1-2. Emɔ nywi ci ji àtɛnŋ ato ahlɛnnɔ Bibla yí agbekplɛniɔ? Na kpɔwɛ ɖeka.

 SƆƐ mɔ èjikɔ axwle axwe ɖeka. Nyiwo ele mɔ àkpɔ gbɔxwe axwliɔ? Nɔ èkpɔ foto axwe lɔ tɔ ɖe, esun a? Kankandoji li mɔ àji mɔ yeakpɔ axwe lɔ ŋtɔŋtɔ keŋ azɔn atrɔdi, aɖo mɛ kpɔ yí akpɔ exɔ ciwo yí le mɛ, yí agbekpɔ lé wokeke do. Àji mɔ yeakan seŋ koɖo mɛ ci yí nya lé wocu exɔ lɔ do. Le nyɔnɔnwi mɛɔ, àji mɔ yeaglo enushianu kpɔ so axwe ci èji mɔ yeaxwle lɔ nu.

² Mìatɛnŋ awa enu ɖekɛŋmɛ lɔ nɔ mìhlɛnkɔ Bibla alo kplɛkɔ. Enuŋwlɛtɔ ɖeka sɔ Bibla sɔ koɖo exɔ yijiyiji ɖeka ci gɔnmɛɖokpewo yi gɔnmɛ nɔ nywiɖe. Eyi taɖo lé mìawɛ amɔŋje enushianu ci yí le Bibla lɔ mɛ nywiɖeɔ? Nɔ èjikɔ ahlɛn Bibla yí enyi ɖa èɖa yí hlinniɔ, gɔnmɛjeje nukplakplawo alo “Mawu Nyɔ ŋkɔtɔwo” kpoŋ yí àjeshi. (Ebre. 5:12) Vɔ shigbe lé eʒan mɔ àɖo axwe lɔ mɛ yí akpɔ enu ciwo pleŋ le mɛ nɛɔ, ele mɔ èɖo akpla Bibla yí akpɔ enu ciwo yí le mɛ nywiɖe. Emɔ adodwi ɖeka ci ji mìato yí akpla Bibla yí nyi mɔ, mìakpɔ lé akpaxwe hamɛhamɛ nɔ yi ŋɛdu lɔ do nu wowonɔnɔwo mɛ do. Je agbla amɔŋje enu ciwo yí èxɔ ji se mɛ. Yí agbetekpɔ yí amɔŋje susu ciwo yí taɖo èxɔ wo ji se mɛ.

3. Nyi yí Pɔlu do ŋsɛn yi kpena Kristotɔwo mɔ wo le waɔ, yí nyi yí taɖoɔ? (Efezitɔwo 3:​14-19)

³ Gbɔxwe mìamɔŋje akpaxwe vovovo ciwo yí le Mawu  Nyɔ lɔ mɛɔ, mìɖo akplanɔ nyɔnɔnwi citocito ciwo yí le mɛ. Apotru Pɔlu do ŋsɛn yi kpena xɔsetɔwo mɔ, wo le kpla Mawu Nyɔ lɔ nywiɖe keŋ atɛnŋ ‘a mɔŋje lé ekeke bonu, jinjin, yi ji yí cito do.’ Nɔ wowɛ ahan ɔ, ‘woalike’ le xɔse mɛ. (Hlɛn Efezitɔwo 3:​14-19.) Ele mɔ mìwo can mìawɛ ahan. Mìakpɔ lé mìatɛnŋ agbeje Mawu Nyɔ lɔ mɛ do yí ase gɔnmɛ ni pleŋpleŋ.

4. Nyi mìawa yí ate gogo Yehowa ɔ? Na kpɔwɛ ɖewo.

⁴ Ci mìnyi Kristotɔwoɔ, de gɔnmɛjeje nukplakplawo ji mìasɛnnɔ le Bibla mɛ o. To gbɔngbɔn kɔkɔɛ kpekpedonu mɛɔ, mìaji veviɖe mɔ mìakpla “Mawu nuwlawlawo do citocito tɔxu.” (1 Kor. 2:​9, 10) Nyi yí taɖo dàtɔ amɛɖekɛnukplakpla wawa keŋ ate gogo Yehowa doji sɔwuɔ? Àtɛnŋ awa numɛkuku so lé Yehowa lɔn yi mɛwo do le blema nu koɖo lé edasɛ do mɔ yelɔn mìwo can le egbɛ mɛ do. Àtɛnŋ agbekpɔ lé Yehowa ji mɔ Izraɛliviwo le sɛn ye do yí asɔ sɔ koɖo lé eji mɔ mìwo le sɛn ye do le egbɛ mɛ. Alo àtɛnŋ agbekpla nu so Yesu gbenɔnɔ koɖo sumɔsumɔ yitɔ nu keŋ akpɔ lé ena yí nyɔnuɖɛwo vamɛ do.

5. Nyi àji mɔ yeakpla le amɛɖekɛnukplakpla hwenuɔ?

⁵ Wobiɔ mɛɖewo ciwo yí kplanɔ Bibla koɖo vevidodonu se mɔ nyi wojinɔ mɔ yewoakpla le Mawu Nyɔ lɔ mɛ citocito ma. Wosɔ ɖoŋci wowotɔ ɖewo do dakavi ci yí nyi  “Enyɔta Ciwo Yí Woatɛnŋ Akpla Le Amɛɖekɛnukplakpla Mɛ.” Nɔ èzan Index des publications Watchtower alo Numekuku Ŋuti Mɔfiagbalẽ Na Yehowa Ðasefowo yí sɔ ji nu gɔnmɛ kpɔ so nyɔta cɛwo nuɔ, àkpɔ jijɔ sugbɔ. Nɔ èkplakpla Bibla kitokitoɔ, ana yí ao xɔse asɛnŋ yí ‘nakpla enu so Mawu nu nyɔnɔnwitɔ.’ (Elo. 2:​4, 5) Ecɛyɛɔ, mìasɔ susu ɖo Bibla mɛ nyɔnɔnwi ɖewo ciwo mìatɛnŋ akpla kitokito ji.

6. (a) Evototo ci yí le toto koɖo edro gblamɛɔ? (b) Nyi yí taɖo mìamɔ susu ci Mawu ɖo do agbetɔwo koɖo nyigban lɔ nu ani tɛgbɛɛɔ? (Efezitɔwo 3:11)

⁶ Le kpɔwɛ mɛ, bu tamɛ kpɔ so enu ci Mawu dro mɔ yeawa nu. Evototo le gblamɛ nɔ toto mɔ woawa enuɖe koɖo edro mɔ woawa ŋɖe mɛ. Toto le shigbe mɔ emɔ ɖe ci ji woato ayi fini woji mɔ woayi hannɛ. Vɔ nɔ ŋɖe vacu mɔ lɔɔ, etɛnŋ dɔ dàgbetɛnŋ ayi fini èji mɔ yeayi o. Edro yɛ le shigbe mɔ afi ci èji mɔ yeayi lɔ ŋtɔŋtɔ ɛnɛ. Mìnya fini mìji mɔ mìayi lɔ nywiɖe. Vɔ mìhɛn mìasɔ emɔ hamɛhamɛ yí ayi dru. Nɔ emɔ ɖe dekplɔ amɛ yí afi lɔɔ, woagbesɔ ebu dru. Ejɔ ji nɔ mì mɔ viviviɔ, Yehowa nu edro mavɔ ci eɖo do Bibla mɛ. Eɖekpokpuiɖe ci anyiɔ, edro ci Yehowa ɖo vanɔmɛ. Ðo “ewa nushanu nɔ woanɔ shigbe lé eji do hannɛ.” (Elo. 16:​4, NWT) Eyi enuwo pleŋ ci Yehowa wa ani tɛgbɛɛ. Nyi Yehowa dro mɔ yeawaɔ, yí ashitrɔtrɔ ci evawa keŋ nɔ atɛnŋ anyi wawaɔ?

7. Ci amɛ ŋkɔtɔwo gbe to nɔ Yehowa ɖe, trɔtrɔ ci ewa nɔ yi dro anyi wawaɔ? (Matie 25:34)

⁷ Mawu na yí Adamu koɖo Ɛva nya edro ci eɖo do wo nu. Mawu nu nɔ wo mɔ, “Mí a ji evi sugbɔ. Mí a ɖɔ nyigbanji, yí a sun ji. Mí a nyi etɔ nɔ . . . enu lagbu ɖekpokpwi ci yí hwànhwàn le nyigban ji.” (Gɔnm. 1:28) Ci Adamu koɖo Ɛva fɔn gu do Mawu ji yí nuvɔn ɖɔ agbetɔwo xomu lɔ mɛ can ɔ, dana yí Yehowa dro lɔ agɔnmavamɛ o. Éwa ashitrɔtrɔwo keŋ nɔ edro lɔ avamɛ. Éɖui zeɖeka mɔ yeaɖo Fyɔɖuxu ɖeka do jeŋkwi mɛ ci yí awɛ nɔ edro ci yeɖo so tɔtɔmɛ so agbetɔwo koɖo nyigban nu avamɛ. (Hlɛn Matie 25:34.) Le gamɛ ci Yehowa ɖo ɖɛ jiɔ, ésɔ Eviɛ ŋkɔtɔ ɖaɖa nyigban ji yí evakpla nu amɛwo so Fyɔɖuxu lɔ nu yí gbesɔ yi gbe sɔ na do ta nɔ wo keŋ ahwlɛn wo so nuvɔn koɖo eku shi. Le yi goduɔ, wofɔn Yesu so ku yi jeŋkwi mɛ nɔ anyi Efyɔ nɔ Mawu Fyɔɖuxu lɔ. Vɔ enu sugbɔ gbekpɔtɔ woakpla so Mawu dro lɔ nu.

8. (a) Nyi yí nyi Bibla lɔ nyɔtaɔ? (b) Shigbe lé Efezitɔwo 1:​8-11 nui nɛ ɖe, nyi yí nyi Yehowa dro gangantɔ lɔɔ? (Kpɔ foto ci yí le akpa lɔ ji.)

⁸ Bibla nyɔta vevi lɔ yí nyi woahwlɛn ta nɔ Mawu ŋkɔ nɔ edro ci eɖo do nyigban lɔ nu avamɛ toto yi Fyɔɖuxu ci Yesu nyi Fyɔ nɔ ji. Yehowa dro lɔ datɛnŋ atrɔ o, émɔ egbe ciwo pleŋ yeɖo ajɔ do ji. (Ezai 46:​10, 11; Ebre. 6:​17, 18) Nyigban lɔ avatrɔ paradiso fini amɛkpekpe ciwo yí nyi Adamu koɖo Ɛva jijimɛviwo anɔ “keke sɔyi mavɔmavɔ.” (Eha. 22:26) Vɔ denyi enu ci pleŋ Yehowa ji mɔ yeawa nɛ o, ágbewɛ yí yi sɛntɔ ciwo yí le jeŋkwi mɛ koɖo nyigban ji anyi enu kuɖeka. Eyi amɛshiamɛ alɔn faa yí ase tonu nɔ Yehowa ci yí nyi Acɛkpatɔ gantɔ. (Hlɛn Efezitɔwo 1:​8-11.) Emɔ nywi ci ji Yehowa to yí na yi dro vavamɛ dekpaca eo ba?

9. Lé Bibla hlɛnhlɛn atɛnŋ ana mìanya enu ciwo yí avajɔ le esɔ mɛɔ?

⁹ Mìasɔ enyɔnuɖɛ ci Yehowa nu le Edɛn kpa lɔ mɛ yí woŋwlɛ do Gɔnmɛjeje 3:15 mɛ. b Éxo nuxu so enu ciwo yí ɖo ajɔ keŋ nɔ Yehowa dro avamɛ nu. Vɔ woajɔ le exwe kotokun nɛniɖe godu. Le enu ciwo yí ɖo ajɔ lɔ mɛɔ, Abraxamu jijimɛvi ɖeka ɖo avanyi Kristo. (Gɔnm. 22:​15-18) Eyi  le exwe 33 K.H. ɔ, woɖu fɔŋguinu nɔ Yesu shigbe lé wonui ɖɛ nɛ. (Edɔ. 3:​13-15) Akpaxwe kpɛtɛkpɛtɛ nɔ nyɔnuɖɛ lɔ ci yí nyi woacuku ta nɔ Satana ajɔ le exwe 1000 koɖo ŋɖe godu. (Enyɔ. 20:​7-10) Bibla gbenu enu ci yí ajɔ hwenu yí manyimanyi ci yí le gblamɛ nɔ Satana xexe lɔ koɖo Mawu habɔbɔ lɔ avasɛnŋ doji.

10. (a) Nyiwo yí ajɔ sabaɖe yɛɔ? (b) Lé mìatɛnŋ adra mìwo ji koɖo susu ɖɛ doɔ? (Kpɔ gɔnmɛnuŋwlɛŋwlɛ lɔ.)

¹⁰ Bu tamɛ kpɔ so enujɔjɔ jiŋ cɛwo ci nu Bibla xo nuxu so. Ŋkɔtɔɔ, jukɔnwo ado “fafa koɖo vofamɛnɔnɔ xwa!” (1 Tɛs. 5:​2, 3, NWT) Eyi zeɖekatɔntɔn ɔ, efunkpekpe gangan lɔ atɔ ji hwenu yí jukɔnwo aje ŋsusɛnsɛnwo pleŋ ji. (Enyɔ. 17:16) Le yɛ goduɔ, enujiŋ ɖeka ajɔ, “Amɛagbetɔ Vi lɔ a gbɔgbɔ le eta nɔ azɔwo le jeŋkwi mɛ koɖo ŋsɛn koɖo ŋcikɔkwɛ gangan ɖeka.” (Mt. 24:30) Yesu aɖo kojo nɔ amɛwo yí ama lɛngbɔwo so gbɔgbɔɛwo gbɔ. (Mt. 25:​31-33, 46) Le hwenɔnuɔ, Satana akpɔtɔ ahwlɛnkɔ nu koɖo Yehowa. Amɛxaxa yitɔ lɔ ana yí adɔ jukɔnwo ajɔn nu yí aje Yehowa sɛntɔ adodwiwo ji. Jukɔnwo gbɛbɔbɔ cɛ yí Bibla yɔ mɔ Gɔgi ci yí so Magɔgi. (Ezek. 38:​2, 10, 11) Le yiyimɛɔ, woabɔ amɛshiaminɔ kpɛtɛwo do jeŋkwi mɛ yí woabɔdo Kristo koɖo yi jeŋkwi mɛ hwakɔnwo nu nɔ woawa Hamargedɔn hwa lɔ. Eyi ahɛn efunkpekpe gangan lɔ va vɔvɔnu. c (Mt. 24:31; Enyɔ. 16:​14, 16) Eyi Exwe Kotokun ɖeka Cɛkpakpa Kristo tɔ atɔ ji.—Enyɔ. 20:6.

11. Nyi agbe tɛgbɛɛ nɔnɔ lɔ ahɛn vɛ nɔ eoɔ? (Kpɔ foto lɔ hɛnnɛ.)

¹¹ Ecɛyɛ bu tamɛ kpɔ so lé esɔ mɛ avanɔ do nu. Bibla mɔ mìwo Watɔ lɔ “sɔ mavɔmavɔ do [mìwo] ji mɛ.” (Ŋun. 3:​11, NWT) Bu tamɛ kpɔ so lé àvanɔ do koɖo lé ànyi xlɔ koɖo Yehowa tɛgbɛɛ do. Le wema ci yí nyi Te Ðe Yehowa Ŋu mɛɔ, wonu enyɔ dojijɔnamɛ cɛ le kpashi 319 mɛ: “Ci mìanɔ agbe na nɔ exwe sanŋdiwo, kotokunwo, miliɔn koɖo miliya  ŋtɔkpu can ɔ, mìavanya enu sugbɔ so Yehowa Mawu nu sɔwu ci mìnya gbɛ. Vɔ akpɔtɔ agbewakɔ nɔ mì mɔ enunywi domahlɛn buwo kpɔtɔ yí mìagbekpla. . . . Enunywi vovovo ci mìdatɛnŋ abu yɛ o yí anɔ agbe mavɔ lɔ mɛ. Eyi mìate gogo Yehowa yí anyi enuvevi ci mìatɛnŋ awa.” Nɔ mìkpɔtɔ le Mawu Nyɔ lɔ kplakɔ ɖe, enunywi bu ciwo mìatɛnŋ akpɔɔ?

12. Lé mìatɛnŋ aglonɔ jeŋkwi mɛ kpɔ doɔ? Na kpɔwɛ ɖeka.

¹² Mawu Nyɔ lɔ nu lé Yehowa gbɔ nɔnɔ le “afi yìji” lɔ le do le kleŋ mɛ. (Ezai 33:5) Bibla nu enukpacamɛ so Yehowa koɖo yi habɔbɔ lɔ kpaxwe ci yí le jeŋkwi mɛ nu. (Ezai 6:​1-4; Dan. 7:​9, 10; Enyɔ. 4:​1-6) Le kpɔwɛ mɛ, mìatɛnŋ ahlɛn nu so enujiŋ ciwo yí Ezekiɛli kpɔ nu hwenu ‘jeŋkwiwo hun yí ekpɔ Mawu le ŋtegannukpɔkpɔwo mɛ.’—Ezek. 1:1.

13. Shigbe lé Ebretɔwo 4:​14-16 dasɛ yi nɛ ɖe, nyi yí jɔ ji nɔ eo le edɔ ci yí Yesu wakɔ le jeŋkwi mɛ nuɔ?

¹³ Gbebu tamɛ kpɔ so edɔ ci Yesu wakɔ le jeŋkwi mɛ nu, ényi mìwo Fyɔ koɖo Avɔnsatɔ Gangantɔ yí senɔ vevi do amɛ nu. Toto jiɔ, mìatɛnŋ ava “ŋkɔ nɔ Mawu fyɔʒinkpin” le gbedodoɖa mɛ yí abiɔ Mawu mɔ yɛ le ku ŋshishi nɔ mì yí akpedo mì nu “le gamɛ nywi lɔ” ji. (Hlɛn Ebretɔwo 4:​14-16.) Gbeɖeka duuɔ, mìɖo abunɔ tamɛ kpɔ so enu ci Yehowa koɖo Yesu wa nɔ mì koɖo enu ci wowakɔ nɔ mì yɛ le jeŋkwi mɛ nu. Lɔnlɔn ci woɖo nɔ mì ɖo ajeŋ nɔ mì yí ana yí mìasɛnnɔ Yehowa koɖo ezolelanmɛ.—2 Kor. 5:​14, 15.

14. Enunywitɔ ci mìatɛnŋ awa asɔ dasɛ mɔ enu ci Yehowa koɖo Yesu wa jeŋ nɔ mìɔ? (Kpɔ foto lɔwo hɛnnɛ.)

¹⁴ Enunywi ɖeka ci mìawa yí asɔ dasɛ mɔ enu ci Mawu koɖo Eviɛ wa jeŋ nɔ mì yí nyi kpɔ mɔ mìaje agbla yí akpedo  mɛbuwo nu nɔ woanyi Yehowa Kunuɖetɔwo koɖo Yesu nukplaviwo. (Mt. 28:​19, 20) Eyi apotru Pɔlu wa yí sɔ dasɛ enujeŋnamɛ yitɔ nɔ Mawu koɖo Kristo. Énya mɔ Yehowa dro yí nyi mɔ “wo a hwlɛn amɛwo pleŋ gan. Yí, E mɔ amɛwo pleŋ a jeshi nyɔnɔnwi.” (1 Tim. 2:​3, 4) Éwa dɔ veviɖe le kunuɖeɖedɔ lɔ mɛ yí kpedo amɛ sugbɔ nu lé akpe ji do keŋ nɔ atɛnŋ “a hwlɛn amɛ ɖewo gan sɔ to emɔ ɖekpokpwi nu.”—1 Kor. 9:​22, 23.

15. Sɔgbe koɖo Ehajiji Wema 1:2 ɖe, nyi yí atɛnŋ ana eji ajɔnɔ mìɔ?

¹⁵ Esɔgbe ci ehakpatɔ lɔ nu mɔ, mɛ ci yí kpɔnɔ jijɔ yí enuwo mlɛnnɔ ni nyi mɛɖeka ci yí “lɔnnɔ enukplakpla Tɔhonɔ tɔwo” yí “bunɔ tamɛ so wo nu kede koɖo ezan.” (Eha. 1:​1-3) Bibla gɔnmɛɖetɔ ɖeka nu so kpukpui cɛwo nu mɔ, “emɔdasɛnamɛ Mawu tɔwo ajɔnɔ ji nɔ amɛ lɔ keke ajinɔ wo yí akplanɔ wo yí azannɔ gamɛ sugbɔ asɔ bunɔ tamɛ kpɔ so wo nu.” Égbenu kpi mɔ, “Nɔ ŋkeke ɖe va yí mɛɖe dehlɛn Biblaɔ, anyi ŋkeke lɔ la mɛ lɔ.” Nɔ èkplanɔ enuvevi ciwo yí le Bibla mɛ yí kpɔ lé wodo nu nɔnɔ mɛ doɔ, Bibla kplakpla lɔ ajɔnɔ ji nɔ eo. Jijɔ teŋ enyi mɔ woakplanɔ Mawu Nyɔ lɔ citocito!

16. Nyi mìakpɔ le enyɔta ci yí gbɔgbɔ mɛɔ?

¹⁶ Nyɔnɔnwi vevi ciwo Yehowa kplakpla mì le yi Nyɔ lɔ mɛ desɛnŋ keke mìdamɔŋje mɛ o. Mìaxo nuxu so nyɔnɔnwi cɛ ɖeka nu le nyɔta ci yí akplɔɛdo mɛ. Eyi nyi Yehowa gbɔngbɔn mɛ gbedoxɔ gangan lɔ ci Pɔlu dre le wema ci eŋwlɛ ɖaɖa Ebretɔwo mɛ. Na nɔ nyɔta cɛ kplakpla avivi nɔ eo.