1-2. Aval avé ô ne yeme lañ a yé’é Kalate Zambe? Va’a éve’an.

 TAME simesane na wo kômbô kuse nda éziñ. Jé wo ye jeñe na ô taté yemelan ôsusua na wo kuse je? Ye wo ye su’u ve na wo yene fôtô ya nda éte? Teke bisô na womiene wo ye jeñe na ô yene nda éte, ô nyiin été asu na ô mane yene bitune bi nda bise a abim é ne. Da ye tu’a bo mvo’é na womien ô yene nkpwase ya nda éte asu na ô yem avale be nga lôñe je. Wo ye jeñe na ô mane yeme bone be mame bese ba fombô nda éte ôsusua na wo kuse je.

² Bi ne bo avale da éyoñe bia lañ a yé’é Kalate Zambe. Ñyeme mam éziñ a nga ve’e foé ya Kalate Zambe a “beta nda a ne mbetane yôp été a bili mbôka’a ô nyiine si été.” Nde aval avé bi ne kôme wô’ô mame mese me ne Kalate Zambe été? Nge wo lañe Kalate Zambe ane wo mate mbil, wo ye fo’o yeme ve bone be mame be ne été, nge ki—“mintene miñye’elane ya atata’a ya minjôane mi Zambe mi ne étyi.” (Héb. 5:12) Ajô te, avale môt a kômbô kuse nda a jeñe na a “nyiine” nda été asu na a yem avale nda éte é ne, wo fe wo yiane kôme yé’é Kalate Zambe asu na ô tu’a wô’ô miñye’elane mi ne été. Asu na bi kôme wô’ô jame Kalate Zambe a jô, bia yiane kôme jeñe na bi yen aval avé mengabe mese ya Kalate Zambe ma wô’an a bo nlô ajô wua. Jeñe’e fe na ô wô’ô mame wo buni, a amu jé wo buni me.

3. Jé nlômane Paul ô nga jô bekristene na be bo, a amu jé? (Beéphésien 3:14-19)

³ Asu na bi kôme wô’ô mengabe mese ya Kalate Zambe, bia yiane yé’é nye édok été. Nlômane Paul ô nga jô bobejañ a besita na be kôme nyoñ éyoñe ya yé’é Kalate Zambe asu na be “kôme yeme nya ñyemane, jé é ne ndam, ayap  a  ôyabe yôp a édok” ya benya mejôô. Nalé a ye volô be na be bi ‘ngule minkañ a yeme mbôka’a ya’ mbunane wop. (Lañe’e Beéphésien 3:14-19.) Bia fe bia yiane bo avale da. Bi tame zu yen aval avé bi ne tu’a fa’a Kalate Zambe asu na bi kôme wôk atinane ya mame bia yé’é.

4. Jé bi ne bo asu na bi subu Yéhôva bebé? Va’a bive’an.

⁴ Bia bekristene bi nji kômbô su’u ve na bi yeme ve miñye’elane ya atata’a ya Kalate Zambe. Mfufube nsisisme Zambe a volô bia na bi bi éva’a ya yé’é “to’o bido’o bi mame ya Zambe.” (1 Cor. 2:9, 10) Ô ne taté na wo yé’é nge jeñe mame méziñ édok été a nsôñane ya subu Yéhôva bebé. Ô ne jeñe na ô tu’a yem avale Zambe a nga liti bebo bisaé bé ya melu mvuse nye’an, a aval avé jam éte da liti na a nye’e fe wo. Ô ne jeñe na ô kôme wôk avale Yéhôva a mbe a yi na bone be Israël be kañe nye melu mvus, a aval a yi na bi kañe nye den. Éko éziñ ô ne fe nyoñ éyoñe ya yé’é édok été minkulane mejô Yésus a nga zu jalé éyoñ a nga nyiñe si va, a mi a nga jalé éyoñ a mbe a bo’o ésaé nkañete jé.

5. Ye ô bili nlô ajô éziñe wo kômbô tu’a fak éyoñe wo ye bo ayé’é étame dôé?

⁵ Be nga sili beyé’é Kalate Zambe béziñe bido’o bi mame bebiene ba kômbô yé’é Kalate Zambe. Ô ne yene biyalane biziñe be nga ve nka’ale ô na “ Minlô mejô asu ayé’é étam.” Ô ne fe bu’uban a mbamba minlô mejô mife mi ne Guide de recherche pour les Témoins de Jéhovah. Éyoñe wo kôme yé’é Kalate Zambe, nalé a ne yemete mbunane wôé a volô wo na ô “yen ñyemane ya Zambe.” (Mink. 2:4, 5) Éyoñe ji bi tame zu yene bido’o miñye’elane ya Kalate Zambe biziñe bi ne tu’a fak.

6. (a) Nsela’ane mbé a ne zañe nta’ane mam a nsôñan? (b) Amu jé bi ne jô na nsôñane Yéhôva asu si a môna môt ô ne “nnôm éto”? (Beéphésien 3:11)

⁶ Bi tame zu yene jame Kalate Zambe a jô a lat a nsôñane Zambe. Beta nsela’ane  a ne zañe nta’ane mam a nsôñan. Nta’ane mam ô ne ane zene wo wulu asu na ô ke kui vôm éziñ. Ve nge jôm éziñ é dibi wo zen éte, ô ne kate kui vôme wo kômbô ke. Ve nsôñane ki, bi ne ve’e wô a vôm émiene wo ke. Bia kôme yeme vôme bia ke, ve bi ne tyii abui mezen asu na bi kui vôm ate. É ne kui na bi tyendé zene jangane nge nalé a sili. Ve mbamba jam a ne na, a zene ya Kalate Zambe, Yéhôva a zuya a volô bôt ôte’etek ôte’ete’e na be yeme “nsôñane wé ya nnôm éto.” (Fombô’ô Beéphésien 3:11.) Jam avok é ne na, Yéhôva a tôé nsôñane wé éyoñ ése amu “a boya jôm ése [asu na a tôé nsôñane wé].” (Mink. 16:4) A bia ye bu’ubane mbamba be mame bese Yéhôva a bo nnôm éto. Nde ñhe, nsôñane Yéhôva ô ne jé, a mame mevé a nga tyendé asu na a tôé wô?

7. Éyoñ Adam ba Ève be maneya bo melo, jé Yéhôva a nga bo asu na a tôé nsôñane wé? (Matthieu 25:34)

⁷ Zambe a nga kate Adam ba Ève jam a mbe a kômbô bo asu dap. A nga jô be na: “biaéane bon, a fôé, a yiane si nyô, a jôô je; jô’ane . . . jôm ése é vee” si va. (Mett. 1:28) Éyoñ Adam ba Ève be nga bo melo, be nga kôé mvoñe bôte jap ése abé. Ve nalé a nji bo na nkômbane Zambe ô bo teke tôéban. Zambe a nga jeñe na a tôé nsôñane wé aval afe. Été été, Zambe a nga tyi’i na a zu telé ngum Éjôé yôp été asu na a tôé nsôñan a mbe a bili atata’a a lat a si a bone be bôt. (Lañe’e Matthieu 25:34.) Mvuse ya valé, Yéhôva a nga lôm atyi’i Mone dé si va asu na é zu volô bôte na be yeme jôm é ne Éjôé Zambe, a ve ényiñe jé asu na a kôté bia abé a awu. Mvuse ya valé Yésus a nga bulane yôp été a bo Njôô ya Éjôé Zambe. Ve bi ngenane bi yiane yé’é abui mam afe a lat a nsôñane Zambe.

8. (a) Nlô ajô ya Kalate Zambe ô ne ôvé? (b) Avale kalate Beéphésien 1:8-11 a liti, nsôñane Yéhôva ô ne ôvé? (Fombô’ô fôtô ya ékô’ôla.)

⁸ Ntene nlô ajô ya Kalate Zambe ô ne na éyôlé Yéhôva ja ye bo mfuban éyoñe nkômbane wé wo ye tôébane si va a zene ya Éjôé Krist. Nsôñane Yéhôva ô vo’o tyendé. A nga ka’ale na mame mese ma ye bobane fo’o ve aval a nga jô. (Ésa. 46:10, 1.; Héb. 6:17, 18) Éyoñ éte si ja ye bo Paradis, vôme bone be Adam ba Ève be ne teke nseme ba ye bu’uban ényiñe nnôm éto. (Bsa. 22:26) Ve sake jam éte étame de Yéhôva a ye bo. Nsôñane wé wo dañ ô ne na, bitétéa bise ya yôp a bi ya si bi bo nlatan. Éyoñ éte, bitétéa bise bi vee bia ye suu bibiene Éjôé Zambe si. (Lañe’e Beéphésien 1:8-11.) Ye ô nji bo fe’e ne vema éyoñe wo yen avale Yéhôva a tôé nsôñane wé?

9. Mame mevé ya melu ma zu bi ne yem a zene ya nlañane Kalate Zambe?

⁹ Bi tame zu yene nkulan ajô Yéhôva a nga bo afup Éden bia koone wô kalate Metata’a 3:15. b Nkulan ajô ôte ô mbe ô kobô’ô ajô mame me mbe me yiane tôé nsôñane Zambe, ve mame mete me mbe me yiane bobane mvuse betoyini mimbu. Éve’an é ne na, Zambe a nga jô Abraham na môte ya mvoñe bôte jé nnye a ye biaé Krist. (Mett. 22:15-18) Mvuse ya valé, mbu 33 É.J., mvoñe nyo é nga di’i Yésus étimekili avale nkulan ajô ô mbe jô’ô. (Mame mi. 3:13-15) Ve ngabe nkulan  ajô é mbe é jô’ô na mvoñe minga ja ye fite Satan nlô ja ye tôébane melu ma zu. (Nlitan 20:7-10) A Kalate Zambe a kobô ajô abui mam afe da ye boban éyoñe ziñ é ne zañ émo Satan a ékôane Yéhôva ja ye tulan ôkup.

10. (a) Beta be mame bevé ba ye boban ana’ana? (b) Aval avé bi ne kômesane minleme miangan a minsisime miangan? (Fombô’ô aton.)

¹⁰ Tame simesane beta be mame Kalate Zambe a nga jô na ba ye bobane melu ma zu. Jam ôsu a nga jô é ne na, meyoñe ma ye jô na “mvo’é a teke jame ya ko woñ!” (1 Thes. 5:2, 3) “Éyoñ éte ébien,” beta étibila’a a ye taté éyoñe meyoñe ma ye wosan évuse ñyebe. (Nlitan 17:16) Mvuse ya valé étua jam é ne boban, éko éziñe ba ye yene “Mona môt a so’o minkute ya yôp été, a ngul a beta étôtok.” (Matt. 24:30) Yésus a ye tyi’i bôte mejô a kandé mintômba a bikela. (Matt. 25:31-33, 46) Éyoñ éte Satan ki a ye ke ôsu a tebe Yéhôva ngame yat. Mbôl a vini bebo bisaé be Yéhôva angôndô ya abui, a ye tindi nsamba meyoñe ba loone na Gog môte ya si ya Magog na ô ke wosane bebo bisaé be Yéhôva. (Ézé. 38:2, 10, 11) Éyoñ éte miñwo’one mia ye bo mi ngenane si va mia ye ke koone Yésus a mingungule beéngele bevo’o yôp été asu bita ya Armaguédon, e memane ya beta étibila’a. c (Matt. 24:31; Nlitan. 16:14, 16) Mvuse ya valé, Éjôé Krist ya toyini mimbu ja ye taté si va.—Nlitan 20:6.

11. Ényiñe ya nnôm éto ja tinan aya asu dôé? (Fombô’ô fe fôtô.)

¹¹ Éyoñe ji, tame ve’ele simesan aval ényiñe ja ye bo mvuse toyini mimbu. Kalate Zambe a jô na, Nté wongan “a maneya futi ajô ya nnôm éto nleme [wongan] été.” (Eccl. 3:11) Tame ve’ele simesan aval avé jam éte é ne nambe ényiñe jôé, a élat ô bili a Yéhôva. Kalate Approchez-vous de Jéhovah, afebe 319, a bili mbamba bifiaé bi: “Éyoñe bia ye bo bi nyiñeya mintete mimbu, betoyini mimbu, bemillion mimbu, to’o bemilliard  mimbu, bia ye bo bi yemeya Yéhôva angôndô ya abui a dañ abime bia yeme nye éyoñe ji. Ve to’o nalé, bia ye yene na bi ngenane bi bili abui mame ya yé’é. . . . Bi vo’o ki ve’ele simesan abim avé ényiñe ya Paradis ja ye bo abeñ, a abim avé ja ye ve bia fane ya bo abui mbamba be mam.” Ve jame da dañe mame mete mese é ne na, bia ye subu Yéhôva bebé éyoñ ése. Nde nté bia yange môs ôte, mame mevé bi ne ke ôsu a fa’a Kalate Zambe été?

12. Aval avé ô ne bete mise yôp? Va’a éve’an.

¹² Kalate Zambe a kate fo’o bia ve abime bone be mame béziñ be tii a vôme Yéhôva a to “yôp été.” (Ésa. 33:5) Kalate Zambe a kate bia bitua bi mam a lat a Yéhôva a ngap ékôane jé é ne yôp été. (Ésa. 6:1-4; Dn. 7:9, 10; Nlitan 4:1-6) Éve’an é ne na, bi ne lañe bitua bi mam Ézéchiel a nga yen éyoñe “yôp ô nga kuiban, a [a] nga yene mam ma so be Zambe.”—Ézé. 1:1.

13. Avale kalate Behébreu 4:14-16 a liti, aval avé wo yen ésaé Yésus a bo a too yôp été?

¹³ Tame ve’ele simesan ésaé Yésus, Njôô wongan a Beta Prêtre wongan a bo yôp été. A zene ya be Yésus bi ne subu “éto njôane ya beta mvame” Zambe a zene ya meye’elan, a sili mvolane wé a mvame jé “mbamba éyoñ.” (Lañe’e Behébreu 4:14-16.) Bi nji yiane jô’é na môs ô lôte teke fase jame Yéhôva ba Yésus ba bo yôp été asu dangan. Nye’ane ba nye’e bia wo yiane nambe minleme miangane nya abuii, a tindi bia na bi bo ayôñe nsisim.—2 Cor. 5:14, 15.

14. Beta jame mbé bi ne bo asu na bi liti Yéhôva ba Yésus na bia ve be akiba? (Fombô’ô fe befôtô.)

¹⁴ Mbamba zene wua ya liti abim avé  bia nye’e Zambe wongan a Mone wé a ne éyoñe bia ve ngule ya volô bôte bevo’o na be bo Bengaa be Yéhôva a beyé’é be Yésus. (Matt. 28:19, 20) Nde nlômane Paul ô nga bo nalé asu na ô ve Zambe ba Yésus akiba. Paul a mbe a yeme’e na nkômbane Yéhôva ô ne na “kane bôt ése é nyiiban a bi nya ñyemane ya benya mejôô.” (1 Tim. 2:3, 4) A nga bo ésaé nkañete a ngule jé ése asu na a volô abime bôt a mbe ngule ya volô na é bi ényiñ.—1 Cor. 9:22, 23.

15. Avale kalate Besam 1:2 a jô, jé é ne bo na bi bi mevak?

¹⁵ Ntili besam a nga jô na môt “a nye’e metiñe me Yéhôva,” a nyu “a simesane metiñe Mé môse ba alu” a ne mevak a mame mé mese ma wulu mvo’é. (Bsa. 1:1-3.) Joseph Rotherham, nkôñelane Kalate Zambe éziñ a nga jô a lat a bifuse bite na, môta binam a yiane nye’e melebe me Yéhôva aval é ne na a “yé’é me, a jeñe me, a kôme lôt abui éyoñe na a bindi mam a yé’é nleme wé été.” A nga jô fe na, éyoñe môt a bili fulu ya lañe Kalate Zambe a lôte ngume môse teke nye lañe , yeme na môs ôte ô wuya nye ntuk.” Ô ne tu’a bu’uban ayé’é Kalate Zambe dôé éyoñe wo nyoñ éyoñe ya fombô bone be mame bese bia te lañ, a éyoñe wo yen avale mame mete mese ma lu’an. Ngo’o abime meva’a bia bi éyoñe bia nyoñ éyoñe ya fa’a Kalate Zambe édok été!

16. Jé bia ye yen ayé’é da zu?

¹⁶ Mbamba miñye’elane Yéhôva a ve bia Kalate Wé mia dañe ki ayaé ya wôk. Ayé’é da zu, bia ye yen édo’o ñye’elan éfe ya Kalate Zambe é tii a beta temple ya nsisime Yéhôva. Paul a nga kobô ajô temple ate kalate a nga tili bekristene ya Hébreu. Ngo’o abime mevak ô ne bi nge wo kôme nyoñ éyoñe ya yé’é nlô ajô ôte.