1-2. Enjira y’akamaro y’okusoma n’okuyiga Ebiblia eli ehe? Lerha omufano.

 WAZA amango oli washonda kugula enju. Bichi wakasiima kurhanga kulola embere y’okurhola eyola simikiro? Ka wakasima kulola konyine efoto y’embere y’eyola nju? Nta ngangane, wakaja kulola eyola nju masu oku masu, wanalambagiramo, wanalambagira embuga, wanalambagira omu byumba byoshi, n’okulola bwinja-bwinja ebigabi byoshi by’eyola nju. Nkabaga wakasiima kulola n’oku pla y’eyola nju y’omenya gurhe yayumbakagwa. Kweri wakashonda kurhegeera obuchakanda bw’eyola nju oli washonda kugula.

² Rhwakajira chintu chilebe chili nk’echola amango rhulirhwasoma n’okuyiga Ebiblia. Muntu muguma ogwerhe obumenyi bwe Biblia aderhere oku Ebiblia “eli nka nju nzibu-zibu enalungerere bwenene eyumbakirwe oku misinji echimire bwenene.” Bobola si, gurhe rhwakajira yirhumenya bwinja ebili omu Biblia? Nk’ofire chakusoma juba-juba, wakayiga konyine ebintu by’omusinji k’okuderha “enyigirizo z’omusinji z’ebinwa bichesibwa bya Mungu.” (Ebr. 5:12) Aliko, nka kulala byakakuhema oje “omunju” yomenya bwinja-bwinja oku biyilolere, bikuhemere oyige Ebiblia bwinja-bwinja y’oyunva loshi ebilimo. Enjira nyinja y’okuyiga Ebiblia kuli kumenya nka gurhe ebye Biblia ederhere omu chitabu chilebe bifarhene n’ebili omu chindi chitabu. Ochihangane kuyunva eby’oba ochizerere, kandi ochihangane kurhegeera empanvu zirhumire wachizera oku ebyola bili by’okuli.

3. Bichi entumwa Paulo alihemere ababo Bakristu bajirage, na bulagurhe? (Waefeso 3:14-19)

 ³ Yirhuyunva bwinja ebigabi bye Chinwa cha Mungu byoshi, hali bintu biguma rhukwanene kuyiga bwinja-bwinja. Entumwa Paulo ali hebere omurhima bene-babo na bali-babo Babakristu, bayige bwinja echinwa cha Mungu, n’echola chakabarhabere “yibagala kumenya bwinja-bwinja obugali, obule, okulungera,  n’enkumbu”  y’okuli. N’okubuzinda byanabalerhera enyungu banagwarhe “emizi n’okuyorha baserere” omu bwemere bwabo. (Osome Waefeso 3:14-19.) Nerhu birhuhemere kujira okola k’onoko. Lekaga rhulole gurhe rhwakayiga Echinwa cha Mungu yirhuyunva bwinja-bwinja oburhumwa bwakamaro bulimo.

4. Bichi rhwakajira yirhuyorha rhuli hofi na Yehova? Lerha emifano.

⁴ Rhwewe nka Bakristu, rhurhalonzeze kumenya enyigirizo z’omusinji ze Biblia konyine. Kugerera oburhabale bwe roho lichesibwa lya Mungu, rhugwerhe enyorha y’okuyiga “chiro n’ebintu bikomeere by’omu Chinwa cha Mungu.” (1 Ko. 2:9, 10) Bulagurhe orhakahwanza kujira efunzo lyawe-lyawe lyarhuma wayegera Yehova? Omufano, wakahumba bwenene wanabona gurhe Mungu aliyerekene obuzigire bwage oku bakozi bage b’omu siku zagerere, na gurhe nawe ali akuyereka obola buzigire. Kandi, wakayiga okuntu Yehova alilonzeze Abaizraeli bamuharamye n’okuhuzanya echola n’okuntu nerhu alonzeze rhumuharamye zene. Changwa nkabaga, wakayiga oku bilolere obulebi buderhere oku ebi Yesu ayenezaga omu kalamo kage n’akasi kage kamahubiri hanola oku gulu.

5. Hali omwazi wakasiima oyigeko amango oli wajira efunzo lyawe-lyawe?

⁵ Abanafunzi baguma baliri bayiga Echinwa cha Mungu n’obushiru, balibazizwe nyigirizo zihe zikomeere bakasiima bayige omu Chinwa cha Mungu. Wakabona biguma omu bibaderhere omu chisanduku “ Emyazi Wakayiga omu Funzo Lyawe-lyawe.” Wakapata busiime bunene oku bilolere okuyiga kw’eyola myazi amango wamapata oburhabale burhengere omu Index des Publications changwa Musaada Wakutafuta Habari (Oburhabale b’Okulonza Emyazi). Okuhumba bwenene omu funzo lyawe lye Biblia kwakomeza obwemere bwawe n’okukurhabala “opate obumenyi bwa Mungu.” (Mez. 2:4, 5) Rhukala kuja  rhwaganira oku nyigirizo zilebe ze Biblia zikomeere rhwakayiga bwinja-bwinja.

6. a) Ngahe epla n’omuhigo bilekene? b) Bulagurhe rhwakaderha oku omuhigo gwa Yehova oku bantu n’egulu guli “gw’esiku n’amango”? (Waefeso 3:11)

⁶ Lekaga rhulole bichi Ebiblia ederhere oku bilolere omuhigo gwa Mungu. Okugwarha epla kulekene bwenene n’okugwarha omuhigo. Rhwaka huzanya epla n’ebarabara liyerekeze emunda rhulirhwashonda kuja. Aliko, nka chintu chilebe chamafunga ebarabara, orhakahika emunda oli washonda kuja. Oku lwindi lunda rhwakahuzanya omuhigo n’emunda rhulirhwashonda kuja. Rhumenyere bwinja-bwinja emunda olugenzi lwerhu lujire, aliko birhuhemere rhugere omu njira zilengene yirhugera emunda yirhwaja. Akaba barabara liguma lifungirwe rhwakagera omu lindi. Rhugwerhe obusiime b’okurhegeera oku Yehova ali arhuyereka kubuya-buya “omuhigo [gwage] gw’esiku n’amango” guli omu Biblia. (Efe. 3:11) Mu njira nguma changwa eyindi, Yehova akachishoga enjira zilengene yayeneza omuhigo gwage n’amango moshi anagala bulala “ajirire buli chintu yichiyeneza obulonza bwage.” (Mez. 16:4) Chechirhumire byoshi Yehova anajira byabaho esiku n’amango. Omuhigo gwa Yehova guli guhe, na bichi ajirire yaguyeneza?

7. Amango abantu b’oburhanzi bakola obugamba, nka gurhe Yehova alihindamwire enjira akayenezemo omuhigo gwage? (Matayo 25:34)

⁷ Mungu ali bwirire abantu b’oburhanzi omuhigo gwage gwali guhe oku bibalolere. Bali kwanene “kuburha n’okuba banene, banayunjuze egulu, n’okulirhegeka, munarhegeke . . . na buli chilemwa chilamire” oku gulu. (Mwa. 1:28) Amango Adamu na Eva baba bigamba, bakola echaha n’okurhuma echaha chayenera oku mulala gw’abantu. Echola chirhabuzaga Yehova kuyeneza omuhigo gwage. Yehova ahindamula okuntu akayeneze ogola muhigo. Aho h’anaho, ahigirira kushimika Obwami embingu bwakayeneze omuhigo gwage gurhanzi oku bilolere abantu n’okubilolere egulu. (Osome Matayo 25:34.) Oku kasanzi Yehova abaga achishogere, arhuma oku buzigire Omugala murhanzi oku gulu, kuyigiriza abantu boshi oku bilolere Obwami, n’okuhaana akalamo kage nka nchungu yarhuyokola omu chaha n’omu lufu. Yehova afuula Yesu arhegeke omu mbingu nka Mwami w’Obwami bwa Mungu. Aliko, hachili bintu binene rhwakayiga oku bilolere omuhigo gwa Mungu.

8. a) Erhwe lye Biblia lye lihe? b) Nk’oku bifasiribwe omu chitabu cha Waefeso 1:8-11, bindi bihe Yehova nja yeneza? (Olole efoto eli oku chiganda.)

⁸ Erhwe likulu lye Biblia liderhere oku, ezino lyage limenyeswe oku anali ayeneza omuhigo gwage oku bilolere egulu kugerera Obwami bwage buli bwarhegekwa na Kristu. Omuhigo gwa Yehova gurhakahindamuka. Alaganyize oku byoshi nji byayenera bwinja-bwinja nko kw’anaderhere. (Isa. 46:10, 11, amahugulo m’eshishi; Ebr. 6:17, 18) Egulu nji lyaba paradizo, ah’oluburho lwa Adamu na Eva lushinganyanya lw’abanyakunali nji lwa “simiira akalamo esiku n’amango.” (Zb. 22:26) Aliko arhali ebyola byonyine bi Yehova nj’ayeneza. Kandi, nj’aheba abakozi bage omu buguma omu mbingu n’okugulu. Naho boshi omu mahanga nji bakenga oku bwimana Yehova nka Murhegesi wabo. (Osome Waefeso 1:8-11.) Kweri, orhasomezwe n’enjira esimisize Yehova anayeneza m’omuhigo gwage si?

9. Amango rhuli rhwasoma Ebiblia, gurhe yakarhurhabala rhubone hale oku bilolere amango mayinjire?

⁹ Waza oku bulebi Yehova aderhaga omu bustani ye Edeni buli omu Mwanzo 3:15. b Bushambere oku bintu byakarhengerere omu  kuyeneza omuhigo gwage. Aliko, ebyola bintu byakarhengerere eyi hamagera ebihumbi by’emyaka. Omufano, Mungu abwira Abrahamu oku muntu muguma w’omu chizazi chage akahikire kuba Kristu. (Mwa. 22:15-18) Naho omu mwaka gwa 33 N.K.Y, Yesu alumwa oku kasinsinya nk’oku obulebi bwabaga bwaderhere. (Mdo. 3:13-15) Echigabi chizinda ch’obola bulebi, k’okuderha, okuvunyongolwa kw’erhwe lya Shetani, nji kwayenera enyuma wa myaka erhalukikire 1 000 omu mango mayinjire. (Ufu. 20:7-10) Kandi Ebiblia erhumenyeseze bintu binene oku bilolere ebi nji byarhengerera ok’obushombanyi buli ahagarhi k’egulu lya Shetani n’olubaga lwa Yehova buli bwahikira oku buzinda.

10. a) Bichi byarhengerera hanola hofi-hofi? b) Nka gurhe rhwaka rheganya obwenge n’omurhima gwerhu? (Olole amahugulo m’eshishi.)

¹⁰ Waza oku bintu bisomeze bwenene byarhengerera Ebiblia yabaga yalebere. Ech’oburhanzi, amashanja nji majira etangazo “ly’omurhula n’obubegere!” (1 Te. 5:2, 3) “Aho han’aho,” amalibuko makulu manarhondera amango amashanja marhera amadini moshi m’obubeshi. (Ufu. 17:16) Enyuma waho, nkabaga nji harhengerera ebintu bisomeze bwenene by’okuyinja “kwa Mwene-omuntu omu bichu by’embingu eyagwerhe emisi n’abukuuze bunene.” (Mt. 24:30) Yesu nj’achira amashanja olubanja, omu kuheba entama olwage lunda n’empene olwage lunda. (Mt. 25:31-33, 46) Mw’agola mango Shetani arhakayorha akunjire efune konyine. Bulala anashomba bwenene olubaga lwa Yehova, nj’ashumika amashanja machihebere haguma, kʼokuderha Gogu w’echihugo cha Magogu arhere abantu ba Yehova. (Eze. 38:2, 10, 11) Mu mango maguma ntya, abashigwa bayorhere banaja embingu n’okuba haguma na Kristu n’abasoda bage b’embingu, k’okuderha bamalayika, yibalwa evita lya Armagedoni, echigabi chizinda ch’amalibuko makulu. c (Mt. 24:31; Ufu. 16:14, 16) Naho Oburhesegesi bwa Kristu bwa Myaka Chihumbi bwanarhondera kurhambula egulu.—Ufu. 20:6.

11. Bichi echilagane ch’akalamo k’esiku n’amango chikumalire? (Olole n’efoto.)

¹¹ Jaga wawaza oku mango mawe mayinjire enyuma w’eyola myaka 1 000. Ebiblia ederhere oku Omulemi werhu “ahebere chiro n’enyorha y’okulama esiku n’amango omu mirhima  [yerhu].” (Muh. 3:11) Waza bichi ebyola biderhere ku woyo n’obwira bwawe haguma na Yehova. Echitabu Mkaribie Yehova (Oyegere Yehova) bukurasa 319, bugwerhe ebila binwa bisimisize bwenene: “Enyuma y’okulama amagana, ebihumbi, emiliyoni, chiro n’emiliyare y’emyaka, nji rhwamenya binene oku bilolere Yehova Mungu kulusha ebirhumenyere zene. Aliko nji rhwachiyunva oku hachiri bindi bintu binene bwenene bisomeze nji rhwaba rhuchikenere kuyiga oku bimulolere. . . . Rhurhakagala kuwaza chiro okuntu akalamo nji kaba kenja kanasimisize bwenene omu paradizo. N’echintu chisimisize bwenene, buli mango nji kwaba kuyegeera Yehova.” Oku akola kasanzi kanahika oku rhunali rhwagenderera kuyiga Echinwa cha Mungu, bichi bindi rhwakayiga?

12. Nka gurhe rhwakalola enyanya omu mbingu? Lerha omufano.

¹² Ebiblia erhuyerekere oku bugeke bichi wakabona nka oli ahaburhambi bwa Yehova “enyanya ahantu halungerere.” (Isa. 33:5) Ebiblia erhubwirire ebintu bisomeze oku bilolere Yehova n’oku bilolere echigabi ch’embingu ch’olubaga lwage. (Isa. 6:1-4; Da. 7:9, 10; Ufu. 4:1-6) Omufano, rhwakasoma oku bintu bisomeze Ezekieli abonaga amango “embingu zifungulwa [ahwanza] kubona ebibonekezi bya Mungu.”—Eze. 1:1.

13. Gurhe onachiyunva oku bilolere ebi Yesu ali ajira omu mbingu nk’oku biyerekenwe omu chitabu cha Waebrania 4:14-16?

¹³ Rhuwaze oku bi Yesu ali arhujirira omu mbingu, yewe nka Mwami ogwerhe akababaro onali Mudahwa Mukulu. Kugerera Yesu rhwakayegera “echirhi ch’Obwami cha [Mungu] ch’olukogo lurhakwanenwe” omu sala n’oku muhema obubabale n’oburhabale “oku kasanzi kakwanene.” (Osome Waebrania 4:14-16.) Buli lusiku rhukwanene kuwaza oku bilolere ebi Yehova na Yesu barhujirire, n’oku bibagenderere kurhujirira kurhenga embingu. Obuzigire barhugwerheko  bukwanene kuhuma oku murhima gwerhu bwenene n’oku rhushunika rhugwarhe omwete omu kukolera Yehova.—2 Ko. 5:14, 15.

14. Njira ehe nguma omu njira z’akamaro rhwakayerekanamo oku rhugwerhe eshukrani ku Yehova na Yesu? (Olole n’amafoto.)

¹⁴ Njira nguma omu njira z’akamaro rhwakayerekanamo oku rhugwerhe eshukrani ku Mungu werhu n’Omugala, kuli kuchihangana kurhabala abandi babe Bahamirizi ba Yehova n’okuba banafunzi ba Yesu. (Mt. 28:19, 20) Echola che ntumwa Paulo alijirire omu kuyerekana eshukrani yage ku Mungu na ku Kristu. Paulo alimenyere oku obulonza bwa Yehova buli oku “abantu babuli buuko bachunguke banagwarhe obumenyi burhagwerhe magosa.” (1 Ti. 2:3, 4) Alikolere bwenene omu kasi kage k’amahubiri y’arhabala bantu banene “koshi akagala y’achungula baguma.”—1 Ko. 9:22, 23.

15. Nk’oku olwandiko lwa Zaburi 1:2 luyerekene, bichi byakarhulerhera obusiime?

¹⁵ Omwandisi we zaburi y’oburhanzi aderhere oku omuntu ogwerhe obusiime, n’onayungukirwa omu byali ajira, ali olala “onasimiswa n’esheria ya Yehova” ‘n’okukengera oku sheria yage ezuba n’ebudufu.’ (Zb. 1:1-3; amahugulo m’eshishi.) Omutafsiri muguma we Biblia aliderhere oku bilolere eyola mistari oku omuntu akwanene “kusiima bwenene obwerekezi bwa Mungu, n’echola chanarhuma abulonza, abuyige n’okugeza kasanzi kanene eyi ali abuwazako.” Ashubire kuderha “oku nk’olusiku lugerere eyi omuntu arhasomere Ebiblia, olola lusiku eyi lwafire busha.” Wakagwarha omwishingo omu kuyiga bintu binene omu Biblia, n’okubona okuntu bifarhene. Buli busiime bunene oku yunva bwinja-bwinja Echinwa cha Mungu!

16. Bichi rhwaganirako omu mwazi gwakulikiraho?

¹⁶ Obukweri busiimisize Yehova anarhuyigiriza omu Chinwa chage, burhakomere bwenene mpu rhugambwe kubuyunva. Omu mwazi gwakulikiraho, rhwaganira ku buguma omu bukweri bukomere k’okuderha ehekalu lizibu-zibu lye kiroho lya Yehova eli Paulo aderhagako omu maruba mage ayandikiraga Abakristu Babaebrania. Okuganira kw’ogola mwazi kujage kwakulerhera busiime bunene.