1-2. Ngu yihi nzila ya yinene yo gonda Bhiblia? Ningela txikombiso.

 ALAKANYA i di ku wo maha txisungo txo xava nyumba. Ina u na gwitela ku yi wona masoni ka yona mwendo u yi wona ngu kule se u maha txisungo txo yi xava kani? Kha ti kanakanisi to u si se maha txisungo txo yi xava u na lava kubela u wona makwarto mndani ni hahanze ni sotshe si si ku ka yona. Ti nga maha u wona ti di txhuko kubhula ni wu a nga wona ti yi nga akiswa tona kasi kuziva totshe mayelano ni nyumba yi u lavako ku yi xava.

² Hi nga maha ti ti fanako mbimo yi hi gondako Bhiblia. Mgondi mmwani a fananisile Bhiblia ni “dipredhiyo da hombe di nga akwa ngu nzila yo xamatisa.” I ngu nzila muni hi nga yi zivako kwati Bhiblia? U txo gonda ngu txikuluveta u na ziva dwe “makhato a timhaka ta Txizimu.” (Vaheb. 5:12) Hahanze keto nga ha ti fanako ni ka nyumba, “bela mndani” u wona tithomba ti ti ku ka yona. Ti to u gonda kwati Bhiblia ti lava u wona nzila yi madungula o tala ma pfanako ngu yona. Zama kupfisisa ati u ti kholwako ni ku ngu kutxani u txi ti kholwa.

3. Ngu tihi ti mpostoli Paulo a nga kuzeta Makristu ku ti maha ni ku ngu kutxani? (Vaefesu 3:14-19)

³ Kasi ku hi pfisisa kwati Dipswi da Txizimu ti lava hi gonda ngu ditshuri do tshima da mu ka Bhiblia. Mpostoli Paulo a kuzetile Makristu kulowe ku me gonda kwati Dipswi da Txizimu kasi ku me ziva “kuanama ni kulapha, kudemba ni kutshima” ka Dipswi da Txizimu. Eto ti ndi na va maha ve va ni “mkoloti wa kutsanisa” likholo lawe. (Lera Vaefesu 3:14-19.) Ti lava hi maha ati ti fanako. A hi wone to hi nga gondisa kutxani khakwati  Dipswi da Txizimu kasi kumana txhamuselo ya tithomba ati ti ku ka dona.

4. Hi nga maha txani kasi ku hi tshuketa hafuhi ni Jehovha? Ningela sikombiso.

⁴ Kota Makristu kha hi lavi kugonda makhato ya Dipswi da Txizimu dwe. Ngu kuvhunwa ngu moya wa Txizimu hi tikaratela kugonda “hambi tile i ku ta wutumbu wa kueta wa Txizimu.” (1 Vak. 2:9, 10) Khata gondo yako upune ayi yi no kuvhuna kutshuketa ka Jehovha. Ngu txikombiso, u nga gonda ngu nzila yi Jehovha a nga kombisa ngu yona lirando ka malanda akwe a kale ni ku ti ti komba ngu nzila muni to wa kuranda. U nga gonda ngu nzila yi Jehovha a nga ti lava to Vaisrayeli ve mkhozela ngu yona ni kufananisa toneto ni nzila yi a lavako to hi mkhozela ngu yona nyamsi. U nga tshumela u gonda ngu wuprofeti wo tshima awu Jesu a nga wu hetisisa ka wutomi wakwe ni ka mthumo wakwe wo txhumayela ha mafuni.

5. Ina waho msungo mhaka wu u lavako kumaha wuxolisisi ka gondo yako upune?

⁵ Vamwani va va dhundako kumaha wuxolisisi va womba wombile ngu wuxolisisi wo tshima awu va tsakelako ku wu maha mu ka Dipswi da Txizimu. Timwani ka ti va nga ti womba ti pfala ka dibhokiso di di ku “ Misungo Mhaka Para Gondo Ya M’thu Apune.” U nga mana litsako la hombe ngu kugonda misungo mhaka yiya ngu kuvhunwa ngu Índice das Publicações mwendo Mkongomiso wa Tifakazi ta Jehovha wo Maha Wuxolisisi. Ku maha gondo yo tshima ya Bhiblia ti na tsanisa likholo lako ni ku kuvhuna ku u “mana kuziva Txizimu.” (Mav. 2:4, 5) Konku he veke mapimo ka ti hi nga ti gondako ka ditshuri do tshima da mu ka Bhiblia.

6. a) Ngu kuhi kuhambana ku kuho ka maplano ni makungo? b) Ngu kutxani ku txi wombwa to makungo ya Jehovha mayelano ni mafu ni vathu nja “kala kupinduka”? (Vaefesu 3:11)

⁶ Ngu txikombiso wona ti Bhiblia yi wombako tona mayelano ni makungo a Txizimu. Makungo ni maplano ta hambana. Hi nga fananisa plano ni txitarato atxi txi ku tekako  kala mu u lavako ku ya kona. Plano yi nga feyila ngako ku txi humelela txo kari atxi txi nga ku tsimbisako ku ya mu u nga txi lava ku ya kona. Kambe makungo wukhalo wu u lavako ku wu hokelela. Ha kuziva mu hi lavako ku ya kona, kambe hi nga thumisa tinzila to hambana. Se ngako nzila yimweyo yi di vhatwe hi nga thumisa yimwani. Ha bonga ngutu nguko, kudotho-kudotho, Jehovha wa hi komba “makungo a kala kupinduka” amu ka Bhiblia. (Vaefesu 3:11.[NM]) Jehovha a nga sawula tinzila to hambana kasi ku hetisisa makungo akwe, ni ku ene “a maha totshe kasi ku ti tsimbitisana ni makungo akwe.” (Mav. 16:4) Ni ku, wuyelo ya ti Jehovha a ti mahako nja kala kupinduka. Ngu yahi makungo ya Jehovha ni ku ngu tihi tinzila a nga ti thumisa kasi ku e ma hetisisa?

7. Msana ko Adhamu ni Evha va di wukete Jehovha a yi lulamisisile kutxani nzila yo hokelela makungo yakwe? (Matewu 25:34)

⁷ Txizimu txi gete Adhamu ni Evha ti to i ti yahi makungo ya txona kwawe. Ene a va gete to: “Velekanani mi txi anda mi tala ha mafuni mi txi ma fuma . . . ni sotshe sihari si si tsimbilako ha mafuni.” (Gen. 1:28) Mbimo yi Adhamu ni Evha va nga wukela Jehovha, ve maha ti to txionho txi bela ka votshe vathu, eto kha ta tsivela ku Jehovha e hetisisa makungo akwe. A to txitxa nzila yi a ndi no ma hetisisa ngu yona. Kukhukhela koneho, Jehovha a tiemisete kusimeka Mfumo nzumani awu wu ndi no hetisisa txikongomelo txakwe txo khata mayelano ni vathu ni mafu. (Lera Matewu 25:34.) Tate wathu wo randeka Jehovha, ngu mbimo yakwe a rumete mwanana wakwe wa matiwula e ta ha mafuni kasi ku ta gondisa vathu mayelano ni Mfumo ni ku ningela wutomi wakwe kasi ku hi terula ka txionho ni lifo. Jesu a wusilwe ka va kufa e tshumela e ya nzumani e ya va Mkoma wa Mfumo wa Txizimu. Kambe ti ho to tala hi nga ti gondako mayelano ni makungo ya Txizimu.

8. a) Ngu wuhi msungo mhaka wa hombe wa mu ka Bhiblia? b) Nga ha ti nga txhamuselwa ngu kona ka Vaefesu 1:8-11, ngu yahi makungo o gwitisa a Jehovha? (Wona mfota wa kapa.)

⁸ Msungo mhaka wa hombe wa Bhiblia ngu ti to ditina da Jehovha di na basiswa mbimo yi a no hetisisa makungo akwe mayelano ni mafu ngu kuthumisa Mfumo wu wu ku manzani ka Kristu. Makungo ya Jehovha kha ma na kutxitxa. A thembisile to totshe ti na maheka nga ha a nga womba ngu kona. (Isaya 46:10, 11; Vaheb. 6:17, 18) Ka mbimo yoneyo, mafu ma na txitxa me va paradhise aha vanana va Adhamu ni Evha vo pelela ni vo lulama va no “hanya tatinene kala kupinduka.” (Mas. 22:26) Ku ni timwani to engeteleka ti Jehovha a lavako ku ti hetisisa. Dikungo dakwe do gwita ngu tshanganisa otshe malanda akwe a nzumani ni ya ha mafuni. Konaho otshe malanda yawa ma na engisa Jehovha kota Mfumeli. (Lera Vaefesu 1:8-11.) Ina kha yi ku xamatisi nzila yo tshura yi Jehovha a hetisisako ngu yona makungo yakwe?

9. Ngu tihi ti hi nga ti wonako ngu wumangwana ngako hi txi gonda Bhiblia?

⁹ Wona wuprofeti wu Jehovha a nga wu womba jaradhi ka Edheni, wu nga bhalwa ka Genesisi 3:15. b Wona wu txi womba-womba ngu simahakalo si si ndi no hetisa makungo akwe msana ko va ku di pindile malembe o tala. Simahakalo siya si pata kuvelekwa ka Kristu ngu ka liveleko la Abrahamu nga ha Jehovha a nga m’thembisa ngu kona. (Gen. 22:15-18) Se, ngu 33 E.C., Jesu a lumilwe txizenende  nga ha ti nga ti profetilwe ngu kona. (Mith. 3:13-15) Tximahakalo txo gwita txa wuprofeti wuwa, ngu ganyatwa ka msungo wa Sathani, ku no maheka msana ka 1000 wa malembe ya kufuma ka Kristu. (Mtu. 20:7-10) Bhiblia yi womba to tala mayelano ni ti ti no maheka mbimo yi livengo li no woneka ngutu hagari ka mfumo wa Sathani ni sengeletano ya Jehovha.

10. a) Ngu tihi ti no maheka i singa kale? b) Hi nga lulamiselisa kutxani mbilu yathu ni mialakanyo? (Wona nota.)

¹⁰ Alakanya ngu simahakalo so xamatisa asi Bhiblia yi nga si womba. Txo khata, ku na wombwa to “kaho kudikha ni kukhaliseka!” (1 Vat. 5:2, 3) “Ngu txidhukisa,” xanisa ya hombe yi na khata mbimo yi matiko ma no xasela wukhongeli wa makuhu. (Mtu. 17:16) Msana keto, ku na woneka timhaka to xamatisa i ku “Mwanana wa M’thu a txi ta a di txitimwi ka marefu a nzumani ni mtamo ni wudhumo wa hombe.” (Mat. 24:30) Jesu a na lamula vathu a va abanisa ngu mitxhambi yimbidi nga kule m’dyisi a abanisako tinvuta ni tiphongo. (Mat. 25:31-33, 46) Ka mbimo yoneyo Sathani kha nambi godhola. Aku Sathani a nyenyako vathu va Txizimu, ene a na sengeletela matiko aya Bhiblia yi ma dhanako to i Goge wa ditiko da Magoge ku ve wukela vathu va Txizimu. (Eze. 38:2, 10, 11) Ngu mbimonyana, masalelwa ya vasawuleki va na sengeletwa nzumani kumweko ni Kristu ni mabutho ya tingelozi kasi ku lwa yimbi ya hombe ya Armagedhoni, magwito ka xanisa ya hombe. c (Mat. 24:31; Mtu. 16:14, 16) Se msana keto Mfumo wa Kristu wa 1000 wa malembe wu na khata kufuma ha mafuni.—Mtu. 20:6.

11. U ti pfisa kutxani ngako u txi alakanyisisa ngu wutomi wo mbi guma? (Wona mfota.)

¹¹ Alakanya ngu wumangwana wako u txi hanya malembe o tala ngutu o mbi guma. Bhiblia yi womba to Mvangi “a vekile timbiluni [kwathu] kwa mbi na magwito.” (Ekl. 3:11) Alakanyisisa ngu ti ti wombako tona eto kwako ni ka wuxaka wako ni Jehovha. Dibhuku di di ku Tshinela Eka Yehovha, pajina 319, di wombawomba ngu mhaka yo tsakisa ngutu:  “Msana kova hi di hanyile magidhi a timiliyoni ta malembe, hi na ziva ta tingi ngu Jehovha kupinda ti hi ti zivako konku. Kambe hi na wona to ku nga di ni ta tingi to tsakisa ati hi fanelako ku ti gonda. . . . Wutomi wo mba guma wu na ta tsakisa ni ku, ku ni to tala to hambana-hambana ati hi no ta ti maha—se kutshuketa ka Jehovha ngu tona ti no maha ku wutomi wu tsakisa mbimo yotshe.” Se mbimo yi hi simamako hi gonda Bhiblia konku ngu tihi ti hi fanelako ku ti xolisisa?

12. I ngu nzila muni hi nga gulako maso hi wonetela nzumani? Ningela txikombiso.

¹² Dipswi da Txizimu da hi ninga txibaka txa khe “txitimwi” nzumani amu Jehovha a zumbako kona. (Isaya 33:5) Bhiblia yi kombisa timhaka to xamatisa mayelano ni Jehovha ni sengeletano yakwe ya nzumani. (Isaya 6:1-4; Dhan. 7:9, 10; Mtu. 4:1-6) Ngu txikombiso hi nga gonda timhaka to xamatisa ati Ezekhiyele a nga ti wona mbimo yi a nga womba to: “Yi to tuleka nzuma, se ani ni wona siwoniso sa Txizimu.”—Eze. 1:1.

13. Ngu tihi ti ti ku tsakisako ka mthumo wu Jesu a wu mahako nga ha ti nga kombiswa ngu kona ka Vahebheru 4:14-16?

¹³ Alakanyisisa ngu ti Jesu a ti mahako nzumani kota Mkoma ni Mphaxeli wa Hombe wathu. Ngu konaho ka Jesu hi nga sikota kutshuketa “txiluveloni ka makatekwa” ya Txizimu ngu mkombelo hi kombela wunene ni txivhuno “ngu mbimo yi yi fanelako.” (Lera Vahebheru 4:14-16.) U nga thuke u leka ditshiku di pinda u sa alakanyisisa ngu ti Jehovha ni Jesu va nga hi mahela tona ni ti va hi mahelako tona konkuwa va di nzumani. Lirando lawe ngu ngathu li fanete ku gwesa ngutu mbilu yathu ni ku hi kuzeta ku hi hiseka ka mthumo wo txhumayela ni ka wukhozeli wathu.—2 Vak. 5:14, 15.

14. Ngu tihi tinzila tatinene hi nga ti thumisako kasi kukombisa to ha m’bonga Jehovha ni Jesu? (Wona mifota.)

 ¹⁴ Nzila ya lisima yi hi nga kombisako ngu yona kubonga Jehovha ni Jesu ngu tikaratela kuvhuna vamwani ti to ni vona ve va Tifakazi ta Jehovha ni kuva vagondiswa va Jesu. (Mat. 28:19, 20) Ngu tona tiya mpostoli Paulo a nga ti maha kasi kukombisa kubonga Txizimu ni Kristu. Ene a txi ti ziva to kuranda ka Jehovha ngu ku “votshe vathu ve mana kuhanyiswa ni kuziva ditshuri.” (1 Tim. 2:3, 4) Ene a thumile ngu mtamo ka mthumo wakwe wo txhumayela kasi ku e “mana kuhanyisa vamwani ngu totshe tinzila.”—1 Vak. 9:22, 23.

15. Ngu ku ya ngu Masalmo 1:2, njitxani txi no hi ninga litsako?

¹⁵ M’bhali wo khata wa masalmo a wombile to m’thu wo tsaka ni wo humelela ngu wu wo, “tsakela Mlayo wa Mkoma a zumba a txi wu alakanya wusiku ni mitshikari.” (Mas. 1:1-3) Muhunduluxeli wa Bhiblia a wombile tiya mayelano ni mavhersikulo yawa: “M’thu ti lava e tsakela Dipswi da Txizimu ha koza e maha wuxolisisi, e gonda ni kuheta mbimo yo lapha a txi alakanyisisa ngu dona.” A tshumela e womba ti to: “Ngako ku txo pinda ditshiku u siya gonda Bhiblia, ditshiku donedo di xaketwe.” Hi nga mana litsako mbimo yi hi gondako Bhiblia ngu kuwona nzila yi totshe ti hi ti gondako ti yelanako ngu yona. Litsako la hombe kuxolisisa kuanama ni kulapha, kudemba ni kutshima ka Dipswi da Txizimu!

16. Hi na gonda ngu txani ka gondo yi yi londetelako?

¹⁶ Ditshuri di Jehovha a hi gondisako ngu kuthumisa Dipswi Dakwe kha di karati ha ko athu hi nga di tanda ku di pfisisa. Ka gondo yi yi londiselako, hi na ta wona ditshuri do tshima ngutu—mayelano ni dithepele da hombe da Jehovha da moya, adi Paulo a nga bhala ka dipasi dakwe a txi bhalela Makristu a Vahebheru. Hi navela to kugonda ngu mhaka yiya ti ku tisela litsako.