1-2. Baibal relnak le hlathlainak ah a ṭha bikmi lam cu zeidah a si? Tahchunhnak pe.

 INN cawk ding in bia na khiah tiah na mitthlam ah cuanter hmanh. Na cawk hlanah zeidah zoh na duh? Inn hmailei hmanthlak lawng maw? Mah lawng in naa lungsi lai lo. Nangmah theng nih mah inn kha a lenglei he a chunglei he ṭha tein zoh na duh lai ti cu lunghrin awk a um lo. Cawk na duhmi inn kha a dikthliar in na zoh lai ti cu a fiang ko.

² Baibal kan rel tik le kan hlathlai tik zong ah cutin kan tuah khawh. Baibal lei mifim pakhat nih Baibal cu “a hram thukpi bunh in sakmi inn nganpi” bantuk a si tiah a ti. A si ahcun Baibal kha zeitindah ṭha tein kan hngalh khawh? Khulrang tein na rel ahcun “Pathian bia cawnnak hmasa bik” a hrampi kong lawng kha na hngalh lai. (Heb. 5:12) Asinain na cawk dingmi inn ah na luh i ṭha tein na hlathlai bantuk in Baibal kha tam deuh in na hngalhthiam nakhnga ṭha tein na hlathlai a hau. Baibal hlathlai ning he aa tlaiin a ṭha tukmi lam pakhat cu Baibal kong pakhat le pakhat zeitindah aa pehtlaih ti hngalhthiam awkah i zuam kha a si. Zeidah na zumh ti lawng si loin zeicah na zumh ti zong kha hngalhthiam awkah i zuam.

3. Lamkaltu Paul nih zumtukhat unau pawl kha zei tuah awkah dah a forh hna, zeicah? (Efesa 3:14-19)

³ Baibal kong ṭha tein hngalhthiam awkah Baibal biatak kong kha ṭha tein kan hlathlai a hau. Lamkaltu Paul nih Khrihfa unau pawl kha biatak “a kauh ning le a sau ning le a san ning le a thuh ning” hngalhthiam awkah Baibal kha ṭha tein hlathlai awkah tha a pek hna. Mah lawng ah an zumhnak cu ‘hram aa bunh’ lai i a fek lai. (Efesa 3:14-19 rel.) Kannih zong cutin  kan tuah ve a hau. Baibal biatak ṭha tein hngalhthiam awkah zeitindah kan hlathlai khawh ti kha i ruah hna u sih.

4. Jehovah he i naih deuh awkah zeidah kan tuah khawh? Tahchunhnak pe.

⁴ Khrihfa kan si caah a hrampi Baibal cawnpiaknak hngalh lawng in kan i lungsi lo. Pathian thiang thlarau bawmhnak thawng in “Pathian nih aa tinhmi, a thukmi hmanh” kha kan hngalh khawh. (1 Kor. 2:9, 10) Jehovah he i naih deuh ding timi hmuitinh he hlathlainak cheukhat na tuah khawh. Tahchunhnak ah, Jehovah nih hlanlio a salle cung ah dawtnak a langhter ning le mah nih nangmah zong aan dawt ve ti a langhter ning kha na hlathlai khawh. Cun Jehovah nih Israel mi pawl biaknak caah a timhtuahpiakmi hna le tuchan Khrihfabu pumhnak caah a kan timhtuahpiakmi kong hna kha tahchunh. Asiloah Jesuh nih vawleicung phungchim rian a ṭuan lioah a rak tlingmi chimchungbia kong kha a dikthliar in hlathlai.

5. Ṭha tein hlathlai na duhmi kong a um maw?

⁵ Ṭha tein Baibal hlathlai a duhmi cheukhat nih tam deuh in hlathlai an duhnak a ruang cheukhat kha an chim. An chimmi kong cheukhat kha “ Pumpak Hlathlainak Caah A Konglam Hna” timi rinli kulh ah zoh khawh a si. Mah a konglam hna kha Jehovah Tehte Hna caah Baibal Hlathlainak timi cauk hmang in na hlathlai ahcun nuamhnak tampi na hmu lai. Ṭha tein Baibal hlathlainak nih na zumhnak a fehter khawh i “Pathian hngalhnak” ngeih awk zong ah aan bawmh khawh. (Ptb. 2:4, 5) Atu ṭha tein kan hlathlai khawhmi a thukmi Baibal biatak kong cheukhat kha i ruah hna u sih.

6. (a) Timhtuahnak le tinhnak ngeih timi aa thleidannak cu zeidah a si? (b) Minung ca le vawlei ca i Jehovah tinhnak cu zeicah “zungzal” ca a si tiah kan ti khawh? (Efesa 3:11)

⁶ Pathian tinhnak kong he aa tlaiin Baibal chimmi kong kha ruathmanh. Timhtuahnak ngeih le tinhnak ngeih cu aa dang tukmi a si. Timhtuahnak timi cu kan kal duhnak hmun ah kan phanh khawh nakhnga zei lam in dah kan kal lai ti kan i thimmi he aa lo. Asinain mah lam ah dawnkhantu thil a um ahcun na kal duhnak hmun ah na phan kho lai lo. Tinhnak timi tu cu kan kal duhnak hmun he aa lo. Kal kan duhnak hmun kha ṭha tein kan hngalh i zei lam in dah kan kal lai ti kha rikhiah a hau lo. Kan kalnak lam ah dawnkhantu thil a um ahcun a dang lam in kan kal kho. Cu bantuk in Jehovah nih Baibal ah a langhtermi ‘zungzal aa tinhnak’ kong kha duhsah tein a rak phuan. (Efesa 3:11) Jehovah nih aa tinhnak tlinter awkah a dang lam hna kha aa thimh khawh i “zeizong vialte hi anmah ca i tinh ciomi caah khan a ser hna” caah a hlawh a tling zungzal. (Ptb. 16:4) Cucaah Jehovah tuahmi thil cu zungzal in an hmun. Jehovah aa tinhmi cu zeidah a si i hlawhtlinnak a hmuh nakhnga zei thlennak dah a tuah?

7. Hmasa bik nupa nih an ralchanh ko nain Jehovah nih aa tinhnak a hlawh a tlin nakhnga zeitindah thlennak a tuah? (Matthai 25:34)

⁷ Pathian nih hmasa bik nupa sinah an caah aa tinhnak kong kha a chimh hna. Hitin a ti hna: “Tefa tampi in ngei u law nan tefa cu vawleicung khuazakip ah khat hna seh, cun annih nih vawlei cu uk hna seh . . . an dihlak cung i nawlngeihnak kaan pek hna.” (Gen. 1:28) Adam le Evi nih Pathian an ralchanh tikah minung chungkhar cu sualnak chung ah kan phan ko nain Jehovah nih aa tinhnak kha tlinter loin a um lo. Aa tinhnak a tlin khawh nakhnga thlennak a tuah. Minung le vawlei caah a hrampi aa tinhnak a tlin khawh nakhnga vancung ah Pennak pakhat dirh ding in bia a khiah colh. (Matthai 25:34 rel.) Pennak kong cawnpiak awk le sualnak le thihnak in tlanh awkah ri a khiahmi caan ah a dawt tukmi a Fater kha vawlei ah a thlah. Cun Jesuh kha a thawhter ṭhan i vancung ah Pathian Pennak Siangpahrang in uktu a ṭuanter. Asinain Pathian tinhnak cu mah lawng a si lo.

8. (a) Baibal i a biapi bikmi kong cu zeidah a si? (b) Efesa 1:8-11 ah a chim bantuk in Jehovah i a ngan bikmi aa tinhnak cu zeidah a si? (A phaw hmanthlak zoh.)

⁸ Baibal i a biapi bikmi kong cu Khrih ukmi Pennak thawng in vawlei ca i aa tinhnak a tlinter tikah Pathian nih a min a thianter lai timi a si. Jehovah tinhnak cu aa thleng kho lo. A chimmi ning in zeizong vialte ka tlinter lai tiah bia aa kam. (Isa. 46:10, 11; Heb. 6:17, 18) A caan a phanh tikah vawlei cu a tlingmi paradis a hung si lai i a dingmi Adam le Evi tefa cu ‘zungzal in thluachuah’ an hmu lai. (Salm 22:26) Asinain Jehovah nih a tlinter dingmi cu mah lawng a si lo. Vancung le vawleicung ah a ummi a salle dihlak kha an lung a rualter hna lai. Mah tikah sermi thil vialte nih Jehovah kha an Uktu in an cohlan lai. (Efesa 1:8-11 rel.) Aa tinhnak tlinter awkah Jehovah nih a ṭha tukmi lam hna a hman caah na khuaruah a har maw?

9. Baibal relnak thawng in hmailei kong zeitluk in dah kan hngalh khawh?

⁹ Genesis 3:15 ah a langhtermi Eden dum he aa tlaiin Jehovah nih a chimchungmi kong kha ruat. b Mah ah aa tinhnak he aa tlaiin a tling dingmi a biakam kong kha a langhter. Asinain mah cu kum thongkhat hnu lawng ah a tlingte lai. Tahchunhnak ah, mah thil sining ah Abraham tefa in Khrih a chuak lai timi aa tel. (Gen. 22:15-18) Cun chimchungbia bantuk in AD 33 ah Jesuh kedil cu cuk a si. (Lam. 3:13-15) “Tefa” nih Satan lu a rial lai timi chimchung bia tu cu kum 1,000 hnu ah a  tlingte lai. (Biat. 20:7-10) Baibal ah Satan vawlei le Jehovah bupi an i ralnak a donghnak a phanh tikah zeidah a cang lai ti kha a langhter.

10. (a) Hmailei ah zeidah a cang lai? (b) Zeitindah kan ruahnak le kan lungthin kan timhtuah chung khawh? (A tanglei fianternak zoh.)

¹⁰ Baibal nih a chimchungmi ṭih a nung tukmi thil sining kong kha ruathmanh. Pakhatnak, miphun pawl nih “zeizong vialte a dai dih ko i a him dih ko” tiah an thanh lai. (1 Thes. 5:2, 3) Miphun pawl nih a hmaan lomi biaknak an doh tikah harnak nganpi cu ‘ruah lopi in’ aa thawk lai. (Biat. 17:16) Mah hnuah ‘mi Fapa cu lianhngannak le sunparnak he vancung in a ra’ ti a langhtermi khuaruahhar a simi hmelchunhnak hna a um kho men. (Matt. 24:30) Jesuh nih mi kha tuu le meheh tiin a ṭhen hna lai. (Matt. 25:31-33, 46) Mah caan chung ah Satan nih Jehovah kha a ralchanh peng lai. Jehovah a biami hna kha a huat tuk hna caah Baibal nih Magog ram ah a ummi Gog tiah a auhmi miphun fonhmi hna kha Jehovah miphun pawl a dohter hna lai. (Ezek. 38:2, 10, 11) Mah caan chung caankhatkhat ah chiti thuhmi a tangmi hna cu vancung ah pumh an si lai. Harnak nganpi a donghnak, Armageddon raldohnak ah Khrih le a vancungmi hna nih an doh lai. c (Matt. 24:31; Biat. 16:14, 16) Mah hnuah vawleicung ah Khrih Kum Thong Khat Uknak cu aa thawk lai.—Biat. 20:6.

11. Na caah zungzal nunnak cu zei sullam dah a ngeih? (Hmanthlak zong zoh.)

¹¹ A ra laimi kum 1,000 kong kha ruathmanh. Sertu nih “hmailei thil hngalh duhnak kha minung kan lungthin chung ah a chiah” tiah Baibal nih a ti. (Pct. 3:11) Mah cu na ca le Jehovah he nan i pehtlaihnak caah zei sullam dah a ngeih ti kha ruat. Jehovah Kha Naih timi [Myanmar] cauk cahmai 319 ah hitin a ti: “Kum zakhat, kum thongkhat, kum nuaikhat le kum nuai thong tampi kan nun hnuah Jehovah Pathian kong kha atu nakin tam deuh kan hngalh chinchin lai. Asinain kan hngalh  awk a simi thil tampi a um rih timi ruahnak kan ngei peng rih lai. . . . Paradis nunnak cu zeitluk in dah a nuamh lai i hngalh duh awk a si lai ti kha kan mitthlam hmanh ah kan cuanter kho lo. Cun Jehovah he i naih cu a ṭha bikmi thil a si zungzal lai.” Baibal kan hlathlai buin a dang zei kong hna dah kan hlathlai khawh rih?

12. Cunglei kha zeitindah kan zoh khawh? Tahchunhnak pe.

¹² Jehovah umnak a simi ‘cunglei’ kong kha Baibal ah a langhter. (Isa. 33:5, NWT) Baibal ah khuaruahhar a simi Jehovah kong le vancung a bupi kong kha a langhter. (Isa. 6:1-4; Dan. 7:9, 10; Biat. 4:1-6) Tahchunhnak ah, Ezekiel nih “van kha aa hung i Pathian langhnak” a hmuh tikah a khuaruah a har tuknak kong kha Baibal ah kan hmuh khawh.—Ezek. 1:1.

13. Hebru 4:14-16 ning in vancung ah Jesuh nih a tuahmi kong he aa tlaiin zeidah na sunsak?

¹³ Zaangfahnak a ngeimi Tlangbawi Ngan le vancung in a kan uktu Siangpahrang Jesuh nih a tuahmi kong zong kha ruat. A “vel a umnak Pathian bawiṭhutdan” hmai ah Jesuh min in thla kan cam khawh. “Kan herh lio caante ah” zaangfahnak le bawmhnak zong kan hal khawh. (Hebru 4:14-16 rel.) Jehovah le Jesuh nih vancung in a rak kan tuahpiakmi kong le a kan tuahpiak liomi kong kha nifatin ruah loin um hna hlah u sih. An kan dawtnak kong kan ruah tikah kan lung a kan suk lai i mah nih teima tein phungchim  rianṭuan awkah a kan forh lai.—2 Kor. 5:14, 15.

14. Jehovah le Jesuh cung ah kan i lawmhnak langhter khawh ning a ṭha bikmi lamkhat cu zeidah a si? (Hmanthlak zong zoh.)

¹⁴ Pathian le a Fapa cung ah kan i lawmhnak langhter khawh ning a ṭha bikmi lamkhat cu mi kha Jehovah Tehte le Jesuh zultu an si nakhnga bawmh kha a si. (Matt. 28:19, 20) Lamkaltu Paul nih Pathian le Khrih cung ah aa lawmhnak kha cutin a rak langhter. Jehovah nih “mi vialte nih khamhnak hmu hna seh ti le biatak kha hngal hna seh” ti a duh kha Paul nih a hngalh. (1 Tim. 2:3, 4) Cucaah “mikip” nih khamhnak an hmuh khawh nakhnga phungchim rianṭuannak ah fakpi in a rak i zuam.—1 Kor. 9:22, 23.

15. Salm 1:2 ning in zeinihdah a kan nuamhter khawh?

¹⁵ Salm caṭialtu pa nih “an i lawmhnak cu BAWIPA nawlbia” a si i “cu nawlbia cu chunzan in” a ruatmi hna cu khua awng an tong tiah a ti. (Salm 1:1-3) Baibal lettu Joseph Rotherham nih mah Baibal caang he aa tlaiin Studies in the Psalms timi a cauk ah hitin a ti: “Ṭha tein kawl, hlathlai, mah kong ruah awkah a caan tampi pek le Pathian lamhruainak hmuh awkah fakpi in i zuam kha kan duh awk a si.” Cun “nikhat chung Baibal rel loin um cu a caan sawksam a si” ti zong in a ti. Baibal ah aa telmi hngalh duh awk ngai a simi a kong hna na hlathlai tik le a kong pakhat le pakhat zeitindah aa pehtlaih ti kha na hngalhthiam tikah nuamhnak na hmu kho. Baibal hmuh ning kong a phunphun hlathlai cu a nuam tukmi a si.

16. A hnu capar ah zei kong dah kan i ruah hna lai?

¹⁶ Jehovah nih Baibal hmang in a kan cawnpiakmi biatak kong cu hngalhthiam awkah a har tuk lo. A hnu capar ah a thukmi Baibal biatak pakhat kong kan i ruah hna lai. Mah cu Paul nih Hebru Khrihfa hna sin a cakuat ah a langhtermi Jehovah i a nganmi thlaraulei biakinn kong a si. Mah kong nan hlathlainak ah nuamhnak hmu ko u.