1-2. An be se ka Ala ka Kuma kalan ani k’a sɛgɛsɛgɛ cogo fisaman juman lo la? Misali dɔ fɔ.

 MIIRI k’a filɛ ko i b’a fɛ ka boon dɔ san. I b’a fɛ ka mun lo filɛ fɔlɔ ka sɔrɔ k’o desizɔn ta? Yala i b’a fɛ k’o boon ɲɛfɛla foto dɔrɔn lo filɛ wa? Siga t’a la, i bena a ɲini k’o boon ye yɛrɛyɛrɛ la walisa ka don ka yaala a kɔnɔ, k’a yɔrɔ kelen kelen bɛɛ filɛ koɲuman ani k’a janya n’a bonya lajɛ. N’a sɔrɔ a bena diya i ye yɛrɛ k’o boon pilan lajɛ walisa k’a lɔn a lɔra cogo min na. Siga t’a la, i b’a fɛ k’o boon yɔrɔ kelen kelen bɛɛ filɛ koɲuman fɔlɔ ka sɔrɔ k’a san.

² An be se k’o ɲɔgɔn kɛ n’an be Bibulu kalanna ani k’a sɛgɛsɛgɛ. Bibulu sɛgɛsɛgɛrikɛla dɔ ko Bibulu be i ko “boon belebeleba jamanjan dɔ min juu sigira koɲuman.” O la, mun lo be se k’an dɛmɛ ka Bibulu kɔnɔnakow lɔn bɛrɛbɛrɛ? N’i b’a kalan joona joona, i bena kalan jɔnjɔnw dɔrɔn lo faamu, o kɔrɔ, “Ala ka koo minw faamu man gwɛlɛ.” (Eburuw 5:12). I ko i mako b’a la cogo min na ka don boon kɔnɔ walisa k’a lajɛ koɲuman, i mako b’a la fana ka Bibulu sɛgɛsɛgɛ koɲuman walisa k’a faamu bɛrɛbɛrɛ. I be se k’o kɛ cogo ɲuman minw na, u dɔ ye k’a filɛ a kɔnɔnakow be taga ɲɔgɔn fɛ cogo min na. I lanin lo tiɲɛnkalan minw na, i jija k’u faamu ani a ɲini k’a lɔn fɛɛn min kama i lanin b’u la.

3. Pol y’a balimaw jija u ka mun lo kɛ ani mun na? (Efɛzikaw 3:14-19).

³ Walisa ka Ala ka Kuma yɔrɔ bɛɛ faamu koɲuman, a yɔrɔ minw faamu man nɔgɔ, an ka ɲi k’a ɲini k’olu fana faamu. Ciden Pol y’a kerecɛnɲɔgɔnw jija u ka Ala ka Kuma sɛgɛsɛgɛ koɲuman. O la, u bena se k’a “fɛrɛ ni a janya ni  a jɔ janya ni a dunya dɔn ɲɔgɔn fɛ.” N’u y’o kɛ, Ala ka Kuma bena ‘sigi u kɔnɔ’ limaniya barika la (Efɛzikaw 3:14-19 kalan). b An fana ka ɲi k’o ɲɔgɔn lo kɛ. An k’a filɛ an be se ka Ala ka Kuma sɛgɛsɛgɛ koɲuman cogo min na walisa k’a yɔrɔ kelen kelen bɛɛ faamu bɛrɛbɛrɛ.

BIBULU KA KALAN MINW FAAMU MAN NƆGƆ, OLU SƐGƐSƐGƐ

4. An be se k’an magwɛrɛ kosɔbɛ Jehova la cogo di? Misali dɔw fɔ.

⁴ An kerecɛnw t’a fɛ ka Bibulu ka kalan jɔnjɔnw dɔrɔn lo faamu. Ala ka hakili senu barika la, a ka di an ye ka “Ala ka koo dogoninw” fana lɔn (1 Kor. 2:9, 10). Mun na i t’a latigɛ ka kelenna kalan kɛ barokun dɔw kan minw bena a to i b’i magwɛrɛ kosɔbɛ Jehova la? Misali la, i be se ka sɛgɛsɛgɛri kɛ k’a filɛ a y’a ka kanuya yira a sagokɛlaw la cogo min na galen ani cogo min na o b’a yira ko a be ele fana kanu. Jehova tun b’a fɛ Israɛldenw k’ale bato cogo min na galen, i be se ka sɛgɛsɛgɛri kɛ o kan ani k’o suma ni kerecɛnw ka batoli kɛcogo ye bi. Wala Yezu ye kiraya kuma minw dafa k’a to dugukolo kan ani a ka cidenya baara tuma na, i be se ka sɛgɛsɛgɛri kɛ o kan koɲuman.

5. Yala i b’a fɛ ka sɛgɛsɛgɛri kɛ koɲuman barokun dɔ kan i ka kelenna kalan tuma na wa?

⁵ A ka di minw ye ka sɛgɛsɛgɛri kɛ koɲuman, u ye dɔw ɲininga a bena diya u ye ka sɛgɛsɛgɛri kɛ koo minw kan Ala ka Kuma kɔnɔ. U ye barokun minw kofɔ, u dɔw be sɔrɔ koorilen nin kɔnɔ: “Barokunw, kelenna kalan kama.” I be se ka basigi Index wala Guide de recherche kan ka sɛgɛsɛgɛri kɛ o barokunw kan. N’i y’o kɛ, i bena ninsɔndiyaba sɔrɔ. N’i be to ka sɛgɛsɛgɛri kɛ koɲuman Bibulu kan, o bena i ka limaniya sabati ani k’i dɛmɛ “ka Ala lɔn.” (Talenw 2:4, 5). Bibulu ka kalan minw faamu man nɔgɔ ani an be se ka sɛgɛsɛgɛri kɛ minw kan, an k’u dɔw lajɛ.

6. a) Faranfasi juman lo be pilan ni sagonata cɛ? b) Mun na an be se k’a fɔ ko “kabini fɔlɔfɔlɔ” Jehova be ni sagonata ye adamadenw ani dugukolo koo la? (Efɛzikaw 3:11).

⁶ An k’a filɛ Bibulu be min fɔ Ala sagonata koo la. Faranfasiba be pilan ni sagonata cɛ. Pilan be i ko sira tigitigi dɔ min be taga ni mɔgɔ ye a tagayɔrɔ la. Nka ni bali dɔ be sira kan, n’a sɔrɔ a tigi tɛna se a tagayɔrɔ la. Faan wɛrɛ fɛ, sagonata be se ka suma ni mɔgɔ tagayɔrɔ ye. An b’a lɔn an be tagara yɔrɔ min na, nka an m’a latigɛ an bena sira tigitigi min ta. Ani, n’an ye sira dɔ ta, an be se k’o yɛlɛma n’a bɛnnin lo. “Kabini fɔlɔfɔlɔ,” Jehova be ni sagonata dɔ ye. An b’a fo sabu a y’o sagonata yira an na dɔɔni dɔɔni Bibulu kɔnɔ (Efɛz. 3:11). Jehova be se ka tɛmɛ fɛɛrɛ caaman fɛ k’a sagonata dafa. A ye min latigɛ, o be dafa tuma bɛɛ sabu a ye “fɛn bɛɛ dan kun dɔ le ra,” o min ye k’a sagonata dafa (Talenw 16:4, Biblu Ala ta Kuma). Ani a be min kɛ, nafa min be sɔrɔ o la, o be mɛɛn fɔɔ abada! Jehova sagonata ye mun lo ye ani a ye yɛlɛmani jumanw lo kɛ walisa o ka dafa?

7. Adama ni Awa murutinin kɔ, Jehova ye yɛlɛmani jumanw lo kɛ walisa k’a sagonata dafa? (Matiyo 25:34).

⁷ Ala y’a fɔ Adama ni Awa ye a sagonata ye min ye u koo la. U tun ka ɲi “ka deenw wolo ka caya ka dugukolo fa k’a kolo” ani ka kɛ “fɛɛn ɲanamanw bɛɛ kunna” dugukolo kan (Zɛnɛzi 1:28). Nka Adama ni Awa murutira ani u ye jurumu lase u deenw ma. O bɛɛ n’a ta, Jehova sagonata ma yɛlɛma. A ye yɛlɛmaniw don a sagonata dafali koo lo la. A sinna k’a latigɛ ka Masaya dɔ sigi sen kan sankolo la. A sagonata tun ye min ye adamadenw ani dugukolo koo la kabi a daminɛ na, a bena tɛmɛ o Masaya fɛ k’o dafa (Matiyo 25:34 kalan). Jehova ka wagati latigɛnin na, kanuya y’a lasun k’a Dencɛ fɔlɔ bangelen Yezu ci ka na dugukolo kan. Yezu ye mɔgɔw kalan Ala ka Masaya koo la ani k’a niin di k’an kisi ka bɔ jurumu ni saya bolo. O kɔ, Yezu suu kununa ka taga sankolo la walisa ka kɛ Masacɛ ye Ala ka Masaya kuun na. Nka fɛɛn caaman wɛrɛw be yen k’a lɔn Ala sagonata koo la.

8. a) Bibulu ka barokun jɔnjɔn ye juman lo ye? b) Ka kɛɲɛ ni Efɛzikaw 1:8-11 ka fɔta ye, Jehova bena koo wɛrɛ juman lo kɛ? (jaa lajɛ ɲɛɛ fɔlɔ kan).

⁸ Bibulu ka barokun jɔnjɔn ye ko Jehova bena a tɔgɔ lafasa tuma min na a bena a sagonata dafa dugukolo koo la. A bena o kɛ a ka Masaya sababu fɛ, Krista b’o min kuun na. Jehova sagonata tɛ se ka yɛlɛma. A y’a daa di ko a bena o dafa, siga t’o la (Ezayi 46:10, 11; Eburuw 6:17, 18). Dugukolo bena yɛlɛma ka kɛ alijɛnɛ ye ani adamaden dafaninw ni kantigiw bena ɲɛnamaya diyabɔ yen fɔɔ abada (Zab. 22:27). Nka Jehova sagonata tɛ dan o dɔrɔn ma. A sagokɛla minw be sankolo la ani minw be dugukolo kan, a ka laɲinita laban ye k’u bɛɛ kaan bɛn. O kɔ, ninmanfɛnw bɛɛ bena mɛnni kɛ Jehova fɛ ani ka sɔn a ka kuntigiya ma (Efɛzikaw 1:8-11 kalan). Jehova b’a sagonata dafara cogo ɲuman min na, yala o t’i kabakoya wa?

9. Bibulu b’an dɛmɛ ka siniɲasigi lɔn fɔɔ ka se tuma juman?

⁹ Jehova ye kiraya kuma min fɔ Edɛn nankɔtu kɔnɔ, an k’o lajɛ. O kiraya kuma be sɔrɔ Zɛnɛzi 3:15 kɔnɔ. c O ɲɛsinna  koo dɔw ma minw bena Jehova sago dafa. Nka o koow tun bena kɛ saan waa caaman tɛmɛnin kɔ le. Misali la, Ala tun y’a fɔ Ibrayima ye ko saan caaman tɛmɛnin kɔ, a bɔnsɔn dɔ tun bena kɛ Krista ye (Zɛnɛzi 22:15-18). O kɔ saan 33 Krista tile la, saa ye Yezu mandimi a seen na, i ko a tun fɔra Zɛnɛzi 3:15 ka kiraya kuma na cogo min na (Kɛw. 3:13-15). O kiraya kuma yɔrɔ laban, o min ye ko muso bɔnsɔn bena saa kungolo ɲɔɲɔ, o bena dafa yanni saan waa kelen ni kɔ (Yir. 20:7-10). Juguya min be Sutana ka duniɲa ni Jehova ka ɔriganisasiyɔn cɛ, mun lo bena kɛ tuma min na o juguya bena se a tan ni fila ma? Bibulu be koo caaman fɔ an ye o koo la.

10. a) Koo jumanw lo bena kɛ yanni dɔɔni? b) An be se k’an yɛrɛ labɛn cogo di o kama? (jukɔrɔla kunnafoni lajɛ).

¹⁰ Bibulu kɔnna ka koo kabakoman minw kofɔ, miiri u la. A fɔlɔ, jamanaw bena a fɔ ko “hɛɛrɛ be yen, an latanganin lo!” (1 Tes. 5:2, 3, NW). Tuma min na siyaw bena wuli ngalon diinanw bɛɛ kama, “yɔrɔnin kelen” tɔɔrɔba bena daminɛ (Yir. 17:16). O kɔ, n’a sɔrɔ koo kabakoman dɔ bena kɛ. An “bena Mɔgɔ Dencɛ natɔ ye sankaba kan ni sebagaya ni nɔɔrɔ ye.” (Mat. 24:30). Yezu bena mɔgɔw kiti: a bena sagaw faran ka bɔ baaw la (Mat. 25:31-33, 46). Nka o wagati la, Sutana tɛna a bolo kuru ka sigi. A be Jehova sagokɛlaw kɔniya minkɛ, a bena siyaw lasun u ka jɛn ka wuli u kama. O siyaw lajɛnnin lo be weele ko Gɔgi min be Magɔgi (Ezek. 38:2, 10, 11). Wagati dɔ la, kerecɛn mɔlen minw be dugukolo kan, olu bena lajɛn sankolo la. U bena fara Krista n’a ka sankolola kɛlɛbolow kan walisa ka Arimagedɔn kɛlɛ kɛ. O lo bena kɛ tɔɔrɔba laban ye d (Mat. 24:31; Yir. 16:14, 16). O kɔ, Krista ka saan waa kelen mara bena daminɛ dugukolo kan.—Yir. 20:6.

11. Ɲɛnamaya banbali jigiya kɔrɔ ko di ele fɛ? (jaa lajɛ fana).

¹¹ Sisan, koo minw bena kɛ Krista ka  saan waa kelen mara kɔ, wagati ta ka miiri dɔɔni o la. Bibulu b’a fɔ ko an Danbaga ye “badaa miirili” don an dusu la (Waaj. 3:11, Bible senuma). Ka ɲɛnamaya kɛ fɔɔ abada, miiri k’a filɛ o kɔrɔ ye min ye ele fɛ ani o bena nɔɔ min to ele ni Jehova ka jɛnɲɔgɔnya kan. Ɲɛfɔli ɲuman nin be sɔrɔ gafe Approchez-vous de Jéhovah, ɲɛɛ 318-319 kɔnɔ: “N’an ye ɲɛnamaya kɛ saan kɛmɛ kɛmɛ caaman, waa caaman, miliyɔn caaman wala saan miliyari caaman yɛrɛ, an bena koo caaman lɔn Jehova Ala koo la ka tɛmɛ sisan kan. Nka, an bena a ye ko koo ɲuman caaman wɛrɛw bele be yen an ka ɲi ka minw lɔn a koo la. . . Ɲɛnamaya banbali bena an nafa ani a bena diya cogo min na, o tɛ se ka fɔ. Koo min bena an nafa kosɔbɛ sanga ni waga bɛɛ, o ye ka to ka an magwɛrɛ Jehova la.” Yanni ɲɛnamaya banbali wagati cɛ, an be se ka koo wɛrɛ juman lo sɛgɛsɛgɛ Ala ka Kuma kɔnɔ?

12. Koo minw be kɛra sankolo la, an be se k’o lɔn cogo di? Misali dɔ fɔ.

¹² Bibulu b’an dɛmɛ ka koo fitinin dɔrɔn lo faamu Jehova koo la, ale min “be fɔɔ sanfɛ.” (Ezayi 33:5). A be koo kabakoman dɔw fɔ an ye Jehova koo la ani a ka ɔriganisasiyɔn faan min be sankolo la (Ezayi 6:1-4; Dan. 7:9, 10; Yir. 4:1-6). Misali la, Ezekiyɛli ye kabako fɛɛn dɔw ye tuma min na a “ye sankolo daa yɛlɛtɔ ye” ani “Ala ye yelifɛnw yira [a] la.” Bibulu b’an dɛmɛ k’o faamu.—Ezek. 1:1.

13. Ka kɛɲɛ ni Eburuw 4:14-16 ka fɔta ye, Yezu be min kɛra sankolo la, ele be mun lo miiri o koo la?

¹³ Yezu be kuntigiya kɛra sankolo la ani sarakalasebagaw Kuntigiba lo min be makari. Miiri k’a filɛ a be min kɛra an ye o yɔrɔ la. Ale barika la, an be se k’an magwɛrɛ Ala ka “masasigilan yɔrɔ la . . . a ka nɛɛma kosɔn” k’a deli janko a ka makari an na ani k’an dɛmɛ “an  dɛsɛ tuma na.” (Eburuw 4:14-16 kalan). Jehova ni Yezu ye min kɛ ani u be min kɛra an ye sankolo la, an kana a to loon kelen ka tɛmɛ n’an ma miiri o la. U ka kanuya ka ɲi k’an dusu sɔrɔ kosɔbɛ ani k’an lasun ka kisɛya Jehova sago kɛli la.—2 Kor. 5:14, 15.

14. An be se k’an ka waleɲumanlɔn yira Jehova ni Yezu la cogo fisaman minw na, u la dɔ ye juman ye? (jaa lajɛ fana).

¹⁴ Cogo fisaman minw na an b’a yira ko an be an ka Ala n’a Dencɛ waleɲuman lɔn kosɔbɛ, u la dɔ ye k’an jija ka mɔgɔw dɛmɛ u ka kɛ Jehova Seerew ani Yezu ka kalandenw ye (Mat. 28:19, 20). Ciden Pol y’o lo kɛ sabu a tun be Ala ni Krista waleɲuman lɔn kosɔbɛ. A tun b’a lɔn ko Jehova sago ye ko “mɔgɔ bɛɛ ka kisi ani ka se ka tiɲɛ lɔn.” (1 Tim. 2:3, 4). A y’a jija kosɔbɛ waajuli la ka mɔgɔ caamanba dɛmɛ walisa ‘cogo o cogo a ka se ka dɔw kisi.’—1 Kor. 9:22, 23.

15. Ka kɛɲɛ ni Zaburuw 1:2 ye, mun lo bena a to an be ninsɔndiya sɔrɔ?

¹⁵ Zaburu sɛbɛbaga y’a fɔ ko “[Jehova] ka sariya koo ka di” mɔgɔ min ye ani “a be miiri o la suu fara tile kan,” o tigi ninsɔn ka di ani a ka koow be ɲɛ a bolo. A ye min fɔ, o bɛnnin lo yɛrɛ le! (Zab. 1:1-3). Bibulu bayɛlɛmabaga Joseph Rotherham y’o vɛrisew ɲɛfɔ ten ko: “Ala ka ladiliw ka ɲi ka diya [mɔgɔ] ye kosɔbɛ fɔɔ a be sɛgɛsɛgɛri kɛ u kan, k’a ɲini k’u faamu ani ka wagati ta ka miiri u kan koɲuman.” A y’a fɔ fana ko mɔgɔ min be deli ka Bibulu kalan, “n’a ye loon kelen kɛ a ma dɔ fara a ka faamuyali kan Bibulu koo la, a b’a jati ko o ye bɔnɛba lo ye a ma.” Kunnafoni nafamanw lo be Bibulu kɔnɔ. A sɛgɛsɛgɛri bena diya i ye n’i be wagati ta k’o kunnafoniw lajɛ koɲuman ani k’a filɛ jɛɛn min be u ni ɲɔgɔn cɛ. N’an be Bibulu yɔrɔ bɛɛ sɛgɛsɛgɛ koɲuman, o bena an ninsɔn diya kosɔbɛ!

16. An bena kuma mun lo koo la barokun nata la?

¹⁶ Jehova b’an kalan tiɲɛnko nafaman minw na a ka Kuma kɔnɔ, an be se k’u faamu. Barokun nata la, an bena tiɲɛnkalan dɔ lajɛ min faamu man nɔgɔ. O ye Jehova batosoba ye Pol kumana min koo la a ka lɛtɛrɛ kɔnɔ, a ye min ci Eburu kerecɛnw ma. An jigi b’a la k’o tiɲɛnkalan sɛgɛsɛgɛri bena diya i ye kosɔbɛ!