1, 2. ¿Kʼãrẽta oibara biʼia estudiaita Daizeze Bedʼeata? Yizata jara ũrĩbira.

 KRĨCHARA bʉa nei edakĩrãbʉta, bʉa maʉ̃ edai nãã, biʼia akʉbʉ bigabʉ kʼawuaita, bʉa tõbari akʉbʉ jõma biabʉ kʼawuaita akʉza bʉara bari potode ũdubʉ kʼarea eda ẽ, awuarabʉrʉ bʉyi dabʉaraba ũdukĩrãbʉ wãrĩnu bigachu kʼawuaita akʉza bʉa kãgadebʉ kʼawuaita. Bari jaraita, bʉa deta edaibʉrʉ naena biʼia akʉbʉ.

² Dayirãbida Daizeze Bedʼea akʉbʉrʉdera maʉ̃ kĩrãkʼa oibara. Daizeze Bedʼea bʉdaba jarasi Daizeze Bedʼeara de drazoabʉ kĩrãkʼabʉta akʉza maʉ̃ de jĩrʉra zareabʉta. ¿kʼãrẽta odaibara audre biʼia kʼawuaita Daizeze Bedʼeaba jarabʉta? Dayirãba Daizeze Bedʼeata mesera lepanʉbʉrʉ nekʼãrẽ mejãcha kʼawuada ẽ bayi (Heb. 5:12). Awuarabʉrʉ bʉara Daizeze Bedʼeara biʼia akʉibara mawũã kʼawuaita kʼãrẽta jarabʉta, abarika bʉa de edai kĩrãkʼa, bʉa nãã biʼia akʉbʉ sãwũãbʉta. Dayirãba Daizeze Bedʼea estudiabʉdera jʉrʉibara awuru testora dayirãba lenʉmʉme abarika bedʼeabʉta. Zarea ora kʼawuaita, bʉa ĩjãbʉ ʉ̃rʉ akʉza kʼawuaita kʼãrẽa ĩjãbʉta bʉa maʉ̃ra.

3. ¿Kʼãrẽta omarẽã jarasi Pabloba kristianora akʉza kʼãrẽa? (Efesios 3:​14-19).

³ Dayirãba Daizeze Bedʼeaba kʼãrẽ jarabʉ biʼia ũrĩra, bari ʉ̃rʉ akʉ ẽ baibara, awuarabʉrʉ biʼia estudiaibara maʉ̃ ʉ̃rʉ. Pabloba jarasi kristianora Daizeze Bedʼeata biʼia estudiadamarẽã, iya jarasi: «Biʼia kʼawuadamarẽã yi joʉbʉata, yi drazoata, yi ʉ̃tʉata akʉza yi eiduata». Ãya maʉ̃ta obasibʉrʉ zarea ĩjãseabasi (akʉra Efesios 3:​14-19). Akʉdaya sãwũã Daizeze Bedʼea biʼia estudiaita, mawũã biʼia kʼawuaita iya kʼãrẽta jarabʉta.

4. ¿Kʼãrẽta oseapanʉ audre Jeowa kʼawa bʼaita? Yizata jara ũrĩbira.

⁴ Dayirã kristianorabara Daizeze Bedʼeara bari ʉ̃rʉ akʉpanʉ ẽ, awuarabʉrʉ Jeowa jaure zarea kʼarebadeba Daizeze Bedʼeara biʼia akʉpanʉ, mawũã bia kʼawuaita kʼãrẽ ʉ̃rʉ bedʼeabʉta (1 Cor. 2:​9, 10). Maʉ̃ oira bʉara estudiaseabʉ nekʼãrẽ bʉ audre Jeowa kʼawa babibʉ ʉ̃rʉ. Bari jaraita, bʉa kʼawuaseabʉ Jeowaba iyi pʉwʉrʉ nããbema sãwũã kãga ũdubida ʉ̃rʉ akʉza bʉa maʉ̃ne ũduseabʉ Jeowabara bʉsida abarika kãgata. Adewara bʉa akʉseabʉ Jeowaba israelitara kʼãrẽta omarẽã jarasita iyaʼa yiwidʼidamarẽã akʉza sãwũã idi ewade dayirã organizasionbida abarika obʉta Jeowaʼa yiwidʼita. Akʉza jʉrʉseabʉ saʉ̃ra propesiarata Jesu ʉ̃rʉ bedʼeabʉta akʉza iya nama nekʼãrẽ oda ʉ̃rʉ bedʼeabʉta akʉza maʉ̃ra sãwũã aripe berabarisita.

5. Bʉyidobaʉba Daizeze Bedʼea akʉbʉde, ¿bʉka nekʼãrẽ bʉa audre kʼawuakĩrãbʉta?

⁵ Ʉ̃kʉrʉ mebẽrã widisida kʼãrẽta audre kʼawuakĩrãpanʉta Daizeze Bedʼea ʉ̃rʉ, ʉ̃kʉrʉ ãya bedʼea jaradadebemara ũdupanʉ rekuadro « ¿Kʼãrẽ ʉ̃rʉ bʉyidobaʉba estudiaita?» abʉmae. Bʉa maʉ̃ra bedʼea ʉ̃rʉ audre kʼawuakĩrãbʉbʉrʉ kʼarebata jʉrʉseabʉ naʉ̃ra kartarane Índice de las publicaciones Watch Tower, mawũã ẽ bʉrʉ Guía de estudio para los testigos de Jehová. Bʉa Daizeze Bedʼeata biʼia estudiabʉbʉrʉ naʉ̃ba kʼarebayi bʉa ĩjãbʉta audre zarea bamarẽã akʉza Daizezeta audre ũdukʼawuamarẽã (Prov. 2:​4, 5). Atia kʼawuadayi kʼãrẽ ʉ̃rʉ estudiaseapanʉta.

6. (1) ¿Kʼãrẽne awuarachu bedʼea plan akʉza bedʼea propósito? (2) ¿Kʼãrẽa jaraseapanʉ Jeowaba ẽbẽrarãita akʉza naʉ̃ drʉaita kʼãrẽ oita krĩchabʉra «ewari jõmaʉ̃nẽta»? (Efesios 3:11).

⁶ Daizezeba kʼãrẽ oita krĩchabʉ audre bia ũrĩnaita akʉdaya kʼãrẽne awuarapanʉta naʉ̃ra bedʼeata, kapũrĩa bedʼeade plan akʉza propósito. Naʉ̃ra bedʼeara abarikabʉ kĩrãkʼapanʉ, mamina ãyi aba abakaʉba nekʼãrẽ awuruta jarakĩrãbʉ. Bari  jaraita, planba jarakĩrãbʉ bʉa nekʼãrẽ oita krĩchabʉ ʉ̃rʉ, mamina bʉa maʉ̃ oitabʉde bedʼea zromata ũdura, idubʉebʉ maʉ̃ra. Mamina propósitobara jarakĩrãbʉ bʉa nekʼãrẽ oita krĩchabʉta mamina bedʼea zroma ũdubʉmina idubʉ ẽ, awuarabʉrʉ jʉrʉbʉ nekʼãrẽ awurudeba aripe oita bʉa krĩchabadata. Jeowaba naʉ̃ta obʉ, iyara kʼawuabʉ kʼãrẽta oita krĩchabʉra, mamina iya maʉ̃ oitabʉde bedʼea zromata ũdura idubʉ ẽ, awuarabʉrʉ jʉrʉbʉ nekʼãrẽ awurudeba aripe berabaribita iya okĩrãbʉta. Jeowaba iyi bedʼeadeba dayirã wika wikaʉde biʼia jara ũrĩbibʉ nekʼãrẽ iya ewari jõmaʉ̃nẽ oita krĩchabadata (Efes. 3:11; Prov. 16:4). Jeowaba nekʼãrẽ oita krĩchabʉ aripe berabaribʉrʉra ewari jõmaʉ̃nẽ mawũãbayi. Jeowabara, ¿kʼãrẽta oita krĩchabʉ akʉza iyara kʼãrẽta ozebʉrʉ maʉ̃ aripe berabaribita?

7. Nããbema ẽbẽrarãba iyi bedʼea ũrĩ ẽ basi baera, ¿kʼãrẽta osi Jeowabara iya oita krĩchabʉ aripe berabaribita? (Mateo 25:34).

⁷ Jeowaba nããbema ẽbẽrarã jara ũrĩbisi ãya kʼãrẽta omarẽã kãgabʉta, iya jarasi: «Todamarẽã naʉ̃ drʉa jõma ẽbẽrarãba birayeda akʉza trajamarẽã, maʉ̃ daucha akʉdamarẽã nedʉwʉrʉ zakera doedabemata, ʉ̃tʉ ewarade wãbaribʉta akʉza udabema nedʉwʉrʉrata, jõma naʉ̃ drʉadebʉta» (Gén. 1:28). Adán Evaʉ̃meba ũrĩ ẽ basi baera, yi kayiruara naʉ̃ drʉaeda zesi, mamina maʉ̃ba taʉbi ẽ basi Jeowaba oita krĩchabadara. Iya nekʼãrẽ awuruta osi mawũã aripe berabarimarẽã, iya oita krĩchabʉta. Dããrabadeba krĩchasi nokʼo aba ʉ̃tʉ bʉeita, mawũã aripe berabaribita iya ẽbẽrarãita akʉza naʉ̃ drʉaita oita krĩchabadata (akʉra Mateo 25:34). Jeowaba iya krĩchada ewaride zokʼa bʉesi iyi warra Jesuta ẽbẽrarã jaradiamarẽã Jeowa Nokʼo ʉ̃rʉ akʉza iyi bebʉta diamarẽã, tẽã Jesura Jeowaba jẽda piradrʉbisi iyi Nokʼota zokʼamarẽã, mamina waididebʉ nekʼãrẽ kʼawuaibarata Jeowaba kʼãrẽ oita krĩchabʉ ʉ̃rʉ.

8. (1) ¿Kʼãrẽ ʉ̃rʉ audre bedʼeabʉ Daizeze Bedʼeara? (2) Efesios 1:​8-11 bayeda jarabʉdebara, ¿kʼãrẽta audre oita krĩchabʉ Jeowabara? (Akʉra poto yi nããrabemata).

⁸ Daizeze Bedʼeara audre bedʼeabʉ Jeowa trʉ̃ sãwũã neneẽã bai ʉ̃rʉ, iya oita krĩchabʉ aripe berabaribibʉrʉde Daizeze Nokʼodeba. Jeowaba kʼãrẽ oita krĩchabʉra awuara krĩcha ẽ, iya jarasi maʉ̃ra jõma aripe berabaribita (Is. 46:​10, 11, nota; Heb. 6:​17, 18). Wika wikade naʉ̃ drʉara ẽjũã kĩrãwãreãbayi akʉza yi Adán Evadeba zedarãra kayirua okabayi, adewara ãyira naʉ̃ drʉade ewari jõmaʉ̃nẽ sobiapanañi (Sal. 22:26). Mamina Jeowaba audre kãgabʉ angelerata akʉza ẽbẽrarãta ãbapanamarẽã yi mebẽrã kĩrãkʼa, maʉ̃ ewaridera jõmaʉ̃ba ũrĩnañi Jeowaba jarabʉta iya nejõma zokʼaseabʉ baera (akʉra Efesios 1:​8-11). ¿Bʉmara jipade yibia ẽka Jeowaba nekʼãrẽ obʉra mawũã aripe berabaribita iya oita krĩchabʉta?

9. Dayirãba Daizeze Bedʼea akʉbʉrʉdera, ¿kʼãrẽaba kʼawuapanʉ nekʼãrẽ ʉ̃ra zei ʉ̃rʉ?

⁹ Génesis 3:15de Jeowaba propesiata aba jarasi. b Naʉ̃bara jarabasi iya oita krĩchabada aripe berabarimarẽã, mamina maʉ̃ra aripe berabaribasi poaga bio berabarida tẽãbʉrʉ. Bari jaraita, Jeowaba  Abrahánʼa jarasi iyideba zeibasita Kristota (Gén. 22:​15-18). Adewara naʉ̃ propesiaba jarabʉ yuwẽrãneba zedara jĩrʉ ãbidarrama kaita, maʉ̃ra aripe berabarisi poaga 33de Jesu beasidade (Hech. 3:​13-15). Yuwẽrã nejʉra burura birachita, maʉ̃ra aripe berabariyi Jesuba Diaru jipa jõbibʉrʉde 1.000 poaga berabarida tẽã (Apoc. 20:​7-10). Daizeze Bedʼeabara adewara jara ũrĩbibʉ kʼãrẽta berabarita Diaruba iyiʉ̃me panʉraba Jeowa pʉwʉrʉ aukʼara pẽwãbʉrʉde.

10. (1) ¿Kʼãrẽta berabari ʉ̃ra zeide? (2) ¿Kʼãrẽta oibara maʉ̃neba ẽdrʉita? (Akʉra notata).

¹⁰ Krĩchara Daizeze Bedʼeaba ʉ̃ra zeide kʼãrẽ berabari jarabʉ ʉ̃rʉ. Nããrãra nokʼorabara jaradayi dayirãra «aduʼa bʼaita» (1 Tes. 5:​2, 3). Nokʼoraba maʉ̃ta jarabʉrʉde jʉ̃drʉyi zʉbʉria zromata, maʉ̃ra berabariyi nokʼoraba religionʼra zeri ẽã jõma pẽwãbʉrʉde (Apoc. 17:16). Maʉ̃ jõma aripe berabaribʉrʉde zeyi Jesuta akʉza ũdubiyi iyi zarea mejãcha erbʉta (Mat. 24:30). Maʉ̃ tẽã Jesubara ẽbẽrarãra kʼawua oyi akʉza iyara obeja kĩrãkʼabʉrãra jʉ̃zaba bʉeyi akʉza yi chibo kĩrãkʼabʉrãra jʉ̃zaba bʉeyi (Mat. 25:​31-33, 46). Mamina Diarura piki ba ẽ bayi maʉ̃ berabarinʉmʉnera, iyara oyi nokʼora jõmaʉ̃ta ãba zemarẽã Jeowa pʉwʉrʉ pẽwãita, maʉ̃ra nokʼora ãba zepanʉrãra Daizeze Bedʼeabara trʉ̃gabʉ Gog de Magog (Ezeq. 38:​2, 10, 11). Maʉ̃ mawũã berabarinʉmʉne ʉ̃kʉrʉ ẽbẽrarã ʉ̃ta wãirãra waidide nama egorode panʉrãra, ʉ̃ta wañi Jesuʉ̃me ãba bʼaita akʉza mawũã Diaruʉ̃me panʉrabawara yõita Armagedónʼne c (Mat. 24:31; Apoc. 16:​14, 16). Maʉ̃ jõma berabarida tẽã Jesuba zokʼa jʉ̃drʉyi 1.000 poagabayeda, iyara zokʼayi ʉ̃tʉba nama egorode panʉrata (Apoc. 20:6).

11. ¿Bʉitara sãwũã bʼai ewari jõmaʉ̃nẽ bʼaira? (Akʉra potota).

¹¹ Atia kʼawuadayi ẽjũã kĩrãwãreãnẽ sãwũã panaita. Daizeze Bedʼeaba jarabʉ Jeowabara dayirãra «ewari jõmaʉ̃nẽ  bakĩrãnamarẽã [parãsita]» (Ecl. 3:11). Maʉ̃nera dayirãra ewari jõmaʉ̃nẽ panai baera audre ewari erbayi Jeowa kʼawa bʼaita. Libro Acerquémonos a Jehová, pagina 319ba naʉ̃ta jarabʉ: «Maʉ̃ne dayirã poaga biobayeda zokʼaibidade audre ũdukʼawuadayi Jeowa idi ũdukʼawuapanʉira, mawũãsidu bayi nekʼãrẽ Jeowa ʉ̃rʉ audre kʼawuaibarata [ . . . ]. Dayirã ewari jõmaʉ̃nẽ panaira jipade yibiabayi, mamina Jeowa neũdukʼawua bʼaira audre yibiabayi jipade». Idi ewade dayirãba Daizeze Bedʼea ʉ̃rʉ kʼawuabʉdera, ¿kʼãrẽ ʉ̃rʉ audre kʼawuapanʉ?

12. ¿Kʼãrẽta oibara kʼawuaita Jeowabʉmae sãwũãbʉta? Yizata jara ũrĩbira.

¹² Daizeze Bedʼeaba jara ũrĩbibʉ, Jeowabʉmaera sãwũãbʉta (Is. 33:5). Akʉza ũdubibʉ Jeowa organizasion ʉ̃tʉbʉra sãwũãbʉta (Is. 6:​1-4; Dan. 7:​9, 10; Apoc. 4:​1-6). Bari jaraita, Ezequielba bʉsi Jeowaba iyi ʉrʉmabʉde nekʼãrẽ ũdubida ʉ̃rʉ, dayirãbara idi ewade maʉ̃ ʉ̃rʉ leseapanʉ (Ezeq. 1:1).

13. ¿Sãwũã biga diapanʉ Jesuba ʉ̃tʉ dayirãbari nekʼãrẽ obʉ kʼarea? (Hebreos 4:​14-16).

¹³ Krĩchara dayirã nokʼo Jesu ʉ̃rʉ, iyira ʉ̃tʉbʉ akʉza sumo saserdote. Jesudeba dayirãra Jeowa kʼawa baseapanʉ yiwidʼibʉde akʉza Jeowaba kʼarebaseabʉ dayirãra dayirãba nesidabʉde (akʉra Hebreos 4:​14-16). Ewariza krĩchadaibara Jeowaba Jesuʉ̃meba dayirã kʼarea, nekʼãrẽ opanʉ ʉ̃rʉ. Ãya dayirã mejãcha kãga ũdubipanʉ baera nekʼãrẽ jõma okĩrã oibara (2 Cor. 5:​14, 15).

14. ¿Kʼãrẽta odaibara biga diabʉ ũdubita Jeowaʼa akʉza Jesuʼa ãya dayirãbari oda kʼarea? (Akʉra potorata).

¹⁴ Dayirãbara Jeowaʼa akʉza Jesuʼa biga  diabʉta ũdubipanʉ ẽbẽrarã jaradiapanʉne akʉza kʼarebapanʉne ãyisida Jeowa ʉ̃rʉ Kʼawuabipanʉrã bamarẽã (Mat. 28:​19, 20). Pabloba maʉ̃ta osi Jeowaʼa akʉza Jesuʼa biga diaita, iya kʼawuabasi Jeowaba naʉ̃ta kãgabʉta: «Jõmaʉ̃ba kʼawuadamarẽã wãrĩnuta akʉza ẽbẽra jõmaʉ̃ta ẽdrʉmarẽã» (1 Tim. 2:​3, 4). Pablobara mejãcha zarea osi ẽbẽrarã iya jaradiaseabʉa jaradiaita mawũã naʉ̃rasida ẽdrʉdamarẽã (1 Cor. 9:​22, 23).

15. Salmo 1:2​ba jarabʉdebara, ¿kʼãrẽba sobiabi dayirãra?

¹⁵ Salmistaba jarasi ẽbẽra abaʉba Daizeze Bedʼeata nrʉemaza akʉbʉbʉrʉ akʉza maʉ̃ ʉ̃rʉ krĩchabʉbʉrʉ, naʉ̃ra mejãcha sobiabʉta (Sal. 1:​1-3). Ẽbẽra abaʉba jarasi: «Ẽbẽra abaʉba Jeowa yi jaradiabira, iyara mejãcha kãgaibara Daizeze Bedʼeata, maʉ̃itara leibara, estudiaibara akʉza krĩchaibara maʉ̃ ʉ̃rʉ. Adewara ẽbẽra abaʉba Daizeze Bedʼeata ewari aba akʉ ẽ basibʉrʉ maʉ̃ ẽbẽrarã maʉ̃ ewaride kʼãrẽ bia oẽ basi kĩrãkʼabʉ» (Studies in the Psalms, Joseph Rotherham). Dayirãbara Daizeze Bedʼeara akʉkĩrã akʉyi bia ũrĩpanʉbʉrʉ kʼãrẽta jara ũrĩbikĩrãbʉta akʉza akʉpanʉbʉrʉ maʉ̃ testoba jarabʉra kʼãrẽne abarikabʉta wuabemaraʉ̃me. Jipade yibia kʼawuaita Daizeze Bedʼeaba kʼãrẽ jarabʉta.

16. ¿Kʼãrẽta kʼawuadayi wuarebema artikulode?

¹⁶ Daizeze Bedʼeade jara ũrĩbibʉra dayirãbara biʼia ũrĩseabʉ. Yi wuarebema artikulode kʼawuadayi nekʼãrẽ Jeowaba dayirã jaradiabʉ ʉ̃rʉ, templo espiritual ʉ̃rʉ. Pabloba maʉ̃ ʉ̃rʉ bʉsi Hebreos kartade. Sobiabara bʉa maʉ̃ ʉ̃rʉ kʼawuabʉrʉde.