1, 2. Ka igaburi buídutimabei lun waliihanu luma lun waturiahanu Bíbülia? Ru huma aban hénpulu.

 SAMINA humá busén humá hagañeiha aban muna. Ka habusenrubei hasubudirun lubaragiñe hagañeihanu muna tuguya? Buídurügübei hamuga san hun tadirarun muna tuguya tigibugiñe? Ma himei humagili hamuga hidin arihoun hungua? Chóuruti busenbadün lan harihinu dandu múnadagiñe kei bóugudigiñe lun harihini sun rumu le ñeinbei buidu buidu. Másiñati busenbadün lan giñe harihinu pülanu lun harihini ida liña lan tábunawagun. Furanguti busenbadün lan harihinu muna buidu buidu lun harihini ídatima tiña lan.

² Ligiaméme giñe lunbei wadügüni dan le waliihanu luma dan le waturiahanu Bíbülia. Ariñagati aban subudihabúti tuáguti Bíbülia ítara tiña lan kei “aban tanarime tagütü muna íñutu ani hulili ligía tabunún”. Ida luba wasubudiruni sun le tariñagubei Bíbülia? Anhoun waliiha lau lóufudagun, míbebei katei wafurendeirun, kateirügübei “létima ménrengubei tídangiñe” wafurendeira (Ebü. 5:12). Ítara kei mosu lan wasubudirunu aban muna buidu buidu lubaragiñe wagañeihanu, mosu giñe waturiahanu Bíbülia buidu lun warihini ida liña lan sun “lácharagun” o gani lan ámuñegueinarügü ariñahani lúmagua. Úati buídurügü lan lun afiñerügü wamá, mosu giñe wasubudiruni ka lan uagu wafiñera luagu ítaga katei.

3. Ka un línchahaña Pábulu líbirigu kristiánugu lun hadügün, ani ka uagu? (Éfesuna 3:​14-19).

³ Lun gunfuranda wamanu Lererun Bungiu buidu buidu lunti waturiahani sun tácharagun, lunti giñe waturiahani inarüni huliliti le tídanbei. Ínchaha lumutiña apostolu Pábulu sun kristiánugu lun haturiahanu Lererun Bungiu lau ubebeni ‘gayara láamuga gunfuranda hamani títulen, timigifen, tilulin luma liñun’ inarüni  le tídanbei, “lun ínsiñeniba lan lílagüle luma liderebugu” hafiñen (aliiha huméi Éfesuna 3:​14-19). Lunti giñe wadügüni ligiaméme. Ariha waméi ida luba lan wakutihanu Lererun Bungiu buidu buidu gunfuranda wamounme lun gayara lan wadariruni inarüni le tídanbei.

4. Ka gayaraabei wadügüni lúntima wayarafadun lun Heowá? Ru humá fiu hénpulu.

⁴ Wagía kristiánugu siñati gufuruma wamá láurügü wasubudirun murusunrügü ariñahani tídangiñe Bíbülia. Busentiwa wafurendeiruni “íbini lilulin-agei laritagun Bungiu”, ani gayaraati líderaguniwa sífiri sandu lun wadügüni (1 Ko. 2:​9, 10). Ka uagu madügün hubéi aransehani lun haturiahan hábuguarügü luagu somu tema le gayaraabei ladügün lúntima hayarafadun lun Heowá? Kéiburi lun hakutihani ida liña lan larufudun Heowá ínsiñeni hawagu lubúeingu ha lánina binadu dan luma ida liña lan larufudun katei le hínsiñe humá lun. Gayaraati giñe haturiahani ida liña lan meha labusenrun Heowá lun háhuduragun Ísüraelina lun, ábameti hagoubaguagüdüni luma ida liña lan labusurun Heowá lun wáhuduragun lun uguñe weyu. O hakutihani profesía buidu buidu le agunfulirubei luagu Hesusu lidan libagari luma lidan lani ministeriu dan meha ya lubéi Ubouagu.

5. Ka tema hínsiñebei hamuga hun hakutihani lidan haturiahan hábuguarügü?

⁵ Aba halügüdǘn fiu íbirigu ha buídubaña lidan taturiahoun Bíbülia ka lan inarüni le dǘgüdati hínsiñebei hamuga houn hakutihani. Lidan rekuáduru le gíribei “ Tema lánina haturiahan gürigia hábuguarügü” anihein fiu lídangiñe saminaü le híridubei íbirigu ha ñein. Chóuruti hínsiñebei lan hun saragu haturiahan luagu burí tema kéiburi le, lau lídehan Índice de las publicaciones Watch Tower tuma Adundehani lun haturiahan gefentiña luagu Heowá. Líderagubadün akutihani le lun lederebugüdün hafiñen ani ítara luba hasubudiruni lanichigu “lasubudirúniwa Bungiu” (Ari. 2:​4, 5). Guentó, teni wamá lun fiu inarüni huliliti tídangiñeti Bíbülia le gayaraabei wakutihani ani gunfuranda wameime.

6. a) Ru humá aban hénpulu le arufuduti gúnfuli lan Heowá súnwandan lau le labusenrubei ladügün? b) Ka uagu gayara lubéi wariñagun le lan labusenrubei Heowá ladügün houn gürigia luma lun Ubóu aban lan katei le lunbei ladurarun lun súnwandan? (Éfesuna 3:11).

⁶ Samina wamá luagu le tariñagubei Bíbülia luagu le labusenrubei Bungiu ladügün. Súnwandan ladügüni Bungiu le labusenrubei  ladügün. Samina humá luagu le, busentün hachülürün lidoun aban aüdü, gama lumoun, aba léiguadun aban tilimun wewe luagun üma, genegeti siñabei lan hásügürün lídangiñe üma ligía lun hachülürün le ñeinhin badun lubéi. Ani kei busén humá hachülürün lidoun aüdü ligía, ábati hárügüdün amu üma lun hachülürün ñeinhin. Ítarameme ladügübei Heowá le laritagubei ladügün “lúmagiñe lubaragiñe lagumeserun sun katei”, ani seremei wamuti saragu luagu lafuranguagüdüni woun tidan Bíbülia murusun murusun le lunbei ladügüni (Efe. 3:11). Furumiñeguarügü katei le ladügübei súnwandan buidu lan ladüga “adüga laali […] sun katei lau aban saminaü” (Ari. 16:4). Ani le lanügübei le ladügübei Heowá laduraruba lun súnwandan. Ligíati, ka labusenrubei Heowá ladügün ani ka asansiruni ladügübei lun gayaraabei lan lagunfuliruni?

7. Ida liña lasansiruni Heowá ligaburi le labusenrubei ladügün dan le lebedaagunbei Adán tuma Ewa lun? (Matéu 25:34).

⁷ Ariñagati Bungiu houn furumiñetiña gürigia ka lan labusenrubei houn dan le lariñagunbalin dimurei le: “Garahüñügua humá saragu, buíngüda huméi ubóu hau hirahüñü ani gumadi huméi, gumadi humañame […] sun animaalugu” (Agu. 1:28). Inarüni, dan lan le lebedaagunbei Adán tuma Ewa, aba lan hebelaagüdüni figóu hadoun gürigia, lau sun lira madügünti katei le lun siñá lan lagunfuliruni Heowá le labusenrubei ladügün. Aranserügü lumuti ida luba lan ligaburi lagunfuliruni. Lau lóufudagun aba ladügün lun ñein lan aban Arúeihani sielu le lunbei meha ladügün lun lagunfulirun le labusenrubei houn gürigia luma lun Ubóu lúmagiñe furumiñeti dan (aliiha huméi Matéu 25:34). Lidan dan le lanúadirubei Heowá aba larufuduni línsiñehabu ani aba lóunahani Liráü le ábanrügüti ubouagun. Ayanuhati Hesusu houn gürigia luagu Larúeihan Bungiu ani derege lumuti libagari lun gayaraabei lan lesefuruniwa lídangiñe figóu luma lídangiñe óunweni. Lárigiñe, aba láguyugun lun lawinwandun sielu luma lun Urúei lan lidan Larúeihan Bungiu. Gama lumoun, anihein ámuya katei luáguti le labusenrubei Bungiu ladügün le gayaraabei wararamagun asaminara luagu.

8. a) Ka tema tídanbei Bíbülia? b) Ítara kei lariñaguni Éfesuna 1:​8-11, ka ámuya katei lunbei libihini Heowá? (Ariha huméi dibuhu le luágubei tidáü garüdia).

⁸ Aniha tema le súdinitimabei tidan Bíbülia: Larumadahabei lan Heowá liri danme le lagunfuliruni le labusenrubei lun Ubóu lídangiñe Larúeihan, lúhaburugu Hesukrístu. Úati ni kata lun ladüraaguni le labusenrubei Heowá ladügün. Ligía guánarügü achoururagüdübalin luagu lagunfulirubei lan (Isa. 46:​10, 11; Ebü. 6:​17, 18). Laume lásügürün dan, ladügǘba Ubóu ábanme paraísu le ñeinba lubéi mafigoun haña lanme ladügawagun Adán tuma Ewa ani hawinwanduba lun súnwandan (Sal. 22:26). Ani mámarügübei katei le asusereda: gíbetimabei katei lanügün le labusenrubei Heowá ladügün. Libihuba lun ábanmeme hamá iduheñu dandu ánheligu kei gürigia, luma lun hasubudiruni súngubei ligía lan gabafutimabei ligibuagu sun Ubóu (aliiha huméi Éfesuna 1:​8-11). Ma buiti ligaburi lagunfuliruni Heowá le labusenrubei ladügün?

9. Átiriñein wasubudirun luagu le lunbei lasuseredun ámuñegü dan le waliihanu Bíbülia?

⁹ Samina wamá luagu profesía le lariñagubei Heowá lidan fuluri agei Edén le adarirubei lidan Agumesehani 3:15. b Lidan, ayanuhóuati luagu katei le lunbei lasuseredun, le lunbei ladügün lun lagunfulirun le labusenrubei Heowá ladügün; gama lumoun, lasusereduba buga sun katei le saragu milu irumu lárigiñe lariñawagún  profesía le. Aban lídangiñe katei le lunbei meha lasuseredun hádangiñeba lan ladügawagun Abüraámü liabin Mesíasi le tadügawagun würi, fánreinti le súdinitimabei (Agu. 22:​15-18). Dan lárigiñe, lidan irumu 33, aba tágürüni hewe lihilin lugudi Hesusu, kei buga lariñaguni profesía, mini lan le aba lan láfarun hilagubei (Adü. 3:​13-15). Ani mégeigili lóugiñe 1,000 irumu lun lagunfulirun lagumuhóun fánreinti lídangiñe profesía le luáguti lachuinrun lábulugu Satanási (Aruf. 20:​7-10). Gama lumoun, rutu Bíbülia lanwoun ariñahani luagu le lunbei lasuseredun lubaragiñe lagumuchun gáganiguaü le lani Satanási tuma lóundarun Heowá.

10. a) Kaba asusereda yarafa madise? b) Ida luba waranseruni wasaminan tuma wanigi? (Ariha huméi abürüdǘni).

¹⁰ Haritagua waméi lanarime burí ñunsu le tídanbei Bíbülia. Lun wagumeserun, hariñaguba néchanigu lídanñein lan “darangilaü luma achoururuni sun katei” (1 Tesa. 5:​2, 3). Lagumeseruba óunwenbu asufuriruni “sódini” danme le hábürühan néchanigu tuagu sun relihión to mámaboun inarünitu (Aruf. 17:16). Lárigiñe, másiñati larihíba lan katei hanufunati danme le larihin “Wügüri Garaüwarügüti, lidan huánriñu siélugiñe lau óunwenbu ubafu luma uéiriguni” (Mat. 24:30). Laguseragüdübaña Hesusu sun gürigia ani lafanreinragubaña giñe ha ítarabaña kei mudún hawéi ha ítarabaña kei gábara (Mat. 25:​31-33, 46; TNM). Ánheinti Mafia, meredebei chagu larüna. Buin lau iyereehabúni, línchahabaña aban sétanu néchanigu ha únbaña tagúaha Bíbülia Gogu luma Magogu, lun hábürühan hawagu lumutuniña Heowá (Ese. 38:​2, 10, 11). Laganagua sun katei le ábame hóundarawaguniwa ha híbiri kristiánugu anuadirúaaña sielu. Ábame hóundaragun ñein luma Kristu luma hama lisudaranigu ha siélubaña lun hawuribuhan lidan Arümahedón, le lunbei lagumuchun lau óunweboun asufuriruni (Mat. 24:31; Aruf. 16:​14, 16). c Lagumuhóun, ábame lagumeserun Larúeihan Kristu le lánina Milu Irumu arúeiha ligibuagu Ubóu le (Aruf. 20:6).

11. Ka mini lubéi hun hawinwandun lun súnwandan? (Ariha humóun iyawaü).

¹¹ Guentó samina wamá luagu le lunbei  lasuseredun lárigiñe Milu Irumu. Ariñagatu Bíbülia ru laali lan Le Adügübaliwa “ayumahani tidoun hanigi gürigia lun busén hamá hawinwandun lun súnwandan” (Apur. 3:11; TNM). Saminatün san luagu le mini lubéi le hun luma humadagua luma Heowá? Tidan líburu Acerquémonos a Jehová, páhina 319, ariñaga tumuti lubuidun dimurei le: “Danme le wínwanhadiwa saragu san, saragu milu, saragu míñunu o íbini saragu bíñunu irumu, wasubudirubatima saragu katei luagu Heowá sügǘ luéi le wasubudirubei guentó. Lau sun lira, warihiba anihein lan saragu katei buíduburiti le lunbei wafurendeirun luagu. […] Siñagubeiti wasaminaruni ida luba lan lubuidun ibagari lídanme Paraísu luma ámuñegueinarügü katei le lunbei warihini ñein. Gama lumoun, lídangiñe sun katei le lunbei wadügüni ñein, létima buídutimabei wayarafadun lun Heowá sagü weyu”. Ani sun awanha lan agurabahei weyu ligía, ka amu tema tídangiñeti Lererun Bungiu gayaraabei waturiahani ani gunfuranda wameime?

12. Ida luba wiñuruni warihin sielun? Ru humá aban hénpulu.

¹² Adügatu Lererun Bungiu lun wasaminarun luagu luéirigun Heowá le íñutimabei (Isa. 33:5). Ayanuhatu Bíbülia luagu burí katei buíduburiti luagu Heowá luma luagu fánreinti tani lóundarun le siélubei (Isa. 6:​1-4; Dan. 7:​9, 10; Aruf. 4:​1-6). Kei hénpulu, gayaraati waliihan luagu burí katei le hanarimeti lubuidun le larihibei Esekiéli dan le ladaaragun sielu ani aba ʻlarihini Bungiu lidan aban uénedü’ (Ese. 1:1).

13. Ida liña hasandiragun hungua lau dasi le ladügübei Hesusu sielu? (Ebüréu 4:​14-16).

¹³ Samina wamá giñe luagu dasi le ladügübei Hesusu sielu kei Urúei ani kei Fádiri le Íñutimabei le gudemehabubei. Seremei ligía gayara lubéi wayarafadun lidan furíei lun “lálana larúeihan Bungiu le hínsiñehabubei woun, lun gudemehabu lan woun, íderagua láwame lau lareini lidan wemegeirun” (aliiha huméi Ebüréu 4:​14-16). Mígira wamá lun lásügürün ni aban  weyu mararamagunga wagía asaminara luagu le adüga laalibei Heowá luma Hesusu wawagu, lúmati le hadügübei wawagu guentó siélugiñe. Ínsiñeni le hasandirubei wawagu lunti lánhingichunu wanigi lun línchahaniwa lun weseriwidun lun Heowá lau ubebeni (2 Ko. 5:​14, 15).

14. Ka igaburi buídutimabei lun warufuduni seremei wamani Heowá luma Hesusu? (Ariha humóun iyawaü).

¹⁴ Aban lídangiñe igaburi buiti lun warufuduni seremei wamani dandu Bungiu kei Lisaani, lau wáfaagun lun wíderaguniña amu gürigia lun hadügagun houngua gefentiñame luagu Heowá luma lun lani hamá Hesusu disipulugu (Mat. 28:​19, 20). Ligía giñe meha ladügübei apostolu Pábulu ladüga seremei lani Bungiu luma Hesukrístu. Subudi lumuti meha le lan labusenrunbei Heowá “lun hasalbarun sun gürigia, lun giñe hayabin lun hasubudiruni inarüni” (1 Tim. 2:​3, 4). Ligíati lariñagunbei, nadagimeintina saragu lidan nani ministeriu lun níderaguniña sun gürigia ha niyaraati “lun gayara lan nesefurun fiu hádangiñe lau furumiñeguarügü igaburi” (1 Ko. 9:​22, 23).

15. Según Sálumu 1:​2, kaba íchiga ugundani woun?

¹⁵ Maweiriduntu wanigi lariñagun abürühati Sálumu gürigia lan ha gúndaabaña ani buiti lidin houn, “lídanñein lilurudun Aburemei hínsiñehabu” ani “luagu lúrudu ligía hasaminara, áriebu wéyuagu” (Sal. 1:​1-3). Dan le layanuhanbei aban ásügüragüdüti Bíbülia luagu bérusu le, afuranguagüdati “lunti lan línsiñedun adundehani lúmagiñeti Bungiu lun gürigia saragu darí lun láluahani, furendei leime ani ráramagua ligíame asaminara luagu”. Ani ariñagayati: “Lasaminaruba weyu lan le mibihin lubéi gunfuranda lanu Bíbülia buidu ni lichú aau le tídanbei aban lan weyu féridiwaali” (Studies in the Psalms, Joseph Rotherham). Gúndaabadün lau haturiahanu Bíbülia anhaün áfaagua lun gunfuranda humani ariñahani le tídanbei luma lun harihini ka lan lánibei aban bérusu luma le aban. Ma lubuidun wasandiragun woungua dan le waturiahanu ani gunfuranda wamóun Lererun Bungiu buidu buidu!

16. Kaba wakutiha lidan leweñegua aturiahani?

¹⁶ Sun wagía gayaraati gunfuranda wamani lubuidun burí inarüni le larufudahabei Heowá woun tidan Lererun. Lidan leweñegua aturiahani, wakutihabei aban lídangiñe inarüni le hulilitimati: aransehani le ladügübei Heowá lun wáhuduragun lun, aransehani le uágubei layanuha Pábulu tidan gárada to labürüdüboun houn kristiánugu Ebüréu. Chóuruti sun lan wagía hínsiñebei lan woun saragu waturiahani lubuidun tema le.