1. Olsem wanem God i givim strong long ol wokman bilong em long bipo?

 PLANTI taim Baibel i stori olsem ol bilipman i gat bikpela strong. Tasol i no olgeta taim ol man i gat strong ol i pilim olsem ol i strongpela man. Olsem, sampela taim King Devit i pilim olsem em i “sanap strong olsem maunten,” tasol long ol narapela taim em i “pret nogut tru.” (Sng. 30:7) Holi spirit bilong God i givim bikpela strong long Samson. Tasol Samson i save olsem sapos em i no kisim strong i kam long God, em bai “no gat strong na . . . kamap wankain olsem ol arapela man.” (Het. 14:​5, 6; 16:17) Ol dispela bilipman i gat strong bikos Jehova i givim strong long ol.   

2. Wai na aposel Pol i tok em i no gat strong na long wankain taim em i gat strong? (2 Korin 12:​9, 10)

² Aposel Pol i tok olsem em tu i nidim strong i kam long Jehova. (Ritim 2 Korin 12:​9, 10.) Wankain olsem planti bilong yumi, Pol i bin karim sampela hevi long sait bilong helt. (Gal. 4:​13, 14) Sampela taim em i hatwok long mekim samting i stret. (Rom 7:​18, 19) Na sampela taim em i tingting planti na em i ting laip bilong em bai lus. (2 Kor. 1:​8, 9) Maski i olsem, taim Pol i no gat strong, long dispela taim em i gat bikpela strong. Hau? Jehova i givim strong em Pol i nidim. Em i strongim Pol.

3. Yumi bai kisim bekim bilong wanem ol askim long dispela atikol?

³ Jehova i tok promis olsem em bai givim strong long yumi tu. (1 Pita 5:10) Tasol yumi no ken ting olsem yumi bai kisim nating strong i kam long God sapos yumi yet i no mekim wanpela samting. Yumi ken tok piksa olsem, ensin bilong kar inap mekim kar i muv i go fowed. Tasol draiva i mas krungutim ekselereta na bai  kar i kisim em i go long hap em i laik i go long en. Olsem tasol, Jehova i redi long givim strong em yumi nidim, tasol yumi yet i mas mekim ol samting na bai yumi ken kisim helpim long en. Jehova i bin redim wanem ol samting bilong givim strong long yumi? Na yumi mas mekim wanem bilong kisim dispela strong? Yumi bai kisim bekim bilong ol dispela askim taim yumi skelim hau Jehova i bin strongim 3-pela man na meri long Baibel—em profet Jona, Maria em mama bilong Jisas, na aposel Pol. Na tu, yumi bai stori long hau Jehova i wok yet long strongim ol wokman bilong em long nau long ol wankain rot olsem.

4. Olsem wanem yumi ken kisim strong i kam long Jehova?

⁴ Wanpela rot yumi ken kisim strong i kam long Jehova em long rot bilong toktok wantaim em long beten. Jehova bai bekim beten bilong yumi long rot bilong givim yumi “dispela strong i winim strong bilong yumi ol man.” (2 Kor. 4:7) Na tu, yumi ken kisim strong taim yumi ritim Tok bilong em na tingim tingim long bel ol dispela tok. (Sng. 86:11) Tok bilong Jehova long Baibel i “wok strong i stap.” (Hib. 4:12) Taim yu beten long Jehova na ritim Tok bilong em, yu bai kisim strong em yu nidim bilong sanap strong na karim hevi, holimpas yet amamas bilong yu, o long inapim wanpela asainmen yu hatwok long mekim. Lukim hau Jehova i strongim profet Jona.

5. Bilong wanem profet Jona i nidim strong?

⁵ Profet Jona i nidim strong i kam long God. Em i bin ranawe long wanpela asainmen i gat hatwok bilong en, em Jehova i bin givim em. Dispela i mekim na klostu laip bilong em na laip bilong ol man i stap long sip wantaim em i lus. Taim ol i tromoi em i go daun long solwara, em i luksave olsem em i stap long wanpela ples we em i no bin stap bipo—insait long bel bilong wanpela traipela pis. Yu ting Jona i pilim olsem wanem? Em i ting em bai dai long dispela hap? Ating em i kisim tingting olsem Jehova i lusim tingting pinis long em? I luk olsem Jona i tingting planti tru.

6. Olsem Jona 2:​1, 2, 7 i kamapim, wanem samting i strongim Jona taim em i stap insait long bel bilong pis?

⁶ Jona i mekim wanem bilong kisim strong taim em i stap wanpis insait long bel bilong pis? Wanpela samting em i mekim, em i beten. (Ritim Jona 2:​1, 2, 7.) Maski Jona i sakim tok bilong Jehova, em i tanim bel na em i bilip olsem Jehova bai harim beten bilong em. Na Jona i tingim tu tok bilong Ol Skripsa. Wai na yumi ken tok olsem? Planti bilong ol tok em i kolim long beten bilong em long Jona sapta 2, em i kolim ol wankain tok i stap long Buk Song. (Olsem, skelim Jona 2:​2, 5 wantaim Buk Song 69:1; 86:7.) Em i klia tru olsem Jona i save gut long ol dispela skripsa. Em i tingim ol dispela tok taim em i karim hevi, na dispela i helpim em long kisim strong na save tru olsem Jehova bai helpim em. Bihain, Jehova i kisim bek Jona na em i redi long kisim na inapim wok Jehova i tokim em long mekim.—Jna. 2:10–3:4.

7-8. Wanpela brata long Taiwan i mekim wanem bilong kisim strong taim em i karim ol hevi?

⁷ Stori bilong Jona i ken helpim yumi taim yumi karim kain kain hevi. Olsem, Zhiming b em wanpela brata long Taiwan, em i karim bikpela hevi long sait bilong helt. Na tu, em i karim hevi long famili i birua long em bikos em i bilip long Jehova. Em i save kisim strong i kam long Jehova long rot bilong beten na stadi. Em i tok: “Sampela taim ol hevi i kamap i save mekim mi tingting planti tru na mi no inap tru long stap isi na mekim pesenel stadi bilong mi.” Tasol em i no save givap. Em i tok: “Pastaim, mi save beten long Jehova. Bihain, mi save putim yaufon  bilong mi na harim ol Kingdom song bilong yumi. Sampela taim, mi save singim ol dispela song isi isi i go inap long mi kisim bel isi. Na bihain mi save kirap mekim stadi.”

⁸ Pesenel stadi i bin strongim tru Zhiming long planti rot. Olsem, taim em i wok long kamap orait gen long wanpela bikpela operesen, wanpela nes i tokim em olsem em i sot long blut, olsem na em i mas kisim blut. Long nait paslain long Zhiming i kisim operesen, em i ritim stori bilong wanpela sista husat i kisim wankain operesen olsem em. Blut bilong dispela sista i go daun moa winim bilong Zhiming, tasol em i no bin kisim blut na em i kamap orait. Dispela ekspiriens i strongim Zhiming long stap gut yet long God.

9. Sapos wanpela hevi i mekim na yu no gat strong, orait yu ken mekim wanem? (Lukim tu ol piksa.)

⁹ Olsem wanem? Taim yu karim wanpela hevi, yu save tingting planti na pilim hatwok long kamapim bel na tingting bilong yu long beten? O yu save pilim olsem yu no gat strong long mekim stadi? Yu ken kisim strong long save olsem Jehova i kliagut long ol samting yu pilim. So sapos yu mekim wanpela sotpela beten, yu ken save tru olsem em bai givim strong em yu nidim. (Efe. 3:20) Sapos yu sik o yu bel hevi tru na dispela i mekim na yu hatwok long ritim Baibel na mekim stadi, orait yu ken traim long harim ol odio rekoding bilong Baibel o ol pablikesen em Baibel i as bilong en. Yu ken kisim helpim tu taim yu harim ol singsing bilong yumi o watsim wanpela vidio long jw.org. Taim yu beten long Jehova na yu painim ol bekim bilong ol beten bilong yu long rot bilong ol samting em i redim bilong helpim yumi, yu opim rot long Jehova i ken givim yu strong.

10. Olsem wanem ol bratasista Kristen bilong yumi i save strongim yumi?

¹⁰ Jehova i ken yusim ol bratasista Kristen bilong yumi long strongim yumi. Ol i ken stap olsem “helpim bilong strongim” yumi taim yumi bungim wanpela hevi o yumi hatwok long inapim wanpela asainmen. (Kol. 4:​10, 11) Yumi nidim ol pren, moa yet long “taim bilong hevi.” (Prov. 17:17) Taim yumi pilim olsem yumi no gat strong, ol wanbilip bilong yumi i ken helpim yumi long sait bilong skin, bel na tingting, na  long bilip. Tingim hau Maria—mama bilong Jisas—i kisim strong long ol narapela.

11. Bilong wanem Maria i nidim strong?

¹¹ Maria i nidim strong i kam long God. Tingim, Maria i mas pilim hevi tru taim em i kisim bikpela asainmen i kam long ensel Gebriel. Em i no marit yet, tasol em bai gat bel. Em i no bin lukautim wanpela pikinini long bipo bikos em yet i no gat pikinini, tasol nau em bai mekim bikpela long dispela liklik boi husat bai kamap Mesaia. Na em i no bin slip wantaim man, so hau em bai eksplenim dispela samting long Josep, em man em i bin tok promis long maritim?—Luk 1:​26-33.

12. Olsem Luk 1:​39-45 i kamapim, olsem wanem Maria i kisim strong em i nidim?

¹² Olsem wanem Maria i kisim strong em i nidim bilong inapim dispela narakain bikpela asainmen? Em i kisim helpim long ol narapela. Olsem, em i askim Gebriel long tokim em long sampela samting moa long dispela asainmen bilong em. (Luk 1:34) Bihain long dispela, em i wokabaut long “ples maunten” bilong Juda bilong i go visitim wanblut bilong em Elisabet. Gutpela samting i kamap long dispela. Elisabet i tok amamas long Maria na holi spirit bilong Jehova i kirapim em long mekim tok profet long bebi i stap long bel bilong Maria. (Ritim Luk 1:​39-45.) Maria i tok Jehova “i bin mekim ol strongpela wok long han bilong em.” (Luk 1:​46-51) Long rot bilong Gebriel na Elisabet, Jehova i strongim Maria.

13. Wanem gutpela samting i kamap long wanpela sista long Bolivia taim em i askim ol wanbilip long helpim em?

¹³ Olsem Maria, yu tu i ken kisim strong long rot bilong ol wanbilip. Dasuri, em wanpela sista long Bolivia, em i nidim kain strong olsem. Taim papa bilong em i kisim wanpela bikpela sik na em i stap long haus sik, Dasuri i kisim dispela wok bilong lukautim em. (1 Tim. 5:4) Dispela wok em i no isi. Em i tok: “Planti taim mi save pilim olsem mi no inap wok yet long mekim dispela wok.” Yu ting em i askim ol narapela long helpim em? Pastaim, em i no mekim olsem. Em i tok: “Mi no laik putim hevi long ol bratasista, mi tingting olsem, ‘Jehova tasol bai givim helpim em mi nidim.’ Tasol bihain, mi luksave olsem taim mi stap longwe long ol narapela, i olsem mi yet i laik karim dispela hevi.” (Prov. 18:1) Dasuri i raitim pas i go long sampela pren bilong em na stori long hevi bilong em. Em i tok: “Ol wanbilip Kristen i strongim mi tru. Ol i bringim ol kaikai i kam long haus sik na kamapim ol gutpela tok bilong Baibel bilong strongim mi. Em nais tru long save olsem yumi no stap wanpis. Yumi olgeta i hap bilong bikpela lain famili bilong Jehova, em ol i redi long helpim yu, krai wantaim yu, na strongim yu long mekim yet wok bilong Jehova.”

14. Bilong wanem yumi mas kisim helpim i kam long ol elda?

¹⁴ Wanpela rot Jehova i save givim strong long yumi em long rot bilong ol elda. Ol i olsem ol presen em i givim bilong strongim yumi na givim yumi nupela strong. (Ais. 32:​1, 2) So taim yu tingting planti, tokim ol elda long ol wari bilong yu. Taim ol i givim helpim long yu, redi long kisim dispela helpim. Long rot bilong ol, Jehova i ken strongim yu.

15. Olgeta Kristen i bilip na wet long wanem samting?

¹⁵ Ol samting yumi bilip na wet long en, em Baibel i as bilong en, ol inap strongim yumi. (Rom 4:​3, 18-20) Yumi ol Kristen i bilip na wet long kisim laip oltaim—yumi inap stap laip oltaim long Paradais long graun o long Kingdom Bilong God long heven. Ol samting yumi bilip na wet long en i helpim yumi long sanap strong na karim ol hevi, autim gutnius, na mekim ol kain kain asainmen yumi kisim insait  long kongrigesen. (1 Tes. 1:3) Dispela wankain bilip i bin strongim aposel Pol.

16. Bilong wanem aposel Pol i nidim strong?

¹⁶ Pol i nidim strong i kam long God. Long pas em i raitim i go long ol Korin, em i tok long em yet olsem wanpela sospen graun i no gat strong. “Hevi i banisim” em, em “i no kliagut long [em] bai mekim wanem,” “ol man i save mekim nogut” long em, na “ol i tromoi [em] i go daun long graun.” Na sampela taim klostu laip bilong em i lus. (2 Kor. 4:​8-10) Pol i raitim ol dispela tok long namba 3 misineri raun bilong em. Na bihain long em i raitim ol dispela tok, em i bungim planti bikpela hevi moa. Em i karim hevi long ol man i bung na paitim em, arestim em, sip em i stap long en i bagarap, na ol i kalabusim em.

17. Olsem 2 Korin 4:​16-18 i kamapim, wanem samting i strongim Pol long karim ol hevi?

¹⁷ Pol i kisim strong long karim ol hevi bilong em taim em i putim tingting long ol samting em i bilip na wet long en. (Ritim 2 Korin 4:​16-18.) Em i tokim ol Korin olsem maski bodi bilong em i “wok long bagarap,” em i no inap larim dispela i daunim em. Pol i putim tingting long ol blesing em bai kisim long bihain. Bilip bilong em long kisim laip oltaim long heven “i bikpela moa yet,” na dispela i winim olgeta kain hevi em i karim. Pol i tingim tingim long bel dispela samting em i bilip na wet long en, na dispela i givim em “nupela strong long olgeta de.”

18. Olsem wanem ol samting Tihomir na famili bilong em i bilip na wet long en i strongim ol?

¹⁸ Tihomir, em wanpela brata long Balgeria, em i save kisim strong taim em i tingim ol samting em i bilip na wet long en. Sampela yia i go pinis, liklik brata bilong em Zdravko i dai long wanpela eksiden. Bihain long en, inap sampela haptaim Tihomir i karim hevi bilong bikpela bel sori tru. Bilong helpim em long karim dispela hevi, Tihomir na famili bilong em i bin piksaim long tingting ol samting bai kamap long taim bilong kirap bek. Em i tok: “Mipela i save stori long wanem hap mipela bai bungim Zdravko, wanem kaikai mipela bai kukim bilong em, mipela bai invaitim husat lain i kam long fes pati bilong em taim em i kirap bek, na mipela bai tokim em long wanem ol samting i kamap long  taim bilong las de.” Tihomir i tok taim em na famili bilong em i putim tingting long ol samting ol i bilip na wet long en, dispela i helpim ol long sanap strong na wok yet long wetim dispela taim we Jehova bai kirapim bek brata bilong em.

19. Yu ken mekim wanem bilong strongim bilip bilong yu long ol samting bai kamap bihain? (Lukim tu piksa.)

¹⁹ Olsem wanem yu ken strongim bilip bilong yu long ol samting bai kamap bihain? Olsem, sapos yu bilip na wet long stap laip oltaim long graun, orait ritim ol stori Baibel i mekim long Paradais na tingim tingim long bel. (Ais. 25:8; 32:​16-18) Piksaim long tingting laip bai olsem wanem long nupela taim. Piksaim yu yet long Paradais. Yu lukim husat? Yu harim wanem ol saun? Yu pilim olsem wanem? Bilong kirapim laik bilong yu long piksaim ol samting long tingting, lukim ol piksa bilong Paradais i stap long ol pablikesen bilong yumi o watsim ol musik vidio olsem The New World to Come, Just Around the Corner, o Imagine the Time. Sapos oltaim yumi piksaim long tingting nupela taim, yumi bai tingim olsem ol hevi bilong yumi ol i bilong “sotpela taim na ol i no bikpela tumas.” (2 Kor. 4:17) Jehova i opim rot long yu inap bilip na wet long ol gutpela samting i kamap bihain, na dispela i ken strongim yu.

20. Taim yumi pilim olsem yumi no gat strong, olsem wanem yumi inap kisim strong?

²⁰ Long taim yumi no gat strong, “God bai givim strong long” yumi. (Sng. 108:13) Jehova i givim yu pinis ol samting yu nidim bilong kisim strong i kam long em. So taim yu nidim helpim long inapim wanpela asainmen, sanap strong na karim wanpela hevi, o holimpas yet amamas bilong yu, orait beten long Jehova na kisim helpim i kam long em long rot bilong pesenel stadi. Kisim tok bilong strongim yu i kam long ol bratasista Kristen bilong yu. Oltaim piksaim long tingting ol samting yu bilip na wet long en. Taim yu mekim olsem, “bikpela pawa bilong God i ken givim strong long [yu] inap long [yu] ken sanap strong na i no les kwik, na [yu] ken mekim wantaim amamas.”—Kol. 1:11.