1-2. Ano an pinakamarahay na paagi para basahon asin pag-adalan an Bibliya? Iilustrar.

 IMAHINARA na nag-iisip kang magbakal nin harong. Ano an gusto mong mahiling bago ka magbakal? Ritrato sana daw kan atubangan kan harong? Siguradong gusto mong mahiling mismo an harong para malibot mo an luwas kaiyan, makalaog diyan tanganing mainspeksiyon an gabos na kuwarto, asin mahiling an gabos na parte kaiyan. Tibaad gusto mo pa nganing hilingon an plano kan harong para maaraman kun paano iyan ginibo. Siyempre, gusto mong mahiling an gabos na detalye kan saimong magigin harong.

² Puwede ta man gibuhon an arog kaiyan pag nagbabasa asin nag-aadal kita nin Bibliya. Iinagid kan sarong parasurat an mensahe kan Bibliya sa “sarong mahiwason na marhay na edipisyo, na may halangkaw na mga tore asin hararom na mga pundasyon.” Kaya, kun siring, paano kita magigin pamilyar sa gabos na yaon sa Bibliya? Kun babasahon mo sana iyan nin madali, tibaad an manudan mo sana iyo an panginot na mga katotoohan​—an “pundamental na mga bagay kan sagradong mga kapahayagan nin Diyos.” (Heb. 5:12) Kaya, arog kan sa harong, kaipuhan mong magduman sa “laog” kaiyan tanganing masiyasat mong marhay an mga detalye. An sarong marahayon na paagi para pag-adalan an Bibliya iyo na maaraman kun paano magkakoronektar an manlain-lain na kabtang kan mensahe kaiyan. Maghinguwang marhay na masabutan bako sana kun ano an mga katotoohan na tinutubod mo kundi pati man kun taano ta nagtutubod ka sa mga iyan.

3. Ano an dinagka ni apostol Pablo na gibuhon kan saiyang mga kapagtubod, asin taano? (Efeso 3:14-19)

³ Para lubos na masabutan an lambang detalye kan Tataramon nin Diyos, dapat tang pag-adalan an hararom na mga katotoohan  sa Bibliya. Dinagka ni apostol Pablo an saiyang Kristiyanong mga tugang na mahigos na pag-adalan an Tataramon nin Diyos tanganing “masabutan [ninda] nin lubos kun ano an lakbang asin laba asin langkaw saka rarom” kan katotoohan. Sa siring, magigin urog pa sindang ‘nakagamot asin nakatindog’ sa saindang pagtubod. (Basahon an Efeso 3:14-19.) Kaipuhan na arog man kaiyan an gibuhon ta. Aramon niyato kun paano ta masisiyasat na marhay an Tataramon nin Diyos tanganing mas urog pang masabutan an kahulugan kaiyan.

4. Ano an puwede tang gibuhon tanganing magin mas dayupot ki Jehova? Magtao nin mga halimbawa.

⁴ Bilang mga Kristiyano, dai kita nakokontento sa pagkaigwa sana nin hababaw na pakasabot sa Bibliya. Sa tabang kan banal na espiritu nin Diyos, gustong-gusto tang manudan “dawa an harararom na bagay nin Diyos.” (1 Cor. 2:9, 10) Taano ta dai mo punan an sarong proyekto nin personal na pag-adal na makakatabang sa saimo na magin mas dayupot ki Jehova? Halimbawa, puwede mong siyasaton na marhay kun paano niya ipinahiling an pagkamuot niya sa mga lingkod niya kaidto asin kun paano iyan nagpapatunay na namumutan ka man niya. Puwede mong pag-adalan an areglo ni Jehova sa pagsamba kaidto sa Israel asin ikumparar iyan sa Kristiyanong areglo sa ngunyan. O tibaad puwede kang gumibo nin hararom na pag-adal sa mga propesiya na inutob ni Jesus sa panahon kan saiyang buhay asin ministeryo digdi sa daga.

5. Igwa daw nin sarong tema na gusto mong i-research sa saimong proyekto nin personal na pag-adal?

⁵ May mga mahigos na mga estudyante sa Bibliya na hinapot kun anong hararom na mga bagay an gusto nindang personal na pag-adalan sa Tataramon nin Diyos. An pira sa mga simbag ninda nakalista sa kahon na “ Mga Tema Para sa mga Proyekto nin Personal na Pag-adal.” Mauugma kang marhay na pag-adalan an arog kaiyan na mga tema sa tabang kan Watch Tower Publications Index o kan Giya sa Pag-research Para sa Mga Saksi ni Jehova. An hararom na pag-adal sa Bibliya makakapakusog kan saimong pagtubod asin makakatabang na “[manumpungan] mo an kaaraman manungod sa Diyos.” (Tal. 2:4, 5) Pag-ulayan ta ngunyan an pirang hararom na mga katotoohan sa Bibliya na puwede tang siyasaton na marhay.

6. (a) Ano an pagkakaiba kan plano sa katuyuhan? (b) Taano ta masasabi na an katuyuhan ni Jehova para sa tawo asin sa daga “daing sagkod”? (Efeso 3:11)

⁶ Pag-isipan halimbawa kun ano an sinasabi kan Bibliya manungod sa katuyuhan nin Diyos. Magkaibang marhay an plano asin an katuyuhan. An plano garo sarong espesipikong ruta na magiya sa saimo sa pinili mong dumanan. Minsan siring, puwedeng dai mangyari an plano kun magkaigwa nin ulang sa dalan. An katuyuhan nakapokus sa mismong dudumanan. Aram ta kun sain an eksaktong dudumanan ta, pero mayo iyan nin sarong espesipikong ruta. Puwede iyan baguhon kun kinakaipuhan. Marahay na sana ta padikit-dikit na ihinahayag ni Jehova sa Bibliya an saiyang “daing sagkod na katuyuhan.” (Efe. 3:11) Sa ano man na paagi, pirmi siyang nagigin mapanggana huling “an gabos na bagay ginibo [niya] para mautob an saiyang katuyuhan.” (Tal. 16:4) Asin an resulta kan mga ginigibo ni Jehova magdadanay sagkod lamang. Ano an katuyuhan ni Jehova, asin anong mga pagbabago an ginibo niya para mangyari iyan?

7. Pagkatapos na magrebelde an inot na mga tawo, paano ni Jehova binago an paagi niya nin paggibo kan saiyang katuyuhan? (Mateo 25:34)

⁷ Sinabi nin Diyos sa inot na mga tawo kun ano an katuyuhan niya para sa sainda. Dapat na ‘magkaigwa sinda nin mga aki asin magpakadakul, panuon ninda an daga asin sakupon iyan, asin pamahalaan an gabos na buhay na linalang’ sa daga. (Gen. 1:28) Kan magrebelde si Adan asin Eva, na nagin dahilan kaya luminaog an kasalan sa katawuhan, dai kaiyan naulang an katuyuhan ni Jehova. Binago niya an paagi niya nin paggibo kan saiyang katuyuhan. Insigida, nagdesisyon siyang mag-establisar nin sarong Kahadian sa langit na iyo an masagibo kan orihinal na katuyuhan niya para sa katawuhan asin sa daga. (Basahon an Mateo 25:34.) Sa saiyang itinalaan na panahon, mamumuton na isinugo ni Jehova an saiyang panganay na Aki sa daga para tukduan an mga tawo manungod sa Kahadian asin para itao an buhay kaini tanganing tubuson kita sa kasalan asin kagadanan. Dangan binuhay liwat si Jesus tanganing mamahala bilang Hadi kan Kahadian nin Diyos sa langit. Pero urog pa diyan an dapat hurop-hurupon manungod sa katuyuhan nin Diyos.

8. (a) Ano an tema kan Bibliya? (b) Arog kan ipinaliwanag sa Efeso 1:8-11, ano an pinakakatuyuhan ni Jehova? (Hilingon an ritrato sa cover.)

⁸ An panginot na tema kan Bibliya iyo na mabibindikar an pangaran ni Jehova mantang inuutob niya an saiyang katuyuhan para sa daga paagi kan saiyang Kahadian sa pamamahala ni Cristo. An katuyuhan ni Jehova dai mababago. Ginagarantiyahan niya na maisasagibo niya iyan nin mapanggana. (Isa. 46:10, 11, mga nota sa ibaba; Heb. 6:17, 18) Pag-abot nin panahon, an daga magigin sarong paraiso kun sain an perpekto, matanos na mga gikan ni Adan asin Eva “[mabubuhay] nin daing sagkod.” (Sal. 22:26) Pero, igwa pa si Jehova nin mas urog pa diyan na katuyuhan. An pinakakatuyuhan niya iyo na pagkasararuon an gabos niyang linalang sa langit asin sa daga. Dangan an gabos na nabubuhay may kaimbudan na magpapasakop sa saiya bilang saindang Soberano. (Basahon an Efeso 1:8-11.) Dai ka daw napapahanga sa magayunon na paagi ni Jehova nin paggibo kan saiyang katuyuhan?

9. Paagi sa pagbasa nin Bibliya, sagkod sain sa maabot na panahon an puwede tang maaraman?

⁹ Pag-isipan an propesiya na sinabi ni Jehova sa hardin nin Eden, arog kan mababasa sa Genesis 3:15. b Manungod iyan sa mga pangyayari na mautob kan saiyang katuyuhan, alagad malihis pa an rinibong mga taon bago iyan mangyari. Kaiba sa mga pangyayaring iyan an pagkaigwa ni Abraham nin gikan, an paggigikanan kan ipapangaki na Cristo. (Gen. 22:15-18) Dangan, kan 33 C.E., linugad  si Jesus sa buol arog kan ihinula. (Gibo 3:13-15) An ultimong pangyayari sa propesiya, an pagrunot sa payo ni Satanas, mangyayari labi pang 1,000 taon puon ngunyan. (Kap. 20:7-10) Asin dakulon pa an ihinahayag kan Bibliya manungod sa kun ano an mga mangyayari sagkod na an pag-iiwal sa pag-ultanan kan sistema ni Satanas asin kan organisasyon ni Jehova sumagkod sa katapusan.

10. (a) Anong mga pangyayari sa maabot an madali nang mangyari? (b) Paano ta aandamon an satong isip asin puso? (Hilingon an nota sa ibaba.)

¹⁰ Pag-isipan an manungod sa mahalagang mga pangyayaring ini na ihinula kan Bibliya. Inot, an mga nasyon maproklamar nin “katuninungan asin katiwasayan!” (1 Tes. 5:2, 3) “Tulos-tulos,” mapuon an dakulang kasakitan pag inatake na kan mga nasyon an gabos na palsong relihiyon. (Kap. 17:16) Pagkatapos kaiyan, posibleng magkaigwa nin pambihirang mga eksena kan “Aki nin tawo na minaabot na nasa mga panganuron nin langit asin may kapangyarihan saka dakulang kamurawayan.” (Mat. 24:30) Huhusgaran ni Jesus an katawuhan, na isinusuway an mga karnero sa mga kanding. (Mat. 25:31-33, 46) Alagad, dai mapundo si Satanas sa pakikipaglaban ki Jehova. Huli sa kaanggutan niya, susutsutan niya an koalisyon nin mga nasyon na inaapod kan Bibliya na Gog kan daga nin Magog para atakihon an tunay na mga parasamba ni Jehova. (Ezek. 38:2, 10, 11) Pagkatapos, an linahidan na mga natatada titipunon sa langit para makaiba ni Cristo asin kan saiyang langitnon na hukbo tanganing makipaglaban sa giyera nin Armagedon, an katapusan kan dakulang kasakitan. c (Mat. 24:31; Kap. 16:14, 16) Sa panahon na iyan, mapuon an Sangribong Taon na Paghadi ni Cristo sa daga.​—Kap. 20:6.

11. Ano an kahulugan para sa saimo kan paglaom na mabuhay nin daing sagkod? (Hilingon man an ritrato.)

¹¹ Ngunyan pag-isipan an magigin buhay mo pagkatapos kan 1,000 taon. Sinasabi kan Bibliya na “ibinugtak pa ngani [kan satuyang Kaglalang] sa puso [ta] an panahon na daing kasagkudan.” (Ecl. 3:11) Pag-isipan kun ano an kahulugan kaiyan para sa saimo asin sa saimong relasyon ki Jehova. An librong Rumani ki Jehova, sa pahina 382, nagsasabi kan nakakaugmang mga tataramon na ini: “Pakatapos na mabuhay nin ginatos,  rinibo, minilyon, binilyon pa nganing taon, mas dakul pang marhay an maaaraman niyato manungod sa Diyos na Jehova kisa sa ngunyan. Alagad mamamatian pa man giraray niyato na dakulon pang makangangalas na mga bagay na dapat manudan. . . . An buhay na daing sagkod magigin makahulugan asin maugma sa paaging dai ta maiimahinar​—asin an urog na pagrani ki Jehova pirming iyo an magigin pinakanakakakontentong kabtang kaiyan.” Miyentras tanto, mantang padagos tang pinag-aadalan an Tataramon nin Diyos, ano pa an puwede tang siyasaton?

12. Paano ta puwedeng pagmasdan an kalangitan? Magtao nin halimbawa.

¹² Tinatawan kita kan Tataramon nin Diyos nin kadikit na ideya manungod sa presensiya ni Jehova “sa kaitaasan.” (Isa. 33:5) Ihinahayag kan Bibliya an kahanga-hangang mga bagay manungod ki Jehova asin sa langitnon na kabtang kan saiyang organisasyon. (Isa. 6:1-4; Dan. 7:9, 10; Kap. 4:1-6) Halimbawa, mababasa ta an manungod sa makangangalas na mga bagay na nahiling ni Ezekiel kan “nabuksan an kalangitan asin nagpuon [siyang] makahiling nin mga bisyon hali sa Diyos.”​—Ezek. 1:1.

13. Ano an naaapresyar mo manungod sa papel ni Jesus sa langit, arog kan ipinaliwanag sa Hebreo 4:14-16?

¹³ Pag-isipan man an manungod sa papel ni Jesus sa langit bilang an satong namamahalang Hadi asin madinamayon na Halangkaw na Saserdote. Paagi sa saiya puwede kitang dumulok sa Diyos sa saiyang “trono nin daing kapantay na kabuutan” paagi sa pamibi asin makimahirak saka maghagad nin tabang “sa tamang panahon.” (Basahon an Hebreo 4:14-16.) Lugod na dai ta palampason an sarong aldaw na dai naghuhurop-hurop sa kun ano an ginibo asin ginigibo ni Jehova saka ni Jesus para sa sato hali sa langit. An pagkamuot ninda sa sato dapat na makataros na marhay sa satong puso asin makapahiro sa sato na magin maigot sa satong paglilingkod asin pagsamba.​—2 Cor. 5:14, 15.

14. Ano an saro sa pinakamarahay na magigibo ta para ipahiling kun gurano ta naaapresyar si Jehova asin si Jesus? (Hilingon man an mga ritrato.)

 ¹⁴ An saro sa pinakamarahay na magigibo ta para ipahiling kun gurano ta naaapresyar an satong Diyos asin an saiyang Aki iyo an paghihinguwang tabangan an iba na magin mga Saksi ni Jehova asin mga disipulo ni Jesus. (Mat. 28:19, 20) Iyo ini an ginibo ni apostol Pablo bilang pasasalamat sa Diyos asin ki Cristo. Aram niya na an kabutan ni Jehova iyo na “an gabos na klase nin tawo maligtas saka makaabot sa tamang kaaraman mapadapit sa katotoohan.” (1 Tim. 2:3, 4) Nagmaigot siyang marhay sa saiyang ministeryo para tabangan an pinakadakul na tawo sagkod sa makakaya niya tanganing “sa gabos na paaging posible mailigtas [niya] an nagkapira.”​—1 Cor. 9:22, 23.

15. Sigun sa Salmo 1:2, ano an makakapaugma sa sato?

¹⁵ Angay sana na ilinadawan kan salmista na an sarong maugma asin mapangganang tawo iyo idtong “[ikinakaugmang] marhay . . . an katugunan ni Jehova” asin “an Saiyang katugunan hinuhurop-hurop niya, aldaw asin banggi.” (Sal. 1:1-3; nota sa ibaba) Dapit sa tekstong ini, may sinabi an paratradusir sa Bibliya na si Joseph Rotherham sa saiyang libro na Studies in the Psalms. Sinabi niya na an sarong tawo dapat na “ikaugmang marhay an paggiya nin Diyos kaya hahanapon niya iyan, pag-aadalan iyan, asin matao nin dakul na panahon para pag-isipan iyan.” Sinabi pa niya na an sarong parabasa nin Bibliya puwedeng “ibilang na sayang sana an sarong aldaw kun maglihis iyan na dai siya nagbasa nin Bibliya.” Puwede mong ikaugma an pag-adal sa Bibliya paagi sa pagkua kan pinakadakul na mahalagang detalyeng makukua mo diyan asin paagi sa pag-aram kun paano iyan magkakoronektar sa kada saro. Nakakaugma nanggad na siyasaton na marhay an lambang detalye kan Tataramon nin Diyos!

16. Ano an pag-uulayan ta sa masunod na artikulo?

¹⁶ An magayon na mga katotoohan na itinutukdo sa sato ni Jehova sa saiyang Tataramon bako man masakiton na masabutan. Sa masunod na artikulo, pag-uulayan ta an saro sa mas hararom na mga katotoohan​—an dakulang espirituwal na templo ni Jehova, na ilinadawan ni Pablo sa saiyang surat sa mga Kristiyanong Hebreo. Lugod na an pagsiyasat na marhay sa temang iyan makatao sa saimo nin dakulang kaugmahan.