1-2. Unsa ang pinakamaayong paagi sa pagbasa ug pagtuon sa Bibliya? Iilustrar.

 IMADYINA nga nagplano kang mopalit ug balay. Unsay gusto nimong tan-awon sa dili pa ka mopalit? Picture lang ba sa atubangan sa balay? Siyempre, gusto nimong aktuwal nga makita ang balay aron makalakawlakaw ka sa palibot niini, makasulod sa tanang kuwarto, ug makita ang tanang bahin sa balay. Tingali gusto pod nimong susihon ang plano sa balay aron mahibalo ka kon giunsa ni pagtukod. Seguradong gusto nimong makita ang tanang detalye sa balay nga imong puy-an sa umaabot.

² Puwede pod nato nang himoon dihang magbasa ta ug magtuon sa Bibliya. Ang usa ka eskolar sa Bibliya miingon nga ang mensahe sa Bibliya samag “dako ug habog kaayo nga bilding, nga gitukod sa lawom nga mga pundasyon.” Busa unsay atong himoon aron mapamilyar gyod ta sa Bibliya? Kon dalidalion lang nimo nig basa, makat-onan lang tingali nimo ang pangunang mga kamatuoran​—ang “simpleng mga butang bahin sa sagradong mga pahayag sa Diyos.” (Heb. 5:12) Pero sama sa balay, kinahanglan kang “mosulod” aron makita ang daghang detalye niini. Ang usa ka maayo kaayong paagi sa pagtuon sa Bibliya mao ang pagsusi kon sa unsang paagi ang lainlaing bahin sa mensahe niini konektado sa usag usa. Paningkamoti nga masabtan kon unsa nga mga kamatuoran ang imong gituohan ug kon nganong nagtuo ka niana.

3. Unsay gidasig ni apostol Pablo nga himoon sa mga Kristohanon, ug ngano? (Efeso 3:14-19)

³ Aron bug-os natong masabtan ang tanang detalye sa Pulong sa Diyos, kinahanglan natong tun-an ang lawom nga mga kamatuoran  sa Bibliya. Gidasig ni apostol Pablo ang iyang mga isigka-Kristohanon nga magkugi sa pagtuon sa Pulong sa Diyos aron “bug-os [nilang] masabtan kon unsa ang gilapdon ug gitas-on ug gihabogon ug giladmon sa kamatuoran.” Pinaagi niana, ang ilang pagtuo mas ‘makagamot ug lig-ong matukod.’ (Basaha ang Efeso 3:14-19.) Kinahanglan pod nato nang himoon. Atong tan-awon kon sa unsang paagi matun-an nato pag-ayo ang Pulong sa Diyos aron mas masabtan ang kahulogan niini.

4. Unsay puwede natong himoon aron mas masuod ta kang Jehova? Paghatag ug mga pananglitan.

⁴ Ingong mga Kristohanon, dili ta kontento nga mahibalo lang sa pangunang mga kamatuoran sa Bibliya. Sa tabang sa balaang espiritu sa Diyos, gusto natong makat-onan “bisan ang lawom nga mga butang sa Diyos.” (1 Cor. 2:9, 10) Unsa kahag mag-research ka bahin sa usa ka topiko nga mas makapasuod nimo kang Jehova? Pananglitan, puwede nimong susihon kon giunsa niya pagpakita ang iyang gugma sa iyang mga alagad kaniadto ug kon nganong nagpamatuod na nga gimahal pod ka niya. Puwede pod nimong tun-an ang kahikayan ni Jehova sa pagsimba sa Israel ug ikompara kana sa kahikayan sa pagsimba sa mga Kristohanon karon. O kaha tun-i pag-ayo ang mga tagna bahin kang Jesus nga natuman panahon sa iyang kinabuhi ug ministeryo dinhi sa yuta.

5. Unsa nga topiko ang gusto nimong himoon nga study project?

⁵ Ang pipila ka igsoon nga kugihang magtuon ug Bibliya gipangutana kon unsang lawom nga mga butang ang gusto nilang susihon diha sa Pulong sa Diyos. Makita nimo ang pipila sa ilang mga tubag diha sa kahong “ Mga Topiko Para sa Personal Study Project.” Malingaw gyod ka nga tun-an kini nga mga topiko gamit ang Watch Tower Publications Index o Giya sa Pagpanukiduki Para sa mga Saksi ni Jehova. Kon tun-an nimo pag-ayo ang Bibliya, makapalig-on ni sa imong pagtuo ug makatabang nimo nga “makaplagan ang kahibalo sa Diyos.” (Prov. 2:4, 5) Hisgotan nato ang pipila sa lawom nga mga kamatuoran sa Bibliya nga puwede natong tun-an pag-ayo.

6. (a) Unsay kalainan sa plano ug katuyoan? (b) Nganong makaingon ta nga ‘dumalayon’ ang katuyoan ni Jehova para sa tawo ug sa yuta? (Efeso 3:11)

⁶ Tagda pananglitan ang giingon sa Bibliya bahin sa katuyoan sa Diyos. Naay dakong kalainan ang plano ug ang katuyoan. Ang plano samag espesipiko ug dili mausab nga ruta padulong sa imong gipili nga destinasyon. Pero ang plano posibleng mapakyas kon naay mga babag sa dalan. Ang katuyoan nakapokus sa destinasyon. Nahibalo ta kon asa ta gustong moadto, pero puwede natong usbon ang ruta. Puwede tang moagi sa laing dalan kon gikinahanglan. Mapasalamaton ta nga anam-anam nga gipadayag ni Jehova diha sa Bibliya ang iyang “dumalayong katuyoan.” (Tan-awa ang study note sa Efeso 3:11.) Bisag unsa pang paagi ang gamiton ni Jehova, kanunay siyang molampos kay gihimo niya ang tanan aron matuman ang iyang katuyoan. (Prov. 16:4) Ug ang mga resulta sa gihimo ni Jehova magpabilin hangtod sa hangtod. Unsa ang katuyoan ni Jehova, ug unsang mga kausaban ang iyang gihimo aron matuman kini?

7. Human mirebelde ang unang magtiayon, giunsa pag-adjust ni Jehova ang iyang paagi sa pagtuman sa iyang katuyoan? (Mateo 25:34)

⁷ Giingnan sa Diyos ang unang magtiayon kon unsay iyang katuyoan para nila: “Panganak mo ug pagdaghan, pun-a ang yuta ug gamhi kini. Gamhi . . . ang matag buhing linalang sa yuta.” (Gen. 1:28) Dihang mirebelde si Adan ug Eva, nga tungod niana nahimong makasasala ang mga tawo, wala ni makapausab sa katuyoan ni Jehova. Gi-adjust niya ang iyang paagi sa pagtuman niini. Midesisyon dayon siya nga magtukod ug Gingharian sa langit nga magtuman sa iyang orihinal nga katuyoan sa tawo ug sa yuta. (Basaha ang Mateo 25:34.) Pag-abot sa iyang gitakdang panahon, mahigugmaong gipadala ni Jehova ang iyang panganay nga Anak dinhi sa yuta aron tudloan ang mga tawo bahin sa Gingharian ug ihalad ang iyang kinabuhi aron malukat ta sa sala ug kamatayon. Dayon si Jesus gibanhaw ngadto sa langit aron magmando ingong Hari sa Gingharian sa Diyos. Pero daghan pa tag makat-onan bahin sa katuyoan sa Diyos.

8. (a) Unsa ang tema sa Bibliya? (b) Sumala sa Efeso 1:8-11, unsa ang pinakadakong katuyoan ni Jehova? (Tan-awa ang hulagway sa atubangan sa magasin.)

⁸ Ang pangunang tema sa Bibliya mao ang pagbindikar sa ngalan ni Jehova samtang iyang tumanon ang iyang katuyoan sa yuta pinaagi sa iyang Gingharian ubos sa pagmando sa Kristo. Ang katuyoan ni Jehova dili gyod mausab. Siya mismo ang naggarantiya nga matuman kini. (Isa. 46:10, 11, mga footnote; Heb. 6:17, 18) Sa ngadtongadto, ang yuta mahimong paraiso nga puy-an sa hingpit, matarong nga mga kaliwat ni Adan ug Eva, ug “mabuhi [sila] hangtod sa hangtod.” (Sal. 22:26) Pero dili lang kana ang katuyoan ni Jehova. Ang iyang pinakadakong katuyoan mao nga magkahiusa ang tanan niyang intelihenteng linalang sa langit ug yuta. Dayon ang tanan maunongong magpasakop kaniya ingong ilang Soberano. (Basaha ang Efeso 1:8-11.) Dili ba makapahingangha ang paagi ni Jehova sa pagtuman sa iyang katuyoan?

9. Pinaagi sa pagbasag Bibliya, unsa ka layo ang atong makita sa umaabot?

⁹ Konsideraha ang tagna nga gisulti ni Jehova sa tanaman sa Eden, nga mabasa sa Genesis 3:15. b Kini nagtumong sa mga hitabo nga magtuman sa iyang katuyoan, pero molabay pa ang linibo ka tuig una kini mahitabo. Apil niini ang pagtungha sa kaliwat ni Abraham, ang linya  sa mga henerasyon diin maggikan ang Kristo. (Gen. 22:15-18) Dayon pagka-33 C.E., natuman ang tagna nga si Jesus samaran sa tikod. (Buh. 3:13-15) Ang kataposang hitabo niana nga tagna, ang pagdugmok sa ulo ni Satanas, matuman kapig 1,000 ka tuig pa sa umaabot. (Pin. 20:7-10) Ug daghan pag giingon ang Bibliya bahin sa mga mahitabo sa kataposang yugto sa panag-away sa sistema ni Satanas ug sa organisasyon ni Jehova.

10. (a) Unsay hapit nang mahitabo sa umaabot? (b) Unsaon nato pag-andam ang atong hunahuna ug kasingkasing? (Tan-awa ang footnote.)

¹⁰ Hunahunaa kining kulbahinam nga mga hitabo nga gitagna sa Bibliya. Una, ang mga nasod mopahayag ug “kalinaw ug kasegurohan!” (1 Tes. 5:2, 3) Dayon, “kalit” nga magsugod ang dakong kasakitan dihang atakehon sa kanasoran ang tanang bakak nga relihiyon. (Pin. 17:16) Human niana, posible nga duna unyay katingalahang talan-awon sa langit​—makita “ang Anak sa tawo diha sa mga panganod sa langit nga moabot uban ang gahom ug dakong himaya.” (Mat. 24:30) Si Jesus magpahayag ug paghukom sa katawhan, nga maglain sa mga karnero gikan sa mga kanding. (Mat. 25:31-33, 46) Pero si Satanas dili pod moundang sa iyang mga paningkamot. Sa iyang pagdumot, iyang palihokon ang nag-alyansa nga mga nasod, nga gitawag sa Bibliya ug Gog sa yuta sa Magog, aron atakehon ang katawhan ni Jehova. (Ezeq. 38:2, 10, 11) Nianang mga panahona, ang nahibiling mga dinihogan dad-on sa langit aron moduyog sa Kristo ug sa iyang langitnong kasundalohan. Sila makig-away sa gubat sa Armagedon, ang kataposang bahin sa dakong kasakitan. c (Mat. 24:31; Pin. 16:14, 16) Dayon, magsugod na ang Usa ka Libo ka Tuig nga Pagmando sa Kristo dinhi sa yuta.​—Pin. 20:6.

11. Nganong eksayting ang paglaom nga mabuhi sa walay kataposan? (Tan-awa sab ang hulagway.)

¹¹ Imadyina ang imong kinabuhi sa umaabot. Ang Bibliya nag-ingon nga “gibutang pa gani [sa atong Maglalalang] ang walay kataposan diha sa [atong] kasingkasing.” (Eccl. 3:11) Hunahunaa kon unsay kahulogan niana para  nimo ug sa imong relasyon kang Jehova. Eksayting kaayo ang giingon sa librong Pakigsuod Kang Jehova, panid 382: “Human sa pagkinabuhig ginatos, linibo, minilyon, bisan binilyong katuigan, mas daghan pa ang atong masayran bahin kang Jehova nga Diyos kay sa atong nasayran karon. Apan bation gihapon nato nga duna pay daghan kaayong kahibulongang mga butang nga ato pang makat-onan. . . . Dili gayod mahanduraw kon unsa ka nindot ang kinabuhing walay kataposan​—ug ang pagpakigsuod kang Jehova mao unya ang kinanindotang bahin niana.” Sa pagkakaron, samtang padayon tang magtuon sa Pulong sa Diyos, unsa pay puwede natong tun-an?

12. Sa unsang paagi makita nato kon unsay naa sa kalangitan? Paghatag ug pananglitan.

¹² Ang Pulong sa Diyos naghatag natog ideya kon sama sa unsa ang presensiya ni Jehova didto “sa kahitas-an.” (Isa. 33:5) Gipakita sa Bibliya ang makapahingangha nga mga butang bahin kang Jehova ug sa langitnong bahin sa iyang organisasyon. (Isa. 6:1-4; Dan. 7:9, 10; Pin. 4:1-6) Pananglitan, mabasa nato ang katingalahang mga butang nga nakita ni Ezequiel dihang “ang kalangitan nabuksan ug nakakita [siyag] mga panan-awon sa Diyos.”​—Ezeq. 1:1.

13. Unsay imong naapresyar bahin sa papel ni Jesus didto sa langit, sama sa gipatin-aw sa Hebreohanon 4:14-16?

¹³ Hunahunaa pod ang papel ni Jesus didto sa langit ingong nagamandong Hari ug maluluy-on nga Hataas nga Saserdote. Pinaagi kaniya, makaduol ta sa “trono sa dili hitupngang pagkamaayo” sa Diyos diha sa pag-ampo ug makahangyo sa iyang kaluoy ug tabang sa panahon nga ato ning gikinahanglan. (Basaha ang Hebreohanon 4:14-16.) Hinaot nga dili nato tugotan nga molabay ang adlaw nga dili ta makapamalandong sa nahimo ug padayong ginahimo ni Jehova ug ni Jesus para nato. Ang ilang gugma kanato angayng magtandog  pag-ayo sa atong kasingkasing ug magpalihok nato nga magmadasigon sa atong pag-alagad kang Jehova.​—2 Cor. 5:14, 15.

14. Unsa ang usa sa pinakamaayong paagi nga mapakita nato ang atong apresasyon kang Jehova ug Jesus? (Tan-awa sab ang mga hulagway.)

¹⁴ Ang usa sa pinakamaayong paagi nga mapakita nato ang atong apresasyon sa Diyos ug sa iyang Anak mao ang pagpaningkamot nga tabangan ang uban nga mahimong Saksi ni Jehova ug tinun-an ni Jesus. (Mat. 28:19, 20) Mao nay gihimo ni apostol Pablo tungod sa iyang apresasyon sa Diyos ug sa Kristo. Nahibalo siya nga kabubut-on ni Jehova nga “ang tanang matang sa tawo maluwas ug makakat-on sa tukmang kahibalo sa kamatuoran.” (1 Tim. 2:3, 4) Sa ministeryo, nagkugi siya sa pagtabang sa daghang tawo kutob sa mahimo “aron maluwas [niya] ang pipila sa bisan unsa mang paagi.”​—1 Cor. 9:22, 23.

15. Sumala sa Salmo 1:2, unsay makapalipay nato?

¹⁵ Haom kaayo ang pagkahubit sa salmista sa malipayon ug malamposong tawo​—“ang iyang kalipay anaa sa balaod ni Jehova” ug “ginapamalandong niya ang Iyang balaod sa hinayng tingog adlaw ug gabii.” (Sal. 1:1-3; footnote) Ang maghuhubad sa Bibliya nga si Joseph Rotherham mikomento bahin niini nga teksto diha sa iyang librong Studies in the Psalms. Siya miingon nga kon ang usa ka tawo “nalipay pag-ayo sa giya sa Diyos, iya kining pangitaon, tun-an, ug pamalandongon.” Siya midugang nga para sa tawo nga ganahang mobasag Bibliya, “sayang kaayo nga molabay ang adlaw nga dili siya makakat-og dugang bahin sa kaalam niini.” Malipay ka sa imong pagtuon sa Bibliya kon imong tun-an ang daghang detalye niini ug masabtan kon sa unsang paagi konektado kining tanan. Malingaw gyod ka kon tun-an nimo pag-ayo ang Pulong sa Diyos!

16. Unsay hisgotan sa sunod nga artikulo?

¹⁶ Klaro gyod nga kaya natong masabtan ang nindot nga mga kamatuoran nga gitudlo ni Jehova diha sa iyang Pulong. Sa sunod nga artikulo, hisgotan nato ang usa sa lawom nga mga kamatuoran​—ang dakong espirituwal nga templo ni Jehova, nga gihisgotan ni Pablo sa iyang sulat sa Hebreohanong mga Kristohanon. Hinaot nga mag-enjoy ka sa pagtuon niini nga topiko.