1-2. Mukalelo wapama wa omwengesa vina omusunza Bibilia buvi? Kavaha yotagiha.

 KOBUWELA akala weyo onfuna ogula nyumba. Ogahiziveliwa wona ohinatti ogula? Obe ogahigula sabwa ya wona foto bahi? Kanina waganyedha wi ogahidhowa wona nyumbaya wang’ana makwartu otene na dhilobo dhina. Kanina waganyedha wi ohinatti ogula ogahiziveliwa wona nyumba yotene vina dhilobo dhing’ono dhilimo.

² Ninokosa elobo yoladdana nigamwengesaga vina nigamusunzaga Bibilia. Namaleba dhahi ohiladdaniha muselu wa Bibilia na “prédiyu enddimuwa vina yolapa vaddiddi emagiwe na alsersi yoliba vaddiddi.” Elobo gani enfwanyelihu okosa wi nimuziwe pama Bibilia? Akala onimwengesa Bibilia vadhulu-vadhulu onele ononelamo masunziho ahinrutxa ononelamowa—masunziho oroma a Nzu na Mulugu. (Aheb. 5:12) Na mukalelo wakakene ogadhowile weyo wona nyumba ohinatti ogula wi oziwe pama, onofwanyela oziwa pama Nzu na Mulugu wi owodhe ononelamo deretu. Mukalelo wapama wa omusunza Bibilia ku otamela wona mukalelo oniwanana elobo modha na dhilobo dhina. Ovilibihedhe wi ononelemo ottiya bahi dhibaribari gani dhinrumeliwe mbwenyi mwahaya onuttukulela orumela.

3. Txini yawaddelile murumiwi Paulo Akristu nanda sabwaya jani? (Éfeso 3:14-19)

³ Wi ninonelemo Nzu na Mulugu mowakwana-mwene ninofwanyela osunza dhibaribari dhotibeleya dha mBibiliani. Murumiwi Paulo ohawaddela abali wi afwaseyele osunza Nzu na Mulugu wi awodhe “ononelamo mutalamelo, munuwelo, mulapelo,  mvayelo” wa ebaribari enfwanyeya mBibiliani. Dhawene agahiwodha owarala vina agahikana nroromelo noliba. (Kengesa Éfeso 3:14-19.) Iyo vina ninofwanyela okosa yakene. Ovano ninfuna none mukalelo onawodhihu otiba nigasunzaga Nzu na Mulugu wi niwodhe opurelamo dhorela dhotene dhilimo.

4. Txini enfwanyelihu okosa wi nimususele venjene Yehova? Kavaha yotagiha.

⁴ Ninga Akristu, kaninfuna osunza bahi masunziho oroma a Bibilia. Na nikamihedho na muya wokoddela wa Yehova, iyo ninofiyedha oziwa “mobuwelo oviteya a Mulugu.” (1 Kor. 2:9, 10) Onkoddelani okosa masasanyedho a nsunzo nomwinya wi odhowegevi bugakala ofiyedheya na Yehova? Motagiha, kapepesa wi oziwe mukalelo walagihile Yehova okwela emeleli aye a masaka a mundduni vina mukalelo enoniha ejoya wi iyene vina onowukwela. Enowodheya weyo vina opepesa mukalelo wosasanyedheya webedhiwa Yehova nsaka na ana Izrayel vina mukalelo onfuna Yehova wi ebedhiwe masaka abano. Obe kasunza mavuhulo akwanihedhile Yezu nsaka naliye velaboni ya vati.

5. Ohikalawo mutoma agavilibihedhiliwe osunza venjene?

⁵ Abali ena anziveliwa omusunza Bibilia ahivuziwa dhilobo gani dhinziveliwani opepesa wi anonelemo pama Nzu na Mulugu. Dhilobo dhina dhilogilani dhili kasha eji “ Ttarho ya Okosa Nsunzo Nomwinya.” Ogafunaga opepesa kalabihedha Índice das Publicações da Torre de Vigia obe Guia de Pesquisa para Testemunhas de Jeová. Onele wona wi olabihedha dhipano esi enele wukamihedha oziveliwana venjene nsunzo nawo, okosa nsunzo notibeleya ninga ntti enele wukamihedha olibiha nroromelo nawo vina ofwanya eziwelo ya Mulugu. (Gano 2:4, 5) Ndowe none dhibaribari dhotibeleya dha mBibiliani dhinfwanyeliwe ovitula.

6. (a) Ottiyana gani olivo wa yogana na efunelo? (b) Ninlogelani wi efunelo ya Yehova na nlogo na attu vina elabo, elobo ya mukalakala? (Éfeso 3:11)

⁶ Koona motagiha ejile enloga Bibilia sabwa ya efunelo ya Mulugu. Vahikala ottiyana ohinaganyedheya wa yogana na efunelo. Kobuwela akala onfuna okosa oleddo, iyo ninfuna  niladdanihe ogana na dila enfuniwe ovira mpaka ondowiwe. Mbwenyi yogana yawo enodhaga ovonya, elobo-txilobo egahidha ononga dilaya buhiwodha ovira. Mwa mpaddi mwina efunelo enoladdana na mburo onfuniwe ofiya. Weyo onoziwa pama mburo ondowiwe nona enowodheya ovira dila yina wi ofiye mburoya. Weyo onowodha okosa matxinjo mowiwanana na yofuna yawo. Iyo ninomutamalela venjene Yehova sabwa ya ovitula vang’ono-vang’ono efunelo yaye modhela Bibilia. Na mukalelo mmodha obe mwina mudhidhi wotene Yehova onowodha okosa ejile enfuniye sabwani “dhithanddile Mulugu, dhikana epaddutxeliye.” (Gano 16:4) Vina dhotene dhinkosa Mulugu sa mukalakala. Ovano efunelo ya Yehova jivi, vina matxinjo gani akosiliye wi akwanihedhe?

7. Muttegile Adamu matxinjo gani akosile Yehova mowiwanana na efunelo yaye? (Mateu 25:34)

⁷ Mulugu wahawaddela atelani oroma ejile yafuniyena. Mulugu wahawaddela dhahi “kalanina guru dh’obala, enjivihanani, dhalani mwilaboni, muthongemo. Mweddihe . . . Vinama dhotene” dhinedda mwilaboni. (Wita 1:28) Sabwa ya onvanya Mulugu Adamu na Eva, vina nlogo notene na attu nihittega, mbwenyi ejo kitxinjile efunelo ya Yehova. Iyene otxinjile bahi mukalelo wowakwanihedha efunelo yaye. Mohigonela Yehova ohigana wimetxa Omwene wirimu onakwanihedhe efunelo yaye yoroma na nlogo na attu vina elabo. (Kengesa Mateu 25:34.) Na okwela Yehova ohimuruma nammodha waye velaboni ya vati wi asunzihe attu mwaha wa Omwene wa Mulugu vina avahe egumi yaye ninga yobolo egavunile attu muttegani vina okwa. Vasogorhova Yehova ohinvenyiha Yezu mukwani wi eyelele wirimu akale Mwene wa Omwene wa Mulugu. Mbwenyi dhihikalawo dhilobo dhinwodhiwe otanalela dhiniwanana na efunelo ya Mulugu.

8. (a) Muselu wa Bibilia buvi? (b) Mowiwanana na Éfeso 1:8-11, efunelo enddimuwa ya Yehova jivi? (Koona foto ya kapa.)

⁸ Muselu munddimuwaya onloga Bibilia okoddelihiwa wa nzina na Yehova, eji enapadduwe agakwanihedha efunelo yaye na elabo ya vati modhela Omwene waye onlamuleliwa na Yezu. Kinwodheya otxinja efunelo ya Mulugu. Yehova ohipikirela wi dhetene dhinele wakwanihedheya dhahene ninga mulogeliye. (Iza. 46:10, 11; Aheb. 6:17, 18) Na mudhidhiya elabo enele osadduliwa bikala paraizu, ziza nibudduwile mwa Adamu na Eva ninele okala noligana vina ninele okalagawo namukalakala. (Masal. 22:26) Yehova ohikana dhilobo dhinjene dhinnifuneyena, mbwenyi efunelo yaye enddimuwaya jawi emeleli aye ankala velaboni ya vati vina wirimu amwebedhege iyene nowiwanana. Otene anele okala oweddeyana vina anele omwiwelela Yehova ninga muttanddi wa wirimu na elabo ya vati. (Kengesa Éfeso 1:8-11.) Kinutikiniha wona mukalelo onakwanihedha Yehova efunelo yaye?

9. Omusunza Bibilia onuttukulela oziwa dhilobo gani sabwa ya musogorho?

⁹ Koona nivuhulo nikosile Yehova mmunddani mwa Edeni, ninga munlagiha Wita 3:15. b Nivuhulo ntti ninologa mapadduwo agattukuleli wakwanihedheya wa efunelo ya Mulugu mbwenyi eji egaromile wakwanihedheya kovira vyaka dhinjene musogorho. Motagiha, Yehova wahimwaddela Abrahamu wi maziza menjene egadhile musogorhomwa pugabaliwe Kristu. (Wita 22:15-18) Vasogorhova yaka ya 33 EC, Yezu wahilumiwa etili, dhahene ninga  mwavuhuleliwani. (Mer. 3:13-15) Epaddi yomariha ya nivuhulo ntti, kuloga otatakiwa wa musoro wa Satana enapadduwe omagomo wa vyaka 1.000 dha olamulela wa Kristu. (Ovuh. 20:7-10) Vina Bibilia onologa dhilobo dhinjene dhinapadduwe mwari mwa mudhidhi obu oli widdana wa nikuru na Satana vina nikuru na Yehova.

10. (a) Txini enapadduwe mohigonela? (b) Ninawodhe dhavi okala ovisasanyedhene muyubuweloni vina mmurimani mwehu? (Koona vina nota.)

¹⁰ Karoma otanalela mapadduwo owagalaliha anloga Bibilia. Yoroma, malogo a mwilaboni anele ologa “dhetedhene dhifwasa, kulí yawopiha!” (1 Tes. 5:2, 3) Mohijedheleya, goyi enddimuwa enele oroma mudhidhi onalupeliwe relijiau dhonyengetta. (Ovuh. 17:16) Vasogorhova txino ninele wona vizinddiyelo dhinapadduwe wirimu “Mwana-muttu adhaga mmiraboni wirimu na nttittimiho ninddimuwa.” (Mt. 24:30) Venevo Yezu onele wattonga attu amwalanihaga ninga mabila na mbuzi. (Mt. 25:31-33, 46) Masiki dhawene Satana kaneyelele mundduni. Sabwa ya widda vaddiddi nlogo na Mulugu Satana onele ottukulela malogo a mwilaboni ankuwela Bibilia ninga Gog mwilaboni y’o Magoge olupela nlogo na Mulugu. (Ezek. 38:2, 10, 11) Mwa mudhidhi mung’onovi attikitteliwi anakale velaboni ya vati anele ottukuleliwa wirimu, venevo vamodha na Yezu na nikuru naye na anyakoddo anele oraba koddo ya Armagedon, omagomo wa goyi enddimuwa. c (Mt. 24:31; Ovuh. 16:14, 16) Ejo egavira Olamulela wa Vyaka Txikwi wa Kristu onele oroma velaboni ya vati.—Ovuh. 20:6.

11. Weyo oniviwamo dhavi ogobuwela wi onele okalawo namukalakala? (Koona vina foto.)

¹¹ Ovano karoma otanalela mukalelo onakale dhilobo vyaka 1.000 dhigavira. Bibilia onloga wi Muttanddi wehu ohika mmurimani mwehu efunelo ya okalawovi na mukalakala. (Koh. 3:11) Karoma otanalela entapulela ejoya mwa weyo vina mandano awo na Yehova. Nivuru Achegue-se a Jeová, nikuku 319, ninonaddela vang’onovi mukalelo onakale egumi yehu mparaizu: “Nigaroma okalawo  vyaka mazana, vyaka txikwi, matxikwi-na-matxikwi, vyaka mabiliau menjene, ninele oziwa dhilobo dhowinjiva mwaha wa Yehova Mulugu opitta esi dhinziwihu ovanene. Mbwenyi dhinele okalawo dhilobo dhinjene dhapama dhinasunzegehu. . . . Okalawo namukalakala enakale elobo yohipimeya na dhilobo dhottiyana-ttiyana. Elobo enakaletxe yamakamakaya ja iyo okala ofiyedheya na Yehova.” Nijedhelaga ejo opadduwa, dhilobo gani dhina dhinfwanyelihu oziwa ovanene nigamusunzaga Bibilia?

12. Ninawodhe dhavi wang’ana wirimu? Kavaha yotagiha.

¹² Bibilia ononisunziha dhilobo dhina mwa ejile entapulela okala vamentoni va Yehova. (Iza. 33:5) Bibilia ononaddela vina dhilobo dhotikiniha mwaha wa Yehova vina nikuru naye nili wirimu. (Iza. 6:1-4; Dan. 7:9, 10; Ovuh. 4:1-6) Motagiha, enowodheya iyo wengesa dhilobo dhotikiniha dhonile namavuhulela Ezekiyel mudhidhi wafuguwile wirimu baroma wona dhilobo dhamulagiha Mulugu.—Ezek. 1:1.

13. Ninga munlagiha Ahebreu 4:14-16 oniviwamo dhavi ogatanaalela esile dhinkosa Yezu ovenyedha wirimu?

¹³ Karoma otanalela vina ejile enkosa Yezu wirimu, ninga Mwene wehu vina Namakutta Munddimuwa onoziwa pama mukalelo onviwamo iyo. Na nikamihedho naye enowodheya osusela vampaddoni va Mulugu modhela nlobelo nikumbiraga oleveleliwa dhottega dhehu vina nikamihedho mudhidhi wofwanyelela. (Kengesa Ahebreu 4:14-16.) Kuttiye labo ovira ohiromile otanalela dhilobo dhotene dhikosile Yehova vamodha na Yezu vina dhinkosani ovenyedha wirimu. Onikwela wawa onofwanyela oddiginya mirima dhehu vina onittukulela okosa muli mwetemwene mmabasani a Yehova.—2 Kor. 5:14, 15.

14. Mukalelo gani wamakamaka wa omutamalela Yehova na Yezu mwa esile dhinnikoselani? (Koona vina mafoto.)

 ¹⁴ Mukalelo mmodha olitxi wamakamaka wa woniha omutamalela wehu Yehova na Yezu mwa esile dhinnikoselani ku ovilibihedha wi nakamihedhe attu ena okala Anamoona a Yehova vina anamafwara a Yezu. (Mt. 28:19, 20) Jijuwene ekosile murumiwi Paulo wi onihe omutamalela waye Mulugu vina Yezu. Iyene wanziwa wi Yehova “onfuna wi etene avuneye, afiyedhe oziwa ebaribari.” (1 Tim. 2:3, 4) Iyene ohivilibihedha venjene mmabasani a olaleya wi akamihedhe attu owinjiva egawodheya wi “masiki erutxe [avunemo] ena.”—1 Kor. 9:22, 23.

15. Mowiwanana na Masalmo 1:2, elobo gani enanagalalihe?

¹⁵ Munasalmo ohimuloga pama muttu onziveliwa osunza Nzu na Mulugu, iyene ohiloga wi onagalala “ddule onjiwa murima na magano a Nabuya” vina ontanalela malamulo aye mutana na mattiyu. (Masal. 1:1-3.) Alogaga sabwa ya nlebo ntti namatapulela wa Bibilia onkuweliwa Joseph Rotherham ohileba munivuruni naye Estudos dos Salmos na engelesi wi “muttu onofwanyela oziveliwana magano a Mulugu vina onofwanyela otamela osunza vina ovira mudhidhi atanalelaga.” Iyene ohiloga vina wi muttu onodhaga “oyelela siku notene sabwa ya ohimwengesa Bibilia vina ohikana eziwelo enfwanyeyamo.” Enowodheya weyo oziveliwa omusunza Bibilia mwa otamela dhilobo dhinjene dhinloga Bibilia na dhilobo dhina dhattima vina mukalelo oniwananani. Otamela ononelamo munuwelo wa Nzu na Mulugu ononidhelana wagalala onddimuwa!

16. Txini enasunzehu nsunzo ninfwarela?

¹⁶ Dhibaribari dhinnisunziha Yehova mu Nzuni naye kahiye dhorutxa vaddiddi ononelamowa. Nsunzo ninfwarela ninele wona dhibaribari eso dhina dhoviteya dhinloga sabwa ya—mparha munddimuwa wa Yehova ologile murumiwi Paulo mukartani nalebeliye akadda Ahebreu. Onele oziveliwa osunza makani aba.