1-2. Asuh öp tölöng inlahen hī haköpmat ngam Paipöl? Mikahtökūö hī.

 ASEHKŪÖRE man töre öm hòṅ havah öp töhěng patī. Asūp kò-òre urěh inlahen meh yěm hòṅ havaha e? Kūö meh hòng öm höng meuk vanāiyö ngam patī imat ngam nyat öm havaha e? Hö-ö. Pöm hakôten re min chuh in e öm ngëichken öp patī öm yòkhöt, chumkūöṙen öm ngëichkö nup uròhò e, ṙôktāk, rôta, rôlòng inrē. Ōt yip rīkre inrē lohten tö hòṅ vë-ekūö öp ònör ngam patī hēk hòṅ meuk ngam mëp inlahen vīni-i ngam patī inrē, hòṅ ò nö akahakūö tö inlahen e. Keuheūtlöre mat ngaich më-eṅ meūkö e, lohten min ngaich öm hòṅ havaha e.

² Ngatī inlahen ayī-ö mihôiṅ yěi haköp mat ngam Paipöl. Ngöṙô ök ihih tö pōihöl nö haköp nö vënyö ngam Paipöl nö sā öp tö “marò-òlkui patī angū-ö ngam tö aṙū-uti machööḵlö.” Asūp mihôiṅ inlahen hī yěi hòṅ akahakūö tö ṙô minë tökūichi aṅ mat ngam Paipöl? Yēḵ meh min höng haveut ṙô re vë-ekūö e, ngaich höng rahëichyen mikahkūö min më-eṅ tö ṙô e, tö ngö manah tö meh höng ‘haköp minë ranehlö nup chööngö ngam Tēv.’ (Hep. 5:12) Hö-ö pöri ayī-ö lōnu töre öi ngatī inlahen, pöi hòṅ lōnu töre öi sā yamòkhöt re öi el ngam patī tö ngö manah angū-ö tö hī hòṅ keuheūtlöre mikah elnang. Yěi hòṅ ngatī inlahen ngaich urěh ayī-ö afītöre nö Asuh minë kanô-en hēk hòṅ akaha elmat inrē ayī-ö tö u. Mikahtökūö re inrē ayī-ö töre öi kūö yòh ṙatö-ellōnre in u. Hòṅ akaha elmat inrē ayī-ö tö u nö sitih inlahen minë tö kūichi aṅ mat ngam Paipöl nö sāḵ ta ṙô nö in höö.

3. Asuh ök hinôtö yik Kristīön tö Pôl, ngaich kūö yòh? (Efisös 3:14-19)

 ³ Yēḵ hī hòṅ akaha elnang töm ṙô ngam Tēv ngaich hòṅ mikahtökūöre ayī-ö tö minë tö aṙū-uti kinūichö kanô-en aṅ mat e. Ngatī inrē ang Pôl nö tölṙô yik holmaneukre Kristīön nö aṙū-uti ṙô nö haköp ngam ṙô ngam Tēv hòṅ cha nö akaha elnang tö ngam ṙôktāk, rôta, rôlòng hēk ṙū-uti e inrē. (Vë-evkūö Efisös 3:14-19.) Mihôiṅ inrē ayī-ö ngatī inlahen. Ta-a chěi töi mikahtökūö re öi sitih inlahen haköp ngam ṙô ngam Tēv, hòṅ hī öi keuheūtlöre mikah elnang tö ṙô e.

4. Asuh öp tö hòṅ inlahen hī yěi hòṅ haröhtöre in Yāvē? Kētö inchōḵelmat.

⁴ Öt ṙamlōn in ayī-ö Kristīön yěi höng röhlö mikahkūö tö minë mikah aṅmat ngam Paipöl. Pöi lōnu töre öi hayöökaṙen tö ngam töhet fanöinylö öi akahakūö tö ‘minë tö aṙū-uti ṙô ngam Tēv.’ (1 Kòr. 2:9, 10) Kò-òren më-eṅ öm haköp minë tö ngatī tòpik im ṙētak kanahngen meh haköp ngaich röhta hēk min më-eṅ in Yāvē? Mihôiṅ inrē më-eṅ chöh (research) inlahen Yāvē nö sitih inlahen misī anga-aṅ nö hameuktö hanangenlōnre nö in më tarik re, ngaich in e mikahkūö min më-eṅ tö ò nö hangenlōn inrē tö meh. Mihòiṅ öm haköp inlahen më aṅ Israel misī nö sītih inlahen cha nö ha-öinyö Yāvē, ngaich asuh nup tö hěngren inrē ṙô ò töngamuh nö in më Kristīön im nöinyö ò. Mihôiṅ inrē öm haköp minë tö aṙū-uti pròfěsī, minë tö hateūngi tö Yēsū misī nö ing panam.

5. Asuh öp ööilōn meh tòpik chahöh meh yěm kahngenre haköp?

⁵ Hatöönö kūö më prötör sistör tö kūöten nö istötī mat ngam Paipöl tö öp ööilōn re tòpik tö hòṅ chöhö tö cha nö imat e. In minë vahë-eny cha nö ōt anū-ö nö el ngam pòks ngam tö ngö minë-eny “ Nichī Atīan Kē Liyē Kuch Visöy.” Mihôiṅ më-eṅ öm yūs ngam Yöhōva Kē Liyē Kōichpīn Ka-ët yē meh hòṅ chöhö u angū-ö tòpik. Yēḵ meh min ngatī inlahen haköp ngaich ṙamlōn min më-eṅ. Yē meh aṙū-uti ṙô haköp mat ngam Paipöl, ngaich ngönlöre min ngam ṙinatö-ellōn meh hēk ‘kôtökūö inrē min më-eṅ tö ngam mikah aṅ im  Tēv.’ (Inch. 2:4, 5) Töi chumkūöṙen ngëichkö minë tö aṙū-uti ṙô ngam Paipöl, ngaich löktö in e inrē mihôiṅ öi kūöten haköp ngam Paipöl.

6. (a) Kētö inchōḵelmat hī tö minë kuilōn Yāvē nö kūö yòh nö öthō nö öt teung? (b) Kūö yòh öi mihôiṅ ngö ṙô tö ngam kuilōn Yāvē ing panam hēk in yip tarik nö töha-ehelen?

⁶ Töi chumkūöṙen tö ṙô ngam Paipöl nö vë-eny inlahen ngam kuilōn ngam Tēv. Asehkūöre man yěm hòṅ chuh in öp chahuhure. Lohten min më-eṅ öm vī öp plān re öm fēkö inlahen öp talöökö chahuhu meh öm kiröönngöre. Lohten pöri min nö ōt nup insökngöröön meh yamih nö el talöökö töp lökten meh kò-òren hòṅ harīngö ngam plān re. Yěn ōt pöri nup kuilōn Yāvē tö hòṅ hateūngi tö ò ngaich hö-ö anga-aṅ nö ngatī mufē. Pön lēnngen tī anga-aṅ nö halēnlö ngam kuilōnre la-en. p Ngaich öt hō nö öt hateungngen e. Öt höng hěngtum ṙô inrē anga-aṅ nö vë-eny ngam ‘töha-ehelen kuilōn re.’ (Efi. 3:11.) Öp tö yòh talöökö tī ngam Tēv nö hateūngngö ngam kuilōnre, ngaich öthō anga-aṅ nö öt teungten. Kūö ò nö tö ‘chööḵnyu tī nö vī tökeuheūttöre.” (Inch. 16:4) Töt kinheūtu ngam kuilōn ò, pò nup la-en kahëken ò nö töt chanūhuvṙen . Töi mikahtökūö re chěi tö ngam kuilōn Yāvē ngaich asuh nup tī ò nö harīkngö minë inlahen tī re nö hateungngö ngam kuilōnre.

7. Hē Ātöm hēk Ēva nö öt hang chööngö Yāvē, ngaich sitih inlahen ang Yāvē nö haṙīngö ngam inlahen re nö hateungngö ngam kuilōnre? (Mëtiv 25:34)

⁷ Vë-eny ngam kuilōnre ang Yāvē nö in nā Ātöm nā Ēva. Ngö ṙô anga-aṅ nö in cha: “Mikūönlö yēḵ, ṙūölöre ṙôken inrē, hatöölö ngam tumlat, hayöngö e; minā-aṅv inrē. . . ikui nup tö-aṅ chehen mahalönyköre el tumlat.” (Ran. 1:28) Ik sā nā Ātöm nā Ēva pöri nö halôngö chööngö Yāvē teunghu ngaich tarik töm tökööl. Öt sökngöre pöri ngam kuilōn Yāvē , pön höng harīkngö tī re anga-aṅ nö hateungngen e. Hēten tö e anga-aṅ nö vīlö ngam Pūlngöre nö el halīöngö ngam löktö ngam kuilōn ò min nö teungtökūö nö ing panam. (Vë-evkūö Mëtiv 25:34.) Tīntö ngam kūönre ang Yāvē nö ing panam im tö halēni ṙetak tö ò, hòṅ ò nö vë-eny nang hī tö inlahen ngam Pūlngöre hēk ṙānyen hī inrē ṙā-ang im tökööl. Hachohlen Yēsū ngaich ang Yāvē ngaich vīlen ò nö rācha ngam Pūlngöre. Öt höng angū-ö pöri kuilōn Yāvē, pön ōt inrē nup tahëng tö hòṅ ngëichka tö hī.

8. (a) Asūp kaha ṙô ngam Paipöl? (b) Sā vinënyö e im Efisös 1:8-11, Asuh öp min inlahen Yāvē? (Ngëichkö ngam nyat lamā uk.)

⁸ Kaha ṙô ngam Paipöl an ngam inhetlö minë-eny Yāvē. Hateungngö ngam kuilōnre min Yāvē nö ing panam nö löktö im Pūlngöre ngam tö rāchavö tö Yēsū Kristū. (Isa. 46:10, 11; Hep. 6:17, 18) Vīngöre min ngaich ngih panam nö tövai nö peretāis ip yamih ṙētak ngaich örheūheu min yip tölöök hēk töhet kūön Ātöm nā Ēva nö iyöng nö ikūö e. (Sal. 22:26) Hö-ö pöri nöng angū-ö tölngö kuilōn ò. Pön vī ngam hinëngö min anga-aṅ nö ihôi më ma-ahānga tö më tarik ngaich hē e min cha-a nö rāchavö ṙô tö Yāvē ngaich haköpngöre nö in ò. (Vë-evkūö Efisös 1:8-11.) Öt pingangkūö öm meuk minë inlahen tī ngam Tēv nö hateung minë kuilōnre?

9. Iṙòvat maheuk öi min töp yamih ṙētak yěi haköpmat ngam Paipöl?

⁹ Töi fēkö inlahen ngam tö-eūka kinlēḵngô el ök panò-òṅ Ētön im līpöre Ranehlö 3:15. b In ngih tö-eūka an nö vënyu inlahen ngam kuilōn Yāvē nö teungtakūö. Unôichrit  ngam tö köönyu samyeūheu pöri anū-ö nö hòṅ teungtakūö. Tö sā ngam kūön tökilē-ěyö hēk ngam Mesayā nö yih nö löknyö im mikūönö Aprahām. (Ran. 22:15-18) Vënyu inrē nö ‘parôkö kulôichröön’ ngam Mesayā nö in e. Ik 33 C.E., angū-ö nö teungtakūö hē Yēsū nö kapah. (Inl. 3:13-15) Vënyu inrē ngam kui ngam pēch nö ‘paṙôkö kui min.’ Pōyen tö tö 1,000 ṙò-angen samyeūheu min angū-ö nö teūngtökūö. (Inm. 20:7-10) Vënyu nang in tö ngam Paipöl, yěn keuheūt min ngam kumnyah elmat nö el hôi ngam söngkötön Yāvē tö ngih panam ngam Sī-ö ngaich asuh min hēk nup inlahngen tö meūkö.

10. (a) Asuh nup min inlahngen tö meūkö ip yamih ṙētak? (b) Sitih inlahen öi min hööngöre öi la-al u anū-ö? (Ngëichkö ngam futnōt.)

¹⁰ Töi ngëichkö në inlahngen aṅmat ngam Paipöl tö kayinlöng tī min töng panam. Ngam raneh, vënyö ngam ‘kumchikṙen hēk lanāmö’ min yip mā ikūö ngih panam. (1 Tös. 5:2, 3) Hē e min më mahayöng nö choholre nö la-al minë tövaich tinlööken ngaich rultenre min ngam tökiröng kanihngen. (Inm. 17:16) Unôichrit e min ngam kūön tarik nö meūkö yanīhi “nö el taṙul ngam halīöngö, holtö chöngö, kanôlò inrē.” (Mët. 24:30) Kahòklö kui yip taṙòkhöre tarik min ang Yēsū tö ngö manah angu-ö tö ò min nö haköhngö nup sīṅp tö nup pököre. (Mët. 25:31-33, 46) Öt höngngöh töheichṙen pöri min ngam Sī-ö, pò ò min nö vīlö tanānyö Kōk ap panam Makōk (Manūlö më mahayöng) nö la-al yip tarik Yāvē. (Isi. 38:2, 10, 11) Hē-e min nö chuh el halīöngö yip chööḵ yip töhachāmö elkui ip manā-ngrit ngam tökiröng kanihngen nö holṙen Kristū min nö kiyung ip Armakētòn. c (Mët. 24:31; Inm. 16:14, 16) Ngaich möl min Kristū nö rultenre nö hayöng im tö hěng kööny samyeūheu.—Inm. 20:6.

11. Asuh nup ngaich tö löpnyökūö talöökö meh, kūö meh öm maheukkūö töre örheūheu aṅ? (Ngëichkö ngam nyat.)

¹¹ Töi ngëichkö nup inlahngen hēk unôichrit ngam tö 1,000 samyeūheu. Kūichi an nö imat ngam Paipöl tö ngam Tēv nö chaphöt ellōn hī öi örheūheu aṅ. (Mum. 3:11) Fēkö inlahen öp  tinrīkenre man hēk tö ngam innòlô meh nö in Yāvē nö ngönlöre ip hē-e. Kūichi an nö im līpöre Yöhôvā Kē Körīp Āo im pěch 319, nö ngö ṙô: “Hē hī min öi köönyu köönyu samyeuheu rò-òten öi aṅ hē-e min öi akahakūö takô tö Yāvē. Sön pöri nö pōitit nup tö hòṅ mikahkūö hī. . . . Iṙôk ṙanamlōn öi min yěi teūngen tö ngam nômö tö-örheūheu aṅ. Öt mufē-ev min ayī-ö tö ṙôken nup kahëkenre la-en. Ngam inlahen hī pöri haröhtöre in Yāvē nö angū-ö löktö hī öi teūngen tö ngam nômö tö örheūheu aṅ.” Asuh pöri nup tö hòṅ mikahkūö hī hēk yěi ṙömöng haköpmat ngam Paipöl?

12. Sitih inlahen öi min môklökūöre ngëichkö el halīöngö? Kētö inchōḵelmat.

¹² Vë-eny nang hī ngam Paipöl tö Yāvē nö “iyöng lātulöng.” In e maheuk inrē ayī-ö tö nup i taseū ò nö vai anū-ö. (Isa. 33:5) Vënyu nö imat ngam Paipöl nup tövai inlahen Yāvē hēk tö ngam söngkötön ò inrē el halīöngö. (Isa. 6:1-4; Tan. 7:9, 10; Inm. 4:1-6) Tö sā hī yěi haköp inlahen minë pinngangkūö maheuk Isikīěl hē ò nö ‘hameukhu mat tö ngam Tēv tö inlahen ngam halīöngö nö löpnyöre kūö.’—Isi. 1:1.

13. Sā ṙô ngam Heprāi 4:14-16, asuh öp töngamuh ööilōn meh inlahen Yēsū nö hayöng nö el halīöngö?

¹³ Töi ngëichkö inlahen Yēsū ngam tökiröng mākūö kūönṙô nö akahakūö tö kanihngen hī hēk hayöng an inrē nö el halīöngö. Lökngörit i minë-eny Yēsū ṙô öi vë-ekūötēv öi “holtö öt pinhë-eṅkūö im kantēra inkôlò” öi havëkö kūö Yāvē nö aheūkölōn tö hī hēk ‘lööngö ṙētak’ inrē nö hayööken hī. (Vë-evkūö Heprāi 4:14-16.) Um ṙāngö sakāmö fēkö inlahen tī Yāvē hēk Yēsū nö in meh nö löktö el halīöngö. Öt lökngö re ellōn öi rih meuk ngam tö ngatī hanangenlōn cha tö hī? Öt lōnu hòng ayī-ö tö inlahen re hēk ṙūöhöl alahare i linökö lōn cha.—2 Kòr. 5:14, 15.

14. Asuh öp inlahen hī mihôiṅ hameuktö minlēḵṙen tö Yāvē hēk Yēsū inrē? (Ngëichkö ngam nyat.)

 ¹⁴ Asuh öp inlahen hī hòṅ hameuktö minlēṙen re tö Yāvē hēk Yēsū inrē? Hayööken yip tahëng nö haköp nö in Yāvē hēk Yēsū inrē. (Mët. 28:19, 20) Ngatī inlahen ök Pôl inrē nö hameuktö minlēḵṙen tö na Yāvē na Yēsū. Akahakūö anga-aṅ tö e nö kuilōn Yāvē tö yip “taṙòkhöre nö hayöökaṙen, yih inrē nö im inkaha kanô-en.” (1 Tim. 2:3, 4) Lökten anga-aṅ nö kalēḵ alaha nö im la-en inhangkö tölöök inhānga. Pön hòṅ ‘lökten in u anga-aṅ nö rahëichyen hayööken.’—1 Kòr. 9:22, 23.

15. Sitih inlahen öi min teūngen tö ṙanamlōnre yěi asīnkö ṙô ngam Salmai 1:2?

¹⁵ Ngöṙô ngam kamūich ngam Salmai ngòh tarik ‘tö ṙamlōn nö im chööngö Yāvē’ hēk ‘sakāmö hatööm inrē nö piṙūtkö ngam chööngö ò’ anga-aṅ ön tö ṙamlōn hēk kôlò inrē inup töng vahīṙen ò. (Sal. 1:1-3) Hěng tak ön ngòh translētör ngam Paipöl ang Jòsěf Rötörhem nö kūich inlahen ngam Salmai nö imat ngam līpöre, tö ngòh tarik nö hòṅ aheuk tö minë ṙô ngam Tēv nö uroh nö hòṅ chöhö u, haköp inlahen u hēk fēkö inlahen u inrē.” Ngö ṙô inrē anga-aṅ, “yěn ōt töhěng hang sumkam nö öt vë-ekūö ngam Paipöl ngaich sā ṙēngen tö kuchīken anga-aṅ ip hē e.” Töi chumkūöṙen chěi öi haköp nup aṅmat ngam Paipöl tö vënyu ngaich mikahtökūöre tö minë ṙô aṅmat u nö ṙōngta ṙô nö in höö. Yěm ngatī inlahen min akahakūö tö “ṙôktāk, rôta, rôlòng, ṙū-uti” ngam ṙô ngam Tēv ngaich teūngen min më-eṅ tö ṙanamlōnre!

16. Asuh öp min haköp hī ip yamih ātiköl?

¹⁶ Minë tö kūichi ṙô ngam Tēv imat ngam Paipöl öt uroh ayī-ö kihngen mikah elnang tö u. Im yamih ātiköl in min öi kakkö inlahen ngam kanô-en. Inlahen ngam tökiröng ispirichūöl tempöl Yāvē, ngam kahūich Pôl chitri yik Kristīön nö im ëlô Heprāi. Meūka in tö meh ṙamlōn min öm haköpö e.