1-2. Nemene la aqane troa e me inine la Tusi Hmitrötr? Qejepengöne jë.

 PANE mekune jë laka, epuni a pi itöne la ketre uma. Nemene la hnei epun hna troa kuca qëmeken troa itöne la uma? Tro hi epun a goeëne la foto ne la uma? Waea, tro epuni lai a pane tro troa wange mekötine lai uma, me tro kanoth ej me lö e kuhu hnin, me goeëne la hnënge hnahag. Tro epuni lai a goeëne hnyawa la pengöne la uma. Nge tro fe epuni lai a sipone troa goeëne la plan me atre la aqane xup la uma. Eje hi, tro epuni lai a pane atre hnyawa la pengöne la uma qëmekene troa itön.

² Celë fe hi aqane tro sa e me inine la Tusi Hmitrötr. Hnene la ketre itus hna aceitunëne la maca ne la Tusi Hmitrötr memine “la ketre ibatima atraqatr, nge ka jui la trepen.” Matre tro sa atre tune kaa la hna qaja hnei Tusi Hmitrötr? Maine tro epuni a e nyimenyimën, ke tro hi epuni a öhne la itre ini ka tëtë, kolo “itre pane ini ne la trengewekë i Akötresie.” (Heb. 5:​12) Ngo tune lo uma e kula, loi e tro epuni a pane goeëne hnyawan maine thel ajuin, matre trotrohnine la hna qaja hnei Tusi Hmitrötr. Ame la ketre aqane tro sa ini Tus, ke ene la troa thel la aqane ce tro la itre igötranene la Tusi Hmitrötr. Thele jë troa trotrohnine la itre nyipici hnei epun hna mejiune kow, memine fe la itre kepin matre epun a mejiun kowe la itre ini cili.

3. Nemene la hnei Paulo hna ithuecatre kowe la itre trejin troa kuca, nge pine nemen? (Efeso 3:​14-​19)

³ Maine easa ajan troa trotrohnine asë la hna qaja hnei  Tusi Hmitrötr, hetre nyipici nyine tro sa thel ajuin. Hnei Paulo aposetolo hna ithuecatr kowe la itre trejin troa inine hnyawane la Tusi Hmitrötr matre tro angatr “a trotrohnine hnyawa la eisaisan, me eqean, me edraiën, me ejuine la nyipici.” E cili, tro hë angatr a “cia waan, me fedr kowe la trepen ne la lapaun.” (E jë la Efeso 3:​14-​19.) Celë fe hi nyine tro sa kuca. Tro sa ce wang la aqane tro sa ini Tusi Hmitrötr, me trotrohnine hnyawane la aliene ej.

4. Nemene la nyine tro sa kuca matre troa easenyi Iehova?

⁴ Ame easë itre keresiano, tha easë hmekuje kö a thel troa trotrohnine la itre ini ka tëtë ne la Tusi Hmitrötr. Jëne la uati hmitrötr, easë fe a ajan troa trotrohnine “la itre ewekë ka jui i Akötresie.” (1 Kor. 2:​9, 10) Ame la epuni a ini Tusi cas, nemene jë la ketre mekun ka troa easenyi epun koi Iehova? Maine jë, tro epuni a thel la aqane amamane Iehova la ihnimi Nyidrë kowe la itre hlue i Nyidrëti ekö. Celë hi ka troa anyipicine ka hape, Nyidrëti fe a hnimi epun. Maine pena, tro epun a thel la ka ceitu ngöne la itre hna amekötine kowe la angetre Isaraela ekö göne la hmi Iehova, me aqane hmi easë enehila. Ijije fe hi tro epun a thel la aqane eatrëne Iesu la itre hna perofetane lo nyidrëti e celë fen.

5. Nemene la mekun hnei epun hna pi thele ajuin la epuni a ini Tusi cas?

⁵ Hna hnyingën kowe la itre trejin ka majemine ini Tusi cas, la itre ini hnei angatr hna pi atre hnyawa. Alanyim thei angatr ka qaja la itre ini ka mama ngöne la hna eköhagen, “ Itre Ini Nyine Tro Sa Ithele Hnyawa.” Tro epuni a madrine troa ithel jëne la Index des publications des Témoins de Jéhovah maine jëne la Nyine Thele Mekun Ne La Itretre Anyipici Iehova. Ame la easa sine ajuin la Tusi Hmitrötr, ke kola acatrene la lapaune së me xatua së troa “ate Akötesie” hnyawa. (Ite edomë 2:​4, 5) Tro pena sa ce wang la itre nyipici ka jui ne la Tusi Hmitrötr.

6. (a) Qaja jë la ketre ceitun ka amamane ka hape, Iehova palahi a eatrëne la aja i Nyidrë. (b) Pine nemene matre easa qaja ka hape, ame la aja i Iehova kowe la itre atr me kowe la ihnadro, ke “ka cile hut”? (Efeso 3:​11)

⁶ Tro palahi Iehova a eatrëne la aja i Nyidrë. Pane mekune jë la: Epuni a tro kowe la ketre hunami, ngo hna thupa la gojenyi epun hnene la ketre isinöe ka mala. Nemene la hnei epun hna troa kuca? Tro epuni lai a xom la ketre gojenyi matre troa traqa kowe la götran hnei epuni hna mekun troa tro kow. Ame ngöne la Tusi Hmitrötr, hnei Iehova hna amamane trongëne koi së la “aja ka cile hut i [Nyidrë].” (Efe. 3:​11.) Ame la hnei Iehova hna mekun troa kuca, ke tro kö lai a aejën, “matre troa eatr la aja i nyidrë.” (Ite edomë 16:​4, NWT) Nge ame la thangan, ke ka epine palua. Nemene la aja i Iehova, nge nemene la hnei Nyidrëti hna saze matre tro kö ej a eatr?

7. Thupene la hna ena la wathebo hnei Adramu me Eva, nemene la itre ewekë hnei Iehova hna saze matre troa eatr la aja i Nyidrë? (Mataio 25:34)

⁷ Hnei Iehova hna qaja la aja i Nyidrë kowe la lue pane atr. Öni Nyidrë, “Hnaho pi me mana, nyialiene jë la ihnadro me musinën. Musinëne jë la . . . nöjei öni ka tro hune la ihnadro.” (Gen. 1:​28) Ngazo pe, hnei Adramu me Eva hna ena la wathebo, matre ngazo asë hë la itre matra i nyidro. Ngo tha saze kö la aja i Iehova. Hnei Nyidrëti pe hna thel la ketre aqane troa eatrëne la aja i Nyidrë. Thupene ju hi lai, hnei Nyidrë hna mekun troa acil la ketre Baselaia e hnengödrai ka troa eatrëne la aja i Nyidrë kowe la itre atr me kowe la ihnadro. (E jë la Mataio 25:34.) Ame e thupen, pine laka tru la ihnimi Iehova koi së, matre hnei Nyidrë hna upe la nekö i Nyidrë kowe la fen, matre cainöjëne lai Baselaia cili, me hamëne la mele i nyidrë thatraqane la itre atr ka ngazo. E thupen, hna amele Iesu hmaca me acili nyidrë troa Joxu ne la Baselaia i Akötresie. Ngo hetre xaa ini palakö nyine tro sa atre göne la aja i Iehova.

8. (a) Nemene la tane ka tru ne la Tusi Hmitrötr? (b) Thenge la Efeso 1:​8-​11, nemene la ketre aja i Iehova? (Wange ju la pane iatr.)

⁸ Ame la tane ka tru ne la Tusi Hmitrötr, ke tro Iehova a ahmitrötrëne la ëje i Nyidrë ngöne la Nyidrëti a eatrëne la aja i Nyidrë kowe la ihnadro jëne la Baselaia hna cilën hnei Iesu. Thatreine kö troa saze la aja i Iehova. Ase hë Iehova anyipicine laka, tro kö Nyidrëti a eatrëne ej. (Is. 46:​10, 11; Heb. 6:​17, 18) Ame elany, tro la itre matra i Adramu me Eva ka mele nyipici koi Akötresie, me ka pexej a mele ngöne la paradraiso e celë fen utihë “epine palua.” (Sal. 22:26) Ngo tha eje hmekuje kö lai aja i Akötresie. Nemene la ketre aja i Nyidrë? Nyidrëti fe a ajan troa acasine la itre hlue i Nyidrë e hnengödrai me e celë fen. Ame e cili, tro asë hi la itre ka mel a atrehmekun laka, Nyidrëti hi la Atre Mus, me drengethenge Nyidrë. (E jë la Efeso 1:​8-​11.) Hapeu, tha madrine kö epun la epuni a öhne la aqane eatrëne Iehova la aja i Nyidrë?

9. Thenge la hna qaja hnei Tusi Hmitrötr, nemene la itre ewekë ka troa traqa elany?

⁹ Tro sa ce wang lo hna perofetan hnei Iehova ngöne la hlapa e Edrena, hna qaja ngöne Genese 3:​15. b Kola qaja la itre ewekë ka troa traqa itre thauzane lao macatre thupën, nge ka eatrëne la aja i Iehova.  Troa hetre matra i Aberahama, nge troa traqa la Keriso qaathene la matra i nyidrë. (Gen. 22:​15-​18) Ame lo macatre 33 M.K., hna eatr la tidöca i Iesu, thenge lo hna perofetan. (Itre hu. 3:​13-​15) Nge thenge lo hnaaluene götran ne la hna perofetan, troa waja fica la he i Satana, thupene la 1 000 lao macatre. (Hna ama. 20:​7-​10) Ngo hnei Tusi Hmitrötre mina fe hna qaja la itre ewekë ka troa traqa la kola catrehnine la icilekeu ne la fene i Satana memine la organizasio i Iehova.

10. (a) Nemene la itre ewekë ka troa traqa? (b) Tro sa hnëkë tune kaa kowe la itre ewekë cili? (Wange ju la ithuemacany.)

¹⁰ Pane mekune jë lo itre ewekë ka troa traqa e celë fen, nge hna perofetane hnei Tusi Hmitrötr. Tro la itre nöj a pane sue ka hape, “Tingetinge hë nge pë hë hna mecin!” (1 Thes. 5:​2, 3) Ame e cili, “tro ha aca tro traqa” la akötr atraqatr. Nge tro la itre mus a lep asë la itre hmi ka thoi. (Hna ama. 17:16) E thupen, ma tro sa “öhne la Nekö i Atr a traqa hune la itre iaw ne hnengödrai, cememine la men me lolo atraqatr.” (Mat. 24:30) E cili, tro Iesu a amekötine la itre atr me aisane la itre mamoe me itre nani. (Mat. 25:​31-​33, 46) Tha tro kö Satana a sile lue im. Pine laka, tru la elëhni angeic, tro angeic a ukune la itre nöje hna acasine hna hëne ka hape, Gog atre Magog, troa lepe la itre hlue i Iehova. (Ezek. 38:​2, 10, 11) Ame e thupen, tro la itre hna iëne e celë fen a elë e hnengödrai, matre ce tro me Iesu memine la trongene isi nyidrë kowe la isi Amagedro. Celë hi ka nyipune la akötr atraqatr. c (Mat. 24:31; Hna ama. 16:​14, 16) Tro hë la Keriso a musi kowe la fen koi 1 000 lao macatre.​—Hna ama. 20:6.

11. Nemene la hnei epun hna troa kuca elanyi thupene la 1 000 lao macatre? (Wange ju fe la iatr.)

¹¹ Ame enehila, tro sa ithanatane la itre ewekë ka troa traqa, thupene la 1 000 lao macatre. Öni Tusi Hmitrötr, hnene la Atre Xupi së hna amë “e kuhu hni së la mekune kowe la itre drai ka pë pun.”  (Ate cai. 3:​11, NWT) Pane mekune jë la pengöne la aqane imelekeu së me Iehova. Ame ngöne la itus Approchez-vous de Jéhovah, götrane 318 koi 319 kola qaja la emingömingöne la mele së elany. Kola hape: “Thupene la itre miliar lao macatre, tru catre kö la itre ewekë hne së hna troa atre göi Iehova hun enehila. Ngo tru catre palakö la itre ewekë hne së hna thatre göi Nyidrë. . . . Thatreine kö së qaja la itre ewekë ka mingöming hne së hna troa kuca elanyi ngöne la paradraiso. Ngo ame la ka mingöminge catr, ke tro palahi sa easenyi koi Iehova.” Nemene la itre xaa nyipici qa hnine la Tusi Hmitrötr?

12. Maine tro sa gala draië, nemene la hne së hna troa öhn? Hamëne jë la ketre ceitun.

¹² Tusi Hmitrötr a amamane koi së la aliene la kola hape, troa ce me Iehova “e koho.” (Is. 33:5) Ej a qaja la itre ewekë nyine hain göi Iehova memine la götrane ka tha mama kö ne la organizasio. (Is. 6:​1-4; Dan. 7:​9, 10; Hna ama. 4:​1-6) Tune lo ijine Ezekiela a öhne la kola ‘kaqa la hnengödrai, nge hna öhn la itre hna meköle goeën qaathei Akötresie.’​—Ezek. 1:1.

13. Nemene la ka ketri epun ngöne la hnei Iesu hna kuca koi epun qa hnengödrai? (Heberu 4:​14-​16)

¹³ Pane mekune jë fe la hnei Iesu hna kuca qa hnengödrai. Ase hë acili nyidrë troa Joxu, me Atre Huuj Ka Sisitria ka hetre iutipi. Jëne nyidrë, easa easenyi kowe “la theron ne la ihnimi gufa,” ene la therone i Akötresie, me kapa la utipin me iamele “ngöne la nyipi ijin.” (E jë la Heberu 4:​14-​16.) Nyipiewekë tro sa mekun, e nöjei drai, la hnei Iehova me Iesu hna kuca koi së qa hnengödrai. Tro la ihnimi nyidro koi së a ketr la hni së me upi së troa catre nyihlue i Akötresie.​—2 Kor. 5:​14, 15.

14. Tro sa amamane tune kaa la hni ne ole së koi Iehova me Iesu? (Goeëne ju fe la itre iatr.)

 ¹⁴ Tro sa amamane tune kaa la hni ne ole së koi Akötresie me Iesu? Ame la ketre aqane ke, troa xatuan la itre xan troa Temoë Iehova me atre drei Iesu. (Mat. 28:​19, 20) Celë hi hnei Paulo aposetolo hna kuca. Atre hi angeic laka, ame la aja i Iehova, ke, “tro la nöjei pengön atr a mel, me atrehmekune hnyawa la nyipici.” (1 Tim. 2:​3, 4) Hnei Paulo hna isine troa catre cainöj, me xatuane la ka alanyim “matre amelene la itre xan.”​—1 Kor. 9:​22, 23.

15. Thenge la Salamo 1:​2, nemene la ka troa amadrinë së?

¹⁵ Önine la atre cinyihane la Salamo ka hape, ame la atr ka madrin me ka eatrën la hnei angeic hna kuca, ke ka e “la wathebo i Iehova me lapa mekune la wathebo i nyidëti e lai me jid.” (Sal. 1:​1-3) Hnei Joseph Rotherham, ketre atre ujë Tusi Hmitrötr, hna qaja göne la xötre cili ka hape, “tru catr la aja ne la atre cili kowe la itre eamo i Akötresie, matre angeic a thele itre ej, me inine me lapa mekun.” Öni nyidrëti fe göne la atre ka e Tusi Hmitrötr ka hape, ame koi angeic, “ka luzi la ketre drai e tha hnei angeice kö hna e la Tusi Hmitrötr.” Hetrenyi e hnine la Tusi Hmitrötr la itre ini ka mingöming. E tro sa isine troa atre la itre ini e kuhu hnin, me thel la aqane ce tro itre ej, tro hë së lai a madrin troa inine la Tusi Hmitrötr me ithel!

16. Nemene la hne së hna troa ce wang ngöne la tane mekun e thupen?

¹⁶ Tha ka jole kö troa trotrohnine la itre nyipici hnei Iehova hna amë ngöne la Trengewekë i Nyidrë. Ame ngöne la tane mekun e thupen, tro sa ce wang la ketre nyipici ka jui ne la Tusi Hmitrötr, ene la uma ne hmi ka tru i Iehova hna qejepengöne hnei Paulo ngöne la tusi Heberu. Tro kö epuni a madrin troa atre hnyawa la nyipici cili!