimwi akukondwa.’—Kol. 1:11.