1-2. Biblö ˗wopösü waa˗ draanˈˈ ˗kɔ ˗së ˗mɛɛn ˗nu ˈwo ˈdhö? ˗A ˈgü ˈˈpʋ.

 ˗KWA kwa ˗zota kö kwa˗ ˈˈpiʋ̈ ˈkwa ˈkɔ do ˈdhɔ. ˈˈSanni ˈkɔ ˈö ˈˈdhʋ̈ ˈkwa˗ ˈdhɔ, ˗mën ˈö ˈkwa ˗dho kwa ˗zota ˗a ˈgü ˗blɛɛsü? ˗A Foto dosɛnŋ ˈnën ˈkwa dho ˗gban ˗a ˗ta ˗ee? ˗Abin. ˈYaa za ˈgü ꞊dhɛ kwa ˗dho ˗a pö ˈkwa ˗kpan ˗a ˈkɔ ꞊dede ˗bha, ˈkwa ˈˈglu ˗a ˗züzü, ˈkwa ˈgüdhɛ ꞊gban ˈˈpɛpɛ ˗ga ˗së ˈka. ˗A ˗de ꞊ʒiaan pë ˗nu ˈwo˗ sü ˈwo˗ dɔ ˗a ˈka, ˈkwa ˗an dɔ. ˗Yö ˗dho kë ˗së kö ˈkɔ ˈö ˈkwa˗ ˈˈpiʋ̈ ˈkwa˗ ˈdhɔ ˈˈdhʋ̈, ˈkwa˗ ˗dhɛ ꞊gban ˈˈpɛpɛ dɔ ˗së ˈka.

² Pë ꞊dede ˈö ˈkwa dho ˗a kë kö kwa Biblö ˗wo pö ˗ni ˈgü ɛɛnˈˈ kö ˈkwa˗ draanˈˈ ˗ni ˈgü, ˈyö bhë. Biblö ˈgüpʋ̈mɛn do ˗ya ˗pö ꞊dhɛ ˗wo ˈö Biblö ˈgü bhë, «˗yö ꞊dhɛ ˈkɔ ˈkpii˗ do ˈö ꞊gblɛɛn, ˈö ˗gɛngbandhɛ ˗yö dho ˈˈsɛɛdhö ꞊gblɛɛn» ˗a ˈdhö. ˈDhɛ ˈˈdhʋ̈ pë ˈˈpɛpɛ ˈö Biblö ˈgü bhë, kwa ˗dho ˗a dɔ ˗së ˈka ˗kɔ ˗kë ꞊dhɛ? ˈKwa Biblö ˗wo pö ˗bia ˈka, «pë ˈnë ˗nu ˈwo ˗gban [˗Zlan] ˗wʋ ˗bha ˈö ˈwo ˈmɛ ꞊wa ˗da ˗a ˗bha zian ˗ta ˗dee ˈgü, ˗a ˗nu ꞊draan˗ ˗bha» bhë, ˈnën ˈkwa ˗dho ˗an dɔ. (Ebl. 5:12) ꞊Dhɛ ˗kɔ do ˈö ˈkwa ˈkɔɔdhɛ ˗ga ˗a ˈka ˗së ˈka bhë, kwa dua ˗mü ˈpö kö ˈkwa Biblö ˗wo pö, ˈkwa˗ ˈˈpiʋ̈ ˈpɔn kö ˈkwa˗ ˈgüman ˗së ˈka. Biblö draanˈˈ ˗kɔ ˗së do ˈnen ˗tɔ ˗kɔ ˈö˗ ˈˈpian ˗nu ˗wo ˗gban ˗a ˈka wo ˈko ˗bha ˗a dɔ ˗sü. Gagade ˗mɛɛn ˗nu ˈkwa ˈdhaŋ˗ bho ˗an ˈˈdhiʋ̈ waa pë ˈö ˗kë ˈkwa ˈdhaŋ˗ bho ˗an ˈˈdhiʋ̈, ˗kwa pë kë kö ˈkwa ˗an ˈgüman.

3. ˗Mën ˈö bɔmɛn Pɔdhö ˗ya pö ö ꞊dhegblü ˗nu ˗dhɛ ˗wa kë? ˈYö ˈmën ˗kë? (Efɛzö 3:​14-19)

³ ˈKwa˗ pö ˈkwa ˗Zlan ˈˈDhiwo ˈgüman ˗së ˈka, kwa dua ˗mü kö ˈkwa gagade ˗nu ˈˈpiʋ̈ ˈpɔn. Bɔmɛn Pɔdhö ˗yö ö ꞊dhegblü ˗nu ꞊faanmën kö ˗wo ˗Zlan ˈˈDhiwo draanˈˈ ˗kplawo, kë ˈˈdhʋ̈ kö ˗wo gagade ‹ˈduaan ˗bha ˗kë ꞊gblɛɛn ˗sü, ˗a ˗bha ˗kë ˈˈgbɛa ˗sü, ˗a ˗dɔ ˗gɛan ˗sü ˗bha ˗kë ꞊gblɛɛn ˗kɔ ˗nu› ˈgüman ˗së ˈka. ꞊Waa˗ kë ˈˈdhʋ̈, ‹Klisi ˗wɔn ˗dho ˈto ˗an zuëˈˈ ˈgü ˗kpɛawo› ˈö ˗an ˗bha ˗zoyödhe ˗gɛn ˗yö ˗gban. (Efɛzö 3:​14-19 ˗wo pö.) Kwa dua  ˗mü ˈkwa˗ kë ˈˈdhʋ̈ ˈpö. ˗Kɔ ˈö ˈkwa dho ˗Zlan ˈˈDhiwo ˈˈpiʋ̈ ˈpɔn ˗a ˈka kö ˈkwa˗ ˈgüman ˗së, ˗kwaa ˗ga.

4. ˗Mën ˈö ˈkwa ꞊mɔɔn˗ ˗bha ˈkwa˗ kë kö ˈkwa ꞊ɲɔɔn Zoova ˈˈsuëë? ˗A ˈwɔnzuan ˗nu ˗zɔn.

⁴ Kletiɛn ˗nu, kwa ˗bha Biblö draansü ˈˈdhiʋ̈ ˈyaa ˈto dosɛnŋ pë ˈkwa˗ ˗draan ˗a ˗zudɔdhɛ ˈgü ˗a ˗ta. ˗Zuu ˈˈslʋ̈ʋ̈slʋ̈ ˗bha ˗takundhe ˈsaa˗ ˈgü, ˈkwa˗ ˈˈpiʋ̈ kö ˈkwa «[˗Zlan] ˗zʋ ˈˈpiʋ̈ ˗wɔn ꞊gban dɔ ˈkpakpadhö.» (1 Ko. 2:​9, 10) Kwa ꞊mɔɔn˗ ˗bha ˈkwa˗ zudɔ Biblö ꞊draan ˈö ˗de ˈˈpiʋ̈ ˗sü ˈö dho kwa ˈˈɲɔɔn Zoova ˗bha,˗a ˗ta. ˗A ˈwɔnzuan do ˈnën ˗tɔ ˗kɔ ˈö Zoova ˗yö ˗dhɔ ˗zɔn ˗a ˈka ö ˗dhɔkëmɛn ˗nu ˈwo ˗kun ꞊kwɛŋzü ˗an ˗dhɛ, ˈö˗ ˗zɔn ˈzü ꞊dhɛ kwa ˗dhɔ ˗ya ˗kë ˈpö bhë kwa ꞊mɔɔn˗ ˗bha ˈkwa˗ ˗draan. ˗Ya ˈgo mü ˗kɔ ˈö ö ˗dhɔkë ˗kɔ ˗zɔn ˗a ˈka Izraɛdhömɛn ˗dhɛ ꞊kwɛŋzü waa ˗kɔ ˈö˗ˈka kletiɛn ˗nu ˗bha ˈˈtʋ̈ŋ ˈgü ꞊dɛɛ kwa ꞊mɔɔn˗ ˗bha ˈkwa ˗an ꞊draan. Ɛɛnˈˈ ˗a ˈbha ˗ya kë, kwa ꞊mɔɔn˗ ˗bha kö ˈwɔn ˗nu ˈö Biblö ˗yö ˗an to ˈˈdhiʋ̈ ˈö ˗an ꞊blɛɛ ˈwo ˗gban Yesu ˗bha ˗tosɛta waa˗ ˗zlanwopösü ˈö ˈˈkpɔnŋ ꞊taa ˗ta yö ˗an ˗bha bhë, ˗kɔ ˈwo yö ˗a ˈka ˈko ˈˈdhiʋ̈ ˈkwa ˗an ˈˈpiʋ̈ ˈpɔn.

5. ˈWɔn ˗gɔ ˈbha ˗yö ˗dhö ˈö ˈka˗ ˈˈpiʋ̈ kö ˈka˗ ˈˈpiʋ̈ ˈpɔn ˗së ˈka, ka ˗bha Biblö ˗draan ka ˗de ˈˈpiʋ̈ ˗sü ˈgü ˗ee?

⁵ Mɛn ˗nu ˈö Biblö draansü ˗dhɔ ˗yö ˗an ˗kë, ˗wo ˗an dhɛɛˈˈ ˗kpɔ gagade ˈbha ˗mɛɛn ˗nu ˈwo˗ ˈˈpiʋ̈ kö ˈwo ˗an dɔ ˗së ˈka ˗Zlan ˈˈDhiwo ˈgü. ˗A ˗yɔ ˗nu ˈwo ˗an bɔ ˗wo ˈkɔnën ˈö˗ ˗gɔ ˗kë «  Sujets pour les projets d’études personnelles » ˈka bhë, ˗a ˈgü. Kwa ꞊mɔɔn˗ ˗bha ˈzü ˈkwa ˗kpan ˗a ꞊va ˈbha ˗bha Index des publications des Témoins de Jéhovah ɛɛnˈˈ Guide de recherche pour les Témoins de Jéhovah gü. Kwa ˈwɔn ˗gɔ ˗nu ˈwo bhë ˗an draanˈˈ, kwa ˗dho zuʋ̈gblüdhi ꞊dede ꞊slɔɔ. ˈKwa Biblö ˈˈpiʋ̈ ˈpɔn ˗së ˈka, ˗yö ˗dho kwa ˗bha ˗zoyödhe ˗gɛn ˗gban ˈö ˈkwa «˗Zlan ˗dɔ.» (Prov. 2:​4, 5) Gagade ˈwɔngbɩɩsü ˗nu ˈwo Biblö ˈgü, ˗kwaa ˈbha ˗nu ˗ga ˗së ˈka.

6. (1) Pë ˈö mɛn ˗ya ˗kë ˗sü ˗wɔn ˗ya ö ˗zo ˈˈpiʋ̈ waa˗ ˗mɛn dhɔɔbhaawɔn ˈwaa do ˗kɔ ˗kë ꞊dhɛ? (2) ˈMën ˗kë ˈö Biblö ˗ya pö Zoova dhɔɔbhaawɔn ˈö ˗gban mɛnbhɩɩdhe waa ˈˈsɛ ˗an ˗bha bhë, ˗yö ˗dho ˈto «˗töëpö» ˈka? (Efɛzö 3:​11, NWT)

⁶ Pë ˈö Biblö ˗ya pö ˈö ˗gban ˗Zlan ˗dhɔbhaawɔn ˗bha, ˗kwaa ˗ga. Pë ˈö mɛn  ˗ya ˗kë ˗sü ˗wɔn ˗ya ö ˗zo ˈˈpiʋ̈ waa˗ ˗mɛn dhɔɔbhaawɔn ˈwaa do. Pë ˈö mɛn ˗ya kë ˗sü ya ö ˗zo ˈˈpiʋ̈ bhë kwa ꞊mɔɔn˗ ˗bha ˈkwa˗ ˗zɔn ʒianga ˈö ˈkwa dho ˗a ˈsü kö ˈkwa ˈdho ˗dhɛ ˈbha ˈgü, ˗a ˈka. ˈˈKɛɛ kö pë ˈbha ˗yö yö ʒianga ˈö ˈˈdhʋ̈ ˗a ˗ta, ˈkwaa ˗mɔn ˗a ˗bha kö ˈkwa ʒiö. Mɛn dhɔɔbhaawɔn ˗zë kwa ꞊mɔɔn˗ ˗bha ˈkwa˗ ˗zɔn ˗dhɛ ˈö ˈkwa dho ˗a ˗bha ˗a ˈka. ˗A ˗dhɛ ˈö ˈˈdhʋ̈ kwa˗ ˗dɔ ˗së, ˈö ʒianga ˗nu ˈkwa dho bɔ ˗an ˈka ˗wo ꞊va. ˗Ya kë ꞊dhɛ ʒianga ˈbha ˈkwa˗ sü ˗ya ˗ta, kwa ꞊mɔɔn˗ ˗bha ˈkwa˗ ˈˈwɛɛ ˈsü. ˈWɔn ˗së ˈö mü ˈyö ˗tɔ ‹pë ˈö Zoova ˗ya ˗yö ˈko ˈdhiö ˗kë ö ꞊zuöˈ ˈpiö ꞊toëpö ˈka› bhë ˗ya ˗zɔn Biblö ˈgü ˈˈdhiʋ̈ ˈˈdhiʋ̈. (Efɛ. 3:​11, NTBL) Zoova ꞊mɔɔn˗ ˗bha ˈö bɔ pë ꞊va ˗ta ˈö ö dhɔɔbhaawɔn ˗kë. ˈWɔn ˗nu ˗wo ˗dhi ˗a ˗gɔ ˗kplawo, ˈyö sü ꞊dhɛ «˗yö pë ˈˈpɛpɛ ˗kë kö ö dhɔɔbhaawɔn ˗yö kë.» (Prov. 16:4) Pë ˗nu ˈö Zoova ˗yö ˗an ˗kë ˗wo ˗dho ꞊gwëë ˗töëpö ˈka. ˈMën ˗tɔ Zoova dhɔɔbhaawɔn? ˈYö ˗mën ˗nu ˈö ˗an ˗kë kö ö dhɔɔbhaawɔn ˗nu ˗wo yöködhiʋ̈?

7. ˈDhɛ mɛnbhɩɩdhe ˗blɛɛsü ˗nu ˗wo ˗gban ˗Zlan ˗gɔ, ˈmën Zoova ˗ya ˗kë kö ˗a dhɔɔbhaawɔn ˗yö kë? (Matiö 25:34)

⁷ ˗Zlan ˗yö ö dhɔɔbhaawɔn ˗zɔn mɛnbhɩɩdhe ˗blɛɛsü ˗nu ˗dhɛ. ˗An dua ˗mü kö ‹ˈkpɔ ˗sü ˗yö dhi ˗an ˗gɔ ˗wo pa, ˗wo ˈˈkpʋngtaadhɛ bho, ˗wa ˗yë kë, kö ˗wo wo ˗zokë pëbhɩɩ˗ ˈˈpɛpɛ ˈˈpiʋ̈› ˈˈkpɔnŋ ꞊taa. (ˈWun. 1:28) ˈˈKɛɛ ˈdhɛ Adan waa Ɛvö ˈwo ˗gban ˗Zlan ˗gɔ, ˈwo nu ˈwɔn yaa ˗kë ˗sü ˈka mɛnbhɩɩdhe ˗nu ˗ta bhë ˗yö ˈti Zoova ˗kɔ ˈˈkan ö dhɔɔbhaawɔn kë ˗sü ˈka. Pë ˈö˗ ˗kë ꞊ʒiaan ˈyö ˗tɔ ˗yö ˗bɔ ˈˈslö ˈˈwɛɛ ˈbha ˗ta kö ˈö ö dhɔɔbhaawɔn kë. ˗Yö ˗to mü ˈö˗ pö ö ˗dho ö ˗bha ˗Gblüdëdhɛ ˗ya dhaŋ˗ ˈgü, kö ˗yö ö dhɔɔbhaawɔn ˈö ˗gban mɛnbhɩɩdhe ˗nu waa ˈˈsɛ ˗an ˗bha bhë, ˗a kë. (Matiö 25:34 ˗wö pö.) ˈDhɛ ˈˈtʋ̈ŋ ˈö Zoova ˗ya ˗ya ˈö ˗wo, ˗dhɔkaadhe ˗ya ˗blü ˈö ö Gbö ˗blɛɛsü bɔ ˈˈsɛ ˗ta kö ˗yö mɛn ˗nu ꞊klaŋkë ö ˗bha ˗Gblüdëdhɛ ˗wɔn ˈka. ˗Ya ˈgo mü, kö ˗yö ö ˗de ˗nu kwa ˗gɔtadhɔpë ˈka kë ˈˈdhʋ̈ kö kwa dha ˈwɔn yaa waa ga ˗an ˗gɔ. Zoova ˗yö Yesu ˗bho ga ˈgü, ˈö˗ ˗ya ö ˗bha ˗Gblüdëdhɛ ˗gɔ ˈˈdhiʋ̈ dhaŋ˗ ˈgü. ˈˈKɛɛ pë ꞊va ˈbha ˗nu ˗wo ˗dhö ˈzü ˈö ˈkwa ꞊mɔɔn˗ ˗bha ˈkwa ˗an draanˈˈ ˗wo ˗gban ˗Zlan dhɔɔbhaawɔn ˗bha.

8. (1) ˈWɔn ˗gɔ ˈkpii˗ ˗mɛɛn ˈö Biblö ˈgü? (2) ˈKwa ˗dhɛ ˗ga Efɛzö 1:​8-11 ˈgü, ˗mën ˈbha ˈö Zoova dho ˗a kë? (Pe ˈˈbin ˈö˗ kwi ˗ta bhë ˗a ˗ga.)

⁸ ˈWɔn ˗gɔ ˈkpii˗ ˈö Biblö ˈgü ˈnën ˗tɔ Zoova ˗bha ˗Gblüdëdhɛ ˈö Yesu ˈdho˗ ˗gɔ ˈˈdhiʋ̈ ˗yö ˗dho ˗a ˈtɔ kë ˈˈslʋ̈ʋ̈slʋ̈, ˈö˗ dhɔɔbhaawɔn ˗kë ˈˈkpɔnŋ ꞊taa. Zoova dhɔɔbhaawɔn ˈyaa ꞊mɔɔn˗ ˗bha kö ˗yö ˈgo ˈˈgblʋʋ. ˗Ya ˗pö ˈwɔn ˈˈpɛpɛ ˗dho kë ꞊dhɛ ˗kɔ ˈö˗ pö˗ ˈka ˗a ˈdhö. (Is. 46:​10, 11; ztw ˗nu; Ebl. 6:​17, 18) ˈˈKpɔnŋtaadhɛ ˗dho kë ꞊bhɔɔ ˈˈsɛ ˈka kö Adan waa Ɛwo ˗an suugünën ˗nu ˈwo kpɛnŋdhö, ˈö ˗wa kë ˈˈslʋ̈ʋ̈slʋ̈ ˗wo «˗tosɛta kë ˗toëpö ˈka» mü. (Ps. 22:26) ˈˈKɛɛ Zoova dhɔɔbhaawɔn ꞊gban ˈyaa ˈnën ˈö bhë. ˗Yö ˗dho ö ˗dhɔkëmɛn ˗nu ˈwo dhaŋ˗ ˈgü waa˗ mɛn ˗nu ˈwo ˈˈsɛ ˗ta yö ˗an ˗kɔ kë ˈwɔn do ˗bha. ˗Ya ˈgo mü, mɛn ˈˈpɛpɛ ˈwo ˈˈsɛ ˗todhʋ̈sü ˈgü, ˗wo ˗dho ˈwɔnman Zoova ˈö ˗kë ˗an ꞊Kɔɔnmɛn ˈka ˗a ˗ta. (Efɛzö 1:​8-11 ˗wo pö.) ˈWɔn ˗së ˗nu ˈö Zoova ˈdhö ˗an kë ˗ni ˈgü kö ö dhɔɔbhaawɔn ˗nu ˗wo ˗yökodhiʋ̈ bhë, ˗a ˈwɔn ˈyaa kwa ˈkun ˗ee?

9. Kwa Biblö ˗wo pö ˗ni ˈgü, ˈwɔn ˗nu ˈwo dho ˗kë ˗dhɛkpaɔ dhiʋ̈ˈˈ ˈgü ˗a ˗mɛɛn ˗nu ˈkwa ꞊mɔɔn˗ ˗bha ˈkwa kwa ˗zota ˗an ˈgü?

⁹ ˈWɔn ˈö Zoova ˗ya to ˈˈdhiʋ̈ ˈö˗ ˗blɛɛ Edɛnö ˈˈdhüdhɛɛdhö ˈö ˈWunzüdɔdhɛ 3:15 ˈgü bhë, ˗kwaa ˗ga. b ˗Yö ˗wɩ ö dhɔɔbhaawɔn ˈö dho yökodhiʋ̈ ꞊taabha kö ˗kwɛ ˈˈgblü ꞊va ˗ya ʒiö ˗a ˈka. ˗A ˈwɔnzuan ˈnën ˗tɔ Zoova ˗ya ˗pö Ablaamö ˗dhɛ ꞊dhɛ ˗a suugünën do ˗dho kë  Klito ˈka. (ˈWun. 22:​15-18) ꞊Taabha ˗kwɛ 33 K.Y., ˗wo Yesu ˗kun ö ˗gɛn ˗bha ꞊dhɛ ˗kɔ ˈö Zoova ˗ya pö˗ ˈka, ˗a ˈdhö. (Këw. 3:​13-15) ˈWɔn ˗nu ˈwo ˈˈdhʋ̈ ˗a ˗totaabhasü ˈö dho yökodhiʋ̈ ˗kwɛ 1.000 ˈˈpiʋ̈ ˗dhɛkpaɔdhiʋ̈ ˈgü bhë, ˗yö ˗dho kë Sɔtraan ˗gɔ ˈwü ˗sü ˈka. (˗Dhɛ. 20:​7-10) ˈWɔn ˈö ˗gban ˈyɔɔdhɛ ˈö Sɔtraan ˗bha ˈˈkpɔŋtaadhɛ waa Zoova ˗bha ˗kɔlokota ˗an ꞊zinŋgü ˗a ˗bha bhë, Biblö ˗yö ˗kɔ ˈö˗ ˈˈdhiʋ̈ dho ˈto ˗a ˈka ˗a ꞊va˗wɔn ˗blɛɛ.

10. (1) ˈWɔn ˗mɛɛn ˗nu ˈwo ˗dho kë ˈö˗ yi ˈyaa mü ꞊gblɛɛn ˈzü? (2) Kwa ˗dho kwa ˗de baaˈˈ ˗an ˗bha ˗kɔ ˗kë ꞊dhɛ? (Kpɔɔˈˈ ˗zoto ˗a ˈˈpiʋ̈ ˗wɔn ˗bha.)

¹⁰ ˈWɔn ˈˈmlünmlünsü ˗nu ˈwo dho kë ˈö Biblö ˗ya to ˈˈdhiʋ̈ ˈö˗ pö, ˗kwa kwa ˗zota ˗an ˈgü. ˗A blɛɛsü ˈnën ˗tɔ ˈˈsɛgɔ ˗nu ˗dho ˗a pö «ˈaa ˈˈsɛ ꞊ya ˈwaanu, ˈkwa ˗ya kwa ˗dɩ ˈflëë˗ ˈgü.» (1 Tes. 5:​2, 3) ˈˈTʋ̈ŋ ꞊dede ˈö ˈˈdhʋ̈ ˗a ˈka, ˈˈklʋʋbhɔdhe ˈkpii˗ ˗dho «ˈˈkan˗ ˗nu ˈgü,» ˈö ˈwo nu ꞊sua ˗zlanwo ˗nu ˗gɔ. (˗Dhɛ. 17:16) ˗Ya ˈgo mü, ˗wɔnmɛnkunwɔn do ˗dho kë. ˗Wo ˗dho ‹˗kpan Mɛgbö ˗bha kö ˗yö nu sië dha ˈkpong˗ ˗ta dhang˗ ˈgü, ˈgügbɩɩdhɛ waa˗ ˈtɔbhɔdhe ˗ziisü ˈka.› (Mat. 24:30) Yesu ˗dho zadɔ mɛnbhɩɩdhɛ ˗nu ˗bha ˈö ˗an bho ˈko ˈˈpiʋ̈ ꞊dhɛ mɛn ˈˈbhlaa waa ˗bho ˗nu bho ˈko ˈˈpiʋ̈. (Mat. 25:​31-33, 46) ˈˈKɛɛ ˈˈtʋ̈ŋ ˈö ˈˈdhʋ̈ ˗a ˈka, kö Sɔtraan ꞊kun ˗gban Zoova ˗gɔ. ˈDhɛ ˗kë ꞊dhɛ Zoova ˗dhɔkëmɛn ˗nu ˗san ˗yö Sɔtraan ˗kë bhë, ˗yö ˗dho ˈˈsɛgɔ ˗nu ˈö Biblö ˗yö ˗an ˗dhɛ Gɔgö ˈö go Magɔgö ˗an ˗blü kö ˗wo nu kwa ˗gɔ. (Ézéch. 38:​2, 10, 11) ˈˈTʋ̈ŋ ꞊dede ˈö bhë ˗a ˈka, kö ˈˈɲɔn ˗a ꞊troo ˗nu ˈwo ˈˈkpɔnŋ ꞊taa yö ˗wa ˈdho dhaŋ˗ ˈgü Yesü waa ö ˗bha ˈˈsɔdha ˗nu ˈˈpiʋ̈ kö ˗wo nu Aamagedɔn ˗gblü ˈka. ˗Yö ˗dho kë ˈˈklʋʋbhɔdhe ˈkpii˗ ˈˈdhiʋ̈todhɛ ˈka. c (Mat. 24:31; ˗Dhɛ. 16:​14, 16) ꞊Ya kë ˈˈdhʋ̈ ˈyö Yesü ˗bha ˗kwɛ ˈˈgblü do ˗Gblüdëdhɛ ˈö ˈˈsɛ ˗ta yö, ˗a zü ˗yö dɔ.—˗Dhɛ. 20:6.

11. Kwa ˗tosɛta ˈö ˈyaa ɲën ˗a kë ˗sü ˗yö ˗kɔ ˗kë ꞊dhɛ? (Kpɔɔˈˈ ˈzü pë ˈˈbin ˗bha.)

¹¹ ꞊Dɛɛ, ˗kwa kwa ˗zöta ˈwɔn ˗së ˗nu ˈwo kwa ˈˈdhiʋ̈ ˈˈgan ˗ni ˈgü ˗dhɛkpaɔ dhiʋ̈ˈˈ ˈgü, ˗an ˈgü. Biblö ˗ya ˗pö ꞊dhɛ kwa ˗Damɛn «˗yö ˗tosɛta ˗kë ˗toëpö ˈka ˗sü ˗ya [kwa] zuʋ̈ˈˈ ˈgü.» (Eccl. 3:11) ˈWɔn ˈö ˗bhë, ˗kɔ ˈö ˗gban ˗a ˈka kwa ꞊dede waa kwaa Zoova kwa ˗bha ˈˈtɔŋdhɛ ˗an ˗bha,  ˗kwa kwa ˗zota ˗a ˈgü. ˈSëëdhɛ ˗be Approchez-vous de Jéhovah ˈˈpian 319, ˗ya ˗pö: «ˈKwa ˗tosɛta kë ˗kwɛ ˈˈgblü ꞊va ˈˈpiʋ̈, ˗kwɛ ˈˈmliŋɔn ꞊va ˈˈpiʋ̈ ɛɛnˈˈ ˗kwɛ ˈˈmliya ꞊va ˈˈpiʋ̈ kwa ˗dho Zoova dɔ ꞊dedewo ˈö ˗ʒiö ˗a ˈka ꞊dɛɛ ˗ta. ˈˈKɛɛ kwa ˗dho ˗a yö ˗kplawo ꞊dhɛ pë ꞊va ꞊dede ˈbha ˗nu ˗wo ˗dhö ˈwo ˗gban Zoova ˗bha ˈö kwa dua ˈdhö ˗mü kö ˈkwa ˗an dɔ. ˗Kɔ ˈö ˗tosɛta dho ˗kë ˗a ˈka ˗së ꞊dedewo, ˈkwaa ꞊mɔɔn˗ ˗bha ˗ʒiaanwo kö ˈkwa kwa ˗zota ˗a ˈgü ꞊dɛɛ. ˈWɔn ˗së ˈkpii˗ ˈö dho kë mü ˈyö ˗tɔ kwa ˗dho ꞊ɲɔɔn Zoova ˗bha ˗kplawo.» ˈˈSanni ˈˈtʋ̈ŋ ˈö ˈˈdhʋ̈ ˗yö ˗wo kwa Biblö draanˈˈ ˗ni ˈgü, ˗mën ˈbha ˈkwa dho ˗a kë?

12. Kwa ˗dho kwa ˈˈɲan luuˈˈ kö ˈkwa ˗dhɛ ˗ga dhaŋ˗ ˈgü ˗kɔ ˗kë ꞊dhɛ? ˗A ˈwɔnzuan do ˗zɔn.

¹² ˗Zlan ˈˈDhiwo ˗yö ˈpë ˈwo˗ ˗dhɛ ˗kë Zoova ˈˈɲan ˈˈdhiʋ̈ ˗sü ˈö «dhaŋ˗ ˗nu ˈgü ˈˈdhuŋ» ˗a ˈdɛdɛ ˗wɔn ˗blɛɛ kwa ˗dhɛ. (Is. 33:5) Biblö ˗yö ˈwɔn ˈˈmlünmlünsü ˗nu ˗wo ˗gban Zoova waa ö ˗bha ˗kɔlokota ˈö dhaŋ˗ ˈgü ˗an ˗bha, ˗an ˗zɔn. (Is. 6:​1-4; Dan. 7:​9, 10; ˗Dhɛ. 4:​1-6) ˗A ˈwɔnzuan ˈnën ˗tɔ kwa ꞊mɔɔn˗ ˗bha kö pë ˈˈmlünmlünsü ˗nü ˈö Ezekiɛdhö ˗yö ˗kpan ˗an ˗bha «kö dhaŋ˗ ˈˈdhiʋ̈ ˗ya ˈˈpʋ, [˗a] ˈˈɲan ˈgü ˗ya ˗da» bhë, ˈkwa ˗an ˗wo pö.—Ézéch. 1:1.

13. ˈKwa ˗dhɛ ˗ga Eblö 4:​14-16 ˈgü, pë ˗nu ˈö Yesü ˈdhö ˗an ˗kë ˗ni ˈgü dhaŋ˗ ˈgü bhë ˈkwa ˗yö ˗kɔ ˗kë ꞊dhɛ?

¹³ Yesü ˈö kwa ˗bha ˗Gblüdë waa kwa ˗bha ˈˈSaabhomɛn ˈKpii˗ ˈka ˈö ˗ya ˗sü ˈka dhaŋ˗ ˈgü ˈö kwa ˗wëë ˗ya ˗kë bhë, ˗kwa kwa ˗zota pë ˗nu ˈö ˗an nu ˗ni ˈgü kwa ˗dhɛ ˗an ˈgü. Kwa ꞊mɔɔn˗ ˗bha ˈkwa bɔ ˗a ˗ta kö ˈkwa ꞊ɲɔɔn ˗Zlan ˗bha «˗gblüdëdhɛ ˗gbloo ˈö ˗gasitɛ ˗kë kwa ˗dhɛ ˗dhɛ ˈka bha˗ ˈˈsɔɔ» bhɛɛsü ˈka, ˈkwa˗ pö ˗a ˗dhɛ ˗yö kwa ˗wëëzë kö ˗yö kwa «˗ta kun˗ ˈˈtʋ̈ng [˗së] ˈgü.» (Ebl. 4:​14-16 ˗wo ˗pö.) ˗Dhɛkpaɔyi ˈˈpɛpɛ ˈka kwa dua ˗mü kö ˈkwa kwa ˗zota pë ˗nu ˈö Zoova waa Yesü ˈwo ˗ya dhaŋ˗ ˈgü ˈö ꞊waa˗ kë kwa ˗dhɛ ˈsaadhö waa˗ ˗dhɛ ˗nu  ˈwo ˗an kë ˗ni ˈgü, ˗an ˈgü. ˗Dhɔ ˈwo˗ ˗zɔn kwa ˗dhɛ bhë ˗a dua ˗mü kö ˗yö ˈpa kwa zuʋ̈ˈˈ ˈka ꞊dedewo, kö ˗yö kwa ˗blü ˈkwa Zoova ˗dhɔkë kwa ꞊faan ˈka.—2 Ko. 5:​14, 15.

14. Zoova waa Yesu ˗an ˈˈnuɛ bho ˗kɔ ˗së ꞊dede ˈnën ˗tɔ ˗mën? (Kpɔɔˈˈ ˈzü pë ˈˈbin ˗nu ˗bha.)

¹⁴ Zoova waa ö Gbö ˗an ˈˈnuɛ bho ˗kɔ ˗së ꞊dede ˈnën ˗tɔ mɛn ˈˈwɛɛ ˗nu ˗takun ˗sü kö ˗wo kë Zoova ˗bha ꞊Gbɛkiö ˗nu waa Yesü ˗bha gwëëˈˈ ˗nu ˈka. (Mat. 28:​19, 20) Pë ˈö bɔmɛn Pɔdhö ˗ya ˗kë kö ˈö ˗Zlan waa Klito ˗an ˈˈnuɛ bho, ˈyö bhë. ˗Ya ˈwɔn ˗dɔ ꞊dhɛ Zoova ˗ya ˈˈpiʋ̈ kö «mɛ ˈˈpɛpɛ ꞊gban ˗wo ˈdhang ꞊në˗ bho tɛanwɔn ˈˈdhiʋ̈ kö ˗wo dha.» (1 Tim. 2:​3, 4) ˗Yö ˗zlanwopö ö ꞊faan ꞊dede ˈka kö ‹ö ˗kɔ ˗yö ˗mɔɔ mɛ ˈbha ˗nu dha ˗sü ˗bha.›—1 Ko. 9:​22, 23.

15. ˈKwa ˗dhɛ ˗ga Psaume 1:2 ˈgü, ˗mën ˈö dho kwa zuʋ̈ˈˈ ˈˈgblü dhi?

¹⁵ Psaume ˗blɛɛsü ˗bɛnzëmɛn ˗ya ˗pö ꞊dhɛ mɛn ˈö ˈwɔn ˗nu ˗dhi ˗a ˗gɔ ˈnën ˗tɔ mɛn ˈö˗ ‹zuʋ̈gblüdhipë ˗yö ˗kë Zoova ˗bha ˈtɔŋ˗ ˗nu› ˈka. ˗Ya ˈgo mü, ˗a ˗mɛn ˗yö ‹ö ˗zota ˗an ˈgü ɲënŋ˗ ˈgü waa gbeŋ.› (Ps. 1:​1-3; ztw.) Biblö ˗dhiëëtamɛn do ˗ya ˗pö Biblö ˈˈɲan ˈö bhë ˗a ˗bha ꞊dhɛ mɛn «ˈö˗ ˈˈpiʋ̈ kö ˗Zlan ˗yö ˈˈdhiʋ̈ ˈsü ö ˈka ꞊dedewo, ˗a dua ˗mü kö ˗yö kpɔɔˈˈ Biblö ˈgü, ˗ya draanˈˈ, ˗yö ˈˈtʋ̈ŋ ꞊va ˈsü kö ˗yö ö ˗zota ˗a ˈgü.» ˗Ya ˗pö ˈzü: «Mɛn ˈö ˗dhɛkpaɔyi do ˗kë ˈö ˈyii Biblö ˗wo pö, kö ˗a ˗bha ˗dhɛkpaɔyi ˈö bhë ꞊yaa˗ shiʋ̈ˈˈ.» ˈKwa˗ pö Biblö draansü ˗yö kë kwa ˗dhɛ ˗së, kwa dua ˗mü kö ˈkwa kwa ˈˈtʋ̈ŋ kë ˈwɔn ˈsɛɛn˗ ˗nu ˈwo˗ ˈgü ˗an ˈgü, kö ˗kɔ ˈwo ˗gban ˗a ˈka wo ˈkwëë˗ ˈkwa˗ dɔ. ˈKwa ˗Zlan ˈˈDhiwo ˈˈpiʋ̈ ˈpɔn ˗së ˈka, kwa zuʋ̈ˈˈ ˈˈgblü ˗yö ˗dhi ꞊dedewo.

16. ˗Mën ˈkwa dho ˗a yö ˈwɔn ˗gɔ ˈö dɔ ˗a ˗dhɛ ˈö yö ˗a ˈˈpiʋ̈, ˗a ˈgü?

¹⁶ Gagade ˗sɛŋbɔ ˗nu ˈö Zoova ˗yö kwa ꞊klaŋkë ˗an ˈka ö ˈˈDhiwo ˈgü bhë, ˗an ˈgümansü ˈyaa ˈˈgbɩɩ˗ kwa ˗bha ˈka. ˈWɔn ˗gɔ ˈö dɔ ˗a ˗dhɛ ˈö yö ˗a ˈˈpiʋ̈ ˗a ˈgü, kwa ˗dho gagade ˗wɔngbɩɩsü do ˈö ˗gban ˗zlandhɔkëgükɔ ˈkpii˗ ˗dɛɛ ˗bha ˈö Pɔdhö ˗ya ˗wɔn ꞊blɛɛ ˈsëëdhɛ ˈö˗ bɔ Eblö ˗nu ˗dhɛ ˗a ˈgü bhë, ˗a yö. Kö ˈwɔn ˗gɔ ˈö ˈˈdhʋ̈ ˗a draansü ˗yö kwa zuʋ̈ˈˈ ˈˈgblü dhi bhë, ˈaa ˗yö kë.