1-2. Mɩnla ɔhʋanɩba yɛ yɛkɔhʋla yekoluwa zʋlɔ yekozuma Bayɩbʋlʋ yɩ a? Ma nwʋmɔ ndianwʋ.

 FA YƖ kɛɛ ɛpɛ kɛɛ ɛhayɩ aliyia. Mɩnla yɛ ekehila wɔ aliyia yɩ nwʋ ansaana wʋazi wʋ pɔkɔ a? Asʋ̃ ekehila aliyia yɩ mfonyini la a? Pɩlazunɛ bela íni nwʋmɔ kɛɛ ɔkɔhɔ kɛnɩ na wʋahɔ wʋahilahila aliyia yɩ nu wʋanwʋ kɛɛ dɩyɛ bela dɩ baaba ansaana wʋahayɩ aliyia yɩ. Sianti mɔɔ ɛkɛyɛ zɔ yɛ lɛ kɛɛ wʋábɛ kɛɛ ɔkɔdʋ wu ozukua okogua.

² Sa yɛkʋla yɛyɛ zɔ la mmɩlɩ mɔ yesumaa Bayɩbʋlʋ yɩ. Bayɩbʋlʋ nwʋ nnimidivʋlɔ be hanlɩ kɛɛ “Bayɩbʋlʋ yɩ dɩ kɛɛ aliyia kezile tɩndɩnlɩ be mɔɔ begyina wɔ fapɩmɩ baaba be zʋ.” Meti kɛ ɩkɛyɛ na yɛanwʋ mɔɔ ɩwɔ Bayɩbʋlʋ yɩ nu munwala bʋwɔ a? Sɛ wʋási abʋtalɩ kɩnga a, bɔmʋnlɩ nninyeni mɔɔ yɩ tʋdɩlɛ ɩáyɛ sɩ nɩ nkʋ̃ la yɛ ɔkɔnwʋ yɩ a. (Hib. 5:12) Meti dɩkɛɛ aliyia yɩ nɩ, ɩsɛ kɛɛ osuma Bayɩbʋlʋ yɩ ɔkɔ aɣinzi ansaana wʋadɩ yɩ tʋ. Ɔhʋanɩ ɔkʋ̃ mɔɔ yekoluwa zʋ yɛkɛyɛ eyi yɛ lɛ kɛɛ, yekehila kezimɔ Bayɩbʋlʋ nu odwokɔ be ɩ nɩɩ Bayɩbʋlʋ nu ndwokɔ mvʋlɔ yiyia. Bɔ mmɔdɩnɩ kɛɛ ɛkɛdɩ mɔɔ ede edi nɩɩ sianti mɔɔ ede edi kɛɛ ɩdɩ nɔhʋanlɛ nɩ tʋ.

3. Mɩnla yɛ Sʋ̃mavʋlɔ Pɔɔlʋ hanlɩ hileli yi mmeliyema Kilisinyiamaa nɩ kɛɛ bɛyɛ a, na mɩnla ti a? (Ɛfɩsɛsɩmaa 3:​14-19)

³ Sɛ yɛkɛdɩ Nyamɩnlɩ Odwokɔ yɩ tʋ yɛkɔhɔ aɣinzi a, ɩsɛ kɛɛ yesuma Bayɩbʋlʋ nu nɔhʋanlɛ mɔɔ numɔ dɔ nɩ. Sʋ̃mavʋlɔ Pɔɔlʋ hyɛlɩ yi mmeliyema dedimaa yɩ ɛzɩzɩbɛ kɛɛ, bozumá Nyamɩnlɩ Odwokɔ yɩ bʋwɔ ama “bɛadɩ Kɩlayɩsɩ yɩ ɔlɔlɛ nɩ yɩ tɛtɛlɛ, yɩ tɩndɩnlɩ, yɩ sʋlɔhɔlɛ nɩɩ yɩ azɩhɔlɛ” tʋ bʋwɔ. Nɩ eyi kɛma “bekegyina pindinyii” wɔ dedi yi nu. (Kɩnga Ɛfɩsɛsɩmaa 3:​14-19.) Ɔzɔ la sʋ̃ yɛ ɩsɛ kɛɛ amɩyɛ sʋ̃ yɛyɛ a. Bɛmá  yehila kezimɔ yɛkɔhʋla yɛkɛbɩbɛlɩ Nyamɩnlɩ Odwokɔ yɩ nu yɛkɔhɔ aɣinzi yɛkɛdɩ yɩ tʋ bʋwɔ.

4. Kɛ ɩkɛyɛ na yɛahʋla yɛahwɩ̃ yɛaɣike Gyehova a? Ma nwʋmɔ ndianwʋ.

⁴ Kɛ Kilisinyiamaa nɩ, kɛ Bayɩbʋlʋ nu ndwokɔ mɔɔ yɩ tʋdɩlɛ ɩáyɛ sɩ nkʋ̃ la yɛ ɩsɛ kɛɛ yesuma a. Nyamɩnlɩ yi sunzuma nwanzanwanza yɩ kɔhʋla kɔwʋwa yɛ ma yekenyia ɛpɛ kɛɛ yekozuma “nninyeni mɔɔ numɔ dɔ” nɩ. (1 Kɔl. 2:​9, 10, NWT) Sa ɔkʋla fa yɛ wʋ bʋtayɩ kɛɛ okozuma dɩyɛ ɔkɔhɔ aɣinzi na ama wʋaɣike Gyehova. Kɛ ndianwʋ nɩ, sa ɔkʋla osuma kezimɔ ɩlalɩ ɔlɔlɛ ali ihileli yɩ azʋ̃mɩvʋlɔ wɔ ɔwɔkɩ mmɩlɩ nu nɩɩ kezimɔ eyi di dasɩlɛ kɛɛ ɩdɔ wʋzawʋ sʋ̃ nɩ. Sa ɔkʋla suma kezimɔ nɩ Gyehova pɛ kɛɛ Yizilayamaa yɩ bɔsʋ̃mɩ yɩ nɩ, na wʋava wʋadindiã kezimɔ ikila ɔhʋanɩ kɛɛ yɛkɔzʋ̃mɩ yɩ nnɛ nɩ nwʋ. Anzɛnyɩɩ sa ɔkʋla osuma kezimɔ Gyisɛsɩ manlɩ nkɔmɩhyɛ azʋlɔtʋ ɣalɩ numɔ wɔ mmɩlɩ mɔ nɩ ɩyɛɛ yɩ dasɩlɛlilɛ egyima yɩ nwʋ dɩyɛ ɔkɔ aɣinzi.

5. Mɩnla ndwokɔ yɛ ɛkɛbɛ yɩ kɛɛ okozuma nwʋmɔ dɩyɛ ɔkɔhɔ aɣinzi a?

⁵ Mmenii be mɔɔ bɛ anyɩ deli Bayɩbʋlʋ yɩ zumanlɛ nwʋ hanlɩ nninyeni be mɔɔ bɛpɛ kɛɛ bɛpɩbɛlɩ numɔ bɔkɔ aɣinzi nɩ nwʋ odwokɔ. Mɔɔ bɛhanlɩ nɩ be wɔ alɩka mɔɔ ise “ Nninyeni Be Mɔɔ Yɛkɔhʋla Yekozuma Nwʋmɔ Dɩyɛ” nɩ nu. Sa ɔkʋla fa Buuku Mɔɔ Gyehova Dasɩvʋlɔmaa Bɛfa Bɛyɛ Ɛbɩbɛlɛnu nɩ osuma ndwokɔ adile eyimmɔ nwʋ dɩyɛ, na wʋ anyɩ kele. Sɛ osuma Bayɩbʋlʋ yɩ ɔkɔ aɣinzi a, ɩkɛhyɛ wu dedi ɛzɩzɩbɛ, na ɩawʋwa wʋ ma “wʋanyia Nyamɩnlɩ nwʋ nnimidi.” (Ɛɣɛ. 2:​4, 5) Sikalɛyɩ, yɛbahila Bayɩbʋlʋ nu nɔhʋanlɛ mɔɔ numɔ dɔ mɔɔ yɛkɔhʋla yekozuma nwʋmɔ dɩyɛ yɛkɔhɔ aɣinzi nɩ be.

6. (a) Mɩnla sʋnʋnkʋ̃ yɛ ɩwɔ nhyɩhyɛlɩyɛ nɩɩ tile nu pɔkɔ nu a? (b) Mɩnla ti mɔɔ yɛkɔhʋla yɛkɛhã kɛɛ Gyehova yi tile nu pɔkɔ ma adasamaa nɩ ɩkɛɣa numɔ ɔhʋanɩ bela zʋ a? (Ɛfɩsɛsɩmaa 3:11)

⁶ Kɛ ndianwʋ nɩ, bɛmá yehila mɔɔ Bayɩbʋlʋ yɩ kã falɩ Nyamɩnlɩ yi tile nu pɔkɔ nwʋ. Ɔsʋnɩ  nhyɩhyɛlɩyɛ yɛɛ ɔsʋnɩ tile nu pɔkɔ kʋlaa. Nhyɩhyɛlɩyɛ ɩdɩ kɛɛ ɔhʋanɩ mɔɔ ɩfa yɛ ɩkɔ dɩka pɔkyɩɩ be mɔɔ yɛpɛ kɛɛ yɛkɔ nɩ. Naasʋ̃ sɛ debe mɔɔ yɛáhila yɩ ɔhʋanɩ si a, ɩkɔhʋla ɩkɛyɛ sɩ kɛɛ yekodwu dɩka mɔɔ yɛkɔɔ nɩ. Tile nu pɔkɔ sʋ̃ gyĩ kɛnɩ ma dɩka pɔkyɩɩ mɔɔ yɛkɔɔ nɩ. Yezi dɩka pɔkyɩɩ mɔɔ yɛkɔɔ dɩyɛ, naasʋ̃ sa yɛkʋla yeduwa ahʋanɩ sʋ̃maa zʋ yɛkɔ. Meti sɛ ɔnwʋmɔ ba hyinyia a, sa yɛkʋla yɛyɛ nzɩnzanlɩyɛ wɔ nhyɩhyɛlɩyɛ yɩ nu na ama yeadwu yɛ bʋtayɩ yɩ nwʋ. Anyɩnlɩlelɛ odwokɔ yɛ lɛ kɛɛ, Gyehova la yi tile nu pɔkɔ ali hile yɛ ngyɩkɩ̃ɩ̃ ngyɩkɩ̃ɩ̃ wɔ Bayɩbʋlʋ yɩ nu. (Ɛfɩ. 3:11.) Ɔhʋanɩ bela zʋ, sa Gyehova yi tile nu pɔkɔ ba numɔ, iluwakɛɛ “ɩyɛ dɩyɛ bela kɛmɔ ɩkɛyɛ a yi tile nu pɔkɔ kɛɣa nu.” (Ɛɣɛ. 16:4) Na dɩyɛ bela mɔɔ Gyehova kɛyɛ nɩ ɩkɔwʋwa kɛnɩ daabaa. Gyehova yi tile nu pɔkɔ yɛ lɛ mɩnla a, na mɩnla nzɩnzanlɩyɛ yɛ ɩyɛ na ama ɩahʋla ɩaɣa numɔ a?

7. Mmɩlɩ mɔ Adamɩ nɩɩ Yifi bɛdɩlɩ atunwa nɩ, mɩnla ɔhʋanɩ zʋ yɛ Gyehova zɩnzanlɩ yɩ nhyɩhyɛlɩyɛ nu na ama yi tile nu pɔkɔ ɩaɣa numɔ a? (Matiyu 25:34)

⁷ Nyamɩnlɩ hanlɩ yi tile nu pɔkɔ mɔɔ ɩwɔ ɩma adasamaa nɩ nwʋ odwokɔ hileli Adamɩ nɩɩ Yifi. Nɩ “bɔkɔwʋ na bɔ nwʋ ɩazʋnɩ, na bɛahyɛ azɩlɛ yɩ zʋ manlɩ na bɛali abɔdɩ mɔɔ nnwʋanlɩ wɔ numɔ munwatĩĩ zʋ” wɔ azɩlɛ yɩ zʋ. (Gyn. 1:28) Mmɩlɩ mɔ Adamɩ nɩɩ Yifi dɩlɩ atunwa na bɛmanlɩ tanɩ hanlɩ adasamaa munwala nɩ, ɩásɩkɛ Gyehova yi tile nu pɔkɔ. Ɩzɩnzanlɩ ɔhʋanɩ mɔɔ ikoluwa zʋlɔ ɩkɛma yi tile nu pɔkɔ yɩ kɛɣa numɔ nɩ. Ndɛndɛ la, ɩyɛlɩ Bulombunlililɛ be nwʋ nhyɩhyɛlɩyɛ wɔ sʋlɔ mɔɔ ikoluwa zʋlɔ ɩkɛma yi tile nu pɔkɔ mɔɔ nɩ ɩwɔ ɩma azɩlɛ yɩ nɩɩ adasamaa nɩ kɛɣa numɔ. (Kɩnga Matiyu 25:34.) Wɔ Gyehova yɩzayɩ yɩ mmɩlɩ nu nɩ, ɩzʋ̃ yɩ pɛ nu ɩzʋ̃manlɩ yɩ abakanɩ ma ɩɣalɩ azɩlɛ yɩ zʋ ɩɣa ihilehileli mmenii Bulombunlililɛ yɩ nwʋ dɩyɛ, na ɩvalɩ yɩ nnwʋanlɩ idianlɩ kɛnɩ ileli mmenii wɔ owulo nɩɩ tanɩ nu. Mɛyɩ mɛda nɩ, bodunwonli Gyisɛsɩ ma izia ɩhɔlɩ sʋlɔ ma ɩhɔ ɩyɛlɩ Nyamɩnlɩ Bulombunlililɛ yɩ zʋ Bulombunli. Naasʋ̃, sʋ̃maa wɔ kɛnɩ mɔɔ sa yɛkʋla yesuma yɛfalɩ Nyamɩnlɩ yi tile nu pɔkɔ yɩ nwʋ.

8. (a) Mɩnla odwokɔ titili yɛ Bayɩbʋlʋ yɩ gyĩ zʋ a? (b) Kɛmɔ Ɛfɩsɛsɩmaa 1:​8-11 kile nɩ, mɩnla dɔkʋ̃ yɛ Gyehova wɔ yi tile nu kɛɛ ɩkɛyɛ a? (Kila Ɔwɩɛnɩlɛ Aɣanɩ yɩ anyunu mfonyini.)

⁸ Odwokɔ titili mɔɔ Bayɩbʋlʋ yɩ gyĩ zʋlɔ yɛ lɛ kɛɛ, Gyehova iluwa yɩ Bulombunlililɛ mɔɔ Gyisɛsɩ Kɩlayɩsɩ di zʋlɔ Bulombunli yi zʋ ɩkɛdɩ yi dima nwʋ. Na ɩkɛma yi tile nu pɔkɔ ma azɩlɛ yɩ kɛɣa numɔ. Dɩyɛ bela ɩlɔ́kʋla ɩkɛzɩnza Gyehova yi tile nu pɔkɔ kyɩ̃. Na ɩwɔ anʋhʋba kɛɛ mɔɔ ɩhã munwala kɛɣa numɔ pɛpɛɛpɛ. (Ayɩ. 46:​10, 11; Hib. 6:​17, 18) Ɩlɛ́kyɛ bela azɩlɛ yɩ munwatĩĩ kɛlanɩ paladayɩsɩ, dɩka mɔɔ Adamɩ yɩ tʋmaa mɔɔ bedi munli “kɔwʋwa azɩ daabaa.” (Ndw. 22:26) Naasʋ̃, Gyehova ɩwɔ tile nu pɔkɔ be mɔɔ ɩtɛla eyi, mɔɔ mɛyɩ yɛ lɛ kɛɛ ɩkɛhã yɩ azʋ̃mɩvʋlɔ mɔɔ bɔwɔ sʋlɔ nɩɩ azɩlɛ yɩ zʋ munwala ɩkɔwɔ nu. Ɔzɔ mmɩlɩ nɩ, abiyela kɛhã yɩ nwʋ azɩ ikowula Gyehova yi tumililɛ tʋ. (Kɩnga Ɛfɩsɛsɩmaa 1:​8-11.) Kezimɔ Gyehova ɩma yi tile nu pɔkɔ ba numɔ nɩ, asʋ̃ ɩáyɛ nnwʋánlɩ a?

9. Sɛ yɛkɩnga Bayɩbʋlʋ yɩ a, mɩnla yɛ yɛkɔnwʋ yɛkɛvalɩ ndwokɔ mɔɔ ikezizi wɔ eɣile be nɩ nwʋ a?

⁹ Bɛmá yehila nkɔmɩhyɛ be mɔɔ Gyehova hanlɩ nwʋmɔ odwokɔ wɔ Ɛdɩnɩ toolo yɩ nu wɔ Gyɛnɛsɩsɩ 3:15 nɩ. b Ɩkã ndwokɔ be mɔɔ ikezizi mɔɔ ɩkɛma Gyehova yi tile nu pɔkɔ kɛɣa nu, naasʋ̃ nɩ ikeli alʋbɔ sʋ̃maa sʋ̃maa ansaana ɩaɣa numɔ. Kɛ ndianwʋ nɩ, Nyamɩnlɩ hanlɩ hileli Abilehamɩ kɛɛ abusunwa sandɩnlɩ  mɔɔ Kɩlayɩsɩ yɩ zʋ̃ numɔ kɛɣa nɩ, ɩkɛyɛ Abilehamɩ yɩ tʋmaa. (Gyn. 22:​15-18) Akʋ̃, wɔ ɔlʋbɔ 33 Y.M.nu nɩ, bɛhalɩ Gyisɛsɩ yɩ agyia ti kɛmɔ nkɔmɩhyɛ yɩ hanlɩ nɩ. (Egy.3:​13-15) Ɔzɔ nkɔmɩhyɛ yɩ ɔfʋã mɔɔ ili awielɩyɛ mɔɔ mɛyɩ yɛ lɛ kɛɛ bɛkɛbɛtɛ Setanɩ yi ti nɩ, ɩkɛɣa numɔ eɣile be. (Yik. 20:​7-10) Akʋ̃ sʋ̃, Bayɩbʋlʋ yɩ ɩma yɛnwʋ sʋ̃maa yɛfalɩ mɔɔ ɩkɔhɔlɩ zʋlɔ wɔ amanlɩ amanlɩ mɔɔ bɛkɛhã bɔ nwʋ bɔkɔwɔ nu, nɩɩ Gyehova yi mmenii bɛ avinli wɔ anwʋhyɩlɩyɛ kezile yi nu.

10. (a) Mɩnla ndwokɔ yɛ ɩlɛ́kyɛ ibazizi a? (b) Kɛ ɩkɛyɛ na yɛaziyeziye yɛ adwɩnɩ nɩɩ yɛ ahʋnlɩnɩ sikalɛyɩ a? (Kila azɩkɛnɩ odwokɔ yɩ.)

¹⁰ Dwɩnɩ ndwokɔ eyimmɔ mɔɔ ɩyɛ nnwʋánlɩ mɔɔ Bayɩbʋlʋ kã kɛɛ ibazizi nɩ nwʋ. Mɔɔ ili bɔmʋnlɩ, amanlɩ amanlɩ yɩ kɛhã kɛɛ “akʋ̃ yenyia azʋ̃nudwolɩyɛ, na dɩyɛ bela ɩdɔ bʋwɔ!” (1 Tɛs. 5:​2, 3) “Aɣilemvile nu la,” amanlɩ amanlɩ yɩ kɔdʋ kɛhyɛ awohwi ɔzʋ̃mɩnlɛ zʋ, na eyi yɛ ɩkɔhɔ kɛva anwʋhyɩlɩyɛ kezile yi ɩkɛɣa a. (Yik. 17:16) Akʋ̃ yɛkɔnwʋ kɛɛ ‘enii Ɣalɛ nɩ iluwa mununkumi nɩ nu na ɩlɛ tumi nɩɩ animinyiamɩ kezile ɩbaa.’ (Mt. 24:30) Gyisɛsɩ kowuwa mmenii ndɛnɩ na ɩayɩyɩ mmenii mɔɔ bɛdɩ kɛɛ mmuwuanɩ yɩ wɔ nzɩkɛ yɩ bo nu. (Mt. 25:​31-33, 46) Naasʋ̃ wɔ ɔzɔ mmɩlɩ yɩ nu nɩ, Setanɩ sʋ̃ kɛhɩhã yɩ nwʋ. Na iluwakɛɛ ɩtanɩ Nyamɩnlɩ mmenii nɩ ti, ikebinyia binyia amanlɩ amanlɩ mɔɔ bɛhã bɔ nwʋ bɔwɔ numɔ mɔɔ bɔfʋlɔ bɛ kɛɛ Gɔgʋ mɔɔ ɩzʋ̃ Magɔgʋ nɩ ma bɔkɔdʋ bɛkɛhyɛ Gyehova yɩ azʋ̃mɩvʋlɔ zʋ. (Izi. 38:​2, 10, 11) Ɔzɔ mmɩlɩ yɩ nu nɩ, bɛzabɛ mɔɔ bɔvɔ ngɔlɔ bɛ mɔɔ bɛha wɔ azɩlɛ yɩ zʋ nɩ, bɔkɔhɔ bɛkɛhɩnla Kɩlayɩsɩ nwʋ wɔ sʋlɔ na bɛahʋ̃ Amagadɔnʋ kʋnɛ yɩ, na eyi yɛ ɩkɛva anwʋhyɩlɩyɛ kezile yɩ ɩkɛɣa awielɩyɛ a. c (Mt. 24:31; Yik. 16:​14, 16) Na akʋ̃ Kɩlayɩsɩ Yɩ Ɔlʋbɔ Abʋmɩ Tumililɛ yɩ kɔwɔ yɩ tʋ.—Yik. 20:6.

11. Anyɩnlɩlazʋ mɔɔ ɔwɔ kɛɛ ɔkɔwʋwa azɩ daabaa nɩ, kɛ ɩma ɛtɩ nɣanlɩ se a? (Kila mfonyini yi sʋ̃.)

¹¹ Akʋ̃ tua kezimɔ wʋ ɛbɩlawɔlɛ kɛyɛ wɔ eɣile be nɩ nwʋ mfonyini kila. Bayɩbʋlʋ yɩ kã kɛɛ, yɛ Wɔlɛvʋlɔ yɩ “ɩva nnwʋanlɩ mɔɔ íni awielɩyɛ iwula [yɛ] ahʋnlɩnɩ nu.” (Odw. 3:11) Kila kezimɔ eyi kɛhã ɛ nɩɩ Gyehova avinli abusunwawɔlɛ yɩ. Bike Gyehova buuku yi, owukolɛ 319  nɩ hanlɩ odwokɔ fɛlɛkʋ̃ eyi kɛɛ: “Ɔzɔ mmɩlɩ yɩ yɛkɔwʋwa azɩ ɔlʋbɔ abʋmɩ abʋmɩ sʋ̃maa, meti yɛkɔnwʋ sʋ̃maa yɛkɛvalɩ Gyehova nwʋ yɛkɛdɛla mɔɔ yezi yɩ nnɛ nɩ. Naasʋ̃ mɛyɩ po nɩ, yɛkɛɣa kɔnwʋ yɩ kɛɛ nninyeni sʋ̃maa wɔ kɛnɩ mɔɔ ɩsɛ kɛɛ yesuma yɛfalɩ yɩ nwʋ. Paladayɩsɩ ɛbɩlawɔlɛ kɛyɛ anyɩnlɩlelɛ baaba, naasʋ̃ mɔɔ ɩtɛla yɩ munwala yɛ lɛ kezimɔ yɛkɔhɔ zʋlɔ yekozuma nninyeni mɔɔ ɩyɛ nnwʋánlɩ yɛkɛvalɩ Gyehova yɩ nwʋ nɩ.” Naasʋ̃ sikalɛyɩ, mɩnla nninyeni mvʋlɔ yɛ yɛkɔhʋla yekozuma wɔ Nyamɩnlɩ Odwokɔ yɩ nu a?

12. Mɩnla ɔhʋanɩ zʋ yɛ ɩsɛ kɛɛ yekila sʋlɔ a? Ma nwʋmɔ ndianwʋ.

¹² Nyamɩnlɩ Odwokɔ yɩ ɩma yɛnwʋ kezimɔ dɩka mɔɔ Gyehova da wɔ “sʋlɔ” nɩ dɩ. (Ayɩ. 33:5) Bayɩbʋlʋ yɩ ɩma yɛnwʋ Gyehova nɩɩ yɩ ahyɩhyɛdɩ yɩ ɔfʋã mɔɔ ɩwɔ sʋlɔ nɩ nwʋ odwokɔ mɔɔ ɩyɛ nnwʋánlɩ. (Ayɩ. 6:​1-4; Da. 7:​9, 10; Yik. 4:​1-6) Kɛ ndianwʋ nɩ, sa yɛkʋla yesuma nnwʋánlɩ nninyeni mɔɔ Izikɩyɛlɩ nwʋnlɩ mmɩlɩ mɔ “sʋlɔ wukoli, na ɩnwʋnlɩ anyɩnlɩzʋdɩyɛnwʋnlɛ wɔ Nyamɩnlɩ kɛnɩ” nɩ nwʋ dɩyɛ.—Izi. 1:1.

13. Kɛmɔ Hibulumaa 4:​14-16 kile nɩ, kɛ ɛtɩ nɣanlɩ wɔ mɔɔ Gyisɛsɩ ɩyɛɛ wɔ sʋlɔ nɩ nwʋ ese a?

¹³ Dwɩnɩndwɩnɩ mɔɔ Gyisɛsɩ ɩyɛɛ wɔ sʋlɔ kɛɛ yɛ Bulombunli nɩɩ yɛ Azɔfʋ Mbanimbani Nu Ebani mɔɔ ɩwɔ kunlumiyɩbalɛ nɩ nwʋ kila. Iluwa yɩ zʋ nɩ yɛkʋla yebike Nyamɩnlɩ wɔ yɩ “abulongua nɩ zʋ, dɩka mɔɔ adʋmɩ ɩyɛ yɩ manlɩ nɩ. Ɛkɛnɩ yɛ Nyamɩnlɩ ɩkɔnwʋ yɛ ngokɛ, ɩanlʋmɩ yɛ, na ɩawʋwa yɛ wɔ mmɩlɩ mɔ yekehyinyia nɩ nu a.” (Kɩnga Hibulumaa 4:​14-16.) Eɣile bela ɩsɛ kɛɛ yɛdwɩnɩndwɩnɩ mɔɔ Gyehova nɩɩ Gyisɛsɩ bɛyɛ bɛma yɛ daada, nɩɩ mɔɔ bɔkɔ zʋ bɛyɛ bɛma yɛ nɩ nwʋ. Ɩsɛ kɛɛ ɔlɔlɛ mɔɔ bɔwɔ bɛma yɛ nɩ ɩkã yɛ ma yɛzʋ̃ yɛ ahʋnlɩnɩ munwala nu yɛfa ɛhyɩmɛ yɛsʋ̃mɩ Gyehova.—2 Kɔl. 5:​14, 15.

14. Mɩnla dɩyɛ ɔkʋ̃ yɛ yɛkɔhʋla kɛyɛ kɛva kehile kɛɛ yɛ anyɩ sɔ mɔɔ Gyehova nɩɩ Gyisɛsɩ bɛyɛ bɛma yɛ nɩ a? (Kila mfonyini yi sʋ̃.)

 ¹⁴ Dɩyɛ ɔkʋ̃ mɔɔ yɛkɔhʋla kɛyɛ kɛva kehile kɛɛ yɛ anyɩ sɔ mɔɔ Nyamɩnlɩ nɩɩ yɩ Ɣa yɩ bɛyɛ bɛma yɛ nɩ yɛ lɛ kɛɛ, yɛkɔwɔ mmɔdɩnɩ yɛkɔwʋwa mmenii sʋ̃maa ma bɛkɛɣa kɛyɛ Gyehova nɩɩ Gyisɛsɩ bɛ adʋwavʋlɔ. (Mt. 28:​19, 20) Ɔzɔ yɛ sʋ̃mavʋlɔ Pɔɔlʋ yɛlɩ va hileli anyɩnlɩzɔlɛ manlɩ mɔɔ Nyamɩnlɩ nɩɩ Gyisɛsɩ bɛyɛ bɛma yɩ nɩ a. Nɩ izi kɛɛ Gyehova ɩpɛ kɛɛ “mmenii munwatĩĩ bɔnwʋ ehilehilelɛ baaba nɩ mɔɔ ɩfalɩ Gyisɛsɩ Kɩlayɩsɩ yɩ nwʋ nɩ, na benyia nnwʋanlɩ.” (1 Tim. 2:​3, 4) Ɩwɔlɩ mmɔdɩnɩ ɩyɛlɩ odwokɔbahanlɛ egyima yɩ ɩva ɩwʋwalɩ mmenii sʋ̃maa ‘ama ɔhʋanɩ bela zʋ ɩahʋla iale abiyemmɔ bɔ nnwʋanlɩ ɩama Nyamɩnlɩ.’—1 Kɔl. 9:​22, 23.

15. Kɛmɔ Ndwomi 1:2 kile nɩ, mɩnla yɛ ɩkɛma yɛ anyɩ kele a?

¹⁵ Ndwomidʋlɛvʋlɔ yɩ hanlɩ enii mɔɔ ɩwɔ anyɩnlɩlelɛ nwʋ odwokɔ kɛɛ, “yɩ anyɩ ideli Gyehova yɩ mmɛla nɩ nwʋ” na “ɩdwɩnɩndwɩnɩ nwʋmɔ awulohyɩnlɩyɛ nɩɩ awulodwolɩyɛ.” (Ndw. 1:​1-3) Bayɩbʋlʋ yɩ tʋhilelɛvʋlɔ Joseph Rotherham hanlɩ nkyɩkyɛmi eyi nwʋ odwokɔ kɛɛ, “ɩsɛ kɛɛ abiye anyɩ deli Nyamɩnlɩ Odwokɔ yɩ nwʋ nkʋ̃ʋ̃ ma isuma na ide mmɩlɩ ɩdwɩnɩndwɩnɩ nwʋmɔ.” Ɩva ɩhɩnlanlɩ nwʋmɔ kɛɛ, “sɛ eɣile ɔkʋ̃ tua numɔ na sɛ abiye ɩákɩnga Bayɩbʋlʋ yɩ a, nɩ ɩáma mfasʋ bela ba ɔzɔ eɣile yi zʋ.” Sɛ ɛma wʋ anyɩ deli Bayɩbʋlʋ zumanlɛ nwʋ na ɛfa wʋ adwɩnɩ siye kezimɔ numɔ ndwokɔ yɩ munwatĩĩ yiyia nɩ zʋ a, ɩkɛma wʋ anyɩ kele. Kila kezimɔ ɩyɛ anyɩnlɩlelɛ kɛɛ ɛkɛbɩbɛ Nyamɩnlɩ Odwokɔ yɩ nu ɔkɔhɔ aɣinzi!

16. Mɩnla yɛ yekozuma wɔ dɩyɛzumanlɛ mɔɔ ili kɛnɩ yɩ nu a?

¹⁶ Nɔhʋanlɛ mɔɔ Gyehova ikilehile yɛ wɔ yi Odwokɔ yɩ nu nɩ, ɩáyɛ sɩ kɛɛ yɛkɛdɩ yɩ tʋ. Wɔ dɩyɛzumanlɛ mɔɔ ili kɛnɩ yɩ nu nɩ, nɔhʋanlɛ ndwokɔ mɔɔ numɔ dɔ nɩ, yekozunzu numɔ ɔkʋ̃ nwʋ. Mɛyɩ yɛ lɛ Gyehova yi sunzuma ɔfʋã nu asɔlɩ aliyia kezile yi, mɔɔ Pɔɔlʋ hanlɩ nwʋmɔ odwokɔ wɔ yɩ kɛlɛta mɔɔ ɩhɛlɛlɩ ɩhɔ ɩmanlɩ Hibulu Kilisinyiamaa nɩ. Ɩɣɩla kɛɛ wʋ anyɩ kele mmɩlɩ mɔ yesunzuu ɔzɔ odwokɔtile yɩ nwʋ nɩ.