1-2. Yo mene maber loyo me kwano Baibul? Mi labol.

 GO KONG ni itye ka moko tammi me wilo ot. Gin ango ma ibibedo ki miti me nenone ma peya imoko tammi? Tika ibiyeng ki neno cal ma nyuto nyim ot meno keken? Labongo akalakala mo, ibibedo ki miti me cito ka neno ot man ki wangi, wek ilwor ki woko, idony i rum ma i iye ducu, kun ingiyo jami ducu ma kwako ot man i yo matut. Bibedo ber ma loyo ka onongo itwero ngiyo pulan me ot man wek inen kit ma kigero kwede. Ngene kene ni, ibibedo ki miti me neno jami ducu ma kwako ot ma imito wilo-ni.

² Watwero timo gin marom aroma ka watye ka kwano Baibul i yo matut. Lacoc mo owaco ni Baibul tye calo “ot mo madit dok mabor adada ma kigero i kom guti matut adada.” Dong, watwero ngeyo maber jami ducu ma tye i Baibul nining? Ka ikwano mere oyotoyot, ibipwonyo lok mayot​—ma en aye “lok mukwongo ma dok i kom lok pa Lubanga” keken. (Ibru 5:12) Ento, kit macalo mitte ni idony wa i ot wek iniang jami mapol i kom ot meno, mitte bene ni ikwan Baibul i yo matut wek iniang lokke maber. Yo maber me kwano Baibul aye me neno kit ma bute moni kubbe kwede ki bute mukene. Pe itute me niang gin ma in iye keken ento bene pingo iye lok ada magi.

3. Gin ango ma lakwena Paulo ocuko cwiny Lukricitayo luwote me timone, dok pingo? (Jo Epeco 3:​14-19)

 ³ Me niang bute mapatpat ducu me Lok pa Lubanga, mitte ni wapwony lok ada me Baibul ma tere tut. Lakwena Paulo ocuko cwiny Lukricitayo luwote me kwano Lok pa Lubanga ki diro wek ‘guniang kit ma lok ada lac kwede, kit ma bor kwede, kit ma odongo kwede malo, ki kit ma tut kwede.’ Ka onongo gutimo meno, ci gibicung “matek macalo yat ma lwite odonyo matut i ngom.” (Kwan Jo Epeco 3:​14-19.) Wan bene omyero watim meno. Kong dong wanenu kit ma watwero kwano kwede Lok pa Lubanga ki diro wek wanong lonyo ducu ma tye iye.

4. Watwero timo gin ango me nyikke cok ki Jehovah? Mi labol mogo.

⁴ Macalo Lukricitayo, pe wayeng ki pwonyo lok ada mayot me Baibul keken. Ki kony pa cwiny maleng pa Lubanga, watye ki miti me pwonyo “kadi wa tam ma Lubanga okano i iye ka matut.” (1 Kor. 2:​9, 10) Pingo pe icak yub me kwan i yo matut piri keni ma bikonyi me nyikke cok ki Jehovah? Me labolle, itwero kwedo kit ma en onyuto kwede ki marre pi luticce ma gukwo i kare macon dok ki kit ma meno nyuto kwede ni en mari. Itwero bene kwano kit ma Jehovah onongo mito ni Luicrael guwore kwede kun iporo ki kit ma en mito ni wawore i kare-ni. Nyo itwero timo kwed i kom lok pa lunebi ma Yecu ocobogi i kare me kwone i lobo.

5. Tika tye gin mo ma imito timo kwed iye matut?

⁵ Kipenyo Lucaden mogo ma gimaro timo kwed ni gutit kong jami mogo ma gimito kwedone ki i Lok pa Lubanga. Itwero neno lagamgi mogo i bok ma wiye tye ni “ Jami Mogo ma Itwero Kwedone ki i Baibul.” Iromo nongo yomcwiny madwong ki i kwedo lok magi kun itiyo ki Watch Tower Publications Index nyo Buk ma Konyo Lucaden pa Jehovah me Kwedo Lok. Kwano Baibul i yo matut twero jingo niyeni dok bikonyi me nongo “ngec i kom Lubanga.” (Car. 2:​4, 5) Kong dong wanyamu lok ada mogo me Baibul ma tergi tut.

6. (a) Apokapoka ango ma tye i kin pulan ki yub? (b) Pingo watwero waco ni yub pa Jehovah pi dano ki lobo “onongo yam tye con” dok birii pi naka? (Jo Epeco 3:11)

⁶ Me labolle, nen kong gin ma Baibul waco madok i kom yub pa Lubanga. Apokapoka madit tye i kin pulan ki yub. Watwero poro pulan ki yero yo ma biteri ka ma imito cito iye. Ento ka inongo kiketo kigeng i yo meno, ci pe ibio ka ma imito cito iye. Ki tungcel, watwero poro yub ki kabedo ma wamito cito iye-ni. Wangeyo kabedo meno kikome, ento watwero tic ki yo mapatpat me cito kunu. Ka wanongo kigeng i yo acel, walokke watiyo ki yo mukene. Watye ki pwoc ni kibedo ka nyuto “tam [yub] pa Lubanga ma onongo yam tye con” motmot i Baibul. (Ep. 3:11) Jehovah twero yero yo mapatpat me cobo yubbe, dok kare ducu yubbe cobbe pien en ‘oketo jami ducu pi tyen lokke.’ (Car. 16:4) Dok adwogi me tic pa Jehovah birii pi naka. Yub pa Jehovah tye ningo, dok alokaloka ango ma en oketo me cobone?

7. I nge jemo pa laco ki dako mukwongo, Jehovah oloko yo me cobo yubbe nining? (Matayo 25:34)

⁷ Lubanga otito bot laco ki dako mukwongo yubbe ma onongo en tye kwede pigi. En owaccigi ni, “Wunywal, wunya, wupong lobo, wulo bene; dok wulo wa . . . gin ducu makwo ma giwoto i wi lobo.” (Acak. 1:28) I kare ma Adam ki Kawa gujemo, dok guweko bal odonyo i lobo, meno pe ogengo Jehovah ki cobo yubbe. En oloko yo ma ebicobo kwede ki yubbe. Cutcut i nge meno, en omoko tamme ni ebiketo Kerre i polo ma bicobo yubbe pi dano ki pi lobo. (Kwan Matayo 25:34.) I kare ma Jehovah onongo omoko, en ocwalo Wode i lobo wek opwony dano lok i kom Ker-ri dok omi kwone macalo ginkok me larowa ki i bal kacel ki to. I nge meno, Jehovah ocero Yecu ci en odok cen i polo ka loc macalo Kabaka me Ker pa Lubanga. Ento pud watye ki jami mapol me apwonya madok i kom yub pa Lubanga.

8. (a) Pen lok me Baibul tye nining? (b) Kit ma kitito kwede i Jo Epeco 1:​8-11, ngo mukene ma pire tek ma Jehovah bitimone? (Nen cal ma tye i pok ngeye.)

⁸ Pen lok me Baibul aye ni kibilonyo nying Jehovah i kare ma en bicobo iye yubbe pi lobo kun tiyo ki Kerre ma tye i te loc pa Kricito. Yub pa Jehovah pe kitwero lokone. En ocikke ni jami ducu bicobbe kit ma en owaco kwede kikome. (Ic. 46:​10, 11; Ibru 6:​17, 18) I karene kikome, lobo bidoko paradic ka ma likwayo pa Adam ki Kawa ma kitgi atir dok gipe ki roc gibibedo ki “kwo maber nakanaka.” (Jab. 22:26) Ento Jehovah bitimo makato meno. En bene biribo luticce ducu ma i polo ki lobo. I nge meno, jo ducu ma i polo ki lobo gibimine i te Loc pa Jehovah. (Kwan Jo Epeco 1:​8-11.) Mono pe itye ki ur i kom kit ma Jehovah bicobo kwede ki yubbe i yo mamwonya adada-ni!

9. Ka wakwano Baibul, ci watwero neno i anyim wa i kare mene?

⁹ Tam kong i kom lok ma Jehovah otito i poto me Eden, ma kicoyo pire i Acakki 3:15. b Oloko i kom jami ma onongo bicobo yubbe. Ento jami magi onongo bitimme i nge mwaki mapol ata. Me labolle, Lubanga otito ki Abraim ni i nge yalwak mapol, lakware mo acel bidoko Kricito. (Acak. 22:​15-18) Ci i mwaka 33 K.M., kitongo opuny tyen Yecu, kit ma onongo kitito kwede con. (Tic 3:​13-15) Bute me agikki me lok pa lanebi meno, ma tito ni ‘lakwar’ dako bigoyo wi Catan, bicobbe i nge mwaki makato 1,000. (Yabo 20:​7-10)  Dok Baibul tito jami mapol ma bitimme ka mone ma tye i kin lobo pa Catan ki dul pa Jehovah woto ki o i agikkine.

10. (a) Jami mene ma bitimme cokcok-ki i anyim? (b) Watwero yubo tamwa ki cwinywa nining? (Nen lok ma i tere piny.)

¹⁰ Tam kong i kom jami me aura ma bitimme ma Baibul otito pire. Mukwongo, lobe gibimiyo lok angeya ni “kuc tye, piny okwe mot, gin mo marac pe!” (1 Tec. 5:​2, 3) Ci twon can madit atika-ni bicakke “atura” i kare ma lobe bijwero dini goba ducu. (Yabo 17:16) I nge meno, gin mo me aura twero nen ma nyuto ni ‘Wod pa dano tye ka bino ki i wi pol me polo, ki twero madwong, ki deyo madit.’ (Mat. 24:30) Yecu bingolo kop i kom dano kun poko romi ki i kin dyegi. (Mat. 25:​31-33, 46) I kare meno, Catan pe bibedo mot. Pien en dag jo pa Jehovah, en bitugo cwiny lobe ma guribbe, ma Baibul lwongo ni Gog me lobo Magog, me oto lweny i kom jo pa Jehovah. (Ejek. 38:​2, 10, 11) I nge kare mo, kibicoko udong jo ma kiwirogi kiterogi i polo me ribbe ki Kricito kacel ki mony me polo pi lweny me Armagedon, ma en aye agikki me twon can madit atika-ni. c (Mat. 24:31; Yabo 16:​14, 16) Ka dong Loc me Mwaka Alip Acel pa Kricito bicakke.​—Yabo 20:6.

11. Gen me kwo pi naka tyen lokke ngo piri? (Nen bene cal.)

¹¹ Kong dong itam i kom anyimmi i nge Mwaka Alip Acel me Loc pa Kricito. Baibul waco ni Lacwecwa ‘oketo kadi wa kare malac i cwinywa.’ (Latit. 3:11) Tam kong i kom adwogi maber ma meno bikelo boti kacel ki i kom watti ki Jehovah. Buk me Draw Close to Jehovah, pot karatac 319, otito lok mamit man: “I nge bedo kwo pi mwaki miya, alip, milion, nyo bilion mapol, wabibedo ki ngec madwong adada i kom Lubanga Jehovah ma loyo i kare-ni. Ento pud wabinongo ni watye ki jami me aura mapol ma watwero pwonyo i kome. . . . Pe watwero niang kwicikwici kit ma kwo i paradic bibedo mamit kwede. Ento gin ma pud dong bibedo ber loyo aye nyikke cok ki Jehovah.” Ka pud wakuro kare meno, kun  wamedde ki kwano Lok pa Lubanga, gin ango mukene ma watwero timo kwed iye?

12. Watwero neno malo i polo nining? Mi labol.

¹² Lok pa Lubanga miniwa ginanyuta manok ma nyutiwa kit ma polo ka ma Jehovah bedo iye nen kwede. (Ic. 33:5) Baibul nyutiwa jami me aura i kom Jehovah kacel ki but dulle ma tye i polo. (Ic. 6:​1-4; Dan. 7:​9, 10; Yabo 4:​1-6) Me labolle, watwero kwano jami me aura ma Ejekiel oneno i kare ma ‘polo oyabbe, ci otugi neno Lubanga i ginanyuta.’​—Ejek. 1:1.

13. Iwinyo nining i kom tic ma Yecu tye ka timone i polo, kit ma kitito kwede i Jo Ibru 4:​14-16?

¹³ Tam bene i kom tic ma Yecu tye ka timone piwa i polo macalo Kabakawa ki Lalamdogwa Madit ma lakica. Watwero bino i nyim ‘komker pa Lubanga, ka ma kica tye iye,’ ka walego pi kica ki kony “i kare ma mitte” kun wawok ki bot Yecu. (Kwan Jo Ibru 4:​14-16.) Nino ducu omyero watam i kom gin ma Jehovah ki Yecu gutimo dok gitye ka timone piwa ki i polo. Margi piwa omyero ogud cwinywa dok owek wabed ki mit kom i ticwa ki worowa pi Jehovah.​—2 Kor. 5:​14, 15.

14. Gin ango maber loyo ma watwero timo me nyuto pwocwa bot Jehovah ki Yecu? (Nen bene cal.)

¹⁴ Yo maber loyo me nyuto bot Jehovah gin ki Wode ni watye ki pwoc aye ki konyo jo mukene me doko Lucaden pa Jehovah ki lupwonnye pa Yecu. (Mat. 28:​19, 20) Meno aye gin ma lakwena Paulo otimo me nyuto pwocce bot Lubanga ki Kricito. En oniang ni Lubanga “mito laro jo ducu, dok mito ni jo ducu gunge lok me ada.” (1 Tem. 2:​3, 4) Pi meno, en otute matek i ticce me pwony me konyo dano mapol kit ma en twero ‘wek omi elar jo mogo.’​—1 Kor. 9:​22, 23.

15. Ma lubbe ki Jabuli 1:​2, ngo ma bikeliwa yomcwiny?

¹⁵ Laco jabuli otito ni ngat ma cwinye yom, dok ma kwone wok maber obedo ngat ma “maro kwano cik pa Rwot [Jehovah]” dok “lwodo lok i kom cikke dyeceng ki dyewor.” (Jab. 1:​1-3) Laco mo ma obedo lagony lok me Baibul oloko i kom tyeng magi kun waco ni dano myero “obed ki miti matek me nongo tira pa Lubanga ma weko en yenyo, kwano, dok tero kare malac me lwodone.” En bene owaco ni “ka nino mo okato ma ngat meno pe okwano Baibul, ci nino meno nongo olannye woko.” Itwero nongo yomcwiny i kwano Baibul ka itye ki miti me niang kit ma jami mapatpat ma iye gikubbe kwede. Pud dong kelo yomcwiny madit ya me kwano Lok pa Lubanga i yo matut!

16. Gin ango ma wabinyamo i pwony ma lubo man?

¹⁶ Lok ada mamwonya ma Jehovah pwonyowa kwede i Lokke, pe gitek tutwal ma pe watwero niang. I pwony ma lubo man, wabinyamo lok ada acel i kingi​—madok i kom ot pa Jehovah i yo me cwiny, ma lakwena Paulo oloko iye i waragane bot Lukricitayo ma Luibru. Walego ni, timo kwed i kom lok meno okelli yomcwiny madit.