1-2. Piav seb yuav nyeem thiab kawm Vajlugkub li cas thiaj zoo.

 YOG tias koj txiav txim siab yuav mus yuav ib lub tsev, koj yuav ua li cas xwb? Koj puas xav mus saib kiag lub tsev ua ntej koj yuav los sis koj pom lub tsev daim duab xwb twb txaus koj siab lawm? Qhov tseeb koj yeej xav mus saib lub tsev tso, seb txhua chav zoo li cas, loj li cas, dav li cas thiab sab nraud zoo li cas ua ntej koj yuav. Tej zaum koj kuj yuav xav saib daim qauv seb thaum lawv ua lub tsev lawv ua zoo npaum li cas.

² Thaum peb nyeem thiab kawm phau Vajlugkub, peb kuj ua tib yam li ntawd. Ib tug neeg tshawb fawb phau Vajlugkub hais tias phau Vajlugkub zoo ib yam li “ib lub tsev loj loj, siab siab, thiab cov ncej txhos tob tob.” Yuav ua li cas peb thiaj paub txhua yam uas nyob hauv phau Vajlugkub? Yog koj nyeem nrawm nroos xwb ces koj tsuas paub tej yam ntiav ntiav xwb. (Henplais 5:12) Yog li ntawd, koj yuav tsum ua zoo li thaum koj mus saib lub tsev es mus tshuaj sab hauv kom zoo zoo. Ib yam uas yuav pab tau koj to taub phau Vajlugkub zoo yog ua tib zoo kawm seb tej uas nyob hauv phau Vajlugkub sib dhos li cas. Rau siab kawm kom koj paub zoo tias qhov tseeb yog dab tsi thiab vim li cas koj ho ntseeg qhov ntawd.

3. Tus tub txib Povlauj txhawb cov Khixatias ua dab tsi thiab yog vim li cas? (Efexus 3:14-19)

³ Yuav kom peb to taub Vajtswv Txoj Lus txhua fab, peb yuav tau ua tib zoo kawm kom txhij kom txhua. Tus tub txib Povlauj txhawb nws cov kwv tij nkauj muam Khixatias kom rau siab ntso kawm Vajtswv Txoj Lus kom lawv paub tias qhov tseeb “dav li cas, ntev li cas, siab li cas thiab tob li cas.” Yog lawv ua li no ces lawv txoj kev ntseeg yuav zoo “ib yam li tsob ntoo uas tej cag ntsia av tob tob.” (Nyeem Efexus 3: 14-19.) Peb kuj yuav tau ua ib yam li ntawd thiab. Cia peb mus kawm seb peb yuav kawm Vajtswv Txoj Lus li cas peb thiaj to taub zoo.

4. Piav seb yuav ua li cas peb thiaj nrog Yehauvas sib raug zoo.

⁴ Peb uas yog cov Khixatias, peb tsis xav kom peb to taub tej ntiav ntiav hauv phau Vajlugkub xwb. Vajtswv twb muab nws lub hwj huam dawb huv los pab peb ces peb yeej kawm tau tej yam tob tob txog Vajtswv. (1 Kauleethaus 2:9, 10) Xws li, koj kuj mus tshawb nrhiav seb Vajtswv hlub cov uas teev tiam nws yav thaum ub li cas. Yog koj kawm li no ces koj yuav pom tias Yehauvas kuj hlub koj npaum li cas thiab. Koj kuj mus kawm seb Yehauvas xav kom cov Ixayees pe hawm nws li cas. Yog koj ua li no ces koj yuav pom tias Yehauvas xav kom peb pe hawm nws li ntawd niaj hnub nim no thiab. Los sis koj kuj ua tib zoo kawm txog cov faj lem uas hais txog Yexus lub neej thiab qhov uas nws mus tshaj tawm txoj xov zoo.

5. Puas muaj ib yam uas koj xav ua tib zoo tshawb nrhiav txog?

⁵ Cov uas rau siab tshawb nrhiav hais txog tej uas lawv xav kawm ntxiv kom lawv haj yam to taub zoo. Tej uas lawv hais ntawd nyob rau hauv lub ntsiab “ Cov Ntsiab Rau Koj Tshawb Nrhiav.” Phau Yehauvas Cov Tim Khawv Phau Ntawv Tshawb Nrhiav Vajlugkub yuav pab koj tshawb nrhiav ntxiv txog cov ntsiab ntawd. Yog koj kawm tej tob tob hauv phau Vajlugkub ces yuav pab tau koj txoj kev ntseeg, thiab koj yuav “paub tseeb hais tias Vajtswv yog tus zoo li cas.” (Pajlug 2:4, 5) Tam sim no cia peb mus kawm txog tej yam tob tob hauv phau Vajlugkub.

6. (1) Piav seb vim li cas Yehauvas thiaj ib txwm ua tau raws li nws lub ntsiab. (2) Ua li cas Yehauvas lub ntsiab rau neeg thiab lub ntiaj teb yuav nyob tau mus ib txhis? (Efexus 3:11)

⁶ Cia peb muab ua piv txwv seb phau Vajlugkub hais li cas txog Vajtswv lub ntsiab. Tib neeg thaum lawv npaj mus rau ib qho chaw  twg ces tsuas taug tib txoj ke xwb. Thaum muaj dab tsi thaiv txoj kev ntawd lawd ces mus tsis txog chaw. Tiam sis Yehauvas tsis zoo li tib neeg. Yehauvas lub ntsiab zoo li ib qho chaw. Thaum nws txiav txim siab mus rau qhov chaw ntawd, nws yuav mus txoj kev twg los yeej mus txog. Peb zoo siab uas Yehauvas twb qhia peb txog nws lub ntsiab hauv phau Vajlugkub zuj zus los lawm. Yehauvas muaj ntau txoj kev los ua kom muaj tiav raws li nws lub ntsiab. (Pajlug 16:4) Thiab thaum kawg tej uas Yehauvas ua yuav nyob mus ib txhis. Ua li Yehauvas lub ntsiab yog dab tsi, thiab nws tau hloov li cas kom muaj tiav raws li nws lub ntsiab?

7. Tom qab thawj nkawm niam txiv tsis mloog Vajtswv lus, nws tau ua li cas kom muaj tiav raws li nws lub ntsiab? (Mathais 25:34)

⁷ Vajtswv qhia thawj nkawm niam txiv tias nws lub ntsiab yog li cas. Vajtswv hais tias: “Neb cia li muaj tub muaj ki kom coob, neb tej xeebntxwv yuav huamvam mus nyob thoob plaws txhua qhov chaw kom puv ntiajteb thiab lawv yuav kav tagnrho lub ntiajteb . . . thiab txhua tsav yam tsiaj uas nyob hauv ntiajteb.” (Chivkeeb 1:28) Thaum Adas thiab Evas nkawd tsis mloog Vajtswv lus, thiaj ua rau tib neeg muaj kev txhaum. Txawm li ntawd los Yehauvas lub ntsiab tsis hloov. Nws nrhiav dua lwm txoj kev los mus ua kom muaj tiav raws li nws lub ntsiab. Nws tau txiav txim siab tsa ib lub Nceeg Vaj saum ntuj los mus ua kom muaj tiav raws li nws lub ntsiab rau tib neeg thiab lub ntiaj teb ntev los lawm. (Nyeem Mathais 25:34.) Thaum txog caij txog nyoog, Yehauvas thiaj tau xa nws tib leeg Tub los rau hauv lub ntiaj teb los qhia tib neeg txog lub Nceeg Vaj thiab muab nws txoj sia los txhiv tib neeg. Tom qab ntawd Yehauvas thiaj tsa Yexus ciaj sawv rov los mus saum ntuj mus kav Vajtswv lub Nceeg Vaj. Muaj ntau yam txog Vajtswv lub ntsiab uas peb yuav tau paub.

8. (1) Phau Vajlugkub lub ntsiab yog dab tsi? (2) Raws li Efexus 1:8-11, Yehauvas lub ntsiab thaum kawg yog dab tsi? (Saib daim duab ntawm lub khaum.)

⁸ Lub ntsiab loj hauv phau Vajlugkub yog Yehauvas yuav siv lub Nceeg Vaj uas Khetos kav los ua kom muaj tiav raws li nws lub ntsiab rau lub ntiaj teb es daws nws lub npe ntawm tej kev iab hiam. Yehauvas lub ntsiab yeej tsis hloov. Nws cog lus tias txhua yam uas nws tau hais lawd yeej yuav muaj xwb xwb li. (Yaxayas 46:10, 11; Henplais 6:17, 18) Lub ntiaj teb yuav hloov ua ib lub vaj kaj siab rau Adas thiab Evas nkawd cov xeeb leej xeeb ntxwv uas zoo tiav tiav lawd tau nyob “kaj siab lug mus ib txhis.” (Phau Ntawv Nkauj 22:26) Tsis tas li ntawd xwb, nws lub ntsiab thaum kawg yog kom txhua tus uas nyob saum ntuj thiab hauv ntiaj teb nyob sib koom siab. Thaum ntawd txhua tus yuav muab siab npuab Yehauvas uas yog tus kav lawv. (Nyeem Efexus 1:8-11.) Qhov uas Yehauvas yuav ua kom muaj tiav raws li nws lub ntsiab yog ib qho uas zoo tshaj plaws li puas yog?

9. Thaum peb nyeem phau Vajlugkub, peb pom hov deb mus rau yav tom hauv ntej?

⁹ Xav txog zaj faj lem Yehauvas tau hais nyob rau hauv lub vaj Edees uas nyob hauv Chivkeeb 3:15. b Zaj faj lem ntawd qhia txog tej uas Yehauvas yuav siv los ua kom muaj tiav raws li nws lub ntsiab. Tiam sis tej ntawd yuav yog ntau txhiab xyoo mam li muaj tiav. Zaj lus faj lem no pib thaum Vajtswv cog lus rau Anplahas tias nws ib tug xeeb  ntxwv yuav yog tus Khetos. (Chivkeeb 22:15-18) Ces xyoo 33 tom qab Yexus, Yexus lub luj taws thiaj raug tom li tau hais tseg. (Tes Haujlwm 3:13-15) Tiam sis qhov uas zaj faj lem tau hais tias Xatas lub taub hau yuav raug tsoo kom ntsoog tseem tshuav tshaj li 1,000 xyoo mam li muaj tshwm sim. (Tshwmsim 20:7-10) Thiab phau Vajlugkub kuj qhia tias thaum kawg txoj kev yeeb ncuab ntawm Xatas lub sim ceeb thiab Yehauvas lub koom haum yuav xaus li cas.

10. (1) Tej twg yuav tshwm sim sai sai no? (2) Peb yuav npaj peb lub siab lub ntsws li cas? (Saib cov taw ntawv.)

¹⁰ Xav txog tej uas phau Vajlugkub qhia tias yuav muaj tshwm sim no. Xub thawj, tej teb chaws yuav tshaj tawm tias “peb tau zoo noj thiab tau zoo nyob kawg li lawm.” (1 Thexalaunikes 5:2, 3) “Tamsim ntawd,” tej teb chaws yuav sawv tawm tsam kev ntseeg cuav ces lub sij hawm muaj kev txom nyem loj kawg nkaus yuav pib. (Tshwmsim 17:16) Tom qab ntawd, tej zaum yuav muaj pov thawj saum ntuj qhia tias “neeg Leej Tub muaj hwj chim ci ntsa iab nrog huab nrog cua saum ntuj los.” (Mathais 24:30) Thaum ntawd, Yexus yuav txiav txim rau tib neeg, yuav muab cov yaj cais ntawm cov tshis. (Mathais 25:31-33, 46) Lub sij hawm ntawd, Xatas yuav tawm tsam Yehauvas. Vim Xatas ntxub Yehauvas cov tib neeg heev, nws yuav tshoov kom ib tsoom teb chaws uas phau Vajlugkub hu ua Nkos uas nyob hauv teb chaws Mankos sawv tawm tsam cov pe hawm Yehauvas. (Exekees 38:2, 10, 11) Lub sij hawm no, Yehauvas yuav sau cov xaiv tseg uas tseem nyob hauv ntiaj teb mus saum ntuj mus nrog Khetos thiab cov tub txib saum ntuj ntaus ntsuj rog Amankedoos. c (Mathais 24:31; Tshwmsim 16:14, 16) Thaum ntawd yuav pib 1,000 xyoo uas Khetos kav.​—Tshwmsim 20:6.

11. Qhov uas nyob mus ib txhis zoo li cas rau koj xwb? (Saib daim duab.)

¹¹ Xav txog ntau xyoo rau yav tom hauv ntej. Phau Vajlugkub qhia tias peb tus Tswv Tsim “muab qhov uas nyob mus ib txhis tsis kawg tso rau hauv neeg lub siab.” (Tej Lus Qhia 3:11) Xav seb qhov no zoo npaum li cas rau  koj thiab koj txoj kev sib raug zoo nrog Yehauvas. Thaum peb nyob txhiab txhiab vam vam xyoo lawm, peb yuav paub Vajtswv Yehauvas zoo tshaj peb paub tam sim no. Txawm li ntawd los peb yuav pom tias tseem tshuav ntau yam uas peb tseem tsis tau paub txog Yehauvas. Peb yeej xav tsis tau tias lub neej nyob hauv lub vaj kaj siab yuav lom zem thiab zoo npaum li cas. Qhov uas zoo tshaj plaws ces yog ib hnub dhau hnub, peb yuav paub Yehauvas zoo zuj zus ntxiv. Ua li lub sij hawm no thaum peb kawm Vajtswv Txoj Lus, zoo rau peb kawm txog tej twg ntxiv?

12. Piav seb peb yuav ntsia mus rau puag saum nruab ntug li cas.

¹² Vajtswv Txoj Lus qhia me ntsis txog “lub chaw siab” uas yog Yehauvas qhov chaw nyob tias zoo li cas. (Yaxayas 33:5) Phau Vajlugkub qhia ntau yam zoo txog Yehauvas thiab nws lub koom haum feem saum ntuj. (Yaxayas 6:1-4; Daniyees 7:9, 10; Tshwmsim 4:1-6) Xws li, peb kuj mus nyeem txog tej yam uas Exekees pom thaum lub “ntuj txawm qhib, ces [nws] ua yogtoog pom Vajtswv los qhia rau [nws].”​—Exekees 1:1.

13. Raws li Henplais 4:14-16, koj xav li cas txog Yexus tes hauj lwm saum ntuj?

¹³ Xav txog Yexus tes hauj lwm saum ntuj thaum uas nws ua Vaj Ntxwv thiab ua Pov Thawj Hlob. Vim muaj Yexus, peb thiaj mus cuag tau Vajtswv thiab thov kom nws khuv leej peb thiab pab peb thaum peb cheem tsum nws txoj kev pab. (Nyeem Henplais 4:14-16.) Txhua txhua hnub, peb yuav tau xav txog tej uas Yehauvas thiab Yexus nkawd tau ua rau peb niaj hnub nim no. Yehauvas thiab Yexus nkawd hlub peb kawg li. Vim li no peb yuav tau kub siab lug ua Yehauvas tes hauj lwm thiab pe hawm nws.​—2 Kauleethaus 5:14, 15.

14. Yam zoo tshaj plaws uas peb ua tau los qhia tias peb ris Yehauvas thiab Yexus nkawd txiaj ntsig yog dab tsi? (Saib daim duab.)

 ¹⁴ Yam zoo tshaj plaws uas peb ua tau los qhia tias peb ris Yehauvas thiab Yexus nkawd txiaj ntsig yog mus pab lwm tus los pe hawm Yehauvas thiab los ua Yexus cov thwj tim. (Mathais 28:19, 20) Povlauj tau ua li no los qhia tias nws ris Vajtswv thiab Khetos nkawd txiaj ntsig. Povlauj paub tias qhov uas Yehauvas lub siab nyiam yog “kom tej neeg sawvdaws nyias dim nyias lub txim thiab xav kom lawv paub qhov tseeb.” (1 Timautes 2:3, 4) Povlauj rau siab ntso ua Yehauvas tes hauj lwm kom “pab tau qee leej dim.”​—1 Kauleethaus 9:22, 23.

15. Raws li Phau Ntawv Nkauj 1:2, dab tsi yuav ua rau peb zoo siab?

¹⁵ Tus uas sau thawj zaj nkauj hauv phau ntawv nkauj piav tias tus uas ua lub neej zoo siab thiab vam meej yog tus “uas hwm [Yehauvas] txoj Kevcai thiab kawm txoj kevcai ntawd nruab hnub hmo ntuj.” (Phau Ntawv Nkauj 1:1-3) Muaj ib tug uas txhais phau Vajlugkub tau hais txog peb nqes Vajlugkub no tias tus uas “xav kom Vajtswv coj nws txoj hau kev, tus ntawd yuav tsum rau siab nrhiav Vajtswv Txoj Lus, kawm Vajtswv Txoj Lus, thiab siv sij hawm los xav txog Vajtswv Txoj Lus.” Nws tau hais ntxiv tias “yog hnub twg ib tug tsis nyeem phau Vajlugkub ces hnub ntawd yog ib hnub uas nws muab xuam pov tseg.” Thaum koj kawm phau Vajlugkub, zoo rau koj ua tib zoo kawm seb tej uas koj kawm sib dhos li cas. Yog koj ua li no ces koj yuav muaj kev zoo siab thaum koj kawm phau Vajlugkub!

16. Zaj tom ntej peb yuav tham txog dab tsi?

¹⁶ Qhov tseeb uas Yehauvas qhia peb hauv nws Txoj Lus yeej tsis yog ib qho nyuaj nyuaj rau peb to taub. Zaj tom ntej, peb yuav kawm txog Yehauvas lub tuam tsev ntawm sab kev ntseeg uas Povlauj tau piav hauv nws tsab ntawv rau cov ntseeg uas yog neeg Henplais. Thaum koj kawm txog lub ntsiab no yeej yuav ua rau koj zoo siab heev.