1, 2. ¿Mbaʼéichapa iporãta jalee ha jastudia la Biblia? Emoĩmi peteĩ ehémplo.

 ÑAÑEIMAHINAMÍNA jajoguataha ñande rogarã, ¿mbaʼépa jajapose raẽta jadesidi mboyve jajoguátapa? ¿Jahechátapa peteĩ fótonte? Nahániri. Katuete jahaséta jahecha la óga, jaguatáta ijerére, jaikéta hyepýpe ha jarrevisáta káda párte pe óga. Ñaporandúta avei álgien oikuaávape mbaʼéichapa oñemopuʼã vaʼekue upe óga. Legálmente ñañehaʼãta jaikuaa entéro mbaʼe pe ógagui.

² Ñande avei ikatu jajapo upéicha jalee ha jastudia jave la Biblia. Peteĩ expérto heʼi voi: “Pe mensáhe oĩva la Bíbliape ojogua peteĩ edifísio ijyvate ha isimiénto porãvape”. ¿Mbaʼépa ikatu jajapo jaikuaa porã hag̃ua la Biblia heʼíva? Jalee pyaʼe pyaʼénteramo, sólamente jaikuaáta “umi mbaʼe primeroite ñaaprendéva Ñandejára mensáhegui” (Heb. 5:12). Ñanemanduʼami jeýna pe óga jajoguasévare. Jaikuaa porã hag̃ua jaikémante vaʼerã hyepýpe, upéicha avei, jaikuaa porã hag̃ua Ñandejára Ñeʼẽ jastudia porãmante vaʼerã. Por ehémplo jastudia hag̃ua la Biblia, ñanepytyvõta jahecháramo mbaʼéichapa peteĩ párte oñekonekta ótra pártere. Ñañehaʼã vaʼerã ñantende mbaʼépa la jagueroviáva ha avei mbaʼérepa jaguerovia upéva.

3. ¿Mbaʼépa heʼi vaʼekue apóstol Pablo umi ermanokuérape ojapo hag̃ua ha mbaʼérepa? (Efesios 3:14-19).

³ Ñantende porã hag̃ua entéro mbaʼe la Biblia heʼíva oĩ umi mbaʼe hypyʼũva jastudia porã vaʼerã. Apóstol Pablo omokyreʼỹ vaʼekue ermanokuérape oñehaʼãmbaite hag̃ua ostudia Ñandejára Ñeʼẽ ikatu hag̃uáicha ontende porã “mbaʼéichapa ipe, ipuku, ijyvate ha ipypuku pe añetegua”. Péicha haʼekuéra ikatúta  ‘oñembohapo pypuku ha ojepytaso mbarete’ (elee Efesios 3:14-19). Ñande avei tekotevẽ jajapo upéicha. Jahechami koʼág̃a mbaʼéichapa ikatu jastudia porã Ñandejára Ñeʼẽ ñantende hag̃ua la heʼiséva.

4. ¿Mbaʼépa ikatu jajapo ñañemoag̃uive hag̃ua Jehováre? Emoĩ peteĩ ehémplo.

⁴ Jastudiávo ndahaʼéi jaikuaasénteva umi mbaʼe isensillovéva omboʼéva la Biblia, síno pe espíritu sánto rupive jaikuaase umi mbaʼe hypyʼũvéva omboʼéva Ñandejára Ñeʼẽ (1 Cor. 2:9, 10). ¿Mbaʼépa ikatu jajapo upearã? Ikatu jastudia porã umi mbaʼe ñanemoag̃uivétava Jehováre. Por ehémplo, ikatu jastudia mbaʼéichapa Jehová ohechauka vaʼekue ohayhuha umi isiervokuéra yma guarépe, ha mbaʼéichapa upéva ohechauka ñanderayhuha avei ñandéve. Ikatu jahecha mbaʼéichapa Jehová oipota vaʼekue oadora chupe umi israelita, ha mbaʼéichapa oipota ñande jaadora chupe koʼág̃arupi. Térã ikatu ñainvestiga porã umi profesía Jesús okumpli vaʼekue oĩrõ guare ko yvy ape ári.

5. ¿Oĩpa álgo reinvestiga porãsevéva nde estúdio personálpe?

⁵ Unos kuánto ermáno ostudia porãva jepi la Biblia omombeʼu mbaʼe mbaʼépa oinvestiga porãseve. Umi mbaʼe heʼi vaʼekue hikuái ikatu jatopa pe rrekuádro héravape “ Umi mbaʼe ikatúva ñahesaʼỹijo ñande estúdio personálpe”. Katuete jadisfrutáta jastudiávo koʼã téma, ha upearã ikatu jaipuru pe Índice de las publicaciones Watch Tower ha Gía oipurúva testígo de Jehová otopa hag̃ua informasión. Jastudia porãvo la Biblia ñamombaretéta ñande jerovia ha ‘jaikuaa porãta Ñandejárape’ (Prov. 2:4, 5). Koʼág̃a jahechamíta unos kuánto mbaʼe hypyʼũva omboʼéva la Biblia ha ikatúva jastudia porãve.

6. ¿Mbaʼérepa Jehová rembipota siémpre osẽ porã? Emoĩ peteĩ ehémplo.

⁶ Jahechamína mbaʼépa heʼi la Biblia Ñandejára rembipotáre. Ñamoĩ chupe ñande jahaseha peteĩ lugárpe, ha upearã jaiporavo peteĩ tape ñandeguerahátava upe peve. Péro oĩramo  álgo ombotýva pe tape ikatu hína nañag̃uahẽi pe lugár jahasehápe. Péro Jehová ndahaʼéi upéicha, ikatu jaʼe hembipota orrepresentaha pe lugárpe, haʼe ikatu odesidi moõitépa ohóta, péro upearã ikatu ojagarra diferénte tape og̃uahẽ hag̃ua upépe. Ajépa ñamombaʼete Jehová oikuaauka haguére mbeguekatúpe la Biblia rupive “pe hembipota oĩva yma guive ha opa ára g̃uarãva” (Efes. 3:11). Tahaʼe haʼeháicha, Jehová siémpre osẽ porã pórke haʼe “ojapo tekotevẽva guive oñekumpli hag̃ua ivolunta” (Prov. 16:4). Ha Jehová ojapóva guive opytáta pára siémpre. ¿Mbaʼépa hína Jehová rembipota? ¿Ha mbaʼe mbaʼépa haʼe okambiaʼimíma oñekumpli hag̃ua ivolunta?

7. Adán ha Eva opuʼã rire Jehováre, ¿mbaʼe mbaʼépa haʼe okambiaʼimi okumpli hag̃ua hembipota? (Mateo 25:34).

⁷ Ñandejára heʼi vaʼekue umi primer yvypóra oiko vaʼekuépe ko yvy ape ári mbaʼépa la hembipota chupekuéra g̃uarã. Haʼe heʼi vaʼekue: ‘Penefamília retákena ha peñemboheta hetave ha pemyenyhẽ ko yvy ha peipuru. Pereko pende poguýpe entéro umi animál oikóva pe yvy tuichakuére’ (Gén. 1:28). Adán ha Eva opuʼãrõ guare Ñandejárare, oike vaʼekue pe pekádo yvyporakuéra apytépe péro upéva ndojokói vaʼekue Jehovápe okumpli hag̃ua hembipota. Haʼe okambiaʼimínte mbaʼéichapa okumplíta ohóvo ivolunta. Upévare ensegidamínte odesidíma omoĩtaha peteĩ goviérno yvágape okumplítava hembipota ko yvy ha yvyporakuérape g̃uarã (elee Mateo 25:34). Jehová ombou vaʼekue Itaʼýrape ko yvy ape ári itiempoitépe, péicha Jesús omboʼe vaʼekue la héntepe pe Rréinogui ha omeʼẽ hekove ñanderreskata hag̃ua pe pekádo ha ñemanógui. Upéi Jehová omoingove jey Jesúspe yvágape ogoverna hag̃ua Ñandejára Rréinope. Péro oĩ hetave mbaʼe ikatúva ñaaprende Ñandejára voluntágui.

8. a) ¿Mbaʼépa hína pe téma iñimportantevéva oĩva la Bíbliape? b) Ohechaukaháicha Efesios 1:8-11, ¿mbaʼe ótra kósa tuichaitereívapa Jehová ojapóta? (Ehecha pe taʼanga oĩva ko rrevísta apére).

⁸ Pe téma iñimportantevéva oĩva la Bíbliape haʼe hína: Oñesantifika Jehová réra. Upéva ojehupytýta haʼe okumplívo ohóvo hembipota ko yvýpe g̃uarã, upearã oipurúta pe Rréino ogovernahápe Jesucristo. Jehová rembipota ndaikatúi okambia, haʼe ogarantisa vaʼekue voi entéro mbaʼe haʼe heʼíva oikotaha (Is. 46:10, 11, notakuéra; Heb. 6:17, 18). Ko yvýgui oikóta peteĩ paraíso ha upépe oikóta Adán ha Eva familiare perféktotava, ha “haʼekuéra oikóta vyʼápe opa ára g̃uarã” (Sal. 22:26). Péro Jehová voluntápe oike avei ótra kósa tuichaitereíva: Enterove oĩva yvágape ha ko yvy ape ári oservíta chupe en unida. Upéicha enterove iñeʼẽrendúta Jehovápe ipyʼaite guive igovernánteramo (elee Efesios 1:8-11). ¡Ajépa ñanesorprendete mbaʼéichapa Jehová okumpli ohóvo ivolunta!

9. ¿Mbaʼe mbaʼépa ikatu jaikuaa oikotaha amo gotyove jaleévo la Biblia?

⁹ Ñaanalisamína pe profesía Jehová omeʼẽ vaʼekue hardín de Edénpe ha jatopáva Génesis 3:15-pe. b Upépe oñeñeʼẽ mbaʼéichapa oñekumplíta ohóvo Ñandejára propósito, péro umi mbaʼe oikóta kuri hetaiterei áño upe rire. ¿Mbaʼe mbaʼépa la oikóta vaʼekue? Por ehémplo, Ñandejára opromete vaʼekue Abrahánpe ifamiliare apytégui osẽtaha pe Cristo (Gén. 22:15-18). Upéi áño 33-pe, Jesúspe ojesuʼu ipytápe ojeprofetisáma haguéicha (Hech. 3:13-15). Ha pe último mbaʼe oñekumplítava ko profesíagui haʼe hína oñembochipetaha  Satanás akã, ha upéva oiko hag̃ua ofalta gueteri mas de 1.000 áño (Apoc. 20:7-10). Satanás múndo ha Jehová organisasión oiko vai oñondive, ha la Biblia omombeʼu ñandéve heta mbaʼe oikótava opávo upéva.

10. a) ¿Mbaʼe mbaʼépa oikóta koʼẽrõite? b) ¿Mbaʼéichapa ikatu jajeprepara umi mbaʼe oikótavape g̃uarã? (Ehecha pe nóta).

¹⁰ Ñapensami koʼã mbaʼe ijojahaʼỹva la Biblia oprofetisávare oikotaha. Primero, umi goviérno oanunsiáta: “¡Jaikóma pyʼaguapýpe ha segúro porã!” (1 Tes. 5:2, 3). “Derrepentete” oñepyrũta pe jehasa asy guasu, umi nasionkuéra oataka vove entéro umi rrelihión fálsape (Apoc. 17:16). Upéi oikóta heta mbaʼe oñeimoʼãʼỹva, pórke ojehecháta “pe Yvypóra Raʼýpe ouha umi arai ári, autorida ha tuicha podér reheve” (Mat. 24:30). Jesús ohusgáta umi héntepe, oseparáta umi ovecha umi kavarágui (Mat. 25:31-33, 46). Upe tiémpope Satanás osegíta ombaʼapo Jehová kóntrape. Satanás ndaijaʼeieterei rupi Jehová puévlore omomýita peteĩ grúpo de nasiónpe oataka hag̃ua umi oadorávape Jehovápe. Ko grúpo de nasiónpe la Biblia ohenói “Gog haʼéva Magog territoriopegua” (Ezeq. 38:2, 10, 11). Upe tiémpope, en algún moménto, umi unhído hembýva gueteri ko yvy ape ári ohóta yvágape. Haʼekuéra omoirũta Crístope ha ijehérsito yvagapeguápe oñorairõ hag̃ua pe gérra de Armagedónpe, upépe opáta pe jehasa asy guasu (Mat. 24:31; Apoc. 16:14, 16). c Upéi Jesucristo goviérno de mil áño oñepyrũta ogoverna ko yvy ape ári (Apoc. 20:6).

11. ¿Mbaʼépa ikatu ñahaʼarõ jaikovéta rupi pára siémpre? (Ehecha pe taʼanga).

¹¹ Koʼág̃ana ñapensa mombyryvemi. La Biblia heʼi voi ñande Apohare omoĩ hague “pe tiémpo opaveʼỹva ñane korasõme” (Ecl. 3:11). Ñapensamína mbaʼeichaitépa upéva ñanepytyvõta ha omombaretéta ñane amista Jehovándi. Pe lívro Acerquémonos a Jehová, páhina 319, ñanemopensa umi mbaʼe iporãitereívare. Heʼi péicha: “Ñañeimahinamína jaikomaha mas de 100, 1.000, millones térã hetaitereive áño. Upe tiémpope jaikuaa porãitevétama Jehovápe, péro jahechakuaáta hetaiterei  mbaʼe porã gueteri ikatuha ñaaprende chugui. Koʼág̃a ndaikatúi voi ni ñañeimahina mbaʼeichaitépa igústota ha jajapóta heta mbaʼe pe paraísope. Káda día ñañemoag̃uivéta Jehováre, ha upéva hína la iporãvéva jajapótava upépe”. Péro ñahaʼarõ aja upéva, jasegíta jastudia Ñandejára Ñeʼẽ. ¿Mbaʼépa ikatu ñaaprendeve?

12. ¿Mbaʼéichapa ikatu jahecha umi mbaʼe oĩva yvágape? Emoĩ peteĩ ehémplo.

¹² La Biblia omombeʼuʼimi ñandéve mbaʼéichapa Jehová oĩ “yvatete yvágape” (Is. 33:5). La Biblia omombeʼu umi mbaʼe ijojahaʼỹva Jehovágui ha iñorganisasióngui, pe párte oĩva yvágape (Is. 6:1-4; Dan. 7:9, 10; Apoc. 4:1-6). Por ehémplo ikatu jalee umi mbaʼe ñanesorprendéva Ezequiel ohecha vaʼekue ‘ojeavrírõ guare pe yvága ha Ñandejára ohechauka chupe peteĩ visión’ (Ezeq. 1:1).

13. Ohechaukaháicha Hebreos 4:14-16, ¿mbaʼépa nde remombaʼe Jesús ojapóvagui yvága guive?

¹³ Ñapensamína avei Jesús ojapóvare ñanderehehápe yvága guive, pórke haʼe ñande Rréi ha súmo saserdóte ñandeporiahuverekóva. Jesucristo rupive ikatu ñañemoag̃ui ‘Ñandejára trónore ha ñañemboʼe chupe, haʼe ningo imbaʼeporãiterei ñanendive’. Avei ikatu jajerure Ñandejárape ñandeporiahuvereko hag̃ua ha ñanepytyvõ hag̃ua “ñaikotevẽ jave” (elee Hebreos 4:14-16). Jajepyʼamongetákena káda día umi mbaʼe Jehová ha Jesús ojapo vaʼekuére ha ojapóvare koʼág̃a ñanderehehápe yvága guive. Opokoiterei ningo ñanderehe jahechávo mbaʼeichaitépa haʼekuéra ñanderayhu, ha upéva ñanemomýi jaservi hag̃ua Jehovápe kyreʼỹme (2 Cor. 5:14, 15).

14. ¿Mbaʼépa la iporãvéva ikatúva jajapo jahechauka hag̃ua jaagradeseha Jehová ha Jesúspe la ojapóvare? (Ehecha pe taʼanga).

¹⁴ ¿Mbaʼépa ikatu jajapo jahechauka hag̃ua  ñamombaʼetereiha Jehová ha Jesús ojapóva ñanderehehápe? Ikatu ñaipytyvõ ótrope oiko hag̃ua chugui testígo de Jehová ha Jesús disípulo. Upéva hína la iporãvéva ikatúva jajapo (Mat. 28:19, 20). Apóstol Pablo ojapo vaʼekue voi upéva ohechauka hag̃ua oagradeseha Jehovápe ha Jesucrístope. Pablo oikuaa vaʼekue Jehová oipotaha “opaichagua persóna ojesalva ha oikuaa porã pe añetegua” (1 Tim. 2:3, 4). Haʼe ombaʼapo jejopy vaʼekue opredikávo la héntepe ikatu hag̃uáicha ‘osalva algúnope jepe ijapyteguikuéra’ (1 Cor. 9:22, 23).

15. Heʼiháicha Salmo 1:2, ¿mbaʼépa ñanembovyʼáta?

¹⁵ Pe oskrivi vaʼekue Salmo oñeʼẽ peteĩ persóna ovyʼa ha osẽ porãvare entéro mbaʼépe. Heʼi hese ‘ohayhuetereiha Jehová léi ha ára ha pyhare ojepyʼamongetaha hese’ (Sal. 1:1-3). Peteĩ traduktór de la Biblia hérava Joseph Rotherham oñeʼẽ koʼã versíkulore peteĩ ilívrope. Haʼe heʼi: “Peteĩ persóna oipotaiterei vaʼerã Ñandejára ogia chupe. Upearã oheka vaʼerã igía, ostudia ha ohasa vaʼerã heta tiémpo ojepyʼamongetávo upévare”. Haʼe heʼi avei ohasa reíramo un día jaleeʼỹre la Biblia, japerde rei hague ñane tiémpo. Ñande ikatu javyʼa jaleévo la Biblia, ha upearã ikatu ñainvestiga heta detálle iñimportánteva, jahecha mbaʼéichapa umíva oho ojuehe ha noñekontradesíri. ¡Ajépa jadisfrutaite jastudiávo heta mbaʼe oĩva Ñandejára Ñeʼẽme!

16. ¿Mbaʼépa jahecháta pe artíkulo oúvape?

¹⁶ Umi mbaʼe porãite ñanemboʼéva Jehová la Biblia rupive ndahaʼéi la hasyetereíva ñantende hag̃ua. Pe artíkulo oúvape jahecháta peteĩ enseñánsa hypyʼũva: Jehová témplo espirituál tuichaitéva. Apóstol Pablo oñeʼẽ vaʼekue ko témplore pe kárta oskrivi vaʼekuépe umi hebréope. Hiʼãite ningo javyʼa jastudiávo ko téma iñinteresantetéva.