1-2. San na a moo bun fasi faw sa leisi anga sutudeli Beibel?

 KOW taki i wani bai wan osu. Sai be o du fosi i bai en? I be o wani si wan fowtow namo fu a osu da a bun kaba? Nono. I be o wani si fa a osu de tuutuu. I be o waka lontu en. I be o keli ala den kambaa luku. Kande i be o taki anga wan sama di sabi fa a osu meke. Yo teke i ten keli en luku, bika te fu kaba aini yo tan.

² U sa du aseefi sani ya tu te we leisi Beibel. Wan Beibel ondoosukuman taki a bosikopu di de aini a Wowtu fu Gadu de enke ‘wan gaan hei osu di meke bun’. Saw yeepi u fu fusutan ala den sani di sikiifi aini a Wowtu fu Gadu? Efi ye leisi a Beibel gawgaw, a ‘den moo pelensipali sani fu a santa bosikopu fu Gadu’ namo yo fusutan (Heb. 5:12). Leti enke fai be o go aini a osu fu keli ala sani luku, a letiso i mu teke ten ondoosuku a Beibel tu. Wan fasi fai sa du a sani ya, a te ye meke moiti fu si fa den toli aini Beibel e kai anga denseefi. I mu meke moiti fu si san ye biibi anga saide ye biibi wan sani.

3. San apostel Pawlesi be e gi den baala anga sisa taanga-sikin fu du? Saide den be mu du a sani ya? (Efeisesama 3:14-19)

³ Efu u wani fusutan a Wowtu fu Gadu, daw mu sutudeli en finifini. Apostel Pawlesi be e gi den baala anga sisa taanga-sikin fu sutudeli a Wowtu fu Gadu bun, bika a sani ya be o yeepi den fu sabi a baala, a langa, a  hei anga a dipi fu a waaleiti. (Leisi Efeisesama 3:14-19.) Na aseefi sani ya u mu du efu u wani fusutan a Wowtu fu Gadu. Meke u luku faw sa du a sani ya.

4. Saw mu du efu u wani wi anga Yehofa toon bun mati?

⁴ Enke Kelesten wa mu si enke a sai kaba fu fusutan den moo pelensipali leli fu Beibel, ma u mu fusutan ‘den dipi toli fu Gadu’ di a santa yeye e yeepi u fu fusutan (1 Kor. 2:9, 10). I sa seeka sani fu sutudeli son toli anga iseefi, bika a sani ya o yeepi i fi yu anga Yehofa toon bun mati. I sa ondoosuku sani fu si fa a be e soi den sama di be e dini en a fositen taki a lobi den. Bakadati dai luku fa a toli de e soi taki a lobi i tu. Boiti dati, i sa ondoosuku fa Yehofa be wani den Islayelisama dini en anga fa a wani u dini en aini a ten ya. Kande i sa luku fa den polofeititoli di e taki fu Yesesi be kon tuu di a be de a goontapu.

5. Sowtu toli i be sa wani sutudeli moo fini?

⁵ Son baala anga sisa di lobi sutudeli taki fu wantu toli di den wani sabi moo sani fu den. I sa si son wan fu den toli ya aini a faki di den e kai ‘ Sani dii sa sutudeli anga iseefi’. A buku di den e kai Ondrosuku Bijbel moro fini​—Gi Yehovah Kotoigi sa yeepi i fu ondoosuku den toli ya. Te ye teke ten fu sutudeli den toli fu Beibel finifini, a sani ya o taanga i biibi. ‘Yo kon sabi Gadu’ tu (Odo 2:4, 5). Meke u luku wantu dipi toli fu Beibel dii sa sutudeli.

6. (a) Gi wan toli di e soi saide Yehofa e du san a abi a pakisei ala yuu. (b) Saide u sa taki den sani di Yehofa abi a pakisei gi libisama anga a goontapu e tan fu ‘teego’? (Efeisesama 3:11)

⁶ I sa sutudeli den sani di Beibel e taki fu san Gadu abi a pakisei fu du. I sa maiki a sani ya anga wan peesi dii  mu go. Iseefi sa luku sowtu pasi yo teke. Ma efu wan sani de na a pasi di e soi taki ya mu lei go doo, da kande yo teke wan taa pasi. Den sani di Yehofa abi a pakisei fu du, de enke a peesi dii mu go. Aw du den sani di a abi a pakisei, winsi wa sabi pilisisi fa aw du den. Beibel e soi u taki na ala yuu ‘Yehofa e du sani enke fa a be abi a pakisei’ (Efe. 3:11). Winsi sai pasa, ‘Yehofa seeka ala sani fu a sa du san a abi a pakisei’ (Odo 16:4). Boiti dati, den sani di Yehofa e du e tan fu teego. Ma san Yehofa abi a pakisei fu du? San a du kaba?

7. San Yehofa du baka di den fosi libisama daai baka gi en? (Mateyesi 25:34)

⁷ Yehofa be taigi den fosi libisama san a be abi a pakisei gi den. Den be mu ‘meke pikin fuu a goontapu’. Den be mu de basi fu a goontapu anga ‘ala den meti’ di de a goontapu (Gen. 1:28). Fu di Adan anga Efa ná aliki Yehofa, meke ala sama abi sondu. Ma a sani ya á tapu Yehofa fu du san a be abi a pakisei. Aa langa seefi neen a sete a Kownukondee fi en a hemel. Na a Kownukondee ya o du san Gadu be abi a pakisei gi libisama. (Leisi Mateyesi 25:34.) Fu di Yehofa lobi u, meke a sende en Manpikin kon a goontapu fu leli u moo sani fu a Kownukondee fi en. Boiti dati, Yesesi dede giw fu u sa fii fu sondu anga dede. Baka di Yesesi dede, Yehofa weki en a hemel fu tii enke Kownu fu Gadu Kownukondee. Ma u sa leli moo sani fu san Yehofa be abi a pakisei gi libisama.

8. (a) San na a bosikopu fu Beibel? (b) Enke fa Efeisesama 1:8-11 e soi, da san Yehofa abi a pakisei fu du? (Luku a fowtow tu.)

⁸ A moo pelensipali leli fu Beibel a taki Yehofa o santa a nen fi en te a Kownukondee di a poti Kelestesi fu tii, o du san a be abi a pakisei gi libisama (Yes. 46:10, 11; Heb. 6:17, 18). A so a goontapu o toon wan paladeisi pe den bakapikin fu Adan anga Efa di naabi sondu moo o tan fu teego (Ps. 22:26). Ma Yehofa abi taa sani a pakisei ete. Aw tyai ala den sama di e dini en a hemel anga goontapu kon a wan. A so ala sama a hemel anga goontapu o aliki Yehofa, a Tiiman fu den. (Leisi Efeisesama 1:8-11.) Tei luku fa Yehofa o du den sani di a abi pakisei gi libisama, a sani ya nai doo yu ati noh?

9. Fai sa poti pakisei na a ten di e kon te ye leisi Beibel?

⁹ I sa teke ten pakisei a polofeititoli di sikiifi a Genesesi 3:15 di Yehofa taki aini a dyali fu Eden. b A polofeititoli ya e taki fu sani di be o pasa baka omen dunsu yali. Ai soi san Yehofa be seeka fu du san a abi a pakisei. Yehofa be taigi Abalaham taki a wan fu den bakapikin fi en be o meke Kelestesi (Gen. 22:15-18). Aini a yali 33, Yesesi kisi mankei neen bakafutu enke fa Beibel be taki (Toli 3:13-15). A lasiti pisi fu a polofeititoli ya o kon tuu te a pikin fu a uman o masi Saatan neen ede (Openb. 20:7-10). Beibel e taki fu moo sani di o pasa  te Saatan anga a goontapu fi en o kon fu feti anga a olikanisâsi fu Yehofa.

10. (a) Saw pasa dyonson? (b) Faw sa seeka useefi gi den sani di o pasa dyonson? (Luku a maiki.)

¹⁰ Pakisei fa den sama o dyombo te den sani ya o pasa. A fosi sani di o pasa a te den kondee o bali taki ‘freide de, ala sani e go bun!’ (1 Tes. 5:2, 3) A gaan banowtu o bigin te den tiiman o bigin poli ala den falisi keliki a hii goontapu (Openb. 17:16). A kan taki sama o si fa ‘a Manpikin fu libisama e kon a den woluku. Aw kon anga gaan makiti anga gendee’ (Mat. 24:30). Yesesi o paati ala den foluku fu goontapu leti enke fa wan sikapuman e puu den sikapu a den bokoboko mindii (Mat. 25:31-33, 46). Saatan naw gi abaa. Fu di ai buuse a foluku fu Yehofa, meke aw tyai omen kondee kon a wan fu feti anga a foluku fu Yehofa. Beibel e kai den kondee ya Gok fu a kondee Magok (Eseik. 38:2, 10, 11). Te fu kaba ala den salufu Kelesten di de a goontapu ya o go a hemel. Den o kon a wan anga Kelestesi makandaa anga den taa engel di de a hemel fu feti a gaan feti na Alimakedon. A disi na a lasiti feti di o feti na a ten fu a gaan banowtu c (Mat. 24:31; Openb. 16:14, 16). Bakadati Kelestesi o tii wan dunsu yali enke Kownu a hii goontapu.​—Openb. 20:6.

11. San a libi di wo libi fu teego wani taki gii? (Luku a fowtow tu.)

¹¹ Pakisei fa sani o de aini a ten di e kon. Beibel taki a sama di meke u ‘poti teego ten aini wi ati’ (Peleik. 3:11). Pakisei fa a sani ya o tyai wini gii. Pakisei fa aw yeepi i fi yu anga Yehofa toon moo bun mati tu. Bladzijde 319 fu a buku di den e kai Kon krosibei na Yehovah e taki: ‘Baka te u libi wan ondoo yali, wan dunsu efuso wan miliyun yali, wo kon sabi moo sani fu Yehofa. Winsi  fa wo sabi omen sani, tokuso a omen sani wo leli fu Yehofa ete . . . A teego libi na a moo gaan gudu di wo fende. Aini a ten de a omen sowtu sani wo du. Ma a moo pelensipali sani a taki wi anga Yehofa o de mati fu teego.’ San a wantu taa sani di yo kon sabi te ye sutudeli a Wowtu fu Gadu?

12. Faw sa poti pakisei a den sani di de a hemel?

¹² A Wowtu fu Gadu e meke u si pikinso fa Yehofa sete sani ‘a tapu anda’ (Yes. 33:5). Beibel e taki fu den moin sani fu Yehofa anga fa a seeka a pisi fu a olikanisâsi fi en di de a hemel (Yes. 6:1-4; Dan. 7:9, 10; Openb. 4:1-6). U sa leisi den sani di Eseikiyeli be si di ‘hemel opo di Gadu soi en omen fisyun’. Den sani di a be si be meke a foondoo.​—Eseik. 1:1.

13. Enke fa Hebrewsama 4:14-16 e soi, da fa ye fii tei pakisei den sani di Yesesi e du a hemel?

¹³ Pakisei den sani di Yesesi e du enke Kownu anga Gaan pilisite fu Gadu Kownukondee a Hemel. Aini Yesesi nen u poi begi ‘na a kownusutuu fu Gadu fesi fu a soi bun-ati giw’. U sa begi en fu a abi tyali-ati giw ‘na a moo bun yuu’ tu. (Leisi Hebrewsama 4:14-16.) Na ala yuu u mu e pakisei den sani di Yehofa anga Yesesi du giw den ten di pasa, anga san den e du a hemel nownow. A lobi di Yehofa anga Yesesi lobi u mu e doo wi ati. Na a lobi ya o yeepi u fu wooko gi Yehofa anga u hii ati.​—2 Kor. 5:14, 15.

14. Faw sa soi Yehofa anga Yesesi taki we teke den sani di den e du giw fu bigi? (Luku den fowtow tu.)

¹⁴ Wan fu den moo bun fasi faw sa soi Yehofa anga en Manpikin taki we  teke den sani di den e du giw fu bigi, a te we meke moiti fu yeepi taa sama fu sabi Yehofa anga fu toon Yesesi bakaman (Mat. 28:19, 20). Na a sani ya apostel Pawlesi be du, bika a be e teke den sani di Yehofa anga Yesesi du gi en fu bigi. Pawlesi be sabi taki Yehofa ‘wani ala sowtu sama kon fii. A wani den sabi a waaleiti soifili tu’ (1 Tim. 2:3, 4). Neen meke a be e ‘du ala san de fanowdu fu yeepi sama fu fende a libi, winsi a wantu sama namo.’​—1 Kor. 9:22, 23.

15. Enke fa Psalm 1:2 e soi, da saw meke u piisii?

¹⁵ A fosi sikiifiman fu den psalm be taki ‘wan sama e piisii te ai leisi den weiti fu Gadu’, anga ‘te ai teke ten pakisei san a leisi dei anga neti’ (Ps. 1:1-3). Wan man di be e poti Beibel aini taa tongo taki fu den vers ya taki: ‘Wan sama e moo piisii te ai leisi Beibel, te ai sutudeli anga te ai teke ten pakisei san a leli. A taki: ‘Efu wan dei pasa neen wan sama á leisi a Wowtu fu Gadu, da a poli a dei de.’ Te ye teke ten sutudeli a Beibel yo piisii. Yo si fa den toli di de aini e kai anga denseefi tu. Ná pikin switi a switi te ye sutudeli a Wowtu fu Gadu finifini.

16. San wo luku aini a taa artikel?

¹⁶ Den moin sani di Yehofa e leli u aini Beibel á taanga fu fusutan. Aini a taa artikel wo luku wan fu den dipi toli ya. Wo taki fu a ageisi tempel fu Yehofa di Pawlesi be taki fi en aini a biifi di a be sikiifi gi den Hebrew Kelesten. Te wo taki fu a toli ya yo lobi en.