1. Akory nataony Zan̈ahary nan̈amia angovo panomponany taloha tan̈y?

 MATETIKY Volan̈a Zan̈ahary mivolan̈a fa iro lelahy manampinoan̈a aby io olo matanjaka. Kanefa nisy fotoan̈a koa iro io mba nahatsiaro ten̈a malemy. Panjaka Davida, ohatra, ndraikindraiky nahatsapa ten̈a ‘fatatra karaha bongo’, fa nisy fotoan̈a koa izy ‘nangorohoro.’ (Sal. 30:7) Fan̈ahiny Zan̈ahary koa nan̈amia angovo Samsona ke izy loso natanjaka mare. Kanefa hainy Samsona fa izikoa tsy tio angovo baka tamy Zan̈ahary io, izy ‘halemy ke hitovy aminolo jiaby fo.’ (Mpits. 14:5, 6; 16:17) Angovo baka tamy Jehovah nahavy iro panomponany tsy mivadiky aby io hatanjaka.

2. Nan̈ino apostoly Paoly nivolan̈a fa izy sady malemy avio matanjaka? (2 Korintianina 12:9, 10)

² Apostoly Paoly niaiky fa izy koa mba nila angovo baka tamy Jehovah. (Vakia 2 Korintianina 12:9, 10.) Karaha maro amintsika, Paoly koa mba niady taminy aretin̈y. (Gal. 4:13, 14) Nisy fotoan̈a koa tsy nora taminany foeky nan̈ano ny tsara. (Rom. 7:18, 19) Ndraikindraiky, izy niasaloha ndreky navozo amy raha mety avoa izy. (2 Kor. 1:8, 9) Ndray zen̈y, tamy fotoan̈a Paoly nahatsiaro nalemy edy izy nanjary natanjaka. Tamy fomba akory? Jehovah nan̈amia angovo nilainy baka hahavitany hiatriky raha sarotro aby io.

3. Ino aby fan̈ontanian̈a hivaliantsika amy lahatsoratra ty?

³ Jehovah koa mampan̈anten̈a fa izy han̈amia angovo hahavitantsika hiaritry. (1 Pet. 5:10) Fa atsika tsy hahazo angovo io izikoa atsika tsy man̈ano raha. Aleva onon̈o baka ohatra ty: Angovo baka amy motera mampandeha tomabily. Ndray zen̈y, tomabily io tsy hiteky izikoa tsy diaviny sofera akseleratera. Karaha zen̈y koa, Jehovah von̈ono han̈amia angovo ilaintsika, fa atsika fo mila man̈ano raha baka hazahoan̈a hatsaran̈a baka amizio. Ino aby raha efa namezany Jehovah atsika baka hazahoantsika  angovo? Baka io ino raha mila ataontsika baka hazahoantsika angovo io? Baka ahitantsika valiny fan̈ontanian̈a aby zen̈y, atsika handiniky akory nataony Jehovah nan̈ampy paminan̈y Jona, Maria reniny Jesosy, ndreky apostoly Paoly. Hizahavantsika koa akory ataony Jehovah mbala man̈amia angovo panomponany aminy andra zioty, karaha nataony taloha tan̈y.

4. Akory fomba azahoantsika angovo baka amy Jehovah?

⁴ Mivavaka amy Jehovah an̈isany fomba araiky afaka hazahoantsika angovo baka aminany. Jehovah hamaly vavakantsika ke han̈amia atsika ‘angovo mihoatrany ninolombelon̈o.’ (2 Kor. 4:7) Hahazo angovo koa atsika izikoa mamaky Volan̈anany ndreky misaintsain̈y izio. (Sal. 86:11) Hafatra Jehovah handeha amintsika an̈aty Baiboly ao “mahery.” (Heb. 4:12) Izikoa anao mivavaka amy Jehovah ndreky mamaky Volan̈anany, anao hahazo angovo ilainao baka hahavitanao hiaritry, ho ravoravo fo, na hahavita han̈ano andraikitry sarotro mare. Aleva onon̈o akory nataony Jehovah nan̈amia angovo paminan̈y Jona.

5. Nan̈ino paminan̈y Jona nila angovo?

⁵ Ten̈a nila angovo paminan̈y Jona. Izy navozo handeha tamy toeran̈a nan̈irahany Jehovah izy, ke izy niondran̈a sambo nandeha tantany hafa. Vokanizen̈y, saiky naty izy ndreky iro olo sambo araiky taminany aby io koa fa takany andra ratsy. Izikoa izy fa natsipinolo aby io tandranomasin̈y tan̈y, izy natelin̈y laoko maventy be. Nahiziky mare tan̈aty kibony laoko io tao. Mba akory eky tsapany Jona tan̈aty tao? Izy ma nieritreritry fa izy hofoaty ao? Mety loso diniky ma izy tsao efa nariany Jehovah? Misaora vaky asaloha mare Jona.

6. Eraka Jona 2:1, 2, 7, tamy Jona tan̈aty kibony laoko in̈y, ino raha nan̈amia angovo izy?

⁶ Tamy Jona latsatokan̈a tan̈aty kibony laoko io, ino raha nataony baka hahazo angovo? Izy nivavaka tamy Jehovah. (Vakia Jona 2:1, 2, 7.) Hainy Jona fa izy tsy nan̈araka volan̈a Jehovah ke izy nibebaka, avio izy nino fa Jehovah hitandren̈y vavakanany. Jona koa nisaintsain̈y raha koran̈iny Soratra Masin̈y. Nan̈ino atsika mivolan̈a zen̈y? Fotony amy vavakanany, voasoratra amy Jona toko faharoe ao, ahitan̈a volan̈a maro mitovy amy lay hita amy Salamo ao. (Ampiràn̈a, ohatra, Jona 2:2, 5 ndreky Salamo 69:1; 86:7.) Mazava hoazy fa hainy Jona tsarabe andininy aby io. Iro io nan̈ampy izy hatoky fa Jehovah han̈ampy izy. Jehovah nan̈avotro Jona, ke tafara tatỳ izy nanjary von̈ono han̈ano raha nan̈irahany Jehovah izy.​—Jona 2:10–3:4.

7-8. Akory fomba nazahoany rahalahy araiky baka Taïwan angovo nahavitany niaritry fitsapan̈a?

⁷ Ohatrany Jona in̈y afaka man̈ampy atsika lera atsika miatriky fitsapan̈a isankarazany. Zhiming, b rahalahy araiky baka Taïwan, ohatra, marary mare. Tsy basinizen̈y fa misy havany manohitry izy mare fotony izy mino Jehovah. Ke akory ataony baka hahazo angovo baka amy Jehovah? Izy mivavaka ndreky mianatra. Karaha ty volan̈iny: “Ndraikindraiky izikoa fa misy problemo miboaka, zaho miasaloha mare ke ndray han̈ano fianaran̈a manokan̈a loso tsy vitako fotony zaho tsy mahavita mifantoko.” Fa izy tsy kivy. Karaha ty ho izy: “Voanalohany, zaho mivavaka amy Jehovah. Baka io, atsetako ekoteranaka zaho mitandren̈y hira momba Fanjakan̈any Zan̈ahary. Ndraikindraiky aby zaho mihirahira moramora firaka jerinaka milamin̈y. Zaho baka io amy zay mianatra.”

 ⁸ Fianaran̈a manokan̈a nan̈amia angovo Zhiming baka hahavitany hiaritry raha sarotro. Tafarany didibe natao taminany, ohatra, nisy infirmiera nivolan̈a taminany fa ambany loatra liomena an̈aty vatan̈anany ke izy tsy maintsy hampidiran̈a lio. Fa alin̈y talohany fandidian̈a io, Zhiming efa namaky tantarany ranabavy araiky natao fandidian̈a nitovy taminany. Liomenany ranabavy io mbala ambanimbany tozay niny Zhiming. Ndray zen̈y, ranabavy io tsy nan̈eky ampidiran̈a lio foeky avio izy mbala janga fo tafara tatỳ. Tantarany ranabavy io nan̈ampy Zhiming hahazo angovo hahavitany tsy hivadiky.

9. Izikoa anao mahatsapa malemy azony fitsapan̈a araiky, ino raha mety ataonao? (Zahava koa sary.)

⁹ Tsy vitanao foeky ma mivavaka lera anao miatriky fitsapan̈a fotony anao miasaloha loatra? Sa anao maharen̈y kajo loatra amy fotoan̈a io ke tsy mahavita mianatra? Tsarova fa hainy Jehovah tsarabe raha mavoa anao. Ke ndray tsotra hely fo vavaka ataonao, matokisa fa izy han̈amia anao raha ten̈a ilainao. (Efes. 3:20) Izikoa sarotro aminao hamaky teny na hianatra fotony anao marary na kajo na miasaloha mare, ino raha mety ataonao? Anao afaka mitandren̈y vaky Baiboly nalain̈a feo na lahatsoratra araiky amy boky ndreky gazetintsika aby io. Afaka ataonao koa mitandren̈y araiky aminy hirantsika aby io na mizaha video amy jw.org. Jehovah tihankahery anao ke izy han̈ano zen̈y izikoa anao mivavaka aminany avio mitady valiny vavakanao an̈aty Baiboly ndreky amy raha jiaby amezany atsika.

10. Amy fomba karakory iro rahalahy ndreky ranabavintsika aby io afaka mankahery atsika?

¹⁰ Iro rahalahy ndreky ranabavintsika kristianin̈y aby io afaka ampiasainy Jehovah hankahery atsika. Iro afaka ‘ten̈a han̈ampy ndreky hankahery’ atsika lera atsika miatriky fitsapan̈a na sahiran̈a man̈atanteraka andraikitry sarotro araiky. (Kol. 4:10, 11) Ten̈a mila naman̈a koa atsika “aminy andra sarotro.” (Ohab. 17:17) Lera atsika malemy, iro rahalahy ndreky ranabavintsika aby io afaka man̈amia raha ilaintsika, mankahery atsika, ndreky mandrisiky atsika tsy hivadiky amy Jehovah. Diniha  baka akory nataony Maria reniny Jesosy nahazo fankahirezan̈a baka taminolo.

11. Nan̈ino Maria nila angovo?

¹¹ Maria ten̈a nila angovo. Iritrireta hely mety ho karakory asalohanany taminizy nahazo andraikitry mavesatra baka taminy anjely Gabriela in̈y. Izy mbala tsendriky nanambady kanefa handeha havesatra. Izy koa mbala tsiary nitarimy tsaiky kanefa handeha hikarakara tsaiky lelahy araiky hanjary Mesia. Baka io, Maria tsiary nan̈ano firaisan̈a. Ke akory ataony han̈azava raha jiaby zen̈y amy Josefa, lelahy hangala vady izy io?​—Lioka 1:26-33.

12. Izikoa zahavan̈a Lioka 1:39-45, karakory fomba nazahoany Maria angovo nilainy?

¹² Akory fomba nazahoany Maria angovo nilainy han̈anaovan̈a andraikitry niavaka sady sarotro be io? Izy nitady fan̈ampian̈a baka taminolo. Ohatra, izy nan̈iraka Gabriela han̈azava tsarabe aminany raha momba andraikitry io. (Lioka 1:34) Tsy ela tafaranizen̈y, izy nandeha tamy ‘faritry be bongo’ ta Joda, handeha hamangy Elizabeta havany. Nisy vokany tsara dia nataony io. Izy niderainy Elizabeta. Baka io, Elizabeta nahazo fan̈ahy masin̈y baka tamy Jehovah ke nivolan̈a faminanian̈a araiky ten̈a mankahery momba tsaiky tan̈aty kibony Maria io. (Vakia Lioka 1:39-45.) Maria nivolan̈a fa Jehovah nan̈ano ‘asa mahery tamy baontan̈ananany.’ (Lioka 1:46-51) Jehovah nampiasa Gabriela ndreky Elizabeta han̈amezan̈a angovo Maria.

13. Ino raha niboaka izikoa ranabavy araiky fa nangataka fan̈ampian̈a tamy piaramanompo?

¹³ Karaha Maria, anao koa afaka mahazo angovo baka amy piaramanompo. Karaha zen̈y iziô Dasuri, ranabavy baka Bolivie. Izy ten̈a nila angovo. Papany narary mare sady efa tsisy aodiny foeky aretin̈inany io. Izikoa izy fa tafiditry lopitaly, Dasuri nan̈ano erakany vitany hikarakaran̈a papany. (1 Tim. 5:4) Fa raha zen̈y tsy nora. Karaha ty ho izy: “Zaho matetiky nahatsapa fa efa tsy ho vitako eky izio.” Fa tamy voanalohany izy mbala tsy nangataka fan̈ampian̈a taminolo. Ho izy: “Zaho tsy tihanahiran̈a iro piaramanompo aby io. Tan̈aty jeriko tan̈y, ‘Efa Jehovah edy ny han̈amia angovo ilaiko.’ Fa zaho baka tio tontohitry fa kaiky miady manokan̈a amy problemonaka fo zaho izikoa tsy mangataka fan̈ampian̈a aminolo.” (Ohab. 18:1) Ke Dasuri nanapakevitry hanoratra tamy kamaradiny sasany ndreky han̈azava amindro raha mandalo aminany io. Ho izy: “Tsisy volan̈a mahavolan̈a fankahirezan̈a nazoko baka tamindro piaramanompo aby io. Iro nan̈atitry hanin̈y ta lopitaly tan̈y ndreky nikoran̈a andininteny mankahery taminaka. Ten̈a mankahery mare mahay fa anten̈a tsy latsatokan̈a. Atsika jiaby an̈isany fianakavian̈any Jehovah. Iro rahalahy ndreky ranabavintsika aby io man̈iry han̈amia raha ilaintsika, hiaraka hitomoan̈y amintsika lera atsika mijaly, ndreky hankahery atsika baka hahavitantsika hanohy hanompo Jehovah miaraka amindro.”

14. Nan̈ino atsika tôkony han̈eky fan̈ampian̈a baka aminy antipan̈ahy?

¹⁴ Antipan̈ahy koa an̈isany fomba araiky ampiasainy Jehovah han̈amezan̈a angovo atsika. Iro io kado ampiasainy hankahery ndreky hamelombelon̈o atsika. (Isaia 32:1, 2) Ke izikoa anao fa miasaloha, koràn̈a aminy antipan̈ahy raha mampiasaloha anao io. Baka io, aza mirekireky man̈eky fan̈ampian̈a baka amindro. Jehovah afaka mampiasa iro antipan̈ahy aby io han̈amezan̈a angovo anao.

15. Ino fan̈antinan̈a anan̈any Kristianin̈y jiaby?

¹⁵ Iro fampan̈antinan̈a an̈aty Baiboly ao afaka man̈amia fan̈antinan̈a atsika ndreky angovo  hahavitantsika manohy manompo Jehovah. (Rom. 4:3, 18-20) Kristianin̈y sasany man̈anten̈a hiain̈y tsisy farany andan̈itry an̈y, fa sasany ndraiky man̈anten̈a hiain̈y mandrakizay amy Paradisa tsara mare ambony tany eto. Fan̈antinan̈antsika io man̈amia angovo hahavitantsika miaritry fitsapan̈a, mitory vaovao tsara, ndreky man̈ano andraikitry samihafa an̈ivony fiangonan̈a. (1 Tes. 1:3) Mbala fan̈antinan̈a io fo koa nan̈amia angovo apostoly Paoly.

16. Nan̈ino apostoly Paoly nila angovo?

¹⁶ Paoly nila angovo. Tamy taratasy nisoratiny tamindro Korintianin̈y aby io, Paoly nivolan̈a fa izy miran̈a vilan̈y tany. Izy “voasery”, “very hevitry”, “ian̈iny”, avio “atreky.” Ndray izy aby efa navy saiky naty foeky. (2 Kor. 4:8-10) Tamy dia misionera fahatelo nataony, Paoly nanoratra volan̈a aby io. Fa tafarany nanoratany iro io, nahainaro fo raha sarotro navoa izy. Izy tojy vahoaka romotro, nisamborin̈y, vaky sambo, avio nigadrain̈y.

17. Eraka 2 Korintianina 4:16-18, ino raha nan̈amia angovo Paoly baka hahavitany hiaritry fitsapan̈a?

¹⁷ Akory fomba nazahoany Paoly angovo nahavitany niaritry? Izy nifantoko tamy fan̈antinan̈anany. (Vakia 2 Korintianina 4:16-18.) Paoly nivolan̈a tamindro Korintianin̈y aby io fa ndray vatan̈anany ‘mahay osa’, zen̈y tsy ambelany hampakivy izy. Fan̈antinan̈anany fo nataony tan̈aty jery. Ten̈a “voninahitry maventy” fan̈antinan̈anany hiain̈y tsisy farany andan̈itry an̈y, ke tsy nampan̈ino Paoly foeky ndray izy niaritry fitsapan̈a isankarazany baka hazahoan̈a izio. Paoly nisaintsain̈y fan̈antinan̈anany zen̈y, ke vokany, izy nahatsapa ‘navaozin̈y fo isanandra.’

18. Nan̈ino fan̈antinan̈andro nan̈amia angovo Tihomir ndreky fianakavian̈anany?

¹⁸ Nan̈amia angovo Tihomir, rahalahy araiky baka Bulgarie, fan̈antinan̈anany. Taon̈o vitsivitsy zay, naty zandriny fotony voany aksidan. Zdravko an̈arany zandriny io. Vokanizen̈y, Tihomir nanjary kivy mare. Ke baka hahavitany miaritry raha zen̈y, izy ndreky fianakavian̈anany  miaraka misaintsain̈y fampan̈antinan̈a momba fitsanganan̈a amy maty. Karaha ty ho izy: “Zahay, ohatra, mikoran̈a aia tany hifanojianay amy Zdravko, ino hanin̈y halokinay ninany, azovy olo hikahianay amy fety voanalohany hataonay lera izy fa iô, baka io ino raha hikoran̈inay aminany momba andra farany.” Tihomir mivolan̈a fa fianakavian̈anany loso mahazo angovo hahavitan̈a miaritry fo ndreky miambin̈y andra hamilomany Jehovah rahalahiny io, fotony iro mifantoko amy fan̈antinan̈andro.

19. Ino raha mety ataonao baka ho fatatra fo fan̈antinan̈anao? (Zahava koa sary.)

¹⁹ Ino raha mety ataonao baka ho fatatra fo fan̈antinan̈anao? Izikoa anao man̈anten̈a hiain̈y tsisy farany ambony tany eto, vakia raha koran̈iny Baiboly momba Paradisa avio saintsain̈a izio. (Isaia 25:8; 32:16-18) Aleva onon̈o han̈ano akory fiain̈ana amy donia vaovao. Miniminia anao amy fotoan̈a zen̈y. Azovy aby olo ho hitanao? Ino raha ho ren̈inao? Akory ho tsapanao? Baka ho vitanao hangala sary antsain̈y fiain̈ana amy Paradisa, zahava sary amy boky ndreky gazetintsika aby io. Na koa zahava iro videony hirantsika aby io, karaha ataony hira Ho Avy Donia Vaovao, Izio ‘fa Ambadiky Ao, na Mba Ataova Antsain̈y. Izikoa atsika mangala fotoan̈a tsy tapaka misaintsain̈y fiain̈ana amy donia vaovao, ‘hielan̈a ndreky hahivan̈a’ fo problemontsika aby io. (2 Kor. 4:17) Fan̈antinan̈a namezany Jehovah anao io afaka man̈ampy anao hahavita hiaritry fitsapan̈a.

20. Akory fomba hazahoantsika angovo lera atsika malemy?

²⁰ Ndray lera atsika mahatsiaro ten̈a malemy, ‘atsika hahazo angovo baka amy Zan̈ahary.’ (Sal. 108:13) Efa namezany Jehovah anao raha ilainao baka azahoanao angovo baka aminany. Ke izikoa anao mila fan̈ampian̈a baka hahavitanao andraikitry araiky, hiaritry fitsapan̈a, na ho ravoravo fo, mivavaha amy Jehovah avio man̈anaova fianaran̈a manokan̈a baka hazahoanao taridalan̈a baka aminany. Ikia fankahirezan̈a baka amindro rahalahy ndreky ranabavinao aby io. Saintsain̈a tsy tapaka fan̈antinan̈anao. Izikoa anao man̈ano zen̈y, ‘Zan̈ahary hampiasa angovonany be voninahitry ke hankafatatra anao ndreky han̈amia angovo jiaby ilainao, baka hahavitanao hiaritry raha jiaby ndreky hanampaharetan̈a avio ho ravoravo.’​—Kol. 1:11.