1-2. Pakayni picekiw to Fangcalay Cudad, o cecay ngaˈayay pakayraan o maanan hani? Tano tinakoan a mitadtad.

 HARATENGEN hena, sapicakayaw kiso to cecay lomaˈ. ˈAyaw no mamisaˈosi i, sapinengnengaw kiso to maanan hani? Sapinengnengaw aca kiso to sasing no ˈaˈayaw nonini lomaˈ han? Cowa. Maedeng sakatayraaw kiso minengneng tonini lomaˈ, mitaliyok a romakat, micomod a minengneng to kahacecay rawang no lomaˈ, sakacipinangaw to kihcod nonini lomaˈ. Alatek sapinengnengaw kiso to safaco a coka nonini lomaˈ. Sapisahciaw cipinang kiso tonini a lomaˈ, cowa ko sapilawaaw to cecacecay a demak.

² Ano micekiw kita to Fangcalay Cudad i, ngaˈayay haenen ko pakayraan. O cecay micacekiway to Fangcalay Cudad a tamdaw, palalinian ningra ko lihaf no Fangcalay Cudad to “o cecay taˈangayay lomaˈ, takaraway, ˈangongolay ko kola.” Sasamaan kita ngaˈ masahci ko kacipinang to Fangcalay Cudad hani? Ano caloh han a miˈosi i, ‘o taˈeneran no kimad no Kawas’ ko kafanaˈan aca ita, tatodong i, pantaay aca ko nika fanaˈ to Fangcalay Cudad. (Hipray 5:12) Kawra “micomod” kita tora lomaˈ minengneng wangaˈ mahapinang, malecaday konini, mamicalep kita micekiw to Fangcalay Cudad wangaˈ masahci a cipinang to lalomaˈay lalakaw. O cecay ngaˈayay pakayraan no picekiw to Fangcalay Cudad i, nengnengen ko masasiromaromaay a lalakaw no Fangcalay Cudad, misamaanay ko nika laliting. O roma i, kiemelen ita pakasoˈlin kora kacipinangan ita a soˈlinay kimad, o maanan ko tatodong, hanaca hapinangen to misamaanay hano pakasoˈlin ko niyah tonini soˈlinay kimad.

3. Palimoˈotay ko tarokos ci Pawlo to salikaka sasamaan ko pidemak? Misamaanay hani? (Ifiso 3:14-19)

³ Toha sapisahciaw a cipinang to Kimad no Kawas i, maminanam  kita to tangongolay a soˈlinay kimad no Fangcalay Cudad. Itini saka 1 hahekalan, tarokos ci Pawlo palimoˈotay to salikaka misakiemel a micekiw to Kimad no Kawas, ‘songilaˈen a cipinang ko kakayaˈ, kakahad, takaraw ato talolong no soˈlinay kimad,’ mihaen cangra wangaˈ ‘tangongol ko lamit no nika pakasoˈlin.’ (ˈOsien ko Ifiso 3:14-19.) Kita i, mamihaen to demak. Nengnengen sasamaan kita micalep a micekiw to Kimad no Kawas, masahci ko kacipinang to lalomaˈay lalakaw.

4. Ano sapiingidaw kita ci Yihofaan i, sasamaan ko pidemak hani? Sadaken ko tinakoan.

⁴ Kita o Krisciyang, soˈlinto mafanaˈ to pinapina taˈeneran kimad no Fangcalay Cudad cowa ko mamasaloento. Itini sapadama no fangcalay saocor no Kawas, sapinanamaw kita to ‘tangongolay a demak no Kawas.’ (1 Korinto 2:9, 10) Ngaˈayay tanamen iso ko cecay micekiway a limasmas, hongaˈ matongal ko piingid no niyah ci Yihofaan han? Tinakoen, ngaˈayay songilaˈen iso micekiw samaanay ci Yihofa patalahkal to olah to nolitengan madimadiay a sikawdan, ato onini a tinakoan samaanay misawacay to maolahay Cingra tisowanan. Ngaˈayay songilaˈen iso minengneng ko patirengan ni Yihofa a midokoay a limasmas itini nolitengan Israil a kitakit, ato aniniay limasmas no kasakopang no Krisciyang iraay ko maanan a kalalecadan. Ngangaˈayho kiso micalep a minanam to kaˈorip ni Yis ato mitosilay ningra, samaanay malaˈosi ko sapairasol no Fangcalay Cudad.

5. Itini notekedan a picekiw i, makalimay kiso sapicekiwaw to maanan a lalakaw?

⁵ O romaroma salikaka tada kiemelay a micekiw to Fangcalay Cudad, sapisolapaw cangra tora “ Notekedan Picekiw a Lalakaw” sanay a sapatongal rayray. Ano sapicekiwaw kiso toninian i, ngaˈayay sakadademaken ko Pirorodan to Mitepangan Cudad no Mikecolay ato Pirorodan to Mitepangan Cudad no Misawacayay Tamdaw ni Yihofa, ano mihaen kiso i, mamalifok ko taˈangayay a hemek. Micalep a micekiw to Fangcalay Cudad, mamatongal ko kaciˈicel no pakasoˈlinay falocoˈ iso, ‘mahelato iso ko pakayniay i Kawas a sifanaˈ.’ (Taneng 2:4, 5) Dotoc i, calepen ita micekiw ko pinapina tangongolay a soˈlinay kimad no Fangcalay Cudad.

6. (1) O limasmas ato patosokan iraay ko maanan a kasasiromaan? (2) O araaw no Kawas pakayni i tamdamdaw ato cikiw o ‘midaˈocay,’ hano saan ko sowal hani? (Ifiso 3:11)

⁶ Salakat i, nengnengen ita ko araaw no Kawas, o patosokan Ningra. O limasmas ato patosokan cowa ka lecad. O limasmas hananay i, o misaˈosianto a kalingadan a lalan, ano malitemoh ko saconged i fatad i, onini a lalan cowa ito ko tatangasa i kahiceraan a patosokan. O roma sa i, o patosokan (araaw) mahecaday o kahiceraan a kitiraan. Ano mafanaˈto kita to icowaay a kahiceraan i, o ngangaˈay pakayni i romaroma lalan tangasa tora kahiceraan. Ano cowa ka ngaˈay rakaten kora lalan i, ngangaˈayho kita romakat to roma lalan. Tada miakoˈiday kita ci Yihofaan itini Fangcalay Cudad palidlid sanay patalahkal to ‘midaˈocay a araaw’ Ningra. (Ifiso 3:11) Ngaˈayay kalasaka dademaken ni Yihofa ko masasiromaay a pakayraan palaˈosi to araaw no Niyah, hanaca mamalahci Ningra, samanen ngaˈayay Cingra ‘milahci to kihcod a araaw Ningra.’ (Taneng 16:4) Malahcito ni Yihofa ko araaw Ningra i, pairaay to makapahay minaroˈan, o tatahadaˈoc konini minaroˈan. Ano hatiraay i, o maanan ko araaw ni Yihofa hani? Toha sapilahciaw to araaw no Niyah, misalofay Cingra to maanan hani?

7. Misafelit ko saka cecay tamdaw ikor i, misamaanay ci Yihofa misalof to pakayraan a milahci to araaw no Niyah hani? (Matay 25:34)

⁷ Pasowalan no Kawas ko saka cecay a tamdaw, o araaw Ningra cangranan i, ‘ka lenak, miedef i fafekang no sera, mipamatang to sera, mikowan to . . . kahirahira a pinaˈorip.’ (Satapangan 1:28) Ikor misafelitay ci Atam aci Ifa, o raraw micomodayto i hekal, kawra cowa piconged konini to sapilahciaw ni Yihofa to araaw Ningra. Misaka dademakan ni Yihofa ko roma pakayraan. Tangsolay Cingra misaˈosi a patireng to cecay Hongti Kitakit i kakarayan, palahci to isalakatay araaw Ningra to tamdaw ato cikiw. (ˈOsien ko Matay 25:34.) Maraodto ko misaˈosian a toki i, ci sidaˈitay a Yihofa ocoran ko sakakaay Wawa tayni i fafekang no sera, pasifanaˈ to tamdaw mafanaˈ tonini Hongti Kitakit, halo patafang to ˈorip malo sapatefoc milidong to tamdaw miliyas to raraw ato patay. Ikorto, patikol maˈorip ci Yis tayra i kakarayan i, malo Hongtiayto no Hongti Kitakit no Kawas. Kawra pakayni i araaw no Kawas, adihayayho ko sasimsimen ita a demak.

8. (1) O maanan ko lalangian no Fangcalay Cudad hani? (2) Mikitini Ifiso 1:8-11, o maanan ko salikoray a araaw ni Yihofa hani? (Nengnengen ko papotalay coka.)

⁸ O lalangian no Fangcalay Cudad i, papakaynien i pikowan ni Yis i Hongti Kitakit no Kawas, palaˈosien ni Yihofa ko araaw no Niyah to cikiw, salikor mamasahci a mapakorac ko fangcalay ngangan no Kawas. O araaw ni Yihofa cowa ko mamafalic, mikiˈokay Cingra to papalaˈosien ko araaw no Niyah. (Isaya 46:10, 11 ato roma pihongyak; Hipray 6:17, 18) Ikor i, mamalo lakoingto ko cikiw, o polong moecelay ko falocoˈ a teloteloc ni Atam aci Ifa papatikol a malefot ko ˈorip, hanaca aitini i lakoing ‘midaˈoc a maˈorip.’ (ˈOlic 22:26) Kawrira cowa koninian aca ko lalahcien ni Yihofa. Salikoray a araaw Ningra i, o papakelecen Ningra ko ikakarayanay ato ifafekangay no sera a madimadiay sikawdan Ningra malacecay a midoko Cingranan, midofdof Cingranan malo Saˈakawangay a Mikowanay. (ˈOsien ko Ifiso 1:8-11.) Mihaenay ci Yihofa tano kasapaan a pakayraan milahci to araaw no Niyah, coko masemeran nanay kiso han?

9. Ano miasip kita to Fangcalay Cudad i, mamafanaˈ to pina:ay mihecaan a noikoran a demak?

⁹ Haratengen ko sapairasol ni Yihofa i Itin. b Onini a sapairasol maˈoningay i Satapangan 3:15, somowalay to mamafekad ko maanan itini pipalaˈosi ni Yihofa to araaw. Kawrira, ikor no somowal tonini a sapairasol mamitaˈlifho to pina  patek a mihecaan ngaˈ mafekad. Onini mahawpay ko ˈaˈaloman ko teloteloc ni Apraham, mitaˈlifho to pina rayray, irato ko cecay a teloc ningra malo ci Kristo. (Satapangan 22:15-18) Tangasa i Kongyen 33 miheca, matira o nisowalan no sapairasol, ‘satenok no waˈay’ ni Yis makalatayto. (Dmak 3:13-15) Salikoray a demak nora sapairasol i, o mamapesiˈ ko fongoh ni Satan. Onini a demak itiniayho i ˈaˈayaw, awaawa sa mataˈlifto ko 1,000 miheca wangaˈ mafekad. (Paˈarawan 20:7-10) Patalahkalayho ko Fangcalay Cudad to adihayay a demak, pakafanaˈ kitanan taynito i salikoray noka sasongtol no lekakawa ni Satan ato likakawa ni Yihofa i, mamafekad ko maanan a demak.

10. (1) Mamifekad ko maanan a demak noikor hani? (2) Sasamaan kita pakayni tonini a demak talaˈayaw ko pisaday hani? (Nengnengen ko sapatongal lalakaw.)

¹⁰ Paliˈayaway ko Fangcalay Cudad, o mamingernger to hekal konini demak. Salakat, ‘dipayalayto rihadayayto’ wa saan a milasil ko kasakitakit. (1 Tisalonika 5:2, 3) Dotoc i, ‘tangsol’ a miˈodis ko kasakitakit to mararaway a pidoyongan. O tahapinangan konini misatapangay ko taˈangayay padiing. (Paˈarawan 17:16) Dotoc i, ‘Wawa no tamdaw aitini i toˈem no kakarayan ciˈicel ato ciˈdil aira.’ Itiyato i, mamaˈaraw ita ko kafahkaˈan a tahapinangan no serayan. (Matay 24:30) O mamisawkit ci Yis to tamdamdaw maemin, pafafidaˈ to lopayˈay siri ato lotok a siri. (Matay 25:31-33, 46) Kawra, mafirangay ko keter ni Satan, cowa ko papakihater saan cingra. O mamiˈowing cingra to Makok a Kok, o makomoday a kasakitakit konini, mamiˈodis to finawlan ni Yihofa. (Icikil 38:2, 10, 11) Itini i cecay tatokian, ya itiniayho i sera a manilnilay no fangcalay saocor a Krisciyang sasaˈopoen patayra i kakarayan, kalacafay ci Kristoan ato kakarayanay a sofitay ningra mifekad to Armakiton a lalood, itiyato a mahorirek ko taˈangayay padiing. c (Matay 24:31; Paˈarawan 16:14, 16) Ikorto i, mamisatapangto ko Comaˈol Miheca Pikowan ni Kristo.—Paˈarawan 20:6.

11. Ngaˈay milifok to midaˈocay ˈorip pakayni kisowanan o maanan ko tatodong hani? (Nengnengen ko coka.)

¹¹ Nohatini tapalen ita ikor no Comaˈol Miheca Pikowan ni Kristo. Sowal no Fangcalay Cudad,  Misangaˈay a Tatapangan ci Yihofa ‘telianto Ningra i falocoˈ [ita] ko midaˈocay a harateng.’ (Patnakay 3:11) Pakayni tisowanan ato kalalaˈed iso aci Yihofa o maanan ko tatodong nonini hani? Miingid ci Yihofaan, saka 319 fiedac mihaenay a somowal: “Maˈoripto to pina soˈot miheca, pina caˈol miheca, pina soˈot ˈofad miheca, pina poloˈ walwal miheca, o kafanaˈ ita to Kawas ci Yihofaan mamikikaka to aniniay ko kaadihay. Soˈlin itiyato i, pakayni ci Yihofaan, adihayayho ko nananamen kasapaan a demak, wa saan kita miharateng. . . . O kaˈorip i lakoing maedeng mataˈlifay ko maharatengay ita, kawra midaˈoc a miingid ci Yihofaan tada o safangcalay a demak.” Nohatini, micekiw kita to Kimad no Kawas i, mamasolapho ko maanan hani?

12. Sasamaan kita cipinang to ikakarayanay a demak? Sadaken ko tinakoan.

¹² Ci Yihofa ‘itiniay i takaraway a kitiraan a maroˈ.’ Pakaynien i Fangcalay Cudad, maˈaraway ita ko fangcalay a kaitiraan Ningra. (Isaya 33:5) Pakayni ci Yihofaan ato i kakarayanay a likakawa Ningra, tada kacekokan ko kasomowal no Fangcalay Cudad. (Isaya 6:1-4; Taniil 7:9, 10; Paˈarawan 4:1-6) Tinakoen, ‘mafohatay ko kakarayan’ sanay ci Icikil, cingra ‘pakaˈaraway to mapolosi no Kawas.’ Somowalay cingra to kasapaan a maˈaraway. ˈOsien ita konini a lalakaw i, maedeng masemeren ko falocoˈ ita.—Icikil 1:1.

13. Pasowalay kitanan ko Hipray 4:14-16, to ˈinorong ni Yis i kakarayan, samaanay ko harateng iso toninian?

¹³ Haratengen ko karetengay a ˈinorong ni Yis i kakarayan nohatini. O Hongti no Hongti Kitakit no Kawas cingra mikowan nohatini, o siniˈadaay kitanan a Sakakaay Saysi cingra. Pakayni cingranan, ngangaˈay kita miingid toya ‘sidaˈitay’ a Kawas, mifowah to falocoˈ i Cingranan, micangacang ‘itini pisaalian no mita’ siniˈada ato midama kitanan. (ˈOsien ko Hipray 4:14-16.) Nanay kita to romiˈamiˈad dotimen ko nidemakan ni Yihofa aci Yis saki kitanan, ato aniniay midemakan Nangra. O patalahkalan Nangra a olah  kitanan, tangongolay a mitemer to falocoˈ ita, pakalalok kitanan fanekfek a matayal saki Kawas.—2 Korinto 5:14, 15.

14. Ano sapatalahkalaw kita to piakoˈid ci Yihofaan aci Yisan i, o ngaˈayay pakayraan o maanan hani? (Nengnengen ko coka.)

¹⁴ O cecay sapiakoˈidaw ita ci Yihofaan aci Yisan a ngaˈayay hapakayraan i, misaˈicel a padama to tao malo Misawacayay Tamdaw ni Yihofa ato malo nisawawaan ni Yis. (Matay 28:19, 20) Mihaenay ko demak no tarokos ci Pawlo. Mafanaˈay cingra o araaw ni Yihofa i, ‘mamilidong to masakenakenaay a tamdaw, matatodong ko kafanaˈ to soˈlinay kimad.’ (1 Timoti 2:3, 4) Ci Pawlo i, ‘ano masamaamaanto sapilidongaw cingra to tamdaw,’ mankora kiemelay cingra mitosil i tamdaw, halamhamay to sapadamaaw to ˈalomanay tamdaw mafanaˈ to soˈlinay kimad.—1 Korinto 9:22, 23.

15. Mikitini ˈOlic 1:2, o maanan a demak ko papakahemek kitanan hani?

¹⁵ Sanay ko sowal no mitiliday to ˈOlic, cima ano ‘maolahay to sarikec ni Yihofa, romiˈad dadaya miasipay a midotim,’ cingra o soˈliˈlinay a lipahak, o malaˈosiay a tamdaw. (ˈOlic 1:1-3) Pakayni tonini pina sinael, mikakingkiway to Fangcalay Cudad ci Yosif Loslam itira tora Micekiwan a ˈOlic (no Padaka) sanay ko sowal, o tamdaw “ano tada maolahay to naitiniay i Kawas a sakayat, mamisaˈicel cingra mikilim, misarocod a micekiw, mipalak to toki misongilaˈ misimsim.” Sanayho cingra, pakaynien i miˈosiay to Fangcalay Cudad ko sowal, “mataˈlifto ko cecay romiˈad, ano cowaho pitongal to kacipinang to taneng no Fangcalay Cudad i, tada mahoracayto kora romiˈad.” Ano sinanoten iso ko kadofahay a kahacecay no Fangcalay Cudad, miharateng tonini kahacecay samaanay malalitiliting i, o mamaolahto kiso a micekiw to Fangcalay Cudad. Ngaˈay micalep micekiw to Kimad no Kawas, o lalipahakento kiso!

16. Dotoc a lalakaw mamilengo to maanan?

¹⁶ Pakaynian ni Yihofa i Fangcalay Cudad pasifanaˈ kita to kasapaan a soˈlinay kimad, oha ngangaˈay cipinang kita. Dotoc a lalakaw mamilengo to cecay tangongolay a soˈlinay kimad, oyanan nisowalan ni Pawlo i Hipray cudad a noˈadingoan tadamaanay fangcalay sefi ni Yihofa. Nanay micalep a micekiw tonini a kimad papaira to adihayay sakalipahak iso.