1. Ne maua pefea ne tino tapuaki o te Atua i aso mua a te malosi?

 E MASANI o fakamatala mai i te Muna a te Atua, me i tāgata fakamaoni e ma‵losi. Kae ke oko foki loa ki te ‵toe tino mafi i a latou e se maua faeloa ne ia te malosi. E pelā mo nisi taimi, ne mafaufau a te tupu ko Tavita me i a ia e “malosi e pelā me se mauga,” kae i nisi taimi ko “polepole i te mataku.” (Sala. 30:7) E tiga eiloa ne maua ne Samasoni se malosi tu ‵kese i te taimi ne fakamalosigina a ia ne te agaga o te Atua, ne iloa ne ia me e aunoa mo te malosi mai i te Atua, a ia ka “gasolo o vāivāi e pelā mo nisi tāgata katoa.” (Fama. 14:​5, 6; 16:17) Ne maua ne tāgata fakamaoni konei a te malosi, me ko Ieova ne tuku atu ne ia ki a latou.

2. Kaia ne fai mai ei te apositolo ko Paulo me i a ia e vāivāi kae malosi foki? (2 Kolinito 12:​9, 10)

² Ne iloa ne te apositolo ko Paulo me ne manakogina foki ne ia te malosi mai i a Ieova. (Faitau te 2 Kolinito 12:​9, 10.) E pelā mo te tokoukega o tatou, ne masaki sāle a Paulo. (Kala. 4:​13, 14) I nisi taimi, ne taumafai foki a ia o fai a te mea tonu. (Loma 7:​18, 19) Kae i nisi taimi ko manavase kae mataku me se a te mea ka tupu ki a ia. (2 Koli. 1:​8, 9) Kae i te taimi ne vāivāi ei a Paulo, ne maua ne ia te malosi. E pefea la? Ne tuku atu ne Ieova a te malosi telā ne seki maua ne ia. Ne fai ne ia ke malosi a Paulo.

3. Ne a fesili ka tali aka ne tatou i te mataupu tenei?

³ E tauto mai foki a Ieova me ka fakamalosi ne ia tatou. (1 Pe. 5:10) Kae e se fakamoe‵moe tatou ke maua te malosi tenā e aunoa mo ne taumafaiga ki ei. Ke fai se fakatusaga, e mafai ne te masini o fai ke ola te motoka kae ke tele. Kae e ‵tau o ‵laka ne te tulaiva te penitini ko te mea ke tele te motoka ki so se koga. I se auala tai ‵pau, e toka a Ieova o tuku mai a te malosi e manakogina  ne tatou, kae e ‵tau o fakagalue ne tatou ke maua a mea aoga mai i ei. Se a te mea ne tuku mai ne Ieova ke fakamalosi ei tatou? Kae ne a mea e ‵tau o fai ne tatou ke maua te malosi tenā? Ka tauloto tatou ki tali o fesili konā mai te mafaufau ‵loto ki te auala ne fakamalosi ne Ieova a tino e tokotolu i te Tusi Tapu—te pelofeta ko Iona, Malia te mātua o Iesu, mo te apositolo ko Paulo. Ka onoono foki tatou ki te auala e fakamalosi faeloa ne Ieova ana tavini i aso nei i auala tai ‵pau.

4. E mafai pefea o maua ne tatou te malosi mai i a Ieova?

⁴ Tasi o auala e mafai ne tatou o maua te malosi mai i a Ieova ko te ‵talo atu ki a ia. Ka tali mai a ia mai te tukumaiga ki a tatou “te malosi telā e sili atu i te malosi masani.” (2 Koli. 4:7) E mafai foki o ma‵losi tatou māfai e fai‵tau ki tena Muna kae mafaufau ‵loto ki ei. (Sala. 86:11) A te fekau a Ieova ki a tatou i te Tusi Tapu e “‵mana.” (Epe. 4:12) Kafai e ‵talo koe ki a Ieova kae faitau tena Muna, ka maua ne koe te malosi e manakogina ke mafai o kufaki, ke fakatumau tou fiafia, io me ke fakataunu sou tōfiga faigata. Mafaufau ki te auala ne fakamalosi aka ne Ieova te pelofeta ko Iona.

5. Kaia ne manakogina ne te pelofeta ko Iona a te malosi?

⁵ Ne manakogina ne te pelofeta ko Iona a te loto malosi. Ne tele kea‵tea a ia mai se tōfiga faigata ne tuku atu ne Ieova ki a ia. Ona ko te mea tenā, toeitiiti ko ‵galo atu a olotou ola mo nisi kauvaka o te vaka i se matagi malosi ‵ki. I tena ‵peiga ki lalo mo te vaka, ne nofo atu a ia i se koga ne seki nofo muamua a ia i ei—i te tinae pouli tagataga o se ika lasi ‵ki. Se a tau faka‵tau ki lagonaga o Iona? E mata, ne mafaufau a ia me ka mate a ia i konā? E mata, ne mafaufau a ia me ko tiakina a ia ne Ieova? Kāti ne manava‵se ‵ki eiloa a Iona.

6. E ‵tusa mo te Iona 2:​1, 2, 7, se a te mea ne fakamalosi atu ki a Iona i loto i te tinae o te ika?

⁶ Ne a mea ne fai ne Iona ke maua te loto malosi i tena nofoga tokotasi i te tinae o te ika? Ne ‵talo atu a ia ki a Ieova. (Faitau te Iona 2:​1, 2, 7.) E tiga eiloa ne seki fakalogo a ia ki a Ieova, ne loto talitonu a Iona me ka fakalogologo a Ieova ki tena ‵talo e fai atu mo te loto maulalo mo te loto salamō. Ne mafaufau ‵loto foki a Iona ki te Tusi Tapu. Kaia e mafai ei o fai atu tatou penā? I tena ‵talo, telā ne fakamau i te Iona mataupu e 2, e fakaaoga i ei a pati e uke penā mo fuaiupu kolā e maua i te Salamo. (E pelā me se fakaakoakoga, fakatusa te Iona 2:​2, 5 ki te Salamo 69:1; 86:7.) E manino ‵lei me ne iloa faka‵lei ne Iona a fuaiupu konā. Kae mai te mafaufau ‵loto ki ei i te taimi o tena fakalavelave, ne talitonu ei a ia me ka fesoasoani atu eiloa a Ieova. Fakamuli ifo, ne luaki a Iona ki tua i te laukele malō, kae ne toka o talia kae fakataunu ne ia a tena suā tōfiga.—Iona 2:10–3:4.

7-8. Ne maua pefea ne se taina i Taiwan a te malosi i te taimi ne fepaki a ia mo fakalavelave?

⁷ Kafai e fe‵paki tatou mo fakalavelave, e mafai o fesoasoani mai te fakaakoakoga a Iona. E pelā mo Zhiming, b se taina i Taiwan telā e fakamasakisaki. E se gata i ei, ne ‵tau o kufaki a ia i ‵tekemaiga mai tena kāiga ona ko tena fakatuanaki ki a Ieova. E maua ne ia te loto malosi mai i a Ieova e auala i ‵talo mo te faiga o sukesukega. “I nisi taimi, ka ‵sae aka a fakalavelave,” e fai mai a ia, “e manavase ‵ki au ko se mafai ei o se toka au ke fai aku sukesukega totino.” Kae ne seki ‵fiu vave a ia. “Muamua la, ne ‵talo au ki a Ieova,” ko ana pati. “Oti aka, pei ei aku mea fakalogo‵logo kae fakalogo ki pese o te Malo. I nisi taimi, e usu foki ne au a  pese i se leo malalo ke oko ki te taimi ko galo ei te manavase. Oti aka, kamata ei o fai aku sukesukega.”

⁸ Ne maua ne Zhiming a te malosi i auala seki fakamoemoegina mai ana sukesukega totino. E pelā me se fakaakoakoga, mai tua o se ‵tipiga lasi o ia, ne fai atu se nēsi ki tou tagata me ka fagai a ia ki te toto me e se lava a sela ‵kula i tena foitino. I te po mai mua o tena ‵tipiga, ne faitau ne Zhiming se tala o se tuagane telā e ‵pau lā ma‵saki. Ne ma‵lalo atu a sela ‵kula o tou fafine i lō a ia, kae ne seki talia ne tou fafine ke fagai a ia ki te toto kae ne mafai loa e ‵lei a ia. Ne fakamalosi atu te tala tenā ke tumau a Zhiming i te fakamaoni.

9. Kafai ne loto vāivāi koe i se fakalavelave, ne a mea e mafai ne koe o fai? (Onoono foki ki ata.)

⁹ Kafai e fepaki koe mo se fakalavelave, e mata, ka se mafai ne koe o fakaasi atu ou lagonaga i au ‵talo ki a Ieova ona ko te lasi o te manavase? Io me ko fi‵ta koe ke fai au sukesukega? Masaua me e malamalama faka‵lei a Ieova i tou tulaga. Tela la, kafai foki loa e fai atu ne koe se ‵talo faigofie, e mafai o talitonu koe me ka tuku atu ne ia a te mea eiloa telā e manakogina ne koe. (Efe. 3:20) Kafai e faigata ki a koe ke faitau kae fai au sukesukega ona ko masaki, fi‵ta, io me manavase, e mafai o fakalogologo koe ki se faitauga ki te Tusi Tapu io me ko ‵tou tusi kolā ne puke. E mafai foki o fesoasoani atu a te fakalogologo ki ‵tou pese io me se vitio mai te jw.org. E manako a Ieova o fakamalosi koe kae ka fai eiloa penā māfai e ‵talo atu koe ki a ia, ko ‵sala atu ei ki tali o au ‵talo i te Tusi Tapu mo nisi tusi kolā ne fakatoka ne ia.

10. E fakamalosi pefea ne taina mo tuagane Kelisiano a tatou?

¹⁰ E mafai ne Ieova o fakaaoga a ‵tou taina mo tuagane Kelisiano ke fakamalosi tatou. E fai latou “mo fai se fakamafanafanaga lasi ‵ki” māfai ko fe‵paki tatou mo se fakalavelave io me taumafai o fakataunu se tōfiga faigata. (Kolose 4:​10, 11) E manakogina malosi ne tatou a taugasoa i “taimi o te puapuaga.” (Faata. 17:17) Kafai e loto vāi‵vai, e mafai o fesoasoani mai ‵tou taina mo tuagane ki a tatou i te feitu faka-te-foitino, feitu tau lagonaga, mo te feitu faka-te-agaga. Mafaufau ki te auala ne  maua ne Malia, te mātua o Iesu a te malosi mai nisi tino.

11. Kaia ne manakogina ei ne Malia a loto te malosi?

¹¹ Ne manakogina ne Malia te loto malosi ke fai te loto o Ieova. Mafaufau ki te manavase o tou fafine i te otiga ne maua ne ia se tōfiga faigata mai te agelu ko Kapilielu. E seki avaga tou fafine; kae ka faitama a ia. Ne seki ai sena iloa i te putiakaga o tamaliki, kae ne ‵tau o tausi atu a ia ki se tamaliki tagata telā ka fai mo fai te Mesia. Kae ona ko te mea e seki aofia tou fafine i faifaiga fakatauavaga, ka fakamatala atu pefea ne Malia a te mea tenei ki tena ‵sai feagaiga ko Iosefa?—Luka 1:​26-33.

12. E ‵tusa mo te Luka 1:​39-45, ne maua pefea ne Malia te loto malosi ne manakogina ne ia?

¹² Ne maua pefea ne Malia te loto malosi e manakogina ke fakataunu te tōfiga tu ‵kese kae faigata tenei? Ne ‵sala atu a ia ki te fesoasoani o nisi tino. Pelā me se fakaakoakoga, ne fakamolemole a ia ki a Kapilielu ke tuku atu nisi fakamatalaga e uiga ki te tōfiga tenā. (Luka 1:34) E se leva, kae faimalaga atu a ia ki “te fenua maugā” o Iuta o asi tena kāiga ko Elisapeta. Se malaga gali ‵ki tenā. Ne fakamālō atu a Elisapeta ki a Malia kae ne fakaosofia ne Ieova ke fakaasi atu ne ia se valoaga fakamalosi loto e uiga ki te tama tagata a Malia telā e seki fanau. (Faitau te Luka 1:​39-45.) Ne fai mai a Malia me ne fai ne Ieova a “galuega ‵mana ki ana lima.” (Luka 1:​46-51) E auala i a Kapilielu mo Elisapeta, ne fakamalosi ei ne Ieova a Malia.

13. Ne a fakamanuiaga ne maua ne se tuagane i Bolivia i te ‵salaatuga ki te fesoasoani o taina tapuaki?

¹³ E pelā mo Malia, e mafai foki o maua ne koe te loto malosi mai taina mo tuagane. Ne manakogina ne Dasuri, se tuagane mai Bolivia a te loto malosi tenā. I te pokotiaga o tena tamana i se masaki telā e seai se faka‵leiga ki ei kae faulu ki te fakaimasaki, ne toka a Dasuri o fai tena tiute ke tausi tou tagata. (1 Timo. 5:4) Ne seki faigofie faeloa te mea tenā. Ne fai mai tou fafine, “E uke taimi ne mafaufau au me ko se mafai ne au o fai toku tiute.” E mata, ne ‵sala a ia mō se fesoasoani? E se i te taimi muamua. “Ne seki fia fakalavelave atu au ki taina,” ne fakamatala mai a ia. “Ne fakasako‵sako atu au, ‘Ko Ieova eiloa ka tuku mai ne ia te fesoasoani e manakogina ne au.’ Kae ne fatoa iloa aka ne au me mai toku ‵vae kea‵tea mo tino, ko taumafai au o faka‵lei aka oku fakalavelave i a au eiloa.” (Faata. 18:1) Ne fakaiku aka ne Dasuri ke tusi atu a ia ki nāi taugasoa o fakamatala atu tena fakalavelave. “E se mafai o fakamatala atu i pati a te lasi o te fakamalosiga ne maua ne au mai oku taina Kelisiano,” ne fai mai a ia. “Ne aumai ne latou a mea‵kai ki te fakaimasaki kae sau‵tala ki fuaiupu fakamafanafana mai te Tusi Tapu. Se lagonaga gali ‵ki ke iloa atu me e se nofo tokotasi koe. E aofia tatou i te kāiga lasi o Ieova—se kāiga telā e loto fia‵fia o tuku atu se fesoasoani, ‵tagi fakatasi mo koe, kae fakatau fakamalosi.”

14. Kaia e ‵tau ei o talia ne tatou te fesoasoani mai toeaina?

¹⁴ Tasi o auala e tuku mai ne Ieova te malosi ki a tatou ko toeaina. A latou ne meaalofa kolā e fakaaoga ne ia ke fakamalosi kae tuku mai te malosi fou ki a tatou. (Isa. 32:​1, 2) Tela la, kafai e manavase koe, fakaasi atu ou lagonaga ki toeaina. Kafai e tuku atu ne latou se fesoasoani, ke loto fiafia o talia. E mafai o fakamalosi ne Ieova a koe e auala i a latou.

15. Se a te fakamoemoega e fakatāua ne Kelisiano katoa?

¹⁵ A te fakamoemoega telā ne folafola mai i te Tusi Tapu e mafai o fakamalosi ne ia tatou. (Loma 4:​3, 18-20) E pelā me ne Kelisiano, e maua ne tatou a te fakamoemoega tāua ke ola ki te se-gata-mai—faitalia me i te lalolagi  palataiso telā ka toe fakafoki mai io me i te Malo i te lagi. E fakamalosi mai ‵tou fakamoemoega ke kufaki i mea faiga‵ta, talai atu te tala ‵lei, kae fakataunu a nisi tōfiga i te fakapotopotoga. (1 Tesa. 1:3) Ko te fakamoemoega eiloa tenā ne fakamalosi ne ia te apositolo ko Paulo.

16. Kaia ne manakogina ne te apositolo ko Paulo a te malosi?

¹⁶ Ne manakogina ne Paulo te loto malosi. I tena tusi ki te kau Kolinito, ne fakatusa ne tou tagata a ia ki se ipu kele telā e mafāgofie. A ia ne “taotaomaki,” “‵numi masei,” “fakasauagina,” kae “‵pei tuki ki lalo.” Ne tu atu foki tena ola i se tulaga fakamataku. (2 Koli. 4:​8-10) Ne tusi ne Paulo a pati konā i te tolu o ana malaga fakamisionale. Kāti ne seki iloa ne ia i te taimi tenā, me ka uke atu a fakalavelave e fe‵paki mo ia. Ka fakafesagai atu a ia ki se potukau fakasaua, puke a ia, kasa te vaka e fano a ia i ei, kae ‵pei ki te falepuipui.

17. E ‵tusa mo te 2 Kolinito 4:​16-18, se a te mea ne fakamalosi atu ki a Paulo ke kufaki i mea faiga‵ta?

¹⁷ Ne maua ne Paulo te loto malosi ke kufaki mai te saga tonu atu ki tena fakamoemoega. (Faitau te 2 Kolinito 4:​16-18.) Ne fai atu a ia ki te kau Kolinito me faitalia foki loa me ne “gasolosolo ifo o vāivāi” tena foitino, ne seki fai ne te mea tenā ke loto vāivāi a ia. Ne saga tonu atu a Paulo ki tena olaga i aso mai mua. A tena fakamoemoega ke ola i te lagi ne “gasolo aka faeloa o lasi atu” tena tāua i lō so se puapuaga ne fakafesagai mo ia. Ne mafaufau ‵loto a Paulo ki te fakamoemoega tenā, tela la, ne “fakafou faeloa [tena] malosi i aso takitasi.”

18. Ne fakamalosi pefea ne te fakamoemoega a Tihomir mo tena kāiga?

¹⁸ Ne maua ne Tihomir, se taina i Bulgaria, a te malosi e auala i tena fakamoemoega. I nāi tausaga ko ‵teka, ne mate atu tena taina foliki ko Zdravko, i se fakalavelave i te motoka. Ona ko te mea tenā, ne logo‵mae ‵ki a Tihomir. Ke kufaki i ei, ne fakaataata ne ia mo tena kāiga a te taimi o te toetuga. Ne fai mai a ia: “E sau‵tala matou ki te koga ka fetaui ei mo Zdravko, ne a mea‵kai ka fakatoka ne matou mō ia, ko oi ka ‵kami mai ki te ‵kaiga muamua tenā māfai ko toetu mai a ia, kae ne a mea ka fai atu ne matou  ki a ia e uiga ki aso fakaoti.” Ne fai mai a Tihomir me i te saga tonu atu ki te lotou fakamoemoega tenā e fakamalosi atu ki tena kāiga ke tumau i te kufaki kae faka‵tali ki te taimi tonu o Ieova ke toe fakatu mai ne ia a tena taina.

19. Ne a mea e mafai ne koe o fai ke fakamalosi aka a tou fakamoemoega? (Onoono foki ki te ata.)

¹⁹ E mafai pefea o fakamalosi aka ne koe a tou fakamoemoega? E pelā me se fakaakoakoga, kafai e fakamoemoe koe ke ola ki te se-gata-mai i te lalolagi, faitau ki fakamatalaga a te Tusi Tapu e uiga ki te Palataiso kae mafaufau ‵loto ki ei. (Isa. 25:8; 32:​16-18) Mafaufau ‵loto ki te vaegā olaga i te lalolagi fou. Fakaataata ne koe a koe eiloa i konā. Ko oi e lavea ne koe? Ne a ‵tagi e lagona ne koe? Pefea ou lagonaga? Ke tai fakalauefa atu tau kilo, onoono ki ata i ‵tou tusi kolā e fakaata mai i ei a te Palataiso io me onoono ki te pese vitio e pelā mo Te Lalolagi Fou, Ko Pili o Oko Mai, io me ko te Kilo ki Taimi. Kafai e mafau‵fau faeloa tatou ki te fakamoemoega i te lalolagi fou, ka ‘vave oti atu a ‵tou puapuaga kae mā‵ma foki.’ (2 Koli. 4:17) Ka fakamalosi eiloa koe ne te fakamoemoega ne tuku atu ne Ieova.

20. I te taimi foki loa e vāi‵vai ei tatou, e mafai pefea o maua ne tatou te malosi?

²⁰ Kafai foki loa e vāi‵vai tatou, “ka maua eiloa ne [tatou] te malosi mai i te Atua.” (Sala. 108:13) Ko oti ne tuku mai ne Ieova a mea e manakogina ke maua ne koe te malosi mai i a ia. Tela la, kafai e manakogina ne koe te fesoasoani ke fakataunu se tōfiga, ke kufaki i se tofotofoga, io me ke fakatumau tou fiafia, ‵talo ki a Ieova kae ‵sala ki tena takitakiga e auala i te faiga o sukesukega totino. Talia fakamalosiga mai taina mo tuagane Kelisiano. Ke mafaufau ‵loto ki tou fakamoemoega. Ko mafai ei o “fakamalosi aka [koe] ki te malosi sili o te Atua e ‵tusa mo tena ‵mana sē fuafuagina ko te mea ke mafai o katoatoa te otou fa‵ki fakatasi mo te kufaki mo te fia‵fia.”—Kolose 1:11.