1, 2. ¿Chumngechi doi cümeabüi papiltuabel ca ngüneduamabel Biblia? Eipinge quiñe inayentun.

 RAQUIDUAMNGE quiñe dungu mu: eimi ayünielmi tami ngillayal quiñe ruca, ¿re foto mu peafuimi? Femlayaimi llemai. Mülei tami pemeafiel ti ruca, adquintuafimi com püle ti ruca, huecuntu ca ponhuitu ca ayüafuimi chi chumngechi tañi deumangen, femngechi cüme ngüneduamafimi ti ruca petu tami ngillanofiel.

² Iñchiñ ca femngechi femafuiñ papeltufiliyiñ ta Biblia. Quiñe quimche feipi tati Biblia “quiñe fütra alüpürachi ruca reque felei, cüme anümcünungelu”. ¿Chumngechi cüme entendeafuiñ chem pin ta Biblia? Chumngechi cüme ngüneduamquefiyiñ quiñe ruca petu tañi ngillanofiel, ca femngechi cüme ngüneduamafiyiñ chem pilen Biblia. Huenche papeltufiliyiñ müten, quimaiñ ti “hunenque dungu mülelu Chau Dios ñi dungu meu”, huelu pichi quimafuiñ müten (Heb. 5:12). Fei, ¿chumngechi cüme estudiayafuiñ Biblia? Papeltufiliyiñ quiñe troquiñ, raquiduamaiñ chumngechi nüucülei cangelu dungu ñi feipin Biblia. Raquiduamaiñ chem taiñ feyentuqueel ca chumngelu quimürpuiñ ñi rüfngen tüfa.

3. Pablo, ¿chem eipibi pu cristiano tañi bemal, ca chemu? (Efesios 3:14-19).

³ Taiñ cüme adümafiel com ñi feipilen Biblia mülei  taiñ estudiayal ti doi ellcalechi quimeltun. Ti apostol Pablo feipifi pu cristiano ñi cüme inaduamafiel Chau Dios ñi huirintucun, feimu feipifi engün: “Cüme adümafimün ti rüf dungu ñi tunte rupan, tunte tuhui, tunte pürai ca tunte coni”. Femngechi femfule pu cristiano, nehuencüleafuingün tañi feyentun mu, quiñe anümca reque cüme foliluucülelu (papeltunge Efesios 3:14-19). Iñchiñ ca femngechi femaiñ. Peaiñ chumngechi cüme estudiayafuiñ Chau Dios ñi Dungu, femngechi taiñ cüme entendeafiel.

4. ¿Chumabüiñ taiñ doi bülconabel Jehová? Eipinge quiñeque inayentun.

⁴ Iñchiñ pu cristiano ayüquelaiñ taiñ huenche quimafiel müten Biblia ñi feipin, doi mai Chau Dios ñi nehuen mu inaduamquefiyiñ Chau Dios ñi ellcalechi quimün (1 Cor. 2:9, 10). Fei, ¿chumafuiñ? Estudiayaiñ quiñe dungu mülelu Biblia mu, femngechi taiñ doi fülconal Jehová mu. ¿Chem dungu estudiayafuiñ? Quiñeque dungu tüfa: inaduamafuiñ Jehová chumngechi piuqueyefi tañi pu che cuifi mu, ca femngechi femquei fachantü. Ca inaduamafuiñ chumngechi püramyengequefui Jehová cuifi Israel mu, ca chumngechi püramyengequei fachantü. Ca peafuiñ quiñeque profecia ñi femtriparpun Jesús mülepalu mapu mu.

5. ¿Chem ayüabüimi tami ngüneduamal?

⁵ ¿Ayüafuimi tami estudiayal ellcalechi quimün mülelu Biblia mu? Peafuimi ti huichulechi dungu “ ¿Chem dungu inaduamafuimi Biblia mu?”, tüfa mu quiñeque peñi, lamngen cüme estudiaquelu Biblia feipingün chem taiñ inaduamafel. Tami estudiayal tüfa, ca inaduamafuimi ti Índice de las publicaciones Watch Tower ca ti Guía de estudio para los testigos de Jehová, tüfa quelluafeimu tami doi maneluhual Jehová mu ca tami peal ti quimün Chau Ngünechen mu cüpalu (Prov. 2:4, 5). Feula peafiyiñ quiñeque ellcalechi quimeltun taiñ inaduamafel.

6. 1) Quiñe duam müten ca quiñe ayüquel, ¿chemu trürlai? 2) ¿Chemu Jehová tañi ayüquel abquelai? (Efesios 3:11).

⁶ Jehová rumel huechunentuquefi tañi ayüqueel. Raquiduamnge tüfa: eimi ayüniefuimi puhual quiñe huaria mu, huelu rüpü mu pilcadnagi quiñe anümca, feimu puulayafuimi feiti huaria mu. Huelu eimi ayüniefuimi tami puhual feiti huaria mu, nüafuimi cangelu rüpü tami puhual. Chau Jehová Biblia mu ñochiquechi pengeleleiñmu chem tañi ayüqueel ca tañi piel, tüfa rumel felequei (Efes. 3:11). Quisu chumngechi rume huechunentuquefi tañi ayüqueel ca cüme adcünufi com dungu tañi huechurpual tañi ayüqueel (Prov. 16:4). Ca com tañi femqueel ta Jehová rumel mülequei. Feimu, ¿chem dungu ayüquei ta Jehová? Ca ¿chem dungu femquei ñi huechurpual tañi ayüqueel? Peafiyiñ.

7. Huentruulu hula hunenque che, ¿chumi Jehová? (Mateo 25:34).

⁷ Jehová feipifi ta Adán engu Eva chem ayüniefui ñi femal ta quisu engu. Feipifi: “Nieaimün yall, fentren-ngeaimün, apolfimün ti mapu ca ngünenieafimün. Cafei ngünenieafimün itrofill mongen” (Gén. 1:28). Huelu Adán engu Eva culpalu, com rulpalelfi ñi culpan caquelu cüpachi che. Tüfa ¿catrütupefi mai Jehová tañi ayüqueel? Femlai, Jehová fentecünulai. Pichiñma rupalu, raquiduami ñi elcünual quiñe Gobierno huenu mu, femngechi ñi huechurpual tañi ayüqueel mapu mu ca pu che mu (papeltunge Mateo 25:34). Rupachi tiempo mu, Jehová huercüi tañi fotüm mapu mu. Fei, ¿chumpai Jesús mapu mu? Quimeltuchepai Chau Dios ñi ngünenietual mapu ca hulpai ñi mongen taiñ moltulaeteu culpan ca lan dungu mu. Lalu ta Jesús, Jehová huiñomongeltueyu ñi lonco ülmencüleal Jehová ñi Gobierno mu huenu meu. Huelu doi mülei taiñ quimal, peafiyiñ.

8. 1) ¿Chem dungu mu dungui Biblia? 2) Efesios 1:8-11 tañi eipin, ¿chem ayüni Jehová? (Pebinge adentun hunen pagina mu).

⁸ Biblia doi nütramcai Jehová ngünenietufile mapu huechurpuai tañi ayüqueel mapu mu, femngechi yamniengetuai Jehová tañi üi. Jehová tañi ayüqueel femngechi felequei müten, com ñi feipicünuel femngechi tripayai (Is. 46:10, 11; Heb. 6:17, 18). Tati mapu cüme adcületuai ca com pu che culpan chengehuelayai ca rumel mongeleaingün (Sal. 22:26). Huelu doi afmatufalchi dungu rupayai. Jehová ayüquei com mülelu huenu mu ca ti mapu mu quiñe familia reque quiñeucületuai ca eluhuaingün tañi ngünenieaeteu ta Jehová (papeltunge Efesios 1:8-11). ¿Ayüucülenoafulu am ta iñchiñ Jehová chumngechi tañi huechurpual tañi ayüqueel?

9. Biblia, ¿chem eipieiñmu cüpalechi antü mu?

⁹ Raquiduamaiñ chem dungu ñi feipicünuel ta Jehová jardin de Edén mu mülelu Génesis 3:15. b Tüfa mu, Jehová feipicünui quiñeque dungu ñi rupayal fentren tripantu mu, femngechi ñi huechurpual ñi ayüqueel. Por ejemplo, Jehová feipifi ta Abrahán quisu tañi cüpanche  mu ñi cüpayal ti Mesías (Gén. 22:15-18). Feiti 33 tripantu mu, Jesús allfülmangei tañi rüncoi namun chumngechi ñi feipicünungeel (Hech. 3:13-15). Huelu petu faltai doi huaranca tripantu tañi pünoñmangeal tañi lonco ta Satanás (Apoc. 20:7-10). Huelu petu ñi rupanon tüfa, Biblia feipi ca dungu tañi rupayal, peafiyiñ.

10. 1) ¿Chem dungu bülcülepai? 2) ¿Chumngechi pepicaabüiñ taiñ lonco ca piuque? (Pebinge hudamngechi dungu).

¹⁰ Peaiñ chem ñi rupayal pichiñma mu. Hunelu mu pu troquiñche “¡com cümelcalei, ngelai chem dungu rume!” piaingün (1 Tes. 5:2, 3). Fei tati pu troquiñche lefconturumeafi tati coilaque religion, femngechi conai tati fütra cutrancahun (Apoc. 17:16). Rupale tüfa, pengeai chi afmatufalchi dungu huenu mu “ti Huentru ñi Fotüm nehuen ca pepiluhun mu cüpalelu huente tromü” (Mat. 24:30). Jesús juzgayafi com tati pu che. Tati ufisa reque felelu quiñepülecünuafi, tati capüra reque felelu cañpülecünuafi (Mat. 25:31-33, 46). Huelu Huecüfü mafülcuhucünuulayai. Fei rume illculelu am ngüchaltucuafi pu troquiñche Gog tuulu Magog pingelu ñi caiñetuafiel Jehová ñi pu che (Ezeq. 38:2, 10, 11). Fei com pu dullinque cristiano huenu mu trahuluucületuaingün, trahulutuaingün Jesús ca pu cümeque püllü engün, fei hueichayaingün Armagedón mu, femngechi afai ti fütra cutrancahun (Mat. 24:31; Apoc. 16:14, 16). c Femngechi Jesús ngünenietuafi com ti mapu huaranca tripantu mu (Apoc. 20:6).

11. Tami abquenochi mongen niepoal, ¿chem raquiduamimi? (Ca inaduamnge ti adentun).

¹¹ Ca raquiduamnge chem rupayai feichi huaranca tripantu mu. Biblia feipi Chau Jehová elueiñmu iñchiñ taiñ ayünieal rumel mongeleal (Ecl. 3:11). Inaduamaiñ ñi feipin lifru Acerquémonos a Jehová pingelu pagina 319. Feipi:  “Fantepu meu quiñeque dungu müten quimqueiñ Chau Jehová mu. Huelu mongeleliyiñ doi fentren tripantu, doi quimaiñ Chau Jehová mu. Huelu fentren tripantu rume mongeleliyiñ, aflayai taiñ quimafiel ta Jehová. Raquiduamlayaiñ rume chi taiñ rume cüme feleafel adelcangetule ti mapu. Fentren ayüfalchi dungu femaiñ, huelu tati doi ayüfalngelu: fei taiñ doi fülmaniefiel Jehová fill antü”. Feula ca peaiñ caquelu dungu taiñ inaduamal Biblia mu.

12. ¿Chumngechi peabüiñ tati huenu? Eipinge quiñe inayentun.

¹² Tati Biblia pichiquen pengeleiñmu ñi chumngen cheu ñi mülen ta Jehová huenu mu (Is. 33:5). Ca feipieiñmu quiñeque dungu ñi chumngen ta Jehová ca ti cümeque püllü mu (Is. 6:1-4; Dan. 7:9, 10; Apoc. 4:1-6). Por ejemplo, Biblia mu papeltuafuiñ afmatufalchi dungu ñi peel Ezequiel, feichi mu nülalu tati huenu ca pefilu afmatufalchi dungu Chau Dios mu cüpalu (Ezeq. 1:1).

13. Jesús tañi cüdahun huenu mu, ¿chum duamelqueimu? (Hebreos 4:14-16).

¹³ Ca raquiduamaiñ Jesús chem dungu femquei iñchiñ mu tañi reyngen ca hunen lonco sacerdotengen. Jesús ñi duam mu iñchiñ fülconpuafuiñ Jehová llellipun mu, femngechi pediafuiñ taiñ cutranpiuqueyeaeteu ca taiñ quelluaeteu (papeltunge Hebreos 4:14-16). Jehová ca Jesús huenu meu fentren cümeque dungu femquei iñchiñ mu, feichi dungu fill antü acordanieafiyiñ. Fente taiñ piuqueyenieteu eluucüleafuiñ taiñ serfinieafiel Jehová com taiñ nehuen mu (2 Cor. 5:14, 15).

14. ¿Chumngechi doi cüme pengelcünoabiiñ Jehová ca Jesús taiñ mañumuucülen? (Ca inaduamnge ti adentun).

 ¹⁴ ¿Chumngechi pengelelafuiñ taiñ mañumtuniefiel Jehová ca Jesús com ñi femün iñchiñ mu? Eluucüleaiñ taiñ quelluafiel pu che ñi testigongerpual ca ñi inanierpuafiel ta Jesús (Mat. 28:19, 20). Ti apostol Pablo fente ñi mañumcülen, femngechi femi. Quisu quimniefui Jehová “ayüniei itrofill che ñi montual ca ñi cüme quimürpuafiel ti rüf dungu” (1 Tim. 2:3, 4). Feimu ti apostol Pablo fente amuldungui ca fentren che quellufi, “fei chumngechi rume ñi montulafiel quiñeque engün” (1 Cor. 9:22, 23).

15. Salmo 1:2 tañi eipin, ¿chem ayühulaiñmu?

¹⁵ Taiñ inaduamfiel mu Biblia ñi feipin ayüucülequeiñ. Feimu ti salmista feipi ti ayühun-ngechi che “rume ayühuelqueyu Jehová ñi ley dungu, antü ca pun meu papeltuquei ñi ley ñochi dungun mu” (Sal. 1:1-3). Quiñe quimche feipi: “Com ti papeltulu Biblia mülei ñi ayüafiel Chau Dios ñi ngülam, feimu quintuafi, quimürpuafi ca raquiduamanieafi”. Feiti quimche ca feipi: “Quiñe che quiñe antü papeltunofile ta Biblia, ngünamcafi ti antü” (ti lifru Studies in the Psalms, Joseph Rotherham). Feimu iñchiñ cüme papeltufiliyiñ Biblia ca cüme raquiduamliyiñ chumngechi ñi nüucülen com ñi feipilen, ayühuelaiñmu. ¡Rume ayühun-ngei taiñ inaduamafiel Biblia ñi feipin!

16. ¿Chem ngüneduamaiñ inalechi papiltun mu?

¹⁶ Com iñchiñ entendeafuiñ Jehová taiñ enseñaeteu. Cüpalechi troquiñ mu, peaiñ cangelu falin-ngechi quimeltun, tüfa ta ñi feipin Pablo Chau Jehová ñi adcünuelchi ruca. Rume ayühuaiñ taiñ inaduamafiel tüfa.