1-2. Ni buha buryo burungi bw’okushomamu Bibuli n’okuyeyegesamu? Gamba ecokureberaho.

 TECEREZA aha nsharamu eyi ori kubasa kukora waza kugura enju. Ni enki eki ori kuba oshemerire kufaho otakakozire ensharamu? Mbehi okayerebera oku eri kushwa enyuma kusha? Hatariho okubanganisa n’oba oshemerire kutaha omuri eyo nju, oreba ebishenge byayo, oyitambatamburamu, mbehi oreba ebipimo byayo byona. Nobasa nokureba na purani yayo obu babire nibajombeka. Hatariho okubanganisa noba ori kwenda kumanya yaba enju eyi ori kwenda kuturamu ari ndungi.

² Eco ni co eki turi kuba tushemerire kukora twaba turi kweyegesa Bibuli. Omuntu omwe akagamba aha butumwa oburi omuri Bibuli ari kugamba ngu: “Ni enju mpango, eyine eminara miringwa kandi eyine emisinge egumire.” Mbwenu shi nitubasa kushoborocerwa bata ebintu byona ebiri omuri Bibuli? Ku ori kushoma Bibuli ori kwehuta tori kubishoborocerwa ge. Ahobwe nomanya kusha ‘eby’okubandizaho ebyorobi omu byagambirwe Ruhanga.’ (Heb 5:12) Konka waza omu nju okacondoza byona ebiyigizire ni bwo ori kumanya yaba eyombekire ge. Obwe rero, oburyo bumwe obu turi kushomamu Bibuli ni okumanya oku otucweka turi kubuganisa n’otundi. Yetegereze amazima agu ori kwikiriza n’enshonga ahabw’enki ori kugikiriza.

3. Ni enki eki entumwa Pawulo yaragire Abakristo bagenzi beye kukora kandi shi ahabw’enki? (Abefeso 3:14-19)

³ Kugira ngu tukizeho kushoborocerwa omu bwijwire ebiri omu Kigambo ca Ruhanga tushemerire kucondoza amazima g’omuri Bibuli. Entumwa Pawulo akahiga Abakristo kwega Ekigambo ca Ruhanga batireho amani bakamanya ‘obugufu bwaco, oburingwa, obwemerero, n’oburingwa bw’okuza  ahaasi.’ Ebyo ni byo byabire birije kutuma ‘basimba’ emizi omu kwikiriza kwabo. (Shoma omu Befeso 3:14-19.) Ni itwe ni co eki tushemerire kukora. Reka tushwijume oku turi kubasa kushoborocerwa Ekigambo ca Ruhanga tukakizaho kukicenga omu bwijwire.

4. Ni bata oku turi kubasa kuba banywani ba Yehova? Gamba ecokureberaho.

⁴ Itwe Abakristo titushemerire kumarwa kusha n’ebintu by’okubandizaho by’omuri Bibuli. Ahabw’obuyambi bwa Ruhanga bw’omwika oguri kwera nitubasa n’okumanya ‘ebitari kumanywa bya Ruhanga.’ (1 Kor 2:9, 10) Ahabw’enki otari kubasa kweteraho entebekanisa y’okweyegesa enyegesa y’omuri Bibuli erije kutuma wakizaho kuba munywani wa Yehova? Ecokureberaho: Nobasa kushwijuma enkuru z’abahereza ba Ruhanga b’omu bwire bwa kare abu yayerekire rukundo, n’oku n’iwe yakwerekire rukundo. Nobasa kugeranisa entebekanisa ya Yehova y’omu bwire bwa Isirayeli n’ey’omuri obu bwire. Nambwenu nobasa kweyegesa munonga aha buhanuzi oburi kukwata ahari Yesu n’oku bwahikirire n’omurimo ogu yakozire obu yabire ari omu nsi.

5. Mbehi hariho ekicweka eki ori kwenda kucondozaho omu kweyegesa kwawe?

⁵ Bamwe omu begi ba Bibuli bakaba nibashabwa kushwijuma ebintu ebigumire ebiri kugambwa omu kigambo ca Ruhanga. Bimwe omu bi bagarukiremu nitubishanga omu kashanduku akine omutwe oguri kugira ngu: “Ebintu ebi ndi kweyegesa.” Nambwenu waba ori kwenda kumanya ebintu ebi ori kubasa kukora kugira ngu onurirwe n’okweyegesa, nobasa kurebera omu Kitabo ekiri kukwasa Abahamya ba Yehova kucondoza. Ku ori kukizaho kweyegesa Bibuli nibyija kugumya okwikiriza kwawe kandi nibyija kukukwasa ‘obone okumanya Ruhanga.’ (Emi 2:4, 5) Reka tute omutima aha mazima gamwe g’omuri Bibuli agu turi kubasa kucondozaho.

6. (a) Ni eha ntanisa eri ahagati y’okutegura n’ekigendererwa? (b) Ahabw’enki turi kubasa kugamba ku ekigendererwa eki Yehova ayinire abantu n’ensi arikihikiriza? (Abefeso 3:11)

⁶ Reka tutecereze aha ki Bibuli eri kugamba aha kigendererwa ca Ruhanga. Hariho  entanisa ahagati y’okutegura n’ekigendererwa. Nitubasa kugeranisa okutegura n’omuhanda ogu ori kubasa kutorana gukakuhisa ahu ori kwenda kuhika. Konka oko kutegura nikubasa kutahikwaho wabugana oburemezi omuri ogo muhanda. Ekigendererwa co ni ahantu ahu ori kwenda kuhika. Nitumanya ahu turi kwenda kuhika konka emihanda nebasa kutana. Obwe rero nitubasa kuhindura ahu turi kubasa kuraba twareba kiri kwetegwa. Nitusima Yehova ahabw’okuba yagenzire ari kutugambira ‘ekigendererwa ceye’ birabire ahari Bibuli. (Efe 3:11) Yehova ayine oburyo obu ari kukoramu buri kintu ahabw’okuba ‘buri kintu Yehova agira eki yakihangire.’ (Emi 16:4) Kandi ebi Yehova ari kukora biryabaho ebiro byona. Ni kiha kigendererwa ca Yehova kandi shi ni ebiki ebi yahindwire kugira ngu ayije kukihikiriza?

7. Abantu b’okubanza ku bamazire kucumura ni bata oku Yehova yahindwiremu oburyo obu ari koresa ari kuhikiriza ekigendererwa ceye ? (Matayo 25:34)

⁷ Ruhanga akagambira abantu b’okubanza ekigendererwa eki yabire abinire. Akabagambira ngu: ‘Muzare, mukanye, mwijure ensi, ebe eyanyu; mutegece . . . na byona ebine amagara ebiri kwegendesa ahaasi.’ (Kut 1:28) Nobu Adamu na Eva bagomire, bakaretera abantu bona ekicumuro tibiratumire ekigendererwa ca Yehova cahinduka. Akahindura oburyo obu yabire arakihikirizemu. Ahonaho akataho Obukama bw’omu iguru kugira ngu bwije kuhikiriza ekigendererwa eki yabire ayinire abantu n’ensi. (Shoma omuri Matayo 25:34.) Obwire bweye ku bwahikire, Yehova akohereza omwana weye owu ari kukunda w’enfura omu nsi, kugira ngu ayegese abantu ebiri kukwata ahari obwo Bukama n’okutanga amagara geye ngu gabe encungu gatukize ekibi n’orufu. Bwanyima Yesu akazoka yaza omu iguru ngu ategeke ari Omukama w’Obukama bwa Ruhanga. Konka hine ebindi bintu ebi tushemerire kutecerezaho munonga aha bikwatirine n’ekigendererwa ca Ruahgna.

8. (a) Ni kiha kigendererwa ca Bibuli? (b) Nk’oku biri kugambwa omu Befeso 1:8-11, ni kiha kigendererwa ca Yehova? (Nambwenu reba ekishushani c’aha kishembeso.)

⁸ Entego y’omugasho ya Bibuli ni oku izina rya Ruhanga ririje kwezibwa ahabw’okwikiriza ekigendererwa eki ayinire ensi birabire aha Bukama obwebembirwe na Kristo. Ekigendererwa ca Yehova tikirahindukire, naturaganisa ku ari kihikiriza. (Isa 46:10, 11, Heb 6:17, 18) Obwire nibwija kuhika ahu abijukuru ba Adamu na Eva abahikirire barije ‘kushemerererwa amagara ebiro byona.’ (Zab 22:26) Konka eco tico conka eki Yehova arije kuhikiriza. Nambwenu ayine ekigendererwa c’oku bamarayika b’omu iguru barije kubana omu bumwe n’abantu abarije kuba batwire omu nsi. Bona bazayekwatanisiriza hamwe omu kumuhimbisa nk’omujuni wabo. (Shoma omu Befeso 1:8-11.) Mbehi tikiri kukushemeza kutecereza aha buryo obu Yehova arije kukoresa kugira ngu ahikirize ekigendererwa ceye?

9. Ku turi kushoma Bibuli ni enki eki turi kushoborocerwa ekirije kubaho omu biro by’omu misho?

⁹ Tecereza aha buhanuzi obu Yehova yagambirire omuri edeni oburi kugambwa omu Kutandika 3:15. b Akagamba aha bintu ebyabire birije kubaho bikahikiriza ekigendererwa ceye konka tibirahikire nibibaho ahobwe bikabaho bwanyima y’emyaka myingi. Ebyo bikaba nibitwariramu okuha oruzaro Aburahamu orwatumire Kristo yazarwa. (Kut 22:15-18) Omu mwaka gwa 33 B.Y., Yesu akazoka  nk’oku cabire cagambirwe. (Byak 3:13-15) Aha muheru g’obwo buhanuzi Sitani azayatwa omutwe kuhisa obu emyaka 1,000 erihwera. (Kush 20:7-10) Kandi Bibuli negemba oku orwango oruri ahagati ya Sitani n’Ekitongore ca Yehova rurije kuhendera.

10. (a) Ni biha bintu ebirije kubaho juba aha? (b) Ni bata oku turi kubasa kwetegura omu bwenge n’omu mutima? (Reba obugambo bw’ahaasi.)

¹⁰ Tecereza ahari ebyo bintu ebiri kutinisa ebirije kubaho ebi Bibuli eri kugamba. Ecokubanza amahanga gazagamba ku ‘hariho obusinge, n’oburinzi!’ (1 Tes 5:2, 3) ‘Ahonaho,’ okubona bona kwingi kuzahika nikutandika rero amahanga gatahirire amadini g’ebishuba. (Kush 17:16) Ebyo ku biri hendera hazarebeka ‘omwana w’omuntu nayizira omu bicu by’omu iguru, ayine obushoborozi n’ekitinisa kingi.’ (Mat 24:30) Yesu azacwera abantu emanja atanise embuzi n’entama. (Mat 25:31-33, 46) Obwo bwire Sitani azaba acakora rero abuganise amahanga ebi Bibuli eri kweta kutahirira kwa gogi wa magogi aha bahereza ba Yehova. (Ezek 38:2, 10, 11) Omuri obwo bwire ni bwo abashukirweho omwika bari buganisibwa hamwe bakaza kutegeka na Kristo omu iguru kandi bakekwatanisa omu rutaro rwa harimagedoni kandi obwe nibwo okubonabona kwingi kuri hwaho. c (Mat 24:31; Kush 16:14, 16) Rero bwanyima Obutegeki bwa Kristo bw’emyaka rukumi buzahika nibutandika.—Kush 20:6.

11. Amagara agahikirire nigamanyisa ki ahari iwe? (Nambwenu reba ekishushani.)

¹¹ Hati shusha nk’owatecereza aha biro byawe by’omu biro by’omu misho. Bibuli negamba ku Omuhangi ‘yatire omu mitima y’abantu ebitekateko by’obwire obutarihwaho.’ (Mub 3:11) Tecereza aha ki ebyo biri kumanyisa ahari iwe n’aha bunywani obu oyine na Yehova. Ekitabo ekiri kwetwa ngu Hika hihi ya Yehova (Draw Close to Jehovah) ahari peji ya 319, nihatugambira ebintu ebiri kutushemeza hari kugamba ngu: “Bwanyima  y’okubaho emyaka magana, ebihumbi, miriyoni naza miriyari tuzakizaho kumanya byingi ebiri kukwata ahari Ruhanga kukiza ebi turi kumumanyaho hati. Konka tuzahurira twine ebintu byingi birungi by’okwega. . . . Amagara agatahwaho gazaba marungi kukiza agu twine hati konka kuba banywani ba Yehova ninga kuhika hihi ya Yehova ni co kintu ekiritura kiri kirungi munonga omu kubaho kwitu.” Mbwenu shi ni enki ekindi eki turi kubasa kukizaho kutecerezaho twaba turi kweyegesa ekigambo ca Ruhanga?

12. Ni bata oku turi kubasa kuguma kureba eby’omu iguru? Gamba ecokureberaho.

¹² Ekigambo ca Ruhanga nikigamba aha bintu bice ebiri kwereka oku Yehova abireho ‘omu iguru.’ (Isa 33:5) Bibuli negamba aha bintu ebiri kutangaza ahari Yehova n’aha kicweka c’ekitongore ceye c’omu iguru. (Isa 6:1-4; Dan 7:9, 10; Kush 4:1-6) Ecokureberaho: Nitushoma ebintu ebiri kutangaza ebi Ezekiyeli yabwine obu yarebire ‘iguru ryashuruka, akareba okorekwa nikuruga ahari Ruhanga.”—Ezek 1:1.

13. Nk’oku biri kugambwa omu Baheburayo 4:14-16, kuba Yesu ari Omugabe omu iguru bitwinire guha mugasho?

¹³ Nambwenu tecereza aha mwanya ogu Yesu ayine omu iguru nk’Omutambi mukuru kandi Omukama murungi oyine embabazi. Birabire ahari we nituhika ‘hihi n’ekitebe c’embabazi’ birabire omu kushaba kandi tukamushaba obuyambi n’embabazi ‘ahu turazetengere hona.’ (Shoma omu Baheburayo 4:14-16.) Nimureke tutarimara izoba na rimwe, tutatecerize aha ki Yehova na Yesu batukorire n’aha ki bari kutukorera bari omu iguru. Rukundo eyi bari kutukunda netukora aha mutima kandi etuma twagira amani omu murimo gwitu n’omu kuramya kwitu.—2 Kor 5:14, 15.

14. Ni kiha kintu c’omugasho eki turi kubasa kukora kugira ngu twereke ku nitusima Yehova na Yesu? (Nambwenu reba ekishushani.)

 ¹⁴ Oburyo oburi kukira obundi obu turi kubasa kwerekamu ku nitusima Ruhanga n’Omwana weye ni okukizaho kukwasa abandi kugira ngu bije kuba Abahamya ba Yehova kandi babe abegi ba Yesu. (Mat 28:19, 20) Eco ni co eki entumwa Pawulo yakozire kugira ngu ayereke ku nasima Ruhanga na Kristo. Akaba namanya ku Yehova ‘ari kwenda ngu abantu bona bajunwe, bamanyire kimwe amazima.’ (1 Tim 2:3, 4) Akaba nakora n’amani omu murimo g’okuburira kugira ‘ngu omu miringo yona abone kukiza bamwe.’—1 Kor 9:22, 23.

15. Tukuratize ebiri omuri Zaburi ya 1:2, ni enki ekiri kutushemeza?

¹⁵ Omuhandiki wa Zaburi akaba ahikire kugamba ku omuntu ori kutunga okushemererwa kandi akagira eki yahikaho omu kubaho kweye, ari ‘ori kushemerererwa ebiragiro bya Yehova’ kandi ‘akabitecerezaho nyomushana na nyekiro.’ (Zab 1:1-3;) Omuhinduzi omwe wa Bibuli ori kwetwa Joseph Rotherham akagamba ahari oru runyiriri ari kugamba ngu: “Omuntu ori kwenda kushemererwa ashemerire kukuratiza ebiragiro bya Ruhanga, akabishoma kandi akabitecerezaho obwire buringwa.” Akongeraho ati: “Omuntu ori kukunda kushoma Bibuli konka bukira atayishomire naba nahurira eryo zoba ryamufira busha.” Nobasa kutungira okushemererwa omu kweyegesa Bibuli birabire omu kufa munonga aha bi ori kushoma kandi okareba ahu biri kubuganira n’ebindi. Mazima kufa ahari buri kintu cona ekiri omu Kigambo ca Ruhanga nibituma twashemererwa!

16. Ni enki eki turije kushwijuma omu kicweka ekiri kukurataho?

¹⁶ Amazima agu Yehova ari kutwegesa birabire aha Kigambo ceye tigari kuturusya. Omu kicweka ekiri kukurataho tuzashwijuma munonga gamwe omuri ago mazima ni okugamba agari kugamba ahari hekalu eri kwera ya Yehova, eyi Pawulo yagambireho omu baruha eyi yahandikire Abakristo b’Abaheburayo. Okushwijuma oyetonzire ago mazima biryatuma washemererwa munonga.