1-2. Ki pi bèl biten ou pé fè pou li é étidyé Bib-la ? Bay on ègzanp ki ka montré sa.

 IMAJINÉ kè ou anvi achté on kaz. Avan ou pran désizyon a-w, ka ou té’é anvi sav asi kaz-lasa ? Si yo ka montré-w douvan a kaz-la tousèl asi on foto, ès sa ké sifi-w ? Sèten ou ké préféré ay vwè kaz-la pou fè tout lantou a-y é pou gadé kijan andidan a-y yé. Ou ké vé gadé chak pawti a-y. Pétèt ou ké vé gadé plan a kaz-la osi pou vwè kijan yo konstwi-y. Nou ka tou konprann kè ou ké anvi konnèt tout ti détay a kaz-la avan ou achté-y.

² Sé sa pou nou fè osi lèwvwè nou ka li é étidyé Labib. On èspésyalis b a Labib di konsa kè Labib ka touvé-y kon « on batiman ki ho toubònman é fondasyon a-y fon fon fon an tè-la. » Men ka ou pé fè pou konnèt Bib-la byen menm ? Si ou ka li-y vitman-présé, ou ké dékouvè enki sé ansègnman-la ki fondal la kivédi « biten tousenp ki adan sé biten sakré la Bondyé di la » (Ébr. 5:12). Men pou nou sav plis biten asi on kaz, fò-nou rantré adan kaz-la. Menmjan-la, fò-nou pran tan étidyé Labib pou nou konprann-li pibyen. On bèl biten ou pé fè pou li é étidyé Bib-la byen konm i fo, sé chèché a vwè kijan on mòso a Labib lyanné èvè ondòt mòso a-y. Éséyé konprann sé vérité-la ki adan-y la byen é éséyé konprann osi poukwa ou ka kwè adan sé vérité-lasa.

3. Ka Pòl ankourajé sé frè é sè la fè, é poukwa i fè sa ? (Éfézyen 3:14-19).

³ Pou nou byen konprann Labib, fò-nou pran tan étidyé sèwten biten é fò-nou ay an nannan a yo. Lapòt Pòl ankourajé sé frè é sè la étidyé Pawòl a Bondyé byen konm i fo pou yo « rivé konprann byen menm lajè, longè, hotè é fondè » a lavérité.  Sé konsa fwa a yo té’é « byen chouké é byen sizé » adan lavérité (li Éfézyen 3:14-19). Nou osi, fò-nou fè menm biten-la. An-nou vwè kijan nou pé pran tan étidyé Pawòl a Bondyé é konprann sa i vé di pibyen.

4. Ka nou pé fè pou nou vin pi bon zanmi èvè Jéova ?

⁴ Konm nou sé dé krétyen, nou pa ka kontanté-nou dè konprann enki biten ki tousenp adan Labib. Nou anvi konprann sa Labib ka di « menm lè sé dé biten a Bondyé ki fon », é sa posib grasa lèspri sen a-y (1 Kor. 2:9, 10). Lè ou ka étidyé Labib tousèl a-w, ou té’é pé ègzaminé on sijé ki pé édé-w vin pi bon zanmi èvè Jéova. Ka ou ka di ? Pa ègzanp, ou té’é pé chèché a vwè kijan Jéova montré sèwvitè a-y ki té ka viv an tan a Labib kè i té enmé-yo. Sa ké montré-w kè Jéova enmé-w vou osi. Ou té’é pé chèché a konprann osi kijan Jéova té vé sé Izraélit-la adoré-y é konparé sa èvè jan nou ka adoré-y jòdijou. Oben pétèt ou té’é pé étidyé sé pwofési-la Jézi réyalizé la lèwvwè i té asi latè.

5. Ès ni on sijé ou té’é enmé fouyé adan étid pèwsonèl a-w ?

⁵ Yo mandé déotwa frè é sè ki ni labitid ay an nannan a Bib-la ki ansègnman yo té’é enmé konprann pibyen. Ou ké touvé sèwten biten yo di adan ti karé-la «  Déotwa sijé ou té’é pé étidyé ». Sèten tchè a-w ké kontan lèwvwè ou ké étidyé sé sijé-lasa. Ou pé sèvi èvè Index des publications des Témoins de Jéhovah oben èvè Guide de recherche pour les Témoins de Jéhovah pou étidyé sé sijé-lasa. Siwvwè ou ka pran tan étidyé Bib-la é kè ou k’ay an nannan a-y, sa pé konsolidé fwa a-w é sa pé édé-w « touvé konésans a Bondyé » (Pwov. 2:4, 5). Alèla, an-nou ègzaminé sèwten vérité ki fon fon fon an Bib-la kè ou pé éséyé konprann pibyen.

6. a) Pwojé a Jéova toujou ka maché. Poukwa nou ka di sa ? b) Poukwa nou pé di kè pwojé-la Bondyé ni la pou latè é pou lézimen sé on pwojé ki étèwnèl ? (Éfézyen 3:11).

⁶ An-nou vwè ka Labib ka di anrapò èvè pwojé a Bondyé pa ègzanp. Ayen pé’é jen  anpéché Jéova réyalizé pwojé a-y. Poukwa nou ka di sa ? Pas lè i ka désidé fè on biten, i pé fè-y plizyè mannyè diféran. I ka rivé fè sa pas i sav fè kò èvè on sitiyasyon é i ka adapté-y pou réyalizé pwojé a-y. Piti-a-piti, Jéova fè-nou konnèt pwojé a-y ki étèwnèl adan Bib-la (Éféz. 3:11). I toujou ka touvé on mwayen pou réyalizé pwojé a-y pas i ka « fè ansòt pou tout biten ay an sans a pwojé a-y » (Pwov. 16:4). É lè i ka fè on biten réyisi a pa pou 2 jou, men sé pou touttan. Ki pwojé Jéova anvi réyalizé, é ki chanjman i fè pou i pé sa rivé jous an bout a pwojé-lasa ?

7. Lè Adan é Èv ba Bondyé do, ki chanjman Jéova fè pou réyalizé pwojé a-y ? (Matyé 25:34).

⁷ Lè Jéova kréyé sé prèmyé moun-la, i èspliké-yo ki pwojé i té ni pou yo. Mi sa i di-yo : « Fè timoun, é miltipliyé-zòt ; ranpli latè, é dominé asi-y ; dominé asi […] tout zannimo » (Jén. 1:28). Malérèzman, Adan é Èv ba Bondyé do é sé konsa yo mèt tout désandan a yo anba jouk a péché-la. Men, sa pa anpéché Jéova réyalizé pwojé a-y. I pran ondòt chimen. Onfwamenm, i désidé mèt on wayòm anplas an syèl-la é sé grasa wayòm-lasa i ké réyalizé pwojé-la i ni la pou latè é pou lézimen (li Matyé 25:34). Lè moman-la rivé, èvè onlo lanmou, Jéova voyé prèmyé Gason a-y asi latè pou i fè moun konnèt wayòm-lasa é pou i bay vi a-y an ranson pou woté-nou anba jouk a péché-la é anba jouk a lanmò. Aprésa, Jéova résisité Jézi pou i vin Wa a wayòm a-y an syèl-la. Men ni onlo dòt biten ankò pou nou konnèt asi pwojé a Bondyé.

8. a) Ka ki tèm a Labib ? b) Dapré sa Éfézyen 1:8-11 ka èspliké, ka Jéova ké fè ankò ? (gadé imaj-la ki anlè po a jounal-la).

⁸ Adan Bib-la, ni on tèm ki pi enpòwtan ki tout sélézòt-la. Tèm-lasa sé : Jéova ké fè non a-y vin sen lè i ké réyalizé pwojé a-y pou latè grasa wayòm a-y é i mèt Jézikris Wa a wayòm-lasa. Pa ni pon biten ki pé chanjé pwojé a Jéova. I ban-nou lagaranti kè i ké réyalizé sa i désidé fè (Iz. 46:10, 11, nòt a Bib-la an fransé ; Ébr. 6:17, 18). Piti-a-piti, tout latè ké vin on paradi. É adan paradi-la ké ni onlo désandan a Adan é Èv ki fidèl é ki pawfè é yo ké « viv pou touttan » (Sòm 22:26). Men a pa sa tousèl Jéova ké fè. Anplisdisa, i ké ini tout kréyati a-y ki ka viv an syèl-la é ki ka viv asi latè. A moman-lasa, toutmoun ké dakò pou di kè sé Jéova tousèl ki andwa dirijé é yo ké fidèl a-y (li Éfézyen 1:8-11). Lè ou ka vwè jan Jéova ka réyalizé pwojé a-y, ès ou pa’a touvé sa èstraòwdinè ?

9. Lèwvwè nou ka li Bib-la, ki biten anrapò èvè sa ki ké fèt dèmen nou pé rivé a konnèt ?

⁹ Sonjé pwofési-la Jéova té anonsé la adan Jadendédèn-la. Ou ka touvé-y adan Jénèz 3:15 c. I ka palé dè sèwten évènman ki té’é fèt é grasa sé évènman-lasa, pwojé a Jéova té’é réyalizé. Men sé évènman-lasa té’é fèt milyé é milyé lanné apré. Pousa, fò Abraam té’é ni désandan é fò yonn adan yo té’é vin Lèkris (Jén. 22:15-18). Aprésa, an 33, yo blésé Jézi an talon a-y kon pwofési-la té anonsé (Akt 3:13-15). Lè yo ké krazé tèt a Satan, dènyé mòso a pwofési-la ké réyalizé. Men a pa konnyéla sa ké fèt, fò-nou ké atann plis ki 1000 an (Rév. 20:7-10). Labib ka palé dè dòt biten ki ké fèt anrapò èvè lagè-la ki ké ni la antrè mond a Satan é òwganizasyon a Jéova é i jous ka di-nou ka ki ké  pasé lèwvwè pi gwo mòso a lagè-lasa ké ka fèt.

10. a) Ki évènman ki ké fèt talè ? b) Kijan nou pé préparé-nou pou sé évènman-la ki ka atann-nou la ? (gadé nòt-la).

¹⁰ Sonjé sé évènman-la Labib anonsé la é ki èstraòwdinè toubònman. Pou koumansé sé nasyon-la ké anonsé « lapé é lasékirité » (1 Tés. 5:2, 3). « Lamenmla », gwo tribilasyon-la ké koumansé lèwvwè sé nasyon-la ké ataké tout sé fo rèlijyon-la (Rév. 17:16). Aprésa, pétèt kè dé biten ké fèt é sa pé ké natirèl. Sé biten-lasa ké montré kè « Gason a lòm ka vin asi sé niyaj-la ki an syèl-la èvè puisans é èvè onlo glwa » (Mat. 24:30). Jézi ké jijé lézimen é i ké mèt mouton é kabrit apa (Mat. 25:31-33, 46). Men li Satan pé’é rété la lébwa-kwazé. I ké tèlman anrajé kè i ké fè plizyè nasyon mèt-yo ansanm pou ataké pèp a Jéova. Labib ka kriyé sé nasyon-lasa « Gòg ki sòti an péyi a Magòg » (Ézék. 38:2, 10, 11). Rivé onlè, tout sé wen-la ki ké asi latè la ké sanblé an syèl-la é yo ké ay jwenn Jézi é lawmé a-y pou yo pé sa goumé adan lagè a Awmagédon. Sé ké dènyé mòso a gwo tribilasyon-la d (Mat. 24:31 ; Rév. 16:14, 16). Aprésa, Jézikris ké koumansé gouvèné asi latè ; i ké gouvèné pannan 1000 an (Rév. 20:6).

11. Lè ou ka sonjé kè ou ké pé viv pou touttan, kijan ou ka imajiné vi a-w ? (gadé imaj-la osi).

¹¹ Aprézan, an-nou fè on ti réfléchi asi dé biten ki ké fèt apré sé 1000 an-la. Labib ka di kè ‘an tchè an nou Kréyatè an nou ban-nou anvi viv pou touttan’ (Ékl. 3:11). Nou ké viv pou touttan ! Éséyé imajiné ka sa ké chanjé adan vi a-w é kijan lanmityé a-w èvè Jéova ké vin. Adan liv-la Approchez-vous de Jéhovah, adan sé paj 318 é 319 la, yo ka di dé biten ki entérésan toubònman. Mi sa yo ka di : « Apré nou ké ja viv plis ki 100 an, plis ki 1000 an, plis ki on milyon lanné é plis ki on milya lanné, nou ké konnèt Jéova lontan pibyen ki jòdla. Men nou ké ni lenprésyon kè toujou ka rété dòt biten a aprann asi Jéova. […] Nou pa menm pé imajiné kijan vi an nou ké bèl é  kijan sa ké entérésan lèwvwè nou ké pé viv pou touttan. É pi bèl biten nou ké pé ni, sé kè nou ké pé vin pi bon zanmi èvè Jéova ankò. » Men annatandan, pannan nou ka kontinyé étidyé Labib, ki dòt biten nou pé chèché a konprann pibyen ?

12. Si ou ka lévé zyé a-w é kè ou ka gadé an syèl-la, ka sa ké aprann-vou ?

¹² Labib ka ban-nou on lidé pou nou pé sa vwè ka sa vé di lè ou douvan Jéova anhola (Iz. 33:5). I ka di-nou dé biten èstraòwdinè asi Jéova é asi mòso a òwganizasyon a-y ki an syèl-la (Iz. 6:1-4 ; Dan. 7:9, 10 ; Rév. 4:1-6). Pa ègzanp, i ka palé dè biten èstraòwdinè kè Ézékyèl vwè lè « syèl-la wouvè, é [kè] Bondyé koumansé fè-[y] vwè vizyon » (Ézék. 1:1).

13. Lè ou ka sonjé tousa Jézi ka fè pou nou toupannan i an syèl-la, ka ou ka rèsanti ? (Ébré 4:14-16).

¹³ Pran on ti tan pou sonjé tousa Jézi ka fè pou nou pannan i an syèl-la. I ja ka gouvèné antankè wa é sé on gran prèt ki plen konpasyon. Grasa-y, nou pé priyé Bondyé é sé konkidiré nou ka vin owa « twòn a favè-la nou pa menm mérité la », kivédi twòn a Bondyé. Konsa, i pé ban-nou favè-la nou pa menm mérité la ki ka édé-nou « lè nou bizwen » (li Ébré 4:14-16). Fò pa onsèl jouné pasé pou nou pa pran on ti tan pou réfléchi asi tousa Jéova é Jézi fè pou nou é asi sa yo ka kontinyé fè pou nou toupannan yo an syèl-la. Lè nou ka vwè jan yo enmé-nou, fò sa touché tchè an nou é fò sa ban-nou onlo balan pou nou sèvi Jéova (2 Kor. 5:14, 15).

14. Nou pé montré Jéova é Jézi jan nou ni rèkonésans pou yo plizyè fason diféran. Bay yonn adan sé pi bèl la (gadé imaj-la osi).

¹⁴ Kijan nou pé montré Jéova, Bondyé an nou é Gason a-y, Jézi jan nou ni rèkonésans pou yo ? Nou pé fè sa plizyè fason diféran  men yonn adan sé pi bèl la, sé lè nou ka édé moun vin Témwen a Jéova é disip a Jézi (Mat. 28:19, 20). Dayè sa ki pousé Pòl édé sé moun-la, sé rèkonésans-la i té ni la pou Jéova é Jézi. I té sav kè sa Jéova té vé, sé kè « tout kalté moun sové é kè yotout rivé ni on konésans ègzak a lavérité » (1 Tim. 2:3, 4). Alò lè sé té pou préché, i té ka bay adan. Konsa, i té pé édé on maksimòm dè moun pou yo konnèt Jéova. ‘I fè tout posib a-y pou sové déotwa adan yo’ (1 Kor. 9:22, 23).

15. Dapré Sòm 1:2, ka ki ké fè tchè an nou kontan ?

¹⁵ Moun-la ki maké 1^é sòm-la di kè on moun ni tchè-kontan é ka réyisi tousa i ka fè lè « plézi a-y sé adan lwa a Jéova i yé » é lè ‘i ka médité asi lwa-lasa lajouné kon lannuit’ (Sòm 1:1-3, nòt a Bib-la an fransé). Ni on tradiktè a Labib non a-y sé Joseph Rotherham ki palé dè pasaj-lasa é i di kè fò on moun « vréman anvi Jéova gidonné-y. Pou sa, fò i ké chèché sé konsèy-la Jéova ka ban-nou la adan Bib-la, fò i ké étidyé-yo é fò i ké pasé onlo tan ka réfléchi anlè yo e ». I di osi kè « si on jou pasé é kè on moun pa li Bib a-y, sé gaspiyé i gaspiyé tan a-y ». A pa ti bèl biten nou ka touvé adan Bib-la ! Si nou ka chèché a konnèt sé bèl biten-lasa é si lè nou ka touvé-yo, nou ka éséyé lyanné-yo yonn èvè lòt, a moman-lasa, étid an nou ké vin on plézi pou nou é nou ké kontan fouyé fon an Bib-la !

16. Dè ki biten nou ké palé adan awtik-la ki ka vin la ?

¹⁶ Pou ou konprann sé bèl biten-la kè Jéova ka anségné-nou adan Pawòl a-y la, sa pa tèlman difisil. Adan awtik-la ki ka vin la nou ké ègzaminé on sijé ki enpòwtan toubònman é pou konprann sijé-lasa, fò-nou ké fouyé fon an Bib-la. Dayè, sijé-lasa ka fè pawti a sé biten-la ki pi fon la adan Bib-la. Nou ké palé dè gran tanp èspirityèl a Jéova. Pòl palé dè-y adan lèt-la i maké ba sé Ébré-la. Nou ka èspéré kè toupannan ou ké ka fouyé fon an Bib-la pou konnèt sijé-lasa pibyen, tchè a-w ké kontan toubònman !